ប្រទេសថៃ ៖ នាយករដ្ឋមន្ត្រីថ្មីប្រទេសថៃ លោកស្រី ផេថងថាន ស៊ីណាវ៉ាត់ បានថ្លែងអំណរគុណនាយករដ្ឋមន្ត្រីប្រទេសកម្ពុជា, ម៉ាឡេស៊ី និងសិង្ហបុរី ខណៈនាយករដ្ឋមន្ត្រីទាំង៣រូប បានបង្ហាញនូវក្តីរីករាយដែលលោកស្រីបានឡើងកាន់តំណែងជានាយករដ្ឋមន្ត្រីថៃ ទី៣១ ។ លោកស្រីបញ្ជាក់ថា នឹងប្តេជ្ញាសហការជិតស្និទ្ធជាមួយនាយករដ្ឋមន្ត្រីប្រទេសទាំង៣ ។

នៅថ្ងៃទី១៩ ខែសីហា ឆ្នាំ២០២៤ សារព័ត៌មានថៃរាយការណ៍ថា លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃបានសរសេរក្នុងបណ្តាញសង្គម X ទៅកាន់មេដឹកនាំប្រទេសជិតខាងចំនួន៣ រួមមាន ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា, លោក Anwar Ibrahim នាយករដ្ឋមន្ត្រីម៉ាឡេស៊ី និងលោក Lawrence Wong នាយករដ្ឋមន្ត្រីសិង្ហបុរី ។

លោកស្រីថ្លែងថា សូមអរគុណសម្តេចមហាបវរធិបតី ហ៊ុន ម៉ាណែត ដែលសម្តេចបានចូលរួមបង្ហាញក្តីរីករាយមុនគេ ពេលលោកស្រីធ្វើជានាយករដ្ឋមន្ត្រី ហើយលោកស្រីបញ្ជាក់ កម្ពុជា គឺជាប្រទេសនៅជិតខាង និងជាដៃគូយុទ្ធសាស្ត្ររបស់ថៃ ។ ប្រទេសថៃនឹងធ្វើពិធីអបអរខួបលើកទី៧៥ឆ្នាំ នៃការបង្កើតទំនាក់ទំនងការទូតរវាងកម្ពុជា និងថៃ នៅឆ្នាំ២០២៥ ហើយថៃនឹងសហការយ៉ាងជិតស្និទ្ធជាមួយកម្ពុជា ដើម្បីបង្កើនទំនាក់ទំនងរវាងគ្នាទៅវិញទៅមក ។

លោកស្រី ផេថងថាន ស៊ីណាវ៉ាត់ ក៏បានថ្លែងអំណរគុណដល់នាយករដ្ឋមន្ត្រីម៉ាឡេស៊ី លោក Anwar Ibrahim ផងដែរ ដែលលោកបានសរសេរក្នុងបណ្តាញសង្គម X ដើម្បីចូលរួមរីករាយ ដែលលោកស្រីឡើងកាន់តំណែងជានាយករដ្ឋមន្ត្រីប្រទេសថៃ ។

លោកស្រីបញ្ជាក់ថា ថៃ និងម៉ាឡេស៊ី ជាប្រទេសជិតខាងគ្នាដែលមានទំនាក់ទំនងល្អយូរមកហើយ ។ កិច្ចសហការជិតសិ្នទ្ធរយៈពេលកន្លងមកក្នុងការងាររបស់អតីតនាយករដ្ឋមន្ត្រីថៃ និងនាយករដ្ឋមន្ត្រីម៉ាឡេស៊ី បានជួយជំរុញដល់ទំនាក់ទំនងរវាងប្រទេសទាំងពីរបន្ថែមទៀត ។ លោកស្រីសង្ឃឹមថា នឹងសហការជាមួយនាយករដ្ឋមន្ត្រីម៉ាឡេស៊ី ក្នុងការជំរុញមិត្តភាព, កិច្ចសហការជិតស្និទ្ធ ដើម្បីផលប្រយោជន៍ប្រទេសទាំងពីរ ។

ក្រៅពីនេះ លោកស្រីក៏បានថ្លែងអំណរគុណដល់លោក Lawrence Wong នាយករដ្ឋមន្ត្រីសិង្ហបុរីផងដែរ ដែលលោកបានបង្ហាញក្តីរីករាយមកកាន់លោកស្រីពេលឡើងជានាយករដ្ឋមន្ត្រីថៃ ។

លោកស្រីថ្លែងថា ថៃ និងសិង្ហបុរី គឺជាមិត្តនឹងគ្នា ព្រមទាំងជាដៃគូជិតស្និទ្ធ ។ ក្នុងឱកាសប្រទេសទាំងពីរប្រារព្ធខួប៦០ឆ្នាំ នៃទំនាក់ទំនងការទូតនៅឆ្នាំ២០២៥ លោកស្រីសង្ឃឹមថា នឹងសហការជាមួយនាយករដ្ឋមន្ត្រីសិង្ហបុរីយ៉ាងជិតស្និទ្ធ ដើម្បីផលប្រយោជន៍របស់ប្រទេសទាំងពីរ និងក្នុងតំបន់បន្តទៀត ៕

ប្រទេសវៀតណាម ៖ កាលពីថ្ងៃទី១៧ ខែសីហា ឆ្នាំ២០២៤ សារព័ត៌មានបរទេសរាយការណ៍ថា ការិយាល័យនយោបាយវៀតណាមបានបញ្ជាឱ្យស្ថាប័នរដ្ឋាភិបាលគ្រប់លំដាប់ថ្នាក់អភិវឌ្ឍន៍ជំនាញភាសាបរទេសរបស់កូនសិស្សតាមសាលារៀននៅទូទាំងប្រទេស ។ ប្រទេសវៀតណាមនឹងកំណត់អង់គ្លេសជាភាសាទី២ ក្នុងសាលារៀនបន្តិចម្តងៗ ធនធានមនុស្សជំនាន់ក្រោយនឹងមានជំនាញភាសាបរទេស ។

ការិយាល័យនយោបាយវៀតណាម គឺជាស្ថាប័នមួយដែលមានអំណាចខ្ពស់បំផុតក្នុងការសម្រេចចិត្តផ្នែកនយោបាយ និងយុទ្ធសាស្ត្រសំខាន់ៗនៅប្រទេសវៀតណាម បានកំណត់គោលនយោបាយដាក់បញ្ចូលអង់គ្លេសជាភាសាទី២ កាលពីថ្ងៃទី១២ ខែសីហា កន្លងមក ។ គោលនយោបាយនេះ គឺផ្អែកលើមតិរបស់គណៈកម្មាធិការមជ្ឈិមបក្សកុម្មុយនិស្តវៀតណាម កាលពីឆ្នាំ២០១៣ ។

គោលនយោបាយបញ្ចូលអង់គ្លេសជាភាសាទី២ គឺផ្តោតលើកំណែទម្រង់វិស័យអប់រំសំខាន់ និងទូលំទូលាយ ដើម្បីបំពេញតម្រូវការកំណែទម្រង់ផ្នែកឧស្សាហកម្ម និងភាពទាន់សម័យ ។ មន្ត្រីការិយាល័យនយោបាយវៀតណាមបញ្ជាក់ថា ប្រទេសវៀតណាមចាំបាច់ត្រូវតែពង្រឹងគុណភាពធនធានមនុស្សជំនាន់ក្រោយ និងអភិវឌ្ឍន៍ជំនាញភាសាបរទេសរបស់កូនសិស្ស ហើយវៀតណាមនឹងប្រើប្រាស់អង់គ្លេសជាភាសាទី២ ក្នុងសាលារៀនបន្តិចម្តងៗ ។

Bui Thi Thanh Truc ជាសាស្ត្រាចារ្យ និងនាយកផ្នែកភាសាបរទេសនៃសាកលវិទ្យាល័យបរទេស និងបច្ចេកវិទ្យាព័ត៌មានក្នុងទីក្រុងហូជីមិញ និយាយថា នៅពេលអង់គ្លេសក្លាយជាភាសាទី២ ក្នុងសាលារៀនវៀតណាមហើយ ភាសាអង់គ្លេសនឹងត្រូវប្រើប្រាស់ក្នុងឯកសារសិក្សា, សៀវភៅសិក្សា, ការទំនាក់ទំនង និងការបង្រៀនមុខវិជ្ជាមួយចំនួនយ៉ាងទូលំទូលាយ ។

បច្ចុប្បន្ន សាលារៀនរដ្ឋជាច្រើនកន្លែងនៅទីក្រុងហាណូយ, ទីក្រុងហូជីមិញ, ខេត្តបាក់សាង និងខេត្តក្វាងនីន បានសាកល្បងបង្រៀនកូនសិស្សជាភាសាអង់គ្លេសសម្រាប់មុខវិជ្ជាគណិតវិទ្យា និងវិទ្យាសាស្ត្រ ៕

ប្រទេសចិន ៖ កាលពីថ្ងៃទី១៩ ខែសីហា ឆ្នាំ២០២៤ សារព័ត៌មានបរទេសរាយការណ៍ថា រដ្ឋាភិបាលចិននឹងផ្តល់ប្រាក់ឧបត្ថម្ភលើសមុនទ្វេដង ដើម្បីជំរុញឱ្យពលរដ្ឋរបស់ខ្លួនយករថយន្តចាស់ៗមកប្តូររថយន្តថ្មី ។ ការផ្តល់ប្រាក់ឧបត្ថម្ភនេះ គឺពលរដ្ឋមកអាចយករថយន្តចាស់របស់ពួកគេមកប្តូរយករថយន្តអគ្គិសនី និងរថយន្តប្រេងឥន្ធនៈថ្មី ។

សារព័ត៌មាន China Xinhua News បានរាយការណ៍ កាលពីថ្ងៃទី១៦ ខែសីហា ថា ក្រសួងពាណិជ្ជកម្ម និងស្ថាប័នពាក់ព័ន្ធរបស់រដ្ឋាភិបាល ចំនួន៦ នៅប្រទេសចិនបានចេញសេចក្តីប្រកាសថា រដ្ឋាភិបាលនឹងបង្កើនវិធានការជំរុញផ្នែកហិរញ្ញវត្ថុ ដើម្បីជំរុញឱ្យពលរដ្ឋឈប់ប្រើប្រាស់រថយន្តចាស់ៗ និងប្តូរមកទិញរថយន្តថ្មី ។

សេចក្តីប្រកាសនេះបញ្ជាក់ថា រដ្ឋាភិបាលនឹងផ្តល់ប្រាក់ឧបត្ថម្ភឱ្យពលរដ្ឋលើសមុនទ្វេដងសម្រាប់ការទិញ-លក់រថយន្ត ឬយករថយន្តចាស់មកប្តូររថយន្តអគ្គិសនីថ្មី ខណៈកន្លងមក រដ្ឋាភិបាលចិនផ្តល់ប្រាក់ឧបត្ថម្ភចំនួន១ម៉ឺនយាន់ (ឬស្មើ១.៤២៨ដុល្លារអាមេរិក) មកស្មើនឹង២ម៉ឺនយាន់ (ឬស្មើ២.៨៥៧ដុល្លារអាមេរិក) ។

រីឯការផ្តល់ប្រាក់ឧបត្ថម្ភសម្រាប់ការទិញរថយន្តប្រេងឥន្ធនៈ ក៏កើនឡើងផងដែរ គឺកើនពី៧.០០០យាន់ (ឬស្មើ១.០០០ដុល្លារអាមេរិក) ទៅ១៥.០០០យាន់ (ឬស្មើ២.១៤២ដុល្លារអាមេរិក) ។ គោលនយោបាយនេះបានផ្តល់ប្រាក់សម្រាប់ពលរដ្ឋដែលបានដាក់ពាក្យស្នើសុំប្រាក់ ចាប់ពីថ្ងៃទី២៤ ខែមេសា ឆ្នាំ២០២៤ រហូតដល់ថ្ងៃទី១០ ខែមករា ឆ្នាំ២០២៥ ។

បើតាមឯកសារបញ្ជាក់ថា ការលក់រថយន្តអគ្គិសនីថ្មីដឹកអ្នកដំណើរនៅប្រទេសចិន គឺស្មើជិត៥លានគ្រឿង ខណៈការលក់រថយន្តប្រេងឥន្ធនៈដឹកអ្នកដំណើរ ស្មើប្រមាណ៦លាន៥សែន៧ម៉ឺនគ្រឿង គិតចាប់ពីខែមករា ដល់ខែកក្កដា ឆ្នាំ២០២៤ ។ តួលេខនេះបានកើនឡើង៣៣,៧% និងធ្លាក់ចុះ១៥% តាមលំដាប់ បើប្រៀបធៀបប្រចាំឆ្នាំ ។

ទោះយ៉ាងណា ការខ្វះខាតតម្រូវការមានប្រសិទ្ធភាព គឺជាបញ្ហាប្រឈមមួយសម្រាប់សេដ្ឋកិច្ចចិន ហើយការកំណត់គោលនយោបាយខាងលើ គឺដើម្បីលើកកម្ពស់ការទិញរថយន្តថ្មី ។ របាយការណ៍លទ្ធផលការងាររបស់រដ្ឋាភិបាលចិន ប្រចាំឆ្នាំ២០២៤ កំណត់ថា នឹងគាំទ្រគម្រោងពាណិជ្ជកម្មទំនិញប្រើប្រាស់ដើម្បីជំរុញតម្រូវការក្នុងប្រទេស ៕

ក្រោយពន្យាពេលលើកថ្ងៃប្រកួត ពេលនេះជំនួបដ៏កក្រើកប្រចាំឆ្នាំ២០២៤ រវាងស្តេចប្រដាល់ Mike Tyson និងតារា Youtuber Jake Paul នឹងធ្វើឡើងនៅថ្ងៃទី១៥ ខែវិច្ឆិកា ឆ្នាំ២០២៤ខាងមុខនេះ។

ការប្រកួតនេះ ហាក់បីជាការប្រកួតបែបពាណិជ្ជកម្ម ឬទីផ្សារកម្សាន្ត ដើម្បីលើកមុខមាត់ និងរកចំណូលរបស់កីឡាករ Mike Tyson តែប៉ុណ្ណោះ ព្រោះលោកមានវ័សចាស់ កម្លាំងមិនសូវអំណោយផលដូចមុននោះទេ។

បច្ចុប្បន្ន Mike Tyson មានវ័យ៥៧ ឆ្នាំ ធ្លាប់ប្រកួត៥៨ដង ឈ្នះ៥០ ចាញ់៦ និងមិមោឃៈចំនួន២ដង ដោយការប្រកួតចុងក្រោយបំផុត តាំងពីឆ្នាំ២០០៥មកម្ល៉េះ។

រីឯតារា Youtuber Jake Paul មានវ័យ២៧ឆ្នាំ ទើបចូលប្រឡូកវិស័យប្រដាល់កាលពីឆ្នាំ២០២០ ដោយឆ្លងកាត់ការប្រកួត១០លើក ឈ្នះ៩ ចាញ់១។

នៅក្នុងការប្រកួទនេះគេរំពឹងថា Mike Tyson នឹងទទួលបានទឹកប្រាក់២០លានដុល្លារ ខណៈ Jake Paul បានរហូតដល់៤០លានដុល្លារឯណោះ៕

ថ្មីៗនេះ ជាការសោកស្តាយដល់ប្រទេសថៃ ដែលគណៈកម្មការអូឡាំពិកអាស៊ីបានប្រកាសបញ្ឈប់ចេញពីម្ចាស់ផ្ទះ Asian Indoor and Martial art Games លើកទី ៦ ដែលគ្រោងនឹងប្រារព្ធនៅត្រឹមតែ ៣ ខែខាងមុខទៀតនេះ។

Asian Indoor and Martial Arts Games គឺជាព្រឹត្តិការណ៍ពហុកីឡា ដែលធ្វើឡើងរៀងរាល់បួនឆ្នាំម្តងក្នុងចំណោមអត្តពលិកមកពីជុំវិញអាស៊ីប្រមាណជាង ៦០ ប្រទេស។ វាត្រូវបានរៀបចំឡើងដោយក្រុមប្រឹក្សាអូឡាំពិកអាស៊ី (OCA) ដែលរួមបញ្ចូលទាំងព្រឹត្តិការណ៍សិល្បៈក្បាច់គុនផងដែរ។ វាអាចចាត់ទុកបានថាជាព្រឹត្តិការណ៍ពហុកីឡាអាស៊ីដ៏ធំទីពីរបន្ទាប់ពី Asian Games។

យ៉ាងណាមិញ កាលពីថ្ងៃទី១៩ ខែសីហានេះ អាជ្ញាធរកីឡាថៃបានគូសបញ្ជាក់ថា ក្រុមប្រឹក្សាអូឡាំពិកអាស៊ី (OCA) បានចេញនូវសេចក្តីប្រកាសបញ្ឈប់ប្រទេសថៃចេញពីម្ចាស់ផ្ទះ Asian Indoor and Martial art Games (Aimag) លើកទី៦ ដែលគ្រោងនឹងរៀបចំនៅទីក្រុងបាងកក និងខេត្តឈុនបុរី ចាប់ពីថ្ងៃទី ២១ ដល់ថ្ងៃទី ៣០ ខែវិច្ឆិកា ឆ្នាំ ២០២៤នេះ។

យោងតាមរបាយការណ៍ពីក្រុមប្រឹក្សាអូឡាំពិកអាស៊ីបានឲ្យដឹងថា ការដែលបញ្ឈប់ប្រទេសថៃចេញពីម្ចាស់ផ្ទះការប្រកួតពហុកីឡាអាស៊ីដ៏ធំលើកនេះ គឺដោយសារតែខាងថៃដែលជាម្ចាស់ផ្ទះមិនបានបង្ហាញពីរបាយការណ៍ហិរញ្ញវត្ថុឲ្យបានច្បាស់លាស់នោះទេ ស្របពេលដែលការប្រកួតនឹងមកដល់ក្នុងរយៈពេលបីខែដ៏ឆាប់ខាងមុខ ដែលវានឹងផ្តល់នូវផលប៉ះពាល់ដល់ប្រតិបត្តិការនៃការប្រកួតកីឡារបស់យើង ដូច្នេះហើយទើបក្រុមប្រឹក្សាអូឡាំពិកអាស៊ីមិនអាចប្រថុយប្រថានបាន។

គួរបញ្ជាក់ថា ព្រឹត្តិការណ៍ Asian Indoor and Martial Arts Games លើកទីប្រាំមួយ ត្រូវបានពន្យាពេលជាច្រើនលើកច្រើនសារ ដោយសារតែវិបត្តិជម្ងឺកូវីដ១៩ ហើយទើបតែកំណត់ជាផ្លូវការថានឹងធ្វើឡើងនៅថ្ងៃទី ២១- ៣០ ខែវិច្ឆិកា ឆ្នាំ ២០២៤ នេះ ដោយប្រទេសថៃធ្វើជាម្ចាស់ផ្ទះ។ យ៉ាងណាមិញ វាក៏ត្រូវបានលុបចោលទៀត។

ជាមួយគ្នានេះ បើយោងតាមមតិលើកឡើងមួយពីលោក Chaiyapak Siriwat ប្រធានគណៈកម្មាធិការរៀបចំ Aimag បានអះអាងថា នេះទំនងមកពីរដ្ឋាភិបាលថៃខ្វះខាតថវិកាដើម្បីធ្វើជាម្ចាស់ផ្ទះរៀបចំកម្មវិធី ខណៈកាលពីពេលកន្លងទៅនេះ ថៃក៏បានសម្រេចដកកីឡា ១៤ប្រភេទចេញពីកម្មវិធីប្រកួត ដែលបានក្លាយជាប្រធានបទដ៏ក្តៅគគុកក្នុងចំណោមកីឡាករ កីឡាការនីអាស៊ីជាច្រើនផងដែរ៕