តារាចម្រៀង Harry Styles និងអតីតសមាជិកក្រុម One Direction បានកាន់ទុក្ខ Liam Payne ដោយនិយាយថា ពួកគេមានការសោកស្ដាយជាខ្លាំងនៅពេលដែលបងប្រុសរបស់ពួកគេបានទទួលមរណភាពក្នុងវ័យ៣១ ឆ្នាំ។

នៅលើ Instagram របស់ក្រុម នៅថ្ងៃទី១៧ ខែតុលា Harry Styles, Zayn Malik, Louis Tomlinson និង Niall Horan រួមគ្នាបង្ហោះសារគោរពដល់ Liam Payne ដោយមានអារម្មណ៍ «ខូចចិត្តទាំងស្រុង» នៅពេលដែលពួកគេបានដឹងពីមរណភាពរបស់អតីតមិត្តរួមក្រុមរបស់ពួកគេ។ តំណាងក្រុមនេះបានសរសេរថា៖ «យូរៗទៅប្រហែលជាមានរឿងនឹងនិយាយទៅកាន់គ្នាកាន់តែច្រើន ប៉ុន្តែសម្រាប់ពេលនេះ ពួកយើងនឹងចំណាយពេលនេះដើម្បីកាន់ទុក្ខការបាត់បង់បងប្រុសដែលយើងទាំងអស់គ្នាស្រលាញ់ ស្រលាញ់អ្នកជានិច្ច អនុស្សាវរីយ៍ជាមួយបងគឺតែងតែមានតម្លៃ»។

សមាជិកបានបន្តបង្ហោះលើបណ្តាញសង្គមផ្ទាល់ខ្លួនថែមទៀត Louis Tomlinson និង Zayn Malik គឺជាមនុស្សពីរនាក់ដំបូងដែលនិយាយឡើង។ Tomlinson បានចែករំលែករូបថតដែលអ្នកទាំងពីរបានថតជាមួយគ្នានៅលើឆាកតន្រ្តីជាមួយនឹងសារលា។ ដូច្នោះហើយ តារាចម្រៀងរូបនេះបាននិយាយថា ខ្លួនពេញចិត្តសំឡេងរបស់ Liam Payne តាំងពីជួបគ្នាលើកដំបូង ប៉ុន្តែក្រោយមកមានអារម្មណ៍ថា Liam Payne ប្រៀបដូចជាបងប្រុសដ៏ល្អដែលលោកប្រាថ្នាចង់បាន។
Tomlinson ក៏បាននិយាយផងដែរថា ប្រសិនបើ Bear ដែលជាកូនប្រុសរបស់ Liam Payne និងតារាចម្រៀង Cheryl Tweedy មានអាយុ៧ឆ្នាំត្រូវការលោក លោកនឹងក្លាយជាពូ ហើយប្រាប់ក្មួយប្រុសអំពីថាតើឪពុករបស់គាត់អស្ចារ្យប៉ុណ្ណា។

Zayn Malik បាននិយាយថាលោកមានរឿងជាច្រើនដែលត្រូវនិយាយដោយសង្ឃឹមថា Liam Payne អាចស្តាប់បាន។ តារាចម្រៀងរូបនេះបានថ្លែងអំណរគុណដល់ Liam Payne ដែលតែងតែនៅក្បែរលោក និងស្រលាញ់លោកក្នុងគ្រាលំបាកបំផុត។ Malik បានរំឮកពីរបៀបដែលអ្នកទាំងពីរឈ្លោះគ្នាព្រោះគ្រប់គ្នារឹងរូស ប៉ុន្តែគោរព Liam Payne ដោយសម្ងាត់ ព្រោះប្អូនប្រុសម្នាក់នេះមានមតិ និងសុខចិត្តចង្អុលបង្ហាញកំហុសអ្នកដទៃ។ តារាចម្រៀង Pillow Talk ក៏បានថ្លែងអំណរគុណចំពោះទេពកោសល្យតន្ត្រីរបស់អតីតសមាជិករូបនេះផងដែរ ដោយនិយាយថាលោកតែងតែជឿជាក់លើ Liam Payne ក្នុងការដឹកនាំក្រុម ទោះបីជាជួបបញ្ហាអ្វីក៏ដោយ។

យោងតាម CNN បានឱ្យ ដឹងថា Zayn Malik និង Liam Payne មានជម្លោះចាប់តាំងពីពួកគេនៅតែសកម្មជាមួយក្រុម។ ក្នុងអំឡុងឆ្នាំ ២០២២ កម្មវិធី podcast Liam Payne បានធ្វើឱ្យអ្នកគាំទ្រខឹងសម្បារដោយការបញ្ចេញមតិអវិជ្ជមានអំពី Malik ។ ប៉ុន្មានខែក្រោយមក លោកបានបង្ហោះវីដេអូសូមទោសនៅលើ យូធូប ដោយនិយាយថាលោកបាននិយាយខុសនៅពេលនោះ ហើយបានកែតម្រូវថាលោកតែងតែចាត់ទុក Malik ជាបងប្រុសរបស់ខ្លួន។
Harry Styles បានបង្ហោះរូបថតខ្នងរបស់ Liam Payne ឡើងវិញក្នុងអំឡុងពេលការប្រគំតន្ត្រីជាមួយសំបុត្រមួយថា “សេចក្តីអំណរដ៏អស្ចារ្យបំផុតរបស់ Liam Payne គឺការជួយអ្នកដទៃឱ្យសប្បាយរីករាយ។ វាជាកិត្តិយសមួយដែលបាននៅជាមួយគ្នានៅពេលដែលគាត់ធ្វើដូច្នេះ។ Liam Payne បើកចំហ និងស្មោះត្រង់។ គាត់មានភាពកក់ក្តៅ តែងតែគាំទ្រ និងស្រលាញ់អ្នកជុំវិញខ្លួន។ សម្រាប់ខ្ញុំ ប៉ុន្មានឆ្នាំ ការនៅជាមួយគ្នានឹងក្លាយជាពេលវេលាដែលស្រលាញ់បំផុតក្នុងជីវិតរបស់ខ្ញុំ ខ្ញុំនឹងនឹកអ្នកជានិច្ច មិត្តសម្លាញ់របស់ខ្ញុំ។ លោកក៏បានផ្ញើសាររំលែកទុក្ខដល់គ្រួសារ Liam Payne ផងដែរ។

កាលពីថ្ងៃទី១៧ ខែតុលា ឆ្នាំ២០២៤ ប្រព័ន្ធផ្សព្វផ្សាយ និងសាធារណជនមានការភ្ញាក់ផ្អើលជាខ្លាំងចំពោះព័ត៌មានដែលតារាចម្រៀង Liam Payne អតីតសមាជិកក្រុម One Direction បានទទួលមរណភាព បន្ទាប់ពីធ្លាក់ពីលើជាន់ទី៣ កម្ពស់ពី១៣ទៅ១៤ម៉ែត្រ នៃសណ្ឋាគារមួយក្នុងប្រទេសអាហ្សង់ទីន។ការធ្លាក់នេះបណ្តាលឱ្យមានរបួសយ៉ាងធ្ងន់ធ្ងរ ដែលនាំឱ្យ Liam Payne ស្លាប់ភ្លាមៗនៅកន្លែងកើតហេតុ៕

Rosé ជាសមាជិកទី៣ក្នុងក្រុម BLACKPINK ដែលបានទម្លាក់បទចម្រៀងរបស់ខ្លួនបន្ទាប់ពី Lisa និង Jennie ក្រោយពីមិនបន្តកុងត្រាទោល។ បទថ្មីរបស់ Rosé គឺមានការសហការជាមួយតារាចម្រៀងល្បី Bruno Mars ម្ចាស់បទ «The Lazy Song» ខណៈការសហការគ្នាលើកដំបូងអ្នកគាំទ្រគឺមានការចាប់អារម្មណ៍ត្រង់ប្លង់ Rosé ហក់ទៅថើប Bruno Mars ជាងគេ។

នៅថ្ងៃទី ១៨ ខែតុលា Bruno Mars និង Rosé សមាជិកក្រុម BLACKPINK បានទម្លាក់ការសហការគ្នាជាផ្លូវការដែលមានចំណងជើងថា “APT”។ មុនការចេញផ្សាយអ្នកទាំងពីរធ្វើឱ្យមានការភ្ញាក់ដោយ Bruno Mars លើកឡើងអំពី Rosé ចង់ថើបបានធ្វើឱ្យកក្រើកបណ្តាញសង្គមទូទាំងពិភពលោក។ APT” (គឺជាពាក្យសម្រាប់ Apartment) ត្រូវបានសហនិពន្ធដោយ Bruno Mars និង Rosé។ បទនេះត្រូវបានគេរំពឹងថានឹងជាចម្រៀងទោលដែលមិនមានបង្ហាញក្នុងអាល់ប៊ុមណាមួយដោយតារាចម្រៀងទាំងពីរនាក់ឡើយ។
MV បទ “APT” ដែលថតក្នុងស្ទូឌីយ៉ូដ៏សាមញ្ញ បង្ហាញពីការថតភាពយន្តបែបសិល្បៈ បំពេញតាមស្តង់ដារសោភ័ណភាពទាំងអស់។ ភាពរស់រវើកបែបរ៉ុកដែលធ្លាប់ស្គាល់ រួមបញ្ចូលគ្នាយ៉ាងល្អឥតខ្ចោះជាមួយនឹងស្ទីលតន្ត្រីរបស់ Rosé និង Bruno Mars ប៉ុន្តែ APT បង្ហាញពីភាពស្រស់ស្រាយ ដែលខុសប្លែកពីបទចម្រៀងមុនៗរបស់ Rosé។

វីដេអូចម្រៀងសម្រាប់បទ “APT” ដូចនឹងបទ “kiss” Bruno Mars ដែលបានលើកឡើង គឺជាយុទ្ធសាស្ត្រទីផ្សារដ៏ឆ្លាតវៃសម្រាប់បទចម្រៀងនេះ។ ពីការលេងហ្គេមផឹកស៊ីរបស់ជនជាតិកូរ៉េ ទៅជាគ្រាដ៏គួរឱ្យភ្ញាក់ផ្អើលដែល Rosé បានផ្តល់ស្នាមថើបដ៏គួរឱ្យស្រលាញ់ទៅកាន់ Bruno Mars ។
ផ្ទុយពីបទចម្រៀងដែលធ្វើឱ្យខូចចិត្តដែលមនុស្សជាច្រើនបានរំពឹងទុក “APT” គឺជាបទចម្រៀងប៉ុបរ៉ុកដ៏រស់រវើក ដែលចាប់យកភាពស៊ីសង្វាក់គ្នារវាង Bruno Mars និង Rosé។

ការសហការនេះបង្ហាញពីផ្នែកផ្សេងគ្នារបស់ Rosé ដែលអ្នកគាំទ្រកម្របានឃើញ បន្ទាប់ពីបទ «On The Ground» និង បទ«Gone» ដែលបង្ហាញពីការខូចចិត្ត។ បទថ្មីនេះរៀបរាប់ពីរឿងស្នេហាដ៏គួរឱ្យស្រលាញ់របស់គូស្នេហ៍មួយគូ ជាមួយនឹងរាល់ការកត់សម្គាល់ និងការបញ្ចេញសំឡេងដែលទាក់ចិត្តទស្សនិកជន។ មនុស្សជាច្រើនកំពុងហៅការសហការគ្នាដែលមិននឹកស្មានដល់នេះ រវាង Bruno Mars និង Rosé ថាជាគូប្រជែងដ៏ធ្ងន់ធ្ងរសម្រាប់ “Die With A Smile” ដែលជាការច្រៀងរួមគ្នារវាង Bruno Mars និង Lady Gaga ៕

ប្រទេសចិន ៖ កាលពីប៉ុន្មានខែមុនក្នុងឆ្នាំ២០២៤ Robot Era គឺជាក្រុមហ៊ុនផលិតមនុស្សយន្តនៅប្រទេសចិន បានធ្វើឱ្យអ្នកលេងបណ្តាញសង្គមកោតសរសើរគ្រប់ៗគ្នា ក្រោយពីក្រុមហ៊ុននេះបញ្ជូនមនុស្សយន្ត Humanoid ប្រភេទ XBot-L ដែលមានលក្ខណៈស្រដៀងនឹងមនុស្ស ទៅដើរលើមហាកំផែងជាលើកដំបូង ។ នាពេលថ្មីៗនេះ មហាជនបានសរសើរក្រុមហ៊ុនម្តងទៀត ក្រោយពីសាកល្បងមនុស្សយន្តរត់លើវាលខ្សាច់ ។

កាលពីថ្ងៃទី១៧ ខែតុលា កន្លងមក សារព័ត៌មានបរទេសរាយការណ៍ថា ក្រុមហ៊ុនចិន Robot Era បានយកមនុស្សយន្តពាក់ស្បែកជើងឃ្លុបទៅរត់លើវាលខ្សាច់ ដើម្បីបង្ហាញពីសមត្ថភាពការធ្វើចលនានៅក្រោមអាកាសធាតុពុំអំណោយផល ។ ក្រុមហ៊ុននិយាយថា មនុស្សយន្តនេះអាចធ្វើចលនាឆាប់រហ័សជាងមុន ហើយវាមានកម្ពស់១.៧១ម៉ែត្រ, ទម្ងន់៦៥គីឡូក្រាម និងអាចរត់ក្នុងចម្ងាយ៣.៦ម៉ែត្រក្នុង១វិនាទី ។

នៅផ្នែកខាងក្នុងរបស់មនុស្សយន្តបានបំពាក់បច្ចេកវិទ្យា AI ដើម្បីជួយឱ្យមនុស្សយន្តស្គាល់ពីបរិស្ថាននៅជុំវិញខ្លួន ។ ក្រៅពីនេះ វាអាចត្រួតពិនិត្យសណ្ឋានដីផ្សេងៗគ្នា ក៏ដូចជាអាចឈ្វេងយល់ និងសម្រេចចិត្ត ។ វាក៏អាចធ្វើការជាមួយបច្ចេកវិទ្យាសិប្បនិម្មិតទូទៅ ឬ AGI និងចងចាំពីផ្ទៃដីដ៏ស្មុគស្មាញផងដែរ ដើម្បីផ្លាស់ប្តូរការដើររបស់វាដោយស្វ័យប្រវត្តិ ។

ក្រុមហ៊ុន Robot Era បញ្ជាក់ថា មនុស្សយន្តអាចរៀនសូត្រពីជំនាញថ្មីៗពាក់ព័ន្ធនឹងការបម្លាស់ទីយ៉ាងឆាប់រហ័ស និងសម្របខ្លួនក្នុងស្ថានការណ៍ផ្សេងៗ ។ មនុស្សយន្តនេះមានសមត្ថភាពពិសេស ៣យ៉ាង រួមមាន ៖ រត់, ដើរ និងលោត នៅពេលវាដើរនៅទីកន្លែងផ្សេងៗគ្នា ។ គោលដៅរបស់ក្រុមហ៊ុន Robot Era គឺចង់ផលិតមនុស្សយន្តឱ្យមានលក្ខណៈស្រដៀងមនុស្សខ្លាំងបំផុត ដើម្បីប្រើប្រាស់ក្នុងការងារផ្សេងៗ ដូចជា ៖ ការស្រាវជ្រាវ, ការដឹកជញ្ជូនទំនិញក្នុងក្រុមហ៊ុន និងប្រើប្រាស់ក្នុងផ្នែកសិល្បៈ នាថ្ងៃអនាគត ។

គួរបញ្ជាក់ថា ក្រុមហ៊ុនចិនជាច្រើនបានផលិតមនុស្សយន្តអាចធ្វើចលនាកាន់តែឆាប់រហ័សជាងមុន និងយកមកប្រើប្រាស់ក្នុងការងារឧស្សាហកម្មយ៉ាងច្រើន ទើបធ្វើឱ្យមនុស្សយន្តចិនទទួលបានការចាប់អារម្មណ៍យ៉ាងខ្លាំងនៅលើពិភពលោក ។ មនុស្សយន្តចិននីមួយៗសុទ្ធតែបំពាក់បច្ចេកវិទ្យា AI និងប្រព័ន្ធឧបករណ៍ចាប់សញ្ញាទំនើប ដែលជួយឱ្យមនុស្សយន្តអាចធ្វើការក្នុងស្ថានការណ៍ផ្សេងគ្នាយ៉ាងមានប្រសិទ្ធភាព ។

ក្រុមហ៊ុនចិនបានផលិតមនុស្សយន្តអាចធ្វើការជាមួយមនុស្សយ៉ាងឆាប់រហ័ស ដូចជា ៖ ការងារផ្ទះ, ឱ្យចំណីឆ្មា, ឆុងទឹកតែ និងបោសសម្អាតផ្ទះ ជាដើម ។ ក្រៅពីនេះ គេក៏អាចប្រើប្រាស់មនុស្សយន្តសម្រាប់ផ្តល់ជំនួយផ្នែកពេទ្យ, ជំនួយបន្ទាន់ និងធ្វើការនៅកន្លែងគ្រោះថ្នាក់ដែលមនុស្សពិបាកធ្វើ ៕

ប្រទេសបារាំង៖ ទឹកជំនន់ដ៏ធំមួយបានវាយប្រហារប្រទេសបារាំង បន្ទាប់ពីមានភ្លៀងធ្លាក់ខ្លាំងឥតឈប់ឈររយៈពេល ៤៨ ម៉ោង ដោយបង្ខំឱ្យមានការជម្លៀសប្រជាជនចេញពីតំបន់មួយចំនួននៅភាគនិរតីភ្លាមៗ។
កាលពីថ្ងៃទី១៧ ខែតុលា ឆ្នាំ២០២៤ តំបន់ជាច្រើននៅភាគនិរតីនៃប្រទេសបារាំងត្រូវបានជន់លិច បន្ទាប់ពីភ្លៀងធ្លាក់ខ្លាំងរយៈពេល ៤៨ ម៉ោងជាប់គ្នា បណ្តាលឱ្យទឹកទន្លេបានហក់ឡើងយ៉ាងខ្ពស់ និងបង្កឱ្យមានការរអិលបាក់ដីនៅក្នុងតំបន់មួយចំនួនយ៉ាងធ្ងន់ធ្ងរ ក៏ដូចជាបង្ខំឱ្យអ្នកស្រុកត្រូវភៀសខ្លួនចេញជាបន្ទាន់ផងដែរ។

បច្ចុប្បន្នទីភ្នាក់ងារឧតុនិយមបារាំង បានចេញការព្រមានពណ៌ក្រហម នៅក្នុងនាយកដ្ឋានចំនួនប្រាំ អំពីភ្លៀងធ្លាក់ខ្លាំង ដោយពួកគេបានបិទផ្លូវ ជម្លៀសប្រជាជនចេញពីសង្កាត់ និងបានស្នើឱ្យអ្នកស្រុកជៀសវាងការថតរូប និងវីដេអូនៅក្នុងបរិយាកាសគ្រោះថ្នាក់នេះ។ យោងតាម Reuters ទោះបីជាមានភ្លៀងធ្លាក់ខ្លាំងក៏ដោយ ប៉ុន្តែមកដល់ពេលនេះមិនទាន់មានរបាយការណ៍ណាមួយរាយការណ៍ពីអ្នកស្លាប់ ឬរងរបួសនៅឡើយទេ ហើយគេក៏មិនទាន់ដឹងច្បាស់ថា កម្រិតនៃការខូចខាតដោយសារជំនន់ទឹកភ្លៀងនេះមានកម្រិតណានោះដែរ។

គួរបញ្ជាក់ដែរថា ទឹកជំនន់នៅភាគខាងត្បូងនៃប្រទេសបារាំងគឺបានកើតឡើងមួយសប្តាហ៍មកហើយ បន្ទាប់ពីសំណល់នៃព្យុះសង្ឃរា Kirk បានបោកបក់ពាសពេញអឺរ៉ុបខាងលិច និងជិតមួយខែបន្ទាប់ពីទីក្រុង Cannes បានវាយប្រហារដោយទឹកជំនន់ភ្លាមៗ។ ដូច្នេះរដ្ឋាភិបាលបារាំង បានដាស់តឿនប្រជាជនដែលនៅតំបន់រងគ្រោះភាគនិរតី ឱ្យមានការប្រុងប្រយ័ត្នខ្ពស់បំផុត ក៏ដូចជាជៀសវាងការធ្វើដំណើរនៅក្នុងតំបន់មួយចំនួន បន្ទាប់ពីការកើនឡើងនៃកម្ពស់ទឹកបានជន់លិចផ្នែកនៃផ្លូវហាយវេនៅជិតទីក្រុងសំខាន់ៗ៕