តើអ្នកណាខ្លះចូលចិត្តក្រោកយឺតនៅថ្ងៃឈប់សម្រាក ឬចុងសប្តាហ៍? យោងតាមលទ្ធផលការស្រាវជ្រាវថ្មីមួយបង្ហាញថា ការក្រោកយឺតនៅថ្ងៃឈប់សម្រាកអាចជួយកាត់បន្ថយហានិភ័យនៃជំងឺបេះដូងបាន ប៉ុន្តែវាអាចជួយតែផ្នែកខ្លះៗប៉ុណ្ណោះ ។.png)
លោកវេជ្ជបណ្ឌិត Weerasak Charatchaisri មានឯកទេសផ្នែកកោសល្យវិច្ច័យមកពីសាកលវិទ្យាល័យ Srinakharinwirot ប្រទេសថៃ បានបង្ហោះក្នុងហ្វេសប៊ុកអំពីលទ្ធផលការស្រាវជ្រាវនេះថា ការក្រោកយឺតនៅថ្ងៃចុងសប្តាហ៍នឹងអាចជួយកាត់បន្ថយហានិភ័យនៃជំងឺបេះដូង ។
ការស្រាវជ្រាវចុងក្រោយនេះបានបង្ហាញក្នុងកិច្ចប្រជុំរបស់ European Society of Cardiology Congress បញ្ជាក់ថា ហានិភ័យនៃជំងឺបេះដូងបានធ្លាក់ចុះប្រមាណ១៩% សម្រាប់អ្នកភ្ញាក់ពីគេងយឺតនៅថ្ងៃចុងសប្តាហ៍ ។ ការភ្ញាក់យឺត គឺដើម្បីជំនួសឱ្យការគេងពុំគ្រប់គ្រាន់ នៅថ្ងៃធ្វើការដើមសប្តាហ៍ ។.png)
ការស្រាវជ្រាវនេះបានដកស្រង់ទិន្នន័យរបស់មនុស្សចូលរួមចំនួន៩០.៩០៣នាក់ ដែលបានលើកឡើងពីការសម្រាករបស់ពួកគេ ។ ការសម្រាកពុំគ្រប់គ្រាន់ គឺការសម្រាកតិចជាង៧ម៉ោងក្នុង១យប់ ហើយអ្នកចូលរួមចំនួន១៩.៨១៦នាក់ ត្រូវបានកំណត់ថា ពុំបានសម្រាកគ្រប់គ្រាន់ ហើយពួកគេបានត្រួតពិនិត្យសុខភាពរយៈពេល១៤ឆ្នាំ ។
ក្រោយពីអ្នកចូលរួមការស្រាវជ្រាវបានត្រួតពិនិត្យសុខភាពរយៈពេល១៤ឆ្នាំរួចមក ពួកគេក៏បានសម្រាកច្រើន និងភ្ញាក់យឺតនៅថ្ងៃចុងសប្តាហ៍ ។ រីឯហានិភ័យនៃការកើតជំងឺបេះដូងបានធ្លាក់ចុះ១៩% បើធៀបនឹងក្រុមអ្នកសម្រាកតិច នាចុងសប្តាហ៍ ។
ការស្រាវជ្រាវរកឃើញថា វាគ្មានភាពខុសប្លែកគ្នាទេរវាងបុរស និងស្ត្រី ប៉ុន្តែវានឹងប្រែប្រួលអាស្រ័យលើបរិមាណការសម្រាកដែលបាត់បង់ ។ ទោះយ៉ាងណា ការស្រាវជ្រាវនេះពុំទាន់បានចេញផ្សាយក្នុងទស្សនាវដ្តីវេជ្ជសាស្ត្រនៅឡើយទេ ប៉ុន្តែការស្រាវជ្រាវត្រូវបានគេយកមកបង្ហាញក្នុងកិច្ចប្រជុំស្តីពី «ជំងឺបេះដូង» នៅទីក្រុងឡុងដ៍ ប្រទេសអង់គ្លេស ។
ការស្រាវជ្រាវខាងលើនៅមានដែនកំណត់មួយចំនួន ហើយគេសន្និដ្ឋានថា ការសម្រាកបានគ្រប់គ្រាន់នៅថ្ងៃចុងសប្តាហ៍ នឹងពាក់ព័ន្ធជាមួយសុខភាពបេះដូងដោយផ្ទាល់ ។ លើសពីនេះ គួរតែស្រាវជ្រាវពីកត្តាផ្សេងទៀតដែលពាក់ព័ន្ធនឹងជំងឺបេះដូងផងដែរ ពីព្រោះការសម្រាកនៅថ្ងៃចុងសប្តាហ៍អាចជួយកាត់បន្ថយហានិភ័យនៃជំងឺបេះដូងបានតែផ្នែកខ្លះៗប៉ុណ្ណោះ ៕
