ក្នុងព្រឹត្តិការណ៍ សាទរកម្ពុជា កាលពីរាត្រីថ្ងៃទី៣១ ខែធ្នូ ឆ្នាំ២០២៤ បានបន្សល់ទុកនូវអនុស្សាវរីយ៍ជាច្រើនជាមួយនឹងទស្សនីយភាពចម្រុះក្រោមការចូលរួមពីមនុស្សរាប់ម៉ឺននាក់ ។ ក្នុងនោះសកម្មភាពតារារ៉េប វណ្ណដា ទទួលបានការកោតសរសើរយ៉ាងខ្លាំងពីទស្សនិកជនបន្ទាប់ពីតារាប្រុសរូបនេះបានលត់ជង្គង់សំពះព្រះឆាយាលក្ខណ៍ព្រះមហាក្សត្រជាមុនសិនមុននឹងផ្តល់ភាពសប្បាយរីករាយដល់ប្រជាពលរដ្ឋ។
វីដេអូរបស់តារាចម្រៀងរ៉េប ម៉ាន់ វណ្ណដា តារាចម្រៀងមានដើមកំណើតនៅខេត្តព្រះសីហនុសម្តែងនៅក្នុងព្រឹត្តិការណ៍សាទរកម្ពុជាត្រូវបានចែករំលែកយ៉ាងទូលំទូលាយនៅបណ្តាញសង្គមចំពោះសកម្មភាព វណ្ណដា ។ ក្នុងការសម្តែងដំបូងតារាចម្រៀង វណ្ណថាន បានប្រគំភ្លេងជាមួយនឹងឧបករណ៍បុរាណខ្មែរ។ បន្ទាប់មកភ្លេងចាប់ផ្តើមប្រគំបទចម្រៀង «សង្ក្រាន្តស្គាល់ស្នេហ៍» ដែលជាបទទទួលបានការគាំទ្រយ៉ាងខ្លាំងនារយៈចុងក្រោយនេះពីបណ្តាប្រទេសជិតខាង។
អ្វីដែលធ្វើឱ្យទស្សនិកជនស្ងើចសរសើរទៅដល់ វណ្ណដា នោះគឺមុននឹងចាប់ផ្តើមសម្តែងបទខាងលើនេះ វណ្ណដា បានលត់ជង្គង់សំពះព្រះឆាយាលក្ខណ៍ព្រះមហាក្សត្រ ដែលទទួលបានការសាទរយ៉ាងខ្លាំង ហើយ វណ្ណដា បានបន្តសំពះដល់ទស្សនិកជនដែលចូលរួមទស្សនាយ៉ាងច្រើនកុះករនៅមុខព្រះបរមរាជវាំងនាកន្លែងប្រគំតន្រ្តី។ 
ក្រៅពីបទ «សង្ក្រាន្តស្គាល់ស្នេហ៍» វណ្ណដា បានផ្តល់ភាពសប្បាយរីករាយជាមួយនឹងបទ «កំលោះស្រុកខ្មែរ», «មិនអាចវិលវិញ» ជាមួយនឹងតារាចម្រៀង វណ្ណថាន និងបទ «អាមុំបងអើយ»ដែលសិល្បករសិល្បការិនីជាច្រើនបានឡើងរាំលើឆាកអបអរជាមួយនឹងតារាចម្រៀងទាំងពីររូប៕
