ប្រទេសចិន៖ ប្រទេសចិនមានគោលបំណងចង់វ៉ាដាច់សហរដ្ឋអាមេរិក ដើម្បីកា្លយជាប្រទេសមហាអំណាចវិទ្យាសាស្ត្រអវកាសនៅឆ្នាំ ២០៥០។
យោងតាម South China Morning Post ប្រទេសចិនបច្ចុប្បន្នបានកំពុងរៀបចំផែនការអភិវឌ្ឍន៍ជាតិលើកដំបូងរបស់ខ្លួន សម្រាប់វិទ្យាសាស្ត្រអវកាសរយៈពេលមធ្យមទៅវែង ដែលបេសកកម្មនេះនឹងចាប់ផ្តើមពីឆ្នាំ ២០២៥ ដល់ឆ្នាំ ២០៥០។ ផែនការនេះបានបង្ហាញយ៉ាងច្បាស់លាស់ពីមហិច្ឆតារបស់ចិន ក្នុងការក្លាយជាប្រទេសឈានមុខគេផ្នែកវិទ្យាសាស្ត្រអវកាស ដោយនឹងវ៉ាដាច់អាមេរិកក្នុងឆ្នាំ ២០៥០។

នេះជាលើកដំបូងក្នុងប្រវត្តិសាស្ត្រហើយដែលចិនបានប្រកាសយ៉ាងទូលំទូលាយអំពីផែនការជាតិនេះ។ ជាធម្មតា ប្រទេសចិនមិនងាយចែករំលែកព័ត៌មានលំអិតអំពីផែនការរបស់ខ្លួនឡើយ ដូច្នេះការប្រកាសនេះអាចចាត់ទុកថាជារឿងដ៏កម្របំផុតសម្រាប់ប្រទេសចិន ដែលបង្ហាញថាប្រទេសនេះនឹងប្តេជ្ញាសម្រេចគោលដៅដែលបានកំណត់។ យោងតាមរដ្ឋបាលអវកាសជាតិចិន (CNSA) ទីភ្នាក់ងារអវកាសចិន (CMSA) និងបណ្ឌិត្យសភាវិទ្យាសាស្ត្រចិន (CAS) បានប្រកាសកាលពីពេលថ្មីៗនេះថា ប្រទេសចិនបានបង្ហាញផែនការបេសកកម្មវិទ្យាសាស្ត្រចំនួន ៣ ដែលនឹងត្រូវអនុវត្តចាប់ពីឆ្នាំ ២០២៤ នេះតទៅ។

ផែនការទីមួយ៖ ប្រទេសចិននឹងបន្ថែមបេសកកម្មពី ៥ ទៅ ៨ ដងបន្ថែមទៀតចំពោះគម្រោងដែលមានស្រាប់។ ជាពិសេស ចិននឹងបន្តប្រតិបត្តិការស្ថានីយអវកាសចិន ដើម្បីជំរុញបេសកកម្មរុករកភពផែនដី និងចាប់ផ្តើមគម្រោងរុករកភពព្រះច័ន្ទដំណាក់កាលទីបួន ដោយរំពឹងថា បេសកកម្មទាំងនេះនឹងប្រព្រឹត្តទៅយ៉ាងរលូនមុនឆ្នាំ ២០២៧។

ផែនការទីពីរ៖ គោលដៅចម្បងគឺដើម្បីអភិវឌ្ឍ និងចាប់ផ្តើមបេសកកម្មចំនួន ១៥ ដើម្បីបង្កើនថាមពលអវកាស រួមទាំងការបាញ់បង្ហោះស្ថានីយ៍ស្រាវជ្រាវព្រះច័ន្ទជាអចិន្ត្រៃយ៍។ បន្ទាប់មក ពួកគេនឹងចាប់ផ្តើមសាងសង់លំនៅដ្ឋាននៅលើឋានព្រះច័ន្ទ ក៏ដូចជាបន្តរុករកព្រំដែននៃប្រព័ន្ធព្រះអាទិត្យផ្សេងទៀត រួមទាំងរុករកប្រព័ន្ធភពយក្ស និងបេសកកម្មគំរូទៅកាន់ភពសុក្រ។

ផែនការទីបីគឺជាដំណាក់កាលដែលវិស័យវិទ្យាសាស្ត្រអវកាសសំខាន់ៗរបស់ប្រទេសចិននឹងឈានដល់កម្រិតឈានមុខគេរបស់ពិភពលោក។ ក្នុងដំណាក់កាលនេះ បេសកកម្មធំៗពី ៥ ទៅ ៦ នឹងត្រូវបានដាក់ឱ្យដំណើរការ រួមជាមួយនឹងបេសកកម្មអវកាសខ្នាតតូច និងមធ្យមប្រហែល ២៥។ លើសពីនេះចិនក៏នឹងធ្វើការស្រាវជ្រាវ អភិវឌ្ឍវិទ្យាសាស្ត្រអវកាសក្រោមប្រធានបទវិទ្យាសាស្ត្រចំនួនប្រាំគឺ សកលលោកអតិបរមា; រលកនៅក្នុងលំហ; ទិដ្ឋភាពបែប Panoramic នៃប្រព័ន្ធព្រះអាទិត្យ-ផែនដី; ភពដែលអាចរស់នៅបាន; និងស្វែងយល់ពីច្បាប់នៃលំហ។

លោក Wang Chi នាយកមជ្ឈមណ្ឌលវិទ្យាសាស្ត្រអវកាសជាតិនៅ CAS ជឿជាក់យ៉ាងមុតមាំថា ពួកគេនឹងព្យាយាមធ្វើឱ្យបាននូវគោលដៅទាំងបីខាងលើនេះ ដើម្បីដឹកនាំប្រទេសឱ្យក្លាយជាមហាអំណាចវិទ្យាសាស្ត្រអវកាសទីមួយរបស់ពិភពលោកនៅឆ្នាំ ២០៥០៕

ប្រទេសស្វីស ៖ កាំភ្លើ.ង Swiss Mini Gun ម៉ាក C1ST ត្រូវបានកត់ត្រាចូលក្នុង Guinness World ថា គឺជាកាំភ្លើ.ង មានទំហំតូចបំផុតនៅលើពិភពលោក ដោយសារវាមានប្រវែងត្រឹមតែ៥.៥សង់ទីម៉ែត្រ, កម្ពស់៣.៥សង់ទីម៉ែត្រ, ទទឹង១.៥សង់ទីម៉ែត្រ និងទម្ងន់១៩.៨ក្រាមប៉ុណ្ណោះ ។ ហេតុនេះ សហរដ្ឋអាមេរិក, អង់គ្លេស និងប្រទេសខ្លះទៀតពុំអនុញ្ញាតឱ្យនាំចូលកាំភ្លើ.ង នេះទេ ពីព្រោះគេអាចលាក់ទុកវាយ៉ាងស្រួល ។

កាំភ្លើង Swiss Mini Gun មានទំហំតូចខ្លាំងពេក រហូតដល់គេងាយស្រួលលាក់វាក្នុងខ្លួន ហើយសមត្ថកិច្ចឆែកឆេរពុំឃើញ ទើបសហរដ្ឋអាមេរិក និងអង់គ្លេសពុំអនុញ្ញាតឱ្យនាំចូលកាំភ្លើងប្រភេទនេះទេ ។ បើទោះជាកាំភ្លើងនេះមានទំហំតូចខ្លាំងស្មើនឹងវត្ថុក្មេងលេងក្តី ប៉ុន្តែវាមានគុណសម្បត្តិគ្រប់បែបយ៉ាងដូចកាំភ្លើងធំៗដែរ ។

ការផលិតកាំភ្លើងនេះមានលក្ខណៈដូចគ្នានឹងការផលិតនាឡិកា និងសម្ភារៈល្បីៗរបស់ប្រទេសស្វីស ។ កាំភ្លើងម៉ាក C1ST គឺជាកាំភ្លើងស្តង់ដាររបស់ Swiss Mini Gun ដែលត្រូវបានផលិតឡើងមកពីដែកអ៊ីណុក ។ វាប្រើប្រាស់គ្រាប់កាំភ្លើងពិត ចំនួន២៤គ្រាប់ និងគ្រាប់ក្លែងក្លាយ ចំនួន២៤គ្រាប់ ព្រមទាំងមានឧបករណ៍សម្អាតកាំភ្លើងដាក់ក្នុងកាបូបតូច និងអាចព្យួរវាជាប់នឹងចង្កេះខោ ។

ក្នុងមួយឆ្នាំៗ Swiss Mini Gun ផលិតកាំភ្លើងម៉ាក C1ST ត្រឹមតែ១០០កាំភ្លើងប៉ុណ្ណោះ ហើយបើអតិថិជនត្រូវការកាំភ្លើងពិសេសជាងនេះ Swiss Mini Gun នឹងមានកាំភ្លើងពិសេសមួយទៀតឈ្មោះ NR.A1YG ដែលផលិតមកពីមាស ។ ប៉ុន្តែកាំភ្លើងម៉ាក NR.A1YG នឹងផលិតតាមចំនួនការកុម៉្មង់តែប៉ុណ្ណោះ ។

ក្រៅពីនេះ អតិថិជនអាចកុម្ម៉ង់ឱ្យផលិតកាំភ្លើងតាមចំណង់ចំណូលចិត្តរបស់ខ្លួន ដូចជា ៖ អាចកុម្ម៉ង់ឱ្យដាំគ្រាប់ពេជ្រនៅកន្លែងចាប់កាន់កាំភ្លើង ដើម្បីឱ្យវាកាន់តែពិសេស ។ ក្រៅពីកាំភ្លើងទំហំតូចទាំងនេះមានតម្លៃខ្ពស់ហើយ ការកុម្ម៉ង់ឱ្យផលិតកាំភ្លើងគ្រប់ម៉ាកទាំងអស់ គឺអតិថិជនត្រូវរង់ចាំរហូតដល់៦ខែឯណោះ ហើយអតិថិជនក៏ត្រូវឈ្វេងយល់ពីច្បាប់របស់ប្រទេសខ្លួនថា តើអនុញ្ញាតឱ្យនាំចូលកាំភ្លើងប្រភេទនេះដែរឬទេ?

ជាក់ស្តែង ច្បាប់នៅសហរដ្ឋអាមេរិក និងប្រទេសអង់គ្លេស ពុំអនុញ្ញាតឱ្យនាំចូលកាំភ្លើងមានទំហំតូចនេះទេ ។ រីឯអ្នកផលិតកាំភ្លើងទំហំតូចនិយាយថា ប្រទេសជាច្រើនបានហាមឃាត់ការនាំចូលកាំភ្លើងទំហំតូច ដោយសារតែពាក្យចចាមអារ៉ាមថា វាអាចបង្កគ្រោះថ្នាក់ដល់ពលរដ្ឋ ។ ការហាមឃាត់នេះ ពុំយុត្តិធម៌ឡើយ ខណៈប្រទេសទាំងនេះបាននាំចូលកាំភ្លើងធំៗ ៕

កាលពីថ្ងៃទី ១៨ ខែតុលានេះ នៅលើបណ្តាញសង្គមគឺមានការចែករំលែកជាច្រើនអំពីស្ថានការណ៍ជំនន់ទឹកភ្លៀងនិងទឹកហូរយ៉ាងគំហុកគួរឲ្យបារម្ភមិនធ្លាប់មាន នៅក្នុងភូមិសាស្រ្តខេត្តប៉ៃលិន។ តែយ៉ាងណា គិតត្រឹមថ្ងៃទី ១៩ នេះ គឺទឹកបានស្រកចុះមកសភាពធម្មតាវិញហើយ តែបងប្អូនក៏ត្រូវត្រៀមខ្លួននិងបន្តការប្រុងប្រយ័ត្ន។

យោងតាមការឲ្យដឹង ភ្លៀងធ្លាក់មួយមេធំកាលពីវេលាម៉ោង ៣ រសៀល ថ្ងៃទី ១៨ ខែតុលានេះ ក៏បណ្តាលឲ្យជំនន់ទឹកភ្លៀង ដែលធ្លាក់ពីតំបន់ជួរភ្នំ មកអូរព្រំដែនកម្ពុជា-ថៃ និងធ្វើឲ្យមានទឹកហូរយ៉ាងគំហុកកាត់ភូមិស្រុក ជាពិសេសគឺនៅត្រង់ចំណុចភូមិផ្សារព្រំ ខេត្តបៃលិន និងច្រកព្រំដែនអន្តរជាតិកម្ពុជាថៃ ប៉ះពាល់ដល់លំនៅដ្ឋាននិងមានការជម្លៀសប្រជាពលរដ្ឋក្នុងតំបន់ទៀតផង។

យោងតាមការដាក់បង្ហោះរបស់ លោកជំទាវ បាន ស្រីមុំ អភិបាលខេត្តប៉ៃលិនបានគូសបញ្ជាក់ថា ជំនន់ទឹកភ្លៀងធ្លាក់ពីភ្នំបានស្រកអស់វិលត្រឡប់មកសភាពធម្មតាវិញហើយគិតត្រឹមម៉ោង ១២.៤៧យប់ ឈានចូលថ្ងៃទី១៩/១០/២៤ ដោយឡែកក្រុមការងារនឹងចុះរៀបចំសម្អាតបរិស្ថាន និងជួយសង្គ្រោះបន្ទាន់ដល់ប្រជាពលរដ្ឋដែលបានបាត់បង់សម្ភារះប្រើប្រាស់ស្បោងអាហារ នៅព្រឹកថ្ងៃទី ១៩ ខែតុលានេះផងដែរ។

នាថ្ងៃទី ១៩ ខែតុលានេះ លោកជំទាវអភិបាលខេត្តប៉ៃលិន បានបញ្ជាក់ទៀតថា «នៅព្រឹកនេះ ជំនន់ទឹកភ្លៀងយប់មិញស្រកមកធម្មតា តែខណៈពេលនេះមេឃនៅតំបន់ភ្នំងងឹតទៀតហើយ បងប្អូនត្រៀមមានការប្រុងប្រយ័ត្ន!»។ ជាមួយគ្នានេះ លោកជំទាវ ក៏បានអំពាវនាវមិនអោយបងប្អូនមានការយល់ច្រលំ ដោយអះអាងថា «នេះជាជំនន់ទឹកភ្លៀងធ្លាក់ពីលើភ្នំនៅតាមជួរខ្សែបន្ទាត់ព្រំដែនកម្ពុជា-ថៃ មិនមែនបាក់ទំនប់ទឹកនោះទេ»។

បើយោងតាមការចុះផ្សាយរបស់ក្រសួងធនធានទឹកនិងឧតុនិយម៖ ចាប់ពីថ្ងៃទី១៩ ដល់ថ្ងៃទី២១ ខែតុលា ឆ្នាំ២០២៤នេះ ខ្យល់មូសុងឦសានដែលបក់លើសមុទ្រចិនខាងត្បូងចាប់ផ្តើមមានឥទ្ធិពលខ្លាំង ខណៈសម្ពាធទាប នៅបន្តគ្របដណ្ដប់លើភាគខាងក្រោមនៃអាងទន្លេមេគង្គ និងលើព្រះរាជាណាចក្រកម្ពុជា ដែលនឹងមានភ្លៀងធ្លាក់ លាយឡំជាមួយនឹងផ្គររន្ទះ និងខ្យល់កន្រ្តាក់ទូទាំងប្រទេសផងដែរ៕

ប្រទេសថៃ ៖ កាលពីថ្ងៃទី១៨ ខែតុលា ឆ្នាំ២០២៤ សារព័ត៌មានថៃរាយការណ៍ថា អាកាសយានដ្ឋានដនមឿងនៅទីក្រុងបាងកក បានប្រកាសឱ្យអ្នកដំណើរត្រៀមខ្លួន ចាប់ពី៣ម៉ោង ទៅ៤ម៉ោងមុនពេលធ្វើដំណើរ ក្រោយពីមានភ្លៀងធ្លាក់ខ្លាំងបណ្តាលឱ្យទឹកលិចជាច្រើនកន្លែង ។ ហេតុនេះ ការមកដល់អាកាសយានដ្ឋានមុនម៉ោង គឺអ្នកដំណើរនឹងពុំខកខានការធ្វើដំណើរ ។

ក្រោយពីមានភ្លៀងធ្លាក់យ៉ាងខ្លាំងនៅតំបន់ជាច្រើនក្នុងទីក្រុងបាងកក ប្រទេសថៃ បានធ្វើឱ្យមានទឹកលិចនៅតំបន់មួយចំនួន និងស្ទះចរាចរណ៍តាមផ្លូវ ។ លើសពីនេះ ភ្លៀងធ្លាក់ខ្លាំងនៅថ្ងៃចុងសប្តាហ៍ កាន់តែធ្វើឱ្យស្ទះចរាចរណ៍ខ្លាំងថែមទៀត ទើបអាកាសយានដ្ឋានដនមឿងប្រកាសថា នៅទីក្រុងបាងកក និងតំបន់ជុំវិញ ព្រមទាំងបរិវេណរបស់អាកាសយានដ្ឋានដនមឿង មានភ្លៀងធ្លាក់ខ្លាំងបណ្តាលឱ្យទឹកលិចជាច្រើនកន្លែង ។

វាធ្វើឱ្យការធ្វើចរាចរនៅបរិវេណអាកាសយានដ្ឋានដនមឿងស្ទះយ៉ាងខ្លាំង ហើយដើម្បីការពារកុំឱ្យអ្នកដំណើរខកខានជើងហោះហើរ ខាងអាកាសយានដ្ឋានដនមឿង សូមឱ្យអ្នកដំណើរទាំងអស់មកដល់អាកាសយានដ្ឋានមុនពេលវេលាកំណត់ គឺចាប់ពី៣ម៉ោង ទៅ៤ម៉ោងមុន ដើម្បីត្រៀមខ្លួន Check-in ។

ដោយឡែក កាលពីថ្ងៃទី១៩ ខែតុលា ឆ្នាំ២០២៤ ភ្នាក់ងារឧតុនិយមថៃបានប្រកាសពីអាកាសធាតុប្រែប្រួល និងប៉ះពាល់ដល់ប្រទេសថៃ ចាប់ពីថ្ងៃទី១៩ ដល់ថ្ងៃទី២១ ខែតុលា ដោយសារសម្ពាធខ្យល់ខ្ពស់ ឬម៉ាស់ខ្យល់ត្រជាក់មកពីប្រទេសចិនបានគ្របដណ្តប់លើតំបន់ភាគខាងជើង, ភាគឦសាន និងសមុទ្រចិនខាងត្បូង ។ វាបណ្តាលឱ្យមានខ្យល់ពីភាគខាងកើត និងភាគអាគ្នេយ៍ ដោយនាំយកសំណើមពីសមុទ្រចិនខាងត្បូង និងឈូងសមុទ្រថៃមកគ្របដណ្តប់លើប្រទេសថៃ ។

ដូច្នេះ ប្រទេសថៃនឹងមានភ្លៀងធ្លាក់ខ្លាំង និងផ្គររន្ទះបន្ថែមទៀត ហើយភ្នាក់ងារឧតុនិយមបានសំណូមពរឱ្យពលរដ្ឋប្រុងប្រយ័ត្នគ្រោះថ្នាក់ផ្សេងៗដោយសារភ្លៀងធ្លាក់ខ្លាំង និងខ្យល់កន្ត្រាក់ ។ ក្នុងអំឡុងពេលនេះ អាចមានទឹកជំនន់ហូរមកពីតំបន់ព្រៃភ្នំភ្លាមៗ ជាពិសេស នៅតំបន់ជើងភ្នំដែលមានទឹកហូរឆ្លងកាត់ និងតំបន់ទំនាប ។

លើសពីនេះ ពលរដ្ឋគួរតែចៀសវាងស្ថិតនៅកណ្តាលវាល, ឈរក្រោមដើមឈើធំៗ និងឈរក្រោមផ្ទាំងផ្សព្វផ្សាយពាណិជ្ជកម្ម ព្រមទាំងថែទាំសុខភាពផងដែរ ដោយសារអាកាសធាតុប្រែប្រួលខ្លាំង ៕

ប្រទេសចិន៖ iPhone 16 បច្ចុប្បន្នកំពុងទទួលបានការចាប់អារម្មណ៍ខ្លាំងនៅក្នុងទីផ្សារប្រទេសចិន ដែលការលក់រយៈពេល ៣ សប្តាហ៍ដំបូងនេះគឺបានកើនឡើងគួរឱ្យកត់សម្គាល់រហូតដល់ ២០% បើប្រៀបធៀបទៅនឹង iPhone 15 ក្នុងរយៈពេលដូចគ្នាកាលពីឆ្នាំមុន។

យោងតាមក្រុមហ៊ុនស្រាវជ្រាវទីផ្សារ Counterpoint Research បានឱ្យដឹងថា បន្ទាប់ពីដាក់លក់ទូរស័ព្ទ iPhone 16 នៅថ្ងៃទី ២០ ខែកញ្ញា ឆ្នាំ២០២៤ ក្នុងប្រទេសចិនកន្លងទៅ ឃើញថាមានការលក់ដាច់អស់ជាបន្តបន្ទាប់។

ដូច្នេះក្នុងចំណោមម៉ូដែលទាំង ៤ iPhone 16 Pro និង 16 Pro Max គឺមានប្រជាប្រិយភាពបំផុត ជាមួយនឹងការកើនឡើង ៤៤% បើប្រៀបធៀបទៅនឹងកំណែរៀងៗខ្លួនកាលពីឆ្នាំមុន។ អ្នកវិភាគ Counterpoint Research លោក Ivan Lam ជឿជាក់ថា កត្តាដែលជួយឱ្យ iPhone 16 ទទួលបានការលក់ខ្ពស់ជាង iPhone 15 គឺទាក់ទងនឹងបញ្ហាផលិតកម្ម។ កាលពីឆ្នាំមុន ក្រុមហ៊ុន Apple បានជួបប្រទះនឹងការលំបាកជាមួយនឹងខ្សែសង្វាក់ផ្គត់ផ្គង់ iPhone 15 ដែលបណ្តាលឱ្យចំនួននៃការនាំចេញទាបជាងការគ្រោងទុក និងមិនអាចបំពេញតម្រូវការដំបូងនៅក្នុងប្រទេសចិននោះទេ។

លើសពីនេះ Mate 60 ដែលជាស្មាតហ្វូនដំបូងបង្អស់របស់ក្រុមហ៊ុន Huawei ដែលប្រើប្រាស់បន្ទះឈីបផលិតដោយខ្លួនឯង ក៏ចេញលក់ដំណាលគ្នានឹង iPhone 15 ដែរ ដែលនេះគឺបានធ្វើឱ្យប៉ះពាល់ដល់ការលក់ iPhone 15 យ៉ាងខ្លាំងនៅក្នុងទីផ្សារប្រទេសចិន។ ទោះបីជាការចាប់ផ្តើមលក់ iPhone 16 នៅចុងឆ្នាំនេះទទួលសញ្ញាវិជ្ជមានខ្លាំងក៏ដោយ ក៏ក្រុមហ៊ុនស្រាវជ្រាវទីផ្សារ បាននិយាយថា iPhone 16 នៅតែប្រឈមមុខនឹងគូប្រជែងធំៗជាច្រើន។

ជាពិសេស Vivo ទើបតែបានប្រកាសចេញនូវស្មាតហ្វូនស៊េរីខ្ពស់ X200 Pro ហើយក្រុមហ៊ុន Huawei ក៏ត្រូវបានគេរំពឹងថានឹងបញ្ចេញ Mate ជំនាន់ក្រោយនៅក្នុងខែវិច្ឆិកាផងដែរ ខណៈ Xiaomi និង Oppo ក៏ហៀបនឹងដាក់បង្ហាញផលិតផលស្មាតហ្វូនរបស់ពួកគេទៀតផង។ គួរបញ្ជាក់ដែរថា ការលក់ iPhone 16 គឺពិតជាបានកើនឡើងមែន ប៉ុន្តែការលក់ iPhone សរុបទាំងអស់នៅក្នុងប្រទេសចិនរយៈពេល ៣ សប្តាហ៍ដំបូងចាប់ពីថ្ងៃទី ២០ ខែកញ្ញាគឺបានធ្លាក់ចុះ ២% ពីមួយឆ្នាំទៅមួយឆ្នាំ ហើយភាគច្រើនដោយសារតែការកើនឡើងនៃការប្រកួតប្រជែងពីបណ្តាញ Mate និង Pura របស់ក្រុមហ៊ុន Huawei ៕

សហរដ្ឋអាមេរិក ៖ ក្រុមហ៊ុនមួយរបស់អាមេរិកបានប្រកាសលក់ពន្លឺព្រះអាទិត្យពេលយប់ ក្រោយពីក្រុមហ៊ុននេះសាកល្បងបច្ចេកវិទ្យារបស់ខ្លួនបានជោគជ័យកាលពីឆ្នាំ២០២៣ ។ អតិថិជនគ្រាន់តែប្រើប្រាស់ App របស់ក្រុមហ៊ុនកុម្ម៉ង់ទិញពន្លឺព្រះអាទិត្យ និងរង់ចាំតែបន្តិចប៉ុណ្ណោះ ក្រុមហ៊ុននឹងបញ្ជូនពន្លឺព្រះអាទិត្យមកកាន់លំនៅឋានអតិថិជនតាមរយៈប្រព័ន្ធផ្កាយរណបលើអាកាស ។

នៅខែតុលា ឆ្នាំ២០២៤ ក្រុមហ៊ុននៅរដ្ឋកាលីហ្វ័រញ៉ា សហរដ្ឋអាមេរិក ឈ្មោះ Reflect Orbital បានប្រកាសពីគម្រោងលក់ពន្លឺព្រះអាទិត្យនៅពេលយប់ ដោយការបង្កើតផ្កាយរណបជាច្រើនគ្រឿងដើម្បីបញ្ចាំងពន្លឺព្រះអាទិត្យមកកាន់ផែនដី ។ ក្រុមហ៊ុនបានកំណត់គោលដៅឱ្យគម្រោងរបស់ខ្លួនក្លាយជាការពិត តាមរយៈការអភិវឌ្ឍប្រព័ន្ធផ្កាយរណបលក់ពន្លឺព្រះអាទិត្យដល់ទីតាំងដំឡើងសូឡារាប់ពាន់កន្លែងពេលយប់ ។

ចំណែកការបង្កើតពន្លឺព្រះអាទិត្យពេលយប់ គឺក្រុមជំនាញនឹងបង្កើតផ្កាយរណបចំនួន៥៧ វិលជុំវិញផែនដីសម្រាប់បញ្ចាំងពន្លឺមកផែនដី ហើយផ្កាយរណបទាំងនេះនឹងហោះឆ្លងកាត់ចំណុចនីមួយៗនៅលើផែនដីក្នុងថ្ងៃតែមួយ និងហោះចំនួន២ដងក្នុងរយៈពេល២៤ម៉ោង ។ ផ្កាយរណបទាំង៥៧ នឹងផ្តល់ពន្លឺព្រះអាទិត្យបន្ថែមទៀតចំនួន៣០នាទីដល់រោងចក្រថាមពលសូឡា ។

ផ្កាយរណបនីមួយៗនឹងមានទម្ងន់ប្រមាណ១៦គីឡូក្រាម ព្រមទាំងបំពាក់កញ្ចក់ Mylar សម្រាប់ប្រើប្រាស់លើអាកាស និងជួយបញ្ចាំងពន្លឺព្រះអាទិត្យ ។ ក្រុមហ៊ុន Reflect Orbital បញ្ជាក់ថា បច្ចុប្បន្ន ពុំទាន់មានការបង្ហោះផ្កាយរណបនៅឡើយទេ ប៉ុន្តែក្រុមអ្នកជំនាញនឹងសាកល្បងដាក់កញ្ចក់លើបាឡុងខ្យល់ក្តៅ និងបង្ហោះលើទីតាំងសូឡា ។ កញ្ចក់នេះនឹងធ្វើឱ្យផ្ទាំងសូឡាអាចផលិតថាមពលបានស្មើនឹងពាក់កណ្តាលនៃពន្លឺព្រះអាទិត្យ ។ ក្រុមហ៊ុនក៏បានបញ្ជាក់ពីការតភ្ជាប់ជាមួយ App ផងដែរ ដើម្បីស្វែងរកទីតាំងលំនៅឋានអតិថិជនលើផែនដី បន្ទាប់មក វានឹងបញ្ជូនពន្លឺព្រះអាទិត្យឱ្យចំគោលដៅ ។

ហេតុនេះ បើអតិថិជនចង់បានពន្លឺសម្រាប់ហាលសម្លៀកបំពាក់ក្រោយផ្ទះ ឬធ្វើអ្វីមួយពេលយប់ គឺអតិថិជនគ្រាន់តែកុម្ម៉ង់ទិញពន្លឺព្រះអាទិត្យ១ម៉ោងមុន ទៅកាន់ App របស់ក្រុមហ៊ុន Reflect Orbital ។ បន្ទាប់មក អតិថិជនអាចយកសម្លៀកបំពាក់មកហាលរង់ចាំ ហើយក្រុមហ៊ុននឹងបញ្ជូនពន្លឺព្រះអាទិត្យមកកាន់ផ្ទះអតិថិជន ។ ប៉ុន្តែក្រុមហ៊ុនប្រាប់ថា វាស័ក្តិសមជាមួយទីតាំងសូឡាច្រើនជាង ពីព្រោះតាមធម្មតា ទីតាំងទាំងនេះនឹងពុំអាចផលិតអគ្គិសនីពេលយប់បានទេ ហើយការកុម្ម៉ង់ទិញពន្លឺព្រះអាទិត្យសម្រាប់កទីតាំងសូឡានឹងធ្វើឱ្យពួកគេអាចផលិតអគ្គិសនីបានច្រើន ។

នាយកក្រុមហ៊ុន Reflect Orbital ជឿថា ពន្លឺព្រះអាទិត្យ គឺជាប្រេងឥន្ធនៈថ្មីរបស់ពិភពលោក ហើយកាលពីឆ្នាំ២០២៣ ក្រុមហ៊ុននេះទទួលបានជោគជ័យក្នុងការសាកល្បងដំណាក់កាលចុងក្រោយ ដោយការប្រើប្រាស់កញ្ចក់បំពាក់លើបាឡុងខ្យល់ក្តៅអណ្តែតលើអាកាសកម្ពស់៣.០៤៨ម៉ែត្រ និងប្រើប្រាស់ប្រព័ន្ធគ្រប់គ្រងកញ្ចក់បញ្ជូនពន្លឺព្រះអាទិត្យមកកាន់ផ្ទាំងសូឡា ។ ក្រុមហ៊ុនថែមទាំងបញ្ជាក់ក្នុងគេហទំព័រថា នឹងចាប់ផ្តើមលក់ពន្លឺព្រះអាទិត្យពេលយប់ ចាប់ពីឆ្នាំ២០២៥ តទៅ ៕

នៅអាស៊ីអាគ្នេយ៍យើងនេះមានប្រទេសទាំងអស់ចំនួន ១១ ដែលក្នុងនោះឥណ្ឌូនេស៊ីគឺជាប្រទេសមានប្រជាជនច្រើនជាងគេប្រមាណជាង ២៨៣ លាននាក់ ហើយប្រទេសដែលមានប្រជាជនតិចជាងគេនៅតំបន់អាស៊ីអាគ្នេយ៍នោះគឺ ប្រទេសប្រ៊ុយណេ។ ទោះជាយ៉ាងណា នៅក្នុងអត្ថបទនេះយើងនិយាយអំពីប្រទេសដែលមានប្រជាជនច្រើនជាងគេទីពីរនៅអាស៊ីអាគ្នេយ៍? ដូច្នេះហើយតើលោកអ្នកដឹងទេថា ក្រៅពីឥណ្ឌូនេស៊ី តើប្រទេសណាដែលមានប្រជាជនច្រើនជាងគេទីពីរនៅអាស៊ីអាគ្នេយ៍?

ជាការពិតណាស់ ប្រទេសណាដែលមានប្រជាជនច្រើនជាងគេទីពីរនៅអាស៊ីអាគ្នេយ៍គឺប្រទេសហ្វីលីពីនដែលមានប្រជាជនជាង ១១៥ លាននាក់ នេះបើយោងតាមគេហទំព័របរទេស Worldometers។ ឈ្មោះប្រទេសហ្វីលីពីនមានប្រភពមកពីស្តេចអេស្ប៉ាញនៅសតវត្សទី ១៦។ ហ្វីលីពីន ជាពាក្យក្លាយមកពីឈ្មោះព្រះរាជាហ្វីលីពទី ២ របស់អេស្ប៉ាញ។ ឈ្មោះនេះត្រូវបានប្រើសម្រាប់ហៅកោះលេយតេ និងកោះសាម៉ារ ក្នុងបេសសកម្មព្រះរាជាអេស្ប៉ាញមកហ្វីលីពីន។ ក្រោយមកឈ្មោះនេះក៏ត្រូវបានគេយកទៅប្រើប្រាស់សម្រាប់ហៅប្រទេសទាំងមូលនេះតែម្តង។

បច្ចុប្បន្នប្រទេសនេះមានផ្ទៃដីប្រហែល ៣០០,០០០ គីឡូម៉ែត្រការ៉េ ដែលមានកោះធំ និងតូចជាង ៧,៦០០។ អាហារតំណាងប្រទេសហ្វីលីពីនគឺឡេសន (Lechon) ឬសាច់ជ្រូកអាំង អាដូបូ (Adobo) ជាដើម ដែលអាហារទាំងនេះទទួលឥទ្ធិពល ពីសម័យអាណានិគម ទាំងអេស្ប៉ាញ ព័រទុយហ្គាល ចិន និងអាមេរិក។ សត្វដែលតំណាងឱ្យប្រទេសនេះគឺ ក្របីស្រុក (Water Buffalo)។ បានជាប្រទេសដែនកោះមួយនេះចាត់ទុកក្របីជាតំណាងជាតិរបស់ខ្លួននោះ គឺដោយសារប្រជាជនហ្វីលីពីនភាគច្រើនធ្វើកសិកម្មបានផលចិញ្ចឹមជីវិត ក៏ព្រោះតែមានសត្វក្របីនេះជាកម្លាំងអូសទាញយ៉ាងសំខាន់។ ដូច្នេះអ្នកស្រុកហ្វីលីពីនហៅសត្វក្របីថា «ខារ៉ាបាវ» ដូចដែលឃើញនៅលើកំប៉ុងភេសជ្ជៈ Carabao អ៊ីចឹង៕

សហរដ្ឋអាមេរិក៖ ថ្មីៗនេះមហាសេដ្ឋីពិភពលោក Elon Musk បាននិយាយថា ខ្លួននឹងបង្ហាញទូរស័ព្ទថ្មីរបស់ខ្លួនគឺ Tesla Pi ដើម្បីវាយលុកទីផ្សារនៅចុងឆ្នាំ ២០២៤ ដោយសន្យាថានឹងធ្វើបដិវត្តន៍ឧស្សាហកម្មស្មាតហ្វូនជាមួយមុខងារពិសេសៗជាច្រើនមិនធ្លាប់មាន។

Tesla Pi គឺជាស្មាតហ្វូនទំនើបបំផុត ប្រកបដោយភាពច្នៃប្រឌិត ណែនាំពីភាពជឿនលឿនមិនធម្មតាចំនួនបី ដែលត្រៀមនឹងកំណត់ស្តង់ដារថ្មីនៅក្នុងបច្ចេកវិទ្យាទូរស័ព្ទ។ ទីមួយ ទូរស័ព្ទ Tesla Pi នឹងលុបបំបាត់តម្រូវការសម្រាប់វិធីសាស្រ្តសាកថ្មធម្មតា មានន័យថា យើងមិនចាំបាច់សាកថ្មទៀតទេ ព្រោះទូរស័ព្ទនេះដើរដោយថាមពលពន្លឺព្រះអាទិត្យ ទោះបីជាគ្មានពន្លឺព្រះអាទិត្យក៏មិនចាំបាច់បារម្ភដែរ ព្រោះថាឱ្យតែកន្លែងណាមានពន្លឺ គឺវាសាកថ្មដោយស្វ័យប្រវត្តិតែម្តង ដែលនេះនឹងធ្វើឱ្យវាក្លាយជាឧបករណ៍ដែលសន្សំសំចៃថាមពលថ្មខ្ពស់បំផុតនៅលើទីផ្សារ។

ទីពីរ ទូរស័ព្ទ Tesla Pi ផ្តល់នូវការចូលប្រើអ៊ីនធឺណិតគ្មានដែនកំណត់ តាមរយៈការតភ្ជាប់បណ្តាញផ្កាយរណប Starlink របស់ Elon Musk។ ជាមួយនឹងការគ្របដណ្តប់ជាសកលរបស់ Starlink អ្នកប្រើប្រាស់អាចបន្តភ្ជាប់បានគ្រប់ទីកន្លែងនៅលើផែនដីដោយមិនបារម្ភអំពីគម្រោងអ៊ីនធឺណិតបែបប្រពៃណី ឬដែនកំណត់ទិន្នន័យទៀតឡើយ។ មានន័យថា លោកអ្នកគ្រាន់តែទិញស្មានហ្វូនមួយនេះ គឺអាចប្រើប្រាស់អ៊ីនធឺណិតបានដោយសេរីគ្រប់ទីកន្លែងតែម្តង ដោយមិនចាំបាច់ទិញកាតបញ្ចូលលុយដូចសព្វថ្ងៃនេះទៀតទេ។

ជាចុងក្រោយ ទូរស័ព្ទដ៏អស្ចារ្យនេះត្រូវបានរចនាឡើងដើម្បីផ្តល់ការទំនាក់ទំនងទូទាំងផែនដី ព្រះច័ន្ទ និងសូម្បីតែភពព្រះអង្គារ ដែលធ្វើឱ្យវាក្លាយជាឧបករណ៍ដ៏សំខាន់បំផុតមួយសម្រាប់ការរុករកអវកាស និងព្រំដែនបន្ទាប់ក្នុងការតភ្ជាប់។ ទូរស័ព្ទ Pi របស់ Tesla គឺពិតជាជំហានទៅមុខ ដោយរួមបញ្ចូលគ្នានូវនិរន្តរភាព ការចូលប្រើអ៊ីនធឺណិតគ្មានដែនកំណត់ និងការទំនាក់ទំនងអន្តរភព ដែលធ្វើឱ្យវាមានភាពទាក់ទាញខ្លាំងនៅលើទីផ្សារ។ ទោះជាយ៉ាងណាគេមិនទាន់ដឹងច្បាស់ទេថា តើទូរស័ព្ទនេះនឹងដាក់លក់លើទីផ្សារចុងឆ្នាំ ២០២៤ ក្នុងតម្លៃប៉ុន្មាននោះទេ៕

ប្រទេសអេស្ប៉ាញ ៖ ពេលយើងទៅដើរលេងនៅសមុទ្រ ក្រៅពីការលេងទឹកសមុទ្រយ៉ាងសប្បាយរីករាយ, ស្រូបខ្យល់អាកាសបរិសុទ្ធ, គយគន់ទេសភាព និងបរិភោគអាហារសមុទ្រឆ្ងាញ់ៗហើយ មនុស្សភាគច្រើនតែងតែពូនដីខ្សាច់ធ្វើជារូបអគារ ឬរូបសត្វផ្សេងៗ ។ ប៉ុន្តែការពូនដីខ្សាច់ជារបស់ពួកគេ គឺគ្រាន់តែជាការសប្បាយប៉ុណ្ណោះ ហើយពំនូកខ្សាច់ទាំងនេះនឹងបាត់រូបរាងទៅវិញក្នុងរយៈពេលខ្លី ។

ប៉ុន្តែសម្រាប់លោក Andoni Bastarrika ជនជាតិអេស្ប៉ាញ បានពូនដីខ្សាច់ជារូបរាងសត្វផ្សេងៗ មិនត្រឹមតែធ្វើឱ្យលោកសប្បាយរីករាយប៉ុណ្ណោះទេ ប៉ុន្តែការពូនដីខ្សាច់របស់លោក គឺប្រកបដោយគំនិតសិល្បៈយ៉ាងផ្ចិតផ្ចង់ និងល្អប្លែក ។ មនុស្សម្នាដែលឃើញស្នាដៃរបស់លោកហើយសរសើរគ្រប់ៗគ្នាថា វាពិតជាអស្ចារ្យខ្លាំងណាស់ ហើយលោកមានសមត្ថភាពពិសេស ។

លោក Andoni និយាយថា កាលពីរដូវក្តៅឆ្នាំ២០១០ លោកចាប់ផ្តើមមានគំនិតចង់បង្កើតស្នាដៃសិល្បៈពីដីខ្សាច់ ជាមួយកូនស្រីទាំង២នាក់របស់លោក ។ លោកបានធ្វើ រូបនាងមច្ឆាតូចពីដីខ្សាច់ ហើយកូនស្រីទាំង២ បានសរសើរស្នាដៃលោកយ៉ាងខ្លាំង ។ នេះជាចំណុចចាប់ផ្តើមដែលលើកទឹកចិត្តលោកឱ្យពូនខ្សាច់ជារូបរាងផ្សេងៗយ៉ាងច្រើន ។

លោកបន្តថា លោកបានហ្វឹកហាត់ជំនាញពូនដីខ្សាច់អស់រយៈពេលជាង១០ឆ្នាំ ហើយលោកបានរកឃើញបច្ចេកទេសផ្សេងៗ ដើម្បីពូនដីខ្សាច់នេះឱ្យកាន់តែល្អឥតខ្ចោះថែមទៀត ។ ការពូនខ្សាច់ធ្វើជារូបរាងសត្វនីមួយៗ គឺលោកបានចំណាយពេលចាប់ពី៦ម៉ោង រហូតដល់២ថ្ងៃ និងអាស្រ័យលើភាពងាយស្រួល ឬលំបាក ដើម្បីឱ្យសត្វធ្វើពីខ្សាច់ទាំងនេះមានរូបរាងដូចសត្វពិតប្រាកដ ។

លោក Andoni បានព្យាយាមបង្ហាញទៅកាន់មហាជនថា ហេតុអ្វីលោកស្រឡាញ់ឈ្វក់វង្វេងនឹងការបង្កើតរូបរាងសត្វពីដីខ្សាច់បែបនេះ ហើយចំណុចមួយដែលធ្វើឱ្យមនុស្សគ្រប់គ្នាពិចារណានោះ គឺមនុស្សយើងក៏ដូចជាគ្រាប់ខ្សាច់តូចៗនៅលើពិភពលោកនេះដែរ ។ បើយើងគ្រប់រូបសាមគ្គីគ្នា ពុំបែកបាក់កម្លាំង គឺយើងនឹងអាចបង្កើតអ្វីមួយដ៏អស្ចារ្យ និងស្រស់ស្អាតដូចគ្រាប់ខ្សាច់ ។

ការលើកឡើងបែបនេះបង្ហាញពីការជឿជាក់យ៉ាងខ្លាំងរបស់លោកចំពោះរូបរាងសត្វផ្សេងៗដែលកើតឡើងពីដីខ្សាច់ ដែលមិនត្រឹមតែជាស្នាដៃសិល្បៈប៉ុណ្ណោះទេ ប៉ុន្តែវាជាការដាស់តឿនពីការសាមគ្គីគ្នារវាងមនុស្សម្នាក់ៗ ។ ពេលយើងបានឃើញរូបរាងសត្វធ្វើពីដីខ្សាច់ យើងនឹងមានអារម្មណ៍ថា ដីខ្សាច់ដែលយើងធ្លាប់ពូនលេងយ៉ាងរីករាយនោះបានក្លាយជាស្នាដៃសិល្បៈមានជីវិតយ៉ាងរស់រវើក និងបញ្ជាក់ថា មនុស្សអាចច្នៃប្រឌិតអ្វីថ្មីៗជានិច្ច ៕

សហរដ្ឋអាមេរិក ៖ កាលពីថ្ងៃទី១៧ ខែតុលា ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុន Meta បានប្រកាសកាត់បន្ថយបុគ្គលិកគ្រប់ផ្នែកជាបន្តបន្ទាប់ រួមទាំងបុគ្គលិកធ្វើការនៅ WhatsApp, Instagram និង Reality Labs ផងដែរ ហើយបុគ្គលិកខ្លះត្រូវបានក្រុមហ៊ុនចោទប្រកាន់ទៀតផង ។ ប៉ុន្តែគេពុំដឹងថា តើ Meta មានគម្រោងកាត់បន្ថយបុគ្គលិកសរុបចំនួនប៉ុន្មាននាក់ទេ ។

បើតាមការចុះផ្សាយរបស់ Verge គឺជាគេហទំព័រផ្នែកបច្ចេកវិទ្យានាំមុខរបស់សហរដ្ឋអាមេរិកបញ្ជាក់ថា បច្ចុប្បន្ន Meta គឺជាក្រុមហ៊ុនមេរបស់ Facebook, Instagram និងបណ្តាញសង្គមជាច្រើនទៀត បានកាត់បន្ថយបុគ្គលិកគ្រប់ផ្នែកជាបន្តបន្ទាប់ ដូចជា ៖ Instagram, WhatsApp និង Reality Labs នៅ Meta ផងដែរ ។

អ្នកនាំពាក្យរបស់ Meta បាននិយាយមកកាន់សារព័ត៌មានរ៉យទ័រថា ក្រុមហ៊ុនកំពុងផ្លាស់ប្តូរការងារផ្នែកខ្លះដើម្បីឱ្យស្របតាមគោលដៅយុទ្ធសាស្ត្ររយៈពេលវែង និងយុទ្ធសាស្ត្រទីតាំង ។ ក្រៅពីនេះ Meta នឹងបញ្ជូនបុគ្គលិកមួយចំនួនទៅធ្វើការនៅកន្លែងផ្សេង និងផ្លាស់ប្តូរតួនាទីរបស់ពួកគេ ហើយក្រុមហ៊ុននឹងប្រឹងប្រែងធ្វើការឱ្យកាន់តែខ្លាំងដើម្បីស្វែងរកឱកាសថ្មីៗឱ្យបុគ្គលិករងផលប៉ះពាល់ ។

ការចុះផ្សាយរបស់គេហទំព័រ Verge ពុំបានបញ្ជាក់ច្បាស់លាស់ពីចំនួនបុគ្គលិកដែល Meta មានគម្រោងបញ្ឈប់នោះទេ គ្រាន់តែបញ្ជាក់ថា ជំហ៊ានដំបូង Meta នឹងកាត់បន្ថយបុគ្គលិកតិចតួច ។ រីឯ Meta ពុំបាននិយាយអ្វីពាក់ព័ន្ធនឹងការកាត់បន្ថយបុគ្គលិកជាសាធារណៈទេ ។

ដោយឡែក Financial Times លើកឡើងថា កាលពីសប្តាហ៍ទី២ ខែតុលា ឆ្នាំ២០២៤ Meta បានបណ្តេញបុគ្គលិកពីការងាររហូតដល់ជាង២០នាក់ នៅទីក្រុង Los Angeles រដ្ឋកាលីហ្វ័រញ៉ា សហរដ្ឋអាមេរិក ដោយចោទប្រកាន់ថា បុគ្គលិកទាំងនេះពាក់ព័ន្ធនឹងការចាយវាយប្រាក់ក្រុមហ៊ុនខុសច្បាប់ ។ ប៉ុន្តែ Meta បានបដិសេធពុំបកស្រាយរឿងនេះ ។

គួរបញ្ជាក់ថា ក្រុមហ៊ុន Meta បានកាត់បន្ថយបុគ្គលិកប្រមាណ២១.០០០នាក់ ចាប់ពីខែវិច្ឆិកា ឆ្នាំ២០២២ ដើម្បីកាត់បន្ថយការចំណាយដើមទុន ។ រីឯលោក Mark Zuckerberg ជានាយកគ្រប់គ្រង Meta បានហៅឆ្នាំ២០២៣ ថា គឺជាឆ្នាំមានប្រសិទ្ធភាព ។

ការប្រកាសកាត់បន្ថយបុគ្គលិករបស់ Meta បានធ្វើឱ្យបុគ្គលិកមួយចំនួនគ្មានការងារធ្វើ បើទោះជាក្រុមហ៊ុននេះមានប្រតិបត្តិការរឹងមាំក្តី ។ ការសម្រេចចិត្តនេះបានបង្ហាញពីការព្យាយាមរបស់ Meta ក្នុងការកាត់បន្ថយដើមទុន ស្របពេលសេដ្ឋកិច្ចប្រែប្រួល ៕