គម្រោងស្ថាបនាផ្លូវជាតិលេខ១០ ដែលមានប្រវែងសរុប ១៩៨គីឡូម៉ែត្រ សម្រេចបាន៩៦ភាគរយ ខណៈស្ពានខ្ពស់ជាងនៅកម្ពុជា សម្រេចបាន៩៣ភាគរយ ហើយគ្រោងដាក់ឱ្យប្រើប្រាស់សាកល្បងនៅចុងខែមីនា ឆ្នាំ២០២៥ មុនថ្ងៃបុណ្យប្រពៃណីខ្មែរ។
យោងតាមក្រសួងសាធារណៈការ និងដឹកជញ្ជូនបានឱ្យដឹងថា៖”បច្ចុប្បន្ននេះផ្លូវជាតិលេខ១០ ប្រជាពលរដ្ឋអាចធ្វើដំណើរបាន តែត្រូវមានការប្រុងប្រយ័ត្ន ដោយសារកំណាត់ផ្លូវខ្លះនៅជាក្រួសក្រហម មានសភាពហុយ ពិបាកក្នុងការមើលផ្លូវ ដោយមិនទាន់មានការសម្អាត”។
ផ្លូវជាតិលេខ១០នេះ ជាប្រភេទផ្លូវ Grade III ក្រាលកៅស៊ូពីរស្រទាប់ (DBST) មានប្រវែងផ្លូវសរុប១៩៨,៥១គីឡូម៉ែត្រ និងទទឹង ៩ម៉ែត្រ សាងសង់ឡើងក្រោមហិរញ្ញប្បទានពីរដ្ឋាភិបាលចិន មានទំហំទឹកប្រាក់សរុបប្រមាណជាង ១៨៨លានដុល្លារ។
ដោយឡែកចំពោះគម្រោងស្ពានលេខ២៨ ដែលជាស្ពានខ្ពស់ជាងគេនៅកម្ពុជា មានកម្ពស់៩០ម៉ែត្រ ប្រវែងសរុប ៥៣៧ម៉ែត្រ និងទទឹង១០ម៉ែត្រ។
បច្ចុប្បន្នស្ពាននេះសាងសង់រួចបាន៩៣ភាគរយ ដោយយករចនាតាមស្តង់ដារចិនហាយវេកម្រិត៣ ដែលមានបន្ទុកចំនួន ៥៥តោន ហើយចំណាយថវិកាអស់ជិត២៣លានដុល្លារ៕
