វិស័យទេសចរណ៍នាពេលបច្ចុប្បន្ននេះគឺមានការរីកដុះដាលខ្លាំងណាស់ ដោយមានកន្លែងកម្សាន្តល្បីល្បាញជាច្រើនជុំវិញពិភពលោក។ ទោះជាយ៉ាងណាកន្លែងកម្សាន្តល្បីល្បាញចំនួន ៦ នេះ ភ្ញៀវទេសចរគឺមិនអាចទៅទស្សនាបានទៀតទេនៅឆ្នាំក្រោយដោយសារហេតុផលសំខាន់ៗដូចខាងក្រោម៖

១.សណ្ឋាគារល្បីៗចំនួនពីរនៅ Las Vegas សហរដ្ឋអាមេរិក៖ សណ្ឋាគារកាស៊ីណូ Tropicana និង Mirage នៅ Las Vegas នឹងឈប់ទទួលភ្ញៀវនៅឆ្នាំក្រោយ។ មូលហេតុគឺដោយសារសណ្ឋាគារ Tropicana ត្រូវបានកម្ទេចនៅក្នុងខែតុលាដើម្បីសាងសង់កីឡដ្ឋានសម្រាប់ក្រុមកីឡាបេស្បល Oakland Athletics វិញ។ ខណៈសណ្ឋាគារ Mirage នឹងប្តូរឈ្មោះទៅជា Hard Rock ដែលមានរាងដូចហ្គីតា។ ដូច្នេះនៅឆ្នាំ ២០២៥ ភ្ញៀវទេសចរទៅកាន់ទីក្រុងនេះនឹងលែងមានឱកាសស្នាក់នៅ Tropicana និង Mirage ទៀតហើយ។

២.ក្លឹបប៉ារីសដ៏ល្បីល្បាញ Chez Michou៖ Chez Michou គឺជាក្លឹបប៉ារីសដ៏ល្បីល្បាញស្ថិតក្នុងប្រទេសបារាំង ដែលមានតន្ត្រី របាំ និងការសម្តែងកំប្លែង ឥឡូវនេះបានបិទហើយ ដោយសារបញ្ហាហិរញ្ញវត្ថុ បន្ទាប់ពីម្ចាស់ដ៏ល្បីល្បាញ Michel Michou Catty បានទទួលមរណភាពនៅឆ្នាំ ២០២០។

៣.សារមន្ទីរសិល្បៈ Rubin នៅទីក្រុងញូវយ៉ក សហរដ្ឋអាមេរិក៖ សារមន្ទីរ Rubin ដែលជាកន្លែងប្រមូលផ្ដុំសិល្បៈហិមាល័យដ៏ធំបំផុតមួយរបស់ពិភពលោកបានប្រកាសបិទជាផ្លូវការហើយ ដោយស្នាដៃមួយចំនួនរបស់ខ្លួន រួមទាំងបន្ទប់ទីសក្ការបូជាពុទ្ធសាសនាទីបេដ៏ពេញនិយម នឹងផ្លាស់ទៅសារមន្ទីរ Brooklyn វិញ។

៤.សារមន្ទីរសិល្បៈ Fotografiska នៅទីក្រុងញូវយ៉ក សហរដ្ឋអាមេរិក៖ សារមន្ទីរសិល្បៈដ៏សំខាន់មួយទៀតនៅទីក្រុងញូវយ៉កគឺ Fotografiska ក៏បាននិយាយលាទៅកាន់អ្នកទស្សនានៅពេលដែលវាត្រូវបានបិទនៅថ្ងៃទី ២៩ ខែកញ្ញាផងដែរ។

៥.ព្រះវិហារ Wayfarers Chapel នៃរដ្ឋ California សហរដ្ឋអាមេរិក៖ ព្រះវិហារកញ្ចក់ Wayfarers ត្រូវបានទទួលស្គាល់ដោយរដ្ឋាភិបាលថាជាកន្លែងសម្គាល់ប្រវត្តិសាស្ត្រជាតិនៅភាគខាងត្បូងរដ្ឋកាលីហ្វ័រញ៉ា ប៉ុន្តែកន្លែងនេះបានបិទហើយ ដោយសារការរងគ្រោះនៃការប្រែប្រួលអាកាសធាតុនៅពេលប្រឈមមុខនឹងហានិភ័យនៃការរអិលបាក់ដីធ្ងន់ធ្ងរ។ អាស្រ័យហេតុនេះ អ្នកដែលទទួលខុសត្រូវមើលថែព្រះវិហារ ក៏សម្រេចចិត្តរុះរើកន្លែងនេះហើយកំពុងរកកន្លែងផ្សេងជំនួសវិញ។

៦.ផ្លូវតូចៗនៅ Kyoto ប្រទេសជប៉ុន៖ រាជធានីបុរាណនៃទីក្រុងក្យូតូ គឺជាគោលដៅទេសចរណ៍ដ៏ល្បីល្បាញដែលទាក់ទាញអ្នកទស្សនាយ៉ាងច្រើន។ ប៉ុន្តែដោយសារតែភាពល្បីល្បាញនេះ អ្នករស់នៅទីនេះតែងមានការរំខានដោយសារភ្ញៀវកក់កុញពេក ធ្វើឱ្យក្រុមប្រឹក្សាមូលដ្ឋានបានបោះឆ្នោតបិទផ្លូវ និងផ្លូវដើរជាច្រើននៅក្នុងទីក្រុងក្យូតូ ដើម្បីការពារភ្ញៀវទេសចរពីការថតរូប geisha ដោយគ្មានការអនុញ្ញាត។ ហេតុនេះអ្នកទេសចរនឹងមិនអាចចូលទៅក្នុងតំបន់ទាំងនេះបានទៀតឡើយ៕

ប្រទេសចិន ៖ យោងតាមការចុះផ្សាយរបស់ទស្សនាវដ្តី Nature Communications កាលពីចុងខែធ្នូ ឆ្នាំ២០២៤ បញ្ជាក់ថា ក្រុមអ្នកជំនាញចិនបានផលិតប្រព័ន្ធសាកថ្មចល័តគ្មានខ្សែសម្រាប់សាកដ្រូហោះនៅលើមេឃ និងបញ្ជាក់ពីទីតាំងរបស់ដ្រូន ។ នេះចាត់ទុកថា គឺជាការអភិវឌ្ឍបច្ចេកវិទ្យាប្រព័ន្ធសាកថ្មដ៏ទំនើបដំបូងគេលើពិភពលោក ។

ក្រុមអ្នកជំនាញមកពីផ្នែកវិស្វកម្មអេឡិចត្រូនិករបស់សាកលវិទ្យាល័យ Xidian បានផលិតប្រព័ន្ធសាកថ្មចល័តគ្មានខ្សែសម្រាប់សាកដ្រូនពេលកំពុងហោះលើមេឃ ហើយប្រព័ន្ធនេះអាចចាប់សញ្ញា បញ្ជាក់ទីតាំងដ្រូន និងទំនាក់ទំនងយ៉ាងមានប្រសិទ្ធភាព ។

ប្រធានក្រុមអ្នកជំនាញនិយាយថា បច្ចេកវិទ្យានេះ គឺជាការសាយភាយរលកអេឡិចត្រូម៉ាញ៉េទិកយ៉ាងឆ្លាតវៃ ហើយវាអាចបង្កើនប្រសិទ្ធភាពការផ្ទេរថាមពលគ្មានខ្សែតាមពេលវេលាជាក់លាក់ ដោយផ្អែកតាមការផ្លាស់ប្តូរបរិស្ថាន និងលក្ខណៈពិសេសរបស់ឧបករណ៍ ។

បច្ចេកវិទ្យាថ្មីនេះមានគុណសម្បត្តិពិសេស បើប្រៀបធៀបនឹងការសាកថ្មគ្មានខ្សែសម្រាប់ឧបករណ៍អេឡិចត្រូនិកកន្លងមក ពីព្រោះវាអាចសាកឧបករណ៍ជាច្រើនគ្រឿងដែលកំពុងតែបម្លាស់ទី ដូចជា ៖ សាកដ្រូនលើមេឃ និងសាកមនុស្សយន្តកំពុងធ្វើចលនា ជាដើម ។

ប្រព័ន្ធនេះអាចផ្គត់ផ្គង់ថាមពលទៅឱ្យដ្រូន និងមនុស្សយន្តប្រកបដោយទំនុកចិត្ត និងមាននិរន្តរភាព ដែលអ្នកជំនាញចិនបច្ចុប្បន្ន បានព្យាយាមអភិវឌ្ឍន៍បច្ចេកវិទ្យាយ៉ាងឆាប់រហ័ស ។ វានឹងជួយដោះស្រាយបញ្ហាផ្នែកបច្ចេកទេសសម្រាប់ការសាកថ្មគ្មានខ្សែកាលពីមុន ដែលត្រូវពឹងផ្អែកលើអាំងឌុចស្យុងអេឡិចត្រូម៉ាញ៉េទិច, ប្រើប្រាស់ថាមពលច្រើន និងប្រឈមជាមួយដែនកំណត់បរិស្ថាន ៕

ប្រទេសចិន ៖ ស្នាមសាក់លើផ្ទៃមុខបានធ្វើឱ្យជីវិតជួបតែការបរាជ័យអស់រយៈពេល៦ឆ្នាំ ហើយខ្ញុំដាក់ពាក្យធ្វើការជាច្រើនកន្លែងហើយ ប៉ុន្តែគ្មានក្រុមហ៊ុនណាទទួលទេ ។ ខ្ញុំចង់លុបវាចេញវិញ ពីព្រោះចង់មានជីវិតល្អប្រសើរជាងនេះ ហើយសូមផ្តាំទៅយុវវ័យផងថា កុំសាក់ដូចខ្ញុំ ប្រយ័ត្នអស់អនាគត ។ នេះបើតាមការលើកឡើងរបស់បុរសចិនម្នាក់ អាយុ២៤ឆ្នាំ ។

បុរសរូបនេះបានរៀបរាប់ពីបទពិសោធន៍ដ៏សែនឈឺចាប់ កាលពីចុងខែធ្នូ ឆ្នាំ២០២៤ ថា លោកចាប់ផ្តើមសាក់លើផ្ទៃមុខ និងរាងកាយកាលពី៦ឆ្នាំមុន ហើយចាប់ពីពេលនោះមក លោកទៅដាក់ពាក្យធ្វើការនៅក្រុមហ៊ុនណា ក៏គេអត់ទទួលដែរ ។ វាធ្វើឱ្យលោកចុះចាញ់ក្នុងជីវិត រហូតដល់សម្រេចចិត្តលុបស្នាមសាក់លើមុខចេញ ។

កាលពីវ័យកុមារ លោកមានជំងឺធ្លាក់ទឹកចិត្ត ទើបចង់បង្ហាញពីអារម្មណ៍របស់ខ្លួនតាមរយៈស្នាមសាក់ និងយល់ថា ការសាក់ធ្វើឱ្យលោកមានសេចក្តីសុខ ។ នៅឆ្នាំ២០១៨ លោកក៏បានសាក់ចាប់ពីក្បាល មុខ ក និងពេញខ្លួនប្រាណទាំងអស់ ប៉ុន្តែរយៈពេលកន្លងមកនេះ លោករស់នៅយ៉ាងលំបាក គ្មានការងារធ្វើ ហើយធ្វើឱ្យសេដ្ឋកិច្ចគ្រួសារដុនដាបយ៉ាងខ្លាំង ។

ក្រៅពីនេះ លោកត្រូវបានអ្នកលេងបណ្តាញសង្គមជាច្រើនមើលងាយពេលលោក Live ទៀតផង ហើយដោយសារផ្ទៃមុខមានស្នាមសាក់ច្រើនពេក ធ្វើឱ្យលោកពិបាក Login ចូលក្នុងទូរស័ព្ទដៃ និងពិបាកផ្លាស់ប្តូរ Face ID ។ នាពេលថ្មីៗនេះ លោកក៏ចាប់ផ្តើមលុបស្នាមសាក់លើមុខវិញ ដើម្បីដោះស្រាយបញ្ហាទាំងអស់ ។

ចំណែកអ្នកជំនាញបំបាត់ស្នាមសាក់ប្រាប់ថា ស្នាមសាក់ទូទៅអាចលុបជ្រះ ចាប់ពី៣លើក ទៅ៤លើក ប៉ុន្តែស្នាមសាក់របស់បុរសនេះពិបាកលុប ដោយសារមានពណ៌ក្រាស់ៗ និងពាសពេញទាំងអស់ ជាពិសេស នៅជុំវិញភ្នែក ។ ស្បែកជុំវិញភ្នែកនេះមានសភាពស្តើងខ្លាំង ហើយការលុបស្នាមសាក់នៅចំណុចនេះអាចកើតដំបៅបាន ។

រឿងរ៉ាវរបស់បុរសរូបនេះបានធ្វើឱ្យអ្នកលេងបណ្តាញសង្គមចិនចាប់អារម្មណ៍យ៉ាងខ្លាំង មនុស្សមួយចំនួនបានសរសើរពីភាពក្លាហានចំពោះការនិយាយពីបញ្ហារបស់ខ្លួនជាសាធារណៈ និងសម្រេចចិត្តលុបស្នាមសាក់ ។ រីឯអ្នកខ្លះទៀតបានចែករំលែករឿងរ៉ាវនេះសម្រាប់ជាឧទាហរណ៍ដាស់តឿនយុវវ័យផ្សេងទៀតកុំឱ្យយកគំរូតាម ពីព្រោះវាជាការបំផ្លាញអនាគត ៕

កូរ៉េខាងត្បូង៖ Squid Game រដូវកាលទី ២ បានចាក់បញ្ចាំងនៅថ្ងៃទី ២៦ ខែធ្នូ ដែលមានចំនួន ៧ ភាគប៉ុន្តែរឿងនេះហាក់ទទួលបានមតិចម្រុះជាច្រើន។ ទោះបីជាមានការរិះ.គន់ថាមិនសូវល្អមើលដូចវគ្គ ១ ក៏ដោយ ក៏ Squid Game វគ្គ ២ នៅតែទាក់ទាញអ្នកទស្សនាយ៉ាងច្រើន ថែមទាំងទទួលបានភាពជោគជ័យខ្លាំងជាងវគ្គដំបូងទៀតផង ដោយបានបង្កើតកំណត់ត្រាថ្មីដែលមិនធ្លាប់មានពីមុនមកសម្រាប់ Netflix។

យោងតាមការចុះផ្សាយរបស់ទស្សនាវដ្តី Forbes បានឱ្យដឹងថា Squid Game រដូវកាលទី ២ បានជាប់ចំណាត់ថ្នាក់លេខ ១ ដំណាលគ្នាក្នុងប្រទេសទាំង ៩៣ នៅលើ Netflix គឺជារឿងដំបូងគេដែលមានអ្នកមើលច្រើនជាងគេបំផុត។ នេះមិនមែនជារឿងធម្មតាទេដែល Netflix សម្រេចបាននូវភាពអស្ចារ្យដ៏គួរឱ្យចាប់អារម្មណ៍ទាំងនេះ សូម្បីតែកម្មវិធីធំៗដែលធ្វើបានល្អនៅលើតារាងពិភពលោក ក៏មិនដែលបង្ហាញខ្លួននៅលេខរៀងទី ១ ដំណាលគ្នាដែរ ដោយសារតំបន់ខ្លះតែងតែចូលចិត្តខ្សែភាពយន្តខុសៗគ្នា។

ខណៈ Squid Game រដូវកាលទី ២ ស្រាប់តែទាក់ទាញអ្នកទស្សនាច្រើនមិនធ្លាប់មាន ដែលបង្ហាញថាវគ្គ ២ គឺទទួលបានភាពជោគជ័យខ្លាំងជាងវគ្គដំបូងទៅទៀត។ ទោះបីជាយ៉ាងនេះក្តីអ្នកប្រើប្រាស់អនឡាញកូរ៉េជាច្រើនបានប្រមូលផ្តុំគ្នានៅក្នុងវេទិកាអនឡាញដ៏ពេញនិយមមួយដើម្បីសម្តែងការរិះគន់ចំពោះរឿងនេះ។ មនុស្សជាច្រើនកំពុងត្អូញត្អែរអំពីការអភិវឌ្ឍន៍យឺត ខណៈដែលអ្នកផ្សេងទៀតបានយកបញ្ហាជាមួយការសម្តែងរបស់តួសម្តែងថាជារឿងខ្វះចន្លោះនិងមានភាពធុញទ្រាន់។ ទោះយ៉ាងណា ទន្ទឹមនឹងមតិអវិជ្ជមានចំពោះរដូវកាលទី២នេះ ទស្សនិកជនមួយចំនួនបានវាយតម្លៃដែរថាឈុតឆាកបែប ‘Deer Hunter’ មានភាពរំជើបរំជួលយ៉ាងខ្លាំងហើយរដូវកាលនេះគឺពោរពេញទៅដោយសកម្មភាពដែលជំរុញដោយប្រធានបទនៃការសងសឹក។

គួរបញ្ជាក់ផងដែរថា រដូវកាលដំបូងនៃ Squid Game បានចេញផ្សាយនៅឆ្នាំ២០២១ ហើយបានក្លាយជាបាតុភូតសកល ដោយទទួលបានពានរង្វាន់តារាសម្តែងឆ្នើម Lee Jung-jae និងអ្នកដឹកនាំរឿង Hwang Dong-hyuk ពានរង្វាន់អ្នកដឹកនាំឆ្នើមនៅឯពានរង្វាន់ Primetime Emmy Awards លើកទី ៧៤ ក្នុងឆ្នាំ២០២២។ ក្នុងរដូវកាលទី១គឺ រកប្រាក់ចំណូលបានខ្ពស់គុណនឹង ៤០ ដងនៃដើមទុនផលិតដោយបានចំណាយទឹកប្រាក់ក្នុងការផលិតចំនួន ២១.៤ លានដុល្លារ ខណៈរកចំណូលបានមកវិញជិត ៩០០ លានដុល្លារ៕

ប្រទេសកូរ៉េខាងត្បូង ៖ កាលពីថ្ងៃទី២៩ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា យន្តហោះរបស់ក្រុមហ៊ុនអាកាសចរណ៍ Jeju Air ជើងហោះហើរ 7C 2216 ដែលដឹកអ្នកដំណើរ និងបុគ្គលិកអាសចរណ៍ សរុប១៨១នាក់ ចាកចេញពីអាកាសយានដ្ឋានសុវណ្ណភូមិ ប្រទេសថៃ ទៅកាន់អាកាសយានដ្ឋានមូអាន់ (Muan) ប្រទេសកូរ៉េខាងត្បូង បានធ្លាក់ពីផ្លូវ Runway បណ្តាលឱ្យមនុស្សស្លា.ប់ រហូតដល់១៧៩នាក់ និងមានមនុស្សតែ២នាក់ប៉ុណ្ណោះនៅមានជីវិត ។

អតីតអាកាសយានិកកូរ៉េខាងត្បូងបាននិយាយពីមូលហេតុបណ្តាលឱ្យមានហេតុការណ៍សោកនាដកម្មនេះថា គឺមកពីផ្លូវ Runway មានចម្ងាយខ្លីត្រឹមតែ២,៨០០ម៉ែត្រ ហើយយន្តហោះមានបញ្ហាកង់មុខ កង់ក្រោយ និងប្រព័ន្ធហ្វ្រាំង ។ អតីតអាកាសយានិកបានណែនាំឱ្យអ្នកដំណើរប្រយ័ត្នគ្រោះថ្នាក់ដោយសារការធ្វើដំណើរតាមយន្តហោះចុះចតនៅអាកាសយានដ្ឋានមាន Runway ខ្លី ។

យន្តហោះនេះមានបុគ្គលិកអាកាសចរណ៍៦នាក់ និងអ្នកដំណើរ១៧៥នាក់ ក្នុងនោះអ្នកដំណើរកូរ៉េខាងត្បូង ១៧៣នាក់ និងថៃ ២នាក់ បានធ្លាក់ពី Runway ក្នុងអាកាសយានដ្ឋានអន្តរជាតិមូអាន់ ខេត្តឆុលឡាខាងត្បូង ដែលនៅឆ្ងាយពីទីក្រុងសេអ៊ូល ទៅភាគនិរតីប្រមាណ២៨៨គីឡូម៉ែត្រ និងទៅបុករបងបណ្តាលឱ្យចេញអណ្តាតភ្លើងយ៉ាងឆាប់រហ័ស ។

Runway ក្នុងអាកាសយានដ្ឋានមូអាន់ មានចម្ងាយខ្លីបំផុត ទើបអាកាសយានិកប្រើជំនាញខ្ពស់ដើម្បីចុះចតយន្តហោះ បើមានបញ្ហាកង់មុខ ឬប្រព័ន្ធហ្វ្រាំងនៅបរិវេណស្លាបយន្តហោះ គឺវាកាន់តែធ្វើឱ្យអាកាសយានិកពិបាកថែមទៀត ដូចជា ៖ ពុំអាចទម្លាក់ចុះកង់មុខ និងកង់ក្រោយបាន ។ ហេតុនេះ អ្នកដំណើរត្រូវជិះយន្តហោះចុះនៅ Runway ខ្លី គួរជ្រើសរើសក្រុមហ៊ុនអាកាសចរណ៍ដែលមានការហោះហើរទៀងទាត់ទៅអាកាសយានដ្ឋាននោះ ពីព្រោះក្រុមហ៊ុននឹងជ្រើសរើសអាកាសយានិកមានជំនាញចុះចតនៅ Runway ខ្លី ។ នេះបើតាមការអះអាងរបស់អ្នកជំនាញផ្នែកយន្តហោះ ។

រីឯភ្នាក់ងារជួយសង្គ្រោះបញ្ជាក់ថា យន្តហោះព្យាយាមចុះចតជាបន្ទាន់ដោយសារប្រព័ន្ធចុះចតមានបញ្ហា ប៉ុន្តែយន្តហោះពុំអាចបន្ថយល្បឿនបាន ទើបធ្លាក់ពី Runway ហើយអាចមកពីយន្តហោះបុកសត្វស្លាបផងដែរ ។ ពួកគេបានជួយអ្នកដំណើរប្រុសម្នាក់ និងស្ត្រីម្នាក់ចេញពីកន្ទុយយន្តហោះ ។ វាជាហេតុការណ៍សោកនាដកម្មដ៏ធ្ងន់ធ្ងរបំផុតនៅកូរ៉េខាងត្បូង តាំងពីយន្តហោះ Korean Air ធ្លាក់នៅកោះកួម ក្នុងឆ្នាំ១៩៩៧ បណ្តាលឱ្យអ្នកដំណើរស្លាប់ជាង២០០នាក់ ។

មេដឹកនាំកូរ៉េខាងត្បូងបានប្រកាសកាន់ទុក្ខ ចំនួន៧ថ្ងៃ សម្រាប់យន្តហោះដឹកអ្នកដំណើរ Jeju Air ជួបគ្រោះថ្នាក់បណ្តាលឱ្យមនុស្សស្លា.ប់ ចំនួន ១៧៩នាក់ និងចាត់ទុកថា គឺជាការបាត់បង់ជីវិតមនុស្សច្រើនបំផុតក្នុងរយៈពេលច្រើនឆ្នាំមកនេះ ៕