ព្រឹត្តិការណ៍ដ៏ល្បីល្បាញមួយក្នុងអំឡុងពេលនេះគឺ Gumball 3000 កំពុងទាញយកចំណាប់អារម្មណ៍មនុស្សម្នាជុំវិញពិភពលោក។ Gumball 3000 នឹងធ្វើដំណើរឆ្លងកាត់ ៥ ប្រទេសគឺវៀតណាម កម្ពុជា ថៃ ម៉ាឡេស៊ី និងសិង្ហបុរី។ ខណៈនៅកម្ពុជាយើង ព្រឹត្តិការណ៍នេះបានប្រព្រឹត្តិទៅនៅឯទីក្រុងភ្នំពេញកាលពីថ្ងៃទី ១៥ ខែកញ្ញា និងថ្ងៃទី ១៦ ខែកញ្ញា នៅលើទឹកដីនៃខេត្តសៀមរាប បរិវេណប្រាសាទអង្គរវត្ត។
ព្រឹត្តិការណ៍ Gumball 3000 បង្កើតឡើងតាំងពីឆ្នាំ ១៩៩៩ ដោយសហគ្រិនជនជាតិអង់គ្លេស គឺលោក Maximillion Cooper ។ Gumball 3000 គឺជាព្រឹត្តិការណ៍ប្រមូលផ្តុំដោយរថយន្តទំនើបៗរាប់ពាន់គ្រឿង ជាមួយនឹងអ្នកចូលរួមរាប់ពាន់នាក់ ដែលនឹងធ្វើដំណើរចុះទៅកាន់ទ្វីបនានាជុំវិញពិភពលោក ចាត់ទុកថាជាការផ្សងព្រេង និងបទពិសោធន៍ដែលមិនអាចបំភ្លេចបាន។
សម្រាប់ឆ្នាំ ២០២៤នេះ គឺជាខួបលើកទី ២៥ ហើយនៃព្រឹត្តិការណ៍ Gumball 3000 ជាមួយនឹងដំណើរត្រួសត្រាយផ្លូវ ៣០០០ គីឡូម៉ែត្រ ដោយបើកបរឆ្លងកាត់ប្រទេសវៀតណាម កម្ពុជា ថៃ ម៉ាឡេស៊ី និងសិង្ហបុរី។ រថយន្តទំនើបរាប់រយគ្រឿង ដែលមានការចូលរួមពីតារាល្បីៗលំដាប់ថ្នាក់អន្តរជាតិ ខ្សែរាជវង្ស, Influencer, Gamer, YouTuber និងសហគ្រិនមកពីជាង ៤០ ប្រទេស។
Gumball 3000 បានចាប់ផ្តើមឡើងនៅទីក្រុង Saigon ប្រទេសវៀតណាម កាលពីថ្ងៃទី ១៤ និង ១៥ ខែកញ្ញា ហើយក៏បានមកដល់ទីក្រុងភ្នំពេញ នាថ្ងៃទី ១៥ ខែកញ្ញា។ បន្ទាប់ពីបានមកដល់ទីក្រុងភ្នំពេញ, Gumball 3000 នឹងធ្វើដំណើរទៅកាន់សំណង់អច្ឆរិយៈទី៨លើពិភពលោកគឺប្រាសាទអង្គរវត្ត នៅថ្ងៃទី ១៦ ខែកញ្ញា។
នៅថ្ងៃបន្ទាប់ដែលត្រូវថ្ងៃទី ១៧ ខែកញ្ញា, Gumball 3000 នឹងទៅដល់ទីក្រុងបាំងកក ប្រទេសថៃ ហើយក៏បន្តដំណើរទៅបង្ហាញខ្លួនក្នុងខេត្តក្រាប៊ី ភាគខាងត្បូងនៃប្រទេសថៃ នៅថ្ងៃទី ១៨ និង ១៩ ខែកញ្ញា។ នៅថ្ងៃទី ២០ ខែកញ្ញា វានឹងទៅដល់ប្រទេសម៉ាឡេស៊ី។ ចុងក្រោយ Gumball 3000 នឹងទៅកាន់ប្រទេសសិង្ហបុរី នាថ្ងៃទី ២១ ខែកញ្ញា ជាវគ្គបិទគូថនៃកម្មវិធីផងដែរ៕
