បន្ទាប់ពីបង្ហាញខ្លួននៅទឹកដីអង្គរទទួលបាន ៣០លាន Subscriber, ស្របតាមការសន្យា Speed ក៏បានត្រឡប់មកកាន់ទឹកដីនៃប្រទេសកម្ពុជាយើងជាលើកទី២ នារសៀលថ្ងៃទី ២៣ ខែកញ្ញានេះ ក៏បានបង្កឲ្យមានការភ្ញាក់ផ្អើលខ្លាំងក្នុងចំណោមអ្នកគាំទ្រកម្ពុជា។

តាមរយៈការ Live Stream នៅលើឆាណែលផ្លូវការរបស់ IshowSpeed នៅម៉ោង ៣ រសៀល Speed បានលេចវត្តមាននៅម្តុំផ្សារទួលទំពូង ដោយគ្រាន់តែចុះទៅលើរថយន្តភ្លាម រឿងដំបូងដែលលោកបានធ្វើមុនគេនោះគឺបានភ្លក់នំគូឆាយចៀន ទោះរៀងរលាកមាត់បន្តិច តែលោកក៏លាន់មាត់ថាឆ្ងាញ់។

ចំណែករឿងទី ២ គឺលោកបានចូលទៅកាន់ផ្សារ ចូលជួបជាមួយនឹងបងប្អូនអាជីវករ ប្រជាពលរដ្ឋខ្មែរយ៉ាងច្រើនកុះករ ហើយលោកក៏បានចាប់កាន់អាវយឺត ដែលមានអក្សរពិធីភ្ជុំបុណ្យបិណ្ឌខ្មែរពេញៗដៃ។ រឿងបន្ទាប់គឺ Speed បានពាក់មួកស្លឹកត្នោតដើរនៅតាមផ្លូវបានយ៉ាងឡូយ ឆ្ពោះទៅកាន់ក្លឹបប្រដាល់គុណខ្មែរមួយកន្លែង ដោយបានលើកយកក្រម៉ាមកពាក់ករ និងលើកខោគុណខ្មែរមកស្លៀកថែមទៀតផង។

បន្ទាប់ពីស្លៀកខោគុនខ្មែររួច Speed ទប់ចិត្តមិនបានក៏ឡើងសង្វៀនប្រដាល់ជាមួយនឹងកីឡាគុនខ្មែររបស់យើង ខណៈក៏មានសំឡេងហ៊ោកងរំពងពេញសង្វៀន៕

អ្នកបង្កើតមាតិកា ShanaeLael ជាជនជាតិអាម៉េរិកដែលមានគ្រួសារនិងរស់នៅស្រុកខ្មែរបានទម្លាយថាមូលហេតុដែលនាងចូលចិត្តខ្មែរគឺប្រជាជនខ្មែរមានទឹកចិត្ត ជួយយកអាសារគ្នា។

ជារឿយៗ អ្នកមួយចំនួនអាចនឹងស្គាល់អ្នកបង្កើតមាតិកា Shanae ដែលជាជនជាតិបរទេសបានជួយផ្សព្វផ្សាយពីអាហារជាច្រើននៅលើទឹកដីកម្ពុជាក្នុងខេត្តបាត់ដំបងប្រកបដោយភាពសាមញ្ញាតាមរយៈវីដេអូនានារបស់ខ្លួនកន្លងមក។ ការផ្សព្វផ្សាយពីវប្បធម៌ខ្មែររបស់អ្នកបង្កើតមាតិការូបនេះបានធ្វើឱ្យហ្វេនៗមានការសាទរយ៉ាងខ្លាំង ខណៈនារីជាជនបរទេសរូបនេះអាចប្រើប្រាស់និយាយភាសាខ្មែរបានយ៉ាងល្អគួរឱ្យសរសើរ។

ទង្វើរបស់អ្នកនាង Shanae ក៏បានដក់ជាប់ក្នុងបេះដូងទស្សនិកជនចំណែកហ្វេនៗមួយចំនួនក៏ចង់ដឹងដូចគ្នាថាហេតុអ្វីបានជាអ្នកបង្កើតមាតិការូបនេះពេញចិត្តពេញថ្លើមប្រទេសកម្ពុជាយ៉ាងនេះ។ ក្នុងកិច្ចសម្ភាសន៍ 3Fun ដែលបានចាក់ផ្សាយកាលពីរាត្រីថ្ងៃទី២០ ខែកញ្ញា Shanae បានបង្ហាញខ្លួនក្នុងនាមជាតារាកិត្តិយសប្រចាំសប្តាហ៍ក្នុងឈុតប្រពៃណីខ្មែរក្នុងឱកាសរដូវកាលភ្ជុំបិណ្ឌ។

ទន្ទឹមនឹងនេះ Shanae បានបញ្ជាក់ថាមូលហេតុដែលរូបអ្នកនាងស្រលាញ់ខ្មែរដោយសារតែខ្មែរស្រលាញ់គ្រួសារ ខ្មែរចេះជួយយកអាសារគ្នាដូចជាអ្នកជិតខាងជួយមើលកូន ធ្វើម្ហូបជាមួយគ្នាសម្រាប់អ្នកខេត្តបាត់ដំបង ប៉ុន្តែមិនសូវដឹងនោះទេសម្រាប់អ្នករស់នៅភ្នំពេញ ហើយសាច់ញាតិខាងសាច់ថ្លៃគឺជួយទុក្ខធុរៈមើលកូនឱ្យខ្លួន។ ក្នុងការលើកឡើងនេះជារួម Shanae ចង់សម្តៅថា ខ្មែរគឺចេះជួយទុក្ខធុរៈយកអាសារគ្នា។

គួរឱ្យដឹងថា ដើមឡើយ Shanae បានមកប្រទេសកម្ពុជាជាការដើរលេងនិងជួយខ្មែរចំនួន៣ខែហើយការមកដំបូងគឺមានអារម្មណ៍ថាស្រលាញ់ខ្មែរខ្លាំងដោយប្រជាជនខ្មែរចិត្តល្អ ស្វាគមន៍ខ្លាំង និងចង់មកលេងម្តងទៀត។ ត្រឡប់មកលើកក្រោយអ្នកនាងរស់នៅចំនួន៦ខែដោយជួយមិត្តភក្តិនៅកន្លែងហាត់ប្រាណហើយក៏បានជួយប្តីនៅទីនោះនិងបានចាប់ដៃកសាងគ្រួសារជាមួយគ្នាដោយបានរៀបការនៅអាម៉េរិក។ បច្ចុប្បន្នអ្នកទាំងពីរមានកូនប្រុសម្នាក់ និងកូនក្នុងផ្ទៃម្នាក់ទៀតនិងមានមុខរបរបើកកន្លែងហាត់ប្រាណនៅខេត្តបាត់ដំបង៕

ករណីកូនប្រុសរបស់លោក ឌឿន សុវណ្ណ រដ្ឋលេខាធិការក្រសួងមហាផ្ទៃ ឈ្មោះ ឌឿន ឧត្ដម បានបើករថយន្តបង្កគ្រោះថ្នាក់ចរាចរណ៍សម្លាប់ប្ដីប្រពន្ធមួយគូ កាលពីថ្ងៃទី១៥ ខែឧសភា ឆ្នាំ ២០២៣ នៅចំណុច ផ្លូវប្រសព្វមួយកន្លែងនៅទីក្រុង Caulfield South ភាគអាគ្នេយ៍នៃទីក្រុង Melbourne ឥលូវនេះត្រូវបានតុលាកា ប្រទេសអូស្ត្រាលី សម្រេចកាត់ក្ដីឱ្យជាប់ពន្ធនាគា រយៈពេល១២ ឆ្នាំ ៩ខែ ហើយបើតាមការចុះផ្សាយពីសារព័ត៌មានអូស្ត្រាលី 9news បានបង្ហាញថា ឈ្មោះ ឌឿន ឧត្ដម អាចនឹងត្រូវបណ្ដេញពីប្រទេសអូស្ត្រាលី បន្ទាប់ពីអនុវត្តទោសចប់ ។

ជនរងគ្រោះពីរនាក់ប្ដីរប្រពន្ធដែលបានស្លាប់ក្នុងករណីគ្រោះថ្នាក់ចរាចរណ៍នេះ មានឈ្មោះ Santosh Adhikari អាយុ៣២ ឆ្នាំ និង Pratima Thapa Adhikari អាយុ ២២ឆ្នាំ ។
យោងតាមចៅក្រមឈ្មោះលោក Jeanette Morrish បាននិយាយថា ការស្លាប់របស់ប្ដីប្រពន្ធគេទាំងពីរ ជាកំហុសទាំងស្រុងរបស់ឈ្មោះ ឌឿន ឧត្ដម ដែលបានបើកបរហួសល្បឿនកំណត់រហូតដល់ ២១៣ គីឡូម៉ែត្រ ក្នងមួយម៉ោង បំពានភ្លើងសញ្ញាចរាចរណ៍ លើសពីនេះថែមទាំងមានកម្រិតជាតិអាកុលក្នុងខ្លួន ០.០១៦ និងមិនមានប័ណ្ណបើកបរទៀតផង ។ ចៅក្រមខាងលើ បានបន្ថែមថា ម្ដាយរបស់ជនរងគ្រោះ តែងតែយំសោកជារៀងរាល់ថ្ងៃ ចាប់តាំងពីកូនស្រី និងកូនប្រសាររបស់គាត់ បានស្លាប់ រហូតមកដល់សព្វថ្ងៃនេះ ។

យោងតាមសម្ដីមិត្តភក្ដិម្នាក់របស់ជនឈ្មោះ ឌឿន ឧត្ដម ដែលបានរួមដំណើរជាមួយ នៅថ្ងៃកើតហេតុ បានឱ្យដឹងថា ឌឿន ឧត្ដម បានបើករថយន្តយ៉ាងលឿនហួសល្បឿនកំណត់ ហើយបើទោះជាគេព្យាយាមឃាត់យ៉ាងណាក៏ដោយ ក៏មិនស្ដាប់ដែរ ។ ហើយដល់ចំណុចកើតហេតុ គេបានប្រាប់ឱ្យឈប់ស្ដុបក្រហម តែ ឌឿន ឧត្ដម នៅតែមិនបន្ថយល្បឿន ទើបបណ្ដាលឱ្យបុកពេញទំហឹងទៅលើជនរងគ្រោះពីរនាក់ប្ដីប្រពន្ធដែលកំពុងបើករថយន្តម៉ាក ហុងដា មួយគ្រឿង ឆ្លងកាត់ផ្លូវបណ្ដាលឱ្យស្លាប់ភ្លាមៗ ។ ចំណែករូបគេដែលជាអ្នករួមដំណើរលើរថយន្តបង្ក ក៏បានរងរបួសធ្ងន់ផងដែរ ។

សូមរំឮកថា កាលពីថ្ងៃទី១៥ ខែឧសភា ឆ្នាំ ២០២៣ ជនបង្កឈ្មោះ ឌឿន ឧត្ដម ដែលគេស្គាល់ថា ជាកូនប្រុសរបស់លោក ឌឿន សុវណ្ណ រដ្ឋលេខាធិការក្រសួងមហាផ្ទៃ រួមដំណើរដោយមនុស្សម្នាក់ បានបើកបររថយន្តមួយគ្រឿងម៉ាក BMW ក្នុងល្បឿន រហូតដល់ ២១៣ គីឡូម៉ែត្រ ក្នងមួយម៉ោង ខណៈដែលល្បឿនកំណើតត្រឹម ៧០ គីឡូម៉ែត្រ ក្នងមួយម៉ោង ព្រមទាំងបំពានភ្លើងសញ្ញាចរាចរណ៍ ទៅបុករថយន្តម៉ាក ហុងដា ពណ៌ទឹកប្រាក់ បើកបរដោយប្ដីប្រពន្ធជនជាតិណេប៉ាល់ បណ្ដាលឱ្យពួកគេទាំងពីរនាក់ស្លាប់ភ្លាមៗនៅកន្លែងកើតហេតុ ចំណែកជនបង្ក ព្រមទាំងអ្នករួមដំណើរម្នាក់ទៀតនោះ រងរបួសធ្ងន់ បញ្ជូនទៅសង្គ្រោះនៅមន្ទីរពេទ្យ ។

ករណីគ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅចំណុចផ្លូវប្រសព្វនៃផ្លូវ North និង Thomas ក្នុងទីក្រុង Caulfield South ប្រទេសអូស្ត្រាលី ។ យ៉ាណាក៏ដោយជនបង្កបានសារភាពទីទោសកំហុស ហើយកាលពីដើមឆ្នាំ តុលាការបានកំណត់ទោស ២ករណី គឺបើកបរបណ្ដាលឱ្យមនុស្សស្លាប់ និងករណីមិនប្រុងប្រយ័ត្នបង្កឱ្យមានរបួស ។

ទីផ្សារខេត្តហឺណាន នៃប្រទេសចិន បានធ្វើការបញ្ជាទិញផលិតផលគ្រាប់ស្វាយចន្ទីពីកម្ពុជាចំនួន ២០០ តោន ក្នុងមួយឆ្នាំ។

យោងតាម ឯកឧត្តម ងិន ឆាយ ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានលើកឡើងថា៖”សមិទ្ធិផលនេះកើតមានឡើង បន្ទាប់ពីឆ្លងកាត់កិច្ចប្រជុំប្រកបដោយផ្លែផ្កាចំនួន ២ លើក ក្នុងខែកក្កដា និងខែសីហា ជុំវិញកិច្ចសហប្រតិបត្តិការលើវិស័យឧស្សាហកម្មដំណាំ កម្ពុជា-ចិន រវាងមន្រ្តីក្រសួងជំនាញពាក់ព័ន្ធរបស់រាជរដ្ឋាភិបាលកម្ពុជាមានក្រសួងកសិកម្ម និងក្រសួងសេដ្ឋកិច្ច ក្រុមហ៊ុនដឹកជញ្ជូនតាមផ្លូវអាកាសCambodia Angkor Air និងភាគីអ្នកបញ្ជាទិញខាងចិន”។

គិតត្រឹមឆ្នាំ២០២៤នេះ ប្រទេសកម្ពុជាមានផ្ទៃដីដាំដុះដំណាំស្វាយចន្ទីជាង ៥៨ម៉ឺនហិកតា នៅទូទាំងប្រទេស ដែលអាចផ្ដល់ទិន្នផលជាមធ្យមប្រមាណ ១,៥តោន ក្នុង ១ហិកតា។

គួរបញ្ជាក់ផងដែរថា នៅក្នុងរយៈពេល៧ខែដើមឆ្នាំ២០២៤ កម្ពុជាផលិតគ្រាប់គ្រាប់ស្វាយចន្ទីឆៅបានជាង ៨៣ម៉ឺនតោន កើនឡើង ៣៦,៧% ដែលធ្វើឱ្យកម្ពុជា ជាប់ចំណាត់ថ្នាក់លេខ២ ជាប្រទេសនាំចេញស្វាយចន្ទីច្រើនជាងគេលើពិភពលោក៕

គម្រោងសាងសង់កំណាត់ផ្លូវចុងក្រោយ នៃផ្លូវជាតិលេខ៥ ចាប់ពីសិរីសោភ័ណ ទៅដល់ប៉ោយប៉ែត មានប្រវែង ៣៥គីឡូម៉ែត្រ សម្រេចបាន២៥ភាគរយ ដោយគ្រោងនឹងបញ្ជប់ការសាងសង់នៅខែមីនា ឆ្នាំ២០២៥។

ផ្លូវកំណាត់ចុងក្រោយនេះត្រូវបានបើកការដ្ឋានសាងសង់កាលពីថ្ងៃទី ២២ ខែវិច្ឆិកា ឆ្នាំ២០២៣ ដោយគ្រោងចំណាយថវិកា ៥២,៥៦លានដុល្លារជាថវិកាបដិភាគរបស់រដ្ឋាភិបាលកម្ពុជា និងជំនួយឥណទានរបស់រដ្ឋាភិបាលជប៉ុន។

ផ្លូវជាតិលេខ៥ ដែលស្ថិតក្នុងគម្រោងសាងសង់ ពីព្រែកក្តាម ដល់ប៉ោយប៉ែត ត្រូវបានបែងចែកការសាងសង់ជា៤កំណាត់ ដោយក្នុងនោះ៖

កំណាត់ទី១ ភាគខាងជើង បាត់ដំបង-សិរីសោភ័ណ ប្រវែង៨៤គីឡូម៉ែត្រ បានដាក់សម្ពោធរួចរាល់នៅខែមករា ឆ្នាំ២០២២

កំណាត់ទី២ ភាគខាងត្បូង ព្រែកក្តាម ដល់ធ្លាម្អម ប្រវែង១៣៥គីឡូម៉ែត្រ

កំណាត់ទី៣ ភាគកណ្តាល ធ្លាម្អម ដល់បាត់ដំបង ប្រវែង ១១០,៩គីឡូម៉ែត្រ ត្រូវបានសម្ពោធរួចរាល់ កាលពីខែវិច្ឆិកា ឆ្នាំ២០២៣

កំណាត់ទី៤ សិរីសោភ័ណ ដល់ប៉ោយប៉ែត មានប្រវែងសរុបជាង ៣៥គីឡូម៉ែត្រ នឹងបញ្ចប់នាឆ្នាំ២០២៥៕

បើទោះបីជាកម្ពុជា បានបញ្ចប់កិច្ចសហប្រតិបត្តិការអភិវឌ្ឍ CLV-DTA ជាមួយឡាវ និងវៀតណាម កាលពីថ្ងៃទី២០ ខែកញ្ញា ឆ្នាំ២០២៤ ក៏ពិតមែន ក៏ប៉ុន្តែការកសាងហេដ្ឋារចនាសម្ព័ន្ធតាមព្រំដែន ជាពិសេសផ្លូវក្រវ៉ាត់ព្រំដែន នៅតែបន្តធ្វើដដែល នេះបើយោងតាមរយៈសារសំឡេងពិសេសតាមប្រព័ន្ធតេឡេក្រាម សម្តេចធិបតី ហ៊ុន ម៉ាណែត កាលពីព្រឹកថ្ងៃទី២៣ ខែកញ្ញា ឆ្នាំ២០២៤។

គិតមកទល់បច្ចុប្បន្ននេះ មានបងប្អូនប្រជាពលរដ្ឋប្រមាណជា៧០មុឺននាក់ បានចូលរួម”មូលនិធិកសាងហេដ្ឋារចនាសម្ព័ន្ធតាមព្រំដែន” ដោយទទួលបានថវិការ២១លានដុល្លារ។

ថវិការ២១លានដុល្លារនេះ នឹងយកផ្តោតចម្បងទៅកាន់ការកសាងផ្លូវក្រវ៉ាត់ព្រំដែនបានចាប់ផ្តើមកសាងតាំងពីឆ្នាំ១៩៩៤ ដោយរួចរាល់បានប្រវែងជាង ១៣០០គីឡូម៉ែត្រ ខណៈនៅសល់ប្រមាណ១៣០០គីឡូម៉ែត្រទៀត។

សម្តេចធិបតីបានសង្កត់ធ្ងន់ថា៖”បើទោះជាកម្ពុជាដកខ្លួនចេញពីគម្រោង CLV-DTA ប៉ុន្តែ កម្ពុជា នៅតែបន្តអភិវឌ្ឍលើទឹកដីរបស់ខ្លួនតទៅទៀត ជាមួយនឹងកិច្ចសហការជាធម្មតាជាមួយប្រទេសជិតខាងក្នុងក្របខ័ណ្ឌទ្វេភាគីរវាងប្រទេស និង ប្រទេស”។

គួរបញ្ជាក់ផងដែរថា សម្រាប់ប្រជាពលរដ្ឋដែលចង់ចូលរួមវិភាគទាន”មូលនិធិកសាងហេដ្ឋារចនាសម្ព័ន្ធតាមព្រំដែន” រាជរដ្ឋាភិបាលកម្ពុជា នៅតែបើកទទួលបន្តពីប្រជាពលរដ្ឋរហូតដល់ថ្ងៃទី ៣១ ខែតុលា ឆ្នាំ២០២៤។ ដោយឡែក សម្រាប់ការធ្វើដំណើរទៅទស្សនកិច្ចនៅខេត្តភូមិភាគឦសានក៏នៅតែបន្ត រហូតដល់ដាច់ឆ្នាំ២០២៤។