នៅពេលនេះតម្លៃប្រេងឥន្ធនៈបានឡើងថ្លៃយ៉ាងខ្លាំងមិនថាតែនៅក្នុងប្រទេសកម្ពុជាឬប្រទេសដទៃនោះទេ។ ស្របពេលជាមួយនឹងតម្លៃខ្ពស់អ្នកបង្កើតមាតិកា Rick Kh គ្រោងធ្វើរឿងមួយដើម្បីជួយសម្រួលបន្ទុកដល់ហ្វេនៗ។
នៅថ្ងៃទី១៨ ខែមីនា Rick Kh បានបង្ហោះនៅលើបណ្តាញសង្គមហ្វេកប៊ុកថា «សាំងឡើងថ្លៃ ឥលូវចង់បានកាតសាំង៣ពាន់លីត្រ ចែកហ្វេនម្នាក់៣០លីត្រ ចំនួន១០០កាត យ៉ាងណាហ្វេនក៏អាចជិះធ្វើការបាន១ខែដែរ»។ ការប្រកាសនេះបានធ្វើឱ្យហ្វេនៗរបស់លោកត្រេកអរយ៉ាងខ្លាំងពីព្រោះពេលនេះអ្នកមួយចំនួនក៏កំពុងត្អូញត្អែរអំពីការឡើងថ្លៃនៃប្រេងឥន្ធនៈដែលធ្វើឱ្យប៉ះពាល់ដល់របររកស៊ីមួយចំនួន។ ការត្អូញត្អែរនេះដោយសារតែប្រេងថ្លៃធ្វើឱ្យតម្លៃនៃការដឹកជញ្ជូនខ្ពស់ជាងមុនដូច្នេះទំនិញមួយចំនួនក៏នឹងឡើងថ្លៃដូចគ្នា។
មិនត្រឹមតែមានគំនិតគិតគូរដល់ហ្វេនៗប៉ុណ្ណោះទេ សកម្មភាពរបស់ Rick Kh កន្លងមកបានចែករង្វាន់លើកទឹកចិត្តដល់អ្នកគាំទ្ររបស់ខ្លួនទាំងការឈ្នះជាសាច់ប្រាក់រួមទាំងទូរសព្ទជាដើម។ នាពេលបច្ចុប្បន្ននេះ ទីផ្សាររបស់អ្នកប្រកបអាជីវកម្មអនឡាញភាគច្រើនបានផ្តល់រង្វាន់យ៉ាងច្រើនសន្ធឹកសន្ធាប់ដើម្បីជាការប្រម៉ូតទីផ្សាររបស់ពួកគេ។
គួរឱ្យដឹងថាក្រៅពីអាជីពជាអ្នកបង្កើតមាតិកាលើបណ្តាញសង្គម Rick Kh ក៏បង្កើតអាជីវកម្មផ្ទាល់ខ្លួនផងដែរ។ ក្រៅពីជួយនិស្សិតដែលមានជីវភាពខ្វះខាតរូបលោកក៏បានបើកបណ្ណាល័យមួយនៅឯខេត្តសៀមរាបដែលបើកឱកាសឱ្យអ្នកអាន អានដោយឥតគិតថ្លៃ៕
