តាំងដើមឆ្នាំរហូតដល់ដាច់ឆ្នាំ ២០២៤ ប្រទេសម៉ាឡេស៊ីបានស្វាគមន៍និស្សិតអន្តរជាតិជាង ១៧០,០០០ នាក់ហើយ ខណៈប្រទេសសិង្ហបុរីមាននិស្សិតបរទេសជាង ៥០,០០០ នាក់ហើយប្រទេសថៃមានត្រឹមតែ ៣០,០០០ នាក់ប៉ុណ្ណោះ ដូច្នេះប្រទេសម៉ាឡេស៊ីកំពុងក្លាយជាគោលដៅដ៏ល្អមួយសម្រាប់វិស័យអប់រំ។ មូលហេតុដែលប្រទេសអាស៊ីអាគ្នេយ៍មួយនេះទាក់ទាញនិស្សិតអន្តរជាតិច្រើនជាងគេ គឺដោយសារគុណភាពអប់រំខ្ពស់ ដំណើរការទិដ្ឋាការមានភាពសាមញ្ញ តម្លៃសិក្សាសមរម្យ រួមទាំងទិដ្ឋភាពវប្បធម៌រីកចម្រើនខ្លាំង ដែលជួយឱ្យប្រទេសនេះក្លាយជាប្រទេសនាំមុខគេនៅអាស៊ីអាគ្នេយ៍ក្នុងចំនួននិស្សិតអន្តរជាតិ។

យោងតាមសារព័ត៌មានបរទេសចុះផ្សាយថា សាកលវិទ្យាល័យសាធារណៈ និងឯកជនរបស់ម៉ាឡេស៊ី គឺមានការអប់រំប្រកបដោយប្រសិទ្ធភាព និងគុណភាពខ្ពស់ ផ្តល់ជូននូវអត្រាសិក្សាដែលសមរម្យបំផុតនៅអាស៊ី ជាមួយនឹងកម្មវិធីដែលទទួលស្គាល់ជាអន្តរជាតិ។ ជាក់ស្តែងដូចសាកលវិទ្យាល័យម៉ាឡាយ៉ាជាប់ចំណាត់ថ្នាក់ល្អបំផុតមួយក្នុងចំណោមសាកលវិទ្យាល័យកំពូលនៅអាស៊ី ដែលផ្តល់ជូននិស្សិតនូវសញ្ញាប័ត្រល្បីឈ្មោះដោយមិនមានតម្លៃខ្ពស់ដែលជាធម្មតាត្រូវបានផ្សារភ្ជាប់ជាមួយនឹងស្ថាប័នដ៏មានកិត្យានុភាព។

ហេតុនេះសម្រាប់អ្នកដែលមានថវិកាល្មមៗ តែចង់បានការអប់រំប្រកបដោយគុណភាព ប្រទេសម៉ាឡេស៊ីគឺជាគោលដៅសិក្សាល្អបំផុត។ លើសពីនេះការស្នាក់នៅក៏មានផាកសុខភាពហើយនៅជិតសាកលវិទ្យាល័យទៀត ងាយស្រួលក្នុងការធ្វើដំណើរទៅមក។ ជាមួយនឹងកំណើនសេដ្ឋកិច្ច និងទីផ្សារការងារដ៏រឹងមាំ ម៉ាឡេស៊ីក៏ផ្តល់ឱកាសការងារសម្រាប់និស្សិតបន្ទាប់ពីពួកគេបានបញ្ចប់ការសិក្សានៅទីនេះផងដែរ។ ប្រទេសនេះបានផ្តល់អាទិភាពលើវិស័យសំខាន់ៗដូចជា បច្ចេកវិទ្យា ហិរញ្ញវត្ថុ និងផលិតកម្ម បង្កើតផ្លូវការងារដែលមានសក្តានុពលសម្រាប់និស្សិតបញ្ចប់ការសិក្សាជំនាញទាំងនេះ។

ទន្ទឹមនឹងនេះប្រទេសម៉ាឡេស៊ីក៏ផ្តល់ទិដ្ឋាការក្រោយបញ្ចប់ការសិក្សា ដែលធ្វើឱ្យវាកាន់តែងាយស្រួលសម្រាប់និស្សិតក្នុងការផ្លាស់ប្តូរពីការអប់រំទៅជាការងារ។ បន្ថែមពីនេះបរិស្ថានដែលមានសុវត្ថិភាព និងពហុវប្បធម៍ ម៉ាឡេស៊ីត្រូវបានគេស្គាល់ដោយសារភាពចម្រុះនៃវប្បធម៌របស់ខ្លួន ជាមួយនឹងចំនួនប្រជាជនដែលរួមមានជនជាតិម៉ាឡេ ចិន ឥណ្ឌា និងជនបរទេសមកពីជុំវិញពិភពលោក។ នេះជាប្រទេសដែលនិយាយភាសាអង់គ្លេសច្រើនជាងគេ ធ្វើឱ្យវាកាន់តែងាយស្រួលសម្រាប់និស្សិតអន្តរជាតិក្នុងការកែតម្រូវ និងរីកចម្រើន៕

សហរដ្ឋអាមេរិក ៖ កាលពីថ្ងៃទី១ ខែមករា ឆ្នាំ២០២៥ សមត្ថកិច្ចនៅទីក្រុង Las Vegas រដ្ឋ Nevada សហរដ្ឋអាមេរិក និយាយថា យ៉ាងហោចណាស់ មានមនុស្សស្លា.ប់ ម្នាក់ និងរងរបួស៧នាក់ ក្រោយពីរថយន្តអគ្គិសនី Cyber Truck របស់ក្រុមហ៊ុន Tesla ឆេះនៅបរិវេណខាងមុខសណ្ឋាគារមួយកន្លែង ដែលជារបស់ប្រធានាធិបតីអាមេរិកថ្មី លោក Donald Trump ។

សមត្ថកិច្ចនៅទីក្រុង Las Vegas បាននិយាយមកកាន់សារព័ត៌មានថា រថយន្តអគ្គិសនីនេះបានបើកមកចតនៅខាងមុខទ្វារចូលរបស់សណ្ឋាគារឈ្មោះ Trump International Hotel បន្ទាប់មក វាក៏ផ្ទុះឆេះដោយខ្លួនឯង ដែលបណ្តាលឱ្យអ្នកជិះក្នុងរថយន្តម្នាក់ស្លាប់ និង៧នាក់ទៀតរងរបួសស្រាល ។ ក្រោយហេតុការណ៍នេះ សមត្ថកិច្ចបានប្រមូលកម្លាំងប្រុងប្រៀបជាមុន ដើម្បីទប់ស្កាត់ហេតុការណ៍ផ្សេងៗដែលគំរាមកំហែងពលរដ្ឋ និងអសន្តិសុខសង្គម ។

ចំណែកលោក Elon Musk នាយកក្រុមហ៊ុន Tesla និងជាអ្នកគាំទ្រលោក Donald Trump ក្នុងពេលឃោសនារកសំឡេងឆ្នោត កាលពីខែវិច្ឆិកា ឆ្នាំ២០២៤ បានសរសេរក្នុងបណ្តាញសង្គម X នៅថ្ងៃទី២ ខែមករា ថា បុគ្គលិក Tesla មានតួនាទីធំៗកំពុងតែស្រាវជ្រាវរកមូលហេតុ ពីព្រោះយើងពុំធ្លាប់ជួបហេតុការណ៍បែបនេះពីមុនទេ ។ វាដូចជាអំពើភេរវកម្មកើតឡើតដោយសារគ្រាប់បែកផ្ទុះ ឬកាំជ្រួចទំហំធំនៅផ្នែកខាងក្រោយរថយន្ត ។

លោកបន្តថា រថយន្តនេះឆេះដោយសារកាំជ្រួចដ៏ធំមួយនៅផ្នែកខាងក្រោយរថយន្ត Cyber Truck ហើយវាពុំពាក់ព័ន្ធនឹងផ្នែកខាងមុខរថយន្តទេ ពីព្រោះប្រព័ន្ធវាស់ចម្ងាយទាំងអស់របស់រថយន្តនៅតែដំណើរការធម្មតាក្នុងពេលរថយន្តផ្ទុះឆេះ ។

ប្រធានាធិបតីអាមេរិក លោក Joe Biden បានជ្រាបពីហេតុការណ៍នេះ ដោយលោកបានបញ្ជាឱ្យមន្ត្រីរដ្ឋាភិបាលផ្តល់ជំនួយពេលមានការចាំបាច់ ។ មុននេះ នៅថ្ងៃដដែល លោកទើបតែទទួលដំណឹងពីជនមិនស្គាល់អត្តសញ្ញាណបើករថយន្តបុកហ្វូងមនុស្សមកចូលរួមឆ្លងឆ្នាំ នៅទីក្រុង New Orleans រដ្ឋ Louisiana បណ្តាលឱ្យមនុស្សស្លា.ប់ ១០នាក់ និងរងរបួស៣៥នាក់ ។ នេះបើតាមការអះអាងរបស់មន្ត្រីសេតវិមាន ៕

បំណាច់ឆ្នាំចាស់ផ្លាស់ចូលឆ្នាំថ្មី ឆ្នាំ២០២៥ បានប្រព្រឹត្តិដោយរលូននិងប្រកបដោយសិរីសួស្តី ដោយសង្កេតឃើញថា នៅតាមបណ្តារាជធានីខេត្តទាំងអស់ទូទាំងប្រទេសកម្ពុជាក៏បានប្រារព្ធនូវកម្មវីធីសប្បាយៗជាច្រើន ដើម្បីអបអរដល់ថ្ងៃឆ្លងឆ្នាំសកល។

យោងតាមការចុះផ្សាយរបស់ក្រសួងទេសចរណ៍បានឲ្យដឹងថា ស្ថិតិទេសចរជាតិ និងអន្តរជាតិ ដើរលេងកម្សាន្តទូទាំងប្រទេស ក្នុងឱកាសឆ្លងឆ្នាំសកល នៅតាមបណ្ដារាជធានី-ខេត្ត ចាប់ពីថ្ងៃទី៣០-៣១ ខែធ្នូ ឆ្នាំ២០២៤ មានដូចជា៖
– ទេសចរសរុបប្រមាណ ៖ ៣ ៥៣៥ ៣២៥នាក់
– ទេសចរជាតិ សរុបប្រមាណ ៖ ៣ ៤៨៨ ០៦៥ នាក់
– ទេសចរអន្តរជាតិ សរុបប្រមាណ ៖ ៤៧ ២៦០នាក់។

ជាមួយគ្នានោះ ខេត្តក្រុងចំនួន ៥ ដែលទទួលបានភ្ញៀវទេសចរច្រើនជាងគេ ដោយចំណាត់ថ្នាក់លេខ ១ បានលើរាជធានីភ្នំពេញ ប្រមាណជាង ១លាន ៥សែននាក់។ លេខ ២ ខេត្តព្រះសីហនុ ៤២ ម៉ឺននាក់។ លេខ ៣ ខេត្តសៀមរាប ៣៣ ម៉ឺននាក់។ លេខ ៤ កំពត ២២ ម៉ឺននាក់។ និងលេខ ៥ ខេត្តកែប ១២ម៉ឺននាក់។

សូមជម្រាបថា នាថ្ងៃទី ៣១ ខែធ្នូ ឆ្នាំ ២០២៤ នៅបរិវេន មុខព្រះបរមរាជវាំង រាជធានីភ្នំពេញ បានប្រារព្ធនូវព្រឹត្តិការណ៍ដ៏ធមសម្បើមមួយ គឺសាទរកម្ពុជា ដែលរួមមានក្បួនដង្ហែរ អ្នកចូលរួមជាង ៣០០០នាក់ ការសម្តែងទស្សនីយភាពចម្រុះ ការតំាងពិពណ៌ ការប្រគុំតន្រ្តី និងការបាញ់កាំជ្រួចអបអរសាទរផងដែរ។ ក្រៅពីនេះ តាមបណ្តាខេត្តនានា ដូចជាខេត្តព្រះសីហនុ បាត់ដំបង តាកែវជាដើមក៏បានរៀបចំកម្មវិធីសប្បាយៗ ដើម្បីអបអរឆ្នាំថ្មីផងដែរ៕

មនុស្សម្នាក់ៗមានការសរសេរខុសៗគ្នា អ្នកខ្លះក៏សរសេរដៃស្តាំ អ្នកខ្លះទៀតក៏សរសេរដៃឆ្វេង ប៉ុន្តែមនុស្សភាគច្រើនគឺគេប្រើប្រាស់ដៃស្តាំជាងដៃឆ្វេង។ ទោះជាយ៉ាងណាអ្នកសរសេរដៃឆ្វេងក៏ត្រូវបានគេនិយាយផងដែរថា ឆ្លាតនិងខ្លាំងពូកែជាងអ្នកប្រើដៃស្តាំ តើនេះជាការពិតដែរឬទ? យោងតាមការសិក្សាស្រាវជ្រាវរបស់សាកលវិទ្យាល័យ Groningene ប្រទេសហូឡង់ និងក្រុមអ្នកវិទ្យាសាស្ត្រ IFL Science ដែលបានពិនិត្យនូវសមត្ថភាពដៃ ដើម្បីសាកល្បងទ្រឹស្ដីនេះបានពន្យល់ថា មុខងាររបស់ដៃ គឺជាការបង្ហាញនៃមុខងារខួរក្បាល ហើយមានការទាក់ទងទៅនឹងការយល់ដឹង។

ដូច្នេះអ្នកប្រើដៃឆ្វេង ទំនងមានខួរក្បាលធំជាងអ្នកប្រើដៃស្តាំ ដែលជួយឱ្យពួកគេមានការចងចាំខ្ពស់ជាងអ្នកផ្សេង។ លើសពីនេះមនុស្សប្រើដៃឆ្វេងក៏មានទេពកោសល្យ និងមានបញ្ញាខ្ពស់ខ្លាំងផងដែរ ដោយសារពួកគេតែងប្រើផ្នែកទាំងពីរនៃខួរក្បាលរបស់គេ។ ជាពិសេសខួរក្បាលខាងឆ្វេង តំណាងឱ្យភាពវៃឆ្លាតគណិតវិទ្យាឡូជីខល ខណៈដែលខួរក្បាលខាងស្តាំ គឺជាភាពវៃឆ្លាតខាងអារម្មណ៍ មានភាពរសើប និងអាចបត់បែនបាន។

ទន្ទឹមនឹងនេះមនុស្សប្រើដៃឆ្វេងពីកំណើតក៏មានអឌ្ឍគោលពីរនៃខួរក្បាលដែលអាចសម្របសម្រួលបានកាន់តែរលូននៅក្នុងផ្នែកដែលទាក់ទងនឹងភាសា ដែលផ្តល់ឱ្យពួកគេនូវសមត្ថភាពនិយាយខ្ពស់ មានន័យថាពួកគេគឺពូកែខាងទំនាក់ទំនង។ នេះបើយោងតាមការស្ទង់មតិឆ្នាំ ២០១៩ លើមនុស្សជាង ២០,០០០ នាក់ អ្នកដែលប្រើដៃឆ្វេងភាគច្រើនក៏មានទំនោរខាងសិល្បៈខ្ពស់ផងដែរ។ សរុបមកវិញអ្នកសរសេរដៃឆ្វេងពិតជាមានភាពឆ្លាតវៃជាងអ្នកប្រើដៃស្តាំមែន ប៉ុន្តែមិនប្រាកដថា អ្នកសរសេរដៃស្តាំសុទ្ធតែខ្សោយនោះទេ។

អ្នកប្រើប្រាស់ដៃស្តាំក៏មានភាពឆ្លាតវៃ និងចំណុចល្អច្រើនដែរ នេះបើយោងតាមការសិក្សាដៃស្តាំអាចចាប់កាន់អ្វីមួយបានល្អជាងដៃឆ្វេង និងគ្មានភាពឆ្គងឡើយ។ ទន្ទឹមនឹងនេះអ្នកប្រើប្រាស់ដៃស្តាំក៏ខ្លាំងខាងចិត្តវិទ្យា ពូកែមើលចិត្តមនុស្ស ទោះបីជាមិនសូវរៀនឆាប់ចេះ ឆាប់ចាំដូចអ្នកប្រើប្រាស់ដៃឆ្វេងក៏ដោយ អ្នកប្រើដៃស្តាំទំនងចិត្តធ្ងន់ជាងអ្នកប្រើដៃឆ្វេង មានភាពរហ័សរហួន និងឧស្សាហ៍ព្យាយាម ហើយដៃស្តាំក៏ត្រូវបានគេចាត់ទុកថាមានអនាម័យខ្ពស់ជាងដៃឆ្វេងផងដែរ៕

ស្របពេលប្រទេសនានាលើពិភពលោក រួមគ្នាអបអរការឆ្លងឆ្នាំសកល ឆ្នាំ២០២៥ អ្នកដំណើរមួយចំនួនបានធ្វើដំណើរឆ្លងប្រទេស ប៉ុន្តែវាជាការធ្វើដំណើរត្រឡប់ពេលវេលា ។ អ្នកដំណើរទាំងអស់បានឡើងជិះយន្តហោះនៅប្រទេសដែលឈានចូលឆ្នាំ២០២៥ រួចហើយ បែរជាយន្តហោះចុះចតនៅប្រទេសពុំទាន់ឆ្លងឆ្នាំ គឺឆ្នាំ២០២៤ ។ នេះបើតាមការផ្សព្វផ្សាយរបស់គេហទំព័រ Hflight ។

គេហទំព័រ Hflight បានត្រួតពិនិត្យទិន្នន័យពីវែបសាយ Flightradar24 ឃើញថា យន្តហោះជើងហោះហើរ NH106 របស់ក្រុមហ៊ុនអាកាសចរណ៍ All Nippon Airways (ANA) ដែលចាកចេញពីអាកាសយានដ្ឋានហាណេតាក់ ទីក្រុងតូក្យូ កាលពីថ្ងៃទី១ ខែមករា ឆ្នាំ២០២៥ ហើយអ្នកដំណើរបានឆ្លងឆ្នាំ (Countdown) នៅប្រទេសជប៉ុនរួចហើយ បែរជាពួកគេមកដល់គោលដៅនៅឆ្នាំ២០២៤ ។

យន្តហោះនេះបានចុះចតនៅអាកាសយានដ្ឋានអន្តរជាតិឡូសអេនជឺឡេស សហរដ្ឋអាមេរិក នៅថ្ងៃទី៣១ ខែធ្នូ ឆ្នាំ២០២៤ ហើយធ្វើឱ្យអ្នកដំណើរឆ្លងឆ្នាំនៅសហរដ្ឋអាមេរិកម្តងទៀត ។ មូលហេតុដែលយន្តហោះធ្វើដំណើរត្រឡប់ពេលវេលាទៅកាន់ឆ្នាំ២០២៤ វិញ ដោយសារពេលវេលានៅទីក្រុងតូក្យូ លឿនជាងទីក្រុងឡូសអេនជឺឡេស រហូតដល់១៧ម៉ោង ។

ពេលយន្តហោះចាកចេញពីទីក្រុងតូក្យូ នៅវេលាម៉ោង១យប់ ថ្ងៃទី១ ខែមករា ឆ្នាំ២០២៥ គឺនៅទីក្រុងឡូសអេនជឺឡេស ទើបតែម៉ោង៨ព្រឹក ថ្ងៃទី៣១ ខែធ្នូ ឆ្នាំ២០២៤ ។ ដូច្នេះ ការធ្វើដំណើររយៈពេល៩ម៉ោង គឺធ្វើឱ្យយន្តហោះចុះចតនៅអាកាសយានដ្ឋានអន្តរជាតិឡូសអេនជឺឡេស នាល្ងាចថ្ងៃទី៣១ ខែធ្នូ ឆ្នាំ២០២៤ ។

ដូចគ្នានេះ យន្តហោះដឹកអ្នកដំណើររបស់ក្រុមហ៊ុនអាកាសចរណ៍ CATHAY PACIFIC ក៏បានធ្វើដំណើរត្រឡប់ពេលវេលាដែរ គឺយន្តហោះនេះចាកចេញពីទីក្រុងហុងកុង នៅថ្ងៃទី១ ខែមករា ឆ្នាំ២០២៥ ហើយទៅដល់ទីក្រុងឡូសអេនជឺឡេស នៅថ្ងៃទី៣១ ខែធ្នូ ឆ្នាំ២០២៤ ។ បុគ្គលិកអាកាសចរណ៍ប្រាប់ថា ពេលវេលារបស់ប្រទេសនីមួយៗពុំដូចគ្នាទេ គឺអាស្រ័យលើខ្សែកំណត់ពេលវេលា (International Date Line / IDL) ៕