កាលពីថ្ងៃទី ២១ ខែមករា ឆ្នាំ២០២៥ មានករណីកសិករនាំគ្នាតវ៉ាបិទផ្លូវជាតិលេខ២ ក្រោយពួកគាត់មិនមានទឹកគ្រប់គ្រាន់ក្នុងការធ្វើស្រូវ។
ក្រោយពីទទួលបានដំណឹងតវ៉ានេះ ឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ សហការជាមយយក្រសួងក្រសួងធនធានទឹក និងក្រសួងកសិកម្ម ចុះត្រួតពិនិត្យភ្លាមៗ ដោយសម្រេចបូមទឹកស្ទឹងព្រែកត្នោត និងទន្លេបាទី។
ក្រសួងពាក់ព័ន្ធ បានបូមទឹកពីទន្លេបាទីតាមស្ថានីយទី២២ និងទី២៣ ដែលមានចំងាយជាង១០គីឡូម៉ែត្រ បញ្ចូលក្នុងប្រឡាយមេហនុមាន ដើម្បីសង្គ្រោះស្រូវប្រាំងប្រមាណ ៤ពាន់ហិកតារបស់ប្រជាកសិករចំនួន ៣ ៥០០គ្រួសារ។
បន្ថែមពីនេះ មន្ទីរធនធានទឹកខេត្តតាកែវ ក៏ចុះពិនិត្យស្ថានភាពជាក់ស្តែងនៅតាមប្រឡាយ៧៨ និងប្រឡាយមេហនុមាន ដើម្បីនាំទឹកពីស្ទឹងព្រែកត្នោតទៅជួយសង្រ្គោះស្រូវប្រាំង និងដោះស្រាយបញ្ហាប្រឈមចំពោះមុខរបស់ប្រជាកសិករបន្ថែមទៀតផងដែរ។
គួរបញ្ជាក់ថា ក្នុងផែនការឆ្នាំ២០២៥ នៅស្រុកបាទី ការបង្កបង្កើនផលស្រូវរដូវប្រាំងមានចំនួន ២ពាន់ហិកតា ប៉ុន្តែប្រជាពលរដ្ឋបានអនុវត្តការធ្វើស្រែប្រាំងរហូតដល់ ៤ពាន់ហិកតា ក្នុងពេលដែលប្រភពទឹកជាក់ស្តែងនៅក្នុងមូលដ្ឋានមិនមានគ្រប់គ្រាន់សម្រាប់បម្រើឱ្យការងារបង្កបង្កើនផល៕
