បរទេស៖ មឹកយក្សដ៏ធំសម្បើមមួយក្បាលបានអណ្តែតនៅលើឆ្នេរសមុទ្រ El Sablón នៃទីក្រុង Llanes ភាគខាងជើងប្រទេសអេស្ប៉ាញ បានកំពុងបង្កឱ្យមានការចាប់អារម្មណ៍យ៉ាងខ្លាំងពីអ្នកវិទ្យាសាស្ត្រ។
មឹកយក្ស Architeuthis dux គឺជាសត្វសមុទ្រជម្រៅជ្រៅបំផុត ដែលកម្រនឹងបង្ហាញខ្លួនឱ្យមនុស្សយើងបានឃើញពួកវាណាស់ ដូច្នេះការប្រទះឃើញសាកសពរបស់វាអណ្តែតនៅលើឆ្នេរសមុទ្រ El Sablón នៃទីក្រុង Llanes ភាគខាងជើងប្រទេសអេស្ប៉ាញ គឺជាការរកឃើញដ៏គួរឱ្យចាប់អារម្មណ៍បំផុតមួយរបស់អ្នកវិទ្យសាស្ត្រ។

មឹកយក្សប្រវែង ១៧ ម៉ែត្រជាមួយទម្ងន់ ៣១២ គីឡូក្រាមនេះគឺមិនអាចបរិភោគបាននោះទេ ព្រោះម៉ាសសាច់ដុំរបស់វាគឺមានកម្រិតខ្ពស់នៃអាម៉ូញាក់ពុលខ្លាំង។ មឹកយក្សដែលរកឃើញនេះគឺជាសត្វឆ្អឹងខ្នងដ៏ធំបំផុត និងកម្របំផុតដែលមានវត្តមានលើផែនដី។ មឹកទាំងនេះច្រើនតែរស់នៅក្នុងជម្រៅដ៏អស្ចារ្យក្រោមផ្ទៃមហាសមុទ្រដល់រាប់រយម៉ែត្រឯណោះ ហើយជារឿយៗគឺមិនមានពន្លឺអាចទៅដល់បានឡើយ។ យោងតាម National Geographic បានឱ្យដឹងថា ពួកវាការពារខ្លួន ឬបរបាញ់សត្វផ្សេងទៀតដោយប្រើត្រែងវែងពីរដែលជួយឱ្យពួកវាចាប់ និងដាក់អាហារចូលទៅក្នុងមាត់បានយ៉ាងងាយស្រួល។

ដូច្នេះអាហាររបស់ពួកវារួមមានត្រី បង្គា និងមឹកប្រភេទផ្សេងៗទៀត។ អ្នកជំនាញខ្លះនិយាយថា ពួកវាថែមទាំងអាចសម្លាប់ និងស៊ីត្រីបាឡែនតូចៗបានទៀតផង។ យោងតាម Newsweek ភ្នែកមឹកយក្សស្ថិតក្នុងចំណោមសត្វធំបំផុតក្នុងនគរដែលមានអង្កត់ផ្ចិត ២៥ ស.ម. ដែលសរីរាង្គដ៏ធំនេះអនុញ្ញាតឱ្យពួកវារកឃើញវត្ថុ និងចាប់សត្វនៅក្នុងបរិយាកាសងងឹតបានយ៉ាងជោគជ័យបំផុត។

លោក Luis Laria ប្រធានក្រុមប្រឹក្សាសម្របសម្រួលស្រាវជ្រាវ និងការពារសត្វសមុទ្រ (CEPESMA) បាននិយាយថា សមុទ្រ El Sablón នៃទីក្រុង Llanes ភាគខាងជើងប្រទេសអេស្ប៉ាញ គឺជាតំបន់សមុទ្រដែលមានប្រភេទសត្វមឹកធំៗជាច្រើនរស់នៅ។ ហេតុនេះការប្រទះឃើញមឹកយក្សដ៏កម្រមួយក្បាលនេះអណ្តែតលើផ្ទៃសមុទ្រមិនមែនជាលើកទីមួយនោះទេ ប៉ុន្តែការរកឃើញនេះគឺកំពុងបង្កឱ្យមានការចាប់អារម្មណ៍យ៉ាងខ្លាំងពីអ្នកវិទ្យាសាស្ត្រដើម្បីស្រាវជ្រាវ។ ទោះជាយ៉ាងណា យើងមិនទាន់ដឹងពីមូលហេតុច្បាស់លាស់នៃការស្លាប់របស់មឹកយក្សដ៏កម្រនេះនោះទេ៕

ប្រទេសនីហ្សេរីយ៉ា ៖ កាលពីថ្ងៃទី១៦ ខែតុលា ឆ្នាំ២០២៤ សារព័ត៌មានបរទេសរាយការណ៍ថា រថយន្តដឹកប្រេងឥន្ធនៈ១គ្រឿងនៅប្រទេសនីហ្សេរីយ៉ា បានក្រឡាប់ហៀរប្រេងនៅតាមផ្លូវ ហើយមនុស្សម្នាក៏នាំគ្នាមកប្រមូលប្រេងទាំងនេះ ។ បន្តិចក្រោយមក រថយន្តនេះក៏ផ្ទុះឡើងបណ្តាលឱ្យភ្លើងឆេះរាលដាលពេញបរិវេណនេះ និងធ្វើឱ្យមនុស្ស១៤៧នាក់ស្លា.ប់ និងរងរបួសជាច្រើននាក់ទៀត ។

សារព័ត៌មានបរទេសរាយការណ៍ថា រថយន្តដឹកប្រេងបានក្រឡាប់នៅរដ្ឋជិកាវ៉ា ស្ថិតនៅភាគខាងជើងប្រទេសនីហ្សេរីយ៉ា កាលពីថ្ងៃទី១៦ ខែតុលា កន្លងមក ដែលធ្វើឱ្យអ្នកស្រុកនាំគ្នាមកប្រមូលប្រេងយកទៅផ្ទះ ប៉ុន្តែពេលនោះ ស្រាប់តែរថយន្តផ្ទុះបណ្តាលឱ្យមានភ្លើងឆេះរាលដាលយ៉ាងឆាប់រហ័ស ។ អ្នកស្រុកដែលកំពុងប្រមូលប្រេងរត់គេចពុំទាន់ ហើយក៏បានស្លាប់ក្នុងភ្លើង ។

ហេតុការណ៍នេះបានកើតឡើងនៅទីក្រុងម៉ាជៀ រដ្ឋជិកាវ៉ា ដោយសារអ្នកបើកបររថយន្តដឹកប្រេងពុំអាចបញ្ជារថយន្តបាន ហើយក៏បណ្តាលឱ្យរថយន្តក្រឡាប់នៅកន្លែងកើតហេតុ ។ រថយន្តនេះបានធ្វើដំណើរមកពីទីក្រុងខាណូ ទៅកាន់ទីក្រុងអេនគូរូ រដ្ឋយ៉ូបេ ។

សមត្ថកិច្ចនីហ្សេរីយ៉ានិយាយថា ក្រោយពីរថយន្តដឹកប្រេងក្រឡាប់ សមត្ថកិច្ចក៏បានបិទរបាំងការពារកុំឱ្យពលរដ្ឋចូលមកជិត ប៉ុន្តែសមត្ថកិច្ចពុំអាចហាមឃាត់ពលរដ្ឋបានទេ ហើយពលរដ្ឋនាំគ្នាមកប្រមូលប្រេងកាន់តែច្រើនឡើងៗ ។

សមត្ថកិច្ចបាននិយាយមកកាន់សារព័ត៌មាន BBC ថា ៖ «យើងបានព្យាយាមបំផុតហើយដើម្បីហាមឃាត់ពលរដ្ឋកុំឱ្យមកក្បែរកន្លែងកើតហេតុ ដោយធ្វើការបិទរបាំងការពារ ។ ប៉ុន្តែមានពលរដ្ឋមកប្រមូលប្រេងកាន់តែច្រើន រហូតដល់សមត្ថកិច្ចឃាត់ឃាំងលែងបាន ហើយពេលនោះ ស្រាប់តែភ្លើងឆេះរាលដាលតែម្តង» ។

ហេតុការណ៍នេះបណ្តាលឱ្យមនុស្សស្លាប់ចំនួន១៤៧នាក់ និងរងរបួសជាង១០០នាក់ ហើយអាជ្ញាធរបានបញ្ជូនអ្នករងរបួសទៅកាន់មន្ទីរពេទ្យនៅទីក្រុងក្បែរៗ ។ មនុស្សភាគច្រើនរងរបួសធ្ងន់ធ្ងរ រីឯសាកសពវិញ អាជ្ញាធរនឹងរៀបចំពិធីកប់សាកសពរួមគ្នានាពេលបន្ទាប់ ។

អ្នកបើកបររថយន្តដឹកប្រេងពុំរងរបួសទេ ប៉ុន្តែសមត្ថកិច្ចបានចាប់ខ្លួនអ្នកបើកបររថយន្តដើម្បីស៊ើបអង្កេតរកមូលហេតុពិតប្រាកដ ដែលបណ្តាលឱ្យរថយន្តក្រឡាប់ផ្ទុះឆេះ ។ សមត្ថកិច្ចនិយាយថា នេះជាហេតុការណ៍គំរូមួយសម្រាប់មនុស្សផ្សេងទៀត ប្រសិនបើជួបហេតុការណ៍រថយន្តដឹកប្រេងក្រឡាប់បែបនេះ សូមកុំទៅក្បែរឱ្យសោះ ពីព្រោះគ្រោះថ្នាក់អាចកើតឡើងគ្រប់ពេលវេលា ៕

ព្រះច័ន្ទពេញវង់នៅថ្ងៃទី ១៧ ខែតុលា ឆ្នាំ២០២៤ ល្ងាចនេះ នឹងក្លាយជាព្រះច័ន្ទដ៏ធំបំផុតប្រចាំឆ្នាំលំដាប់ទី ៣ ដោយសារតែវារះនៅជិតផែនដីបំផុត។
យោងតាមវេជ្ជបណ្ឌិត Fred Espenak អ្នកជំនាញខាងរូបវិទ្យា និងសូរ្យគ្រាស ដែលធ្វើការនៅ NASA បាននិយាយថា នៅឆ្នាំ ២០២៤ នេះព្រះច័ន្ទដ៏ធំបំផុត ឬហៅថា Super Moons នឹងរះនៅជិតផែនដីរបស់យើងចំនួន ៤ ដងគឺក្នុងអំឡុងខែសីហា កញ្ញា តុលា និងវិច្ឆិកា។

ដូច្នេះ Super Moons ដែលរះថ្ងៃទី ១៧ ខែតុលានេះ នឹងជាព្រះច័ន្ទដ៏អស្ចារ្យបំផុតលំដាប់ទី ៣ ប្រចាំឆ្នាំ ហើយក៏ជាព្រះច័ន្ទពេញលេញជាងគេបំផុតផងដែរ។ នៅថ្ងៃនេះ ព្រះច័ន្ទនឹងពេញបូណ៌មីនៅម៉ោង ៦:៣០ នាទីល្ងាចដែលជាម៉ោងនៅក្នុងប្រទេសកម្ពុជា ដោយឥឡូវនេះវាបាននឹងទៅដល់ perigee ដែលជាចំណុចជិតបំផុតរបស់ផែនដីនៅចម្ងាយ ៣៥៧.១៧៤ គីឡូម៉ែត្រហើយ នេះបើយោងតាម Space ។

Super Moons កើតឡើងដោយសារតែគន្លងរាងអេលីបរបស់ព្រះច័ន្ទ នៅពេលដែលព្រះច័ន្ទស្ថិតនៅជួរជាមួយផែនដី ហើយព្រះអាទិត្យស្ថិតនៅជិតផែនដីបំផុត (perigee) ដូច្នេះព្រះច័ន្ទនឹងមានទំហំធំជាង ១៤% ក៏ដូចជាភ្លឺជាងព្រះច័ន្ទពេញវង់ធម្មតារហូតដល់ ៣០% ។ ហេតុនេះព្រះច័ន្ទដែលរះនៅថ្ងៃនេះត្រូវបានគេចាត់ទុកថា ជាព្រះច័ន្ទដ៏អស្ចារ្យបំផុតប្រចាំឆ្នាំលំដាប់ទី ៣ ដែលនឹងរះនៅជិតផែនដីបំផុត។

ដូច្នេះហើយកុំភ្លេចចូលរួមទស្សនាទាំងអស់គ្នា។ ទោះជាយ៉ាងណាប្រសិនបើអ្នកខកខានមើលព្រះដ៏អស្ចារ្យនៅថ្ងៃនេះ អ្នកក៏មានឱកាសទស្សនាវាម្តងទៀតនៅខែក្រោយ ដែលវានឹងរះនៅជិតផែនដីបំផុតនៅថ្ងៃ ១៥ ខែវិច្ឆិកា ឆ្នាំ២០២៤ ហើយវាក៏ជាព្រះច័ន្ទធំបំផុតចុងក្រោយនៃឆ្នាំផងដែរ៕

ប្រទេសថៃ ៖ កាលពីថ្ងៃទី១៦ ខែតុលា ឆ្នាំ២០២៤ ក្រោយពីសមត្ថកិច្ចខេត្តនគរាជសីម៉ា ប្រទេសថៃ បានទទួលសេចក្តីរាយការណ៍ថា រថយន្តក្រុងដឹកភ្ញៀវទេសចរបរទេសផ្ទុះឆេះនៅផ្លូវមិត្តភាពឃូខាក់ណាន ទល់មុខសួនច្បារខោខេន ក្នុងតំបន់មឿងប៉ាកឆង ខេត្តនគរាជសីម៉ា សមត្ថកិច្ចក៏ទំនាក់ទំនងទៅកាន់រថយន្តពន្លត់អគ្គិភ័យមកជួយអន្តរាគមន៍ភ្លាមៗ ។ បន្ទាប់មក សមត្ថកិច្ចក៏បានប្រមូលកម្លាំង និងសហការជាមួយភ្នាក់ងារពាក់ព័ន្ធចុះមកកន្លែងកើតហេតុ ។

សមត្ថកិច្ចបញ្ជាក់ថា ភ្លើងបានឆាបឆេះរថយន្តក្រុងពណ៌ទឹកក្រូច និងមានផ្សែងខ្មៅហុយទ្រលោមយ៉ាងច្រើន ដែលធ្វើឱ្យភ្ញៀវទេសចរបរទេសជាង៥០នាក់ ជាជនជាតិឥណ្ឌូណេស៊ី ប្រជ្រៀតគ្នារត់ចុះពីរថយន្តក្រុងយ៉ាងលឿន ។ ហេតុការណ៍នេះពុំបណ្តាលឱ្យមានគ្រោះថ្នាក់ដល់ភ្ញៀវទេសចរបរទេសទេ ដោយសារពួកគេស្រែកប្រាប់គ្នាឱ្យប្រញាប់ចុះពីរថយន្ត ។

សមត្ថកិច្ចបន្តថា រថយន្តពន្លត់អគ្គិភ័យបានបាញ់ទឹកពន្លត់ភ្លើងឆេះរថយន្តក្រុង ដោយចំណាយពេលប្រមាណ២០នាទី ទើបភ្លើងរលត់អស់ ប៉ុន្តែរថយន្តក្រុងបានខូចខាតទាំងស្រុង ។ នេះសំណាងល្អហើយ ដែលភ្ញៀវទេសចរបរទេសរត់ចុះពីរថយន្តទាន់ពេលវេលា បើមិនដូច្នោះទេ វានឹងដូចហេតុការណ៍ឆេះរថយន្តដឹកកូនសិស្សនាពេលកន្លងមក ។

តាមការសាកសួរលោក អភិឆាត លិនតា អាយុ៤៦ឆ្នាំ ជាអ្នកបើកបររថយន្តក្រុងនេះ និយាយថា លោកបានបើករថយន្តក្រុងដឹកភ្ញៀវទេសចរបរទេសជាង៥០នាក់ មកលេងនៅស្រុកប៉ាងឆង ខេត្តនគរាជសីម៉ា រួចហើយស្នាក់នៅក្នុងសណ្ឋាគារមួយកន្លែង ។ មុនពេលកើតហេតុ លោកបានដឹកភ្ញៀវទេសចរមកស្រស់ស្រូបអាហារពេលល្ងាចនៅភោជនីយដ្ឋានក្បែរកន្លែងកើតហេតុ ហើយលោកក៏បើករថយន្តទៅចតនៅផ្លូវមិត្តភាពឃូខាក់ណាន ស្រាប់តែភ្ញៀវទេសចរស្រែកថា មានភ្លើងឆេះនៅផ្នែកខាងក្រោយរថយន្ត ។

លោក អភិឆាត បន្ថែមថា ពេលឃើញភ្លើងឆេះរថយន្តក្រុងបែបនេះ ភ្ញៀវទេសចរបរទេសទាំងអស់ក៏រត់ចុះពីរថយន្តយ៉ាងឆាប់រហ័ស ។ បន្តិចក្រោយមក ភ្លើងបានឆាបឆេះរថយន្តក្រុងទាំងមូល មុនពេលរថយន្តពន្លត់អគ្គិភ័យមកជួយបាញ់ទឹកពន្លត់ ។ សំណាងល្អណាស់ ដែលភ្ញៀវទេសចរទាំងអស់មានសុវត្ថិភាព ហើយលោកពុំដឹងថា ភ្លើងឆេះរថយន្តនេះបណ្តាលមកពីមូលហេតុអ្វីទេ ពីព្រោះរថយន្តនេះចាក់ប្រេងឥន្ធនៈ ពុំបានប្រើប្រាស់ហ្គាស់ទេ ។

សមត្ថកិច្ចនឹងស៊ើបអង្កេតរកមូលហេតុពិតប្រាកដដែលធ្វើឱ្យភ្លើងឆេះរថយន្ត ព្រមទាំងចាត់វិធានការបន្តទៀត ហើយសមត្ថកិច្ចបានផ្តាំផ្ញើឱ្យក្រុមហ៊ុនរថយន្តក្រុង និងអ្នកបើកបររថយន្តក្រុងយកចិត្តទុកដាក់ថែទាំរថយន្តឱ្យបានល្អ ដើម្បីកុំឱ្យមានភ្លើងឆេះបែបនេះទៀត ។ បើភ្លើងឆេះរថយន្តក្រុងញឹកញាប់នឹងធ្វើឱ្យបាត់បង់ទំនុកចិត្តពីភ្ញៀវទេសចរបរទេស ហើយពួកគេនឹងលែងហ៊ានជិះរថយន្តក្រុងថៃបន្តទៀត ។

គួរបញ្ជាក់ថា នាពេលថ្មីៗនេះ មានហេតុការណ៍ភ្លើងឆេះរថយន្តក្រុងនៅប្រទេសថៃជាញឹកញាប់ ដូចជា ៖ ភ្លើងឆេះរថយន្តក្រុងដឹកសិស្សសាលាទៅទស្សនកិច្ច ដែលបណ្តាលឱ្យកូនសិស្សជាច្រើននាក់ និងគ្រូបង្រៀន៣នាក់ ស្លាប់ក្នុងរថយន្ត ។ រីឯហេតុការណ៍មួយទៀត គឺភ្លើងឆេះរថយន្តក្រុងក្នុងចំណតរថយន្តរបស់សាកលវិទ្យាល័យដ៏ល្បីមួយកន្លែងនៅឃុំប្រាឆាធិប៉ាត់ ស្រុកថាណាក់បុរី ខេត្តប៉ាធុមថានី ៕

បណ្តាប្រទេសអាស៊ីអាគ្នេយ៍នឹងឃើញមានការកើនឡើងទឹកភ្លៀងខ្ពស់ជាងធម្មតានៅខែចុងក្រោយនៃឆ្នាំ ២០២៤ ដែលនឹងគំរាមកំហែងដល់ផលិតកម្មកសិកម្ម ទេសចរណ៍ និងឧស្សាហកម្ម។
យោងតាមសេចក្តីប្រកាសរបស់ទីភ្នាក់ងារជាតិគ្រប់គ្រងទឹក PUB បច្ចុប្បន្នព្យុះផ្គររន្ទះបានកំពុងគ្របដណ្តប់ប្រទេសសិង្ហបុរី ដោយបង្កឱ្យមានភ្លៀងធ្លាក់ខ្លាំងប្រហែល ១៣៤.៨ មីលីម៉ែត្រកាលពីថ្ងៃទី១៤ ខែតុលាកន្លងទៅ ដែលទឹកភ្លៀងនេះគឺស្មើនឹង ៨០% នៃទឹកភ្លៀងជាមធ្យមក្នុងខែតុលារបស់ប្រទេសសិង្ហបុរី ហើយក៏ជាទឹកភ្លៀងប្រចាំថ្ងៃខ្ពស់បំផុតចាប់តាំងពីឆ្នាំ ១៩៧៨ មកផងដែរ។

មិនត្រឹមតែប្រទេសសិង្ហបុរីប៉ុណ្ណោះទេ បណ្តាប្រទេសអាស៊ីអាគ្នេយ៍ផ្សេងទៀតក៏នឹងឃើញមានការកើនឡើងខ្ពស់ជាងទឹកភ្លៀងធម្មតានៅខែចុងក្រោយនៃឆ្នាំ ២០២៤ ផងដែរ ដែលនេះនឹងបង្កឱ្យមានការគំរាមកំហែងយ៉ាងខ្លាំងដល់ផលិតកម្មកសិកម្ម ទេសចរណ៍ ក៏ដូចជាឧស្សាហកម្មដែលត្រូវបានរំខានដោយព្យុះជាបន្តបន្ទាប់ក្នុងឆ្នាំនេះ។ ដូច្នេះសម្រាប់មូលហេតុដែលបង្កឱ្យមានភ្លៀងធ្លាក់ខ្លាំងខុសធម្មតានៅអាស៊ីអាគ្នេយ៍ គឺដោយសារបាតុភូត La Nina ដែលជាបាតុភូត​ផ្ទៃសមុទ្រ​នៅ​ចំ​កណ្ដាល និង​ភាគ​ខាងកើត​ខ្សែ​អេក្វាទ័រ នៅ​តំបន់​ប៉ាស៊ីហ្វិក ចុះ​ត្រជាក់​ជាង​ធម្មតា។ នេះបើយោងតាមទីភ្នាក់ងារព័ត៌មាន Bloomberg ដែលបានដកស្រង់ការព្យាករណ៍របស់មជ្ឈមណ្ឌលឧតុនិយមឯកទេសអាស៊ាន។

លោក Takahisa Nishikawa អ្នកដឹកនាំសកម្មភាពព្យាករណ៍នៅក្រុមហ៊ុន The Weather របស់សហរដ្ឋអាមេរិកបានព្យាករណ៍ថា ប្រទេសវៀតណាមនឹងទទួលរងនូវព្យុះត្រូពិចច្រើនជាងធម្មតាចាប់ពីពេលនេះរហូតដល់ខែមេសាឆ្នាំក្រោយ ជាមួយនឹងហានិភ័យនៃទឹកជំនន់ និងការបាក់ដី…ហើយតំបន់ដែលរងផលប៉ះពាល់ខ្លាំងជាងគេគឺ តំបន់ភាគខាងជើងនិងកណ្តាល។ ទន្ទឹមនឹងនេះទឹកជំនន់ក៏បានអូសបន្លាយនៅក្នុងខេត្តឈៀងម៉ៃ និងឈៀងរ៉ៃនៃប្រទេសថៃផងដែរ ដែលធ្វើឱ្យប្រទេសនេះខាតបង់ប្រាក់ប្រហែល ៣០ ពាន់លានបាត (ជិត ៩០០ លានដុល្លារអាមេរិក) ។

នៅប្រទេសហ្វីលីពីនបច្ចុប្បន្នក៏កំពុងជួបការលំបាកក្នុងការងើបឡើងវិញបន្ទាប់ពីរងការវាយប្រហារដោយព្យុះខ្លាំងជាបន្តបន្ទាប់ផងដែរ។ ប្រទេសនេះអាចនឹងទទួលបានភ្លៀងធ្លាក់ច្រើនជាងមធ្យមចាប់ពីពេលនេះរហូតដល់ចុងឆ្នាំ ២០២៤ នេះបើយោងតាមទីភ្នាក់ងារអាកាសធាតុរបស់ប្រទេស។ ដូច្នេះហើយតាមការព្យាករប្រទេសទាំងបីនេះ គឺអាចនឹងរងផលប៉ះពាល់ដោយព្យុះភ្លៀងផ្គររន្ទះខ្លាំងជាងគេក្នុងតំបន់អាស៊ីអាគ្នេយ៍៕

បន្ទាប់ពីប្រទេសថៃដែលជាប្រទេសកំពូលមានភ្ញៀវទេសចរទស្សនាច្រើនជាងគេក្នុងតំបន់ក្នុងអាស៊ីអាគ្នេយ៍ ប្រទេសវៀតណាមបច្ចុប្បន្នក៏កំពុងក្លាយជាគោលដៅទេសចរណ៍នាំមុខគេនៅអាស៊ីអាគ្នេយ៍ផងដែរ ដោយសារកត្តាចម្បងធំៗទាំងនេះ។ ក្នុងរយៈពេល ៧ ខែដំបូងនៃឆ្នាំ ២០២៤ ប្រទេសវៀតណាមបានស្វាគម៍ភ្ញៀវអន្តរជាតិជិត ១០ លាននាក់ ក្នុងនោះ ៧០% គឺជាភ្ញៀវដែលមកពីប្រទេសកូរ៉េខាងត្បូង ចិនដីគោក និងតៃវ៉ាន់។ ដោយអត្រាស្ទុះងើបឡើងវិញនៃវិស័យទេសចរណ៍ត្រូវបានប៉ាន់ប្រមាណថាមានការកើនឡើងខ្ពស់រហូតដល់ ៩៤.១%។ ដូច្នេះហេតុផលដែលភ្ញៀវបរទេសនិយមមកទស្សនាប្រទេសវៀតណាមច្រើនជាងគេគឺដោយសារកត្តាដូចខាងក្រោម៖

១.ការចំណាយទាប៖ យោងតាមក្រុមហ៊ុន Outbox ដែលជាអង្គភាពស្រាវជ្រាវទីផ្សារទេសចរណ៍បានស្ទង់មតិអ្នកទេសចរអន្តរជាតិចំនួន ២,៧០០ នាក់ដើម្បីស្វែងរកមូលហេតុដែលភ្ញៀវបរទេសភាគច្រើនចូលចិត្តទៅលេងប្រទេសវៀតណាម។ ដូច្នេះមូលហេតុដែលភ្ញៀវច្រើនចូលចិត្តទៅកម្សាន្តនៅប្រទេសនេះគឺដោយសារការចំណាយទាប។

ជាការពិតណាស់ការចំណាយដ៏សមរម្យរបស់វៀតណាមបានធ្វើឱ្យវាក្លាយជាកន្លែងទាក់ទាញបំផុតសម្រាប់អ្នកធ្វើដំណើរដែលគិតដល់ថវិកា។ ការចំណាយទាបក្នុងប្រទេសវៀតណាមអនុញ្ញាតឱ្យអ្នកធ្វើដំណើររីករាយនឹងបទពិសោធន៍ដែលមានតម្លៃខ្ពស់ក្នុងតម្លៃទាប ក៏ដូចជាកត្តាសន្សំសំចៃការចំណាយ ដែលនេះនឹងជួយវៀតណាមក្លាយជាជម្រើសដ៏ល្អបំផុតសម្រាប់ភ្ញៀវបរទេស ដែលចង់ស្វែងយល់ពីគោលដៅថ្មីៗដោយមិនមានតម្លៃថ្លៃ។

២.សុវត្ថិភាព៖ ៤០.៧% នៃអ្នកឆ្លើយសំណួរជឿថាវៀតណាមគឺជាគោលដៅសុវត្ថិភាពសម្រាប់ការធ្វើដំណើរនាពេលខាងមុខរបស់ពួកគេ។ វៀតណាមបានធ្វើឱ្យអ្នកទេសចរមានអារម្មណ៍ថាមានសុវត្ថិភាព ដោយសារអត្រាឧក្រិដ្ឋកម្មទាបជាងប្រទេសអាស៊ីអាគ្នេយ៍ផ្សេងទៀត។ នៅក្នុងរបាយការណ៍សន្ទស្សន៍សន្តិភាពសកលឆ្នាំ ២០២៣ វៀតណាមបានចាត់ចំណាត់ថ្នាក់ថាជាប្រទេស និងដែនដីមានសុវត្ថិភាពបំផុតដោយជាប់លេខ ៤១ ក្នុងចំណោម ១៦៣ ប្រទេស។

៣.វប្បធម៌ដ៏សម្បូរបែប៖ ប្រទេសវៀតណាមគឺជាគោលដៅដ៏ល្អមួយដែលមានប្រវត្តិសាស្ត្ររាប់ពាន់ឆ្នាំ ស្លាកស្នាមវប្បធម៌ដែលមានវត្តមាននៅក្នុងប្រាសាទបុរាណនីមួយៗ ទីក្រុងប្រវត្តិសាស្ត្រ ពិធីបុណ្យប្រពៃណី និងម្ហូបក្នុងស្រុក ដែលទាំងនេះសុទ្ធសឹងតែជាកត្តាទាក់ទាញភ្ញៀវទេសចរ ៤៥.២% ទៅកាន់ប្រទេសវៀតណាម។

៤.ធម្មជាតិដ៏អស្ចារ្យ៖ ៥២.១% នៃភ្ញៀវអន្តរជាតិបានចាប់អារម្មណ៍នឹងប្រទេសវៀតណាម គឺដោយសារតែធម្មជាតិដ៏អស្ចារ្យរបស់វា ដែលជាកម្លាំងចិត្តចម្បងសម្រាប់ពួកគេមកទីនេះ។ ទេសភាពនៃប្រទេសវៀតណាមមានភាពចម្រុះ ដែលលាតសន្ធឹងពីជើងទៅត្បូង ជាពិសេសគឺតំបន់ Ha Long ភ្ញៀវទេសចរអាចមើលឃើញភ្នំថ្មកំបោរនៅលើឈូងសមុទ្រ ដែលជាកន្លែងទាក់ទាញភ្ញៀវអន្តរជាតិរហូតដល់មួយលាននាក់ក្នុងឆមាសទីមួយនៃឆ្នាំ ២០២៤ នេះ។

មិនត្រឹមតែទាក់ទាញភ្នែកប៉ុណ្ណោះទេ អត្ថប្រយោជន៍ទេសភាពក៏ជួយឱ្យប្រទេសវៀតណាមផ្តល់នូវសកម្មភាពទេសចរណ៍ដែលទាក់ទងនឹងធម្មជាតិដូចជាការឡើងភ្នំ ការជិះទូក ឬសម្រាកលំហែនៅមាត់សមុទ្រ សម្រាប់ភ្ញៀវទេសចរ ខណៈអ្នកទេសចរខ្លះក៏ចូលចិត្តទៅទីជនបទពណ៌បៃតង ឬតំបន់ឆ្នេរស្អាត ដើម្បីជៀសវាងសម្លេងរំខានពីទីក្រុងផងដែរ៕