អ្នកសិល្បៈជាច្រើនរូបបានជួយចែករំលែកខ្លឹមសាររបស់តារាសម្តែងជើងចាស់អ្នកស្រី ចាន់ សោភ័ណ្ឌ ហៅ រ៉េត រ៉ូស បន្ទាប់ពីបានបង្ហោះផ្តាំផ្ញើដល់អ្នកសិល្បៈឯទៀតពេលទទួលថតត្រូវសួរឱ្យច្បាស់ពីពេលវេលាព្រោះផលិតករមួយចំនួនតូចកេងប្រវ័ញ្ចញើសឈាមតួចាស់ៗ។
កាលពីរសៀលថ្ងៃទី២១ មករា តារាសម្តែង រ៉េត រ៉ូស ដែលចំណាំដើរតួជាម្តាយនិងលេចមុខសលើខ្សែភាពយន្តនានាជាច្រើននិងការផ្សាយពាណិជ្ជកម្មមួយចំនួនបានបង្ហោះរូបមួយសន្លឹកអមដោយអត្ថន័យរៀបរាប់ពីការខកចិត្តរបស់ខ្លួន។ អ្នកស្រី បានលើកឡើងថា «សូមផ្ដាំដល់បងប្អូនសិល្បករពេលដែលទទួលគេថតត្រូវសួរឱ្យច្បាស់ពីពេលវេលាកុំឱ្យខកចិត្តដូចខ្ញុំ ផលិតករមួយចំនួនតូចកេងប្រវ័ញ្ចលើកម្លាំងញើសឈាមតួចាស់ៗខ្លាំងណាស់ ឱ្យយើងទៅដល់ទីតាំងម៉ោង ៧:៣០ ព្រឹកថតរហូតដល់ស្អែកឡើងម៉ោង ៦:០០ ព្រឹកវិញបានចប់ សុំសួរមតិបងប្អូនបន្តិចតើការគិតលុយឱ្យតែមួយថ្ងៃត្រឹមត្រូវដែរទេសូមខំមិនម្នាក់មួយមក តែខ្ញុំបានប្រាប់ថាខ្ញុំសុំគិត ២ថ្ងៃតែខាងផលិតកម្មនៅតែគិតឱ្យ១ថ្ងៃដូចជាបំបាក់ទឹកចិត្តយាយចាស់តាចាស់ពេកហើយ។ 
តារាសម្តែង រ៉េត រ៉ូស បានបន្តទៀតថា «ពេលតួចាស់ៗគេមិនហៅថតកាន់តែក្រគ្មានលុយទិញថ្នាំបែរជានិយាយបែបមើលងាយថាចាស់ៗសុំតែជំនួយ ចុះពេលដែលហៅគាត់ថតមួយរឿងមានប៉ុន្មានថ្ងៃ?ហើយមួយថ្ងៃឱ្យគាត់ប៉ុន្មានដែរ? នេះហើយជាហេតុផលដែលតួចាស់ដូចខ្ញុំកាន់តែក្រ»។
ខ្លឹមសារខាងនេះបានធ្វើឱ្យសាធារណជនផ្ទុះការចាប់អារម្មណ៍ ខណៈអ្នកសិល្បៈមួយចំនួនបានចែករំលែកខ្លឹមសាររបស់អ្នកស្រី។ តារាចម្រៀង គូម៉ា បានសរសេរថា «មិនត្រូវទេ»។ បវរកញ្ញា ដាំ សុភ័ក្រ្តស៊ីនឌី Miss planet Cambodia 2023 បានចែករំលែកជាមួយនឹងសម្តីថា «ខ្ជិលនិយាយ មួយចំនួន ថោកខ្លាំង!»។ 
ក្រៅពីនេះមានអ្នកមួយចំនួនទៀតបានចែករំលែកក្នុងនាមជាអ្នកសិល្បៈម្នាក់ថែមទាំងបង្ហើបដែរថាមិនត្រឹមតែតួចាស់ៗប៉ុណ្ណោះទេត្រូវបានផលិតករមួយចំនួនកេងប្រវ័ញ្ចញើសឈាមសូម្បីតែខ្លួនជាតួក្មេងៗក៏មានវាសនាមិនខុសគ្នាជួយរឿងបែបនេះដូចគ្នា៕
