រដូវវស្សា គឺជាពេលវេលាដែលធម្មជាតិបង្អួតសម្រស់ស្រស់ត្រកាល ដោយក្នុងអំឡុងប៉ុន្មានខែនេះគឺគ្រប់តំបន់ទាំងអស់នៅក្នុងប្រទេសកម្ពុជាយើង សុទ្ធសឹងតែមានទេសភាពស្រស់បំព្រង និងស្អាតខ្លាំងបំផុត បូករួមនឹងខ្យល់អាកាសបរិសុទ្ធ ថែមទាំងមានព្រៃព្រឹក្សាចម្រុះជាច្រើនផងដែរ។ ទោះជាយ៉ាងណាការដើរកម្សាន្តនៅរដូវវស្សាហាក់មានគ្រោះថ្នាក់បន្តិច ប៉ុន្តែប្រសិនបើអ្នកទៅតំបន់ទេសចរណ៍ទាំងនេះគឺមានសុវត្ថិភាពខ្ពស់បំផុត។ ដូច្នេះនៅក្នុងអត្ថបទនេះ យើងនឹងនាំប្រិយមិត្តមកកម្សាន្តនៅកន្លែងដូចខាងក្រោម ធានាថាសប្បាយ និងមិនចាំបាច់ព្រួយបារម្ភពីហានិភ័យនោះទេ។

១.ភ្នំកំពង់ត្រាចខេត្តកំពត៖ នៅរដូវវស្សាការទៅលេងទស្សនារមណីយដ្ឋាននេះគឺពិតជាជម្រើសដ៏ល្អបំផុត។ ភ្នំកំពង់ត្រាចគឺជារមណីយដ្ឋានដែលមានភាពស្រស់ស្អាតបែបធម្មជាតិ និងជាកន្លែងដ៏គួរឱ្យចាប់អារម្មណ៍បំផុតសម្រាប់ភ្ញៀវទេសចរជាតិ និងអន្តរជាតិ។ ភ្នំនេះគឺមានល្អាងតូចធំជាច្រើន ក៏ដូចជាមានសិលាចរិក និងជាកន្លែងសក្ការៈគោរពបូជាវត្ថុផ្សេងៗទៅតាមជំនឿនៃទំនៀមទំលាប់របស់ប្រជាជនខ្មែរយើងផងដែរ។ ភ្នំនេះស្ថិតនៅតាមផ្លូវជាតិលេខ៣៦ ក្នុងឃុំដំណាក់កន្ទួតខាងត្បូង ស្រុកកំពង់ត្រាច ចំងាយ ៣៨ គីឡូម៉ែត្រប៉ែកខាងកើតនៃខេត្តកំពត។

២.ភូមិកំពង់ភ្លុកខេត្តសៀមរាប៖ កំពង់ភ្លុកគឺជាភូមិឋានធម្មជាតិដ៏ធំមួយ ដែលនៅជាប់តំបន់បឹងទន្លេសាប គ្របដណ្ដប់ទៅដោយផ្ទៃទឹក ដែលមានចម្ងាយប្រហែល ៥០គីឡូម៉ែត្រពីក្រុងសៀមរាប ប្រទេសកម្ពុជា។ ភូមិបណ្ដែតទឹកមួយនេះ មិនត្រឹមតែជាតំបន់នេសាទដ៏សំខាន់នោះទេ ថែមទាំងជាសមាគមន៍ទេសចរណ៍ដ៏ពេញនិយមមួយ ដែលមានសម្រស់ស្រស់ស្អាត និងទាក់ទាញភ្ញៀវទេសចរយ៉ាងច្រើនផងដែរ ជាពិសេសនៅរដូវវស្សាតែម្តង។ នៅពេលដែលលោកអ្នកបានមកដល់ទីនេះ នឹងបានឃើញភាពស្រស់ស្អាតចម្រុះពណ៌នៃដំបូលផ្ទះ រួមទាំងការសាងសង់ពត់ពែងវែងអន្លាយតាមសណ្ឋានភូមិសាស្ត្រ និងពណ៌បៃតងនៃរុក្ខជាតិប្រៀបដូចកម្រាលព្រំដែលក្រាលលើបឹងទន្លេសាប គួរជាទីទាក់ទាញខ្លាំងបំផុត។

៣.ទេសភាពស្រស់បំព្រងនៅមណ្ឌលគីរី៖ ទេសភាពធម្មជាតិដ៏ស្រស់បំព្រង នៅខេត្តមណ្ឌលគិរីនារដូវវស្សានេះ គឺកំពុងទទួលបានការចាប់អារម្មណ៍យ៉ាងខ្លាំងពីសំណាកភ្ញៀវទេសចរជាតិ និងអន្តរជាតិ ដោយសារបរិយាកាសល្អ ជាទឹកដីនៃភ្នំដែលក្រាលគ្របដោយរុក្ខជាតិ វាលស្មៅ និងព្រៃឈើចម្រុះ បង្កើតបានជាទិដ្ឋភាពពណ៌បៃតងខៀវខ្ចី ផ្តល់នូវអារម្មណ៍ស្រស់ស្រាយ និងជំនួយដល់សុខភាពភ្នែកថែមទៀតផង។ ការធ្វើដំណើរកម្សាន្តមកកាន់ខេត្តទេសចរណ៍មួយនេះនារដូវភ្លៀងធ្លាក់ គឺមិនសូវជាមានបញ្ហាចោទនោះទេ ព្រោះទីនេះមានកន្លែងកម្សាន្តលក្ខណៈធម្មជាតិច្រើន ដែលងាយក្នុងការជ្រើសរើស។

៤.គីរីរម្យខេត្តកំពង់ស្ពឺ៖ លោកអ្នកប្រាកដជាស្គាល់ច្បាស់ហើយ កន្លែងនេះគឺនៅជិតក្រុងយើងនេះទេ មិនថារដូវប្រាំង ឬរដូវវស្សា រមណីយដ្ឋានឧទ្យានជាតិព្រះសុរាម្រិតកុសុមៈគិរីរម្យ គឺជាទីឋានដែលទេសចរជាតិមិនដែលរំលងឡើយ ក៏ព្រោះតែទីនេះជាតំបន់ភ្នំធម្មជាតិមានដើមឈើធំៗ ទឹកធ្លាក់ និងមានកន្លែងកម្សាន្តជាច្រើន ក៏ដូចជាមានភាពងាយស្រួលក្នុងការធ្វើដំណើរ ពិសេសចម្ងាយតែប្រមាណជាង ១០០ គីឡម៉ែត្រពីភ្នំពេញប៉ុណ្ណោះ។

៥.ភ្នំខ្នងផ្សារ៖ នៅរដូវវស្សានេះ ខ្នងផ្សារគឺជាកន្លែងដែលអ្នកមិនគួររំលងឡើយ ក៏ព្រោះតែទីនេះមានទេសភាពស្អាតខ្លាំងបំផុត។ នៅពេលដែលយើងឡើងដល់កំពូលភ្នំ យើងនឹងអាចគយគន់វាលស្មៅស្រស់បំព្រងបៃតងខ្ចីនារដូវវស្សា កម្សាន្តបែបដំណើរផ្សងព្រេង បោះតង់ មើលថ្ងៃរះនាព្រឹកព្រលឹមស្រាងៗ ទិដ្ឋភាពថ្ងៃអស្តង្គតនាពេលល្ងាច សោយសុខនឹងធម្មជាតិ។ រមណីយដ្ឋានធម្មជាតិខ្នងផ្សារ ជាតំបន់ព្រៃភ្នំដ៏ធំមួយដែលស្ថិតនៅក្នុងភូមិតាំងបំពង តំបន់រលាក់កងជើង ឃុំតាសាល ស្រុកឱរ៉ាល់ ខេត្តកំពង់ស្ពឺ ជាទីតាំងប្រសព្វមុំបីដែលផ្សាភ្ជាប់ខេត្តចំនួនបីគឺ កោះកុង កំពង់ស្ពឺ និងពោធិ៍សាត់៕

មហាជនភាគច្រើនប្រហែលជាស្គាល់ហើយ អ្នកជំនួញអនឡាញព្រមទាំងជាអ្នកផលិតមាតិកាល្បីឈ្មោះ កញ្ញាពេជ្រ ពិសី ស្រស់ស្អាត វ័យក្មេង ហាក់កំពុងទទួលបាននូវភាពជោគជ័យជាបន្តបន្ទាប់ទៅលើអាជីពការងារខ្លួន ដែលបន្ថែមពីនេះ ក៏បានធ្វើឲ្យមហាជនជាច្រើនច្រណែនទៅនឹងជីវិតគូររបស់នាងផងដែរ។

កញ្ញាពេជ្រ ពិសី ដែលបច្ចុប្បន្នមានអ្នកតាមដានរហូតដល់ទៅ ១.២លាននាក់នៅលើគេហទំព័រហ្វេសបុកផ្លូវការ។ ក្នុងនាមជាអ្នកជំនួញអនឡាញវ័យក្មេងមួយរូប ដែលព្យាយាមកសាងខ្លួនតាំងពីបាតដៃទទេជាមួយគូរស្នេហ៍ រហូតទទួលបានឈ្មោះបោះសំឡេងនៅលើបណ្តាញសង្គម។ បច្ចុប្បន្ននេះ នាងបានចេញផលិតផលដែលជាប្រេនផ្ទាល់ខ្លួនជាច្រើន ដូចជាលេគូថ លេក្លៀក និង Blush ជាដើម ដែលកំពុងតែផ្ទុះខ្លាំងក្នុងចំណោមយុវវ័យ។

ក្រៅពីអាជីពជាអ្នកជំនួញអនឡាញ ពេជ្រ ពិសី ក៏ត្រូវបានគេស្គាល់ថាជា អ្នកផលិតមាតិកាល្បីឈ្មោះមួយរូបដែរ ដែលវីដេអូរបស់នាងភាគច្រើនគឺតែងចែករំលែកអំពីដំណើរកម្សាន្តក៏ដូចជាបទពិសោធន៍ជីវិត។ Vlog ដំណើរកម្សាន្តទៅកាន់ប្រទេសនានាជុំវិញពិភពលោក បានលេចឡើងតាមរយៈគេហទំព័រផ្លូវការរបស់នាង នឹងទទួលបានអ្នកទស្សនារហូតដល់ទៅរាប់លាននាក់។ កាន់តែពិសេស ពេជ្រ ពិសី ក៏តែងរួមចំណែកយ៉ាងសកម្មក្នុងការផ្សព្វផ្សាយសម្បត្តិបេតិកភណ្ឌជាតិ ក៏ដូចជាវប្បធម៌អរិយធម៌របស់ខ្មែរ ដែលនាងតែងតែផលិតមាតិកាទាក់ទងនឹងគោលដៅទេសចរណ៍ក្នុងស្រុកជាហូរហែរ។

ក្រៅពីអាជីពជាអ្នកជំនួញអនឡាញនិងជាអ្នកផលិតមាតិកាដែលកំពុងតែទទួលបាននូវភាពជោគជ័យជាបន្តបន្ទាប់ហើយ ពេជ្រ ពិសី ក៏ត្រូវបានមហាជនភាគច្រើនច្រណែននឹងជីវិតគូរដ៏ផ្អែមផ្ហែមរបស់នាងជាមួយនឹងគូរដណ្តឹង ឆៃ ផងដែរ។ យ៉ាងណាមិញ បើតាមការចែករំលែករបស់នាង ទម្រាំតែមកដល់ចំណុចនេះ នាងនិងគូរដណ្តឹងបានឆ្លងកាត់ប្រវត្តិស្នេហាដ៏ជូរចត់ជាច្រើនដំណាក់កាល ដែលផ្តើមចេញពីស្នេហាក្មេងៗវ័យ ១៥- ១៦ឆ្នាំ ដែលមិនត្រូវបានឪពុកម្តាយទទួលស្គាល់។ ទោះជាយ៉ាងណា អ្នកទាំងពីរនូវតែមិនបោះបង់គ្នាចោល បានចាប់ដៃគ្នារកស៊ីក្នុងកិច្ចខិតខំប្រឹងប្រែងយ៉ាងខ្លាំង រហូតទទួលបានលទ្ធផលជាទីគាប់ប្រសើរនានា ទើបឪពុកម្តាយទាំងសងខាងបើកចិត្តទទួលស្គាល់ ព្រមឲ្យមានកម្មវិធីភ្ជាប់ពាក្យតូចមួយកាលពីឆ្នាំ ២០២១។ ទាំងនេះ គឺឆ្លុះបញ្ចាំងអំពីសេ្នហាពិត ការជឿជាក់លើដៃគូរ ការលះបង់ ឆ្លងកាត់គ្រប់ឧបសគ្គជាមួយគ្នា រហូតទទួលបានភាពជោគជ័យព្រមៗគ្នា ដែលគូរស្នេហ៍យុវវ័យដទៃគួរតែយកតម្រាប់តាម។

ជាមួយគ្នានេះ កាលពីថ្ងៃទី ១៤ ខែសីហា ជាថ្ងៃខួបកំណើតរបស់គូដណ្តឹង ពិសី ក៏បានបង្ហោះរូបថតប៉ុន្មានសន្លឹក អមជាមួយសារមួយឃ្លាយ៉ាងផ្អែមល្ហែមថា «រីករាយថ្ងៃកំណើតមនុស្សប្រុសដែលល្អទាំងក្នុងនឹងក្រៅរបស់អូន ចង់បានអ្វីយើងនឹងទៅបង្កើតវារួមគ្នាបន្តទៀត ដើម្បីខ្លួនឯង គ្រួសារ មនុស្សជុំវិញខ្លួន នឹងសង្គមមួយនេះ»។ តាមរយៈសារមួយឃ្លានេះ ក៏បានបណ្តាលឲ្យអ្នកលេងបណ្តាញសង្គមលើសជាតិស្ករគ្រប់ៗគ្នា ព្រមជាមួយនឹងការបញ្ចេញមតិស្ញើចសរសើរព្រោងព្រាតផងដែរ៕

កាលពីថ្ងៃទី ១៥ ខែសីហា ឆ្នាំ២០២៤នេះ នៅឯភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី បានប្រារព្ធទិវាអន្តរជាតិជនជាតិដើមភាគតិចពិភពលោកលើកទី៣០ និងលើកទី២០ នៅកម្ពុជា ក្រោមប្រធានបទការការពារសិទ្ធរស់នៅ និងប្រាស្រ័យទាក់ទង តាមបែបប្រពៃណីជនជាតិដើមភាគតិចដោយស្ម័គ្រចិត្ត។

ជាមួយគ្នានោះ ក៏រួមមានក្បួនដង្ហែរយ៉ាងមហាឡារិកក្នុងចំណោមជនជាតិដើមភាគតិច មានទាំងក្មេងចាស់ ប្រុសស្រី និងស្លៀកសម្លៀកបំពាក់ប្រពៃណីរបស់ពួកគេយ៉ាងសមសួនសឹងតែគ្រប់ៗគ្នា ក៏ដូចជាមានប្រារព្ធនូវកម្មវិធីសប្បាយៗជាច្រើនទៀតផងដែរ។

យ៉ាងណាមិញ មិនមែនមានតែនៅក្នុងខេត្តមណ្ឌលគិរីមួយនោះទេដែលបានប្រារព្ធនូវទិវានេះ ខណៈក៏នូវមានខេត្តផ្សេងៗទៀតដែលមានជនជាតិដើមភាគតិចរស់នៅក៏បានប្រារព្ធនូវទិវានេះប្រចាំខេត្ត\ក្រុងពួកគេរៀងៗខ្លួនដែរ តួយ៉ាងដូចជា ខេត្តព្រះវិហារ, ខេត្តកំពង់ស្ពឺ, ខេត្តបាត់ដំបង,ខេត្តរតនគិរីជាដើម។

គួរបញ្ជាក់ថា នៅពាសពេញសកលលោក នៅរៀងរាល់ឆ្នាំក្នុងថ្ងៃទី៩ សីហា ជាពេលវេលាដ៏រីករាយ និងអធិកអធមបំផុតសម្រាប់ជនជាតិដើមភាគតិចដើម្បីចូលរួមអបអរសាទរនិងប្រារព្ធទិវាអន្តរជាតិពិភពលោករបស់ខ្លួនស្របតាមប្រពៃណីទំនៀមទំលាប់របស់ពួកគេនៅសឹងគ្រប់បណ្ដាប្រទេសដែលមានជនជាតិដើមរស់នៅជាអចិន្ត្រៃយ៍។ គួរកត់សម្គាល់ទិវានេះត្រូវបានមហាសន្និបាតអង្គការសហប្រជាជាតិបានប្រកាសជាផ្លូវការដោយបានកំណត់យកថ្ងៃទី ៩ សីហា ជាទិវាអន្តរជាតិពិភពលោករបស់ជនជាតិដើមភាគតិច តាមរយៈសេចក្ដីប្រកាសលេខ ៤៩/២១៤ ដែលចុះកាលពីថ្ងៃទី២៣ ខែធ្នូ ឆ្នាំ ១៩៩៤។

យោងតាមអង្គការជនជាតិដើមភាគតិចនៅកម្ពុជាបានឲ្យដឹងថា គោលដៅរួមនៃការប្រារព្ធទិវាអន្ដរជាតិជនជាតិដើមនេះ ដើម្បីពង្រឹងកិច្ចសហប្រតិបត្តិការអន្តរជាតិ ក្នុងទិសដៅដើម្បីដោះស្រាយបញ្ហាប្រឈមរបស់ជនជាតិដើមភាគតិចក្នុងវិស័យសំខាន់ៗដូចជាវិស័យ វប្បធម៌ ការអប់រំ សុខភាព សិទ្ធិមនុស្ស បរិស្ថាន និងការអភិវឌ្ឍន៍សង្គម និងសេដ្ឋកិច្ចជាដើម។ លើសពីនេះ ជាតិ ស្ថាប័នថ្នាក់ក្រោមជាតិ និងដៃគូអភិវឌ្ឍន៍នានា សហការគ្នាដើម្បីធានាប្រសិទ្ធភាពការអភិវឌ្ឍប្រកបដោយចីរភាព និងការអភិរក្ស៕

បវរកញ្ញាមានប្រជាប្រិយ ពេជ្រ វត្តីសារ៉ាវឌ្ឍី Miss Grand Cambodia 2022 និងជនបរទេសបានរាំរបាំគោះអង្រែជាមួយគ្នានៅតំបន់រមណីដ្ឋានអង្គរធ្វើឱ្យមានការចាប់អារម្មណ៍យ៉ាងខ្លាំង។ ព្រឹត្តិការណ៍នេះនៅក្នុងកម្មវិធី «ស្នាមញញឹមនៃកម្ពុជា» ដែលរៀបចំឡើងដោយសមាគមសិល្បករខ្មែរ មានការចូលរួមពីសិល្បករសិល្បការិនីជាច្រើនរូបក្នុងសំលៀកបំពាក់ប្រពៃណីខ្មែរ។

កម្មវិធី «ស្នាមញញឹមនៃកម្ពុជា» ដែលរៀបចំឡើងនៅមុខប្រាសាទអង្គរវត្តដើម្បីលើកកម្ពស់ វិស័យទេសចរណ៍ក្នុងស្រុករួមទាំងផ្សព្វផ្សាយពីវប្បធម៌ អរិយធម៌ខ្មែរផងដែរមានការចូលរួមយ៉ាងច្រើនកុះករពីសិល្បករ សិល្បការិនីជាច្រើនដួងនិងអ្នកផលិតមាតិកាជាដើម។ ក្នុងកម្មវិធីនៅថ្ងៃទី១៥ ខែសីហា មានរៀបចំពិព័រណ៍ម្ហូបអាហារ នំចំណី ផ្លែឈើ និងភេសជ្ជៈបែបខ្មែរ មានការប្រគំតន្ត្រីខា្នតតូច សំឡេងស្រាល ការសម្តែងផ្ទាំងទស្សនីយភាពសិល្បៈផ្សេងៗជាច្រើនទម្រង់ អមដោយការអត្ថាធិប្បាយពីពិធីករពិធីការិនីល្បីៗ ដើម្បីជាកិច្ចស្វាគមន៍ និងផ្តល់ភាពសប្បាយរីករាយជូនភ្ញៀវទេសចរជាតិ និងអន្តរជាតិ។

ការចូលរួមពីសំណាកសិល្បករ សិល្បការិនី រៀបចំខ្លួនតាមបែបប្រពៃណីខ្មែរ និងកម្មវិធីនានាធ្វើឱ្យមានការចាប់អារម្មណ៍យ៉ាងខ្លាំងពីទាំងភ្ញៀវជាតិនិងអន្តរជាតិ ហើយនេះក៏ជាចំណុចទាក់ទាញជួយបានទាំងវិស័យទេសចរណ៍ និងបានលើកតម្កើនសិល្បៈវប្បធម៌ខ្មែរផងដែរ។

ទន្ទឹមនឹងនេះអ្នកលេងបណ្តាញសង្គមមានការចាប់អារម្មណ៍យ៉ាងខ្លាំងបន្ទាប់ពីមានវីដេអូចែករំលែកនៅលើបណ្តាញសង្គមឃើញ ពេជ្រ វត្តីសារ៉ាវឌ្ឍី និងជនបរទេសដ៏ស្រស់សង្ហាកំពុងតែមានភាពរីករាយក្នុងការរាំរបាំគោះអង្រែនៅក្នុងព្រឹត្តិការណ៍ខាងលើនេះ។

ជាបវរកញ្ញាល្បីឈ្មោះមួយរូបប្រចាំប្រទេសកម្ពុជាស្ថិតក្នុងសំលៀកបំពាក់ប្រពៃណីខ្មែរ ទីតាំងនៅប្រាសាទអង្គរជាតំបន់ទេសចរណ៍ដ៏សំខាន់របស់កម្ពុជាធ្វើឱ្យមានភាពទាក់ទាញយ៉ាងខ្លាំង ជនបរទេសក៏ចូលចិត្ត ឯយើងក៏ទទួលបានអត្ថប្រយោជន៍ពីវិស័យទេសចរណ៍ ជាប្រទេសសម្បូរទៅដោយស្នាមញញឹមស្រស់ស្អាតរួសរាយរាក់ទាក់។

ក្រៅពី ពេជ្រ វត្តីសារ៉ាវឌ្ឍី គឺមានអ្នកសិល្បៈច្រើនរូបផ្សេងទៀតបានចូលរួមក្នុងកម្មវិធីនេះដែលញុំាងឱ្យកម្មវិធីពិតជាអធិកអធមភ្ញៀវទេសចរពេញចិត្តយ៉ាងខ្លាំង៕