ក្នុងឱកាសបុណ្យចូលឆ្នាំចិន ពលរដ្ឋចិនតែងតែធ្វើម្ហូបអាហារសែន និងសម្តែងការលោតមុងសាយ ដែលជាជំនឿរបស់ដូនតាពីបុរាណក្នុងការកម្ចាត់ព្រាយបិសាច។
ជុំវិញការបណ្តេញព្រាយបិសាចនេះ ពលរដ្ឋចិនជំនាន់មុន ក៏ប្រើប្រាស់មធ្យោបាយមួយទៀត ដោយពួកគេនាំគ្នាប្រើដើមឫស្សីញាត់រំសេវ ហើយដុតវា ដើម្បីបង្កើតបានជាផាវ។
ពលរដ្ឋចិនមានជំនឿថា ការដុតផាវ ជាការហៅលាបជ័យចូលផ្ទះ ដើម្បីបណ្តេញសេចក្ដីអាក្រក់ ភាពអពមង្គល ឬជម្រះឧបទ្រុបចង្រៃនៅក្នុងឆ្នាំចាស់ និងបើកផ្លូវនាំសំណាងនៅឆ្នាំថ្មី។
ផាវ ត្រូវបានខ្ចប់ជាមួយក្រដាសពណ៌ក្រហម ដែលជាពណ៌នាំសំណាងក្នុងថ្ងៃចូលឆ្នាំចិន ដែលអាចធ្វើឱ្យមានសំឡេងលាន់ឮខ្លាំង ឬខ្សោយទៅតាមបរិមាណរំសេវ។
គួរបញ្ជាក់ថា ចំពោះការដុតផាវនិងកាំជ្រួច ក្នុងថ្ងៃបុណ្យចូលឆ្នាំចិន នៅប្រទេសកម្ពុជា ត្រូវបានហាមឃាត់ និងចាត់ទុកជាសកម្មភាពខុសច្បាប់ បើមានអ្នកប្រព្រឹត្តិ នឹងត្រូវទទួលទោសតាមច្បាប់៕
