ខេត្តក្រចេះមានតំបន់ទេសចរណ៍ និងរមណីយដ្ឋានជាច្រើនកន្លែង ដែលទាក់ទាញភ្ញៀវទេសចរជាតិ-អនុ្តរជាតិមកកម្សាន្តជារៀងរាល់ឆ្នាំ ក្នុងនោះរមណីយដ្ឋានព្រែកកាំពី ស្ថិតនៅភូមិក្បាលជួរ ឃុំសំបុក ស្រុកចិត្របុរី មានចម្ងាយ១៦គីឡូម៉ែត្រពីទីរួមខេត្ត បានទាក់ទាញភ្ញៀវទេសចរមកម្សាន្តច្រើនជាងគេ ជាពិសេស នៅខែមេសា ជាពេលបុណ្យចូលឆ្នាំខ្មែរ ។ ភ្ញៀវទេសចរមកទីនេះអាចអង្គុយលេងពីព្រឹកដល់ល្ងាច និងបរិភោគអាហារលើកញ្ចុះតូចៗដែលត្រូវបានសង់លើផ្ទៃទឹក ព្រមទាំងអាចហែលទឹកលេងយ៉ាងរីករាយ ។

រមណីយដ្ឋានកាំពី ស្ថិតនៅតាមផ្លូវជាតិលេខ៧ ពេលទៅដល់ស្ពានព្រែកកាំពី យើងនឹងឃើញទិដ្ឋភាពមួយដ៏ល្អប្លែក គឺផ្ទៃទឹកទន្លេមេគង្គទាំងមូលបានជ្រៀកជាចំណែកតូចៗដោយពំនូតកោះរាប់ម៉ឺន មានរុក្ខជាតិដុះខៀវស្រងាត់ ។ រមណីយដ្ឋាននេះជាក៏ជាជម្រកសត្វផ្សោត ដែលជាទីពេញនិយមរបស់ភ្ញៀវទេសចរមកលេងផងដែរ ចាប់ពីខែមករា ដល់ខែឧសភា រីឯជម្រៅទឹកចាប់ពី០.៥ម៉ែត្រ ទៅ១.៣០ម៉ែត្រប៉ុណ្ណោះ ទឹកថ្លាដូចកញ្ចក់ និងហូរក្នុងល្បឿនមិនបង្កគ្រោះថ្នាក់ ។ លក្ខណៈអំណោយផលល្អពីធម្នជាតិ ទើបធ្វើឱ្យរមណីយដ្ឋាននេះមានសេវាកម្មផ្សេងៗ ដូចជា ៖ ស្ពានចម្លង កញ្ចុះ កន្លែងលក់ម្ហូបអាហារ ភេសជ្ជៈ និងផ្ញើយានជំនិះ ។

ភ្ញៀវទេសចរនិយមមកកម្សាន្តនៅរមណីយដ្ឋានព្រែកកាំពីនៅរដូវប្រាំង ពីព្រោះទឹកក្នុងទន្លេមេគង្គស្រករាក់អាចអង្គុយលេងលើកញ្ចុះបាន រីឯនៅរដូវវស្សាវិញ ទឹកទន្លេឡើងមានកម្ពស់ខ្ពស់ មិនអាចងូតទឹកបានទេ ។ មុននឹងទៅរមណីយដ្ឋានព្រែកកាំពី ភ្ញៀវទេសចរអាចទិញវត្ថុអនុស្សាវរីយស្អាតៗជាច្រើនដែលអ្នកភូមិធ្វើឡើងពីសាច់ឈើដាក់លក់តាមដងផ្លូវ ដែលបច្ចុប្បន្ន ការិយាល័យទេសចរណ៍ខេត្តបានខិតខំធ្វើឱ្យប្រសើរឡើង និងរៀបចំរមណីយដ្ឋានឱ្យកាន់តែល្អ មានភាពទាក់ទាញកាន់តែខ្លាំង ។

រមណីយដ្ឋានព្រែកកាំពី សាកស័ក្តិសម្រាប់ការដើរកម្សាន្តជាក្រុមគ្រួសារ ឬមកជាមួយមិត្តភក្តិពេលចូលបុណ្យចូលឆ្នាំខ្មែរ ដែលអាចសម្រាកយកខ្យល់អាកាសបរិសុទ្ធពីទន្លេមេគង្គផ្ទាល់ ។ មុនដំបូង ត្រូវចុះជណ្តើរពីថ្នល់ជាតិតាមច្រាំងទន្លេមកក្រោម ទើបមកដល់កញ្ចុះលើផ្ទៃទឹក បន្ទាប់មក ភ្ញៀវទេសចរអាចជួលកញ្ចុះសម្រាកលើអង្រឹង ហើយកុម្ម៉ង់អាហារមកបរិភោគលើផ្ទៃទឹក ប៉ុន្តែសម្រាប់ភ្ញៀវទេសចរក្នុងស្រុកបានខ្ចប់អាហារមកបរិភោគដោយខ្លួនឯង ។

ភ្ញៀវទេសចរក្នុងស្រុកនិយាយស្រដៀងគ្នាថា ពេលមកកម្សាន្តនៅទីនេះខែប្រាំងទោះជាក្តៅបន្តិចមែន ប៉ុន្តែពេលឈានជើងដើរលើស្ពានក្តារលើផ្ទៃទឹកទៅរកកញ្ចុះនោះ ធ្វើឱ្យពួកគេមានអារម្មណ៍ស្រស់ស្រាយណាស់ និងអាចងូតទឹកទន្លេដ៏ថ្លាត្រជាក់មានទឹករាក់ហូរតិចៗ ។

សរុបមក រមណីយដ្ឋានកាពី គឺជារមណីយដ្ឋានទេសចរណ៍ធម្មជាតិដែលមានសម្រស់ទេសភាពទឹកទន្លេដ៏ស្រស់បំព្រង ហើយក៏ជាជម្រកដ៏សុខសាន្តសម្រាប់សត្វផ្សោតទន្លេមេគង្គផងដែរ ។ បច្ចុប្បន្ន រមណីយដ្ឋាននេះបានក្លាយជាតំបន់លំហែកាយមួយដ៏ពេញនិយម និងល្បីល្បាញបំផុតនៅខេត្តក្រចេះ នារដូវប្រាំង ។

គួរបញ្ជាក់ថា ក្រៅពីរមណីយដ្ឋានកាំពី ខេត្តក្រចេះ ក៏មានតំបន់ទេសចរណ៍ជាច្រើនកន្លែងទៀត ដូចជា ៖ វត្តសសរ១០០ ភ្នំសុពណ៌កាឡី សួនស្នេហ៍ថ្មបាំង កោះទ្រង់ ភ្នំសំបុក អន្លង់ផ្សោត និងក្រឡានថ្មគ្រែ ។ ក្រៅពីនេះ ភ្ញៀវទេសចរក៏អាចដើរទស្សនាផ្ទះ និងសំណង់អគារចាស់ៗបន្សល់ពីសម័យបារាំង ដែលមានទីតាំងនៅទីរួមខេត្តក្រចេះតែម្តង ៕

នៅថ្ងៃទី៣០ ខែមករា ឆ្នាំ២០២៦ មានការចែករំលែកព្រោងព្រាតនូវវីដេអូរបស់ត្រីបាឡែនមួយក្បាល ដែលបានហែលមកផ្ទៃខាងលើក្នុងខេត្តព្រះសីហនុត្រង់ចំណុចឆ្នេរតាបារាំង។ ការលេចវត្តមានឡើងមកខាងលើរបស់ត្រីបាឡែននេះ បានធ្វើឲ្យមនុស្សជាច្រើនមានការព្រួយបារម្ភថានេះអាចជាសញ្ញានៃគ្រោះធម្មជាតិនៅក្រោមបាតសមុទ្រជាមិនខាន។

ជាការពិតណាស់ ត្រីបាឡែនគឺជាសត្វដែលរស់នៅក្នុងទឹកជ្រៅ វាមិនងាយនឹងឡើងមកផ្ទៃខាងលើក្បែរឆ្នេរ ឬច្រាំង ឬចូលជិតតំបន់ដែលមានមនុស្សរស់នៅឡើយ លុះត្រាតែវាមានជំងឺ, របួស, ឬព្យាយាមគេចចេញពីការរំខានណាមួយនៅក្រោមផ្ទៃទឹក។ ជាក់ស្ដែងសម្រាប់ត្រីបាឡែនដែលប្រជាពលរដ្ឋប្រទះឃើញលើឆ្នេរតាបារាំងនោះត្រូវបានមជ្ឈដ្ឋានជាច្រើនធ្វើដាក់ការសង្ស័យថា អាចជាការគេចចេញពីមជ្ឈដ្ឋានដែលវារស់នៅឡើងមកផ្ទៃខាងលើដើម្បីស្វែងរកជំនួយ។ ដូច្នេះតើការឡើងមកផ្ទៃខាងលើរបស់ត្រីបាឡែននេះបណ្ដាលមកពីមូលហេតុអ្វីឲ្យប្រាកដ?

យោងតាមប្រភពព័ត៌មានពីមូលដ្ឋានបានប្រាប់ទៅកាន់ក្រុមការងារអង្គការអភិរក្សសមុទ្រកម្ពុជា (MCC)ថា វាគឺជាកូនត្រីបាឡែន (baleen whale) ដែលមានរបួសនៅផ្នែកខាងលើនៃខ្នងរបស់វា ក៏ដូចជាមានស្នាមរឹត ដែលមើលទៅដូចធ្លាប់បានវ័ណ្ឌជាប់នឹងរបស់អ្វីម្យ៉ាង។ យ៉ាងណាមិញ គេពុំទាន់អាចសនិ្នដ្ឋានដឹងពីមូលហេតុពិតប្រាកដនៃវត្តមានរបស់វានៅឡើយទេ។

ក្រុមការងារបច្ចេកទេសក្នុងតំបន់និងប្រជាជនបានព្យាយាមជួយសង្រ្គោះព្រមទាំងបានទាញកូនត្រីបាឡែននោះចូលទៅក្នុងទឹកជ្រៅវិញ ប៉ុន្តែវាហាក់ដូចជាមិនព្រមហែលត្រឡប់ទៅវិញទាល់តែសោះ។ អ្វីដែលជារឿងគួរឲ្យអាណិ.តអាសូ.រសម្រាប់កូនត្រីបាឡែននេះ គឺវាប្រហែលជាហែលតាមរកម្ដាយរបស់វា ហើយវានឹងពុំព្រមហែលចូលទឹកជ្រៅវិញឡើយប្រសិនបើវាមិនអាចជួបម្ដាយរបស់វាវិញនោះ។ នេះបើផ្អែកតាមការសន្និដ្ឋានរបស់ក្រុមការងារបច្ចេកទេស (MCC) និងវិទ្យាសាស្រ្តថនិកសត្វសមុទ្រ។

ដោយយើងតាមការសន្និដ្ឋានរបស់អ្នកជំនាញដូចខាងលើនេះ បញ្ហាទំនងជាកើតមានតែលើកូនត្រីបាឡែនមួយក្បាលនេះប៉ុណ្ណោះ ខណៈពុំមានសេចក្ដីរាយការណ៍ណាមួយរាយការណ៍អំពីត្រីបាឡែន ឬសត្វសមុទ្រផ្សេងទៀតបានឡើងមកផ្ទៃខាងលើ ដែលជាសញ្ញាគួរឲ្យសង្ស័យអំពីគ្រោះធម្មជាតិនៅបាតសមុទ្រឡើយ៕

(ភ្នំពេញ) ៖ ស្ថានទូតអាមេរិកប្រចាំកម្ពុជា ប្រកាសផ្តល់អាហារូបករណ៍ដល់និស្សិតកម្ពុជាឱ្យទៅសិក្សាថ្នាក់អនុបណ្ឌិត និងបណ្ឌិតនៅសហរដ្ឋអាមេរិក ក្រោមគម្រោងអាហារូបករណ៍Fulbright ក្នុងគោលបំណងបង្កើនការយោគយល់គ្នាទៅវិញទៅមករវាងប្រជាជនសហរដ្ឋអាមេរិក និងប្រជាជនកម្ពុជា។

យោងតាមសេចក្ដីជូនដំណឹងនៅថ្ងៃសុក្រ ទី៣០ ខែមករា អាហារូបករណ៍នៃកម្មវិធីនិស្សិតបរទេស Fulbright ឆ្នាំ២០២៧-២០២៨ សម្រាប់ការសិក្សាថ្នាក់បរិញ្ញាបត្រជាន់ខ្ពស់នៅសហរដ្ឋអាមេរិក ដែលនាំទៅដល់សញ្ញាបត្រអនុបណ្ឌិត ឬបណ្ឌិតនេះ ត្រូវបានផ្តល់ជូនលើមូលដ្ឋានប្រកួតប្រជែងដល់បេក្ខជនដែលមានសមត្ថភាព ក្រោមការឧបត្ថម្ភរបស់កម្មវិធីអាហារូបករណ៍បរទេស J. William Fulbright ដោយអាស្រ័យលើភាពអាចរកបាននៃមូលនិធិ។

ដើម្បីមានសិទ្ធិស្នើសុំអាហាររូបករណ៍នេះ បេក្ខជនត្រូវតែ៖ ជាជនជាតិខ្មែរ, មានប្រវត្តិការសិក្សាល្អ និង លិខិតបញ្ជាក់ការអប់រំ, មានសញ្ញាបត្របរិញ្ញាបត្រសម្រាប់អ្នកដាក់ពាក្យថ្នាក់អនុបណ្ឌិត ឬសញ្ញាបត្រអនុបណ្ឌិតសម្រាប់អ្នកដាក់ពាក្យថ្នាក់បណ្ឌិត, មានសមត្ថភាពប្រើប្រាស់ភាសាអង់គ្លេសល្អ (ពិន្ទុ TOEFL អប្បបរមា 570 ឬ តេស្តផ្សេងទៀតដែលមានកម្រិតស្មើ),

ជាមួយគ្នានេះផងដែរ បេក្ខជនត្រូវតែអាចសម្របខ្លួននៅសហរដ្ឋអាម៉េរិក មានសុខភាពល្អ និងមានបទពិសោធន៍តិចតួច ឬក៏គ្មានក្នុងការរស់នៅសហរដ្ឋអាម៉េរិក។ បើសិនជាបេក្ខជនមានចំណាប់អារម្មណ៍សូមចូលទៅកាន់ តំណរភ្ជាប់ ដើម្បីបានព័ត៌មានបន្ថែមនិងដាក់ពាក្យឱ្យបានមុនថ្ងៃទី៣០ ខែមេសា ឆ្នាំ២០២៦។

ដោយឡែកចំពោះការដាក់ពាក្យស្នើសុំ នឹងត្រូវធ្វើឡើងតាមប្រព័ន្ធអ៊ីនធឺណេតតែមួយគត់។ ក្នុងនោះបេក្ខជនតម្រូវឱ្យមានឯកសារមួយចំនួនដូចជា អត្ថបទគម្រោងនៃការសិក្សាមិនលើសពី ៥០០ពាក្យ។ លិខិតសេចក្តីថ្លែងការផ្ទាល់ខ្លួនមិនលើសពី ៥០០ពាក្យ។ បន្ថែមលើនោះ បេក្ខជនត្រូវមានសញ្ញាបត្របរិញ្ញបត្រសម្រាប់ថ្នាក់អនុបណ្ឌិត និងសញ្ញាបត្រអនុបណ្ឌិតសម្រាប់ថ្នាក់បណ្ឌិត រួមទាំងព្រឹត្តិបត្រពិន្ទុ និងលទ្ធផលតេស្តភាសាអង់គ្លេស លិខិតណែនាំចំណួន៣ ប្រវត្តិរូបសង្ខេប និងអត្តសញ្ញាបណ្ណមកជាមួយ។

គួរបញ្ជាក់ផងដែរថា អាហារួបករណ៍នេះនឹងគ្រប់ដណ្តប់ទៅលើថ្លៃសិក្សា ការធ្វើដំណើរទៅមក កន្លែងស្នាក់នៅ ការហូបចុក និងការចំណាយនានា ប៉ុន្តែចំពោះការចំណាយទាំងអស់ដែលទាក់ទងនឹងការធ្វើតេស្តភាសាអង់គ្លេសគឺបេក្ខជនត្រូវរ៉ាប់រងបន្ទុកដោយខ្លួនឯង៕