ប្រទេសចិន៖ ទីក្រុង Dayong Town ត្រូវបានសាងសង់ឡើងតាមរចនាបទនៃទីក្រុងបុរាណ ដោយបានចំណាយថវិកាអស់ ៣០០ លានដុល្លារអាមេរិក ដើម្បីស្វាគមន៍ភ្ញៀវទេសចរ ប៉ុន្តែនៅពេលសាងសង់រួចទីក្រុងមួយនេះស្រាប់តែគ្មានភ្ញៀវមកទស្សនាសោះឡើយ។

ទីក្រុង Dayong Town បានបើកដំណើរការនៅឆ្នាំ ២០២១ ដែលសាងសង់ដោយអ្នកវិនិយោគក្នុងក្តីសង្ឃឹមថានឹងទាក់ទាញអ្នកទេសចរកាន់តែច្រើនទៅកាន់ទីក្រុង Zhangjiajie ខេត្ត Hunan ប្រទេសចិន ប៉ុន្តែនៅពេលសាងសង់រួចទីក្រុងនេះទទួលភ្ញៀវបានត្រឹមតែ ១០ នាក់ប៉ុណ្ណោះក្នុងមួយថ្ងៃ។

តំបន់ទេសចរណ៍នេះមានទីតាំងនៅផ្លូវ Jiefang ជាមួយនឹងការវិនិយោគសរុបជាង ២.២ ពាន់លានយន់ (ប្រមាណ ៣០០ លានដុល្លារអាមេរិក) សាងសង់ឡើងតាមរចនាបទនៃទីក្រុងបុរាណ ដើម្បីរំលឹកដល់ប្រទេសចិនបុរាណ ដោយមានត្រីមាសដ៏ស្រស់បំព្រង រួមជាមួយព្រះពន្លា ជញ្ជាំងថ្ម និងផ្លូវធ្វើពីថ្ម។ ប៉ុន្តែបន្ទាប់ពីរយៈពេលបីឆ្នាំនៃការបើកដំណើរការ ទីប្រជុំជន Dayong ស្រាប់តែក្លាយទៅជាទីក្រុងដែលគេបោះចោល ឬមើលរំលងទៅវិញ។ ជំនួសឱ្យការរកលុយ កន្លែងកម្សាន្តនេះបានទទួលរងការខាតបង់ជាង ៥០០ លានយន់ (ប្រមាណជាង ៧០ លានដុល្លារ) ចាប់តាំងពីបើកដំណើរការមក។

គិតត្រឹមឆមាសទីមួយនៃឆ្នាំ ២០២៤ ទីក្រុង Dayong លក់សំបុត្រអស់ ២,៣០០ សន្លឹក ដែលជាមធ្យមប្រហែល ១៣ សំបុត្រក្នុងមួយថ្ងៃ។ នៅថ្ងៃធ្វើការកន្លែងនេះប្រៀបដូចជា “ទីក្រុងខ្មោច” ដោយទីលានសំខាន់ត្រូវបានគេមើលរំលង ហើយហាងនៅតាមបណ្តោយផ្លូវក៏បិទអស់ សូម្បីគោមពណ៌ក្រហមដែលព្យួរនៅមាត់ទ្វារខាងកើតនៃទីក្រុងបុរាណនេះក៏ត្រូវបានរហែក និងរសាត់អស់ផងដែរ។ មូលហេតុដែលកន្លែងកម្សាន្តនេះគ្មានភ្ញៀវមកទស្សនាគឺដោយសារគម្រោងនេះមានគុណវិបត្តិជាច្រើន ហើយជាការរួមបញ្ចូលគ្នាដ៏ឆ្គងនៃស្ថាបត្យកម្មបុរាណ និងទំនើប ដូច្នេះវាមិនទាក់ទាញអតិថិជនច្រើននោះទេ។

លើសពីនេះទីតាំងកណ្តាលនៃទីក្រុងដែលមានចម្ងាយតែ ៣ គីឡូម៉ែត្រពីស្ថានីយ៍រថភ្លើង Zhangjiajie មិនមែនជាអត្ថប្រយោជន៍ធំដូចដែលអ្នកវិនិយោគរំពឹងទុកនោះទេ។ ក្រុមហ៊ុនទេសចរណ៍ជាច្រើនមិនរាប់បញ្ចូលទីប្រជុំជន Danyong ក្នុងកាលវិភាគទេសចរណ៍របស់ពួកគេទេ ដែលនេះក៏ជាហេតុផលដែលកន្លែងនេះត្រូវបានគេបោះបង់ចោលផងដែរ។

ទោះជាយ៉ាងណាការបរាជ័យនៃតំបន់ទេសចរណ៍នេះបានធ្វើឱ្យមន្ត្រីជាន់ខ្ពស់របស់ចិនកត់សម្គាល់ និងគ្រោងអភិវឌ្ឍវិស័យទេសចរណ៍ បង្កើនគុណភាព និងប្រសិទ្ធភាពនៃការវិនិយោគឡើងវិញ។ ពួកគេក៏សម្រេចបើកឱ្យភ្ញៀវទេសចរណ៍ចូលទស្សនាដោយឥតគិថ្លៃ ដូច្នេះសព្វថ្ងៃនេះទីក្រុង Danyong ត្រូវបានអ្នកស្រុកចាត់ទុកថាជាសួនសាធារណៈដោយមិនគិតថ្លៃចូល។ ជំនួសឱ្យកន្លែងទេសចរណ៍ មនុស្សជាច្រើននាំកូន និងសត្វចិញ្ចឹមរបស់ពួកគេទៅដើរលេងជារៀងរាល់ថ្ងៃ៕

ប្រទេសថៃ ៖ ផ្សារបណ្តែតទឹក គឺជាតំបន់ទេសចរណ៍ដ៏ល្បីល្បាញនៅប្រទេសថៃ ដែលបានទាក់ទាញភ្ញៀវទេសចរថៃ និងបរទេសមកកម្សាន្តយ៉ាងច្រើនក្នុង១ឆ្នាំៗ ដោយសារសម្បូរម្ហូបអាហារឆ្ងាញ់លក់លើទូក ។ ភ្ញៀវទេសចរអាចជិះទូកកម្សាន្តតាមប្រឡាយគយគន់មើលហាងលក់ទំនិញផ្សេងៗ និងមើលពីការរស់នៅតាមមាត់ប្រឡាយរបស់ពលរដ្ឋថៃ ប៉ុន្តែថ្មីៗនេះ ភ្ញៀវទេសចរបរទេសម្នាក់បានប្រាប់ឱ្យប្រយ័ត្នពេលមកបរិភោគអាហារនៅទីនេះ ។

វីដេអូមួយត្រូវបានចែកចាយយ៉ាងច្រើនក្នុងបណ្តាញសង្គមកាលពីដើមខែមករា ឆ្នាំ២០២៥ ដែលវីដេអូនេះថតដោយភ្ញៀវទេសចរបរទេសម្នាក់ពេលមកកម្សាន្តនៅផ្សារបណ្តែតទឹកមួយកន្លែងក្នុងប្រទេសថៃ និងបានសួរពីបញ្ហាអនាម័យការចម្អិនអាហារលក់ឱ្យភ្ញៀវទេសចរ ។ រីឯអ្នកលេងបណ្តាញសង្គមថៃ ក៏ពុំគាំទ្រទង្វើនេះដែរ ដែលធ្វើឱ្យខូចដល់កេរ្តិ៍ឈ្មោះប្រទេសជាតិដែលល្បីល្បាញផ្នែកអាហារ ។

បើតាមវីដេអូ គឺអ្នកលក់អាហារម្នាក់លើផ្សារបណ្តែតទឹកបានលាងសម្អាតខ្ទះ វែកឆា និងសម្ភារៈផ្សេងទៀតក្នុងទឹកប្រឡាយតូចមួយដែលមានសភាពល្អក់ខ្មៅ ហើយពុំចាប់អារម្មណ៍នឹងក្រសែភ្នែកភ្ញៀវទេសចរ ។ ភ្ញៀវទេសចរជាម្ចាស់វីដេអូនិយាយថា ៖ «អាហារថៃមានរសជាតិឆ្ងាញ់ ប៉ុន្តែខ្ញុំចង់ឱ្យភ្ញៀវទេសចរប្រយ័ត្នរឿងអ្នកលក់អាហារលាងចានក្នុងទឹកប្រឡាយ ចូរមើលទឹកនេះ តើវាមានសភាពបែបណា?» ។

ក្រោយពីមានការចែកចាយវីដេអូនេះក្នុងបណ្តាញសង្គម អ្នកលេងបណ្តាញសង្គមថៃនិយាយថា បច្ចុប្បន្ន ប្រភពទឹកតាមធម្មជាតិមិនស្អាតសម្រាប់ការលាងចានឆ្នាំងទេ ហើយការទម្លាក់កាកសំណល់អាហារចូលក្នុងទឹកបែបនេះ ក៏ពុំគួរធ្វើដែរ ពីព្រោះវានឹងធ្វើឱ្យទឹកកខ្វក់ ។ អ្នកខ្លះទៀតបានរិះគន់ពីការបោះចោលកាកសំណល់អាហារក្នុងទឹករបស់អ្នករស់នៅតាមមាត់ប្រឡាយ ។

អ្នកលេងបណ្តាញសង្គមផ្សេងទៀតនិយាយថា ខ្លួនបានឃើញការលាងចានឆ្នាំងក្នុងទឹកប្រឡាយយូរហើយ ជាពិសេស អ្នកលក់គុយទាវ អ្នកលក់គិតតែពីរឿងអាហារឆ្ងាញ់ ប៉ុន្តែភ្លេចគិតពីអនាម័យ ។ វាធ្វើឱ្យខូចមុខមាត់ប្រទេសជាតិ អ្នកលក់ចំណីអាហារត្រូវប្រយ័ត្នបន្តិចរឿងអនាម័យ ។ បើលាងចានឆ្នាំងសម្រាប់ដាំស្លបរិភោគក្នុងគ្រួសារមិនអីទេ ប៉ុន្តែនេះយើងទទួលបានប្រាក់ចំណូលពីវិស័យទេសចរណ៍ ៕

@khaosodonline

ฝรั่ง งง ไทยก็ งง แม่ค้าใช้น้ำคลองล้าง กระทะ ตะหลิว #ข่าวสด #ข่าวtiktok

♬ original sound – ข่าวสด Khaosodonline – ข่าวสด Khaosodonline

ស្បែកជើងគឺជារបស់ប្រើប្រាស់ដ៏ចាំបាច់បំផុតមួយដែលមិនអាចខ្វះបាន ព្រោះវាអាចជួយការពារកម្តៅថ្ងៃ និងភាពកខ្វក់ដែលមកប៉ះពាល់ជើងរបស់យើង។ ស្បែកជើងមានសារៈសំខាន់ណាស់ និងមានតម្លៃខុសៗគ្នាទៅតាមម៉ូដនីមួយៗ ដោយស្បែកជើងមួយគូនេះមានតម្លៃរហូតដល់ ១៩.៩ លានដុល្លារអាមេរិក ត្រូវបានគេចាត់ទុកថា ជាស្បែកជើងថ្លៃជាងគេបំផុតនៅលើពិភពលោក។ ដូច្នេះហើយតើវាមានលក្ខណៈពិសេសបែបណា ទើបស្បែកជើងមួយគូនេះមានតម្លៃខ្ពស់ខ្លាំងបែបនេះ?

«Moon Star Shoes» ដែលជាស្បែកជើងថ្លៃជាងគេបំផុតក្នុងពិភពលោក ត្រូវបានដាក់តាំងបង្ហាញនៅឯកម្មវិធី MIDE (Made in Italy, Designed in Emirates) Fashion Week ដែលប្រារព្ធឡើងនៅលើទូកកម្សាន្តក្នុងទីក្រុងឌូបៃ កាលពីឆ្នាំ ២០១៩។ រហូតមកបច្ចុប្បន្ននេះស្បែកជើង Moon Star នៅតែជាប់កំណត់ត្រាជាស្បែកជើងថ្លៃជាងគេបំផុតរបស់ពិភពលោក ដោយមិនមានស្បែកជើងណាអាចប្រជែងបានឡើយ។ មូលហេតុដែលស្បែកជើងកែងមួយគូនេះមានតម្លៃខ្ពស់ គឺដោយសារវាត្រូវបានផលិតចេញពីមាសដ៏រឹងមាំ និងតុបតែងដោយត្បូងពេជ្រ ៣០ ការ៉ាត់។

បន្ថែមពីលើនេះវាក៏រួមបញ្ចូលនូវសម្ភារៈពិសេស និងកម្រមួយចំនួនផងដែរ ដូចជាបំណែកនៃអាចម៍ផ្កាយមកពីប្រទេសអាហ្សង់ទីន ដែលមានអាយុកាលតាំងពីឆ្នាំ ១៥៧៦ មកម្លេះ។ ស្បែកជើង Moon Star រចនាឡើងដោយ Antonio Vietri លក់ក្នុងតម្លៃ ១៩.៩ លានដុល្លារ។ Vietri ត្រូវបានគេស្គាល់ថាជាអ្នកផលិតស្បែកជើងមាស ២៤k ដំបូងបង្អស់របស់ពិភពលោកក្នុងឆ្នាំ ២០១៧ ហើយបន្តផលិតស្បែកមាសជាបន្តបន្ទាប់ដោយបានបំបែកកំណត់ត្រាច្រើនជាងគេ។

ក្រៅពីស្បែកជើង Moon Star ស្បែកជើង Jada Dubai ក៏ជាប់ឈ្មោះជាស្បែកជើងថ្លៃជាងគេទីពីរនៅលើពិភពលោកផងដែរ។ ជាមួយតម្លៃជាង ៧ លានដុល្លារអាមេរិកស្បែកជើង Jada Dubai ត្រូវបានផលិតឡើងដោយវត្ថុធាតុដើមដ៏ប្រណិតដែលប្រើប្រាស់ក្នុងការបង្កើតវាឡើងចេញពីមាសពិត និងតុបតែងដោយត្បូងពេជ្រជិត ២៤០គ្រាប់ រួមទាំងពេជ្រ ១៥ ការ៉ាត់ D-flawless ចំនួនពីរដែលលេចធ្លោនៅម្រាមជើង។ ស្បែកជើងនេះត្រូវបានបង្ហាញជាលើកដំបូងនៅ Burj Al Arab ដែលជាសណ្ឋាគារលំដាប់ផ្កាយ ៧ តែមួយគត់នៅលើពិភពលោក៕

ប្រទេសចិន ៖ នៅដើមឆ្នាំ២០២៥ រដ្ឋាភិបាលចិនបានប្រកាសដំឡើងប្រាក់ខែមន្ត្រីរាជការដើម្បីជំរុញសេដ្ឋកិច្ច, បង្កើនការចាយវាយក្នុងប្រទេស និងត្រៀមខ្លួនទប់ទល់សង្គ្រា.ម ពាណិជ្ជកម្មជាមួយសហរដ្ឋអាមេរិក ក្នុងអាណត្តិលោក Donald Trump ក្លាយជាប្រធានាធិបតី ។ ប៉ុន្តែមន្ត្រីរាជការភាគច្រើននិយាយថា រដ្ឋាភិបាលដំឡើងប្រាក់ខែតិចពេក ។

កាលពីថ្ងៃទី២ ខែមករា ឆ្នាំ២០២៥ សារព័ត៌មាន Bloomberg រាយការណ៍ថា ចិនបានដំឡើងប្រាក់ខែ៦៩ដុល្លារអាមេរិក ឱ្យគ្រូបង្រៀន សមត្ថកិច្ច និងមន្ត្រីរាជការទូទៅ ប្រមាណ១,៤០០លាននាក់នៅដើមឆ្នាំ២០២៥ ដោយគិតចាប់ពីខែកក្កដា ឆ្នាំ២០២៤ ហើយការដំឡើងប្រាក់ខែមន្ត្រីរាជការពុំស្មើគ្នាទេ និងអាស្រ័យលើប្រាក់ខែគោល ។ រដ្ឋាភិបាលធ្លាប់ដំឡើងប្រាក់ខែមន្ត្រីរាជការជាទ្រង់ទ្រាយធំកាលពីឆ្នាំ២០១៥ បន្ទាប់មក នៅឆ្នាំ២០១៨ និងឆ្នាំ២០២១ ។

ការជំរុញការចំណាយក្នុងស្រុក គឺជាគោលនយោបាយសំខាន់សម្រាប់ឆ្នាំ២០២៥ របស់រដ្ឋាភិបាល ដើម្បីដោះស្រាយបញ្ហាវិបត្តិសេដ្ឋកិច្ចអូសបន្លាយតាំងពីឆ្នាំ១៩៩៩ ។ ក្រៅពីនេះ រដ្ឋាភិបាលបានកាត់បន្ថយអត្រាការប្រាក់, កំណត់វិធានការជំរុញវិស័យអចលនទ្រព្យ និងចែកប្រាក់ឱ្យពលរដ្ឋ ។ នេះបើតាមការលើកឡើងរបស់ប្រធានាធិបតីចិន លោក ស៊ី ជិនពីង ។

រដ្ឋាភិបាលបានផ្តល់ប្រាក់ឧបត្ថម្ភដល់គ្រួសារពលរដ្ឋមានប្រាក់ចំណូលទាបដើម្បីស្ថិរភាពសង្គម ដោយសារការដាក់សម្ពាធសេដ្ឋកិច្ចពេញមួយឆ្នាំ ។ កាលពីថ្ងៃទី៣១ ខែធ្នូ ឆ្នាំ២០២៤ រដ្ឋាភិបាលបានប្រកាសផ្តល់ប្រាក់ដល់គ្រួសារមានកូនច្រើន និងស្នើឱ្យអាជ្ញាធរមូលដ្ឋានចែកប្រាក់ដល់ពលរដ្ឋក្រីក្រក្នុងឆ្នាំថ្មី ។

ប៉ុន្តែគ្រូបង្រៀនម្នាក់រស់នៅភាគខាងកើតប្រទេសចិននិយាយថា ប្រាក់ខែដែលរដ្ឋាភិបាលដំឡើងឱ្យនេះ គឺតិចជាងប្រាក់ Bonus ដែលរដ្ឋាភិបាលបានកាត់បន្ថយក្នុងរយៈពេលជាច្រើនឆ្នាំ ។ រីឯមន្ត្រីរាជការម្នាក់ទៀតប្រាប់ថា ការដំឡើងប្រាក់ខែ គឺតិចជាងប្រាក់ខែរបស់ខ្លួនដែលត្រូវបានកាត់បន្ថយ ។

កាលពីខែធ្នូ ឆ្នាំ២០២៤ គណៈកម្មការគណបក្សកុម្មុយនិស្តចិនឱ្យដឹងថា ការដំឡើងប្រាក់ខែមន្ត្រីរាជការ មិនត្រឹមតែជំរុញការចាយវាយក្នុងស្រុកប៉ុណ្ណោះទេ ប៉ុន្តែជាការស្តារសេដ្ឋកិច្ចឡើងវិញ ។ លើសពីនេះ វាជាការត្រៀមខ្លួនរបស់ចិនពេលលោក Trump ត្រឡប់មកកាន់តំណែងប្រធានាធិបតីអាមេរិក ដែលលោកតាំងចិត្តដំឡើងពន្ធទំនិញចិននាំចូលអាមេរិក ៕