នេះជាប្រទេសតែមួយគត់ក្នុងលោកដែលគ្មានប្រជាជនក្រីក្រទាល់តែសោះ ពោលប្រជាជននៅទីនេះ ៩៩% សុទ្ធតែជាអ្នកមាន រហូតដល់ថ្នាក់បាចលុយតាមផ្លូវទៀតផង ដែលប្រទេសនោះគឺជាប្រទេសកាតា។ ប្រជាជនកាតាធ្វើការត្រឹមតែ ៣ ម៉ោងប៉ុណ្ណោះក្នុងមួយថ្ងៃ ហើយពួកគេធ្វើការគ្រាន់តែជាការកម្សាន្ត ទោះបីជាពេលខ្លះប្រជាជនក្នុងប្រទេសនេះគ្មានការងារធ្វើក៏ដោយ ក៏ប្រជាជនគ្រប់រូបនៅតែមានប្រាក់ឧបត្ថម្ភពីរដ្ឋាភិបាលរហូតដល់ ២ ពាន់ដុល្លារអាមេរិកជារៀងរាល់ខែ។

ប្រទេសកាតាមានផ្ទៃដីត្រឹមតែ ១១,៥៨១ ម៉ែត្រការ៉េជាមួយប្រជាជនជាង ២,៧ លាននាក់ គឺជាប្រទេសមួយស្ថិតនៅតំបន់អាស៊ីខាងលិច មានព្រំដែនគោកតែមួយគត់ជាប់ជាមួយប្រទេសអារ៉ាប៊ីសាអ៊ូឌីតនៅភាគខាងត្បូង ចំណែកឯទឹកដីទាំងប៉ុន្មានរបស់វាត្រូវបានហ៊ុព័ទ្ធដោយឈូងសមុទ្រពែក្ស។ ដោយសារប្រជាជនតិច បូករួមនឹងអំណោយផលប្រេងពីធម្មជាតិ និងធនធានដ៏សម្បូរបែប ទើបប្រជាជននៅទីនេះភាគច្រើនសុទ្ធតែជាអ្នកមាន និងជាបុគ្គលល្បីល្បាញ។

ពលរដ្ឋនៅទីនេះមានលុយច្រើនៗណាស់ រហូតដល់ពេលខ្លះពួកគេបាចលុយតាមផ្លូវទៀតផង។ ប្រាកខែជាមធ្យមសម្រាប់មនុស្សម្នាក់គឺ ៧ រយពាន់ដុល្លារអាមេរិកក្នុងមួយឆ្នាំ ហើយតាំងពីកើតមករហូតដល់ចាស់ ពួកគេមិនចាំបាច់ចំណាយលុយលើវិស័យអប់រំ ការថែទាំសុខភាព និងការចូលនិវត្តន៍នោះទេ ដោយសាររដ្ឋាភិបាលបានយកចិត្តទុកលើប្រជាជនទាំងអស់គ្រប់វិស័យតែម្តង។

កាតាត្រូវបានអង្គការសហប្រជាជាតិចាត់ចំណាត់ថ្នាក់ជាប្រទេសដែលមានការអភិវឌ្ឍន៍មនុស្សខ្ពស់បំផុតទីបីនៅក្នុងពិភពអារ៉ាប់។ វាជាប្រទេសសេដ្ឋកិច្ចប្រាក់ចំណូលខ្ពស់ ដោយមានឧស្ម័នធម្មជាតិបម្រុង និងប្រេងបម្រុងធំជាងគេទីបីនៅលើពិភពលោក។ ក្រៅពីភាពសម្បូរសប្បាយចាយលុយមិនអស់ ប្រទេសនេះក៏មានប្រជាជនអាយុវែងៗជាងគេផងដែរ។ បើនិយាយពីទេសភាពក្នុងប្រទេសកាតាវិញ ក៏មិនធម្មតាដែរ ប្រទេសនេះមានទេសភាពស្រស់ស្អាតខ្លាំងណាស់មិនចាញ់បណ្តាប្រទេសនានានៅលើពិភពលោកនោះទេ។

គួរបញ្ជាក់ដែរថា បច្ចុប្បន្នប្រទេសកាតាត្រូវបានគ្រប់គ្រងដោយព្រះអង្គម្ចាស់ Sheikh Tamim bin Hamad al-Thani ដោយព្រះអង្គម្ចាស់ទទួលបានការអប់រំពីចក្រភពអង់គ្លេស។ ព្រះអង្គបានទៅសិក្សានៅសាលា Sherborne, Dorset និង Sandhurst ដែលសុទ្ធសឹងតែជាសាលាយោធារបស់អង់គ្លេស។ ព្រះអង្គម្ចាស់ Sheikh Tamim បានយកការធ្វើពិពិធកម្មសេដ្ឋកិច្ច និងការវិនិយោគលើហេដ្ឋារចនាសម្ព័ន្ធជាតិ ជាទិសដៅអាទិភាពមួយ។ ព្រះអង្គបានលើកកម្ពស់វិស័យកីឡា ដែលជាផ្នែកមួយនៃការប្រកួតប្រជែងរបស់កាតា ក្នុងការលើកកម្ពស់មុខមាត់ប្រទេសនៅលើឆាកអន្តរជាតិ៕

ប្រទេសអូស្ត្រាលី ៖ អូស្ត្រាលីបានស្នើឱ្យពលរដ្ឋទាំងអស់មិនស្ថិតនៅក្រោមកំដៅថ្ងៃ និងមិនចេញពីផ្ទះបើគ្មានការងារចាំបាច់ ដើម្បីចៀសវាងជំងឺដាច់សរសៃឈាមខួរក្បាល ក្រោយពីតំបន់ជាច្រើនរបស់អូស្ត្រាលីគ្របដណ្តប់ដោយអាកាសធាតុក្តៅខ្លាំង និងសីតុណ្ហភាពកើនឡើងខ្ពស់ ។

កាលពីថ្ងៃទី១២ ខែធ្នូ ឆ្នាំ២០២៤ ការិយាល័យឧតុនិយមអូស្ត្រាលីបានប្រកាសអាសន្នពីអាកាសធាតុក្តៅខ្លាំងគ្របដណ្តប់តំបន់ជាច្រើន ដែលធ្វើឱ្យសីតុណ្ហភាពកើនឡើងខ្ពស់ ជាពិសេស តំបន់ភាគខាងកើត និងភាគខាងលិចប្រទេស ។ ហេតុនេះ សូមពលរដ្ឋគ្រប់រូបនៅតែក្នុងផ្ទះ ដើម្បីចៀសវាងជំងឺដាច់សរសៃឈាមខួរក្បាល ។

អាជ្ញាធរអូស្ត្រាលីឱ្យដឹងថា នៅភាគកណ្តាល និងខាងកើតតំបន់ Queensland មានអាកាសធាតុក្តៅជាងតំបន់ផ្សេង ហើយអាជ្ញាធរបានណែនាំពលរដ្ឋផឹកទឹកឱ្យគ្រប់គ្រាន់, ស្ថិតនៅអគារមានម៉ាស៊ីនត្រជាក់ និងចៀសវាងស្ថិតក្រោមកំដៅថ្ងៃ ។ អាកាសធាតុក្តៅខ្លាំងអាចបង្កគ្រោះថ្នាក់ដល់មនុស្សជាច្រើន ជាពិសេស មនុស្សចាស់ ទារក កុមារ ស្ត្រីមានផ្ទៃពោះ ស្ត្រីផ្តល់ទឹកដោះឱ្យកូន និងអ្នកជំងឺ ។

គួរបញ្ជាក់ថា ប្រទេសអូស្ត្រាលីបានប្រឈមនឹងអាកាសធាតុក្តៅខ្លាំងជាច្រើនលើកនាពេលកន្លងមក ដែលពេលខ្លះ សីតុណ្ហភាពបានកើនឡើងរហូតដល់ជាង៤០អង្សារសេ ។

អ្នកជំនាញមកពីក្រុមហ៊ុនស្រាវជ្រាវ Risk Frontiers និយាយថា រលកកំដៅ គឺជាគ្រោះធម្មជាតិដ៏គ្រោះថ្នាក់បំផុតក្នុងរដូវក្តៅរបស់អូស្ត្រាលី ដោយសារយើងពុំអាចមើលឃើញដោយភ្នែកទទេដូចភ្លើងឆេះព្រៃ ដែលធ្វើឱ្យមនុស្សភាគច្រើនគិតថា អាកាសធាតុក្តៅគ្មានផលប៉ះពាល់ ។ ពេលភ្លើងឆេះព្រៃនៅទីក្រុង Melbourne កាលពីឆ្នាំ២០០៩ មនុស្សបានស្លាប់យ៉ាងច្រើនដោយសាររលកកំដៅនៅជុំវិញ ។

រីឯភ្នាក់ងារវិទ្យាសាស្ត្រ និងអាកាសធាតុបញ្ជាក់ថា អូស្ត្រាលីមានសីតុណ្ហភាពកើនឡើងជាមធ្យម ស្មើនឹង១.៤អង្សារសេ គិតចាប់ពីអូស្ត្រាលីបានកត់ត្រាកាលពីឆ្នាំ១៩១០ ។ អាកាសធាតុក្តៅខ្លាំងមិនត្រឹមតែបណ្តាលឱ្យភ្លើងឆេះព្រៃប៉ុណ្ណោះទេ ប៉ុន្តែវានឹងប៉ះពាល់សុខភាពពលរដ្ឋផងដែរ ៕

ប្រទេសជប៉ុន ហុងកុង ថៃ និងអ៊ីតាលីបានបង្កើនការគ្រប់គ្រងនៅអាកាសយានដ្ឋាន និងប្រកាសឱ្យប្រជាជនការពារខ្លួន ឬផ្អាកការធ្វើដំណើរជាបណ្តោះអាសន្នទៅកាន់ប្រទេសកុហ្គោ ដោយសារប្រទេសនេះកំពុងផ្ទុះជំងឺអាថ៌កំបាំងមួយ។

យោងតាមសារព័ត៌មានបរទេសចុះផ្សាយថា ក្នុងរយៈពេលប៉ុន្មានថ្ងៃកន្លងមកនេះ ប្រទេសកុហ្គោបានផ្ទុះជំងឺអាថ៌កំបាំងមួយដែលបណ្តាលឱ្យមនុស្ស ១៤៣ នាក់ស្លា.ប់ដោយគ្មានមូលហេតុពិតប្រាកដ ដោយសារជំងឺនេះមានរោគសញ្ញាដូចជាគ្រុនក្តៅផង ផ្តាសាយផង និងឈឺក្បាលធ្ងន់ធ្ងរ ធ្វើឱ្យគ្រូពេទ្យមិនអាចពិនិត្យដឹងថា ជាជំងឺអ្វីពិតប្រាកដនោះទេ។

ទោះជាយ៉ាងណាបើយោងតាមលទ្ធផលនៃការធ្វើតេស្តដំបូងពីការស៊ើបអង្កេតរបស់ WHO ក្នុងចំណោមគំរូអ្នកជំងឺ ១២ នាក់ ១០ នាក់មានភាពវិជ្ជមានសម្រាប់ជំងឺគ្រុនចាញ់។ លោកវេជ្ជបណ្ឌិត Abdi Mahamud នាយកបណ្ដោះអាសន្ននៃការជូនដំណឹង និងការឆ្លើយតបរបស់អង្គការសុខភាពពិភពលោក បាននិយាយថា ជំងឺគ្រុនចាញ់គឺជាជំងឺរាតត្បាតនៅក្នុងតំបន់ ហើយរដូវវស្សាបណ្តាលឱ្យមានការកើនឡើងខ្លាំងនៃជំងឺផ្លូវដង្ហើម។

ដូច្នេះហើយបណ្តាប្រទេសផ្សេងៗក៏បានបង្កើនការប្រុងប្រយ័ត្នរបស់ពួកគេ ក៏ដូចជាបង្កើនការគ្រប់គ្រងនៅអាកាសយានដ្ឋាន និងប្រកាសឱ្យប្រជាជនការពារខ្លួនអំពីការរីករាលដាលជំងឺដ៏អាថ៌កំបាំងដែលកំពុងផ្ទុះឡើងនៅក្នុងប្រទេសកុងហ្គោ។ ថ្មីៗនេះ មន្ត្រី ហុងកុង បានចេញបទប្បញ្ញត្តិពិនិត្យសុខភាពសម្រាប់អ្នកដំណើរ និងនាវិកនៃជើងហោះហើរទាំងអស់ដែលមកដល់ពីមជ្ឈមណ្ឌលអាហ្វ្រិក ដើម្បីដោះស្រាយជាមួយនឹងជំងឺរាតត្បាតដែលមិនស្គាល់។

យោងតាមមជ្ឈមណ្ឌលការពារសុខភាពហុងកុង (CHP) អ្នកដំណើរទាំងអស់ដែលចូលប្រទេស ត្រូវតែត្រួតពិនិត្យសីតុណ្ហភាពរាងកាយរបស់ពួកគេជាមុនសិន។ បន្ទាប់មកបុគ្គលិកពេទ្យនឹងវាយតម្លៃសុខភាពអ្នកដែលមានរោគសញ្ញា ហើយបញ្ជូនករណីសង្ស័យទៅមន្ទីរពេទ្យ។ ទន្ទឹមនឹងនេះក្រសួងសុខាភិបាលថៃ ក៏បានណែនាំឱ្យមានការប្រុងប្រយ័ត្នចំពោះការផ្ទុះឡើងជំងឺនេះផងដែរ។

លោក Opas Kankawinpong លេខាធិការអចិន្ត្រៃយ៍នៃក្រសួងបាននិយាយថា អាជ្ញាធរសុខាភិបាលទាំងអស់តម្រូវឱ្យតាមដានយ៉ាងដិតដល់នូវចលនារបស់មនុស្ស និងព័ត៌មានថ្មីៗអំពីជំងឺនេះ ទោះបីជាប្រទេសថៃត្រូវបានចាត់ទុកថាជាប្រទេសដែលមានហានិភ័យទាបក៏ដោយ។ រីឯប្រទេសអ៊ីតាលី ក្រុមមន្ត្រីបានសម្រេចចិត្តបង្កើនការត្រួតពិនិត្យនៅព្រលានយន្តហោះសម្រាប់អ្នកដំណើរដែលមកពីសាធារណរដ្ឋប្រជាធិបតេយ្យកុងហ្គោ។ ចំណែកឯប្រទេសជប៉ុនវិញក្រសួងការបរទេសក៏បានណែនាំប្រជាជនកុំឱ្យធ្វើដំណើរទៅកាន់តំបន់ដែលរងផលប៉ះពាល់ដោយជំងឺរាតត្បាតប្រសិនបើមិនចាំបាច់៕

ប្រទេសជប៉ុន ៖ បច្ចុប្បន្ន ពលរដ្ឋជប៉ុននៅតំបន់ជនបទបានបោះបង់ផ្ទះចោល រហូតដល់ជាង៨លានខ្នង ហើយផ្ទះទាំងនេះភាគច្រើនមានសភាពចាស់ ដែលភាសាជប៉ុនហៅថា «Akiya» ។ វាជាក្តីសុបិនរបស់មនុស្សជាច្រើនដែលចង់ទិញផ្ទះជប៉ុនក្នុងតម្លៃសមរម្យ ប៉ុន្តែវាមានបញ្ហាជាច្រើនសម្រាប់អ្នកទិញ ។

អ្នកស្រី អេលឈិលី សឹរុអូកាក់ អ្នកជំនាញបានសរសេរអត្ថបទមួយក្នុង gaijinpot blog ដើម្បីដាស់តឿនជន​បរទេស​ មុននឹងសម្រេចចិត្តទិញផ្ទះជប៉ុនតម្លៃថោក ដូច​ខាងក្រោម ៖

*ផ្ទះបោះបង់ចោល មិនមែនមានតែនៅជនបទ ៖ មនុស្សភាគច្រើនគិតថា ផ្ទះបោះបង់ចោល (ឬ Akiya) នឹងស្ថិតនៅតំបន់ជនបទស្ងប់ស្ងាត់ និងមានទេសភាពវាលស្រែ ឬព្រៃភ្នំ ។ ប៉ុន្តែផ្ទះប្រភេទនេះមិនមែនសម្បូរតែនៅជនបទទេ គឺនៅទីក្រុង ឬជាយក្រុង ក៏មានផ្ទះនេះដែរ ដូចជា ៖ ទីក្រុងតូក្យូ, អូសាកា និងទីក្រុងធំៗ ។ ចំនួនផ្ទះ Akiya បានកើនឡើងជាបន្តបន្ទាប់ និងក្លាយជាជម្រើសមួយសម្រាប់អ្នកចង់ទិញផ្ទះតម្លៃសមរម្យក្នុងទីក្រុង ។

*ការជួសជុលផ្ទះមានតម្លៃថ្លៃហួសពីការគិត ៖ ផ្ទះត្រូវគេបោះបង់ចោលភាគច្រើននៅជប៉ុនមានសភាពចាស់ទ្រុឌទ្រោម ឬមានអាយុរាប់រយឆ្នាំ ហើយការជួសជុលផ្ទះ Akiya គឺអាស្រ័យលើអាយុ និងសភាពផ្ទះ ។ ការជួសជុលផ្ទះនឹងមានតម្លៃខ្ពស់ ដូចជា ៖ ធ្វើបន្ទប់ទឹកថ្មី ឬការកែលម្អបរិវេណផ្ទះ ។

*Akiya មិនមែនជាផ្ទះទទេ ឬគ្មានសម្ភារៈ ៖ ផ្ទះ Akiya ពុំទទួលបានការថែទាំ ឬបោសសម្អាតឡើយ ហើយអ្នកទិញត្រូវជួលភ្នាក់ងារសម្អាតក្នុងតម្លៃខ្ពស់ ជាពិសេស ការជួលភ្នាក់ងារកម្ទេចសម្ភារៈធំៗក្នុងផ្ទះ, ដឹកសំរាម និងបោសសម្អាតផ្ទះ ។ ហេតុនេះ លោកអ្នកនឹងចំណាយប្រាក់យ៉ាងច្រើនលើថ្លៃសម្អាតផ្ទះចាស់ ។

*ការបង់ពន្ធ និងសេវាផ្សេងៗចំណាយប្រាក់ច្រើន ៖ បើទោះជាផ្ទះចាស់នៅជប៉ុនមានតម្លៃថោក ប៉ុន្តែបើរួមបញ្ចូលទាំងការបង់ពន្ធផ្សេងៗឃើញថា ត្រូវចំណាយប្រាក់ច្រើនណាស់ ដូចជា ៖ ថ្លៃឈ្មួញកណ្តាល, ថ្លៃផ្ទេរកម្មសិទ្ធិ និងបង់ពន្ធដី ។

បញ្ហាទាំងអស់នេះតែងតែធ្វើឱ្យជនបរទេសឈឺក្បាលពេលចង់ក្លាយជាម្ចាស់ផ្ទះចាស់នៅជប៉ុន ហើយនេះពុំបានគិតពីគ្រោះធម្មជាតិរញ្ជួយដីជាញឹកញាប់ទេ ។ ផ្ទះខ្លះលក់តម្លៃថោក គឺពុំទាន់គិតទាំងតម្លៃដី ខណៈផ្ទះខ្លះទៀតពិបាកធ្វើដំណើរតាមមធ្យោបាយសាធារណៈ និងខ្វះខាតសេវាកម្មផ្សេងៗ ។

*អ្នកណាក៏អាចទិញផ្ទះចាស់ជប៉ុនបានដែរ ប៉ុន្តែគ្មានសិទ្ធិរស់នៅរយៈពេលយូរ ៖ ច្បាប់ជប៉ុនអនុញ្ញាតឱ្យជនបរទេសអាចទិញផ្ទះបាន ប៉ុន្តែការក្លាយជាម្ចាស់អចលនទ្រព្យរស់នៅរយៈពេលយូរអាចជាបញ្ហាសម្រាប់ជនបរទេស ។ អាជ្ញាធរមូលដ្ឋាននឹងកំណត់ឱ្យផ្ទះថ្មីនៅជនបទចូលរួមចំណែកក្នុងកម្មវិធីនានារបស់សហគមន៍ និងគាំទ្រការអភិវឌ្ឍសេដ្ឋកិច្ចជនបទ ។

ចុងក្រោយ អ្នកស្រី អេលឈិលី សឹរុអូកាក់ (Ashley Tsuruoka) ដាស់តឿនថា ម្ចាស់ផ្ទះថ្មីត្រូវត្រៀមប្រាក់សម្រាប់ជួសជុលផ្ទះ បន្ទាប់ពីខូចខាតដោយសារគ្រោះធម្មជាតិដែលគ្មានអ្នកណាដឹងមុន ក្រោយពីពួកគេបានចំណាយប្រាក់យ៉ាងច្រើនជួសជុលផ្ទះចាស់ ៕