ជាការពិតណាស់មនុស្សភាគច្រើនប្រហែលជាគិតថា ផែនដីរបស់យើងគឺមានរាងមូល នៅពេលដែលមើលពីចំនុចមួយនៃលំហ ទោះជាយ៉ាងណាការសន្និដ្ឋាននេះគឺមិនត្រឹមត្រូវនោះទេ។ យោងតាមការសិក្សាបច្ចុប្បន្នរបស់អង្គការ NASA បានរកឃើញថា ផែនដីរបស់យើងគឺមិនមានរាងមូលល្អឥតខ្ចោះនោះទេ ពោលគឺវាមានរាងជាពងក្រពើ ដោយសារតែកម្លាំង centrifugal ដែលបង្កើតឡើងដោយការបង្វិលថេររបស់ផែនដី ធ្វើឱ្យអង្កត់ផ្ចិតនៃភពមួយនេះប៉ោងនៅខ្សែអេក្វាទ័រ មានន័យថាផែនដីរបស់យើងគឺមានដុំពកតូចមួយ ដូច្នេះវាមិនមានរាងមូលល្អឥតខ្ចោះឡើយ ។

នេះបើយោងតាមការចុះផ្សាយរបស់ National Ocean Service ក៏បានឱ្យដឹងទៀតថា ដើម្បីដឹងថាផែនដីពិតជាមិនមែនមានរាងមូល យើងត្រូវដឹងពីនិយមន័យនៃភពជាមុនសិន ពាក្យថាភពត្រូវតែមានរាងមូល ដូច្នេះវត្ថុដែលមានទម្ងន់លើសពី ១០ ទៅ ២៣ គីឡូក្រាមជាធម្មតាត្រូវបានគេចាត់ទុកថាជាភព ប្រសិនបើពួកគេបំពេញតាមលក្ខណៈវិនិច្ឆ័យផ្សេងទៀតដូចជាគន្លងច្បាស់លាស់។ ភពនានាបង្កើតនៅពេលដែលបំណែកនៃវត្ថុបុកគ្នាតាមពេលវេលានៅក្នុងថាស protoplanetary ជុំវិញផ្កាយ បង្កើតបានជាចង្កោមដ៏ធំមួយ។ នៅពេលដែលម៉ាស់កើនឡើង ទំនាញរបស់ភពថ្មីក៏កើនឡើងផងដែរ ដែលទាក់ទាញសម្ភារៈកាន់តែច្រើន។

នៅពេលដែលម៉ាស់រលាយឈានដល់ទំហំចាំបាច់ ឥទ្ធិពលនៃទំនាញនឹងរលាយចូលទៅក្នុងវត្ថុរាងជារង្វង់ ជាហេតុធ្វើឱ្យភពផ្សេងទៀតនៅក្នុងប្រព័ន្ធព្រះអាទិត្យមានរាងមូលល្អឥតខ្ចោះ។ ទោះជាយ៉ាងណាអង្កត់ផ្ចិតនៃភពផែនដីរបស់យើងប៉ោងនៅខ្សែអេក្វាទ័រ ដោយសារតែកម្លាំង centrifugal ដែលបង្កើតឡើងដោយការបង្វិលថេររបស់ផែនដី មានន័យថាមូលហេតុដែលផែនដីមិនមានរាងមូលល្អឥតខ្ចោះដូចភពដទៃទៀត គឺដោយសារផែនដីជាភពមានជីវិត ខណៈដែលភ្នំកើនឡើងជិត ៣០,០០០ ហ្វីត និងលេណដ្ឋានមហាសមុទ្រដែលលោតលើកម្ពស់ ៣៦,០០០ ហ្វីត ជាហេតុធ្វើឱ្យខូចទ្រង់ទ្រាយរូបរាងរបស់ផែនដី។ លើពីនេះការប្រែប្រួលបន្តិចបន្តួចនៅក្នុងវាលទំនាញផែនដីក៏បណ្តាលឱ្យមានភ្នំ និងជ្រលងភ្នំអចិន្ត្រៃយ៍ក្នុងផ្ទៃមហាសមុទ្រលើសពី ៣០០ ហ្វីតផងដែរ។

ទន្ទឹមនឹងនេះរូបរាងរបស់ផែនដីតែងតែផ្លាស់ប្តូរជាញឹកញាប់ ដែលការផ្លាស់ប្តូរនេះមានលក្ខណៈតាមកាលកំណត់ ដូចទៅនឹងជំនោរប្រចាំថ្ងៃ ដែលប៉ះពាល់ដល់ទាំងមហាសមុទ្រ និងសំបកផែនដី។ ពេលខ្លះការផ្លាស់ប្តូរគឺយឺត និងស្ថិរភាព ដូចជាការរសាត់នៃបន្ទះ tectonic ឬការងើបឡើងវិញនៃសំបក បន្ទាប់ពីផ្ទាំងទឹកកកដ៏ធ្ងន់មួយបានរលាយ។ ហើយជួនកាលរូបរាងរបស់ភពផែនដីផ្លាស់ប្តូរតាមរបៀបហិង្សា និងជាដំណាក់កាលអំឡុងពេលព្រឹត្តិការណ៍ដូចជាការរញ្ជួយដី ការផ្ទុះភ្នំភ្លើង ឬការវាយប្រហារដោយអាចម៍ផ្កាយជាដើម។ នេះមានន័យថាផែនដីរបស់យើងគឺពិតជាមិនមានរាងមូលនោះទេ ពោលគឺវាមានរាងជាពងក្រពើ៕

ប្រទេសឡាវ ៖ ក្រសួងការងារ សុខុមាលភាព និងសង្គមឡាវ កំពុងតែពិចារណាដំឡើងប្រាក់ឈ្នួលរបស់ពលរដ្ឋមានចំណូលទាប ដែលធ្វើការក្នុងផ្នែកផលិតកម្ម, សេវាកម្ម និងកសិកម្ម ដើម្បីឱ្យប្រាក់ខែរបស់ពួកគេអាចទប់ទល់នឹងការចំណាយប្រចាំថ្ងៃ ។ បច្ចុប្បន្ន ទំនិញគ្រប់ប្រភេទលក់នៅតាមផ្សារ និងសេវាកម្ម មានតម្លៃកើនឡើងខ្ពស់នៅទូទាំងប្រទេស ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី២ ខែសីហា ឆ្នាំ២០២៤ ។

សារព័ត៌មានស៊ីនហួររាយការណ៍ថា រដ្ឋាភិបាលឡាវ និងអាជីវកម្មផ្សេងៗបានដំណើរការងារដោយប្រើប្រាស់ថវិកាមានកំណត់យ៉ាងខ្លាំង ហើយធ្វើឱ្យរដ្ឋាភិបាលឡាវព្យាយាមដោះស្រាយបញ្ហាតម្លៃប្រេងឥន្ធនៈ និងទំនិញកើនឡើងខ្ពស់ជាបន្តបន្ទាប់ ។ លើសពីនេះ ប្រាក់គីបរបស់ឡាវបានធ្លាក់ថ្លៃ ហើយវាធ្វើឱ្យប៉ះពាល់ដល់សេដ្ឋកិច្ច និងជីវភាពពលរដ្ឋយ៉ាងខ្លាំង ។

ហេតុនេះ ក្រសួងការងារ, សហព័ន្ធសហជីពឡាវ ព្រមទាំងសភាពាណិជ្ជកម្ម និងឧស្សាហកម្មឡាវ បានធ្វើការពិភាក្សាគ្នាស្វែងរកវិធីដោះស្រាយបញ្ហាទាំងនេះ ដោយការដំឡើងប្រាក់ឈ្នួលដល់ពលរដ្ឋមានចំណូលទាប ។ ក្រៅពីនេះ ស្ថាប័នពាក់ព័ន្ធក៏បានពិភាក្សាអំពីការជួលកម្លាំងពលកម្មបន្ថែម និងជំរុញផ្នែកផលិត ជាពិសេស ក្នុងឧស្សាហកម្មការផលិត ។

ការពិភាក្សាគ្នានេះដើម្បីឈានទៅរកការដោះស្រាយបញ្ហាសម្រាប់ជាប្រយោជន៍ដល់និយោជិក, និយោជក និងផ្តល់ប្រយោជន៍ទូទៅសម្រាប់រដ្ឋាភិបាល ។ រីឯលទ្ធផលការពិភាក្សានឹងផ្ញើទៅទីស្តីការនាយករដ្ឋមន្ត្រីពិចារណាបន្តទៀត ។

គេសង្កេតឃើញថា ពលរដ្ឋឡាវតែងតែត្អូញត្អែរក្នុងបណ្តាញសង្គមថា ការធ្វើការនៅប្រទេសឡាវទទួលបានប្រាក់ខែតិចខ្លាំង បើធៀបនឹងប្រទេសនានាក្នុងតំបន់អាស៊ីអាគ្នេយ៍ ។ ដូច្នេះហើយ ទើបពលរដ្ឋឡាវរស់នៅតាមជនបទសម្រេចចិត្តចាកចោលស្រុកកំណើតទៅធ្វើការនៅក្រៅប្រទេស ដើម្បីផ្ញើប្រាក់មកផ្គត់ផ្គង់ជីវភាពគ្រួសារ ៕

ប្រទេសឥណ្ឌា ៖ មនុស្សភាគច្រើនបានជ្រាបហើយថា ឥណ្ឌា គឺជាប្រទេសមួយមានចំនួនពលរដ្ឋច្រើនមហាសាលលើពិភពលោក ហើយចំនួនពលរដ្ឋដ៏ច្រើននេះ ធ្វើឱ្យរដ្ឋាភិបាលឥណ្ឌាត្រូវដោះស្រាយបញ្ហាផ្សេងៗជានិច្ច ។ បញ្ហាមួយក្នុងចំណោមបញ្ហាទាំងអស់ដែលតែងតែកើតឡើងនោះ គឺការប្រជ្រៀតគ្នាធ្វើដំណើរតាមរថភ្លើងរបស់អ្នកដំណើរ ។

រថភ្លើងនៅឥណ្ឌាត្រូវបានគេស្គាល់ច្រើន និងល្បីល្បាញពេញពិភពលោក ដោយសារតែមានអ្នកដំណើរច្រើនលើសលប់ ជាពិសេស នៅពេលពួកគេមានការប្រញាប់ ។ រថភ្លើងទាំងនេះអាចដឹកអ្នកដំណើររាប់លាននាក់ក្នុង១ថ្ងៃ ពីព្រោះពលរដ្ឋឥណ្ឌាភាគច្រើននិយមជិះរថភ្លើង ដូចជា ៖ អ្នកនៅតំបន់ជនបទ ខណៈការដឹកជញ្ជូនអ្នកដំណើរតាមមធ្យោបាយផ្សេងមានកំណត់ ។

ពេលថ្ងៃឈប់សម្រាក ឬថ្ងៃបុណ្យជាតិសំខាន់ៗ គេឃើញថា រថភ្លើងនានាចង្អៀតខ្លាំងណាស់ ហើយអ្នកដំណើរពិបាករកកៅអីអង្គុយ ។ ហេតុនេះ អ្នកដំណើរខ្លះត្រូវឈរក្នុងរថភ្លើង, ឈរក្រៅរថភ្លើង, ឈរនៅក្បាលរថភ្លើង ឬអង្គុយលើដំបូលពពាក់ពពូនគ្នា ហើយវាធ្វើឱ្យពួកគេប្រឈមនឹងគ្រោះថ្នាក់ខ្លាំង ។ ប៉ុន្តែការជិះរថភ្លើងពពាក់ពពូនគ្នាបែបនេះ គឺជារឿងធម្មតានៅឥណ្ឌា ពីព្រោះក្នុង១ថ្ងៃៗ មានអ្នកដំណើរជាច្រើននាក់ត្រូវការជិះរថភ្លើង ទើបធ្វើឱ្យកៅអីអង្គុយលើរថភ្លើងនីមួយៗមិនគ្រប់គ្រាន់ ។

រដ្ឋាភិបាលឥណ្ឌាបានព្យាយាមដោះស្រាយបញ្ហាការធ្វើដំណើរតាមរថភ្លើងប្រជ្រៀតគ្នានេះរហូតមក ដូចជា ៖ ការបង្កើនចំនួនរថភ្លើង និងកែលម្អហេដ្ឋារចនាសម្ព័ន្ធក្នុងប្រទេស ។ ទោះយ៉ាងណា ដោយសារមានអ្នកដំណើរជាច្រើនចាំបាច់ត្រូវជិះរថភ្លើង វាធ្វើឱ្យការជិះប្រជ្រៀតគ្នានេះនៅកើតឡើងបន្តទៀត ហើយរដ្ឋាភិបាលឥណ្ឌាពុំអាចដោះស្រាយបញ្ហានេះបានឆាប់ៗឡើយ ។

បើយើងមានអារម្មណ៍ធុញទ្រាន់ជាមួយការធ្វើដំណើរស្ទះចរាចរណ៍ខ្លាំងតាមផ្លូវ ឬធុញទ្រាន់នឹងការតម្រង់ជួរ Check in នៅអាកាសយានដ្ឋាននោះ យើងអាចគិតឡើងវិញ បើបានសាកល្បងជិះរថភ្លើងណែនខ្លាំងនៅឥណ្ឌា ។ គេចាត់ទុកថា ឥណ្ឌាមានបណ្តាញផ្លូវដែកធំលំដាប់ទី២ លើពិភពលោក ហើយក្នុង១ថ្ងៃៗ មានពលរដ្ឋឥណ្ឌាធ្វើដំណើរតាមរថភ្លើង ប្រមាណ២៣លាននាក់ ។ ដូច្នេះ វាពុំចម្លែកទេ ដែលរថភ្លើងនៅឥណ្ឌាណែនដល់ថ្នាក់នេះ ។

រថភ្លើងនីមួយៗរបស់ឥណ្ឌាមានសភាពចាស់បំផុត បើធៀបនឹងរថភ្លើងលើពិភពលោក ដោយសាររថភ្លើងទាំងនេះត្រូវបានផលិតតាំងពីឆ្នាំ១៨៥៥ មកម៉្លេះ ។ ប៉ុន្តែរថភ្លើងចាស់ៗនៅតែបន្តរត់លើផ្លូវដែករហូតដល់បច្ចុប្បន្ន ចាប់ពីទីក្រុង New Delhi ទៅកាន់រដ្ឋ Rajasthan ។ ក្នុង១ថ្ងៃ នឹងមានរថភ្លើងចេញដំណើររហូតដល់១១.០០០រថភ្លើង ។ ក្រៅពីនេះ ឥណ្ឌាមានបុគ្គលិកធ្វើការផ្នែករថភ្លើងច្រើនបំផុតលើពិភពលោក គឺស្មើនឹង១លាន៤សែននាក់ ៕

នារីដ៏ស្រស់ស្អាតម្នាក់ដែលលក់ទឹកផ្លែឈើស្រស់ៗនៅផ្សាររាត្រីប្រទេសថៃល្បីល្បាញកន្លងមកនេះកំពុងល្បីពេញប្រព័ន្ធអ៊ីនធឺណិតប៉ុន្តែមិនមែនជារឿងល្អដូចពីមុននោះទេប្តូរពីមានអ្នកស្រលាញ់ចូលចិត្តត្រូវគេរិះគន់កប់ៗមាត់។ ការរិះគន់ទៅកាន់អ្នកលក់រូបស្រស់នេះដោយសារតែនាងបញ្ចេញអាកប្បករិយាមិនល្អមិនរួសរាយដូចជាពេលមុនដែលល្បី។

អ្នកមកលេងបាងកកញឹកញាប់ប្រហែលជាធ្លាប់ឮពីអ្នកលក់ទឹកផ្លែឈើថៃដ៏ពេញនិយមមួយរូប ហើយតូបរបស់នាងមានទីតាំងនៅក្នុងផ្សាររាត្រីមួយកន្លែងនៅប្រទេសថៃ។ អ្នកលក់រូបនេះត្រូវបានគេដាក់ឈ្មោះថាជា«នារីទឹកផ្លែឈើដ៏ស្រស់ស្អាតបំផុត» ។ រូបនាងល្បីល្បាញឆ្នាំ ២០២២ ដោយទាក់ទាញចំណាប់អារម្មណ៍របស់អ្នកស្រុកមិនត្រឹមតែប៉ុណ្ណោះទេប៉ុន្តែថែមទាំងភ្ញៀវទេសចរដែលនឹងធ្វើដំណើរទៅផ្សាររាត្រីគឺចង់ឃើញនាង។

អ្នកលក់ស្រស់សោភារូបនេះបានបង្ហាញមុខនៅក្នុង vlogs និងមគ្គុទ្ទេសក៍ទេសចរណ៍ជាច្រើន ដោយមានរហស្សនាមថា «Watermelon Lady» បានធ្វើឱ្យកេរ្តិ៍ឈ្មោះរបស់នាងឡើងសន្ទុះខ្លាំងពេញប្រព័ន្ធផ្សព្វផ្សាយសង្គម។ យោងតាមរបាយការណ៍ នាងត្រូវជួលអង្គរក្ស ដែលពេលខ្លះឈរជើងនៅតូប ដើម្បីការពារនាងពីអ្នកគាំទ្រដ៏ក្លៀវក្លា ដោយសារតែប្រជាប្រិយភាពដ៏លើសលប់របស់នាង។

ទោះជាយ៉ាងណាក៏ដោយ អ្នកលក់រូបនេះ ថ្មីៗនេះបានទទួលរងការរិះគន់ចំពោះ «អាកប្បកិរិយាមិនល្អ» និង «មិនរួសរាយរាក់ទាក់» របស់នាងចំពោះអ្នកដើរផ្សាររាត្រី។

យោងតាមការខឹងសម្បាររបស់អ្នកលេងអ៊ិនធឺណិតមួយចំនួន បានលើកឡើងថា អ្នកលក់ ទឹកផ្លែឈើរូបនេះ លែងអនុញ្ញាតឱ្យអតិថិជនដែលមិនទិញថតរូបនាងទៀតហើយ។ អ្នកដែលចង់ថតរូបនាងគឺតម្រូវឱ្យបង់ប្រាក់យ៉ាងតិច ១៥០ បាត (ជាង៤ដុល្លារ) សម្រាប់ទឹកមួយកែវ មុននឹងសុំរូបថត។ គេថានាងនឹងបង្វែរទៅរកអ្នកដែលមិនមែនជាអតិថិជន ប្រសិនបើនាងប្រទះឃើញពួកគេព្យាយាមលួចថតរូបនាង។ ក្នុងករណីខ្លះ ពួកគេក៏នឹងត្រូវបានអង្គរក្សរបស់នាងដេញចេញដែរ។ មនុស្សជាច្រើនបានបន្ថែមថា អាជីវកម្មរបស់តូបនេះលែងមានភាពអ៊ូអរដូចពីមុនទៀតហើយ ដោយមានអតិថិជនត្រឹមតែមួយជួរប៉ុណ្ណោះ។

អ្នកលេងបណ្តាញសង្គមបានចង្អុលបង្ហាញថា គេនៅទីនោះ១០នាទីប៉ុន្តែមិនបានឃើញនាងញញឹមម្តងឡើយ។ អ្នកខ្លះថា តម្លៃភេសជ្ជៈរបស់នាងទោះបីល្បីតាមបណ្តាញសង្គមតែ ថ្លៃពេក បើធៀបនឹងតូបផ្សេងទៀតដែលមិនសូវពេញនិយម។ អ្នកផ្សេងទៀតថានាងធ្វើគោលនយោបាយថតរូប ដោយមនុស្សជាច្រើននិយាយថានាងមិនស្វាគមន៍ និងរួសរាយរាក់ទាក់ដូចនាងពីមុនទេដោយសារតែភាពល្បីល្បាញបានឡើងដល់កម្រិតកំពូលពេក៕