ទីក្រុងដែលស្រស់ស្អាតបំផុតទាំង ៥ នៅលើពិភពលោកសម្រាប់ឆ្នាំ ២០២៤ ត្រូវបានចាត់ថ្នាក់តាមលក្ខណៈវិនិច្ឆ័យនៃការអនុវត្តសេដ្ឋកិច្ច អាជីវកម្មទេសចរណ៍ ហេដ្ឋារចនាសម្ព័ន្ធ គោលនយោបាយ សុវត្ថិភាព និងនិរន្តរភាព។ យោងតាមរបាយការណ៍របស់ Euromonitor International ដែលជាក្រុមហ៊ុនស្រាវជ្រាវទីផ្សារពិភពលោកមានទីស្នាក់ការធំនៅចក្រភពអង់គ្លេសបានឱ្យដឹងថា ទីក្រុងប៉ារីសរបស់ប្រទេសបារាំង ឈរលើកំពូលតារាងនៃទីក្រុងដែលស្រស់ស្អាត និងទាក់ទាញបំផុតនៅលើពិភពលោកក្នុងឆ្នាំ ២០២៤។

ចំណាត់ថ្នាក់លេខ ២ គឺទីក្រុងម៉ាឌ្រីដ រាជធានីនៃប្រទេសអេស្ប៉ាញ។ ទីក្រុងនេះសម្បូរទៅដោយប្រវត្តិសាស្ត្រ និងវប្បធម៌ ដែលបង្ហាញពីស្នាដៃស្ថាបត្យកម្មដ៏គួរឱ្យចាប់អារម្មណ៍ដូចជាព្រះបរមរាជវាំង និងទីលានអភិបាលក្រុងជាដើម។ ម៉ាឌ្រីដក៏ជាមជ្ឈមណ្ឌលសម្រាប់សិល្បៈផងដែរ ជាមួយនឹងសារមន្ទីរ Prado ដ៏មានកិត្យានុភាព និងសង្កាត់ Gran Via ដ៏រស់រវើក។ ជាមួយនឹងរបៀបរស់នៅសម្រាកលំហែកាយ និងពិធីបុណ្យប្រពៃណីប្លែកៗ ម៉ាឌ្រីដគឺជាគោលដៅដ៏ពេញនិយមបំផុតមួយនៅអឺរ៉ុប។

ចំណាត់ថ្នាក់ទី ៣ គឺទីក្រុងតូក្យូ ប្រទេសជប៉ុន ដែលជាគោលដៅមួយស្ថិតក្នុងបញ្ជីទីក្រុងដែលទាក់ទាញបំផុតនៅលើពិភពលោកឆ្នាំ ២០២៤។ ទីក្រុងតូក្យូមានភាពទាក់ទាញដោយសារតែការរួមបញ្ចូលគ្នានៃប្រពៃណី និងភាពទំនើបរបស់វា។ ទីក្រុងនេះមានភាពល្បីល្បាញសម្រាប់កន្លែងសម្គាល់ដូចជាប្រាសាទ Senso-ji, Tokyo Tower, តំបន់ Shibuya ដ៏រស់រវើក និងតំបន់ Ginza ដ៏ប្រណិត។ ទីក្រុងតូក្យូក៏ទាក់ទាញអ្នកទេសចរផងដែរ ដោយសារវប្បធម៌ប្លែក និងមុខម្ហូបល្បីៗដូចជា ស៊ូស៊ី រ៉ាមេន ឬម៉ូជីជាដើម។

រីឯទីក្រុងរ៉ូមរដ្ឋធានីប្រទេសអ៊ីតាលីវិញ ក៏ជាប់ចំណាត់ថ្នាក់ទី ៤ ក្នុងតារាងផងដែរ។ ទីក្រុងនេះគឺជាគោលដៅទេសចរណ៍ដ៏ទាក់ទាញមួយ ជាមួយនឹងការរួមបញ្ចូលគ្នានៃប្រវត្តិសាស្រ្ត សិល្បៈ និងមុខម្ហូប។ ទីក្រុងរ៉ូមមានភាពល្បីល្បាញសម្រាប់កន្លែងសម្គាល់ដូចជា Colosseum, Pantheon, Trevi Fountain និង Piazza Navona ។ ក្នុងខែកញ្ញា រដ្ឋាភិបាលទីក្រុងរ៉ូមបានកំណត់ចំនួនអ្នកទស្សនានៅទីតាំងមួយចំនួន ដូចជាតំបន់បុរាណវត្ថុ Pompeii ត្រឹម ២០,០០០ នាក់ក្នុងមួយថ្ងៃ ដើម្បីការពារបេតិកភណ្ឌវប្បធម៌ពីទេសចរណ៍ហួសកម្រិត។

ចំណែកចំណាត់ថ្នាក់ទី ៥ បានទៅលើទីក្រុង Milan ដែលជាទីក្រុងធំទីពីររបស់ប្រទេសអ៊ីតាលី ដែលគួរឱ្យកត់សម្គាល់សម្រាប់ការបញ្ចូលគ្នានៃប្រវត្តិសាស្រ្ត សិល្បៈ និងម៉ូដ។ អ្នកទស្សនានៅទីនេះបានកោតសរសើរយ៉ាងខ្លាំងនៅព្រះវិហារ Duomo di Milano ជាមួយនឹងស្ថាបត្យកម្មហ្គោធិក ទស្សនាសារមន្ទីរសិល្បៈ Brera ជាមួយនឹងស្នាដៃសិល្បៈដ៏មានតម្លៃ និងរុករក Galleria Vittorio Emanuele II ដែលជាមជ្ឈមណ្ឌលទិញទំនិញចំណាស់ជាងគេបំផុតមួយរបស់ពិភពលោក។ ទីក្រុងនេះក៏ជាគោលដៅដ៏ល្បីល្បាញសម្រាប់ព្រឹត្តិការណ៍សំខាន់ៗដូចជា Milan Fashion Week និងពិព័រណ៍ការរចនាអន្តរជាតិ Salone del Mobile ផងដែរ៕

នៅក្នុងពិភពលោកយើងនេះ មានសត្វស្លាបជាច្រើនប្រភេទ ដែលមានលក្ខណៈខុសៗគ្នាពីមួយទៅមួយ។ សត្វស្លាបប្រភេទខ្លះតូច ខ្លះធំ ខ្លះអត់ចេះហើរជាដើម តែបើនិយាយពីទំហំស៊ុតវិញ សត្វស្លាបដែលផ្ដល់ស៊ុតធំជាងគេបំផុតនោះគឺ សត្វអូទ្រីស។ សត្វអូទ្រីសគឺជាសត្វដែលមានស៊ុតធំបំផុតក្នុងប្រវត្តិសាស្ត្រ ជាមួយប្រវែងរហូតដល់ ៣៣ សង់ទីម៉ែត្រដែលនៅតែមានដល់សព្វថ្ងៃនេះ។

ប្រភេទសត្វស្លាបនេះ មានអម្បូរជាមួយនឹងសត្វគីវី (Kiwi) ហើយវាត្រូវបានរកឃើញនៅទូទាំងពិភពលោកតែម្តង ប៉ុន្តែភាគច្រើនវាសម្បូរមាននៅទ្វីបអាហ្វ្រិក ដូចជាអាហ្វ្រិកខាងជើង អាហ្វ្រិកខាងត្បូង និងអាហ្វ្រិកខាងកើតជាដើម។ ស៊ុតអូទ្រីសធំបំផុតក្នុងប្រវត្តិសាស្ត្រមានទម្ងន់ ៤៥០ គីឡូក្រាម ស្មើនឹងខ្លាឃ្មុំផេនដា ៣ ក្បាល ជាមួយប្រវែងរហូតដល់ ៣៣ សង់ទីម៉ែត្រដែលអាចផ្ទុកសារធាតុរាវបាន ៨.៥ លីត្រ នេះបើយោងតាមសៀវភៅកំណត់ត្រាពិភពលោកហ្គីណេស។

ទោះជាយ៉ាងណាបច្ចុប្បន្ននេះស៊ុតអូទ្រីស មានទម្ងន់ជាមធ្យមត្រឹមតែ ១.៤ គីឡូក្រាមប៉ុណ្ណោះ ដែលមានទទឹងជាមធ្យម ១៣ សង់ទីម៉ែត្រ និងបណ្ដោយប្រមាណ ១៥ សង់ទីម៉ែត្រ។ ទោះបីជាវាមានទំហំតូចជាងមុនបន្តិចក៏ដោយ ក៏ស៊ុតអូទ្រីសនៅតែជាប់ឈ្មោះជាស៊ុតធំជាងគេបំផុតក្នុងលោកផងដែរ។ ស៊ុតអូទ្រីសត្រូវការរយៈពេលប្រមាណ ៣៥ ទៅ ៤៥ ថ្ងៃដើម្បីញាស់ចេញជាកូនអូទ្រីស។

ស៊ុតអូទ្រីសត្រូវបានគេនិយាយតៗគ្នាថា ផ្តល់អត្ថប្រយោជន៍ជាច្រើនចំពោះសុខភាពរាងកាយរបស់មនុស្ស ដោយសារវាសម្បូរទៅដោយជាតិប្រូតេអ៊ីនដែលចាំបាច់ត្រូវការចិញ្ចឹមសរីរាង្គ។ ដោយនៅពេលខ្លះគេយកស៊ុតសត្វស្លាបធំជាងគេនេះ ទៅធ្វើជាម្ហូប ចំណែកឯស្បែក និងស្លាបរបស់អូទ្រីសវិញ ត្រូវបានគេកែច្នៃជាសម្ភារៈមានតម្លៃផ្សេងៗ។

ក្រៅពីអូទ្រីសសត្វគីវីក៏ជាសត្វបក្សីដែលមានស៊ុតធំជាងគេទីពីរក្នុងលោកផងដែរ ជាមួយទម្ងន់ធ្ងន់មិនធម្មតារបស់វា បានធ្វើឱ្យវាកើតមកមានសុខភាពល្អ មានរោមពេញ និងឯករាជ្យ។ ពងគីវីត្រូវចំណាយពេលប្រហែល ៧៥-៨៥ ថ្ងៃដើម្បីញាស់ ដែលជារយៈពេលដ៏យូរបំផុត៕

លោក Elon Musk នាយកក្រុមហ៊ុន Tesla, SpaceX និងជាម្ចាស់បណ្តាញសង្គម X (Twitter) ដែលមានឈ្មោះល្បីល្បាញជាបុគ្គលមានគំនិតច្នៃប្រឌិតបច្ចេកវិទ្យាថ្មីៗ បាននិយាយពីអត្រាកំណើតធ្លាក់ចុះនៅសិង្ហបុរីក្នុងបណ្តាញសង្គមថា ៖ «សិង្ហបុរី និងប្រទេសជាច្រើនទៀតកំពុងបាត់បង់ជាតិសាសន៍ពីពិភពលោកនេះ» ។

លោកបានបញ្ចេញមតិក្នុងបណ្តាញសង្គម X ទៅកាន់លោក Mario Nawfal ជាបុគ្គលល្បីមួយរូបពាក់ព័ន្ធនឹងអត្រាកំណើតធ្លាក់ចុះនៅសិង្ហបុរី និងតួនាទីមនុស្សយន្តធ្វើការជំនួសមនុស្ស ដើម្បីកាត់បន្ថយផលប៉ះពាល់ដោយសារខ្វះខាតកម្លាំងពលកម្ម ។ ការបញ្ចេញមតិរបស់លោកបានធ្វើឱ្យពិភពលោក ចាប់អារម្មណ៍ពីសង្គមប្រទេសអភិវឌ្ឍន៍ ដែលប្រឈមនឹងចំនួនពលរដ្ឋធ្លាក់ចុះ ។

រយៈពេល៣០ឆ្នាំមកនេះ អត្រាកំណើតនៅសិង្ហបុរីបានធ្លាក់ចុះយ៉ាងខ្លាំង ហើយនៅឆ្នាំ២០២៣ អត្រាកំណើតធ្លាក់ចុះខ្លាំងជាងគេ ដោយសារមានស្ត្រីសិង្ហបុរីតិចតួចផ្តល់កំណើតទារក ។ រីឯមូលហេតុសំខាន់ដែលបណ្តាលឱ្យអត្រាកំណើតធ្លាក់ចុះ គឺដោយសារសង្គមផ្លាស់ប្តូរ ។

ទិន្នន័យរបស់រដ្ឋាភិបាលសិង្ហបុរីបង្ហាញថា ស្ត្រីក្នុងវ័យរៀបការអាយុពី២៥ឆ្នាំ ទៅ៣៤ឆ្នាំ បានសម្រេចចិត្តនៅលីវ ។ រីឯចំនួនគូស្វាមី-ភរិយាមានអាយុ២០ឆ្នាំ ក៏បានធ្លាក់ចុះផងដែរ ដែលជំរុញឱ្យអត្រាកំណើតសរុបធ្លាក់ចុះ ប្រមាណ៣២% ។ ទោះជាអត្រាកំណើតរបស់សិង្ហបុរីធ្លាក់ចុះខ្លាំងគួរឱ្យបារម្ភក្តី ប៉ុន្តែការរីកចម្រើនផ្នែកបច្ចេកវិទ្យាអាចជួយកាត់បន្ថយផលប៉ះពាល់ដោយសារចំនួនពលរដ្ឋធ្លាក់ចុះ ។

ប្រទេសសិង្ហបុរីបានប្រើប្រាស់មនុស្សយន្តច្រើនបំផុតក្នុងផ្នែកឧស្សាហកម្ម និងជាប់លំដាប់ទី២ លើពិភពលោក ។ បច្ចេកវិទ្យារីកចម្រើនធ្វើឱ្យសិង្ហបុរីអាចដោះស្រាយបញ្ហាខ្វះខាតកម្លាំងពលកម្ម ខណៈការជួលមនុស្សធ្វើការត្រូវចំណាយប្រាក់ច្រើន ប៉ុន្តែទទួលបានលទ្ធផលការងារតិច ។

លោក Elon Musk បានចំណាយប្រាក់យ៉ាងច្រើនផលិតមនុស្សយន្តមានរូបរាងស្រដៀងមនុស្ស ធ្វើការជំនួសមនុស្ស និងគ្មានគ្រោះថ្នាក់ ដើម្បីដោះស្រាយបញ្ហាការខ្វះខាតកម្លាំងពលកម្ម ។ ប៉ុន្តែមហាជនបានរិះគន់ពាក្យសម្តីរបស់លោក ហើយពួកគេបញ្ជាក់ថា អត្រាកំណើតធ្លាក់ចុះនៅសិង្ហបុរី ដោយសារបញ្ហាសង្គម និងសេដ្ឋកិច្ច ។

មតិនានាថា ពលរដ្ឋសិង្ហបុរីប្រឈមនឹងបញ្ហាទំនិញឡើងថ្លៃគ្រប់មុខ ហើយនេះជាឧបសគ្គដល់ការរៀបការបង្កើតគ្រួសារ ពីព្រោះឪពុក-ម្តាយមានតួនាទីថែទាំ និងផ្តល់អនាគតល្អឱ្យកូនៗ ។ ក្រៅពីនេះ ផ្ទះនៅសិង្ហបុរីមានតម្លៃខ្ពស់ ពលរដ្ឋគ្មានលទ្ធភាពទិញ ទើបពួកគេសម្រេចចិត្តពុំរៀបការ ៕

ប្រទេសចិន៖ ឥឡូវនេះរោងចក្រក្នុងប្រទេសចិនជាច្រើនបានកាត់បន្ថយបុគ្គលិក ដោយនាំយកមនុស្សយន្តមកធ្វើការជំនួសវិញ បានកំពុងក្លាយជានិន្នាការថ្មីនាពេលបច្ចុប្បន្ននេះ។
មនុស្សយន្ត MagicBot របស់ក្រុមហ៊ុន MagicLab អាចអនុវត្តការងារជាច្រើនដូចជា ការត្រួតពិនិត្យផលិតកម្ម ការគ្រប់គ្រងសម្ភារៈ ការជ្រើសរើស និងតម្រៀបផ្នែក ការត្រួតពិនិត្យសារពើភ័ណ្ឌ និងការគ្រប់គ្រង។ យោងតាម Interesting Engineering មនុស្សយន្តរបស់ក្រុមហ៊ុននេះក៏បានបង្ហាញពីសមត្ថភាពក្នុងការធ្វើកិច្ចសហប្រតិបត្តិការក្នុងកម្រិតតូចមួយ ដោយបង្ហាញថាពួកគេអាចធ្វើការជាមួយគ្នាប្រកបដោយប្រសិទ្ធភាព។

កាលពីខែមករា ក្រុមហ៊ុន MagicLab បានណែនាំមនុស្សយន្តជំនាន់ទី ៣ ដែលមានឈ្មោះថា MagicBot ដែលត្រូវបានរចនាឡើងដើម្បីប្រកួតប្រជែងជាមួយនឹងមនុស្សយន្ត Atlas របស់ Boston Dynamics ។ ក្នុងខែកុម្ភៈ ពួកគេបានចែករំលែកវីដេអូអំពីមនុស្សយន្តធ្វើការជាមួយមនុស្សយន្តគ្នាឯង ដោយធ្វើការយ៉ាងរលូន និងរហ័សរហួនបំផុត។ ដោយសារមនុស្សយន្តមានអត្ថប្រយោជន៍ច្រើន និងឆ្លាតវៃ ទើបរោងចក្រជាច្រើនក្នុងប្រទេសចិនបាននាំយកមនុស្សយន្តមកធ្វើការ ដោយកាត់បន្ថយបុគ្គលិកមួយចំនួនចេញ។

ស្របពេលប្រទេសនេះក៏មានបំណងផលិតមនុស្សយន្តដ៏ច្រើនសន្ធឹកសន្ធាប់នៅឆ្នាំ ២០២៥ និងគ្រប់គ្រងទីផ្សារនៅឆ្នាំ ២០២៧។ បច្ចុប្បន្នមនុស្សយន្ត MagicBot ដែលប្រើក្នុងរោងចក្រអាចបង្វិលបាន ៤២ ដឺក្រេដោយសេរី។ ដៃរបស់វាអាចលើកវត្ថុមានទម្ងន់រហូតដល់ ២០គីឡូក្រាម ខណៈដែលរាងកាយទាំងមូលរបស់វាអាចផ្ទុកទំនិញបាន ៤០គីឡូក្រាម។ លើសពីនេះ MagicBot ក៏មានថាមពលថ្មរហូតដល់ ៥ ម៉ោងនៅពេលធ្វើដំណើរ និងដំណើរការជាបន្តបន្ទាប់ អាចបង្កើនប្រសិទ្ធភាពការងារយ៉ាងរលូន។

ទន្ទឹមនឹងនេះមនុស្សយន្ត MagicBot ក៏មានសមត្ថភាពធ្វើម្ហូប បត់សំលៀកបំពាក់ ស្រោចទឹករុក្ខជាតិ និងរាំតាមតន្ត្រីដ៏រំភើបផងដែរ។ វាក៏មានសមត្ថភាពរៀបចំផែនការដោយសុវត្ថិភាព ជៀសវាងឧបសគ្គ និងឈានដល់ចំណុចប្រតិបត្តិការប្រកបដោយប្រសិទ្ធភាពដោយប្រើក្បួនដោះស្រាយរុករកដែលបានអភិវឌ្ឍដោយខ្លួនឯង។ ដូច្នេះជំនាញដ៏គួរឱ្យចាប់អារម្មណ៍ទាំងនេះ អាចបំពេញការងារចម្រុះដោយភាពរហ័សរហួន និងឆ្លាតវៃបំផុត។

យោងតាម Sango Automation មនុស្សយន្តទាំងនេះមិនត្រឹមតែធ្វើការបានតែក្នុងរោងចក្រប៉ុណ្ណោះទេ សូម្បីការងារផ្ទះ ការងារការរិយាល័យ ក៏វាអនុវត្តបានដូចមនុស្សយើងដែរ។ នៅក្នុងប្រទេសចិនមនុស្សយន្តនាពេលបច្ចុប្បន្ននេះគឺកំពុងពេញនិយម និងមានប្រជាប្រិយភាពខ្លាំងណាស់ ហើយបានកើនឡើងជាងបន្តបន្ទាប់ ដោយនាំមុខគេក្នុងការដំឡើងមនុស្សយន្តឧស្សាហកម្មជាមួយនឹង ៥១% នៃការដំឡើងទូទាំងពិភពលោក៕