ប្រទេសឥណ្ឌា៖ ទន្លេ Yamuna ត្រូវបានគេចាត់ទុកថា ជាទន្លេដែលកខ្វក់ និងមានការបំពុលខ្លាំងបំផុតក្នុងពិភពលោក ទោះជាយ៉ាងណាប្រជាជនឥណ្ឌានៅតែប្រារព្ធពិធីបុណ្យភ្លើងនៅទីនេះដើម្បីសុំសេចក្តីសុខ។
ពិធីបុណ្យភ្លើងប្រព្រឹត្តទៅនូវថ្ងៃទី៣១ ខែតុលានេះតែម្តង ដោយអ្នកជឿសាសនាហិណ្ឌូតែងតែមកទន្លេ Yamuna ដើម្បីងូតទឹក និងផឹកទឹកទន្លេនេះ ព្រោះគេជឿថា Yamuna គឺជាទន្លេដ៏ពិសិដ្ឋបំផុតសម្រាប់ហិណ្ឌូសាសនា។

ទន្លេ Yamuna មានប្រវែង ១,៣៧៦ គីឡូម៉ែត្រក្នុងទីក្រុង New Delhi ប្រទេសឥណ្ឌាគឺជាទន្លេមួយក្នុងចំណោមទន្លេដែលបំពុលបំផុតនៅលើពិភពលោក។ ផ្ទៃទន្លេត្រូវបានគ្របដណ្តប់ដោយពពុះពណ៌ស ពោរពេញទៅដោយសារធាតុគីមីពីរោងចក្រក្នុងទីក្រុង ដែលកំពុងគំរាមកំហែងយ៉ាងធ្ងន់ធ្ងរដល់សុខភាពប្រជាជន។ ទោះបីជាវាមានគ្រោះថ្នាក់ខ្លាំងយ៉ាងណាក៏ដោយ ក៏ប្រជាជនឥណ្ឌានៅតែជំនះប្រារព្ធពិធីបុណ្យភ្លើងនៅទីនេះដើម្បីសុំសេចក្តីសុខ។ ពិធីបុណ្យភ្លើងគឺជាពិធីបុណ្យសាសនាដែលមានអាយុកាលរាប់ពាន់ឆ្នាំមកហើយ ដោយមនុស្សតែងតែគោរព តៗគ្នារហូតមកដល់បច្ចុប្បន្ន។

ជនជាតិឥណ្ឌាម្នាក់បាននិយាយថា លោកតែតែមកទីនេះជារៀងរាល់ឆ្នាំដើម្បីថ្វាយបង្គំទឹកទន្លេ មិនខ្វល់ថាទឹកនេះកខ្វក់ ឬបំពុលខ្លាំងប៉ុណ្ណានោះទេ សម្រាប់លោកបាតទឹកទន្លេនេះនៅតែស្អាតជានិច្ច។ រដូវរងាជិតមកដល់ហើយ ដែលជាពេលមានការបំពុលខ្លាំងបំផុតក្នុងទីក្រុងញូវដែលីដែលមានប្រជាជន ២០ លាននាក់។ ទីក្រុងនេះច្រើនតែគ្របដណ្តប់ដោយអ័ព្ទបំពុលក្នុងរដូវរងារ។ កម្រិតបំពុលបានកើនឡើង ខណៈអ្នកកាន់សាសនាហិណ្ឌូរាប់លាននាក់បានដុតផាវដើម្បីអបអរពិធីបុណ្យភ្លើង Diwali។

ពិធីបុណ្យភ្លើង Diwali បានធ្វើឱ្យមន្ត្រីមានការព្រួយបារម្ភ ព្រោះថាអ្នកគោរពបូជាហិណ្ឌូរាប់ពាន់នាក់នឹងមកងូតទឹក ផឹកទឹកនៅទន្លេយ៉ាមូណា។ ទន្លេនេះត្រូវបានបំពុលកាន់តែខ្លាំងឡើង ដែលពោរពេញទៅដោយថ្នាំសម្លាប់សត្វល្អិត និងទឹកសំណល់ឧស្សាហកម្ម បើទោះបីជារដ្ឋាភិបាលបានប្រកាសឱ្យប្រើច្បាប់ប្រឆាំងការបំពុល និងការសាងសង់រោងចក្រប្រព្រឹត្តកម្មទឹកសំណល់រាប់សិបកន្លែងក៏ដោយ ក៏ទន្លេនៅតែមានការបំពុលខ្លាំង ហើយមនុស្សជាច្រើននៅតែប្រារព្ធពិធីបុណ្យនានា ដោយមិនខ្វល់ពីសុខភាព៕

ប្រទេសថៃ ៖ កាលពីថ្ងៃទី២៩ ខែតុលា ឆ្នាំ២០២៤ សារព័ត៌មានថៃរាយការណ៍ថា នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានបញ្ជាឱ្យស្ថាប័នពាក់ព័ន្ធដោះស្រាយបញ្ហាធូលីកខ្វក់លើអាកាស មុនពេលប្រទេសថៃចូលដល់រដូវរងា ។ ក្រៅពីនេះ សមត្ថកិច្ចត្រូវចាប់រថយន្តបញ្ចេញផ្សែងខ្មៅ និងបញ្ឈប់ការទិញទិន្នផលកសិកម្មដែលទទួលបានការពីដុតស្មៅក្នុងចម្ការ ។

លោកស្រី ផេថងថាន ស៊ីណាវ៉ាត់ ថ្លែងថា ក្នុងកិច្ចប្រជុំគណៈរដ្ឋមន្ត្រីបានចាត់តាំងលោក ប្រាសីទ ចាន់ថារ៉ាវង្ស ឧបនាយករដ្ឋមន្ត្រី និងរដ្ឋមន្ត្រីក្រសួងបច្ចេកវិទ្យាឌីជីថល សេដ្ឋកិច្ច និងសង្គម ព្រមទាំងលោក ឆាឡឺមឆ័យ ស្រ៊ីអន រដ្ឋមន្ត្រីក្រសួងធនធានធម្មជាតិ និងបរិស្ថាន ដោយធ្វើការសហការជាមួយស្ថាប័នពាក់ព័ន្ធពន្លឿនដោះស្រាយបញ្ហាធូលីកខ្វក់លើអាកាសឱ្យបានមុនរដូវរងា ។

លោកស្រីនាយករដ្ឋមន្ត្រីក៏បានលើកឡើងពីការដោះស្រាយបញ្ហាពាក់ព័ន្ធនឹងផ្នែកកសិកម្មផងដែរថា តើថៃគួរតែមានវិធានការដូចម្តេច? ដូចជា ៖ ពុំទិញផ្លែពោត និងអំពៅ ដែលបានមកពីការដុតស្មៅក្នុងចម្ការទាំងក្នុងប្រទេសថៃ និងប្រទេសជិតខាង ព្រមទាំងដោះស្រាយបញ្ហាផ្សែងខ្មៅចេញពីរថយន្ត និងរោងចក្រឧស្សាហកម្ម ។

ក្រៅពីនេះ លោកស្រីបានស្នើសុំការសហការជាមួយក្រសួងនានា ជាពិសេស ក្រសួងគមនាគមន៍ ត្រូវតែរឹតបន្តឹង និងចាប់រថយន្តផ្សែងខ្មៅ ព្រមទាំងកំណត់វិធានការគ្រប់គ្រងរោងចក្រយ៉ាងតឹងរ៉ឹង ដើម្បីកាត់បន្ថយធូលីកខ្វក់លើអាកាស ។

ប្រទេសថៃនឹងមានធូលីកខ្វក់ក្នុងពេលផ្លាស់ប្តូររដូវកាល គឺពីរដូវរងាទៅរដូវក្តៅ ។ នៅចុងរដូវរងាជារៀងរាល់ឆ្នាំ ថៃនឹងគ្របដណ្តប់ដោយសម្ពាធខ្ពស់ ឬខ្យល់ត្រជាក់ពីប្រទេសចិន ហើយខ្យល់មូសុងឦសាននឹងគ្របដណ្តប់ប្រទេសថៃ ជាពិសេស តំបន់ភាគខាងជើងនឹងមានសីតុណ្ហភាពធ្លាក់ចុះ ព្រមទាំងមានអាកាសធាតុត្រជាក់ ។

ប៉ុន្តែពេលខ្លះ សម្ពាធខ្យល់ខ្ពស់ដែលគ្របដណ្តប់តំបន់ទាំងនេះបានចុះខ្សោយកម្លាំង និងធ្វើឱ្យកម្លាំងខ្យល់មូសុងឦសានធ្លាក់ចុះ ព្រមទាំងមានកម្រិតសីតុណ្ហភាពទាប ទើបធ្វើឱ្យចរន្តខ្យល់មិនល្អ ។ ហេតុនេះ វាក៏បង្កឱ្យមានការប្រមូលផ្តុំធូលីកខ្វល់លើអាកាសកាន់តែច្រើន ។

តាមមន្ត្រីជំនាញបញ្ជាក់ថា ធូលីកខ្វក់មានប្រភពមកពីបំពង់ស៊ីម៉ាំងរថយន្ត, រោងចក្រឧស្សាហកម្ម និងការដុតស្មៅក្នុងចម្ការ ហើយធូលីនឹងប៉ះពាល់សុខភាពមនុស្សយ៉ាងខ្លាំង ពីព្រោះវាអាចចូលក្នុងសួតយ៉ាងងាយស្រួល ។ បើទោះជាវាមិនបង្កឱ្យឈឺភ្លាមៗក្តី ប៉ុន្តែការសន្សំធូលីក្នុងសួតរយៈពេលយូរ នឹងបណ្តាលឱ្យកើតជំងឺផ្សេងៗ ដូចជា ៖ ជំងឺផ្លូវដង្ហើម, សរសៃឈាម ប្រព័ន្ធបេះដូង និងប្រសាទ ៕

តើជ្រាបទេថា ក្នុងពិធីបុណ្យ Halloween ជារៀងរាល់ឆ្នាំ តែងតែមានផ្លែល្ពៅរាប់លានផ្លែត្រូវបានកប់ចោលក្នុងដី ដោយសារការប្រើប្រាស់តែម្តងបោះចោល ។ រីឯផ្លែល្ពៅខ្លះទៀតបានយកមកប្រើប្រាស់តែពាក់កណ្តាលផ្លែប៉ុណ្ណោះ ហើយផ្នែកនៅសល់បានក្លាយជាសំរាម ។

ប្រទេសនានាតែងតែរៀបចំពិធីបុណ្យ Halloween នៅថ្ងៃទី៣១ ខែតុលា ជារៀងរាល់ឆ្នាំ ហើយវាជាពិធីបុណ្យមានអាយុកាល២.០០០ឆ្នាំមកហើយ ។ ដើមកំណើតនៃពិធីបុណ្យនេះ គឺចាប់ផ្តើមពីពិធីបុណ្យ Samhain របស់ជនជាតិខែវ ដែលពួកគេតែងតែធ្វើពិធីបុណ្យពេលបញ្ចប់រដូវប្រមូលផល សម្រាប់ដោះលែងខ្មោចឱ្យមានសេរីភាព ។

ពិធីបុណ្យ Halloween ពុំសូវពេញនិយមក្នុងបណ្តាប្រទេសអាស៊ីប៉ុន្មានទេ ហើយពេញនិយមខ្លាំងសម្រាប់បណ្តាប្រទេសអឺរ៉ុប ។ ប៉ុន្តែបណ្តាប្រទេសអឺរ៉ុបមានបញ្ហាមួយក្រោយពិធីបុណ្យនេះ គឺសំរាមផ្លែល្ពៅយ៉ាងច្រើនសន្ធឹកសន្ធាប់ ។

ជាក់ស្តែង នៅប្រទេសអង់គ្លេស មានសំរាមផ្លែល្ពៅយ៉ាងច្រើនក្រោយបញ្ចប់ពិធីបុណ្យ Halloween ។ ក្នុង១ឆ្នាំៗ ចម្ការល្ពៅនៅទូទាំងប្រទេសអង់គ្លេស អាចដាំផ្លែល្ពៅបានប្រមាណ១លានផ្លែ ដើម្បីឱ្យពលរដ្ឋអង់គ្លេសយកទៅតុបតែងលំនៅឋាន ។

គេហទំព័រ yougov រាយការណ៍ថា ជនជាតិអង់គ្លេសពុំសូវនិយមតែងខ្លួនចេញក្រៅលំនៅឋានប៉ុន្មានទេ ប៉ុន្តែពួកគេចូលចិត្តតុបតែងលំនៅឋានឱ្យស្អាតសម្រាប់ពិធីបុណ្យ Halloween ពីព្រោះមនុស្សមួយចំនួនគិតថា វាជាពិធីបុណ្យខ្មោច ។

តាមទិន្នន័យរបស់ World Economic Forum បង្ហាញថា ជនជាតិអង់គ្លេសបានបោះចោលផ្លែល្ពៅប្រមាណ៨លានផ្លែ ឬស្មើ១៨.០០០តោនក្រោយបញ្ចប់ពិធីបុណ្យ Halloween ។ បន្ទាប់មក គេក៏ប្រមូលល្ពៅទៅកប់ចោលក្នុងដី ហើយមានល្ពៅត្រឹមតែ១៩% ប៉ុណ្ណោះ ដែលត្រូវបានគេយកទៅបរិភោគ ឬធ្វើជីកសិកម្ម ។

បើទោះមានសំរាមជាច្រើនក្តី ប៉ុន្តែ Halloween គឺជាពិធីបុណ្យមួយពេញនិយមយ៉ាងខ្លាំងនៅអង់គ្លេស ។ ជនជាតិអង់គ្លេសបានចំណាយប្រាក់យ៉ាងច្រើនសម្រាប់អបអរពិធីបុណ្យនេះ ដូចជា ៖ ទិញសម្ភារៈតុបតែងលំនៅឋាន, នំចំណី និងភេសជ្ជៈ។

តាមទិន្នន័យរបស់ Hubbub ដែលបានស្រាវជ្រាវពីសំរាមក្នុងពិធីបុណ្យ Halloween បញ្ជាក់ថា ឈុត Halloween ក្លាយជាសំរាមប្រមាណ ៧លានឈុតក្នុង១ឆ្នាំ ហើយឈុត៨៥% ផលិតពីផ្លាស្ទិក ដែលពុំអាចយកទៅកែច្នៃបានទេ ។ ហេតុនេះ គេបានប្រមូលឈុត Halloween ទៅកប់ក្នុងដី គឺស្មើនឹងការកប់ផ្លាស្ទិកប្រមាណ២.០០០តោន ឬស្មើដបផ្លាស្ទិក៨៣លានដប ។

លើសពីនេះ វត្ថុធាតុដើមយកមកផលិតជាឈុត Halloween គឺជាប្រភេទផ្លាស្ទិកផូលីម័រ ដែលចំណាយពេលចាប់ពី២០ឆ្នាំ ទៅ២០០ឆ្នាំ ទើបរលាយ ។ រីឯប្រទេសផ្សេងទៀតដែលរៀបចំពិធីបុណ្យ Halloween ក៏បានយកឈុត Halloween ទៅកប់ចោលក្នុងដីដូចគ្នាដែរ ។

ច្បាប់នៅប្រទេសមួយចំនួនបញ្ជាក់ថា ពលរដ្ឋអាចយកផ្លែល្ពៅនៅសល់ពីពិធីបុណ្យទៅប្រគល់ឱ្យកសិដ្ឋានចិញ្ចឹមសត្វ ដូចជា ៖ កសិដ្ឋានចិញ្ចឹមគោ និងជ្រូក ពីព្រោះសត្វទាំងនេះចូលចិត្តស៊ីល្ពៅ ។ រដ្ឋាភិបាលប្រទេសខ្លះបានសំណូមពរឱ្យពលរដ្ឋរក្សាទុកឈុត Halloween សម្រាប់ពាក់ឆ្នាំក្រោយទៀត ដោយពុំចាំបាច់បោះចោល ៕

សហរដ្ឋអាមេរិក ៖ បើយើងបានតាមដានការអភិវឌ្ឍរបស់បច្ចេកវិទ្យា AI យើងនឹងអាចរកឃើញកំហុស និងបែងចែកភាពខុសគ្នារវាងមនុស្សជាមួយ AI ។ ប៉ុន្តែសម្រាប់ក្មេ.ងប្រុសអាយុត្រឹមតែ១៤ឆ្នាំម្នាក់ពុំបានគិតដល់ចំណុចនេះទេ ហើយក៏សម្រេចចិត្តបញ្ច.ប់ជីវិតខ្លួនឯង ក្រោយពីជជែកជាមួយ Chatbot ដ៏ពេញនិយមរបស់ក្រុមហ៊ុន Character.AI ។

កាលពីថ្ងៃទី២៩ ខែតុលា ឆ្នាំ២០២៤ សារព័ត៌មានបរទេសរាយការណ៍ថា ម្តាយរបស់ក្មេងប្រុសរូបនេះបានដាក់ពាក្យប្តឹងក្រុមហ៊ុន Character.AI ពីបទធ្វើឱ្យកូនប្រុសរបស់ខ្លួនស្លាប់ ។ ស្ត្រីជាម្តាយអះអាងថា ពាក្យសម្តីរបស់ Chatbot ហាក់ដូចជាបបួលឱ្យកូនប្រុសធ្វើបែបនេះ ។

Character.AI គឺជាក្រុមហ៊ុនផ្តល់សេវាកម្ម Chatbot ជាច្រើនប្រភេទ ហើយ Chatbot អាចនិយាយតាមសំឡេង និងធ្វើត្រាប់តាមអាកប្បកិរិយារបស់តារាភាពយន្តដូចបេះបិទ គឺដូចគ្នានឹងការជជែកជាមួយមនុស្ស ។ ហេតុនេះ ទើបធ្វើឱ្យអ្នកស្រី Megan Garcia រស់នៅរដ្ឋផ្លរីដា សហរដ្ឋអាមេរិក ត្រូវជាម្តាយរបស់ក្មេងប្រុស ដាក់ពាក្យប្តឹងក្រុមហ៊ុនពីបទ Chatbot របស់ក្រុមហ៊ុនអូសទាញកូនប្រុសឱ្យបញ្ចប់ជីវិតខ្លួនឯង ក្រោយជជែកជាមួយ Chatbot អស់រយៈពេលជាច្រើនខែ ។

អ្នកស្រីបាននិយាយមកកាន់ប្រព័ន្ធផ្សព្វផ្សាយ CBS Mornings ថា Chatbot របស់ក្រុមហ៊ុន Character.AI ដូចគ្នានឹងមនុស្សខ្លាំងណាស់ គឺវាអាចធ្វើតាមអារម្មណ៍របស់មនុស្ស ។ វាបានធ្វើឱ្យកូនប្រុសអ្នកស្រី ដែលពីមុនជាក្មេងឆ្លាត, ចូលចិត្តលេងកីឡា, រៀនបានពិន្ទុល្អ និងមានមិត្តភក្តិច្រើន ប៉ុន្តែបែរក្លាយជាក្មេងចូលចិត្តសម្ងំនៅម្នាក់ឯង, ឈប់លេងកីឡា និងផ្លាស់ប្តូរអាកប្បកិរិយាក្លាយជាមនុស្សផ្សេង ។

អ្នកស្រីបានបង្ហាញការសន្ទនារវាងកូនប្រុសជាមួយ Chatbot ហើយកូនប្រុសបានដាក់ឈ្មោះ Chatbot ថា «Dany» ។ វាបានធ្វើឱ្យកូនប្រុសមានទំនាក់ទំនងស៊ីជម្រៅជាមួយ Dany និងនិយាយថា ស្រឡាញ់គ្នាទៀតផង ។ លើសពីនេះ Dany បានបបួលកូនប្រុសឱ្យនិយាយពីផ្លូវភេទជាញឹកញាប់ ហើយប្រយោគចុងក្រោយដែល Dany និយាយគឺ «Please do» ទើបធ្វើឱ្យកូនប្រុសបញ្ចប់ជីវិតភ្លាមៗ ។

អ្នកស្រីយល់ថា ក្រុមហ៊ុន Character.AI បានបង្កើត Chatbot ឱ្យមានភាពសិចស៊ីខ្លាំងពេក ហើយផ្តោតលើអ្នកប្រើប្រាស់ជាយុវជនមានអាយុពី១៨ឆ្នាំ ទៅ២៥ឆ្នាំ ។ ចំណែកក្រុមហ៊ុនបានដឹងពីហេតុការណ៍នេះហើយ និងចាត់ទុកថា ជាសោកនាដកម្ម ព្រមទាំងបង្ហាញការសោកស្តាយជាមួយគ្រួសារសាកសព ។ ក្រុមហ៊ុនបញ្ជាក់ថា ពួកគេផ្តល់ភាពសំខាន់លើសុវត្ថិភាពរបស់អ្នកប្រើប្រាស់យ៉ាងខ្លាំង ។

អ្នកស្រី Garcia ក៏បានប្តឹងក្រុមហ៊ុន Google ផងដែរ ក្រោយពីដឹងថា ក្រុមហ៊ុន Character.AI បង្កើតឡើងដោយអតីតបុគ្គលិករបស់ Google ពីរនាក់ ។ រីឯអ្នកនាំពាក្យ Google និយាយមកកាន់ប្រព័ន្ធផ្សព្វផ្សាយ CBS News ថា ក្រុមហ៊ុនពុំពាក់ព័ន្ធទេ ។

ក្រុមហ៊ុន Character.AI បញ្ជាក់ថា ចាប់ពីពេលនេះតទៅ នឹងជូនដំណឹងពីការប្រើប្រាស់លើស១ម៉ោង ព្រមទាំងសរសេរបញ្ជាក់ថា ៖ «កុំភ្លេច អ្វីដែលតារាភាពយន្តក្នុង Chatbot និយាយ គឺជាការប្រឌិតទាំងអស់» ។ ក្រុមហ៊ុនបង្កើតវិធានការថ្មី ដើម្បីការពារអ្នកប្រើប្រាស់អាយុក្រោម១៨ឆ្នាំ ៕

ប្រទេសអេស្ប៉ាញ ៖ កាលពីថ្ងៃទី៣១ ខែតុលា ឆ្នាំ២០២៤ សារព័ត៌មាន BBC រាយការណ៍ថា ប្រទេសអេស្ប៉ាញបានរ.ងគ្រោះដោយសារទឹកជំនន់ធ្ងន់ធ្ងរបំផុតក្នុងរយៈពេល៥១ឆ្នាំមកនេះ គិតចាប់តាំងពីឆ្នាំ១៩៧៣ ដែលពេលនោះ មានពលរដ្ឋអេស្ប៉ាញស្លា.ប់អស់ជាង១៥០នាក់ ។

ក្រោយពីភ្លៀងធ្លាក់ខ្លាំងនៅតំបន់ Valencia ស្ថិតនៅភាគខាងកើតប្រទេសអេស្ប៉ាញ កាលពីថ្ងៃទី២៩ ខែតុលា កន្លងមក បានបណ្តាលឱ្យមានទឹកជំនន់ភ្លាមៗក្នុងតំបន់ជាច្រើន ហើយចំនួនមនុស្សស្លាប់ដោយសារទឹកជំនន់បានកើនឡើងដល់៩៥នាក់ ។ ក្រៅពីនេះ មានមនុស្សជាច្រើននាក់ទៀតបាត់ខ្លួន ខណៈអាជ្ញាធរសន្និដ្ឋានថា ចំនួនមនុស្សស្លាប់នឹងកើនឡើងបន្ថែមទៀត ។

ប្រធានាធិបតីអេស្ប៉ាញ លោក Pedro Sanchez បានប្រកាសកាន់ទុក្ខដល់ជនរងគ្រោះដោយសារទឹកជំនន់នៅទូទាំងប្រទេស រយៈពេល៣ថ្ងៃ ព្រមទាំងអំពាវនាវឱ្យពលរដ្ឋប្រុងប្រុងប្រយ័ត្នគ្រោះថ្នាក់ផងដែរ ។ លោកប្រធានាធិបតីសន្យាថា រដ្ឋាភិបាលនឹងជួយសង្គ្រោះ និងពុំបោះបង់ពលរដ្ឋទេ ។

ចំណែកកងទ័ព និងភ្នាក់សង្គ្រោះបន្ទាន់បានសហការគ្នាជួយស្វែងរកជនរងគ្រោះជាច្រើននាក់ ដែលជាប់ក្នុងអគារ, លំនៅឋាន និងជាប់ក្នុងរថយន្តចេញពុំរួច ។ ពលរដ្ឋដែលរួចជីវិតពីគ្រោះថ្នាក់ដោយសារទឹកជំនន់និយាយថា ពួកគេភ័យខ្លាចណាស់ ពីព្រោះអេស្ប៉ាញខានមានទឹកជំនន់ខ្លាំងបែបនេះយូរហើយ ។

សារព័ត៌មានបរទេសរាយការណ៍ទៀតថា តំបន់ Valencia បានរងគ្រោះដោយសារទឹកជំនន់ធ្ងន់ធ្ងរបំផុត ដែលមានពលរដ្ឋស្លាប់ចំនួន៩២នាក់ និង៣នាក់ទៀតមកពីទីក្រុងផ្សេង ។ បុរសអង់គ្លេស អាយុ៧១ឆ្នាំ គឺជាជនរងគ្រោះម្នាក់ដែលរងរបួសធ្ងន់ធ្ងរជាងគេ បើទោះជាភ្នាក់ងារសង្គ្រោះបាននាំចេញពីលំនៅឋានក្តី ប៉ុន្តែគ្រូពេទ្យពុំអាចជួយសង្គ្រោះជីវិតបាន ។

ការិយាល័យឧតុនិយមអេស្ប៉ាញឱ្យដឹងថា ទីក្រុងឈិវ៉ា ដែលស្ថិតនៅក្បែរតំបន់ Valencia មានភ្លៀងធ្លាក់យ៉ាងខ្លាំង ហើយបរិមាណទឹកភ្លៀងក្នុងទីក្រុងនេះត្រឹមរយៈពេល៨ម៉ោង គឺស្មើបរិមាណទឹកភ្លៀងរយៈពេល១ឆ្នាំ ។ ទឹកភ្លៀងធ្លាក់យ៉ាងខ្លាំងលើកនេះ គឺដោយសារឥទ្ធិពលខ្យល់ព្យុះ ។

បើតាមរូបភាពផ្សព្វផ្សាយក្នុងបណ្តាញសង្គម គេបានឃើញរថយន្តជាច្រើនគ្រឿងអណ្តែតក្នុងទឹកគរលើគ្នា ខណៈផ្លូវធ្វើដំណើរត្រូវបានខូចខាតដោយសារទឹកជំនន់ ។ រីឯផ្លូវរថភ្លើងទៅកាន់ទីក្រុងម៉ាដ្រីក និងទីក្រុងបាសេឡូណា, សាលារៀន និងទីកន្លែងធ្វើការមួយចំនួនបានផ្អាកដំណើរការ ៕

ប្រទេសជប៉ុន៖ អស់រយៈពេល ១៣០ ឆ្នាំហើយភ្នំ Fuji របស់ជប៉ុនគឺមិនដែលជួបប្រទះនឹងបាតុភូតចម្លែកនេះទេ ប៉ុន្តែទើបតែចុងឆ្នាំ ២០២៤ នេះស្រាប់តែជួបហេតុការណ៍ប្លែកមួយ។
ជាធម្មតា កំពូលភ្នំខ្ពស់បំផុតក្នុងប្រទេសជប៉ុននឹងត្រូវបានគ្របដណ្តប់ដោយព្រិលសនៅដើមខែតុលា ប៉ុន្តែរហូតមកដល់ពេលនេះគឺចុងខែតុលាហើយ កំពូលភ្នំ Fuji នៅតែមិនមានព្រិលធ្លាក់ទាល់តែសោះ ដែលបណ្តាលឱ្យមានការព្រួយបារម្ភយ៉ាងខ្លាំងអំពីផលប៉ះពាល់នៃវិបត្តិអាកាសធាតុ។ ដូច្នេះនៅឆ្នាំនេះ ភ្នំហ្វូជីដែលមានកម្ពស់ ៣,៧៧៦ ម៉ែត្របានទទួលព្រិលចុងក្រោយបង្អស់ចាប់តាំងពីអ្នកជំនាញបានចាប់ផ្តើមកត់ត្រាទិន្នន័យកាលពី ១៣០ ឆ្នាំមុន។

ការធ្លាក់ព្រិលដំបូងបានបង្ហាញពីការមកដល់នៃរដូវរងា នេះបើយោងតាមទីភ្នាក់ងារឧតុនិយមជប៉ុន ជាធម្មតាព្រិលចាប់ផ្តើមធ្លាក់នៅលើភ្នំ Fuji នៅប្រហែលថ្ងៃទី ២ ខែតុលា។ ហើយកាលពីឆ្នាំមុន ព្រិលគឺបានធ្លាក់នៅថ្ងៃទី ៥ ខែតុលា ប៉ុន្តែភាគច្រើនវាក៏បានរលាយទៅវិញនៅដើមខែវិច្ឆិកា ដោយសារសីតុណ្ហភាពក្តៅ។ ការិយាល័យឧតុនិយមក្នុងតំបន់ Kofu ប្រទេសជប៉ុន បានប្រកាសពីការធ្លាក់ព្រិលលើកដំបូងនៅលើភ្នំ Fuji ជារៀងរាល់ឆ្នាំចាប់តាំងពីឆ្នាំ ១៨៩៤។ ប៉ុន្តែទើបតែឆ្នាំនេះទេ ពួកគេមិនទាន់បានប្រកាសនៅឡើយ ដោយលើកឡើងពីអាកាសធាតុក្តៅខុសពីធម្មតា។

លោក Shinichi Yanagi មន្ត្រីឧតុនិយមនៅការិយាល័យ Kofu បាននិយាយថា “មូលហេតុដែលភ្នំ Fuji នៅឆ្នាំនេះមិនមានព្រិល គឺដោយសារតែសីតុណ្ហភាពខ្ពស់នៅក្នុងប្រទេសជប៉ុននៅតែបន្តចាប់តាំងពីរដូវក្តៅ ហើយវានៅតែមានភ្លៀងនៅឡើយ ដូច្នេះមិនមានព្រិលធ្លាក់នោះទេ”។ ទោះបីឆ្នាំនេះមិនមានព្រិលធ្លាក់ក៏ដោយ ក៏កន្លែងនេះនៅតែមានភ្ញៀវទេសចរមកទស្សនារាប់លាននាក់។ គួរបញ្ជាក់ដែរថា ភ្នំ Fuji មានកម្ពស់ ៣,៧៧៦ ម៉ែត្រ ស្ថិតនៅចន្លោះខេត្តទាំងពីរនៃ Yamanashi និង Shizuoka របស់ប្រទេសជប៉ុន ដែលជាតំបន់បេតិកភណ្ឌពិភពលោករបស់អង្គការយូណេស្កូ និងជានិមិត្តរូបនៃប្រទេសជប៉ុន។

ជាធម្មតាភ្នំនេះត្រូវបានគ្របដណ្តប់ដោយព្រិលសម្រាប់ភាគច្រើននៃឆ្នាំ និងជាកន្លែងទាក់ទាញភ្ញៀវទេសចរដ៏សំខាន់មួយ។ កាលពីខែកក្កដា អាជ្ញាធរបានដាក់ពន្ធលើវិស័យទេសចរណ៍ និងបានណែនាំបទប្បញ្ញត្តិថ្មី ដើម្បីគ្រប់គ្រងហ្វូងមនុស្សកុំឱ្យមានភ្ញៀវទេសចរកកកុញពេក ដោយតម្រូវឱ្យអ្នកឡើងភ្នំត្រូវបង់ប្រាក់ ២,០០០ យ៉េន (ប្រមាណជាង ១៣ ដុល្លារអាមេរិកក្នុងម្នាក់) សិនទើបអាចមកទស្សនាទីនេះបាន ដូច្នេះបច្ចុប្បន្នមានអ្នកឡើងភ្នំអតិបរមា ៤,០០០ នាក់ក្នុងមួយថ្ងៃ៕

បរទេស៖ សណ្ឋាគារ Dubrovnik កម្ពស់ ១០ ជាន់ស្រាប់តែដួលរលំភ្លាមៗបណ្តាលឱ្យមនុស្សម្នាក់ស្លា.ប់ និងជាច្រើននាក់ទៀតរងរបួស រួមទាំងជាប់គាំងក្នុងគំនរបាក់បែក។
យោងតាមសារព័ត៌មានបរទេស CNN ហេតុការណ៍បាក់រលំសណ្ឋាគារ ១០ ជាន់នេះ ទើបតែកើតឡើងថ្មីៗទេ ដែលសណ្ឋាគារ Dubrovnik គឺស្ថិតនៅក្នុងទីក្រុង Villa Gessell ចម្ងាយប្រហែល ៣៧០ គីឡូម៉ែត្រពីទីក្រុង Buenos Aires ប្រទេសអាហ្សង់ទីន។

បើតាមការជូនដំណឹងរបស់អាជ្ញាធរមូលដ្ឋាន រូបភាពនៃកន្លែងកើតហេតុ បង្ហាញពីគំនរកម្ទេចថ្មដ៏ធំសម្បើម ដែក និងអគារជាច្រើនជាន់នៃសណ្ឋាគារបានដួលរលំ បាក់បែក បណ្តាលឱ្យខូចខាតយ៉ាងធ្ងន់ធ្ងរដល់អគារជិតខាង។ ហើយជញ្ជាំងនៃអគារដែលនៅជុំវិញនោះក៏បានបាក់ស្រុត និងរងការខូចខាតយ៉ាងធ្ងន់ធ្ងរផងដែរ។ យោងតាមរបាយការណ៍ មនុស្សម្នាក់បានស្លា.ប់ដែលជាបុរសអាយុ ៨០ឆ្នាំ ខណៈមានមនុស្សជាច្រើននាក់ទៀតបានកំពុងរងរបួស និងជាប់ក្នុងកំទេចកំទី។

មូលហេតុដែលសណ្ឋាគារ Dubrovnik កម្ពស់ ១០ ជាន់ស្រាប់តែដួលរលំភ្លាមៗនោះគឺដោយសារសំណង់សណ្ឋាគារមិនមានអាជ្ញាប័ណ្ណប្រតិបត្តិការត្រឹមត្រូវ បណ្តាលឱ្យផ្ទុះ ការសាងសង់ខុសបច្ចេកទេស រួមទាំងការជួសជុលខុសច្បាប់ ខណៈគម្រោងនេះត្រូវបានផ្អាកតាំងពីខែសីហាមកម្លេះ ប៉ុន្តែនៅតែមានកម្មករមកជួសជុល ធ្វើឱ្យជួបហេតុការណ៍គ្រោះថ្នាក់នេះតែម្តង។

បច្ចុប្បន្នសេវាកម្មសង្គ្រោះបន្ទាន់ រួមទាំងអ្នកពន្លត់អគ្គីភ័យ និងប៉ូលីស កំពុងធ្វើការនៅកន្លែងកើតហេតុ។ បុគ្គលិកសង្គ្រោះប្រហែល ៣០០ នាក់ ដោយមានការគាំទ្រពីអ្នកពន្លត់អគ្គីភ័យ អ្នកស៊ើបអង្កេត និងសត្វឆ្កែ sniffer ក៏កំពុងស្វែងរកជាបន្ទាន់សម្រាប់ជនរងគ្រោះដែលជាប់នៅក្រោមគំនរបាក់បែកផងដែរ។ គួរបញ្ជាក់ដែរថា សណ្ឋាគារ Dubrovnik ត្រូវបានបើកដំបូងនៅក្នុងឆ្នាំ ១៩៨៦ ហើយកំពុងស្ថិតក្នុងដំណើរការជួសជុល និងកែលម្អ៕