ស្ថិតនៅក្នុងតំបន់ដែលមានការអភិវឌ្ឍយ៉ាងឆាប់រហ័សនៃខេត្តកោះកុង គម្រោង AHNAKOT Smart City នឹងកែប្រែខេត្តកោះកុង ក្លាយជាខេត្តឆ្នេរសមុទ្រ ដ៏មានសក្តានុពលបំផុតមួយ។

គម្រោងនេះ ស្ថិតក្រោមការវិនិយោគរបស់ក្រុមហ៊ុន Bilderberg Group ដោយផ្តោតទៅលើការរស់នៅទីក្រុងដែលមានបច្ចេកវិទ្យាទំនើបមិនធ្លាប់មាននៅកម្ពុជា។

AHNAKOT Smart City លាតសន្ធឹងលើផ្ទៃដី ១២ ម៉ឺនហិកតា ដោយចាយទឹកប្រាក់ប្រមាណ ៦០០ ពាន់លានដុល្លារក្នុងការសាងសង់។

ទីក្រុងនេះ អាចនុញ្ញាតឱ្យប្រជាជនរស់នៅបានចំនួនចន្លោះពី ៥ លានទៅ ៦ លាននាក់ និងជួយបង្កើតឱកាសការងារដល់ប្រជាជនចំនួន ៧០មុឺននាក់ រួមជាមួយការពង្រីកទីផ្សារក្នុងតំបន់ ជាពិសេសដោះស្រាយបញ្ហាចម្បងនៃការគ្មានទីផ្សារជូនប្រជាពលរដ្ឋ។

គួរបញ្ជាក់ថា គម្រោងនេះ ត្រូវបាន លោក DENIS GIGIL AHNAKOT ប្រធានក្រុមហ៊ុន Bilderberg Group ប៉ាន់ប្រមាណថា គម្រោងទាំងមូលនឹងត្រូវបញ្ចប់នៅក្នុងរយៈពេល៥ ទៅ៧ ឆ្នាំខាងមុខ ហើយនឹងបើកដាក់ឲ្យដំណើរការនៅតំបន់មួយជាជំហានៗផងដែរ៕

កាលពីថ្ងៃទី ១ ខែមករា ឆ្នាំ ២០២៥ គេហទំព័រទេសចរណ៍ល្បីឈ្មោះ Agoda បានចុះផ្សាយថា រាជធានីភ្នំពេញ គឺជាគោលដៅទេសចរណ៍ដ៏សប្បាយបំផុត ថែមទាំងមានតម្លៃសមរម្យជាងគេនៅអាស៊ី សម្រាប់ការប្រារព្ធបុណ្យឆ្លងឆ្នាំសកល ២០២៥ តាមពីក្រោយដោយទីក្រុងហាណូយ និងទីក្រុងហ្សាកាតា(ឥណ្ឌូណេស៊ី)។ ខណៈដែលទីក្រុងបាំងកក (ថៃ) និងតូក្យូ(ជប៉ុន) គឺមានតម្លៃថ្លៃបំផុត។

រាជធានីភ្នំពេញ ដែលជាទីក្រុងដ៏ទំនើបស៊ីវិស័យ ភ្ញៀវទេសចរមិនត្រឹមតែចំណាយតិចសម្រាប់ដំណើរកម្សាន្តប៉ុណ្ណោះទេ ថែមទាំងទទួលបាននូវភាពសប្បាយរីករាយនឹងស្នាមញញឹមប្រឡប់ទៅវិញទៀត ដែលនាថ្ងៃទី ៣១ ខែធ្នូ ឆ្នាំ២០២៤ កន្លងទៅនេះ ភ្នំពេញបានរៀបចំព្រឹត្តិការណ៍ដ៏ធំសម្បើម«សាទរកម្ពុជា» ដែលប្រព្រឹត្តិទៅមុខព្រះបរមរាជវាំង។

តាមរយៈព្រឹត្តិការណ៍ដ៏អស្ចារ្យនេះ បានធ្វើឲ្យពិភពលោកកត់សម្គាល់ រហូតធ្វើឲ្យគេហទំព័របរទេសចុះផ្សាយអំពីការប្រារព្ធពិធីបុណ្យឆ្លងឆ្នាំសកល កក្រើករាជធានីភ្នំពេញ ជាមួយនឹងក្បួនដង្ហើរវប្បធម៌ ទស្សនីយភាពចម្រុះ ក៏ដូចជាការបាញ់កាំជ្រួចអបអរសាទរតាមមាត់ទន្លេ និងមុខព្រះបរមរាជវាំង ដែលជាទីតំាងប្រវត្តិសាស្រ្តខ្មែរ។

បើក្រឡេកទីកាន់ទីក្រុងហាណូយ ត្រូវបានគេហទំព័រ Agoda ចុះផ្សាយថាជាទីតំាងឆ្លងឆ្នាំ ដែលមានតម្លៃសមរម្យជាងគេទី ២ នៅអាស៊ី បន្ទាប់ពីកម្ពុជា។ កាលពីរាត្រីថ្ងៃឆ្លងឆ្នាំ ទីក្រុងដ៏ចំណាស់មួយនេះក៏បានរៀបចំនូវព្រឹត្តិការណ៍ពិសេសៗ ដែលរួមមានការប្រារព្ធពិធីនៅមាត់បឹង Hoan Kiem ការសម្តែងសិល្បៈប្រពៃណី ការតាំងពិពណ៍ផ្សេងៗ ដែលឆ្លុះបញ្ចាំងពីការលាយបញ្ចូលគ្នារវាងទំនើបកម្មនិងវប្បធម៌ប្រពៃណី។

មិនខុសគ្នាប៉ុន្មានទេ ហ្សាកាតា ដែលជារដ្ឋធានីរបស់ប្រទេសឥណ្ឌូណេស៊ី ក៏មានរៀបចំអបអរពិធីបុណ្យឆ្លងឆ្នាំដូចគ្នាដែរ ដោយរួមទាំងការប្រគុំតន្ត្រី និងការបាញ់កាំជ្រួចនៅទូទាំងទីក្រុង បានក្លាយជាទីតាំងដ៏អស្ចារ្យ ទាក់ទាញ ថែមទាំងមានតម្លៃសមរម្យទៀត។

គេហទំព័រ Agoda បានគូសបញ្ជាក់ទៀតថា នៅភ្នំពេញ ទីក្រុងដ៏ទំនើប បន្ទប់សណ្ឋាគារមួយយប់ត្រឹមតែ ៦៧ ដុល្លារប៉ុណ្ណោះ។ ខណៈប្រទេសវៀតណាម ៧៩ ដុល្លារ និងហ្សាកាតា (ឥណ្ឌូណេស៊ី) ៩២ ដុល្លារ៕

ថ្មីៗនេះលើបណ្តាញសង្គម មហាជនភាគច្រើនហាក់មានការចាប់អាម្មណ៍ខ្លាំងលើយុវជនមួយរូប ដែលជាអ្នក Review ផលិតផល និយាយស្តីបែបធម្មតាៗ តែកំប្លែងស្ងួត ខណៈទទួលបានសន្ទុះនូវការគាំទ្រកាន់តែខ្លាំង។

Reviewer ឬអ្នក Review ជាទូទៅ ត្រូវបានស្គាល់ថាជាមនុស្សពោរពេញដោយទេពកោសល្យក្នុងការនិយាយប្រម៉ូតអំពីផលិតផលអ្វីមួយ តាមវិធីសាស្រ្តពួកគេរៀងៗខ្លួន ដើម្បីទទួលបានភាពទាក់ទាញពីអ្នកទស្សនា។ យ៉ាងណា បើក្រឡេកទៅកាន់យុវជនមួយរូប ដែលមានឈ្មោះថា Chen Ra Dee នេះវិញហាក់ខុសប្លែកពីអ្នក Review ឯទៀតណាស់ ដែលស្ទើរតែគ្មាននរណាអាចធ្វើដូចទាល់តែសោះ។

នៅលើបណ្តាញសង្គមរបស់យុវជនរូបនេះ តែងដាក់បង្ហោះនូវវីដេអូប្រម៉ូតផលិតផលយ៉ាងច្រើនសម្បូរបែប តែអ្វីដែលធ្វើឲ្យមហាជនចាប់អារម្មណ៍ខ្លាំងនោះគឺទៅលើស្តាយ៍ Review របស់គាត់, និយាយប្រម៉ូតផលិតផលធម្មតាៗ តែពាក្យពេចន៍របស់គាត់បែរជាពោរពេញដោយភាពកំប្លែងយ៉ាងខ្លាំង រហូតធ្វើឲ្យអ្នកទាំងអស់គ្នាសើចដោយមិនដឹងខ្លួន។

ជារឿយៗ យុវជនរូបនេះ តែងនិយាយចំអន់បែបលេងសើច និងនិយាយចំៗលើផលិតផល មិនចេះលើកជើងសរសើរ (មិនចេះប្រើក៏ប្រាប់ថាមិនចេះប្រើ មិនស្អាតក៏ប្រាប់ថាមិនស្អាតជាដើម)។ យ៉ាងណា គាត់បានទាញយកចំណាប់អារម្មណ៍ពីមហាជនតាមស្តាយ៍របស់គាត់ ខណៈដែលវីដេអូនីមួយៗទទួលបានអ្នកទស្សនារហូតដល់រាប់សែន រាប់លាននាក់ផងដែរ៕

ថ្មីៗនេះ នៅលើបណ្តាញសង្គម មហាជនភាគច្រើនហាក់ប្រតិ.កម្មយ៉ាងខ្លាំងទៅលើពាក្យសម្តីបស់បណ្ឌិតមួយរូបដែលនិយាយអំពី«ខ្លឹមសារសមាធិ» រហូតដល់មានការវិភាគនិងវែកញែកពេញពិភពអ៊ីធើណែត។

លោកបណ្ឌិតសុខ ទូច បានមានប្រសាសន៍ថា«ក្មេងៗសម័យនេះបែរជាទៅសមាធិ? វ័យនេះមិនមែនជាវ័យសមាធិទេ តែជាវ័យប្រយុទ្ធ»។ លោកបានសង្កត់ធ្ងន់ទៀតថា«ការអប់រំទៅវិញទេ អានសៀវភៅឲ្យច្រើន យកចំណេះដឹងនិងគំនិតទៅប្រើ ទើបជាការប្រសើរ»។

យ៉ាងណា ត្រឹមពាក្យសម្តីរបស់លោកបណ្ឌិតត្រឹមប៉ុណ្ណេះ ក៏បានបណ្តាលឲ្យអ្នកលេងបណ្តាញសង្គមវិភាគព្រោងព្រាត ដោយមានទាំងអ្នកពេញចិត្តនិងអ្នកមិនពេញចិត្ត ដោយមតិខ្លះបានលើកឡើងថា«ប្រយុទ្ធត្រង់នេះប្រហែលគាត់ចង់សម្ដៅថាយុវជនគួរខិតខំរៀនសូត្រនិងប្រឹងធ្វើការ។ ដូច្នេះ ប្រសិនបើបានខំរៀនហើយចំណាយពេលសមាធិព្យាបាលផ្នត់គំនិតបន្ថែមទៀត គឺល្អទាំងព្រមតែម្ដង»។

«គាត់និយាយត្រង់ហ្នឹងពិតជាមានន័យអីចឹងហើយ! គ្រាន់តែឆ្ងល់ថា រៀនក៏ល្អ សមាធិក៏ល្អ ហេតុអ្វីត្រូវបោះបង់ចោលមួយ? ម្យ៉ាងទៀត គេមិនមែនអង្គុយតែសមាធិទេ ដែលនេះក៏មិនខុសអីពីជីវិតប្រចាំថ្ងៃ រវល់ខ្លះ ទំនេរខ្លះហ្នឹងឯង»។

«សមាធិក៏ជាមេរៀនជីវិតមួយដ៏សំខាន់ដែរ គឺអប់រំហ្នឹងហើយ ហើយក៏មិនមែនទៅសមាធិ ភ្លេចការភ្លេចងារ ភ្លេចរៀនសូត្រចំណេះដឹងផ្សេងៗដែរ គេមានពេលមានវេលាគេដែរតើ»។«ការបង្រៀនក្មេងឲ្យធ្វើសមាធិនិងអប់រំផ្លូវចិត្តតំាងពីក្មេង ធ្វើឲ្យគាត់មិនដើរផ្លូវខុស»។ «ព្រះបាទជ័យវរ្ម័នទី៧ មុននឹងយាងទៅធ្វើចម្បាំងក៏ទ្រង់ធ្វើសមាធិដែរ! ព្រោះកាលណាចិត្តមានសមាធិល្អហើយ ធ្វើកិច្ចអ្វីក៏សម្រេចបានគ្រប់យ៉ាង មិនថាការសិក្សា របរទទួលទាន»៕

មួយរយៈក្រោយនេះ កូនដំរីញីមួយក្បាលដែលត្រូវបានគេស្គាល់ថាជា«អូនលំផាត់» កំពុងតែទាញយកចំណាប់អារម្មណ៍ពីមហាជន ភ្លុកទឹកភ្លុកដីទៅទស្សនាកម្សាន្តជាបន្តបន្ទាប់ នៅឯសួនសត្វភ្នំតាម៉ៅ លើទឹកដីខេត្តតាកែវ។

ថ្មីៗនេះ យោងតាមការបង្ហោះនៅលើបណ្តាញសង្គម បានបង្ហាញអំពីផ្ទាំងតូចល្មមមួយ ដែលជាតារាពេលវេលាដើម្បីជួបជាមួយអូនលំផាត់។ តាមការគូសបញ្ជាក់ អូនលំផាត់ គឺបើកឲ្យភ្ញៀវចូលទស្សនាជារៀងរាល់ថ្ងៃតែម្តង ដោយនៅពេលព្រឹក ចន្លោះម៉ោង ៩៖៣០-៩៖៥០នាទី និង ម៉ោង១០៖៣០-១០៖៥០នាទី។ នៅពេលរសៀលវិញ គឺនៅចន្លោះម៉ោង ១៖៣០-១៖៥០នាទី និង ម៉ោង ៣៖៣០-៣៖៥០។

សូមជម្រាបថា អូនលំផាត់ ជាកូនដំរីញីមួយក្បាល មានអាយុប្រហែល ៦ខែ និងមានទំងន់១៣៨គីឡូក្រាម ដោយបច្ចុប្បន្ន កំពុងតែទទួលការសង្គ្រោះនិងព្យាបាលនៅឯសួនសត្វភ្នំតាម៉ៅ។ ភាពល្បីល្បាញរបស់អូនលំផាត់ ដោយសារតែភាពឆ្លាតវៃ រូបរាងដ៏ខ្ជូតគួរឲ្យស្រលាញ់ និងប្រវត្តិដ៏ជូរចត់។

មុនពេលដែលកូនដំរីមួយក្បាលនេះមកដល់សួនសត្វភ្នំតាម៉ៅ គឺមានរបួសជើងមុខខាងស្តាំដោយសារការដាក់អន្ទាក់របស់ព្រានព្រៃ។ អូនលំផាត់ ត្រូវបានបញ្ជូនមកកាន់មជ្ឈមណ្ឌលសង្គ្រោះភ្នំតាម៉ៅ កាលពីអំឡុងថ្ងៃទី ១០ ខែធ្នូ ឆ្នាំ២០២៤ យ៉ាងណា ដោយសារតែមានរបួសជើងមុខខាងស្តាំនោះធ្ងន់ធ្ងរ គឺត្រូវការពេលវេលាព្យាបាលយូរទៀត ខណៈវាក៏មិនទាន់ចេះស៊ីចំណីបានត្រឹមត្រូវនោះទេ។ ដូច្នេះហើយ នាងតូចដំរីញីមួយក្បាលនេះក៏ត្រូវតែមានការថែទាំឲ្យបានដិតដល់ពីក្រុមការងារ នៅឯសួនសត្វនោះ។

បើក្រឡេកទៅកាន់បណ្តាញសង្គមវិញ ទាំងនៅលើ Tik Tok និងហ្វេសបុក នាងតូចលំផាត់ហាក់មានភាពល្បីល្បាញខ្លាំង ដោយមានការដាក់បង្ហោះនិងចែករំលែកជាបន្តបន្ទាប់ ខណៈក៏មានសប្បុរសជននានាឧបត្ថម្ភជាថវិកាផង និងជូនជាទឹកដោះគោរជូនផងដែរ។ អ្នកលេងបណ្តាញសសង្គមភាគច្រើនបានហៅនាងតូចលំផាត់ថាជា កូនដំរីនាំសំណាង ត្រូវតែទៅលេងឲ្យបានម្តងក្នុងមួយឆាកជីវិត៕