ប្រទេសម៉ាឡេស៊ី ៖ កាលពីថ្ងៃទី២៨ ខែវិច្ឆិកា ឆ្នាំ២០២៤ សារព័ត៌មាន Reuters រាយការណ៍ថា ពលរដ្ឋជាង៣៧,០០០នាក់ រស់នៅខេត្តចំនួន៦ របស់ប្រទេសម៉ាឡេស៊ី បានរងផលប៉ះពាល់ដោយសារទឹកជំនន់ធ្ងន់ធ្ងរ ។ វាបណ្តាលមកពីភ្លៀងធ្លាក់ខ្លាំងជាប់ៗគ្នាជាច្រើនថ្ងៃនាចុងខែវិច្ឆិកានេះ ក្នុងនោះខេត្តកាឡាន់តាន់ ស្ថិតនៅជាប់ប្រទេសថៃ លិចខ្លាំងជាងគេ ។

នាយករដ្ឋមន្ត្រីម៉ាឡេស៊ី លោក Anwar Ibrahim បានថ្លែងនៅថ្ងៃទី២៨ ខែវិច្ឆិកា ថា អាជ្ញាធរបានធ្វើជម្រកស្នាក់នៅបណ្តោះអាសន្នក្នុងខេត្តទាំង៦ រួមមាន ៖ ខេត្តកាឡាន់តាន់, ត្រាំងកានូ, ខេដាស់, ប៉េលិស, យ៉ាក់ហូ និងប៉េរ៉ាក់ ស្មើនឹង៣២២កន្លែង សម្រាប់ឱ្យពលរដ្ឋរងផលប៉ះពាល់ស្នាក់នៅ ។ ខេត្តកាឡាន់តាន់ ស្ថិតនៅភាគឦសានម៉ាឡេស៊ី និងជាប់ប្រទេសថៃ លិចលង់ខ្លាំងជាងគេ ដែលខេត្តនេះមានពលរដ្ឋ៣០,៥៨២នាក់ មកពី៩,២២៣គ្រួសារ រងផលប៉ះពាល់ ។

ទឹកជំនន់តែងតែលិចនៅបរិវេណឆ្នេរសមុទ្រភាគខាងកើតប្រទេសម៉ាឡេស៊ីនៅរដូវវស្សា ដែលធ្វើឱ្យពលរដ្ឋរាប់ពាន់នាក់ជម្លៀសចេញពីលំនៅឋានជារៀងរាល់ឆ្នាំ ចាប់ពីខែតុលា រហូតដល់ខែមីនា ។ កាលពីថ្ងៃទី២៨ ខែវិច្ឆិកា កន្លងមក ភ្នាក់ងារជាតិគ្រប់គ្រងគ្រោះមហន្តរាយបានបង្ហោះរូបភាពក្នុងហ្វេសប៊ុកផេក ដែលបង្ហាញពីអាជ្ញាធរកំពុងជួយជម្លៀសពលរដ្ឋចេញពីតំបន់ទឹកជំនន់ក្នុងខេត្តកាឡាន់តាន់ ដោយមានទាំងទូក និងឧបករណ៍ផ្សេងៗ ។

ចំណែកភ្នាក់ងារឧតុនិយមម៉ាឡេស៊ីបានប្រកាសអាសន្នឱ្យពលរដ្ឋជ្រាបពីភ្លៀងធ្លាក់ខ្លាំងជាបន្តបន្ទាប់ដែលអាចបង្កគ្រោះថ្នាក់ផ្សេងៗ ជាពិសេស ពលរដ្ឋរស់នៅខេត្តកាឡាន់តាន់, ប៉ាហាំង និងត្រាំងកានូ ។ ដូចគ្នានេះ ភ្នាក់ងារជាតិគ្រប់គ្រងគ្រោះមហន្តរាយបានទទួលបញ្ជាឱ្យត្រៀមកម្លាំងដើម្បីផ្តល់សុវត្ថិភាពដល់ពលរដ្ឋទាំងអស់ ។

ខេត្តត្រាំងកានូ បានបិទផ្លូវចំនួន៣២ខ្សែ មិនឱ្យពលរដ្ឋធ្វើដំណើរតាមយានជំនិះគ្រប់ប្រភេទ ដោយសារស្ថានការណ៍ទឹកជំនន់កាន់តែធ្ងន់ធ្ងរ ។ រីឯតូបលក់ម្ហូបអាហារបណ្តែតទឹក បានរសាត់តាមទឹកជំនន់អស់ ម្ចាស់តូបនិយាយថា ទឹកជំនន់លើកនេះបំផ្លាញសម្ភារៈលក់ដូរ, តុកៅអី និងស្បៀងអស់មួយចំនួនធំ ៕

ផ្កាឈូករ័ត្នមានរាងមូល ពណ៌លឿងស្រដៀងនឹងកាំរស្មីនៃពន្លឺព្រះអាទិត្យ ត្រូវបានគេស្គាល់ថា ជាផ្កាដែលមានសារៈសំខាន់ខាងវប្បធម៌ និងស្មារតីចំពោះមនុស្សជុំវិញពិភពលោក។ ជាមួយនឹងសម្រស់ដ៏ស្រស់ត្រកាល ផ្កានេះមានអត្ថន័យល្អជាច្រើនដូចជា តំណាងឱ្យសុភមង្គល, សុទិដ្ឋិនិយម, ភាពស្មោះត្រង់, សន្តិភាព និងអាយុយឺនយូរ។ ក្រៅពីភាពស្រស់ស្អាត និងអត្ថន័យល្អ ផ្កាឈូករ័ត្នក៏មានអត្ថប្រយោជន៍ច្រើនផងដែរ។

ផ្កាឈូករ័ត្នមានគុណសម្បត្តិគ្រប់ផ្នែកទាំងអស់ទាំងឬស ដើម ស្លឹក ផ្កា និងគ្រាប់។ ជាទូទៅស្លឹករបស់វាត្រូវបានគេប្រើជាថ្នាំព្យាបាលអាការៈផ្សេងៗដូចជា៖ ឈឺពោះ បន្ធូការចុកណែនទ្រូង ហើម ជាំ ព្រមទាំងជាថ្នាំបញ្ចុះដ៏ល្អ ទាំងបញ្ចុះទឹកនោម បញ្ចុះមេរោគ រួមទាំងព្យាបាលអាការៈរោគទឹកនោមផ្អែម និងហឺតបានផងដែរ។ រីឯដើមរបស់វាវិញ ត្រូវបានគេយកមកធ្វើថ្នាំបញ្ចុះទឹកនោម ថ្នាំបន្ថយអាការៈក្អក រួមទាំងបុកឱ្យម៉ត់យកទៅបិទរបួស ឬដំបៅផ្សេងៗបានទៀតផង។

ចំណែកផ្ការបស់វា ប្រើជាថ្នាំសម្រាប់ព្យាបាលអាការៈឈឺក្បាល វិលមុខ ឈឺធ្មេញ ឈឺក្រពះ និងឈឺចាប់ពេលមករដូវ។ ជាមួយគ្នានេះដែរ គ្រាប់របស់ផ្កាឈូករ័ត្នក៏ត្រូវបានគេយកមកចម្រាច់ធ្វើប្រេងផង និងធ្វើជាគ្រាប់ធញ្ញជាតិផង។ គ្រាប់ផ្កាឈូករ័ត្នផ្តល់អត្ថប្រយោជន៍យ៉ាងច្រើនដល់សុខភាពរាងកាយដូចជា ជួយលើកកម្ពស់សុខភាពបេះដូង និងស្បែក ជួយជំរុញដល់ការលូតលាស់សក់ ជួយសម្រកទម្ងន់ បញ្ចុះកូឡេស្តេរ៉ូល ប្រឆាំងជំងឺមហារីក និងធ្វើឱ្យមានតុល្យភាពកម្រិតអរម៉ូន។

លើសពីនេះប្រេងផ្កាឈូករ័ត្នក៏ជួយធ្វើឱ្យប្រសើរឡើងនូវសុខភាពបេះដូង ការពារជំងឺរលាកសន្លាក់ ការពារជំងឺហឺត ក៏ដូចជាការពារជំងឺមហារីក ធ្វើឱ្យប្រសើរឡើងនូវប្រព័ន្ធភាពស៊ាំ កាត់បន្ថយការធ្លាក់ទឹកចិត្ត និងថប់បារម្ភ រួមទាំងជំនួយស្បែកឱ្យក្មេងជាងវ័យទៀតផង។ សរុបមកវិញផ្កាឈូករ័ត្នមិនត្រឹមតែស្រស់ស្អាតគួរឱ្យគយគន់ប៉ុណ្ណោះទេ វាក៏មានអត្ថប្រយោជន៍ច្រើន ដែលមនុស្សមួយចំនួនមិនដែលដឹងផងដែរ៕

ប្រទេសចិន ៖ ប្រព័ន្ធផ្សព្វផ្សាយចិនបានរាយការណ៍ កាលពីថ្ងៃទី២៦ ខែវិច្ឆិកា ឆ្នាំ២០២៤ ថា គម្រោងដំឡើងពន្ធទំនិញចិនខ្ពស់របស់មេដឹកនាំអាមេរិកថ្មី លោក Donald Trump អាចធ្វើឱ្យមហាប្រទេសអំណាចទាំងពីរឈានទៅមានសង្គ្រាមពន្ធយ៉ាងធ្ងន់ធ្ងរ ហើយប្រទេសទាំងពីរនឹងរងផលប៉ះពាល់ខ្លាំងដូចគ្នា ។

លោក Trump ដែលគ្រោងស្បថចូលកាន់តំណែងជាប្រធានាធិបតីអាមេរិកថ្មី នៅថ្ងៃទី២០ ខែមករា ឆ្នាំ២០២៥ បាននិយាយកាលពីថ្ងៃទី២៥ ខែវិច្ឆិកា កន្លងមកថា លោកនឹងដំឡើងពន្ធទំនិញចិន ១០%ទៀត រហូតដល់ទីក្រុងប៉េកាំង អនុវត្តវិធានការជាក់លាក់ក្នុងការទប់ស្កាត់ថ្នាំញៀនហ្វេនតានីល (Fentanyl) ដែលជាបញ្ហាធំនៅអាមេរិក ។

កាសែត China Daily និង Global Times បានផ្សព្វផ្សាយវិចារណកថា កាលពីថ្ងៃទី២៦ ខែវិច្ឆិកា កន្លងមក ថា សូមមេដឹកនាំអាមេរិកថ្មីកុំធ្វើឱ្យចិនក្លាយជាសត្វពពែទទួលទោសដោយសារបញ្ហាថ្នាំញៀនហ្វេនតានីល នៅអាមេរិក ឬមើលរំលងបំណងល្អរបស់ចិន ។ មេដឹកនាំអាមេរិកគំរាមដំឡើងពន្ធទំនិញចិន គឺជារឿងពុំសមហេតុផល ពីព្រោះសង្គ្រាមពន្ធ គ្មានអ្នកណាឈ្នះទេ ។ បើអាមេរិកនៅតែយកបញ្ហាសេដ្ឋកិច្ចមកលាយឡំជាមួយនយោបាយ និងយកការដំឡើងពន្ធជាអាវុធ វានឹងធ្វើឱ្យប្រទេសទាំងពីរខាតបង់ ។

សេដ្ឋវិទូជាច្រើនរូបចាប់ផ្តើមទម្លាក់ការព្យាករកំណើនសេដ្ឋកិច្ចចិន ចាប់ពីឆ្នាំ២០២៥ ដល់ឆ្នាំ២០២៦ ដោយសារពិចារណាពីការដំឡើងពន្ធរបស់លោក Trump ហើយពួកគេបានដាស់តឿនឱ្យពលរដ្ឋអាមេរិកត្រៀមខ្លួនជាមួយទំនិញឡើងថ្លៃនៅអាមេរិក ។

កាលពីថ្ងៃទី២៤ ខែវិច្ឆិកា ប្រធានសេដ្ឋវិទ្យានៅតំបន់អាស៊ី មកពីស្ថាប័ន S&P Global Ratings បញ្ជាក់ថា បច្ចុប្បន្ន យើងដឹងថា ផលប៉ះពាល់ដោយសារការដំឡើងពន្ធទំនិញនឹងកើតឡើង ។ ដូច្នេះ ស្ថាប័ន S&P បានកាត់បន្ថយការព្យាករសេដ្ឋកិច្ចចិន នៅឆ្នាំ២០២៥ និងឆ្នាំ២០២៦ គឺនឹងកើនឡើងត្រឹមតែ៤.១% និង៣.៨% ប៉ុណ្ណោះ ។

លោក Trump ធ្លាប់បានប្រកាសថា អាមេរិកនឹងដំឡើងពន្ធទំនិញចិនខ្ពស់ជាងមុន ខណៈកន្លងមក អាមេរិកយកពន្ធទំនិញចិន ចាប់ពី៧.៥% ទៅ២៥% ប៉ុណ្ណោះ ។

លោក Gao Lingyun អ្នកវិភាគសេដ្ឋកិច្ចមកពី Chinese Academy of Social Sciences នៅទីក្រុងប៉េកាំង ឱ្យដឹងថា ចិនមានវិធានការទប់ស្កាត់ការដំឡើងពន្ធទំនិញរបស់អាមេរិក ។ ការយកបញ្ហាប្រឆាំងថ្នាំញៀនមកធ្វើជាមូលហេតុដំឡើងពន្ធទំនិញចិន គឺចិនពុំអាចទទួលយកបានទេ ហើយក៏ស្តាប់មិនចូលត្រចៀកដែរ ៕

ប្រទេសឥណ្ឌូណេស៊ី ៖ កាលពីថ្ងៃទី២៧ ខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា ប្រទេសឥណ្ឌូណេស៊ីកំពុងតែពិចារណាលើសំណើវិនិយោគស្មើទឹកប្រាក់ ១០០លានដុល្លារអាមេរិករបស់ Apple Inc បន្ទាប់ពីក្រុមហ៊ុននេះព្យាយាមបញ្ចុះបញ្ចូលរដ្ឋាភិបាលឥណ្ឌូណេស៊ីឱ្យបញ្ឈប់ការហាមឃាត់ការលក់ទូរស័ព្ទ iPhone 16 ។

ក្រសួងឧស្សាហកម្មឥណ្ឌូណេស៊ីបញ្ជាក់ថា បានទទួលសំណើសុំវិនិយោគសាងសង់រោងចក្រផលិតឧបករណ៍ទូរស័ព្ទរបស់ក្រុមហ៊ុន Apple ខណៈលោក Agus Gumiwang Kartasasmita រដ្ឋមន្ត្រីក្រសួងឧស្សាហកម្ម បានហាមឃាត់ការលក់ទូរស័ព្ទ iPhone 16 កាលពីខែតុលា ឆ្នាំ២០២៤ ។ យើងនឹងរៀបចំកិច្ចប្រជុំមួយ ដើម្បីពិភាក្សាគ្នាពីសំណើសុំវិនិយោគរបស់ Apple ។

បើតាមលោក Febri Hendri Antoni Arif មន្ត្រីនាំពាក្យក្រសួងឧស្សាហកម្ម គឺការប្រជុំលើកនេះជាសញ្ញាវិជ្ជមាន ហើយរដ្ឋមន្ត្រីក្រសួងឧស្សាហកម្មឥណ្ឌូណេស៊ីនឹងស្វាគមន៍ការវិនិយោគនេះ ។

ក្រុមហ៊ុន Apple បានស្នើសុំវិនិយោគនៅឥណ្ឌូណេស៊ីបន្ថែមទៀត ស្មើទឹកប្រាក់១០០លានដុល្លារអាមេរិក ដែលទឹកប្រាក់នេះស្មើជិត១០ដង បើធៀបទឹកប្រាក់វិនិយោគកន្លងមករបស់ Apple ស្មើត្រឹមតែជិត១០លានដុល្លារអាមេរិកប៉ុណ្ណោះ ដោយសារក្រុមហ៊ុនមានបំណងឱ្យឥណ្ឌូណេស៊ីឈប់ហាមឃាត់ការលក់ទូរស័ព្ទ iPhone 16 របស់ខ្លួន ។ នេះបើតាមសេចក្តីរាយការណ៍របស់ Bloomberg News ។

គួរបញ្ជាក់ថា រដ្ឋាភិបាលឥណ្ឌូណេស៊ីបានហាមឃាត់ការលក់ទូរស័ព្ទ iPhone 16 ដោយសារបុគ្គលិក Apple នៅឥណ្ឌូណេស៊ី ពុំអនុវត្តតាមលក្ខខណ្ឌកំណត់ឱ្យទូរស័ព្ទស្មាតហ្វូនត្រូវតែផលិតឧបករណ៍នៅឥណ្ឌូណេស៊ី យ៉ាងហោចណាស់ ៤០% ។ យោងតាមទិន្នន័យរបស់មន្ត្រីរដ្ឋាភិបាលរកឃើញថា Apple វិនិយោគនៅឥណ្ឌូណេស៊ី ត្រឹមតែ៩៥លានដុល្លារអាមេរិក ដែលជាទឹកប្រាក់តិចជាងក្រុមហ៊ុននេះធ្លាប់សន្យា ។

ក្រៅពីនេះ ឥណ្ឌូណេស៊ីក៏បានហាមឃាត់ការលក់ទូរស័ព្ទម៉ាក Google Pixel ផងដែរ ដោយសារពុំបានវិនិយោគតាមទឹកប្រាក់កំណត់ ។ គេចាត់ទុកថា ការហាមឃាត់ការលក់ទូរស័ព្ទទាំងនេះ គឺជាវិធានការក្តៅលោក Prabowo Subianto ប្រធានាធិបតីឥណ្ឌូណេស៊ីថ្មី ដែលព្យាយាមដាក់សម្ពាធក្រុមហ៊ុនបរទេសឱ្យចូលមកផលិតឧបករណ៍នៅឥណ្ឌូណេស៊ីកាន់តែច្រើន ៕

ប្រទេសថៃ ៖ កាលពីថ្ងៃទី២៧ ខែវិច្ឆិកា ឆ្នាំ២០២៤ សារព័ត៌មានថៃរាយការណ៍ថា ក្រសួងគមនាគមន៍បានសហការជាមួយក្រុមហ៊ុនអាកាសចរណ៍នានា បញ្ចុះតម្លៃសំបុត្រយន្តហោះ៣០% ស្មើនឹង៥ម៉ឺនកៅអី សម្រាប់ឱ្យពលរដ្ឋធ្វើដំណើរកម្សាន្ត ឬទៅស្រុកកំណើតក្នុងអំឡុងពេលចូលឆ្នាំសកល ឬឆ្លងឆ្នាំ ។

លោក សុរិយ៉ាក់ ជឹងរុងរឿងកិច្ច ឧបនាយករដ្ឋមន្ត្រី និងរដ្ឋមន្ត្រីក្រសួងគមនាគមន៍ បានលើកឡើងនៅថ្ងៃទី២៧ ខែវិច្ឆិកា កន្លងមកថា លោកបានប្រជុំជាមួយសមាគមអាកាសចរណ៍ថៃ ដើម្បីសហការគ្នាដោះស្រាយបញ្ហាសំបុត្រយន្តហោះឡើងថ្លៃពេលបុណ្យទាន ជាពិសេស ពេលចូលឆ្នាំសកលឆាប់ៗនេះ ។ យើងចង់ឱ្យសំបុត្រយន្តហោះមានតម្លៃថោក និងសមរម្យ ដើម្បីជាកាដូចុងឆ្នាំសម្រាប់ពលរដ្ឋធ្វើដំណើរកម្សាន្តទៅកាន់ទីជិតឆ្ងាយអាចកាត់បន្ថយចំណាយ, ងាយស្រួល និងសុវត្ថិភាពក្នុងការធ្វើដំណើរ ។

កិច្ចប្រជុំជាមួយសមាគមអាកាសចរណ៍ថៃ រួមមាន ៖ ក្រុមហ៊ុនអាកាសចរណ៍ Bangkok Airways, Thai AirAsia, Nok Air, Thai Lion Air និង Thai Vietjet Air ។ លទ្ធផលកិច្ចប្រជុំ គឺក្រសួងគមនាគមន៍ និងក្រុមហ៊ុនអាកាសចរណ៍ទាំងអស់នឹងសហការបង្កើតវិធានការលក់សំបុត្រយន្តហោះតម្លៃពិសេស ។

យើងនឹងផ្តល់ជូនសំបុត្រយន្តហោះតម្លៃថោកសរុបចំនួន៥ម៉ឺនសំបុត្រ សម្រាប់ការធ្វើដំណើរចេញពីទីក្រុងបាងកក ទៅកាន់បណ្តាខេត្ត-ក្រុងនានា ។ វាជាការបើកឱកាសឱ្យពលរដ្ឋថៃធ្វើដំណើរកម្សាន្តពេលចូលឆ្នាំសកល ឬឆ្លងឆ្នាំ (គិតចាប់ពីថ្ងៃទី២៦ ខែធ្នូ ឆ្នាំ២០២៤ ដល់ថ្ងៃទី៥ ខែមករា ឆ្នាំ២០២៥) ជាមួយការបញ្ចុះតម្លៃសំបុត្រយន្តហោះ៣០% ខណៈកន្លងមក តម្លៃសំបុត្របានកើនឡើងខ្ពស់ពេលមានបុណ្យទានម្តងៗ ។

លោក សុរិយ៉ាក់ បន្តទៀតថា ៖ «ក្រសួងគមនាគមន៍ និងស្ថាប័នពាក់ព័ន្ធទាំងរដ្ឋ និងឯកជនជឿជាក់ថា វាផ្តល់ភាពងាយស្រួលដល់ពលរដ្ឋអាចទិញសំបុត្រយន្តហោះតម្លៃសមរម្យដើម្បីធ្វើដំណើរទៅលេងស្រុកកំណើត ជួបជុំសាច់ញាតិ ប្រកបដោយសុវត្ថិភាពពេលឆ្លងឆ្នាំ» ។

ក្រៅពីនេះ ស្ថាប័នពាក់ព័ន្ធទាំងអស់ និងក្រុមហ៊ុនអាកាសចរណ៍នានាគួរចាត់វិធានការបង្កលក្ខណៈងាយស្រួលដល់អ្នកដំណើរក្នុងឱកាសចូលឆ្នាំសកល ព្រមទាំងគ្រប់គ្រងសម្ភារៈអ្នកដំណើរ និងកំណត់ពេលវេលាបើក-បិទអាកាសយានដ្ឋានតាមបណ្តាខេត្តឱ្យច្បាស់លាស់ ។ រីឯអាជ្ញាធរអាកាសចរណ៍ស៊ីវិលត្រូវតាមដានស្ថានការណ៍ថ្លៃធ្វើដំណើរជានិច្ច ដើម្បីកុំឱ្យក្រុមហ៊ុននានាឆ្លៀតឱកាសដំឡើងថ្លៃសំបុត្រ ៕

ឃើញហៃសូក្នុងបណ្តាញសង្គមស្មានតែមានលុយ តារា TikTok ដ៏មានឥទ្ធិពលម្នាក់របស់អាមេរិក ស្រាប់តែត្រូវបានប៉ូលិស.ចាប់ខ្លួនដោយសារលួ.ចអ៊ីវ៉ាន់ក្នុងហាងទំនើបមួយ។ Marlena Velez អាយុ ២២ ឆ្នាំមានអ្នកតាមដាន TikTok ជាង ៣៩០K ប្រមាណជាង ៣៩០.០០០ នាក់ត្រូវបានចាប់ខ្លួន និងចោ.ទប្រកាន់ពីបទលួ.ចរបស់របរមានតម្លៃប្រហែល ៥០០ ដុល្លារពី Target។

យោងតាមសារព័ត៌មានបរទេស NBC News ចុះផ្សាយថា Influencer ម្នាក់នេះតែងតែបង្ហោះខ្លឹមសារអំពីជីវិតរបស់នាងក្នុងនាមជាម្តាយកូនពីរ នៅលើគណនី TikTok របស់នាង ជាមួយនឹងសម្លៀកបំពាក់ប្រណីត និងរបស់ប្រើប្រាស់ថ្លៃៗ។ ថ្មីៗនេះនាងក៏បានបង្ហោះវីដេអូមួយនៅលើបណ្តាញសង្គម ដោយពាក់អាវពណ៌សាច់ ខោជើងវែង ដើរទិញរបស់របរនៅហាងមួយកន្លែងក្នុងទីក្រុង Cape Coral រដ្ឋ Florida។

ខណៈឈុតដែលនាងស្លៀកគឺដូចគ្នាបេះបិទទៅនឹងស្ត្រីដែលលួចឥវ៉ាន់ ក្នុងហាង Target ដែលបានបាត់កាលពីថ្ងៃ ៣០ ខែតុលា ត្រូវបានគេឃើញក្នុងកាមេរ៉ាសុវត្ថិភាព។ នៅពេលដែលគេយកវីដេអូនាងទៅដាក់ជិតជាមួយវីដេអូកាមេរ៉ាសុវត្ថិភាពឃើញថា ចោរក្នុងកាមេរ៉ាសុវត្ថិភាពនោះគឺជារូបនាងតែម្តង។ មិនយូរប៉ុន្មាននាយកដ្ឋានប៉ូលីស Cape Coral ក៏បានទៅផ្ទះនាង ចុះឆែកឆេរ និងចាប់ខ្លួននាងតាមសន្តិវិធី។

Marlena Velez បានសារភាពថា នាងពិតជាបានលួចរបស់គេពិតមែន Influencer ម្នាក់នេះក៏ត្រូវបានគេចោតប្រកាន់ថា លួចរបស់របរគេច្រើនដងហើយ។ មន្ត្រីដែលបានចាប់ខ្លួននាងបានសួរនាងនៅនៅក្នុងពន្ធនាគារថា តើនាងនៅមានទំនិញដែលលួចពីមុនៗច្រើនទៀតទេ Marlena Velez ឆ្លើយតបថានាងប្រហែលជានៅតែមានរបស់របរមួយចំនួនទៀត។ បច្ចុប្បន្នស្ត្រីរូបនេះត្រូវបានឃុំខ្លួនជាបណ្តោះអាសន្ន និងត្រូវឡើងតុលាការនៅថ្ងៃទី ១០ ខែធ្នូខាងមុខនេះ៕