ខួបកំណើតឆ្នាំនេះ ពេជ្រ វត្តីសារ៉ាវឌ្ឍី បានរៀបចំកម្មវិធីយ៉ាងអធិកអធមបូកជាមួយនឹងកម្មវិធីជួបជុំអ្នកគាំទ្រផងដែរ។ អ្វីដែលកាន់តែចាប់អារម្មណ៍ Miss Grand Cambodia 2022 រូបនេះពិតជាមានហ្វេនគុណភាពពិតមែន ខណៈទទួលបានកាដូជាទឹកប្រាក់សរុបជាង១ម៉ឺនដុល្លារពីហ្វេនក្នុងស្រុកនិងក្រៅស្រុក។
កាលពីថ្ងៃទី២១ ខែកញ្ញា ពេជ្រ វត្តីសារ៉ាវឌ្ឍី លំដាប់រងទី៥ Miss Grand International 2022 បានរៀបចំកម្មវិធីខួបកំណើតនិងជួបជុំអ្នកគាំទ្រលើកដំបូងរបស់ខ្លួនប្រមូលផ្តុំដោយសិល្បករសិល្បការិនី បវរកញ្ញា មានភ្ញៀវពិសេសពីក្រៅប្រទេសផងដែរ។ តាមរយៈវីដេអូផ្សេងៗដែលត្រូវបានចែករំលែកលើបណ្តាញសង្គមគេបានឃើញមានកម្មវិធីសប្បាយៗជាច្រើនទាំងការរាំនិងចម្រៀងពីម្ចាស់កម្មវិធីផ្ទាល់។
ជាមួយគ្នានេះដែរ ពេជ្រ វត្តីសារ៉ាវឌ្ឍី ទទួលបានជូនពរនិងកាដូជាច្រើនពីមិត្តក្នុងចង្កោមសិល្បៈចំណែកឯហ្វេនៗរបស់នាងមិនអន់ដូចគ្នាមានការរៀបចំកាដូជាទឹកប្រាក់ទាំងលុយរៀលនិងដុល្លារសរុបបានទៅដល់ជាង១ម៉ឺនដុល្លារ។ ហ្វេនៗក្នុងស្រុកទទួលបានចំនួន
1465$ ចំណែកឯហ្វេននៅក្រៅប្រទេសវិញជូនជាកាដូដល់នាងសរុបចំនូន ១ម៉ឺនដុល្លារ។ ក្រៅពីហ្វេនៗ Miss Grand Cambodia 2022 រូបនេះទទួលបានបាច់ផ្កាជាសាច់ប្រាក់ពីម្ចាស់ក្រុមហ៊ុនដែលនាងធ្វើជា BA ផងដែរ។
ការទទួលបានកាដូជាសាច់ប្រាក់យ៉ាងច្រើនពីហ្វេនៗទៅកាន់ ពេជ្រ វត្តីសារ៉ាវឌ្ឍី បែបនេះបានធ្វើឱ្យអ្នកដទៃទៀតស្ងើចសរសើរយ៉ាងខ្លាំងចំពោះបវរកញ្ញារូបនេះដែលទទួលបានការគាំទ្រខ្លាំង ជានាមជាបវរកញ្ញាកម្ពុជាដំបូងមានការគាំទ្រទាំងក្នុងប្រទេសនិងក្រៅប្រទេសមានជាអំណោចយ៉ាងច្រើនបែបនេះ។
គួរបញ្ជាក់ថា នេះមិនមែនជាលើកទី១នោះទេដែលហ្វេនៗជូនកាដូជាសាច់ប្រាក់ដល់ ពេជ្រ វត្តីសារ៉ាវឌ្ឍី ជារឿយៗពេលមានកម្មវិធីពិសេសនាងគឺទទួលបានពីហ្វេនៗដូចគ្នា៕
