ទេព ពិសិដ្ឋ តបតវិញក្រោយរងការរិះគ.ន់ថាជាសិល្បករពា.ល

តារាចម្រៀង ទេព ពិសិដ្ឋ កម្រនឹងបង្ហាញការខឹងសម្បារឬចេញមកប្រតិកម្មតបតនឹងមតិរិះគន់ណាស់ប៉ុន្តែលើកនេះ ទេព ពិសិដ្ឋ អត់ទ្រាំមិនបានចេញមកពន្លះអ្នកលេងបណ្តាញសង្គមម្នាក់ក្រោយរិះគន់ទៅកាន់ខ្លួនជាតារាបង្ហាញសកម្មភាពពាល ចរិតអឿ និងការជក់បារីដែលអាចជះឥទ្ធិពលដល់យុវជនផ្សេងទៀត។

តារាចម្រៀង ទេព ពិសិដ្ឋ ត្រូវបានមនុស្សជាច្រើនទទួលស្គាល់ពីស្នាដៃសិល្បៈចាប់តាំងពីរូបគេបោះជំហានចូលទៅក្នុងការប្រកួតប្រជែងដណ្តើមពានតាំងពីវ័យក្មេងរហូតពុះពារស្វែងរកពណ៌សម្រាប់ខ្លួនឯងនិងទទួលបានប្រជាប្រិយភាពជាតារាវ័យក្មេងល្បីល្បាញមួយរូបក្នុងប្រទេស។ ជាពិសេសថ្មីៗនេះ ទេព ពិសិដ្ឋ ទើបតែប្រកាសពីការប្រគំតន្រ្តីរបស់ខ្លួននៅឯប្រទេសអូស្ត្រាលីទៀតផង។ យ៉ាងណាមិញ ទេព ពិសិដ្ឋ កម្រនឹងតបនឹងមតិរិះគន់ពីអ្នកលេងបណ្តាញសង្គមណាស់ប៉ុន្តែពេលនេះតារាចម្រៀងរូបនេះបានតបតទៅនឹងគណនីមួយដែលរិះគន់លោកជាតារាពាល បញ្ចេញចរិតអឿ ជាមួយនឹងការជក់បារី។

គណនីបណ្តាញសង្គមនោះបានរិះគន់ ទេព ពិសិដ្ឋ ថាមានភាពក្អេងក្អាងខុសកាលពីកាលនៅតូចនិងជំទង់ដែលមានចរិតស្លូតបូតដល់ពេលធំបន្តិចផ្លាស់ប្តូរទាំងស្រុងមកជាចរិតអឿ មានជក់បារី ចេញបទឌឺដងជេរគ្នា ចរិតពាល។ គណនី Channa Sreang លើកឡើងទៀតថា សិល្បករជាមនុស្សរបស់មហាជនមានក្មេងៗច្រើននាក់ណាស់ដែលមើល ហើយសព្វថ្ងៃ ក្មេងៗតូចៗអាយុក្រោម១៥ឆ្នាំចេះជក់បារី ចេះធ្វើ ចរិតអឿ មានបក្សមានពួកអស់ហើយដែល ជាឥទ្ធិពលខ្លះមកពីអ្នកបង្ហាញបែបនេះ។ គណនីដដែលនេះក៏បានបង្ហាញថាការសរសើរក្មេងមានសមត្ថភាព តែជាសិល្បករដែលមហាជនស្គាល់ហើយដូច្នេះគួរកុំបង្ហាញចរិតអឿក្អេងក្អាង ជក់បារី ថតបង្ហាញទូទៅអី…ក្រុម Rapper ក៏ដោយ Hiphop ក៏ដោយមិនមែន ទាល់តែធ្វើចរិតបែបពាលចឹងទើបគេគាំទ្រឬល្បីនោះទេ»។

ក្រោយទទួលរងនូវមតិរិះគន់បែបនេះ ទេព ពិសិដ្ឋ បានប្រើគណនីផ្ទាល់ខ្លួនដែលមានឈ្មោះថា «មេ តំបន់» តបតទៅកាន់គណនីខាងលើនេះនៅរសៀលថ្ងៃទី១៣ ខែមិថុនា ថា «បាទបង បងមើលទៅចេះដឹងណាស់និយាយហៅគេឡើងវា ធ្វើដូចស្គាល់គ្នាតាំងកាលចឹង។ ខ្ញុំពាលមិនដល់បងទេ មើលតាមការ Writing បងក៏គេអាចដឹង ខ្ញុំចង់ប្រាប់បងថា ខ្ញុំបានចេញបទចម្រៀងល្អៗ rap បែប inspired ច្រើនណាស់ បើមិនជឿសួរ YT & FB ទៅ…»។

ទោះយ៉ាងណា បន្ទាប់ពីបង្ហាញការតបតរបស់ខ្លួនទៅនឹងអ្នករិះគន់មិនយូរប៉ុន្មាន ទេព ពិសិដ្ឋ បានសម្រេចចិត្តលុបឬលាក់ការបង្ហោះនោះផងដែរ៕