ថ្មីៗនេះតារាចម្រៀង Mina និង B.O (ប៊ីអូរ) បានធ្វើឱ្យហ្វេនៗមានការនឹករលឹកទៅកាន់ខ្សែភាពយន្តដ៏ល្បីល្បាញមានចំណងជើងថា «ម្ចាស់ព្រះអាទិត្យ» បន្ទាប់ពីអ្នកទាំងពីរបានបកស្រាយឡើងវិញនូវបទចម្រៀងមានចំណងជើងថា «Once Again» ។ សំឡេងអ្នកទាំងពីរដែលបកស្រាយជាភាសាកូរ៉េនេះក៏ទទួលបានមតិវិជ្ជមានផងដែរ។
«ម្ចាស់ព្រះអាទិត្យ»(Descendants of the Sun) ពីតារាសម្តែង Song Hye Kyo និង Song Joong Ki ដែលបានចេញក្នុងឆ្នាំ២០១៦ នៅតែខ្សែភាពយន្តកូរ៉េដែលមានសន្ទុះគាំទ្រយ៉ាងច្រើនបើទោះបីជារឿងនេះរំលងផុតរយៈពេល១០ឆ្នាំមកហើយក្តីនិងទោះបីជាតួឯកទាំងពីរលែងលះគ្នាក្តី។ មិនត្រឹមតែខ្សែភាពយន្តប៉ុណ្ណោះទេដែលទទួលបានសន្ធឹកនៃការគាំទ្រលើសលប់សូម្បីតែបទចម្រៀងក្នុងខ្សែភាពយន្តនេះនៅតែទទួលបានការគាំទ្រពីទស្សនិកជន។
ជាក់ស្តែងថ្មីៗនេះ Mina និង B.O បានចូលរួមក្នុងកម្មវិធីមួយដោយអ្នកទាំងពីរបានបកស្រាយបទ «Once Again» ពីតារាចម្រៀងដើម Kim Na-young និង Mad Clown ហើយក៏ទួលបាននូវការចាប់អារម្មណ៍យ៉ាងច្រើនដូចគ្នា។ តារាចម្រៀងខ្មែរដែលបកស្រាយបទកូរ៉េនេះ ពិតជាមិនធ្វើឱ្យអ្នកគាំទ្រខកចិត្តនោះទេដោយសារតែ Mina និង B.O អាចច្រៀងបានយ៉ាងរលូននិងពីរោះផងដែរ។
បន្ទាប់ពីវីដេអូនេះបានរីកសាយភាយនៅលើបណ្តាញសង្គម Mina និង B.O ទទួលបានមតិសរសើរជាច្រើនដោយពួកគេបានលើកឡើងថា «Once Again» Version ខ្មែរឡូយអស់ទាស់។
គួរបញ្ជាក់ផងដែរថា កន្លងមកអ្នកទាំងពីរក៏ធ្លាប់ចាប់ដៃគ្នា Cover បទ «Free»ចម្រៀងក្នុងខ្សែភាពយន្តគំនូរជីវចល K-pop demon hunters ហើយទទួលបានការសរសើរជាច្រើនពីសំណាកអ្នកគាំទ្រជាតិនិងអន្តរជាតិ៕
