ជនបង្កដែលបានបើករថយន្តបញ្ច្រាសទិស បណ្តាលឱ្យតារារ៉េប Ruthko បាត់បង់ជីវិត ត្រូវបានសមត្ថកិច្ចជំនាញ នៃស្នងការដ្ឋាននគរបាលរាជធានីភ្នំពេញ ពិនិត្យមិនឃើញមានជាតិអាកុលក្នុងខ្លួននោះទេ។
ជនបង្កមានឈ្មោះ ណឹម ណាង ភេទប្រុស អាយុ៣៥ឆ្នាំ មុខរបរ កងរាជអាវុធហត្ថ មានទីលំនៅផ្ទះជួលលេខ២៧ ផ្លូវលេខ១០(បុរីប៉េងហួត៦០ម៉ែត្រ)សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
បើតាមកាមេរ៉ាសុវត្ថិភាព នៅកន្លែងកើតហេតុ បានឱ្យឃើញថា រថយន្តបង្កម៉ាកLEXUS RX330 ពណ៌ស ពាក់ផ្លាកលេខ ខ.ម 2_4771 បើកបរតាមបណ្ដោយផ្លូវ៦០ម៉ែត្រ ក្នុងទិសដៅពីជើងទៅត្បូង លុះពេលបើកមកដល់ចំណុចកើតហេតុខាងលើ បានបត់ឆ្វេងឆ្លងផ្លូវ ក៏បុកជាមួយម៉ូតូមួយគ្រឿង ម៉ាក HONDA CRF ពណ៍ខ្មៅ ពាក់ផ្លាកលេខ បាត់ដំបង 1AL_9616 ដែលធ្វើដំណើរបញ្ច្រាសទិសគ្នា បណ្ដាលឱ្យអ្នកបើកបរម៉ូតូ ស្លាប់នៅកន្លែងកើតហេតុ។
ជុំវិញហេតុការណ៍នេះ បានធ្វើឱ្យមហាជន និងអ្នកសិល្បៈជាច្រើនរូបចូលរួមសោកស្តាយនៃការបាត់បង់តារារ៉េបវ័យ២៥ឆ្នាំដ៏មានទេពកុសល្យរូបនេះ៕
