ប្រទេសកូរ៉េខាងត្បូង ៖ អ្នកដំណើរសម្រុកលុបចោលសំបុត្រយន្តហោះរបស់ក្រុមហ៊ុនអាកាសចរណ៍ Jeju Air ជិត៧ម៉ឺនសំបុត្រ ក្រោយយន្តហោះធ្លាក់ពី Runway ពេលចុះចតនៅអាកាសយានដ្ឋានរបស់កូរ៉េខាងត្បូង ហើយអ្នកដំណើរបារម្ភថា គ្មានសុវត្ថិភាព ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣០ ខែធ្នូ ឆ្នាំ២០២៤ ។

នៅថ្ងៃទី២៩ ខែធ្នូ កន្លងមក យន្តហោះរបស់ក្រុមហ៊ុនអាកាសចរណ៍ Jeju Air ជើងហោះហើរ 2216 បានធ្លាក់ពី Runway ពេលចុះចតនៅអាកាសយានដ្ឋានអន្តរជាតិមូអាន់ ប្រទេសកូរ៉េខាងត្បូង ។ ហេតុការណ៍នេះបណ្តាលឱ្យអ្នកដំណើរស្លាប់រហូតដល់១៧៩នាក់ ហើយមានតែបុគ្គលិកអាកាសចរណ៍ ២នាក់ប៉ុណ្ណោះនៅរស់រានមានជីវិត ។

សារព័ត៌មានកូរ៉េខាងត្បូងរាយការណ៍ថា អ្នកដំណើរសម្រុកលុបចោលសំបុត្រយន្តហោះជាបន្តបន្ទាប់ កាលពីថ្ងៃទី៣០ ខែធ្នូ កន្លងមក ដោយសារពួកគេបារម្ភពីគ្រោះថ្នាក់ ក្រោយពីយន្តហោះ Jeju Air ឆេះនៅអាកាសយានដ្ឋានបណ្តាលឱ្យស្លាប់អ្នកដំណើរយ៉ាងច្រើន ។ ហេតុការណ៍នេះនឹងប៉ះពាល់ដល់វិស័យទេសចរណ៍កូរ៉េខាងត្បូងយ៉ាងខ្លាំង ទាំងការធ្វើដំណើរក្នុងស្រុក និងឆ្លងប្រទេស ។

ក្រុមហ៊ុន Jeju Air បញ្ជាក់ថា សំបុត្រយន្តហោះចំនួន៦៨,០០០សំបុត្រ ត្រូវបានអ្នកដំណើរលុបចោលត្រឹមតែ១ថ្ងៃប៉ុណ្ណោះ ។ ក្នុងចំណោមសំបុត្រយន្តហោះទាំងនេះ ក្នុងនោះមានសំបុត្រជាង៣៣,០០០សំបុត្រ គឺជាការធ្វើដំណើរក្នុងស្រុក រីឯសំបុត្រ៣៤,០០០ ទៀតជាការធ្វើដំណើរឆ្លងប្រទេស ។ រីឯក្រុមហ៊ុនអាកាសចរណ៍នានាបានផ្អាកផ្សាយពាណិជ្ជកម្មតាមទូរទស្សន៍ និងអនឡាញ ព្រមទាំងការផ្សព្វផ្សាយពីដំណើរកម្សាន្តជាក្រុមផងដែរ ។

ដោយឡែក យន្តហោះ Jeju Air មួយគ្រឿងទៀតរបស់កូរ៉េខាងត្បូង ជើងហោះហើរ 7C101 ដឹកអ្នកដំណើរ១៦១នាក់ ដែលធ្វើដំណើរពីអាកាសយានដ្ឋានអន្តរជាតិគីមផូ នៅភាគខាងលិចទីក្រុងសេអ៊ូល ទៅកាន់កោះសេជូ ក៏មានបញ្ហាកង់យន្តហោះដែរ ពេលចេញដំណើរកាលពីព្រឹកថ្ងៃទី៣០ ខែធ្នូ ហើយក៏សម្រេចចិត្តត្រឡប់មកអាកាសយានដ្ឋានគីមផូ វិញ ៕

បច្ចុប្បន្ន ការធ្វើដំណើរកម្សាន្តរវាងប្រទេសចិន និងឡាវកាន់តែងាយស្រួលជាងមុន ដោយសារប្រព័ន្ធទូទាត់ប្រាក់តាមរយៈ QR Code បានធ្វើឱ្យភ្ញៀវទេសចរអាចធ្វើប្រតិបត្តិការទូទាត់ប្រាក់ដោយពុំចាំបាច់ប្រើប្រាស់សាច់ប្រាក់ ។ ភ្ញៀវទេសចរចិនអាចស្កេន QR Code ទូទាត់ថ្លៃផលិតផល និងសេវាកម្មនៅឡាវ ហើយប្រទេសទាំងពីរមានគម្រោងឱ្យភ្ញៀវទេសចរឡាវអាចស្កេន QR Code នៅចិនបានដូចគ្នា ។

កាលពីថ្ងៃទី១៩ ខែធ្នូ ឆ្នាំ២០២៤ ក្រុមហ៊ុន Lao National Payment Network (LAPNet) និងក្រុមហ៊ុនចិន UnionPay International (UPI) បានចុះហត្ថលេខាលើកិច្ចព្រមព្រៀងមួយនៅទីក្រុងសៀងហៃ ដើម្បីដំណើរការប្រព័ន្ធទូទាត់ប្រាក់តាមរយៈ QR Code រវាងប្រទេសទាំងពីរដើម្បីសម្រួលដល់ភ្ញៀវទេសចរ ។ នេះបើតាមការចុះផ្សាយរបស់សារព័ត៌មាន The Laotian Times ។

នៅក្នុងប្រព័ន្ធនេះ ភ្ញៀវទេសចរដែលប្រើប្រាស់ UnionPay នឹងអាចទូទាត់ប្រាក់តាម QR Code ក្នុងកម្មវិធីទូរស័ព្ទដៃ ដែលហាងលក់ទំនិញនានាបានភ្ជាប់ជាមួយធនាគារជាសមាជិករបស់ LAPNet ចំនួន៨កន្លែង ព្រមទាំងធនាគារពាណិជ្ជកម្មបរទេសឡាវ (BCEL), ធនាគាររួមគ្នាអភិវឌ្ឍន៍ (JDB) និងធនាគារលើកកម្ពស់កសិកម្ម (APB) ។

នៅដំណាក់កាលដំបូង ភ្ញៀវទេសចរចិនអាចស្កេនទូទាត់ប្រាក់ថ្លៃផលិតផល និងសេវាកម្មផ្សេងៗនៅប្រទេសឡាវ ហើយដំណាក់កាលទី២ ភ្ញៀវទេសចរឡាវនឹងអាចស្កេនទូទាត់ប្រាក់ថ្លៃផលិតផល និងសេវាកម្មនៅចិនបានយ៉ាងងាយស្រួលដូចគ្នា ។ នៅចុងខែធ្នូ ឆ្នាំវ២០២៤ ប្រទេសទាំងពីរកំពុងតែដំណើរការគម្រោង និងពុំទាន់ប្រកាសពីថ្ងៃចាប់ផ្តើមប្រើប្រាស់ជាផ្លូវការទេ ។

គួរបញ្ជាក់ថា ចិន គឺជាប្រទេសទី៤ ដែលបានដំណើរការប្រព័ន្ធទូទាត់ប្រាក់ឆ្លងព្រំដែនជាមួយប្រទេសឡាវ បន្ទាប់ពីប្រទេសវៀតណាម កម្ពុជា និងថៃ ៕

ប្រទេសជប៉ុន ៖ ការរៀបចំពិធីឆ្លងឆ្នាំនៅជប៉ុនមានលក្ខណៈខុសប្លែកពីប្រទេសនានានៅលើពិភពលោក គឺពេលរៀបចំពិធីម្តងៗមានពលរដ្ឋជប៉ុនមកចូលរួមជាច្រើននាក់ ហើយពួកគេត្រូវតែសើចឱ្យឮសំឡេងខ្លាំងៗដើម្បីបណ្តេញរឿងរ៉ាវអាក្រក់ៗឱ្យចេញពីជីវិតក្នុងឆ្នាំចាស់ និងសូមឱ្យជួបតែសំណាងល្អក្នុងឆ្នាំថ្មី ។

មនុស្សជាច្រើននាក់បានមកប្រមូលផ្តុំគ្នានៅវត្តមួយកន្លែងក្នុងទីក្រុងអូសាកា ដើម្បីចូលរួមពិធីសើចឮខ្លាំងៗ ដែលវត្តតែងតែរៀបចំពិធីនេះនៅរៀងរាល់ចុងឆ្នាំ ។ ពួកគេជឿថា ការសើចនឹងជួយបណ្តេញរឿងរ៉ាវ និងការចងចាំអាក្រក់ៗក្នុងឆ្នាំចាស់ ហើយពួកគេនឹងជួបតែសំណាងល្អក្នុងជីវិតក្នុងឆ្នាំថ្មី ឬសម្រេចបំណងប្រាថ្នា ។

សារព័ត៌មានជប៉ុនរាយការណ៍ថា នៅចុងឆ្នាំ២០២៤នេះ មានពលរដ្ឋមកចូលរួមពិធីជាង១,០០០នាក់ ហើយពួកគេឈរសើចអស់រយៈពេលជាង២០នាទី ។ ព្រះសង្ឃក្នុងវត្តបានសើចមុនគេ ដើម្បីឱ្យអ្នកចូលរួមទាំងអស់សើចតាមក្រោយជាចង្វាក់ ដែលពិធីនេះមានភាពស្រដៀងគ្នានឹងការមកចូលរួមទស្សនាតន្ត្រីលើឆាក ។

ពលរដ្ឋជប៉ុនម្នាក់បាននិយាយមកកាន់សារព័ត៌មានថា ខ្លួនមកចូលរួមពិធីសើចជារៀងរាល់ឆ្នាំ ពុំដែលខកខានទេ ពីព្រោះក្រោយពីបានសើចរួចហើយធ្វើឱ្យខ្លួនមានអារម្មណ៍ថា មានសេចក្តីសុខ និងទទួលយកសំណាងល្អ ។ រីឯពលរដ្ឋជប៉ុនម្នាក់ទៀតដែលទើបចូលរួមពិធីសើចលើកដំបូងប្រាប់ថា ខ្លួនសើចឡើងហត់ ហើយមួយជីវិតនេះ ពុំធ្លាប់បានសើចបែបនេះពីមុនមកទេ ។

ក្រោយពីបញ្ចប់ពិធីសើច អ្នកចូលរួមទាំងអស់ក៏បាននាំគ្នាអង្គុយសុំពរឱ្យជួបតែសំណាងល្អ គ្រួសារមានសេចក្តីសុខ និងសម្រេចក្តីប្រាថ្នាក្នុងឆ្នាំថ្មីរៀងរាល់ខ្លួន ។ សរុបមក វាជាពិធីខុសប្លែកមួយ ខណៈប្រទេសផ្សេងៗបានប្រគំតន្ត្រី, បាញ់កាំជ្រួច, សូត្រធម៌ និងរៀបចំកម្មវិធីសប្បាយៗជាច្រើនទៀតដើម្បីអបអរការឆ្លងឆ្នាំ ៕