បរទេស៖ អ្នកវិទ្យាសាស្ត្រអូស្ត្រាលីនៃសាកលវិទ្យាល័យ James Cook បានកំពុងបំប្លែងមីក្រូប្លាស្ទិក ទៅជាក្រាហ្វិនដ៏មានតម្លៃមួយ ដែលវាពិតជាមានប្រយោជន៍ខ្លាំងចំពោះឧស្សាហកម្ម នេះបើយោងតាមការចុះផ្សាយរបស់ Interesting Engineering កាលពីថ្ងៃទី១៥ ខែសីហា ឆ្នាំ២០២៤។
យើងគ្រប់គ្នាដឹងហើយថាមីក្រូប្លាស្ទិកគឺជាភាគល្អិតតូចៗដែលបានជះឥទ្ធិពលអាក្រក់ដល់ប្រព័ន្ធអេកូឡូស៊ី ដូច្នេះដើម្បីដោះស្រាយការកើនឡើងនៃបរិមាណសំណល់ប្លាស្ទិកនៅលើពិភពលោក លោកបណ្ឌិត Adeel Zafar នៅសាកលវិទ្យាល័យ James Cook និងសហការីរបស់លោកក៏បានរកឃើញវិធីសាស្រ្តថ្មីមួយ។

វិធីសាស្ត្រនោះគឺប្រែក្លាយមីក្រូប្លាស្ទិកទៅជាវត្ថុដ៏មានតម្លៃ ទោះជាយ៉ាងណាវិធីសាស្ត្រនេះគឺអាចប្រឈមនឹងបញ្ហាធំៗពីរគឺ ការចំណាយខ្ពស់ និងតម្រូវការកម្លាំងពលកម្មច្រើន។ ទោះបីជាប្រឈមនឹងឧបសគ្គក៏ដោយ ក៏បច្ចុប្បន្ននេះអ្នកវិទ្យាសាស្ត្រកំពុងអនុវត្តវិធីនេះបណ្តើរៗ ដោយពួកគេបានកំទេចដបប្លាស្ទិកទៅជាមីក្រូប្លាស្ទីក បន្ទាប់មកប្រើបច្ចេកទេសសំយោគសម្ពាធបរិយាកាសមីក្រូវ៉េវប្លាស្មា (APMP) ដើម្បីបំប្លែងកំទេចកំទីទៅជាក្រាហ្វិន ដែលជាសារធាតុកាបូនក្រាស់មួយអាតូម រឹងជាងពេជ្រ ២០០ ខ្លាំងជាងដែក និងស្រាលជាងអាលុយមីញ៉ូម ៥ ដង។

Graphene កំពុងទទួលបានប្រជាប្រិយភាពកាន់តែខ្លាំងឡើងនៅក្នុងឧស្សាហកម្មផ្សេងៗគ្នាជាច្រើន ដោយសារវាពិតជាមានប្រយោជន៍ខ្លាំងចំពោះឧស្សាហកម្ម ។ Graphene គឺជាវត្ថុដែលប្រើប្រាស់ចម្រុះបាន ដូចជាការជួយផលិតឧបករណ៍ចាប់សញ្ញា ការចម្រោះទឹក និងការស្រូបយកសារធាតុគីមីអចិន្ត្រៃយ៍ PFAS ជាដើម។ នេះបើតាមការស្រាវជ្រាវថ្មីក៏បានបង្ហាញដែរថា មីក្រូផ្លាស្ទិចពីដបប្លាស្ទិកដែលបោះចោលអាចបំប្លែងទៅជាក្រាហ្វិនយ៉ាងមានប្រសិទ្ធភាពតាមរយៈវិធីសាស្ត្រសំយោគ APMP ។

ហេតុនេះប្រសិនបើអ្នកវិទ្យាសាស្ត្រអូស្ត្រាលីអាចប្រែក្លាយមីក្រូប្លាស្ទិកទៅជាក្រាហ្វិនបានពិតមែន នោះមីក្រូប្លាស្ទិកនឹងក្លាយជាវត្ថុដែលមានតម្លៃបំផុត ដោយសារវាមានប្រយោជន៍ខ្លាំងចំពោះឧស្សាហកម្ម ក៏ដូចជាអាចកាត់បន្ថយការកើនឡើងនៃបរិមាណសំណល់ប្លាស្ទិកនៅលើពិភពលោកបានទៀតផង។ នេះបើយោងតាមលោក Jacob បាននិយាយថា “ការស្រាវជ្រាវនេះមិនត្រឹមតែជួយត្រួសត្រាយនូវវិធីសាស្រ្តថ្មីនៃការសំយោគ graphene ប៉ុណ្ណោះទេ ប៉ុន្តែថែមទាំងរួមចំណែកដល់គោលដៅធំជាងក្នុងការកាត់បន្ថយផលប៉ះពាល់អវិជ្ជមាននៃការបំពុលមីក្រូប្លាស្ទិកលើប្រព័ន្ធអេកូឡូស៊ីផងដែរ”៕

កំពូលតារាបាល់ទាត់ពិភពលោក Cristiano Ronaldo ឬហៅថា CR7 និងគូស្នេហ៍របស់លោកគឺ Georgina Rodriguez ថ្មីៗនេះកំពុងទាក់ទាញការចាប់អារម្មណ៍យ៉ាងខ្លាំងពីមហាជន នៅពេលដែលប្រព័ន្ធផ្សព្វផ្សាយព័រទុយហ្គាល់បង្ហាញពីការចុះហត្ថលេខាលើកិច្ចព្រមព្រៀងមួយ ទាក់ទងនឹងការបែងចែកទ្រព្យសម្បត្តិក្នុងករណីដែលពួកគេចែកផ្លូវគ្នា ខណៈអតីតមិត្តស្រីរបស់ Ronaldo មុនៗមិនទទួលបានទ្រពសម្បត្តិពីលោកនោះទេ ប៉ុន្តែទោះជាយ៉ាងណាគូស្នេហ៍បច្ចុប្បន្នរបស់ CR7 ហាក់មានសំណាងជាងគេ ក៏ព្រោះនាងជាម្តាយបង្កើតរបស់កូនៗ Ronaldo ។

ជាការពិតណាស់ Cristiano Ronaldo និង Georgina Rodriguez គឺជាគូស្នេហ៍ដែលទទួលបានការចាប់អារម្មណ៍ខ្លាំងបំផុតនៅក្នុងឧស្សាហកម្មកីឡា ដោយពួកគេមានអ្នកតាមរាប់រយលាននាក់។ នេះបើយោងតាមប្រព័ន្ធផ្សព្វផ្សាយព័រទុយហ្គាល់ បានឱ្យដឹងថា ប្រសិនបើអ្នកទាំងពីរចែកផ្លូវគ្នា Georgina នឹងទទួលបានប្រាក់ឧបត្ថម្ភចំនួន ១០ ម៉ឺនអឺរ៉ូ (ប្រមាណជាង ១០ ម៉ឺនដុល្លារអាមេរិក) ក្នុងមួយខែពី Ronaldo ពេញមួយជីវិតរបស់នាងតែម្តង។ លើសពីនេះតារាម៉ូឌែលវ័យ ៣០ ឆ្នាំក៏នឹងទទួលបានផ្ទះល្វែងដែលមានតម្លៃប្រហែល ៦ លានអឺរ៉ូក្នុងរដ្ឋធានី Madrid ពី Ronaldo ផងដែរ។

ទោះជាយ៉ាងណានេះគ្រាន់តែជាកិច្ចសន្យានៅពេលដែលពួកគេបែបគ្នាប៉ុណ្ណោះ។ ប៉ុន្តែនាពេលបច្ចុប្បន្នខ្សែប្រយុទ្ធវ័យ ៣៩ ឆ្នាំគឺ CR7 និងមិត្តស្រីគឺកំពុងមានសុភមង្គលជាខ្លាំងបន្ទាប់ពីរួមរស់ជាមួយគ្នាអស់រយៈពេល ៨ ឆ្នាំ។ គួរបញ្ជាក់ដែរថា Ronaldo បានជួប Georgina ជាលើកដំបូងនៅហាងលក់សំលៀកបំពាក់មួយក្នុងទីក្រុង Madrid កាលពីឆ្នាំ ២០១៦ ហើយគូស្នេហ៍មួយគូនេះក៏ចាប់ផ្តើមរួមរស់ជាមួយគ្នាតាំងពីពេលនោះមក។

ទោះបីជាពួកគេមិនបានរៀបការជាមួយគ្នាក៏ដោយ ក៏ Ronaldo តែងតែហៅ Georgina ថា “ប្រពន្ធ” ជានិច្ច និងតែងបង្ហាញពីក្តីស្រឡាញ់របស់លោកទៅឱ្យនាងគ្រប់ពេលវេលា។ នេះបើតាមប្រព័ន្ធផ្សព្វផ្សាយព័រទុយហ្គាល់ Marca គូស្នេហ៍មួយគូនេះទំនងជាបានរៀបការជាមួយគ្នាស្ងាត់ៗ៕

ប្រទេសជប៉ុន ៖ អូណាកាដូរិ គឺជាសត្វមាន់កន្ទុយវែង ដែលមានពិតប្រាកដនៅលើពិភពលោក ហើយវាមិនមែនជាមាន់ក្នុងរឿងនិទានទេ ។ បើទោះជារូបរាងរបស់វាពុំខុសប្លែកពីសត្វមាន់ផ្សេងទៀត ប៉ុន្តែកន្ទុយវាវែងជាសត្វក្ងោក ខណៈអ្នកបានឃើញមាន់កន្ទុយវែងនេះ គិតថា វាគ្រាន់តែជារូបភាពកាត់តប៉ុណ្ណោះ ។

មាន់អូណាកាដូរិ គឺជាពូជកម្រលើពិភពលោក ដែលវាមានកន្ទុយវែងយ៉ាងពិសេស ហើយកន្ទុយមាន់អូណាកាដូរិ ខ្លះអាចវែងរហូតដល់១០ម៉ែត្រឯណោះ ។ មាន់ចំនួន១០ពូជត្រូវបានចាត់ទុកថា ជាសម្បត្តិជាតិរបស់ជប៉ុន ក្នុងនោះមានតែពូជមាន់អូណាកាដូរិ មួយប៉ុណ្ណោះ ដែលទទួលបានសិទ្ធិពិសេសនៅឆ្នាំ១៩៥២ ។ តាំងពីពេលនោះមក ជប៉ុនហាមនាំចេញមាន់ប្រភេទនេះ និងស៊ុតរបស់វាទៅក្រៅប្រទេស ទើបយើងពុំធ្លាប់ឃើញមាន់កន្ទុយវែងនៅប្រទេសផ្សេង ក្រៅពីជប៉ុន ។

ចំណែកមូលហេតុធ្វើឱ្យមាន់នេះមានកន្ទុយវែង ដោយសារវាមិនជ្រុះរោម និងធ្វើឱ្យកន្ទុយរបស់វាវែងខ្លាំងពុំគួរឱ្យជឿ ។ បើពួកវាត្រូវបានគេចិញ្ចឹមនៅកន្លែងមានបរិយាកាសល្អ នឹងធ្វើឱ្យកន្ទុយវាកាន់តែដុះវែងខ្លាំងឡើងរហូតដល់វាងាប់ ។ ប្រវត្តិរបស់មាន់កន្ទុយវែង ត្រូវបានពលរដ្ឋជប៉ុនរៀបរាប់បន្តគ្នាតាំងពីរាប់ពាន់ឆ្នាំមុនមកម្ល៉េះ ។

ពលរដ្ឋជប៉ុនជឿថា ពូជមាន់អូណាកាដូរិ ទើបតែងបង្កើតឡើងនៅសតវត្សទី១៧ ក្នុងទីក្រុងថូសាក់ លើកោះឈីកូគុ ប្រទេសជប៉ុន ។ ប៉ុន្តែគ្មានអ្នកណាដឹងច្បាស់ថា កន្ទុយវែងរបស់វាមានដើមកំណើតមកពីណាទេ ។

រីឯអ្នកជំនាញជឿថា មាន់អូណាកាដូរិ មានកន្ទុយវែង ដោយសារវាមានតំណរពូជមកពីពូជមាន់កន្ទុយវែងផ្សេងទៀត ដូចជា ៖ ពូជឆូកូកុ, ថូថេនកុ និងមីណូហ៊ីគិ ។ មាន់អូណាកាដូរិ មានកន្ទុយវែងយ៉ាងស្រស់ស្អាត គឺបណ្តាលមកពីការហ្សែនដែលជួយឱ្យរោមរបស់វាមិនជ្រុះ ព្រមទាំងមានហ្សែនផ្សេងទៀតជួយឱ្យរោមដុះវែង ។

អ្វីគួរឱ្យចាប់អារម្មណ៍ គឺកន្ទុយមាន់អូណាកាដូរិ មិនជ្រុះពីខ្លួននេះ កើតឡើងតែលើមាន់ឈ្មោលប៉ុណ្ណោះ ប៉ុន្តែរោមនៅផ្នែកផ្សេងទៀតនឹងជ្រុះក្នុងរយៈពេល៣ឆ្នាំម្តង ។ នេះជាមូលហេតុដែលអ្នកបង្កាត់ពូជមាន់នៅអឺរ៉ុបពុំចូលចិត្តមាន់នេះទេ ដោយសារកន្ទុយវែងរបស់វានឹងនៅជាប់ខ្លួនរយៈពេលយូរ ។ ក្រៅពីនេះ មាន់អូណាកាដូរិ ពិបាករស់នៅតំបន់អឺរ៉ុប ព្រោះតែអាកាសធាតុ ។

ហេតុនេះ អ្នកបង្កាត់ពូជមាន់នៅអឺរ៉ុបបានយកពូជមាន់អូណាកាដូរិ ទៅបង្កាត់ពូជជាមួយមាន់អឺរ៉ុប ដើម្បីឱ្យវាអាចរស់នៅតំបន់អឺរ៉ុបបាន ។ ក្រោយពេលបង្កាត់ពូជរួច ពួកគេក៏ទទួលបានពូជមាន់ថ្មីឈ្មោះ «យឺរ៉ាម៉ាន់ ហ្វីនិក» ដែលមានលក្ខណៈស្រដៀងនឹងមាន់អូណាកាដូរិយ៉ាងខ្លាំង ប៉ុន្តែវាជ្រុះរោមញឹកញាប់ ។

ពូជមាន់អូណាកាដូរិ សុទ្ធនឹងមានកន្ទុយវែងយ៉ាងហោចណាស់១ម៉ែត្រកន្លះ ហើយបើគេចិញ្ចឹមវានៅកន្លែងមានបរិយាកាសល្អ កន្ទុយរបស់វានឹងដុះវែងជិត១ម៉ែត្រក្នុង១ឆ្នាំ ។ ហេតុនេះ មាន់អូណាកាដូរិ កន្ទុយវែងបានក្លាយជារឿងធម្មតានៅជប៉ុន ខណៈទិន្នន័យមាន់មានកន្ទុយវែងបំផុត គឺស្មើនឹង១១.៣ម៉ែត្រ ។

ក្រៅពីមាន់អូណាកាដូរិ មានកន្ទុយវែងហើយ វានឹងមានតម្លៃខ្ពស់តាមចំនួនរោមពិសេសនៅលើកន្ទុយ ដែលរោមនេះហៅថា «Kawaro-Honge» គឺមានរោមចាប់ពី១ ទៅ៤រោមលើកន្ទុយ ។ បើមាន់ណាមានរោម Kawaro-Honge ចំនួន៤ វានឹងក្លាយជាតម្រូវការរបស់អ្នកបង្កាត់ពូជមាន់ និងមានតម្លៃខ្ពស់ ។

បច្ចុប្បន្ន មាន់អូណាកាដូរិ ត្រូវបានចាត់ទុកថា ជាសត្វប្រឈមនឹងការជិតផុតពូជ ហើយនៅសល់ត្រឹមតែ២៥០ក្បាលប៉ុណ្ណោះ ។ មូលហេតុមួយក្នុងចំណោមមូលហេតុធ្វើឱ្យវាជិតផុតពូជ គឺដោយសារវាពងត្រឹមតែ២៥ ប៉ុណ្ណោះក្នុង១ឆ្នាំ ៕

ប្រទេសម៉ិកស៊ិក ៖ Jala គឺជាទីក្រុងតូចមួយស្ថិតនៅរដ្ឋ Nayarit ប្រទេសម៉ិកស៊ិក ដែលមានឈ្មោះល្បីល្បាញថា កសិករនៅទីនេះ អាចដាំផ្លែពាតមានទំហំធំ និងវែងបំផុតលើពិភពលោក ។ បើទោះជាពូជពោតប្រភេទនេះត្រូវបានគេយកទៅដាំដុះនៅតំបន់ផ្សេងទៀតរបស់ម៉ិកស៊ិកក្តី ប៉ុន្តែវាពុំចេញផ្លែធំវែង ដូចដាំនៅទីក្រុង Jala ទេ ។

កាលពីឆ្នាំ២០១៩ ឃេស៊ុត ណាសារីអូ ជាកសិកររស់នៅទីក្រុង Jala បានជាប់ចំណាត់ថ្នាក់ទី១ ក្នុងការប្រកួតប្រជែងផ្លែពោតប្រចាំឆ្នាំ ដែលមានទំហំធំ និងវែងបំផុតលើពិភពលោក ។ ផ្លែពោតរបស់កសិកររូបនេះ មានប្រវែងរហូតដល់៣៩.៥សង់ទីម៉ែត្រ និងវែងជាងផ្លែពោតរបស់កសិករជាប់ចំណាត់ថ្នាក់ទី២ ត្រឹមតែ០,៥សង់ទីម៉ែត្រប៉ុណ្ណោះ ខណៈផ្លែពោតរបស់អ្នកចូលរួមប្រកួតផ្សេងទៀត ក៏មានទំហំធំ និងវែង ប្រហាក់ប្រហែលគ្នាដែរ ។

ផ្លែពោតដែលពួកគេយកមកប្រកួតប្រជែងនាពេលនោះ គឺជាពូជពោតយក្សមានដើមកំណើតនៅទីក្រុង Jala ដែលគេបានស្គាល់យ៉ាងច្បាស់នៅក្នុងឧស្សាហកម្មកែច្នៃពោត កាលពីជាង១០០ឆ្នាំមុន ។ ប៉ុន្តែបច្ចុប្បន្ន ផ្លែពោតយក្សមានទំហំកាន់តែតូចទៅៗ បើធៀបនឹងផ្លែពោតដែលបានដាំដុះកាលពីមុន ។ ជាក់ស្តែង កាលពីឆ្នាំ២០១៦ ផ្លែពោតរបស់អ្នកជាប់ចំណាត់ថ្នាក់ទី១ មានប្រវែងត្រឹមតែ៤៥សង់ទីម៉ែត្រប៉ុណ្ណោះ ខណៈផ្លែពោតដាំដុះនៅឆ្នាំ១៩២៤ មានប្រវែងរហូតដល់៦០សង់ទីម៉ែត្រ ។

ចំណែកមូលហេតុធ្វើឱ្យផ្លែពោតនេះមានប្រវែងកាន់តែខ្លីជាងមុន ដោយសារចំនួនកសិករដាំពោតនៅទីក្រុង Jala កាន់តែតិចជាងមុន និងដាំវាលាយឡំជាមួយពោតផ្សេង ។ ឃេរ៉ូឡៃណា ខាណាសូ ជាអ្នកស្រាវជ្រាវផ្នែកសេដ្ឋកិច្ច និងសង្គមនិយាយថា ៖ «យើងពុំគួរប្រើប្រាស់គ្រឿងម៉ាស៊ីនក្នុងចម្ការពោតនៅទីក្រុង Jala ទេ ដោយសារទំហំរបស់វា និងតម្រូវការលើទីផ្សារ ។ យើងត្រូវប្រមូលផលពោតដោយដៃ ដោយសារដើមវាមានកម្ពស់ខ្ពស់ជាងក្បាលមនុស្ស ហើយកសិករត្រូវជិះសេះកាច់ពោតក្នុងចម្ការ» ។

បើទោះជាពោតយក្សមានទំហំធំខ្លាំងគួរឱ្យចាប់អារម្មណ៍ និងមានរសជាតិឆ្ងាញ់ក្តី ប៉ុន្តែពោតនេះកំពុងតែជិតផុតពូជបន្តិចម្តងៗពីទីក្រុង Jala ដោយសារកសិករនៅទីនេះឈប់ដាំដុះ ហើយពួកគេប្តូរទៅដាំពោតពូជផ្សេងវិញ ពីព្រោះងាយស្រួលថែទាំជាង ។ ម្យ៉ាងទៀត នៅតាមជ្រលងភ្នំនានា កសិករបានដាំពោតយក្សនេះលាយឡំជាមួយពោតផ្សេងៗ ទើបធ្វើឱ្យវាមានប្រវែងកាន់តែខ្លី និងធ្វើឱ្យអ្នកជំនាញបារម្ភពីការបាត់បង់ពូជពោតប្រភេទនេះ ។

អ្វីគួរឱ្យចាប់អារម្មណ៍ បើទោះជាគេបញ្ជូនពូជពោតមានដើមកំណើតនៅទីក្រុង Jala ទៅដាំនៅទីក្រុងផ្សេងៗរបស់ប្រទេសម៉ិកស៊ិក ដូចជា ៖ ដាំទីក្រុង Sinaloa និងទីក្រុង Jalisco ប៉ុន្តែវាពុំមានទំហំធំវែង ដូចដាំនៅតាមជើងភ្នំភ្លើងសេបូរ៉ូកូ នៅទីក្រុង Jala ដែលសម្បូរដោយសារធាតុរ៉ែក្នុងដីឡើយ ៕

ប្រទេសចិន ៖ ពេលប្រទេសចិនឈានទៅផ្តល់សេវាកម្មរថយន្តតាក់ស៊ីបើកបរដោយស្វ័យប្រវត្តិ និងកំពុងសាកល្បងរថយន្តតាក់ស៊ីប្រភេទនេះបើកបរនៅតាមផ្លូវនានាក្នុងទីក្រុងជាច្រើន ប៉ុន្តែវាបែរជាធ្វើឱ្យអ្នកបើកបររថយន្តតាក់ស៊ីកាន់តែបារម្ភទៅវិញ ពីព្រោះពួកគេខ្លាចថា រថយន្តតាក់ស៊ីគ្មានមនុស្សបើកទាំងនេះនឹងធ្វើឱ្យពួកគេបាត់បង់ការងារ និងចំណូល ។

បច្ចុប្បន្ន សេវាកម្មរថយន្តតាក់ស៊ីបើកបរដោយស្វ័យប្រវត្តិ ត្រូវបានគេឃើញកាន់តែច្រើននៅតាមផ្លូវក្នុងទីក្រុង Wuhan ដូចជា ៖ រថយន្តតាក់ស៊ីម៉ាក Apollo Go របស់ក្រុមហ៊ុនបច្ចេកវិទ្យាដ៏ធំបំផុតឈ្មោះ Baidu ។ ក្រុមហ៊ុននេះកំពុងសាកល្បងផ្តល់សេវាកម្មរថយន្តតាក់ស៊ីបើកបរដោយស្វ័យប្រវត្តិចំនួន៥០០គ្រឿង ក្នុងទីក្រុង Wuhan ។

សារព័ត៌មាន Reuters រាយការណ៍ថា សេវាកម្មរថយន្តតាក់ស៊ីបើកបរដោយស្វ័យប្រវត្តិបានធ្វើឱ្យអ្នកប្រកបរបរបើករថយន្តតាក់ស៊ីនៅប្រទេសចិនព្រួយបារម្ភ ដោយសាររថយន្តបើកបរដោយស្វ័យប្រវត្តិផ្តល់សេវាកម្មភាគច្រើនក្នុងចម្ងាយផ្លូវជិតៗ ។ ហេតុនេះ វាប៉ះពាល់ដល់ប្រាក់ចំណូលរបស់អ្នកបើករថយន្តតាក់ស៊ី ខណៈក្រុមហ៊ុន Baidu មានគម្រោងពង្រីកសេវាកម្មរថយន្តបើកបរដោយស្វ័យប្រវត្តិឱ្យបានដល់១០០ទីក្រុងនៅឆ្នាំ២០៣០ គឺកាន់តែធ្វើឱ្យអ្នកបើករថយន្តតាក់ស៊ីបារម្ភខ្លាំងឡើង ។

សារព័ត៌មាន Reuters រាយការណ៍ទៀតថា មិនមែនមានតែអ្នកបើកបររថយន្តតាក់ស៊ីប៉ុណ្ណោះទេដែលបារម្ភ ប៉ុន្តែបណ្តាគ្រូបង្រៀនបើករថយន្តនៅតាមសាលានានា ក៏បារម្ភជាមួយស្ថានការណ៍នេះដូចគ្នាដែរ ពីព្រោះបច្ចុប្បន្ន សាលាបង្រៀនបើករថយន្តចាប់ផ្តើមយកមនុស្សយន្តមកបង្រៀនបើករថយន្តកាន់តែច្រើន ។ សាលាបង្រៀនបើករថយន្តមួយកន្លែងឱ្យដឹងថា បច្ចុប្បន្ន អ្នករៀនបើករថយន្តភាគច្រើនជ្រើសយកមនុស្សយន្តមកបង្រៀនពួកគេ ហើយអត្រាប្រឡងជាប់ក៏កើនឡើងដែរ ។

សាលាបង្រៀនបើករថយន្តមួយចំនួនបានទទួលយកគ្រូបង្រៀនបើករថយន្តតិចជាងមុន ហើយសាលាទាំងនេះងាកមកប្រើប្រាស់បច្ចេកវិទ្យា AI ឬមនុស្សយន្តជួយបង្រៀនបើករថយន្តជំនួសមនុស្ស ដោយសារអាចសន្សំសំចៃប្រាក់ឈ្នួល, ឆ្លើយតបនឹងការរៀន ការបង្រៀនឯករាជ្យ ហើយសិស្សអាចរៀនបើករថយន្តដោយខ្លួនឯងគ្រប់ពេលវេលា ។

គ្រូបង្រៀនបើករថយន្ត មានតួនាទីបង្រៀនសិស្សឱ្យចេះបើករថយន្តតែប៉ុណ្ណោះ ហើយពុំបានបង្រៀនពីទ្រឹស្តីផ្សេងទេ ។ ប៉ុន្តែបច្ចេកវិទ្យា AI ក្នុងរថយន្តនឹងផ្តល់ការណែនាំសំខាន់ៗពីវិធីបើកបរ និងជួយបំពេញបន្ថែមនូវចំណុចខ្វះខាតរបស់គ្រូបង្រៀនបើកបរ ។

យោងតាមទិន្នន័យពីផ្នែកវិភាគរបស់ក្រុមហ៊ុនបណ្តាញសារព័ត៌មាន The Economist ដែលតែងតែចុះផ្សាយអត្ថបទពីការប្រកបអាជីវកម្ម, ស្ថានការណ៍នយោបាយ និងបច្ចេកវិទ្យានៅប្រទេសចិន បញ្ជាក់ថា រដ្ឋាភិបាលចិននឹងកំណត់កូតារថយន្តតាក់ស៊ីបើកបរដោយស្វ័យប្រវត្តិនៅតាមផ្លូវ និងបង្កើនការគាំទ្រអ្នកបើកបររថយន្តតាក់ស៊ីដែលបាត់បង់ការងារ ។ វាអាចជាវិធានការមួយរបស់រដ្ឋាភិបាលចិនដើម្បីដោះស្រាយបញ្ហានេះ ៕

ប្រទេសឡាវ ៖ រដ្ឋាភិបាលឡាវបានជំរុញគោលនយោបាយផ្សេងៗពាក់ព័ន្ធនឹងការងារ និងលើកទឹកចិត្តឱ្យពលរដ្ឋរបស់ខ្លួនចេញទៅធ្វើការនៅក្រៅប្រទេស តាមរយៈការស្វែងរកឱកាសការងារថ្មីៗបន្ថែមទៀត ជាពិសេស ការងារនៅបណ្តាប្រទេសអាស៊ាន ។

កាលពីថ្ងៃទី១៥ ខែសីហា ឆ្នាំ២០២៤ សារព័ត៌មានស៊ីនហួររាយការណ៍ថា យោងតាមរបាយការណ៍របស់ក្រសួងការងារឡាវបញ្ជាក់ថា ពលរដ្ឋឡាវដែលស្វែងរកការងារធ្វើអាចទៅធ្វើការនៅក្រៅប្រទេសបាន ចាប់តាំងពីប្រទេសឡាវបានអនុវត្តច្បាប់បញ្ជូនពលករទៅធ្វើការនៅក្រៅប្រទេស កាលពីឆ្នាំ២០០២ ។ ច្បាប់នេះបានជួយឱ្យពលករឡាវមានប្រាក់ចំណូល និងអភិវឌ្ឍន៍ជំនាញការងារដ៏មានតម្លៃ ។

តាមទិន្នន័យបញ្ជាក់ថា ចំនួនពលករឡាវដែលចេញទៅធ្វើការនៅក្រៅប្រទេស បានកើនឡើងជារៀងរាល់ឆ្នាំ គឺចាប់ពីចំនួន៤៩.៤៤១នាក់ នៅឆ្នាំ២០១៧ មកស្មើនឹង១២០.៣៦០នាក់ នៅឆ្នាំ២០១៨ ។ លើសពីនេះ មានពលរដ្ឋឡាវទៅធ្វើការនៅក្រៅប្រទេស ស្មើជាង៦ម៉ឺននាក់ បើគិតចាប់ពីខែមករា ឆ្នាំ២០២៤ រហូតមកដល់ពាក់កណ្តាលខែសីហា ឆ្នាំ២០២៤ ។

បច្ចុប្បន្ន ពលរដ្ឋឡាវបានទៅធ្វើការនៅក្រៅប្រទេស មានចំនួនសរុបស្មើជាង៤សែននាក់ ហើយពួកគេបានផ្ញើប្រាក់មកឱ្យក្រុមគ្រួសារនៅឡាវ ជាមធ្យមស្មើជាង៦២៥លានដុល្លារអាមេរិក ។ តម្រូវការការងារនៅក្រៅប្រទេសបានកើនឡើងយ៉ាងខ្លាំង ហើយក្រសួងការងារឡាវបានចុះអនុស្សរណៈយោគយល់គ្នា ដើម្បីបញ្ជូនពលករឡាវទៅធ្វើការនៅប្រទេសមួយចំនួន ដូចជា ៖ ថៃ, ជប៉ុន និងកូរ៉េខាងត្បូង ។ ក្រសួងការងារឡាវ ក៏បានស្វែងរកឱកាសការងារឱ្យពលកររបស់ខ្លួនធ្វើការក្នុងបណ្តាប្រទេសជាសមាជិកអាស៊ានផងដែរ ។

ជាមួយគ្នានេះ ក្រសួងការងារឡាវបានកែសម្រួលគោលនយោបាយផ្សេងៗពាក់ព័ន្ធនឹងតួនាទីការងារ, គោលនយោបាយបញ្ជូនពលករឡាវទៅធ្វើការនៅក្រៅប្រទេស និងបង្កើនការគ្រប់គ្រងក្រុមហ៊ុនផ្តល់សេវាកម្មស្វែងរកការងារ ដើម្បីឱ្យពលរដ្ឋឡាវធ្វើការនៅក្រៅប្រទេសដោយស្របច្បាប់ ។

យុវជនឡាវជាច្រើនបានសម្រេចចិត្តទៅធ្វើការនៅក្រៅប្រទេស ដោយសារកត្តាជាច្រើន ដូចជា ៖ ការងារក្នុងស្រុកផ្តល់ប្រាក់ខែតិចតួច និងពុំអាចផ្គត់ផ្គង់ជីវភាពនាពេលបច្ចុប្បន្ន , ភាពក្រីក្រ, វិបត្តិសេដ្ឋកិច្ចឡាវ និងបញ្ហាអតិផរណា ។ បើទោះជារដ្ឋាភិបាលឡាវប្រកាសថា នឹងដំឡើងប្រាក់ឈ្នួលឱ្យពលរដ្ឋក្តី ប៉ុន្តែវានៅតែពុំគ្រប់គ្រាន់ដើម្បីឱ្យពលរដ្ឋមានជីវភាពសមរម្យបានទេ ៕