ប្រទេសអង់គ្លេស ៖ ក្រុមអ្នករចនាម៉ូដមកពីសាកលវិទ្យាល័យ Royal College of Art និង Mperial College London ប្រទេសអង់គ្លេស បានផលិតឧបករណ៍ផ្តល់សញ្ញាភ្លើងឆេះព្រៃប្រាប់ទៅអាជ្ញាធរភ្លាមៗ ដើម្បីឱ្យអាជ្ញាធរអាចគ្រប់គ្រងស្ថានការណ៍ទាន់ពេលវេលា ។ ឧបករណ៍នេះមានលក្ខណៈពិសេសច្រើនយ៉ាងភ្ជាប់ជាមួយបច្ចេកវិទ្យា AI ធ្វើឱ្យពួកគេទទួលបានពានរង្វាន់ពីកម្មវិធី James Dyson Award ប្រចាំឆ្នាំ២០២៤ នៅអង់គ្លេស ។

ឧបករណ៍ផ្តល់សញ្ញាភ្លើងឆេះព្រៃនេះឈ្មោះ Pyri នៅពេលទទួលកំដៅខ្លាំងដោយសារភ្លើងឆេះព្រៃ វានឹងផ្តល់សញ្ញាតាមរលកវិទ្យុប្រាប់ទៅអាជ្ញាធរឱ្យចាត់វិធានការទាន់ពេលវេលា។ ឧបករណ៍នេះដំណើរការដោយថ្ម និងអាចបំពាក់វានៅតាមចំណុចផ្សេងៗក្នុងព្រៃ ឬអាចទម្លាក់ឧបករណ៍ពីលើយន្តហោះមកក្នុងព្រៃផ្សេងៗ និងអាចប្រើប្រាស់បានភ្លាមៗ ។

ឧបករណ៍ Pyri អាចផ្តល់ដំណឹងពីភ្លើងឆេះព្រៃទៅកាន់អាជ្ញាធររហូតដល់ចម្ងាយ៥០គីឡូម៉ែត្រ ហើយគេអាចបោះចោលឧបករណ៍នេះ ក្រោយការប្រើប្រាស់ចំនួន១លើក ។ នៅពេលឧបករណ៍នេះផ្តល់ដំណឹងប្រាប់អាជ្ញាធររួចហើយ វានឹងរលាយដោយសារកំដៅដោយខ្លួនឯង ។

ក្រុមអ្នករចនាម៉ូដនិយាយថា ឧបករណ៍នេះបានផលិតពីវត្ថុធាតុដើមអាចរលាយបាន ហើយវាមានផលប៉ះពាល់បរិស្ថានតិចតួច ។ ពួកគេផលិតវាឡើងដើម្បីងាយស្រួលប្រើប្រាស់នៅតំបន់ឆ្ងាយដាច់ស្រយាល និងប្រើប្រាស់បច្ចេកវិទ្យា AI ដើម្បីបញ្ជាក់ពីទីតាំងឧបករណ៍ ព្រមទាំងទិន្នន័យអាកាសធាតុ និងផ្កាយរណប ។

វានឹងជូនដំណឹងពីភ្លើងឆេះព្រៃទៅភ្នាក់ងារសង្គ្រោះបន្ទាន់ និងតំបន់ប្រឈម ដើម្បីឱ្យអាជ្ញាធរអាចជម្លៀសពលរដ្ឋ ឬពន្លត់ភ្លើងទាន់ពេលវេលា ។ ក្រុមអ្នករចនាម៉ូដបានសាកល្បងប្រើប្រាស់ឧបករណ៍ចំនួន២០ប្រភេទ ហើយពួកគេមានគម្រោងសាកល្បងបន្ថែមទៀតនៅតំបន់មួយចំនួនក្រោមបរិយាកាសដែលពួកគេគ្រប់គ្រង ។

ក្រោយពីផលិតគំរូឧបករណ៍រួចរាល់ហើយ ពួកគេក៏ទទួលបានពានរង្វាន់លេខ១ ពីកម្មវិធីប្រកួតរចនាម៉ូដឧបករណ៍ដ៏ល្បីល្បាញឈ្មោះ James Dyson Award ប្រចាំឆ្នាំ២០២៤ នៅប្រទេសអង់គ្លេស ៕

ប្រទេសឡាវ ៖ ឡាវ គឺជាប្រទេសទេសចរណ៍មួយស្ថិតក្នុងតំបន់អាស៊ីអាគ្នេយ៍ ដែលមានអ្វីៗជាច្រើនទាក់ទាញភ្ញៀវទេសចរ ។ រីឯភ្ញៀវទេសចរគួរតែឈ្វេងយល់, គោរពច្បាប់ និងទំនៀមទម្លាប់ប្រពៃណីរបស់ឡាវផងដែរពេលមកកម្សាន្តនៅទីនេះ ទើបដំណើរកម្សាន្តប្រកបដោយភាពរីករាយ ។

បច្ចុប្បន្ន ភ្ញៀវទេសចរបរទេសយ៉ាងច្រើននិយមមកកម្សាន្តនៅឡាវ ដោយសារប្រទេសនេះមានវប្បធម៌ ប្រពៃណី និងតំបន់ទេសចរណ៍ធម្មជាតិដ៏ស្រស់ស្អាតជាច្រើនកន្លែង ។ ប៉ុន្តែមុនពេលទៅកម្សាន្តនៅឡាវ តើភ្ញៀវទេសចរគួរតែឈ្វេងយល់ពីចំណុចសំខាន់ៗអ្វីខ្លះ?

១-ប្រុងប្រយ័ត្នលិខិតឆ្លងដែន ៖ គួរតែទុកដាក់លិខិតឆ្លងដែនឱ្យបានល្អ ហើយមិនត្រូវទុកវាជាមួយលុយកាក់ និងទ្រព្យសម្បត្តិមានតម្លៃផ្សេងៗឡើយ ។ លិខិតឆ្លងដែនត្រូវតែយកជាប់ខ្លួនជានិច្ច ព្រមទាំងថតកូពីចម្លងលិខិតឆ្លងដែនទុកយ៉ាងហោចណាស់១ច្បាប់ ដើម្បីធ្វើភស្តុតាងពេលបាត់បង់ ។

២-ស្នាក់នៅក្នុងសណ្ឋាគារប៉ុណ្ណោះ ៖ បើមកប្រទេសឡាវក្នុងឋានៈជាភ្ញៀវទេសចរ យើងគួរតែស្នាក់នៅក្នុងសណ្ឋាគារប៉ុណ្ណោះ ។ បើមានជនជាតិឡាវស្គាល់គ្នាបបួលទៅស្នាក់នៅផ្ទះរបស់គេ យើងពុំគួរទៅទេ ពីព្រោះវាខុសច្បាប់ប្រទេសឡាវ ។

ប៉ុន្តែបើចង់ទៅស្នាក់នៅផ្ទះមិត្តភក្តិជនជាតិឡាវ គឺត្រូវសុំការអនុញ្ញាតឱ្យសមត្ថកិច្ចឡាវជាមុនសិន ។ ជាទូទៅ សមត្ថកិច្ចឡាវនឹងចេញលិខិតអនុញ្ញាតស្នាក់នៅដល់ជនបរទេសណាដែលចូលមកប្រទេសឡាវដើម្បីធ្វើការជាផ្លូវការប៉ុណ្ណោះ ។

៣-ការចតរថយន្តនៅទីសាធារណៈ ៖ ការចតរថយន្តនៅទីសាធារណៈ ឬតំបន់ទេសចរណ៍នានានៅឡាវ នឹងយើងនឹងចំណាយថ្លៃចតរថយន្តជានិច្ច ដោយនឹងមានអាជ្ញាធរឡាវមើលការខុសត្រូវយានជំនិះភ្ញៀវ ។ វាជាការការពារសុវត្ថិភាពយានជំនិះរបស់ភ្ញៀវទេសចរកុំឱ្យមានការបាត់បង់ ។

៤-ការទស្សនាកន្លែងស័ក្តិសិទ្ធិ ៖ ប្រទេសឡាវមានតំបន់ទេសចរណ៍ និងកន្លែងស័ក្តិសិទ្ធិជាច្រើន ហើយការទៅទស្សនានៅតំបន់ទាំងនេះត្រូវរង់ចាំការអនុញ្ញាតពីអាជ្ញាធរជាមុនសិន ទើបអាចចូលទៅបាន ។

៥-ការថតរូបមនុស្សម្នា ៖ មុនពេលថតរូបអ្នកណាម្នាក់ គួរតែសុំអនុញ្ញាតជាមុនសិន ទើបអាចថតរូបបាន ពីព្រោះពេលខ្លះ ជនជាតិឡាវពុំពេញចិត្តនឹងការថតរូបរបស់ភ្ញៀវទេសចរទេ ។

៦-ការតុបតែងខ្លួន ៖ គួរតុបតែងខ្លួន ឬស្លៀកពាក់ឱ្យបានសមរម្យជានិច្ចពេលចូលទៅកន្លែងសំខាន់ៗ ដូចជា ៖ វត្តអារ៉ាម ឬកន្លែងស័ក្តិសិទ្ធិ ដោយសារឡាវជាប្រទេសគោរពព្រះពុទ្ធសាសនា ហើយពលរដ្ឋឡាវប្រកាន់យកការស្លៀកពាក់សុភាពរាបសារ ៕

ប្រទេសជប៉ុន ៖ កាលពីឆ្នាំ២០១១ មានគ្រោះធម្មជាតិរញ្ជួយដីយ៉ាងខ្លាំង ព្រមទាំងរលកយក្សស៊ូណាមិនៅភាគឦសានប្រទេសជប៉ុន ហើយហេតុការណ៍នេះបានបំផ្លា.ញ ទ្រព្យសម្បត្តិយ៉ាងច្រើនមហាសាល និងបាត់បង់ជីវិតមនុស្សរហូតដល់ជាង១ម៉ឺន៥ពាន់នាក់ ។ រីឯអ្នកនៅរស់រានមានជីវិតមានភាពសោកសៅ ដោយសារការបាត់បង់សមាជិកគ្រួសារ ឬមនុស្សជាទីស្រឡាញ់ ។

ក្នុងទីក្រុងអូឈូឈិ មានទូរសម្រាប់ហៅទូរស័ព្ទចេញមួយកន្លែងនៅលើភ្នំ ដែលនៅទីនេះអាចមើលឃើញមហាសមុទ្រប៉ាស៊ីហ្វិក ហើយគេដាក់ឈ្មោះវាថា «ទូរសម្រាប់ហៅទូរស័ព្ទតាមខ្យល់» ។ នៅទីនេះ អនុញ្ញាតឱ្យមនុស្សគ្រប់គ្នាដែលនៅរស់រានមានជីវិតពីគ្រោះធម្មជាតិអាចទូរស័ព្ទទៅរកសាច់ញាតិ ឬមនុស្សជាទីស្រឡាញ់ដែលស្លាប់ទៅហើយ ។

ពួកគេអាចនិយាយពីអារម្មណ៍នឹករលឹកសាច់ញាតិតាមទូរស័ព្ទ ប៉ុន្តែការពិត ទូរស័ព្ទមួយនេះគ្មានការតភ្ជាប់ជាមួយបណ្តាញទូរស័ព្ទណាទេ ។ ទូរសម្រាប់ហៅទូរស័ព្ទចេញនេះបានបង្កើតឡើងដោយលោក អ៊ីតារុ សាសាគិ ដែលលោកបានបាត់បង់បងប្អូនជីដូនមួយ កាលពីឆ្នាំ២០១០ ឬរយៈពេល១ឆ្នាំមុនរលកយក្សស៊ូណាមិបំផ្លាញទីក្រុងតូចនេះ ។

ពីដំបូង មានតែលោក សាសាគិ ម្នាក់ប៉ុណ្ណោះដែលប្រើប្រាស់ទូរស័ព្ទនៅលើភ្នំ ។ លោកព្យាយាមទំនាក់ទំនងទៅរកបងប្អូនជីដូនមួយ បើទោះលោកដឹងច្បាស់ថា ការនឹករលឹករបស់លោកពុំអាចរៀបរាប់ប្រាប់អ្នកណាម្នាក់តាមទូរស័ព្ទបានទេ ប៉ុន្តែលោកជឿថា ខ្យល់នឹងបញ្ជូនការនឹករលឹកនេះទៅដល់សាច់ញាតិ ។

បន្ទាប់ពីមានគ្រោះធម្មជាតិរញ្ជួយដីយ៉ាងខ្លាំង ព្រមទាំងរលកយក្សស៊ូណាមិនៅភាគឦសានប្រទេសជប៉ុននៅឆ្នាំ២០១១ និងសម្លាប់មនុស្សនៅទីក្រុងអូឈូឈិ ជាង៨០០នាក់ ទូរសម្រាប់ហៅទូរស័ព្ទចេញនេះ ក៏ក្លាយជាកន្លែងពេញនិយមសម្រាប់មនុស្សក្នុងទីក្រុង និងអ្នកដំណើរពីចម្ងាយ ។ រយៈពេល៦ឆ្នាំក្រោយកើតហេតុការណ៍ស៊ូណាមិ មានមនុស្សជាង១ម៉ឺននាក់ បានធ្វើដំណើរមកទីនេះ ។

មនុស្សជាច្រើនបាននិយាយពីអារម្មណ៍សោកស្តាយសាច់ញាតិរបស់ខ្លួនតាមទូរស័ព្ទ ខណៈអ្នកខ្លះចង់បានការឆ្លើយតប ឬសម្រេចក្តីប្រាថ្នា ។ អ្នកខ្លះទៀតនិយាយប្រាប់សាច់ញាតិដែលស្លាប់ថា ខ្លួនសុខសប្បាយធម្មតា ពុំចាំបាច់បារម្ភទេ ។

ស្ត្រីម្នាក់រស់នៅទីក្រុងអូឈូឈិ ដែលបានទូរស័ព្ទទៅរកកូនប្រុសរបស់ខ្លួនដែលស្លាប់ទៅ ប្រាប់ថា ៖ «ខ្ញុំពុំបានឮសំឡេងកូនប្រុសនិយាយទេ ហើយខ្ញុំនិយាយតែម្នាក់ឯង ។ ខ្ញុំជឿថា កូនប្រុសបានឮសំឡេងខ្ញុំ វាធ្វើឱ្យខ្ញុំអាចមានជីវិតរស់នៅបន្តទៀត» ។

ក្រៅពីពលរដ្ឋនៅទីក្រុងអូឈូឈិ ស្លាប់អស់ជាង៨០០នាក់ នៅមានពលរដ្ឋជាង៤០០នាក់ទៀតបាត់ខ្លួនរហូតមកដល់បច្ចុប្បន្ន ដោយសារគ្រោះធម្មជាតិនៅជប៉ុន ។ ពលរដ្ឋជប៉ុនជឿថា សមាជិកគ្រួសារដែលបាត់ខ្លួននោះកំពុងស្នាក់នៅកន្លែងណាមួយ ទើបពួកគេធ្វើដំណើរមកនិយាយទូរស័ព្ទនៅលើភ្នំម្តងហើយម្តងទៀត ។

វាជារឿងចម្លែក ប៉ុន្តែបើតាមលទ្ធផលការស្រាវជ្រាវបង្ហាញថា វិធីសមស្របដើម្បីដោះស្រាយបញ្ហាសោកសៅផ្លូវចិត្ត ពុំមែនជាការព្យាយាមបំភ្លេចក្តីទុក្ខឱ្យបានឆាប់រហ័សទេ គឺវាជាការទទួលស្គាល់អារម្មណ៍ខ្លួនឯង ។

អ្នកដែលបាត់បង់មនុស្សជាទីស្រឡាញ់ ពួកគេគ្រាន់តែចង់ជជែកជាមួយអ្នកស្លាប់ម្តងទៀត ហើយទោះបីទូរស័ព្ទនេះពុំអាចទាក់ទងបានក្តី ប៉ុន្តែវាបានជួយព្យាបាលផ្លូវចិត្តមនុស្សសោកសៅបាន ។ លោក សាសាគិ ធ្លាប់និយាយថា ទោះបីវាលំបាកខ្លាំងប៉ុនណាក្តី ប៉ុន្តែក្តីសង្ឃឹមអាចធ្វើឱ្យយើងមានជីវិតរស់នៅបន្តទៀត ៕

ជារៀងរាល់ឆ្នាំ ប្រទេសនានាបានកាប់ដើមឈើប្រមាណ១ម៉ឺន៥ពាន់លានដើម ហើយមានដើមឈើប្រមាណ៤០% ឬជិត៦ពាន់លានដើម ត្រូវបានយកទៅប្រើប្រាស់ក្នុងឧស្សាហកម្មផលិតក្រដាស ។ លើសពីនេះ ស្ទើរតែគ្មានផលិតផលផ្សេងទៀតអាចប្រើប្រាស់ជំនួសក្រដាសបានទេ ដោយសារពិភពលោក បានប្រើប្រាស់ក្រដាសយ៉ាងច្រើនមហាសាលក្នុងជីវិតប្រចាំថ្ងៃ ។

Releaf Paper គឺជាក្រុមហ៊ុនរបស់អ៊ុយក្រែនបានរកឃើញវិធីផលិតក្រដាសពីស្លឹកឈើជ្រុះតាមធម្មជាតិ ហើយក្រុមហ៊ុននេះអាចផ្លាស់ប្តូរស្លឹកឈើជ្រុះជាង២តោន ឱ្យក្លាយជាក្រដាសចំនួន១តោន ។ ការផលិតក្រដាសតាមវិធីថ្មីនេះមានភាពខុសប្លែកពីវិធីចាស់ ដែលត្រូវប្រើប្រាស់សាច់ឈើរហូតដល់១៧តោន ដើម្បីផលិតឱ្យបានក្រដាសក្នុងបរិមាណនេះ ។

ស្លឹកឈើជ្រុះ គឺជាបញ្ហាមួយដែលទីក្រុងនានាលើពិភពលោក កំពុងតែចាត់វិធានការ ។ ប្រទេសជាច្រើនពិបាកកម្ចាត់ស្លឹកឈើជ្រុះណាស់ ដោយសារវារលាយកើតជាផូស្វ័រ ដែលជាមូលហេតុបំផ្លាញប្រភពទឹក ។ ក្រៅពីនេះ ស្លឹកឈើងាប់បានធ្វើឱ្យស្ទះលូ និងប្រព័ន្ធបង្ហូរទឹក ហើយជាទូទៅ ស្លឹកឈើជ្រុះត្រូវបានគេយកទៅកប់ក្នុងដី ឬដុតកំទេច ដែលធ្វើឱ្យប៉ះពាល់បរិស្ថាន ។

ក្រុមហ៊ុន Releaf Paper ឱ្យដឹងថា បើគិតជាមធ្យម ទីក្រុងនីមួយៗបានកម្ចាត់ស្លឹកឈើងាប់រហូតដល់៨.០០០តោនក្នុង១ឆ្នាំ ហើយគ្រាន់តែទីក្រុងនៅអឺរ៉ុបអាចប្រមូលស្លឹកឈើងាប់រហូតដល់ជាង១លានតោនឯណោះ ។

ទីក្រុងនានានៅអឺរ៉ុបបានបញ្ជូនសំរាមស្លឹកឈើទៅកាន់រោងចក្ររបស់ក្រុមហ៊ុន Releaf Paper នៅទីក្រុងប៉ារីស ប្រទេសបារាំង ។ រីឯដំណាក់កាលយកស្លឹកឈើងាប់ទៅផលិតជាក្រដាស គឺចាប់ផ្តើមពីការលាងស្លឹកឈើឱ្យស្អាត និងយកវាទៅលាយជាមួយសារធាតុជីវសាស្ត្រ ។ បន្ទាប់មក យកវាហាលថ្ងៃឱ្យស្ងួតដើម្បីផលិតជាថង់ក្រដាស សៀវភៅកត់ត្រា ឡាំងក្រដាស ក្រដាសខ្ចប់កាដូ និងផលិតផលជាច្រើនទៀត ។

ក្រុមហ៊ុន Releaf Paper បន្តថា ផលិតផលក្រដាសរបស់ពួកគេបានបញ្ចេញកាបូនឌីអុកស៊ីតរហូតដល់៨០% និងប្រើប្រាស់ទឹកតិចជាងការផលិតក្រដាសតាមវិធីចាស់រហូតដល់១៥ដង ។ ក្រដាសផលិតពីស្លឹកឈើងាប់នឹងរលាយក្នុងដីត្រឹមរយៈពេល៣០ថ្ងៃ ខណៈក្រដាសធម្មតាបានចំណាយពេលរលាយក្នុងដី រហូតដល់២៧០ថ្ងៃ ឬយូរជាងនេះ ។

ប៉ុន្តែក្រុមហ៊ុនបញ្ជាក់ថា ពួកគេនឹងប្រមូលស្លឹកឈើជ្រុះក្នុងទីក្រុងប៉ុណ្ណោះមកផលិតជាក្រដាស ហើយពួកគេពុំយកស្លឹកឈើដែលជ្រុះក្នុងព្រៃមកផលិតជាក្រដាសទេ ដើម្បីរក្សាភាពសម្បូរបែបរបស់ប្រព័ន្ធអេកូឡូស៊ីព្រៃឈើ ។

បច្ចុប្បន្ន ក្រុមហ៊ុនអាចផលិតថង់ក្រដាសបានជាង៣លានថង់ក្នុង១ខែ និងកែច្នៃស្លឹកឈើជ្រុះជាង៥.០០០តោនក្នុងឆ្នាំ ។ អតិថិជនរបស់ក្រុមហ៊ុន រួមមាន ៖ ធនាគារ BNP Paribas, Logitech, Samsung និងក្រុមហ៊ុនធំៗជាច្រើនទៀត ហើយក្រុមហ៊ុនមានគម្រោងបង្កើនការផលិត ដោយការបើករោងចក្របន្ថែមនៅប្រទេសផ្សេងៗ ។

នាយកក្រុមហ៊ុន Releaf Paper និយាយថា ៖ «យើងចង់ផ្សព្វផ្សាយពីវិធីផលិតក្រដាសនេះទៅកាន់ពិភពលោក ។ ចក្ខុវិស័យរបស់យើង គឺមនុស្សម្នានៅគ្រប់ទ្វីបទាំងអស់អាចប្រើប្រាស់ក្រដាសផលិតពីស្លឹកឈើងាប់» ៕

ប្រទេសកូរ៉េខាងត្បូង ៖ អត្រាកំណើតនៅប្រទេសកូរ៉េខាងត្បូងបានធ្លាក់ចុះយ៉ាងខ្លាំង ដោយសារពលរដ្ឋកូរ៉េខាងត្បូងចូលចិត្តចិញ្ចឹមឆ្កែជាងចិញ្ចឹមកូនតូ.ច រហូតធ្វើឱ្យរទេះដឹកឆ្កែ លក់ដាច់ជាងរទេះកូនក្មេ.ង ។ នេះបង្ហាញថា យុវជនភាគច្រើនពុំចង់រៀបការ និងមានកូនទេ ដែលធ្វើឱ្យអត្រាកំណើតធ្លាក់ចុះជាបន្តបន្ទាប់ ។

វាជាបញ្ហាមួយធ្វើឱ្យរដ្ឋាភិបាលបារម្ភយ៉ាងខ្លាំងពីផលប៉ះពាល់សេដ្ឋកិច្ចរយៈពេលយូរ និងកំណើនពលរដ្ឋអាយុច្រើន ។ លើសពីនេះ រដ្ឋាភិបាលមានគម្រោងបង្កើតក្រសួងថ្មី ដើម្បីដោះស្រាយបញ្ហានេះទៀតផង ។ កាលពីឆ្នាំ២០២៣ រទេះដឹកឆ្កែបានលក់ដាច់ជាងរទេះកូនក្មេងនៅ Gmarket ជាហាងលក់រាយតាមអនឡាញឈានមុខគេនៅកូរ៉េខាងត្បូង ។

សារព័ត៌មាន The Wall Street Journal រាយការណ៍ថា អត្រាកំណើតនៅកូរ៉េខាងត្បូងបានធ្លាក់ចុះម្តងទៀតកាលពីឆ្នាំ២០២៣ ហើយធ្វើឱ្យការទិញរទេះដឹកសត្វចិញ្ចឹមកើនឡើងខ្ពស់ គឺចំនួនលក់បានកើនឡើងរហូតដល់៤ដង គិតចាប់ពីឆ្នាំ២០១៩ ។

ពលរដ្ឋកូរ៉េខាងត្បូងចូលចិត្តចិញ្ចឹមសត្វ ហើយចំនួនមនុស្សក្លាយជាម្ចាស់សត្វចិញ្ចឹមបានកើនឡើងជាបន្តបន្ទាប់ ខណៈការចំណាយប្រាក់ពាក់ព័ន្ធនឹងសត្វចិញ្ចឹម ក៏កើនឡើងដែរ ។ នេះជាការលើកឡើងរបស់ CEO មកពី Pet Friends ជាកម្មវិធីលក់សត្វចិញ្ចឹមតាមអនឡាញដ៏ធំបំផុត បាននិយាយមកកាន់សារព័ត៌មាន The Wall Street Journal ។

ចំណែករដ្ឋមន្ត្រីក្រសួងការងារ បានថ្លែងកាលពីឆ្នាំ២០២៣ ថា ៖ «អ្វីដែលខ្ញុំបារម្ភបំផុត គឺយុវជនកូរ៉េខាងត្បូងពុំស្រឡាញ់គ្នាទេ ។ ពួកគេស្រឡាញ់ឆ្កែ និងយកឆ្កែដើរតាមខ្លួន ហើយពួកគេពុំរៀបការ ឬមានកូនឡើយ» ។

វិធានការកាត់បន្ថយអត្រាកំណើតធ្លាក់ចុះ គឺរដ្ឋាភិបាលកូរ៉េបានផ្តល់ប្រាក់ឧបត្ថម្ភជិត៣សែនលានដុល្លារអាមេរិកសម្រាប់ជួយឱ្យពលរដ្ឋចិញ្ចឹមកូន ឬផ្តល់ប្រាក់ដល់គ្រួសារផ្តល់កំណើតទារក ។ រីឯអាជ្ញាធរក្នុងតំបន់ខ្លះបានផ្តល់ប្រាក់ចំនួន៧ម៉ឺនដុល្លារអាមេរិកសម្រាប់ទារកម្នាក់ ដែលវាជាផ្នែកមួយនៃគំនិតផ្តួចផ្តើមគាំទ្រទារកកើតថ្មី ។

ក្រៅពីនេះ រដ្ឋាភិបាលក៏បានជំរុញយុវជនឱ្យស្វែងរកគូស្រករ ព្រមទាំងផ្តល់ប្រាក់ឱ្យគូស្នេហ៍ណាត់ជួបគ្នាភ្ជាប់ទំនាក់ទំនង ។ ប៉ុន្តែវិធានការទាំងនេះពុំទទួលបានលទ្ធផលទេ ដោយសារយុវជនជួបឧបសគ្គជាច្រើនដើម្បីបង្កើតគ្រួសារ ជាពិសេស នៅទីក្រុងសេអ៊ូល ដែលមានការចំណាយខ្ពស់ ។

សាស្ត្រាចារ្យផ្នែកសង្គមវិទ្យានៅសាកលវិទ្យាល័យ Seoul Women និយាយថា ៖ «យុវជនសម័យថ្មីបានចំណាយប្រាក់ច្រើនជាងយុវជនជំនាន់មុន និងគ្មានប្រាក់សន្សំទេ ។ ពួកគេតែងតែបង្ហាញភាពជោគជ័យរបស់ខ្លួនក្នុងអ៊ីនធើរណេតច្រើនជាង» ៕

ប្រទេសស៊ុយអែត ៖ កាលពីថ្ងៃទី១៨ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ផ្សារទំនើបជាច្រើនកន្លែងនៅប្រទេសស៊ុយអែតបានប្រើប្រាស់ធ្នើរដាក់ទំនិញធ្វើជាកន្លែងដាំបន្លែលើទឹក ដើម្បីឱ្យអតិថិជនអាចជ្រើសរើសទិញបន្លែស្រស់ៗ គ្មានសារធាតុគីមី ។ បន្លែទាំងនេះបានដាំក្នុងបន្ទះជ័រដែលមានទឹកនៅខាងក្រោមតម្រៀបគ្នាជាជួរលើធ្នើរ ដែលមានបុគ្គលិកក្រុមហ៊ុនកសិកម្មឈ្មោះ SweGreen ជាអ្នកថែទាំ ។

ការដាំបន្លែក្នុងផ្សារទំនើបនេះ ក្រុមហ៊ុន SweGreen មានគោលបំណងដោះស្រាយបញ្ហាមួយចំនួន ដូចជា ៖ ការខ្វះខាតទឹកស្រោចស្រពបន្លែ, ផ្ទៃដីកសិកម្មពុំគ្រប់គ្រាន់, កាត់បន្ថយការពឹងផ្អែកលើអាកាសធាតុ និងជាការធ្វើកសិកម្មពុំប៉ះពាល់បរិស្ថាន ។

លើសពីនេះ ការដាំបន្លែបៃតងក្នុងស្រុកនឹងជួយកាត់បន្ថយការទិញបន្លែពីក្រៅប្រទេស, កាត់បន្ថយការបញ្ចេញជាតិពុលពេលដឹកជញ្ជូន, រក្សាទុកបានយូរ, បន្លែមានគុណភាពល្អ និងពុំប្រើប្រាស់ដីសម្រាប់ដាំទេ ។ បច្ចុប្បន្ន បន្លែស្រស់របស់ក្រុមហ៊ុនបានដាក់លក់នៅតាមផ្សារទំនើបនៅស៊ុយអែត និងអាល្លឺម៉ង់ ។ បន្លែទាំងអស់ទទួលបានការថែទាំយ៉ាងល្អ គ្មានសត្វល្អិតបំផ្លាញ និងសារធាតុគីមីទេ ។ វាជាការផ្តល់ទំនុកចិត្តដល់អតិថិជនអាចទិញបន្លែស្រស់ពេញ១ឆ្នាំ, ស្អាត និងមានសុវត្ថិភាព ។

ការដាំបន្លែទាំងអស់បានប្រើប្រាស់ទឹកតិចតួច គឺក្រុមហ៊ុនអាចដាំស្ពៃក្រញាញ់បាន១គីឡូក្រាម ដោយត្រូវការទឹកត្រឹមតែ១លីត្រប៉ុណ្ណោះ ។ នេះជាការប្រើប្រាស់ទឹកតិចជាងការដាំស្ពៃក្រញាញ់នៅទីវាល រហូតដល់៩៩% ខណៈការដាំនៅទីវាលប្រើទឹករហូតដល់២៥០លីត្រ ។ ពេលយកបន្លែមកដាំក្នុងផ្សារទំនើបបែបនេះ ក្រុមហ៊ុនពុំចាំបាច់ចំណាយប្រាក់លើដឹកជញ្ជូនបន្លែទេ ខណៈការដឹកជញ្ជូនបន្លែបានបញ្ចេញកាបូនឌីអុកស៊ីតទៅបរិយាកាស ។

ក្រុមហ៊ុនបានដាំបន្លែក្នុងផ្សារទំនើបចំនួន១០០មុខ ដូចជា ៖ ស្ពៃក្រញាញ់, ស្លឹកជីរ, ជីអង្កាម និងជីស្លឹកវែង ជាដើម ។ នាយកក្រុមហ៊ុន SweGreen និយាយថា ក្រុមហ៊ុននឹងពង្រីកការដាំបន្លែបន្ថែមទៀត ដូចជា ៖ ដាំក្នុងភោជនីយដ្ឋាន សណ្ឋាគារ និងសាកលវិទ្យាល័យ ។ បច្ចុប្បន្ន ក្រុមហ៊ុនកំពុងតែសាកល្បងដាំឈើហូបផ្លែ និង Strawberry ៕

ប្រទេសអ៊ីតាលី ៖ អ៊ីតាលីនឹងទទួលបានតំណែងជាប្រទេសផលិតស្រាទំពាំងបាយជូរច្រើនបំផុតលើពិភពលោក នៅឆ្នាំ២០២៤នេះ ក្រោយពីចម្ការទំពាំងបាយជូរនៅប្រទេសបារាំងរងផលប៉ះពាល់ដោយសារការធ្លាក់ព្រិល និងមានទឹកសំណើមច្រើនក្នុងចម្ការទំពាំងបាយជូរ ។ នេះបើតាមការរាយការណ៍របស់សារព័ត៌មាន AFP កាលពីថ្ងៃទី១៩ ខែកញ្ញា ឆ្នាំ២០២៤ ។

ក្រសួងកសិកម្មអ៊ីតាលីឱ្យដឹងថា ការផលិតស្រាទំពាំងបាយជូររបស់អ៊ីតាលីនឹងកើនឡើង៨% ឬកើនឡើងចាប់ពី៤១លាន ទៅ៤២លានហិកតា ក្រោយពេលការផលិតបានធ្លាក់ចុះ កាលពីឆ្នាំ២០២៣ ។ អ៊ីតាលីនឹងវ៉ាដាច់បារាំងនាពេលឆាប់ៗ ពីព្រោះក្រសួងកសិកម្មបារាំងរំពឹងថា ការផលិតស្រាទំពាំងបាយជូររបស់បារាំងនឹងធ្លាក់ចុះ១៨% ឬធ្លាក់ចុះជាង៣៩លានហិកតា ។

យោងតាមទិន្នន័យរបស់អង្គការស្រាទំពាំងបាយជូរអន្តរជាតិបញ្ជាក់ថា ចាប់ពីឆ្នាំ២០០៦មក អ៊ីតាលីបានគ្រប់គ្រងតំណែងជាប្រទេសផលិតស្រាទំពាំងបាយជូរច្រើនបំផុតលើពិភពលោក ប៉ុន្តែនៅឆ្នាំ២០១១, ឆ្នាំ២០១៤ និងឆ្នាំ២០២៣ អ៊ីតាលីបានបាត់បង់តំណែងនេះទៅឱ្យបារាំង ។

ទោះយ៉ាងណា នៅតំបន់ខាងជើងប្រទេសអ៊ីតាលីបានប្រឈមជាមួយបញ្ហាភ្លៀងធ្លាក់ខ្លាំង និងមានព្រិលធ្លាក់ច្រើនក្នុងនិទាឃរដូវ និងរដូវក្តៅ ។ រីឯតំបន់ខាងត្បូងអ៊ីតាលីបានប្រឈមនឹងគ្រោះរាំងស្ងួត ក្តៅខ្លាំង និងមានភ្លៀងធ្លាក់តិចតួច ។ ហេតុនេះ ទើបធ្វើឱ្យកសិករអ៊ីតាលីប្រញាប់ប្រមូលផលទំពាំងបាយជូរលឿនជាងពេលធម្មតា ។

ចំណែកនៅតំបន់ភ្នំជូរ៉ា ស្ថិតនៅភាគខាងកើតប្រទេសបារាំងឯណោះវិញ មានសំណើមច្រើន និងជំងឺផ្សិត ដែលបណ្តាលឱ្យទិន្នផលដំណាំទំពាំងបាយជូរធ្លាក់ចុះរហូតដល់៧១% ក្នុងតំបន់ឆារ៉ម ។ រីឯតំបន់ភាគខាងលិចបារាំង ទិន្នផលទំពាំងបាយជូរបានធ្លាក់ចុះ៣៥% នៅជ្រលងភ្នំលួ និងធ្លាក់ចុះ៣០% នៅទីក្រុងបូឆូឡេ ដោយសារចម្ការទំពាំងបាយជូរនៅតំបន់ទាំងនេះមានព្រិលធ្លាក់ច្រើនពេក ៕