វត្តមានរបស់ Speed នៅលើទឹកដីអង្គរ កាលពីយប់មិញនេះរយៈពេលតែប៉ុន្មានម៉ោង ប៉ុន្តែបានធ្វើឲ្យកម្ពុជាចំណេញមិនស្ទើរទេ ក្នុងការបង្ហាញអត្តសញ្ញាណជាតិចំនួន ៣ ធំៗ ទៅកាន់ពិភពលោក ដែលរួមមានទង់ជាតិខ្មែរ អប្សរា និងនំអាកោរត្នោត។

កាលពីថ្ងៃទី ១៦ ខែកញ្ញាម្សិលមិញនេះ ក្នុងព្រឹត្តិការណ៍ Gumball 3000 នៅលើទឹកដីនៃខេត្តសៀមរាប, វត្តមានរបស់ IShowSpeed បានបង្កឲ្យមានការចាប់អារម្មណ៍យ៉ាងខ្លាំង។ ខណៈលោកក៏បានធ្វើការ Stream នៅលើ Channel YouTube ផ្លូវការរបស់លោកដែលមានអ្នកទស្សនារហូតដល់ទៅរាប់សែននាក់ តាមបណ្តាប្រទេសនានាជុំវិញសកលលោក។

អ្វីដែលធ្វើឲ្យគ្រប់គ្នាចាប់អារម្មណ៍ខ្លាំងនោះ នៅក្នុងការឡាយ Speed បានធ្វើការលើកបង្ហាញទង់ជាតិខ្មែរពេញៗដៃ ដោយទឹកមុខញញឹមស្រស់បំព្រង ហាក់មានមោទនភាពយ៉ាងខ្លាំង ព្រមជាមួយនឹងវត្តមានកូនខ្មែរគ្រប់ៗរូបនៅទីនោះ។ បន្ថែមពីនេះ Speed ក៏បានធ្វើការភ្លក់នំអាកោរត្នោតរបស់ខ្មែរ ថែមទាំងលាន់មាត់សរសើរនិងទឹកមុខសរបញ្ជាក់ថា លោកមិនដែលទទួលទាននំណាឆ្ងាញ់បែបនេះពីមុនមកនោះទេ។ កាន់តែពិសេស តួអង្គអប្សរា តំណាងវប្បធម៌ខ្មែរ ក៏បានបង្ហាញខ្លួនក្នុងការឡាយជាមួយនឹង Speed ផងដែរ។

យ៉ាងណាមិញ ១០ ប្រទេសនៅក្នុងអាស៊ាន គឺមានតែកម្ពុជាមួយទេ ដែល Speed បានលើកយកទង់ជាតិមកបង្ហាញពេញៗដៃបែបនេះ អាចចាត់ទុកថាជាកិត្តិយស និងជាការផ្សព្វផ្សាយទៅកាន់ពិភពលោកឲ្យបានស្គាល់និងឈ្វេងយល់ពីកម្ពុជាកាន់តែច្រើនឡើង។

គួរបញ្ជាក់ថា ទឹកដីអច្ឆរិយៈខេត្តសៀមរាប ក៏បានធ្វើឲ្យ Speed សម្រេចតាមបំណង ទទួលបានបាន ៣០ លាន Subscriber លើ YouTube ដែលបណ្តាលឲ្យលោកសប្បាយចិត្តចិត្តឥតឧបមា ហើយលោកក៏បានធ្វើការអរគុណចំពោះប្រទេសកម្ពុជា ប្រទេសតំបន់អាស៊ី និងប្រទេសនានាជុំវិញសកលលោក ហើយលោកប្តេជ្ញាថានឹងយកនឹង ៤០ លាន Subscriber ឲ្យបានក្នុងឆ្នាំ ២០២៥ ផងដែរ៕

ប្រទេសជប៉ុន ៖ Influencer ជនជាតិជប៉ុនម្នាក់រៀបរាប់ថា នាងបានចំណាយប្រាក់អស់ជាង២០លានយ៉េន (ឬជាង១៤ម៉ឺនដុល្លារអាមេរិក) ដើម្បីវះកាត់មុខមាត់របស់ខ្លួនឱ្យក្លាយជាស្រីស្អាត ដោយសារមិត្តភក្តិចំអ.ន់ ខ្លាំងពេក ។ ក្រោយវះកាត់រួច ជីវិតរបស់នាងក៏បានផ្លាស់ប្តូរក្លាយជាមនុស្សថ្មីម្នាក់ទៀតមិនគួរឱ្យជឿ ហើយនាងទទួលបានឱកាសការងារល្អៗផងដែរ ។

យុវតីរូបនេះឈ្មោះ Hirase Airi បានបង្ហោះរូបភាពរបស់ខ្លួនកាលពីមុន និងក្រោយពេលវះកាត់រួច ដើម្បីប្រៀបធៀបគ្នាក្នុង YouTube កាលពីប៉ុន្មានខែមុន ។ វាធ្វើឱ្យអ្នកគាំទ្រនាងក្នុងបណ្តាញសង្គមភ្ញាក់ផ្អើលយ៉ាងខ្លាំងពីរូបសម្ឆស្សរបស់នាងផ្លាស់ប្តូរខ្លាំងបែបនេះ ។

នាងរៀបរាប់ថា តាំងពីក្មេងរហូតដល់ធំ នាងត្រូវបានមិត្តភក្តិចំអន់ថា មុខមិនស្អាតសោះ ។ នាងក៏ប្រាប់ខ្លួនឯងថា ពេលធំឡើង និងមានប្រាក់គ្រប់គ្រាន់ នាងនឹងផ្លាស់ប្តូរមុខមាត់ខ្លួនឯង ។ ក្រោយបញ្ចប់ការសិក្សាកម្រិតមធ្យមសិក្សា នាងក៏ចាប់ផ្តើមធ្វើការ និងទទួលបានប្រាក់ខែមិនច្រើនទេ ដូចជា ៖ ការងារសន្តិសុខ និងភ្នាក់ងារជញ្ជូនសម្ភារៈ ។ ប៉ុន្តែនាងបានសន្សំសំចៃប្រាក់រហូតមក ដើម្បីវះកាត់មុខមាត់អាក្រក់ ។

ពេលសន្សំប្រាក់បាន១០លានយ៉េន នាងក៏សម្រេចចិត្តទៅហាងកែសម្ឆស្សជាលើកដំបូង ហើយក៏វះកាត់ជាបន្តបន្ទាប់ រហូតដល់អស់ប្រាក់ចំនួន២០លានយ៉េន ។ ប៉ុន្តែនាងប្រាប់ថា បើទោះចំណាយប្រាក់ច្រើនក្តី តែនាងចំណេញបានកើតជាមនុស្សថ្មីម្តងទៀត ព្រោះកន្លងមក នាងធ្លាប់ធ្វើការបានប្រាក់ខែតិចតួច ប៉ុន្តែពេលនេះ នាងមានឱកាសបង្ហាញមុខតាមទូរទស្សន៍ល្បីៗ និងក្លាយជាអាយដលរបស់មនុស្សរាប់លាននាក់ ។

ទោះបីមតិខ្លះលើកឡើងថា ការកែសម្ឆស្សនឹងមានគ្រោះថ្នាក់ និងចំណាយប្រាក់ច្រើនក្តី ប៉ុន្តែនាងគិតខុសពីនេះ ហើយនាងគាំទ្រឱ្យនារីៗកែសម្ឆស្ស បើយល់ថាខ្លួនមានចំណុចខ្វះខាត ។ នាងថា នារីៗគួរតែសាកល្បងកែសម្ឆស្ស ដើម្បីផ្តល់ទំនុកចិត្តដល់ខ្លួនឯង ។

បច្ចុប្បន្ន នាង Hirase Airi មានចំនួនអ្នកតាមដានក្នុងបណ្តាញសង្គមរហូតដល់ជាង២លាននាក់ ហើយនាងត្រូវបានគេអញ្ជើញឱ្យទៅចូលរួមកម្មវិធីទូរទស្សន៍ជាញឹកញាប់ ។ ក្នុងកម្មវិធីប្រកួតផ្សេងៗ នាងតែងតែផ្តល់កម្លាំងចិត្តដល់អ្នកមានមុខមាត់មិនស្អាត ឬមិនសង្ហាថា នាងជាភស្តុតាងមានជីវិតដែលអាចបញ្ជាក់ថា ការកែសម្ឆស្សពិតជាអាចផ្លាស់ប្តូរជីវិតមនុស្សឱ្យល្អប្រសើរ ៕

ប្រទេសមីយ៉ាន់ម៉ា ៖ ទីក្រុងណៃពិដោ ប្រទេសមីយ៉ាន់ម៉ា បានលិចទឹកខ្លាំងក្រោយពីភ្លៀងចាប់ផ្តើមធ្លាក់ខ្លាំងតាំងពីថ្ងៃទី៩ ខែកញ្ញា ហើយរហូតមកដល់ថ្ងៃទី១១ ខែកញ្ញា ទឹកលិចខ្លាំងដល់កម្ពស់៥ម៉ែត្រនៅតំបន់ខ្លះ ដោយសារឥទ្ធិពលខ្យល់ព្យុះ Yagi ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១២ ខែកញ្ញា ឆ្នាំ២០២៤ ។

ទឹកជំនន់បានលិចដល់ដំបូលផ្ទះពលរដ្ឋរាប់រយខ្នងនៅទីក្រុងណៃពិដោ រីឯផ្ទះមួយចំនួនទៀតបានខូចខាត និងបាក់រលំដោយសារកម្លាំងទឹកហូរ ។ ពលរដ្ឋរាប់ពាន់នាក់ពុំអាចចាកចេញពីតំបន់ទឹកជំនន់បានទេ ហើយពួកគេបានអង្គុយលើដំបូលផ្ទះរបស់ខ្លួនរង់ចាំអាជ្ញាធរមកជួយសង្គ្រោះ ។

ពលរដ្ឋមីយ៉ាន់ម៉ាបានរាយការណ៍មកវិទ្យុបរទេសថា ពួកគេនៅជាប់លើដំបូលផ្ទះ ដោយសារទឹកជំនន់ហូរមកភ្លាមៗពុំអាចចាកចេញបាន ។ បើទោះជាពួកគេព្យាយាមទូរស័ព្ទប្រាប់អាជ្ញាធរឱ្យមកជួយសង្គ្រោះជាច្រើនលើកក្តី ប៉ុន្តែពុំឃើញអាជ្ញាធរមកជួយទេ ។

ដោយឡែក រដ្ឋឆាន ស្ថិតនៅភាគខាងជើងប្រទេសមីយ៉ាន់ម៉ា ក៏រងគ្រោះដោយសារទឹកជំនន់ដូចគ្នាដែរ ហើយពលរដ្ឋរស់នៅរដ្ឋនេះគ្មានអគ្គិសនីប្រើប្រាស់ និងខ្វះការទំនាក់ទំនងជាមួយអាជ្ញាធរ ។

រីឯរដ្ឋកាឈីន ស្ថិតនៅភាគខាងត្បូងប្រទេសវិញ ទឹកទន្លេមឺយ បានហក់ឡើងខ្ពស់បណ្តាលឱ្យលិចផ្ទះពលរដ្ឋក្នុងទីក្រុងមីវវ៉ាឌី ដែលជាទីក្រុងជាយដែនរបស់មីយ៉ាន់ម៉ា តាំងពីថ្ងៃទី១០ ខែកញ្ញា កន្លងមក ។ ពលរដ្ឋនាំគ្នាជម្លៀសចេញពីផ្ទះទៅរស់នៅតាមវត្ត និងសាលារៀនបណ្តោះអាសន្ន ហើយជំហ៊ានដំបូង មានពលរដ្ឋប្រមាណ៥.០០០នាក់ បានរងគ្រោះដោយសារទឹកជំនន់ ។

ក្រុមភ្នាក់ងារសង្គ្រោះដែលបានចុះជួយជនរងគ្រោះដោយសារទឹកជំនន់នៅទីក្រុងមីវវ៉ាឌី និយាយថា ទឹកបានកើនឡើងខ្ពស់យ៉ាងឆាប់រហ័ស ហើយហូរខ្លាំងបំផុត ដែលពួកគេពុំធ្លាប់ឃើញពីមុន នៅទីក្រុងមីវវ៉ាឌី ។ ដូចគ្នានេះ នៅតំបន់ទំនាប ទឹកបានលិចដល់ដំបូលផ្ទះ ហើយអាជ្ញាធរសន្និដ្ឋានថា ទឹកជំនន់នឹងលិចរហូតដល់តំបន់ដីសណ្តភាគខាងត្បូងប្រទេស ដោយសារទឹកបានហូរតាមទន្លេអ៊ីរ៉ាវ៉ាឌី ។

រហូតមកដល់ថ្ងៃទី១២ ខែកញ្ញា វិទ្យុបរទេសពុំអាចទាក់ទងជាមួយភ្នាក់ងារគ្រប់គ្រងគ្រោះមហន្តរាយរបស់រដ្ឋាភិបាលយោធាមីយ៉ាន់ម៉ា ដើម្បីសាកសួរព័ត៌មានស្ថានការណ៍ទឹកជំនន់ និងការជួយសង្គ្រោះពលរដ្ឋនៅឡើយទេ ៕

ប្រទេសសិង្ហបុរី ៖ យោងតាមរបាយការណ៍របស់ BloombergNEF បង្ហាញថា ប្រទេសសិង្ហបុរីបានកំណត់គោលដៅប្រើប្រាស់រថយន្តអគ្គិសនីឯកជនច្រើនជាងគេក្នុងតំបន់អាស៊ីអាគ្នេយ៍ នៅឆ្នាំ២០៤០ ឬរយៈពេល១៦ឆ្នាំទៀត ។

របាយការណ៍នេះបញ្ជាក់ថា រថយន្តឯកជនប្រមាណជាង៨០% នៅសិង្ហបុរីនឹងផ្លាស់ប្តូរជារថយន្តអគ្គិសនីនៅឆ្នាំ២០៤០ បើធៀបនឹងមធ្យមភាគប្រើប្រាស់រថយន្តអគ្គិសនីក្នុងតំបន់ គឺស្មើត្រឹមតែ២៤% ប៉ុណ្ណោះ ។ បន្ទាប់មក គឺប្រទេសថៃស្ថិតក្នុងចំណាត់ថ្នាក់ទី២ ស្មើ៤១%, វៀតណាម ស្មើ៣១%, ឥណ្ឌូណេស៊ី ស្មើ២៥%, ម៉ាឡេស៊ី ស្មើ១៥% និងហ្វីលីពីន ស្មើ១០% ។

ប្រទេសសិង្ហបុរីបានប្រើប្រាស់រថយន្តអគ្គិសនីច្រើនជាងគេ ក្នុងចំណោមប្រទេសអាស៊ានទាំងនេះ ។ ជាក់ស្តែង កាលពីឆ្នាំ២០២៣ ការប្រើប្រាស់រថយន្តអគ្គិសនីស្មើប្រមាណ១៩% នៃចំនួនរថយន្តសរុបដែលលក់នៅប្រទេសសិង្ហបុរី ។

លោកស្រី Komal Kareer អ្នកសរសេររបាយការណ៍រថយន្តអគ្គិសនីនៅសិង្ហបុរីនិយាយថា ថ្មរថយន្តអគ្គិសនីមានតម្លៃថោកនឹងជួយកាត់បន្ថយការចំណាយដើមទុន ។ វាធ្វើឱ្យរថយន្តអគ្គិសនីអាចប្រកួតប្រជែងជាមួយរថយន្តប្រើប្រាស់ប្រេងឥន្ធនៈបាន ។

កាលពីឆ្នាំ២០២៣ ចំនួនលក់រថយន្តអគ្គិសនីឯកជននៅតំបន់អាស៊ីអាគ្នេយ៍បានកើនឡើងរហូតដល់៣ដង អស់រយៈពេល២ឆ្នាំជាប់ៗគ្នា ដោយសារគោលនយោបាយគាំទ្រ និងការកើនឡើងរបស់ក្រុមហ៊ុនផលិតរថយន្តចិនក្នុងតំបន់ ។ ក្រុមហ៊ុនទាំងនេះទទួលបានការបន្ធូរបន្ថយពន្ធ និងគោលនយោបាយផ្សេងៗពីរដ្ឋាភិបាលបណ្តាប្រទេសអាស៊ាន ។

មូលហេតុចម្បងធ្វើឱ្យការប្រើប្រាស់រថយន្តអគ្គិសនីនៅសិង្ហបុរីកើនឡើង គឺដោយសាររដ្ឋាភិបាលសិង្ហបុរីផ្តល់សិទ្ធិទៅឱ្យម្ចាស់យានយន្ត ហើយគាំទ្រម្ចាស់រថយន្តអាចផ្លាស់ប្តូររថយន្តរបស់ខ្លួនរៀងរាល់១០ឆ្នាំម្តង ។ ផ្ទុយពីនេះ ប្រទេសផ្សេងៗក្នុងតំបន់អាស៊ីអាគ្នេយ៍ គឺម្ចាស់រថយន្តនឹងប្រើប្រាស់រថយន្តរហូតដល់ជាង១០ឆ្នាំ ឬលក់រថយន្តក្នុងផ្សារលក់រថយន្តមួយតឹក ពេលពួកគេប្រើប្រាស់រថយន្តលែងកើត ។

ក្រៅពីនេះ រដ្ឋាភិបាលសិង្ហបុរីបានកំណត់គោលនយោបាយថ្មី គឺចាប់តាំងពីឆ្នាំ២០២៥ តទៅ នឹងមិនតម្រូវឱ្យពលរដ្ឋចុះបញ្ជីថ្មីសម្រាប់រថយន្តឯកជន ឬរថយន្តតាក់ស៊ីដែលប្រើប្រាស់ប្រេងម៉ាស៊ូតទេ ។ ហេតុនេះ ទើបការប្រើប្រាស់រថយន្តអគ្គិសនីនៅសិង្ហបុរីកើនឡើងខ្ពស់ជាងមធ្យមភាគប្រើប្រាស់រថយន្តក្នុងតំបន់អាស៊ីអាគ្នេយ៍យ៉ាងខ្លាំង ៕

ប្រទេសកូរ៉េខាងត្បូង ៖ កាលពីថ្ងៃទី១៣ ខែកញ្ញា ឆ្នាំ២០២៤ សារព័ត៌មាន Yonhap រាយការណ៍ថា កងទ័ពកូរ៉េខាងត្បូងបានដោះកាមេរ៉ាសុវត្ថិភាពប្រមាណ១.៣០០គ្រឿងចេញពីមូលដ្ឋានទ័ព ក្រោយពីរកឃើញថា កាមេរ៉ាសុវត្ថិភាពទាំងនេះផលិតនៅចិន ។ កូរ៉េខាងត្បូងបារម្ភថា វានឹងប៉ះពាល់ដល់សន្តិសុខជាតិ ដោយសារកាមេរ៉ាទាំងនេះបានភ្ជាប់ប្រព័ន្ធ Server រាយការណ៍ទៅចិន ។

យោងតាមប្រភពពុំបញ្ចេញឈ្មោះឱ្យដឹងថា ក្រុមហ៊ុនកូរ៉េខាងត្បូងមួយបានទិញកាមេរ៉ាសុវត្ថិភាពទាំងនេះមកលក់ឱ្យកងទ័ពកូរ៉េខាងត្បូង ប៉ុន្តែកងទ័ពទើបតែជ្រាបពីប្រភពរបស់វាថា ផលិតនៅប្រទេសចិន ក្នុងអំឡុងពេលពួកគេត្រួតពិនិត្យឧបករណ៍កងទ័ព កាលពីដើមឆ្នាំ២០២៤ ។

កាមេរ៉ាសុវត្ថិភាពទាំងអស់ពុំទាន់បានប្រើប្រាស់ក្នុងការងារសន្តិសុខជាតិនៅឡើយទេ ដូចជា ៖ ប្រើប្រាស់នៅតំបន់គ្មានកងទ័ពរវាងប្រទេសកូរ៉េទាំងពីរ ដែលជាតំបន់រឹតបន្តឹងយ៉ាងខ្លាំង ។ ប៉ុន្តែតំបន់នេះត្រូវបានប្រើប្រាស់សម្រាប់ការហ្វឹកហាត់យោធា និងដំឡើងកាមេរ៉ាសុវត្ថិភាពលើរបងជុំវិញមូលដ្ឋានទ័ព ។

ក្រសួងការពារជាតិកូរ៉េខាងត្បូងប្រកាសថា ក្រសួងបានដកហូតកាមេរ៉ាសុវត្ថិភាពផលិតនៅក្រៅប្រទេស ដើម្បីប្តូរមកប្រើប្រាស់កាមេរ៉ាសុវត្ថិភាពផលិតនៅកូរ៉េខាងត្បូងវិញ ។ ប៉ុន្តែក្រសួងការពារជាតិពុំបានបញ្ជាក់ថា តើកាមេរ៉ាសុវត្ថិភាពទាំងនេះផលិតនៅប្រទេសណាទេ ។

ក្រសួងការពារជាតិនឹងចាត់វិធានការតាមច្បាប់ ដោយប្តឹងទាមទារប្រាក់សំណងពីក្រុមហ៊ុនកូរ៉េខាងត្បូង ដែលលក់កាមេរ៉ាទាំងនេះមកឱ្យកងទ័ពកូរ៉េខាងត្បូង ។ ប៉ុន្តែក្រុមហ៊ុនអះអាងថា វាជាការយល់ខុសទាំងស្រុង ពីព្រោះកាមេរ៉ាសុវត្ថិភាពសុទ្ធតែផលិតនៅក្នុងស្រុក ។

រីឯកងទ័ពកូរ៉េខាងត្បូងបញ្ជាក់ថា កាមេរ៉ាសុវត្ថិភាពទាំងអស់ដែលបំពាក់នៅមូលដ្ឋានទ័ពបានផលិតមកសម្រាប់តភ្ជាប់ជាមួយប្រព័ន្ធ Server រាយការណ៍ទៅចិន ។ ប៉ុន្តែព័ត៌មានកងទ័ពកូរ៉េខាងត្បូងពុំទាន់បែកធ្លាយទៅចិននៅឡើយទេ ចាប់ពីបានដំឡើងកាមេរ៉ាសុវត្ថិភាពនៅមូលដ្ឋានទ័ពកូរ៉េខាងត្បូង កាលពីឆ្នាំ២០១៤ ។ ហេតុនេះ ស្ថាប័នពាក់ព័ន្ធរបស់កូរ៉េខាងត្បូងត្រូវតែដោះវាចេញជាបន្ទាន់ដើម្បីសុវត្ថិភាព ហើយចាប់ពីពេលនេះទៅ ពួកគេនឹងប្រើប្រាស់ CCTV ផលិតនៅកូរ៉េខាងត្បូងជំនួសវិញ ៕

ប្រទេសវៀតណាម ៖ ប្រទេសវៀតណាមបានរីកចម្រើនយ៉ាងឆាប់រហ័ស ហើយការវិនិយោគរបស់ក្រុមហ៊ុនបរទេសក្នុងផ្នែកបច្ចេកវិទ្យា, យានយន្ត និងកសិកម្ម បានធ្វើឱ្យផលិតផលក្នុងស្រុកសរុប (GDP) របស់វៀតណាមនៅឆ្នាំ២០២២ កើនឡើងរហូតដល់៨,០២% ។ គេចាត់ទុកថា នេះជាការកើនឡើងខ្លាំងបំផុត បើគិតចាប់ពីឆ្នាំ១៩៩៧ ។

វាបានក្លាយជាកត្តាសំខាន់ជួយទាក់ទាញក្រុមហ៊ុនបរទេសឱ្យមកវិនិយោគនៅវៀតណាម ដោយក្រុមហ៊ុនបរទេសសង្ឃឹមថា នឹងប្រមូលចំណូលនៅវៀតណាមឱ្យបានច្រើន ។ ក្រុមហ៊ុនកាហ្វេអាមេរិក Starbucks ក៏ស្ថិតក្នុងចំណោមក្រុមហ៊ុនទាំងនេះដែរ ដោយ Starbucks បានមកវិនិយោគអាជីវកម្មកាហ្វេនៅវៀតណាមអស់ជាង១០ឆ្នាំហើយ ដោយសារឃើញជនជាតិវៀតណាមចូលចិត្តផឹកកាហ្វេ ។

ប៉ុន្តែក្រុមហ៊ុន Starbucks ពុំអាចប្រកួតប្រជែងឈ្នះកាហ្វេវៀតណាម ឬទាក់ទាញចំណាប់អារម្មណ៍ជនជាតិវៀតណាមទេ ហើយចំណូលក្រុមហ៊ុនពុំស្មើគោលដៅដូចការរំពឹងទុក ។ Starbucks បានបើកអាជីវកម្មកាហ្វេនៅវៀតណាមអស់១០ឆ្នាំ ប៉ុន្តែមានសាខាមិនដល់១០០កន្លែង តើវាបណ្តាលមកពីមូលហេតុអ្វី?

តាមទិន្នន័យរបស់ Nikkei Asia បង្ហាញថា ប្រទេសវៀតណាមមានហាងកាហ្វេរហូតដល់១៩.០០០កន្លែង និងស្ថិតក្នុងចំណាត់ថ្នាក់ទី៤ លើពិភពលោក បន្ទាប់ពីអាមេរិក, ចិន និងកូរ៉េខាងត្បូង ។ កាហ្វេក្នុងស្រុកនៅតែគ្រប់គ្រងទីផ្សារ និងលក់ដាច់ជាងកាហ្វេបរទេស ព្រមទាំងពង្រីកសាខាកាន់តែច្រើន ។

ម្ចាស់ហាងកាហ្វេវៀតណាមនិយាយថា វៀតណាមមានទម្លាប់បរិភោគអាហារក្នុងភោជនីយដ្ឋានរួចហើយ ពួកគេទៅជជែកគ្នាបន្តនៅហាងកាហ្វេ ។ អ្នកខ្លះចូលចិត្តអង្គុយផឹកកាហ្វេតាមផ្លូវបណ្តើរ និងមើលការរកស៊ីលក់ដូរបណ្តើរ ខណៈហាងកាហ្វេមានទំនាក់ទំនងជិតស្និទ្ធជាមួយអតិថិជន ដែលវាជាចំណុចខ្លាំងមួយ ហើយជនបរទេសពុំយល់ទេ ។

នេះជាមូលហេតុដែលអាជីវកម្មរបស់ Starbucks មិនរីកចម្រើននៅវៀតណាម ៖

១-វៀតណាមមិនចូលចិត្តរសជាតិកាហ្វេ Starbucks ៖ អ្នកនាង Trang Do សិល្បករមកពីទីក្រុងដាណាង និយាយថា បើទោះនាងផឹកកាហ្វេ ៣កែវក្នុង១ថ្ងៃ ប៉ុន្តែនាងពុំធ្លាប់ផឹកកាហ្វេ Starbucks ទេ ដោយសារគ្មានរសជាតិច្រើន ។ កាហ្វេ Starbucks មានរសជាតិសាបខ្លាំង មិនដូចកាហ្វេវៀតណាមទេ ។ នាងថា ៖ «កាហ្វេវៀតណាមខាប់ជាង ឈ្ងុយជាង ហើយការឆុងកាហ្វេវៀតណាម ក៏ល្អជាងដែរ» ។

២-កាហ្វេ Starbucks មានតម្លៃថ្លៃ ៖ កាហ្វេ Starbucks មានតម្លៃថ្លៃជាងការចំណាយក្នុងជីវភាពប្រចាំថ្ងៃរបស់ជនជាតិវៀតណាម ទើបពួកគេស្ទាក់ស្ទើរទិញកាហ្វេ Starbucks ផឹក បើទោះមានរសជាតិថ្មីប្លែកក្តី ។ កាហ្វេ Starbucks មានតម្លៃប្រមាណ ៣.៨ដុល្លារអាមេរិក បានក្លាយជាឧបសគ្គដ៏ធំសម្រាប់អតិថិជនវៀតណាម ដែលមានប្រាក់ចំណូលជាមធ្យមត្រឹមតែ ៣៤៥ដុល្លារអាមេរិកក្នុ១ខែ ។

៣-វៀតណាមចូលចិត្តកាហ្វេ Robusta ជាង Arabica ៖ វៀតណាមចូលចិត្តកាហ្វេ Robusta ដោយសារវាខាប់ជាង និងមានជាតិកាហ្វេអ៊ីនច្រើនជាង ។ Starbucks បានប្រើប្រាស់កាហ្វេ Arabica ១០០% ព្រោះគិតថា វាមានរសជាតិឆ្ងាញ់ ប៉ុន្តែការស្រាវជ្រាវបង្ហាញថា ជនជាតិវៀតណាមម្នាក់បានផឹកកាហ្វេ២គីឡូក្រាមក្នុង១ឆ្នាំ ហើយជាកាហ្វេ Robusta ។

វៀតណាមមិននិយមកាហ្វេ Starbucks ហើយពួកគេចូលចិត្តផឹកកាហ្វេក្នុងស្រុកជាងកាហ្វេបរទេស ។ ជាក់ស្តែង កាហ្វេដាក់ស៊ុត ដែលមានដើមកំណើតនៅទីក្រុងហាណូយ តាំងពីឆ្នាំ១៩៤០ អំឡុងពេលវៀតណាមមានសង្គ្រាម និងខ្វះខាតទឹកដោះគោ ទើបវៀតណាមយកស៊ុតដាក់កាហ្វេជំនួសទឹកដោះគោ ។ កាហ្វេស៊ុតទទួលបានការគាំទ្រខ្លាំង ដែល Starbucks ពុំអាចយកឈ្នះ ។

បច្ចុប្បន្ន ហាងកាហ្វេវៀតណាមព្យាយាមបង្កើតរសជាតិកាហ្វេថ្មីៗបន្ថែមទៀតដើម្បីទាក់ទាញអតិថិជន ដោយយកយៅអ៊ួ និងផ្លែឈើផ្សេងៗដាក់ក្នុងកាហ្វេ ។ កាហ្វេពេញនិយមបំផុត គឺកាហ្វេដូង ដែលផ្សំពីគ្រីមដូង, ទឹកដោះគោ និងទឹកកក ។

៤-វៀតណាមផលិតកាហ្វេច្រើនលើពិភពលោក ៖ វៀតណាមជាប្រទេសផលិតកាហ្វេលំដាប់ទី២ លើពិភពលោក បន្ទាប់ពីប្រេស៊ីល ។ កាហ្វេ៩៧% ដែលផលិតនៅវៀតណាម ជាកាហ្វេ Robusta និង ៣% ជាកាហ្វេ Arabica ។ ហេតុនេះ ហាងកាហ្វេក្នុងស្រុកពុំចាំបាច់នាំចូលកាហ្វេពីក្រៅប្រទេសមកលក់ទេ ដោយសារកាហ្វេ Robusta នៅវៀតណាមមានតម្លៃថោក ហើយពួកគេអាចលក់ក្នុងតម្លៃសមរម្យ ៕