ប្រទេសថៃ ៖ កាលពីថ្ងៃទី១៧ ខែធ្នូ ឆ្នាំ២០២៤ សារព័ត៌មាន Thairath រាយការណ៍ថា គ្រូពេទ្យបានលើកឡើងពីមន្ទីរពេទ្យថៃនៅតាមព្រំដែនទទួលព្យាបាលអ្នកជំងឺមកពីប្រទេសជិតខាង ធ្វើឱ្យប៉ះពាល់សិទ្ធិពលរដ្ឋថៃ ។ មន្ទីរពេទ្យថៃអនុវត្តតាមគោលការណ៍សិទ្ធិមនុស្ស និងចំណាយប្រាក់ព្យាបាលបែបមនុស្សធម៌ ហើយគ្រូពេទ្យបានសំណូមពរឱ្យដោះស្រាយបញ្ហានេះ ដោយការសហការជាមួយប្រទេសជិតខាង ។

ហ្វេសប៊ុកផេកឈ្មោះ Drama-addict បានបង្ហោះសាររបស់គ្រូពេទ្យនៅមន្ទីរពេទ្យថៃតាមព្រំដែនថា ស្ត្រីមីយ៉ាន់ម៉ាបានមកសម្រាលកូនដោយវះកាត់នៅមន្ទីរពេទ្យថៃរយៈពេលយូរ ហើយត្រូវបង់ថ្លៃព្យាបាលជាច្រើនសែនបាត ។ ស្ត្រីរូបនេះមកមន្ទីរពេទ្យថៃជាមួយអ្នកបកប្រែ ហើយប្រាប់ថា ពេលសម្រាលកូនរួចហើយ នាងនឹងទទួលលិខិតបញ្ជាក់កំណើតកូនដើម្បីមកព្យាបាលនៅថៃពុំគិតថ្លៃ ។

គ្រូពេទ្យបន្តថា អ្នកជំងឺបរទេសដឹងច្បាស់បែបនេះ តើប្រទេសថៃនឹងទទួលបន្ទុកបានយូរប៉ុនណា? ថៃមិនត្រឹមតែចំណាយថ្លៃព្យាបាលអ្នកជំងឺបរទេសប៉ុណ្ណោះទេ ប៉ុន្តែគ្រូពេទ្យថៃនឹងទទួលបន្ទុកការងារច្រើនជាងមុន ។ ពលរដ្ឋថៃទទួលសេវាព្យាបាលនៅមន្ទីរពេទ្យយឺតយ៉ាវ ដោយសារមន្ទីរពេទ្យត្រូវព្យាបាលអ្នកជំងឺបរទេសយ៉ាងច្រើន ហើយទម្រាំបានពិនិត្យជំងឺ ពលរដ្ឋថៃត្រូវរង់ចាំលេខរៀង ។ បច្ចុប្បន្ន អ្នកជំងឺបរទេសដង្ហែគ្នាមកព្យាបាលនៅថៃ ដោយសារពួកគេដឹងថា ថៃគាំទ្រ ។ មិនយូរទេ ប្រព័ន្ធសុខាភិបាលថៃនឹងដួលរលំ បើរដ្ឋាភិបាល ឬក្រសួងពុំចាត់វិធានការ ។

ក្រោយគ្រូពេទ្យលើកឡើងពីកំណើនអ្នកជំងឺបរទេសនៅមន្ទីរពេទ្យព្រំដែន ជំនួយការរដ្ឋមន្ត្រីក្រសួងសុខាភិបាល លោក ថាណាក់គ្រីត ជីតប៉ារីរ៉ាត់ និយាយថា ជនបរទេសគ្មានសិទ្ធិព្យាបាលពុំគិតថ្លៃនៅមន្ទីរពេទ្យថៃទេ លើកលែងតែពួកគេធ្វើការស្របច្បាប់នៅថៃ ។ ពលរដ្ឋប្រទេសជិតខាងចូលមកថៃខុសច្បាប់ ដូចជា នៅស្រុកមេស៊ត ខេត្តតាក គឺមន្ទីរពេទ្យថៃបានព្យាបាលបែបមនុស្សធម៌ និងគោរពគោលការណ៍សិទ្ធិមនុស្ស ដោយពុំទាមទារថ្លៃព្យាបាល ។ ប៉ុន្តែអ្នកជំងឺទាំងនេះអាចព្យាបាលបានតែ១៤ថ្ងៃ ត្រូវត្រឡប់ទៅប្រទេសខ្លួនវិញ ។

ករណីអ្នកជំងឺក្រីក្រ គឺគ្រូពេទ្យថៃពិបាកបណ្តេញពួកគេឱ្យត្រឡប់ទៅប្រទេសវិញដោយពុំព្យាបាល ប៉ុន្តែវាក៏ក្លាយជាបន្ទុករបស់ថៃដូចគ្នា ដែលរដ្ឋាភិបាលត្រូវតែពិភាក្សាបញ្ហានេះជាមួយប្រទេសជិតខាង ពីព្រោះថវិកាឧបត្ថម្ភមន្ទីរពេទ្យបានពីការបង់ពន្ធរបស់ពលរដ្ឋថៃ ។ ប៉ុន្តែដោយសារការប្រកាន់យកគោលការណ៍សិទ្ធិមនុស្ស ទើបថៃជួយសង្គ្រោះអ្នកជំងឺក្រីក្រ ឬស្ត្រីឈឺពោះសម្រាលកូន បើគ្រូពេទ្យបដិសេធពុំព្យាបាលនឹងប៉ះពាល់ក្រមសីលធម៌ ៕

ប្រទេសស្កុតឡែន៖ ក្នុងចំណោមស៊ុតមាន់រាប់ពាន់លានគ្រាប់ មានស៊ុតមាន់តែមួយប៉ុណ្ណោះត្រូវបានគេយកមកលក់ក្នុងតម្លៃរហូតដល់ ២៥៣ ដុល្លារអាមេរិក តើស៊ុតមាន់មួយគ្រាប់នេះមានលក្ខណៈពិសេសយ៉ាងណាទៅ ទើបតម្លៃរបស់វាខ្ពស់យ៉ាងនេះ។

យើងដឹងហើយថាស៊ុតមាន់គឺជាអាហារសុខភាពដែលមានតម្លៃថោ.កសមរម្យ ហើយត្រូវបានគេដាក់លក់ពាសពេញទីផ្សារ ជាទូទៅគេមិនដែលទិញស៊ុតមាន់មួយគ្រាប់នោះទេ ភាគច្រើនគឺគេទិញម្តង ៥ ទៅ ១០ គ្រាប់ដោយសារតម្លៃថោ.ក អាចប្រើប្រាស់បានច្រើនមុខ។

ទោះជាយ៉ាងណាយោងតាមការចុះផ្សាយរបស់សារព័ត៌មានបរទេស BBC ស៊ុតមាន់មួយគ្រាប់នេះស្រាប់តែត្រូវបានគេដាក់លក់ក្នុងតម្លៃរហូតដល់ ២០០ ផោន ឬស្មើនឹង ២៥៣ ដុល្លារឯណោះ។ មិនត្រឹមតែលក់បានថ្លៃប៉ុណ្ណោះទេ ស៊ុតមាន់មួយគ្រាប់នេះថែមទាំងត្រូវបានដាក់លក់ក្នុងទម្រង់ជាការដេញថ្លៃ ដោយមនុស្សជាច្រើនព្យាយាមដេញថ្លៃទិញវាទៀតផង។ បើយោងតាម BBC មូលហេតុដែលស៊ុតមាន់មួយគ្រាប់នេះមានតម្លៃថ្លៃ គឺដោយសាររូបរាងរបស់វាខុសប្លែកពីគេ ពោលគឺមូលដូចបាល់តែម្តង ខណៈរូបរាងពិសេសនេះបានកើតឡើងតាមធម្មជាតិដោយពុំមានការកែច្នៃអ្វីឡើយ។

ប្រភពខាងលើបានបន្តថា តាមពិតទៅស៊ុតមាន់មួយគ្រាប់នេះគឺគ្រាន់តែជាស៊ុតមាន់ធម្មតាប៉ុណ្ណោះ ដោយសាររូបរាងចម្លែករបស់វា ទើបគេយកមកលក់ក្នុងតម្លៃខ្ពស់តែម្តង។ ស៊ុតមាន់ចម្លែកនេះ ត្រូវបានគេរកឃើញនៅផ្សារទំនើបក្នុងប្រទេសស្កុតឡែនដោយអ្នកស្រី Roz Rapp ទិញវាមួយប្រអប់មានចំនួន ១៥ គ្រាប់ជាមួយតម្លៃ ២.៤០ ដុល្លារ ក្នុងគោលបំណងទុកញ៉ាំជាធម្មតា។ ប៉ុន្តែក្នុងចំណោម ១៥ គ្រាប់អ្នកស្រីក៏ប្រទះឃើញស៊ុតមាន់មួយគ្រាប់ខុសគេ ហើយក៏មានគំនិតដាក់លក់ដោយការដេញថ្លៃតែម្តង។

ទោះជាយ៉ាងណាប្រាក់ចំនួន ២៥៣ ដុល្លារអាមេរិកនេះត្រូវបានអ្នកស្រី Roz Rapp ដែលជាម្ចាស់ស៊ុតនេះ បរិច្ចាគវាទៅឱ្យមូលនិធិ Iuventas ដែលជាអង្គការសប្បុរសធម៌ ផ្តល់ការណែនាំ ការបង្វឹកជីវិត និងជំនួយសុខភាពផ្លូវចិត្តដល់យុវជននៅទូទាំង Oxfordshire៕

ប្រទេសឥណ្ឌា៖ ធ្លាប់គិតថាមានតែប្រទេសចិនទេដែលចំណាយពេលតិចក្នុងការសាងសង់ ហើយទទួលបានផលលឿន ទោះជាយ៉ាងណាថ្មីៗនេះឥណ្ឌាបានធ្វើឱ្យពិភពលោកភ្ញាក់ផ្អើលនូវការសាងសង់ផ្លូវមិនធម្មតារបស់ខ្លួន ដោយចំណាយពេលត្រឹមតែ ១០០ ម៉ោងប៉ុណ្ណោះក្នុងការសាងសង់ផ្លូវជាង ១០០ គីឡូម៉ែត្រ។

ក្រសួងដឹកជញ្ជូនផ្លូវគោក និងផ្លូវហាយវ៉េ បាននិយាយនៅក្នុងសេចក្តីថ្លែងការណ៍មួយថា ប្រទេសឥណ្ឌាបានបង្កើតប្រវត្តិសាស្ត្រដោយចាក់បេតុង bituminous ប្រវែង ១១២.៥ គីឡូម៉ែត្រនៅលើផ្លូវ Ghaziabad-Aligarh Expressway ក្នុងរយៈពេលត្រឹមតែ ១០០ ម៉ោង ក្លាយជា​ប្រទេស​ដំបូង​គេ​ក្នុង​ពិភពលោក​ដែល​សម្រេច​បាន​ស្នាដៃ​នេះ។

ផ្លូវ Ghaziabad-Aligarh Expressway លាតសន្ធឹង ១១៨ គីឡូម៉ែត្រ ដើរតួនាទីយ៉ាងសំខាន់ក្នុងការតភ្ជាប់ការដឹកជញ្ជូនរវាងតំបន់ដែលមានប្រជាជនរស់នៅច្រើន។ លោក Nitin Gadkari រដ្ឋមន្ត្រីដឹកជញ្ជូនផ្លូវគោក និងផ្លូវហាយវេ បាននិយាយថា តាមរយៈការតភ្ជាប់តំបន់ឧស្សាហកម្ម តំបន់កសិកម្ម និងស្ថាប័នអប់រំ វាក៏ដើរតួជាផ្លូវពាណិជ្ជកម្មដ៏សំខាន់ សម្រួលដល់ចលនាទំនិញ និងរួមចំណែកដល់ការអភិវឌ្ឍន៍សេដ្ឋកិច្ចក្នុងតំបន់ផងដែរ។

Gadkari បានបន្តថា គម្រោងនេះប្រើប្រាស់បច្ចេកវិទ្យា Cold Central Plant Recycling (CCPR) គឺជាបច្ចេកវិទ្យាបៃតងប្រកបដោយភាពច្នៃប្រឌិត ដែលអនុញ្ញាតឱ្យកែច្នៃវត្ថុធាតុដើម អាចកែច្នៃបាន ៩០% កាត់បន្ថយការប្រើប្រាស់សម្ភារៈ និងកាត់បន្ថយផលប៉ះពាល់បរិស្ថាន ដោយសង្កត់ធ្ងន់ចំពោះនិរន្តរភាព និងប្រសិទ្ធភាព។

សមិទ្ធផលដ៏អស្ចារ្យនេះនេះនឹងធានានូវភាពចល័តពិសេសសម្រាប់អ្នកដំណើរគ្រប់រូប ការលើកកម្ពស់ពាណិជ្ជកម្ម និងការជំរុញសកម្មភាពសេដ្ឋកិច្ចក្នុងតំបន់ តាមរយៈការអភិវឌ្ឍផ្លូវល្បឿនលឿនលំដាប់ពិភពលោកក្នុងល្បឿនលឿនបំផុតដោយមិនប៉ះពាល់ដល់គុណភាព។

គួរបញ្ជាក់ដែរថា ផ្លូវ Ghaziabad-Aligarh ស្ថិតក្នុងរដ្ឋ Uttar Pradesh ប្រទេសឥណ្ឌា ដែលកំណត់ត្រានេះត្រូវបានធ្វើឡើងនៅខែឧសភា ឆ្នាំ២០២៣ ជាផ្លូវដែលសាងសង់លឿនជាងគេបំផុតក្នុងពិភពលោក ដោយវាជាផ្លូវល្បឿនលឿនក្រាលដោយប្រភេទបេតុង bituminous ផ្តល់ភាពងាយស្រួលក្នុងការសាងសង់ និងធន់សម្រាប់ការប្រើប្រាស់៕

ប្រទេសថៃ ៖ សារព័ត៌មានថៃបានរាយការណ៍កាលពីថ្ងៃទី១៧ ខែធ្នូ ឆ្នាំ២០២៤ ថា មន្ទីរសុខាភិបាលថៃបានដាស់តឿនឱ្យពលរដ្ឋប្រុងប្រយ័ត្ន និងការពារខ្លួន ក្រោយរកឃើញកូនសិស្ស គ្រូ និងបុគ្គលិកសាលាឆ្លងជំងឺ Norovirus រហូតដល់១,៤៣៦នាក់ ដោយសារពួកគេចូលរួមក្នុងកម្មវិធីប្រកួតកីឡារបស់សាលារៀននៅស្រុកក្លេង ខេត្តរ៉ាក់យ៉ង ។

Norovirus គឺជាជំងឺឆ្លងរាតត្បាតមួយដែលពិភពលោកកំពុងតាមដាន ក្រោយពីវាឆ្លងខ្លាំងនៅប្រទេសចិន ។ ជំងឺនេះនឹងបណ្តាលឱ្យរលាកប្រព័ន្ធរំលាយអាហារ ឈឺពោះ ក្អួតចង្អោរ ហើយវានឹងធ្វើទុក្ខធ្ងន់ធ្ងរលើកុមារ មនុស្សចាស់ និងអ្នកសុខភាពខ្សោយ ហើយបច្ចុប្បន្ន ពុំទាន់រកឃើញថ្នាំការពារនៅឡើយទេ ។

កាលពីថ្ងៃទី១៦ ខែធ្នូ កន្លងមក អគ្គនាយករងនៃមន្ទីរសុខាភិបាល លោក ធិទិ ស្វែងថាំ និយាយថា ជំងឺ Norovirus បានឆ្លងរាតត្បាតខ្លាំងក្នុងសាលារៀន២កន្លែងនៅស្រុកក្លេង ខេត្តរ៉ាក់យ៉ង គឺកូនសិស្សឆ្លងចំនួន១,៤១៨នាក់ រីឯគ្រូ និងបុគ្គលិកសាលា ឆ្លង១៨នាក់ សរុបស្មើនឹង១,៤៣៦នាក់ ។

មូលហេតុបណ្តាលឱ្យជំងឺនេះឆ្លងខ្លាំងក្នុងសាលារៀនទាំង២ គឺមេរោគនៅលាយឡំជាមួយទឹក និងទឹកកក ដែលកូនសិស្សផឹកពេលមកចូលរួមប្រកួតកីឡា ហើយកូនសិស្សបានឆ្លងជំងឺនេះច្រើនដោយសារប្រព័ន្ធការពាររាងកាយខ្សោយជាងមនុស្សពេញវ័យ ។ ជំងឺនេះឆ្លងច្រើននៅរដូវរងា ជាពិសេស សាលារៀន ភោជនីយដ្ឋាន មន្ទីរពេទ្យ កន្លែងថែទាំកុមារតូចៗ រថយន្តក្រុង និងនាវាទេសចរណ៍ ។

ជំងឺនេះងាយឆ្លងពីមនុស្សម្នាក់ទៅមនុស្សម្នាក់តាមយៈការបរិភោគអាហាររួមគ្នា និងឆ្លងតាមទឹក អាកាសធាតុ ការប៉ះពាល់ និងការដកដង្ហើម ។ ក្រៅពីនេះ វាឆ្លងតាមរយៈការប៉ះពាល់អ្នកជំងឺដោយផ្ទាល់ ការប៉ះពាល់សម្ភារៈផ្ទុកមេរោគ Norovirus និងបរិស្ថានគ្មានអនាម័យ ។

*វិធីការពារខ្លួនកុំឱ្យឆ្លងជំងឺ Norovirus ៖
-បរិភោគអាហារទើបចម្អិនថ្មីៗ និងប្រើប្រាស់ស្លាបព្រារួមដួសអាហារ
-លាងបន្លែ និងផ្លែឈើឱ្យស្អាត
-លាងដៃដោយទឹកស្អាត សាប៊ូដុំ និងអាល់កុល មុននិងក្រោយធ្វើការងារប្រចាំថ្ងៃ
-ផឹកទឹកស្អាត និងចៀសវាងការប៉ះពាល់ទឹកមិនស្អាត

*រោគសញ្ញា និងភាពធ្ងន់ធ្ងររបស់ជំងឺ Norovirus ៖ គឺរាគរូស ចុកពោះ ក្អួតចង្អោរ ឈឺក្បាល ក្តៅខ្លួន ឈឺចាប់ខ្លួនប្រាណ និងអស់កម្លាំង ។

វានឹងចាប់ផ្តើមបញ្ចេញរោគសញ្ញា ចាប់ពី២៤ម៉ោង ទៅ៤៨ម៉ោង ក្រោយពេលឆ្លង ហើយធ្វើទុក្ខខ្លាំងចំពោះកុមារដែលមានប្រព័ន្ធការពាររាងកាយខ្សោយ ដូចជា ៖ ខ្វះខាតទឹកខ្លាំង និងអាចស្លាប់បាន បើពុំព្យាបាលទាន់ពេលវេលា ៕