កោះតៃវ៉ាន់៖ Kong-rey ដែលជាព្យុះដ៏ធំបំផុតចាប់តាំងពីឆ្នាំ ១៩៩៦ មកស្រាប់តែបានវាយប្រហារកោះតៃវ៉ាន់ជាលើកទីពីរនៅឆ្នាំនេះ បណ្តាលឱ្យមានភ្លៀងធ្លាក់ខ្លាំងឥតឈប់ឈរ ដាច់ចរន្តអគ្គិសនី និងបង្ខំឱ្យមនុស្សរាប់ពាន់នាក់ត្រូវជម្លៀសចេញភ្លាមៗ។

យោងតាមទីភ្នាក់ងារឧតុនិយមតៃវ៉ាន់ (CWA) បាននិយាយថា ព្យុះទីហ្វុងដ៏កាចសាហាវនេះ បានបោកបក់មកលើស្រុក Taitung ភាគអាគ្នេយ៍នៃកោះតៃវ៉ាន់ កាលពីល្ងាចថ្ងៃទី៣១ ខែតុលា ជាមួយនឹងកម្លាំងខ្យល់អតិបរមាជិត ២៥១ គីឡូម៉ែត្រក្នុងមួយម៉ោង និងកាំនៃព្យុះជិត ៣២០ គីឡូម៉ែត្រ។

យោងតាមមជ្ឈមណ្ឌលវិទ្យាសាស្ត្រ បច្ចេកវិទ្យា និងការកាត់បន្ថយគ្រោះមហន្តរាយរបស់តៃវ៉ាន់ បានឱ្យដឹងទៀតថា Kong-rey គឺជាព្យុះដ៏ធំបំផុតដែលធ្លាប់វាយប្រហារមកលើកោះនេះក្នុងឆ្នាំ ១៩៩៦ ហើយមកដល់បច្ចុប្បន្នវាក៏បានមកវាយប្រហារជាលើកទីពីរ។ ថ្មីៗនេះទីភ្នាក់ងារឧតុនិយមតៃវ៉ាន់ បានចេញការព្រមានអំពីភ្លៀងធ្លាក់ខ្លាំងបំផុតសម្រាប់ស្រុកឆ្នេរសមុទ្រភាគខាងកើតដូចជា Yilan, Hualien, Taichung និង Taitung ។ ផ្នែកខាងកើតនៃកោះនេះ រួមទាំងក្រុងតៃប៉ិ ក៏បានចេញការព្រមានអំពីភ្លៀងធ្លាក់ខ្លាំងបំផុតផងដែរ។

យោងតាមរបាយការណ៍ អាជ្ញាធរបានជម្លៀសមនុស្សជាង ៩,០០០ នាក់នៅស្រុក និងទីក្រុងចំនួន ១៣ នៅតៃវ៉ាន់។ ហើយកម្លាំងការពាររបស់កោះនេះបានចល័តទាហានជិត ៣៥.០០០ នាក់ និងរថយន្ត ៣.៤០០ គ្រឿង រួមទាំងឧបករណ៍ផ្សេងៗទៀត ដើម្បីត្រៀមសម្រាប់ជួយសង្គ្រោះប្រជាជន។

ព្យុះទីហ្វុង គង់-រី បានបោកបក់ខ្លាំង បណ្តាលឱ្យរលំដើមឈើ ដោយសម្លាប់មនុស្សម្នាក់ និង ៧៣ នាក់ទៀតរងរបួស។ បច្ចុប្បន្នសាលារៀនត្រូវបានបិទនៅគ្រប់តំបន់ទាំងអស់នៅលើកោះ ហើយផ្លូវហាយវេ និងផ្លូវដែកជាច្រើនទៀតក៏ឈប់ដំណើរការ រួមទាំងជើងហោះហើរចំនួន ៥២៧ ក៏ត្រូវបានលុបចោល។ លើសពីនេះទីផ្សារភាគហ៊ុនរបស់តៃវ៉ាន់ក៏បានផ្អាកការជួញដូរជាបណ្តោះអាសន្នផងដែរ៕

សហរដ្ឋអាមេរិក ៖ លោក Lenny Maughan គឺជាកីឡាកររត់ចម្ងាយឆ្ងាយនៅទីក្រុងសាន់ហ្វ្រាន់ស៊ីស្កូ រដ្ឋកាលីហ្វ័រញ៉ា សហរដ្ឋអាមេរិក មានគំនិតថ្មីមួយខុសប្លែកពីកីឡាករផ្សេងទៀត ដោយលោកបានរត់ក្នុងទីក្រុងឱ្យក្លាយជារូបភាពផ្សេងៗ ។ វាជាស្នាដៃសិល្បៈថ្មីកើតឡើងដោយសារការហាត់ប្រាណ និងទទួលបានការចាប់អារម្មណ៍យ៉ាងខ្លាំងពីមហាជន ។

លោក Lenny និយាយថា ៖ «រយៈពេលជាច្រើនឆ្នាំមកនេះ រហូតមកដល់បច្ចុប្បន្ន ខ្ញុំបានបង្កើតស្នាដៃសិល្បៈប្រមាណ៥៣ផ្ទាំង ហើយស្នាដៃនីមួយៗមានលក្ខណៈស្មុគស្មាញខុសគ្នា ។ រីឯចម្ងាយផ្លូវដែលរត់ក្នុងទីក្រុង គឺខ្ញុំបានកំណត់ឱ្យវាបង្ហាញជារូបភាពផ្សេងៗ ដូចជា ៖ រូបសត្វ, មនុស្ស និងដើមឈើ» ។

លោកបន្តទៀតថា ៖ «ចំណុចពិបាកបំផុតសម្រាប់ការបង្កើតស្នាដៃនេះ គឺការរត់ឡើងលើភ្នំ ។ ខ្ញុំពុំអាចចៀសវាងរត់តាមផ្លូវលំបាកៗបានទេ ពីព្រោះចង់ឱ្យវាបង្ហាញរូបភាពឡើងមក ហើយខ្ញុំពុំធ្លាប់គិតពីការរត់តាមផ្លូវកាត់ឡើយ» ។

លោកបានប្រើប្រាស់ App ពិសេសមួយសម្រាប់ហាត់ប្រាណឈ្មោះថា Strava និង MapMyRun ដែលកម្មវិធីនេះនឹងកត់ត្រាចម្ងាយផ្លូវរត់របស់លោ
កទាំងអស់ ។ មុនពេលទទួលបានរូបភាពដោយសារការរត់នេះ គឺលោកបានរៀបចំគម្រោង និងគូរផ្លូវដែលប្រុងរត់ក្នុងផែនទីម្តងហើយម្តងទៀត ព្រមទាំងមើលទីតាំងភូមិសាស្ត្រផងដែរ ។

ពេលខ្លះ ការកំណត់ចម្ងាយផ្លូវរត់ឱ្យក្លាយជារូបភាពតាមតម្រូវការនេះ គឺចំណាយពេលយូរជាងការរត់តាមធម្មតា ។ ចំណុចសំខាន់ ត្រូវប្រុងប្រយ័ត្នក្នុងពេលរត់ ពីព្រោះបើលោករត់ខុសផ្លូវអាចធ្វើឱ្យខូចរូបភាពបាន ។

មនុស្សភាគច្រើនមិនចង់ជឿថា មានអ្នកអាចបង្កើតស្នាដៃសិល្បៈចេញជារូបភាពផ្សេងៗមកពីការរត់បែបនេះទេ ។ ប៉ុន្តែអ្វីដែលលោក Lenny បានបង្ហាញស្នាដៃឱ្យមនុស្សគ្រប់គ្នាឃើញនេះបញ្ជាក់ថា អ្វីៗក៏អាចកើតឡើងបានដែរ ប្រសិនបើយើងមានការស្រមើស្រមៃចង់ឱ្យវាក្លាយជាការពិត ។

រូបភាពផ្សេងៗកើតឡើងដោយសារការរត់របស់លោក Lenny ដោយការប្រើប្រាស់ GPS បានល្បីល្បាញយ៉ាងខ្លាំងក្នុងបណ្តាញសង្គម ពីព្រោះវាជាស្នាដៃសិល្បៈថ្មីកើតឡើងដោយសារការហាត់ប្រាណ ។ គេជឿថា មុននឹងទទួលបានស្នាដៃនេះ គឺត្រូវមានភាពអត់ធ្មត់យ៉ាងខ្លាំង ពីព្រោះលោកបានរត់ឡើង-ចុះភ្នំ ៕

ប្រទេសថៃគឺជាប្រទេសដែលមានភ្ញៀវទេសចរធ្វើដំណើរកម្សាន្តច្រើនជាងគេនៅតំបន់អាស៊ីយើងនេះ ដោយសារនៅទីនោះមានកន្លែងសម្បូរបែបជាច្រើនរួមមាន កន្លែងប្រវត្តិសាស្ត្រ ទឹកធ្លាក់ ប្រាសាទដ៏ស្រស់ស្អាត សណ្ឋាគារខ្ពស់ៗ ប្រណីតៗ ឧទ្យានជាតិដ៏ធំល្វឹងល្វើយ និងកន្លែងអស្ចារ្យសំខាន់ៗរាប់ស៊ិបទៀត ដែលកំពុងរង់ចាំភ្ញៀវទេសចរមកទស្សនា ដើម្បីទទួលបានបទពិសោធន៍ប្លែកៗ និងពិសេសៗនៅចុងរដូវវស្សា ដើមរដូវរងានេះ។ ដូច្នេះហើយសម្រាប់ភ្ញៀវដែលចូលចិត្តបរិយាកាសស្ងប់ស្ងាត់ ទេសភាពបៃតងស្រស់បំព្រង អាចមកលេងនៅកន្លែងដូចខាងក្រោម៖

១.ឧទ្យានប្រវត្តិសាស្ត្រ Si Thep៖ ស៊ីទេពគឺជាកន្លែងអរិយធម៌ដ៏សំខាន់ និងបានចុះបញ្ជីជាបេតិកភណ្ឌពិភពលោកដោយអង្គការយូណេស្កូថា ជាឧទ្យានប្រវត្តិសាស្ត្រដ៏អស្ចារ្យបំផុត។ ជាការពិតណាស់ ឧទ្យាននេះពោរពេញទៅដោយទីតាំងបុរាណ ដែលលេចចេញជាភស្តុតាងសំខាន់ៗ ឆ្លុះបញ្ចាំងពីការតាំងទីលំនៅរបស់មនុស្សតាំងពីបុរាណកាល។ វាមានទីតាំងនៅស្រុក Si Thep ខេត្ត Phetchabun ប្រទេសថៃ។

២.ទីក្រុងបុរាណ Ban Mung៖ ទីតាំងសំខាន់មួយទៀតនៃខេត្ត Phitsanulok គឺ Ban Mung ដែលជាទីក្រុងបុរាណមានភាពទាក់ទាញជាច្រើនដែលអ្នកគួរស្វែងរក។ នៅទីនេះមានកន្លែងទេសចរណ៍ល្បីៗដូចជា ល្អាងហ្លួងផរ ប៊ុនម៉ី ល្អាងណាងស៊ីសុង ទឹកធ្លាក់ឃុនហួយធឿនជាដើម។ ហើយអ្វីដែលអស្ចារ្យជាងគេនោះគឺសកម្មភាពមើលសត្វប្រចៀវនៅក្នុងភូមិ ដោយសារសត្វប្រចៀវរាប់លានក្បាលរស់នៅក្នុងរូងភ្នំ ហើយពួកវានឹងហោះចេញពីរូងភ្នំដើម្បីស្វែងរកអាហារនៅពេលល្ងាច។ ក្រៅពីទទួលបានបទពិសោធន៍ទាំងនេះយើងក៏អាចស្នាក់នៅផ្ទះប្រក់ស្បូវ ហើយសម្រាក និងគយគន់ទេសភាពធម្មជាតិផងដែរ។

៣.ឧទ្យានជាតិ Lan Hin Pum៖ Lan Hin Pum គឺជាឧទ្យានជាតិដ៏ល្បីល្បាញមួយ ដែលកំពុងរង់ចាំភ្ញៀវទេសចរ ដើម្បីទទួលយកបទពិសោធន៍ពិសេសៗនៅទីនេះ។ ជាមួយនឹងថ្មមានរូបរាងខុសធម្មតា ហើយលេចចេញជាដុំៗ បានកំពុងទាក់ទាញភ្ញៀវទេសចររាប់ពាន់នាក់ជារៀងរាល់ឆ្នាំ ថ្មប្លែកៗទាំងនេះត្រូវបានគេជឿថាបណ្តាលមកពីស្នាមប្រេះនៅក្នុងថ្មតូចៗដែលពុកផុយ ពីប្រតិកម្មគីមី និងរូបវន្តដែលបំផ្លាញថ្មទៅជារបារ។ បន្ទាប់មកនៅពេលប៉ះនឹងខ្យល់និងទឹក វានឹងមានស្នាមប្រេះតូចៗ ហើយវាក៏មានរាងមូលស្រដៀងនឹងប៊ូតុងថ្ម ឬសសរថ្មទាបតែម្តង ដែលធ្វើឱ្យតំបន់នេះមានភាពស្រស់ស្អាតបំផុត៕

សហរដ្ឋអាមេរិក ៖ ក្រុមហ៊ុន Meta បានប្រកាសលុបចោលគណនីអ្នកប្រើប្រាស់ជាច្រើនក្នុង Instagram និង Threads ដែលបង្កើតឡើង ដើម្បីតាមដានទីតាំងយន្តហោះផ្ទាល់ខ្លួនរបស់បុគ្គលថ្មីៗលើពិភពលោក ។ Meta បញ្ជាក់ថា យុវជនអាមេរិកឈ្មោះ Jack Sweeney អាយុ២១ឆ្នាំ បានបង្កើតគណនីចំនួន៣៨ ដើម្បីតាមដានទីតាំងយន្តហោះផ្ទាល់ខ្លួនរបស់លោក Elon Musk ។

កាលពីខែធ្នូ ឆ្នាំ២០២៣ ក្រុមការងាររបស់តារាចម្រៀងដ៏ល្បី ឈ្មោះ Taylor Swift បានសុំឱ្យក្រុមហ៊ុន Meta លុបគណនីតាមដានទីតាំងយន្តហោះផ្ទាល់ខ្លួនរបស់តារាចម្រៀងរូបនេះ ។ នៅថ្ងៃទី២០ ខែតុលា ឆ្នាំ២០២៤ Meta ក៏បានលុបចោលគណនីតាមដាននេះចោល និងលុបគណនីជាច្រើនទៀត នាពេលបន្ទាប់ ។

លោក Jack គឺជានិស្សិតនៅរដ្ឋផ្លរីដា បានបង្កើតគណនីក្នុង Instagram និង Threads ដើម្បីតាមដានទីតាំងយន្តហោះផ្ទាល់ខ្លួនរបស់បុគ្គលថ្មីៗជាច្រើនរូប ដូចជា ៖ Mark Zuckerberg, Elon Musk, Kim Kardashian, Taylor Swift, Bill Gates, Jeff Bezos, Ron DeSantis និងបុគ្គលមានឥទ្ធិពលនៅរុស្ស៊ី ។

អ្នកតំណាងក្រុមហ៊ុន Meta បញ្ជាក់ថា ពួកគេបានលុបចោលគណនីរបស់លោក Jack ចំនួន៣៨ ដោយសារបានល្មើស និងលួចយកព័ត៌មានអ្នកផ្សេង ។ ការធ្វើនេះស្របតាមការពិចារណារបស់គណៈកម្មការ Oversight Board ថា គណនីទាំងនេះអាចបង្កគ្រោះថ្នាក់ជាមួយបុគ្គលល្បីៗ ។

កាលពីខែកុម្ភៈ ឆ្នាំ២០២២ លោក Jack បានបង្កើតគណនីក្នុង Twitter (ឬ X) ឈ្មោះ @ElonJet ដើម្បីតាមដានទីតាំងយន្តហោះរបស់លោក Elon Musk រហូតដល់លោក Elon Musk សុំទិញគណនីនេះ ក្នុងតម្លៃ៥.០០០ដុល្លារអាមេរិក ។

រឿងរ៉ាវនេះបានបញ្ចប់ក្រោយពី Twitter កែតម្រូវគោលនយោបាយទិន្នន័យផ្ទាល់ខ្លួនជាថ្មី ដោយពុំអនុញ្ញាតឱ្យចែកចាយព័ត៌មានរបស់បុគ្គលថ្មី ហើយ Twitter និយាយថា វាអាចបង្កគ្រោះថ្នាក់ដល់បុគ្គលថ្មី ។ ក្រោយពី Twitter កែតម្រូវគោលនយោបាយទិន្នន័យផ្ទាល់ខ្លួន គណនីឈ្មោះ @ElonJet ក៏ត្រូវលុបចោលភ្លាមៗ ហើយគណនីស្រដៀងនេះជាច្រើនទៀតក៏ត្រូវលុបដូចគ្នា ។

លោក Jack បានសរសេរក្នុង Threads ថា Meta លុបចោលគណនីរបស់លោក គឺដូចគ្នានឹង Twitter ធ្លាប់ធ្វើដាក់លោកកន្លងមក ដោយពុំជូនដំណឹងជាមុន ទើបលោកពុំអាចបញ្ជាក់ពីមូលហេតុដែលលោកបង្កើតគណនី ។ ទិន្នន័យទីតាំងយន្តហោះរបស់បុគ្គលល្បីៗត្រូវបានបង្ហាញជាសាធារណៈរួចហើយ អ្នកណាៗក៏អាចស្វែងរកទីតាំងយន្តហោះបានដែរ ខណៈច្បាប់អាមេរិកបានកំណត់ឱ្យទិន្នន័យនេះបង្ហាញជាសាធារណៈ ៕