បឹងកន្សែង ដែលជាបឹងធម្មជាតិមួយស្ថិតនៅចំកណ្តាលបេះដូងនៃខេត្តរតនគិរី និងជាតំបន់រមណីយដ្ឋានទេសចរណ៍ដ៏មានសក្តានុពលបំផុតមួយក្នុងខេត្តភាគឦសានមួយនេះ។ យ៉ាងណាមិញថ្មីៗនេះ សមិទ្ធិផលថ្មីបន្ថែមមួយទៀតក៏បានលេចចេញមកនៅមាត់បឹងកន្សែងនេះ ដើម្បីត្រៀមស្វាគមន៍ភ្ញៀវទេសចរជាតិ-អន្តរជាតិ។

រូបសំណាក់គ្រួសារសត្វដំរី ដែលរួមមានដំរីចំនួន៣ ក្បាល គឺដំរីឈ្មោល១ ដំរីញី១ និងកូនដំរី១ បានដាក់បង្ហាញទៅកាន់សារធារណៈជនទូទៅនៅទីតាំងខាងត្បូងមាត់បឹងកន្សែង ដើម្បីជាការបន្ថែមនូវសោភ័ណ្ឌភាព និងជានិមិត្តរូបដ៏មានន័យ។

កាលពីថ្ងៃទី៩ ខែកញ្ញា បើយោងតាមការដាក់បង្ហោះរបស់ ឯកឧត្តម ញ៉ែម សំអឿន អភិបាលខេត្តរតនគិរីបានគូសបញ្ជាក់ថា«សមិទ្ធិផលថ្មីបន្ថែមទៀតនាមាត់បឹងកន្សែង ។ ការរៀបចំលើកដាក់គ្រួសារដំរីលើទីតាំងនៅវេលាម៉ោង ៩ ,៩ នាទី និង ៩ វិនាទី នាថ្ងៃទី៩ ខែ៩ ត្រូវនឹងថ្ងៃច័ន្ទ ៧កើត ។ អត្ថន័យគ្រួសារដំរី និងពេលវេលាដែលបានលើកដាក់នៅកន្លែងបញ្ជាក់អំពីៈ សុខដុមរម្យនីយ៌ ត្រជាក់ត្រជុំ ជួបជុំ សុខសាន្ត ថ្កុំថ្កើង រុងរឿង ដែលនឹងជូនពរដល់បងប្អូន ក្រុមគ្រួសារ សង្គមជាតិ ប្រទេសជាតិ ឲ្យកាន់តែរីកចម្រើនក្រោមម្លប់នៃសន្តិភាព!»។

គួរបញ្ជាក់ថា បឹងកន្សែង ដែលមានទីតាំងស្ថិតនៅក្នុងទឹកដីនៃភូមិអូរកន្សែង សង្កាត់បឹងកន្សែង មានចម្ងាយប្រមាណជាង ១គីឡូម៉ែត្រពីក្រុងបានលុង ខេត្តរតនគិរី ។ បឹងធម្មជាតិដ៏ស្រស់ត្រកាលមួយនេះត្រូវបានអ្នករស់នៅក្នុងខេត្តរតនគិរីភាគច្រើនប្រាប់ឱ្យដឹងថា ក្នុងសម័យអតីតកាល នៅតំបន់មាត់បឹងកន្សែង សំបូរទៅដោយរុក្ខជាតិជាច្រើនប្រភេទដុះមានផ្ការីកចោលក្លិនក្រអូបឈ្ងុយឈ្ងប់ ហើយនៅក្នុងផ្ទៃបឹងវិញមានផ្ទៃទឹកថ្លាឈ្វេងមានដុះប្រមូលផ្ដុំដោយសារាយ និងព្រលិតជាដើមមានផ្ការីករហង់។

យ៉ាងណាមិញ បច្ចុប្បន្ននេះ បឹងកន្សែងបានក្លាយជាកន្លែងដែលមានបរិស្ថានស្អាត សោភណ្ឌភាពល្អ និងជារមណីយដ្ឋានល្អឯកប្រកបដោយភាពទាក់ទាញ បន្ទាប់ពីឯកឧត្តមអភិបាលខេត្ត បានដាក់ចេញគម្រោងរៀបចំកែលម្អជុំវិញបរិវេណរមណីដ្ឋានបឹងដ៏ស្រស់ស្អាតនេះឡើងវិញដោយកែលម្អ ហេដ្ឋារចនាសម្ព័ន្ធជុំវិញបរិវេណមាត់បឹង រៀបចំសួនច្បារ និងបំពាក់ភ្លើងបំភ្លឺសាធារណៈ សាងសង់រូបសំណាក់គ្រួសារដំរី រូបសំណាកសត្វអកញីឈ្មោល១គូ ដែលជាសត្វបក្សី រំលេចក្នុងបទចម្រៀងអធិរាជាសម្លេងមាស (អកបឹងកន្សែង) ,ការរៀបចំដាក់ឧបករណ៍ហាត់ប្រាណ និងឧបករណ៍សម្រាប់ក្មេង ជិះលេងតាមមាត់បឹង ការសាងសង់បង្គន់អនាម័យសាធារណៈជាបន្តបន្ទាប់ជាដើមផងដែរ៕

 

រូបភាព៖ Chesda Snapher

កាលពីយប់ម៉ោង៧និង៣០នាទីយប់ ថ្ងៃទី០៩ ខែកញ្ញា ឆ្នាំ២០២៤ មានករណីគ្រោះថ្នាក់ចរាចរណ៍ បណ្តាលឱ្យស្លាប់មនុស្ស២នាក់ នៅមុខផ្សារទំនើបឡាក់គី ស្ថិតនៅលើផ្លូវ១៩៨៦ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

នៅមុនពេលកើតហេតុគេឃើញក្មេងស្រីរងគ្រោះ២នាក់ ម្នាក់អាយុ១១ឆ្នាំ និងម្នាក់ទៀតអាយុ៩ឆ្នាំ ជិះម៉ូតូម៉ាក zoomer X ពាក់ផ្លាកលេខ ភ្នំពេញ 1FS- 7326 ជិះឌុបគ្នា តាមបណ្តោយផ្លូវ១៩៨៦ ក្នុងទិសដៅពីលិចទៅកើត ខណៈពេលជិះមកដល់ចំណុចកើតហេតុ មុខផ្សារទំនើបឡាក់គីផ្សារ ស្រាប់តែមានរថយន្តពណ៌សមួយគ្រឿងមិនចាំម៉ាក ធ្វើដំណើរក្នុងទិសដៅបញ្រ្ចាស់គ្នាក្នុងល្បឿនលឿន ជ្រុលចង្កូតបុកម៉ូតូជនរងគ្រោះយ៉ាងពេញទំហឹងប៉ើងជាច្រើនម៉ែត្របណ្តាលឲ្យក្មេងស្រីទាំង២នាក់ត្រូវជាបងប្អូនបង្កើតស្លាប់នៅកន្លែង ហើយរថយន្តបង្កបានបន្ថែមល្បឿនបើករត់គេចខ្លួនបាត់ស្រមោល។

ក្រោយកើតហេតុនេះ សមត្ថកិច្ចបានចុះធ្វើការវាស់វែង និងស្រាវជ្រាវស្វែងរកម្ចាស់រថយន្ត ដើម្បីចូលខ្លួនមកដោះស្រាយតែផ្លូវច្បាប់។

ចំពោះហេតុការណ៍នេះ មហាជនមួយចំនួនក៏បានទម្លាក់កំហុសទៅលើអាណាព្យាបាលដែលបណ្តាលឱ្យក្មេងមិនទាន់គ្រប់អាយុបើកបរ។

យោងតាមច្បាប់ក្នុងប្រទេសកម្ពុជាយើង បានចែងយ៉ាងច្បាស់ថា”អ្នកបើកបរត្រូវមានអាយុយ៉ាងតិច១៥ឆ្នាំ ឡើងទៅ ដោយមានអត្តសញ្ញាណបណ្ណសញ្ជាតិខ្មែរ ឬឯកសារបញ្ជាក់អត្តសញ្ញាណណាមួយទើបអាចមានសិទ្ធបើកបរនៅក្នុងប្រទេសកម្ពុជា”៕

ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៤-២០២៥ នៅសល់តែរយៈពេលមួយខែទៀតប៉ុណ្ណោះ ពោលគឺនៅថ្ងៃទី៨ ខែតុលា ខាងមុខនេះ។

ស្របពេលដែលពេលវេលាកាន់តែកៀក សិស្សានុសិស្សមួយចំនួនប្រហែលជាបាននឹងកំពុងនឹងត្រៀមខ្លួនរួចជាស្រេច ខណៈមួយចំនួនទៀត អាចនឹងមានភាពពិបាកចំពោះការត្រៀមខ្លួនក្នុងការឡើងសមរភូមិមួយនេះ។

ខាងក្រោមនេះគឺជាគន្លឹះ និងចំណុច ចាំបាច់ដែលបេក្ខជនគួរត្រៀមមុនការប្រឡងចូលមកដល់៖

ថែរក្សាសុខភាព ទាំងផ្លូវកាយនិងផ្លូវចិត្ត
ត្រូវទទួលទាននិងគេងឱ្យបានគ្រប់គ្រាន់ ហើយគិតអ្វីដែលវិជ្ជមានឱ្យបានច្រើន ក្នុងអំឡុងពេលនេះប្អូនៗទី១២ត្រូវតែសម្រាក ដោយមិនគួរដើរលេងកំសាន្តនៅកន្លែងណាឆ្ងាយៗ និងគ្មានសុវត្តិភាពនោះទេ ចៀសវាងមានគ្រោះថ្នាក់ដោយយថាហេតុណាមួយ ជាពិសេសត្រូវប្រុងប្រយត្ន័ទៅលើការធ្វើដំណើរផ្សេងៗ។

ពង្រឹងចំនុចខ្លាំង និងកែប្រែចំនុចខ្សោយទៅជាខ្លាំងវិញ
ត្រូវបែកចែកឱ្យដាច់ថាតើ យើងច្បាស់លើមុខវិជ្ជាមួយណា ហើយខ្សោយមួយណា (រូប គីមី គណិត ខ្មែរ ភូមិ ប្រវត្តិ…) រួចត្រូវពង្រឹកមុខវិជ្ជាណាដែលខ្លួនគិតថាមិនទាន់ល្អនៅឡើយសម្រាប់ខ្លួន។ យើងត្រូវអនុវត្តន៍លំហាត់ និងរំលឹកមេរៀន ធ្វើហើយធ្វើទៀត រហូតទាល់តែ យើងយល់ច្បាស់ពីបាតុភូត ឬប្រធាននៃវិញ្ញាសាទាំងនោះ។

យកវិញ្ញាសាចាស់ៗមកធ្វើឡើងវិញ
រាល់ការយកវិញ្ញាសាឆ្នាំចាស់ៗដែលចេញប្រឡងមកធ្វើ គឺយើងត្រូវកំណត់ម៉ោង អង្គុយ និងប្រើប្រាស់ក្រដាស រួមទាំងពេលវេលានៃការធ្វើវិញ្ញាសា យើងត្រូវជ្រើសយកឱ្យដូចទៅហ្នឹងការប្រឡងពិត ដើម្បីដឹងច្បាស់ថា យើងនៅមានចំនុចខ្វះខាតអ្វីខ្លះ? ចំនុចណាខ្លះដែលយើងធ្វើបានល្អហើយ ត្រូវរក្សាទម្រង់ដដែល? ធ្វើដូចនេះជាប្រចាំ ធ្វើឱ្យយើងមានអារម្មណ៍ស៊ាំជាមួយការប្រឡង ដូចច្នេះក៏ជាផ្នែកមួយបន្ធូរភាពតានតឹងពេលប្រឡងផ្លូវកាផងដែរ៕

ប្រទេសជប៉ុន ៖ មនុស្សភាគច្រើនចូលចិត្តភាសា និងវប្បធម៌របស់ជប៉ុន មិនថាការស្តាប់បទចម្រៀង, ការអានសៀវភៅ និងការទស្សនាភាពយន្តជប៉ុន ហើយពួកគេសង្ឃឹមថា នឹងបានទៅកម្សាន្តនៅជប៉ុននៅថ្ងៃណាមួយ ។ បើទោះជាជប៉ុនស្ថិតនៅទ្វីបអាស៊ីក្តី ប៉ុន្តែវប្បធម៌ប្រទេសនេះមានភាពខុសប្លែកពីប្រទេសផ្សេងៗយ៉ាងខ្លាំង ។

ប្រទេសនីមួយៗតែងតែមានជំនឿពាក់ព័ន្ធនឹងតួលេខខុសៗគ្នា ដូចជា ៖ សហរដ្ឋអាមេរិកជឿថា លេខ១៣ គឺជាលេខពុំល្អ ទើបនៅតាមសណ្ឋាគារ និងទីកន្លែងភាគច្រើនគ្មានជាន់ទី១៣ ទេ ហើយអាមេរិកបានចៀសវាងការប្រើប្រាស់លេខ១៣ ដើម្បីការសប្បាយចិត្ត ។ រីឯប្រទេសចិនវិញចូលចិត្តលេខ៨ ពីព្រោះពលរដ្ឋចិនបញ្ចេញសំឡេងលេខ៨ ថា «Facai» មានន័យថា មានទ្រព្យសម្បត្តិស្តុកស្តម្ភ ។

ចំណែកពលរដ្ឋជប៉ុន ក៏មានជំនឿ និងផ្តល់ភាពសំខាន់លើតួលេខដូចគ្នាដែរ ។ សារព័ត៌មាន KBN សូមបង្ហាញលោកអ្នកថា តើលេខណាខ្លះល្អ និងលេខណាខ្លះមិនល្អសម្រាប់ជប៉ុន?

*លេខមិនល្អ និងបង្ហាញពីភាពសោកសៅ រួមមាន ៖

-លេខ៤ ៖ ជប៉ុនចាត់ទុកថា លេខ៤ គឺជាលេខមិនល្អ ដោយសារការបញ្ចេញសំឡេងលេខ៤ ក្នុងភាសាជប៉ុន គឺ «Shi» ហើយវាដូចគ្នានឹងសំឡេង «Shinu» មានន័យថា «ការស្លាប់» ។ ហេតុនេះជប៉ុនក៏អានពាក្យនេះជា២បែប គឺ «Shi» និង «Yon» ដើម្បីចៀសវាងការបញ្ចេញសំឡេងក្នុងន័យមិនល្អ ។

គេសង្កេតឃើញនៅតាមមន្ទីរពេទ្យ ជាពិសេស បន្ទប់វះកាត់នៅជប៉ុននឹងចៀសវាងវះកាត់អ្នកជំងឺនៅជាន់ទី៤ ឬបន្ទប់លេខ៤ ដើម្បីឱ្យអ្នកជំងឺ និងសាច់ញាតិសប្បាយចិត្ត ។ បើទោះវាជាជំនឿបុគ្គលក្តី ប៉ុន្តែបើជនបរទេសធ្វើអាជីវកម្មជាមួយជនជាតិជប៉ុន គួរតែចៀសវាងការប្រើប្រាស់លេខ៤ ។

-លេខ៦ ៖ ភាសាជប៉ុនបញ្ចេញសំឡេងលេខ៦ ថា «Roku» ឬ «Muttsu» ដែលដូចគ្នានឹងសំឡេង «Mu» មានន័យថា «ភាពទទេស្អាត» ។ ពាក្យនេះមានអត្ថន័យអវិជ្ជមាន ទើបនៅតាមអាកាសយានដ្ឋាន និងស្ថានីយរថភ្លើងរបស់ជប៉ុន ពុំប្រើប្រាស់លេខ៦ ទេ ។

-លេខ៩ ៖ ភាសាជប៉ុនបញ្ចេញសំឡេងលេខ៩ ថា «Ku» គឺវាដូចនឹងសំឡេងពាក្យរបស់ជប៉ុនថា «Ku» មានន័យថា «ទុក្ខព្រួយ» ទើបការធ្វើលំនៅឋាន, សណ្ឋាគារ និងទីកន្លែងផ្សេងៗ ជប៉ុនតែងតែចៀសវាងការប្រើប្រាស់លេខ៩ ។ ផ្ទុយពីនេះ ចិនបែរជាចាត់ទុកថា លេខ៩ គឺជាលេខនាំមកនូវសំណាង ។

*លេខល្អ និងនាំមកនូវលាភសំណាង រួមមាន ៖

-លេខ៧ ៖ ក្នុងជំនឿរបស់ជប៉ុន លេខ៧ មានន័យថា ជាលេខល្អ ។ រីឯផ្នែកពុទ្ធសាសនារបស់ជប៉ុនចាត់ទុកថា លេខ៧ គឺជាលេខល្អយ៉ាងខ្លាំង ដូចជា ៖ ជប៉ុនតែងតែធ្វើពិធីអបអរពេលទារកកើតបាន៧ថ្ងៃ ជាដើម ។

ក្រៅពីនេះ ក៏មានជំនឿពាក់ព័ន្ធនឹងពិធីបុណ្យសំខាន់ៗផងដែរ ដូចជា ៖ ពិធីបុណ្យ Shichifukuin (ឬបុណ្យព្រះសំណាងទាំង៧) និងពិធីបុណ្យរដូវក្តៅដ៏សំខាន់ឈ្មោះ Tanabata ដែលតែងតែរៀបចំនៅថ្ងៃទី៧ ខែ៧ ជាដើម ។

-លេខ៨ ៖ ជប៉ុនអានលេខ៨ ថា «Hachi» ហើយមូលហេតុដែលជប៉ុនចាត់ទុកថា លេខនេះមានអត្ថន័យល្អ ដោយសារពាក្យ «Hachi» សម្គាល់លើការទទួលបានមាសប្រាក់គ្មានទីបញ្ចប់ ។ ក្រៅពីនេះ លេខ៨ មានន័យថា «ជានិរន្ត» ផងដែរ ទើបជប៉ុននិយមប្រើប្រាស់លេខនេះ ៕