«ទឹកធ្លាក់ថ្មក្រាល» គឺជារមណីយដ្ឋានដ៏ទាក់ទាញមួយ ស្ថិតនៅភូមិកោះក្ទម្ព ឃុំជៀប ស្រុកទឹកផុស ខេត្តកំពង់ឆ្នាំង ដែលភ្ញៀវទេសចរគ្រប់ជាតិសាសន៍មិនគួររំលងនោះទេ។ នៅទីនេះគឺពិតជាមានទេសភាពស្រស់ស្អាតខ្លាំងណាស់ ដោយមានសម្រស់ធម្មជាតិនៃទឹកធ្លាក់យ៉ាងស្រស់ត្រកាល គួរជាទីមនោរម្យ អាចឱ្យភ្ញៀវទេសចរ ទស្សនាលំហែកាយ ងូតទឹកលេងកម្សាន្តយ៉ាងសប្បាយរីករាយ ស្រស់ស្រូបអាហារជុំគ្រួសារ ឬជួបជុំមិត្តភ័ក្រ្ត នៅក្រោមម្លប់ឈើដ៏ត្រឈឹងត្រឈៃ ស្រូបយកខ្យល់អាកាសដ៏ត្រជាក់បរិសុទ្ធ លាងជម្រះនូវភាពនឿយហត់ តប់ប្រមល់ និងទុក្ខសោកទាំងឡាយ។
ទឹកធ្លាក់ថ្មក្រាលមានបរិស្ថានល្អ ដែលធ្វើឱ្យភ្ញៀវទេសចរជាតិ និងអន្តរជាតិ ទៅលេងកម្សាន្តមិនចេះជិនណាយនោះទេ ដោយសារនៅក្នុងតំបន់នោះមានទឹកធ្លាក់ពីលើភ្នំដែលអាចឱ្យមនុស្សចាស់ និងក្មេងងូតទឹកលេងកម្សាន្តនៅក្រោមម្លប់ឈើតូចធំបានយ៉ាងងាយស្រួលបំផុត។ ក្រៅពីងូតទឹកលេងកម្សាន្ត ភ្ញៀវទេសចរក៏អាចអង្គុយលេង ហូបអាហារបែបស្រុកស្រែឆ្ងាញ់ៗ និងគយគន់ទេសភាពធម្មជាតិដ៏ខៀវស្រងាត់ផងដែរ។
ដូច្នេះដើម្បីទៅដល់រមណីយដ្ឋានទឹកធ្លាក់ថ្មក្រាល លោកអ្នកត្រូវធ្វើដំណើរចេញពីទីរួមខេត្តកំពង់ឆ្នាំង តាមផ្លូវជាតិលេខ៥៣ ទៅដល់ផ្សារស្រុកទឹកផុស ត្រូវបន្តដំណើរឆ្លងកាត់ផ្លូវរថភ្លើង រហូតដល់ជិតវត្តក្នុងខ្លុងពពក ដែលមានចម្ងាយជាង ៣០ គីឡូម៉ែត្រ រួចបត់ស្តាំតាមផ្លូវក្រាលកៅស៊ូ និងក្រួសក្រហមជាង ២០ គីឡួម៉ែត្រទៀត ទើបដល់ទៅដល់រមណីយដ្ឋានដ៏ស្រស់ស្អាតមួយនេះ។
រមណីយដ្ឋានទឹកធ្លាក់ថ្មក្រាលគឺរមណីយដ្ឋានធម្មជាតិមួយដ៏សំខាន់ ដែលប្រជាពលរដ្ឋក៏ដូចជាភ្ញៀវទេសចរក្នុងស្រុក និងក្រៅស្រុកមកលេងកម្សាន្តជាហូរហែ ជាពិសេសគឺថ្ងៃចុងសប្តាហ៍ ឬថ្ងៃបុណ្យទានតែម្តង ដោយសារនៅទីនោះមានទឹករាក់ដែលអាចលេងកម្សាន្តពីក្មេងរហូតដល់មនុស្សចាស់ មិនមានគ្រោះថ្នាក់ទេ គឺមានសុវត្ថិភាពណាស់។
ទោះជាយ៉ាងណា បងប្អូនដែលទៅលេងកម្សាន្តនៅរមណីយដ្ឋាននានានៅខេត្តកំពង់ឆ្នាំង សូមមេត្តាចូលរួមថែរក្សាបរិស្ថានផង ជាពិសេសកុំបោះចោលសំរាមពាសវាលពាសកាល ដោយបងប្អូនហូបរួចត្រូវច្រកថង់ បោះចូលទៅក្នុងធុងសំរាមឱ្យបានត្រឹមត្រូវ ដើម្បីសុខភាពយើង និងសហគមន៍យើង ទីក្រុងស្អាត អនាម័យល្អ៕
