ប្រទេសថៃ ៖ កាលពីថ្ងៃទី៩ ខែមករា ឆ្នាំ២០២៥ ភ្នាក់ងារអាកាសយានដ្ឋានភូកេត ប្រទេសថៃ បានត្រួតពិនិត្យហាងមួយឈ្មោះ SUBWAY ក្រោយភ្ញៀវទេសចរបរទេសម្នាក់ឡូឡារឿងទិញសាំងវិច ៣ដុំ និងនំ Cookie ពីហាងនេះក្នុងតម្លៃថ្លៃកប់ពពក គឺរហូតដល់ ៩២ដុល្លារអាមេរិក ។ បន្ទាប់ពីត្រួតពិនិត្យ ភ្នាក់ងារអាកាសយានដ្ឋានភូកេត បញ្ជាក់ថា ហាងនេះបានសរសេរតម្លៃអាហារច្បាស់លាស់លើស្លាកខាងមុខ ហើយហាងលក់សាំងវិច តាមតម្លៃលើស្លាក ។

អ្នកលេងបណ្តាញសង្គមប្រទេសថៃបានចែកចាយវីដេអូរបស់ភ្ញៀវទេសចរអង់គ្លេសម្នាក់ ដែលរិះគន់ហាង SUBWAY នៅអាកាសយានដ្ឋានភូកេត ប្រទេសថៃ ថា លក់អាហារ និងភេសជ្ជៈក្នុងតម្លៃថ្លៃខ្លាំង ។ ភ្ញៀវទេសចរអង់គ្លេសបានទិញសាំងវិច ៣ដុំ, នំ Cookie ៣ដុំ និងភេសជ្ជៈ ៣កែវ ប៉ុន្តែហាងនេះបានគិតប្រាក់រហូតដល់ ៣,១៥២បាត (ឬស្មើ៩២ដុល្លារអាមេរិក) ។

ក្រោយមក ភ្នាក់ងារអាកាសយានដ្ឋានភូកេត ក៏បានមកត្រួតពិនិត្យហាង SUBWAY នៅអគារអ្នកដំណើររង់ចាំឡើងយន្តហោះទៅក្រៅប្រទេស ស្ថិតនៅជាន់ទី៣ ។ ក្រោយការត្រួតពិនិត្យឃើញថា ហាងនេះបានសរសេរតម្លៃអាហារលើស្លាកត្រឹមត្រូវ ហើយហាងគិតតម្លៃអាហារតាមស្លាក ។ ភ្ញៀវទេសចរបានទិញសាំងវិច ៣ដុំ ប៉ុន្តែសុំឱ្យហាងដាក់សាច់ និងឈីសបន្ថែមទៀត ។ ហាងបានគិតលុយសាំងវិច រួមទាំង Cookie និងភេសជ្ជៈ ទើបតម្លៃកើនឡើងខុសធម្មតាបែបនេះ ។

ការត្រួតពិនិត្យតម្លៃអាហារ និងភេសជ្ជៈ គឺដើម្បីផ្តល់ភាពយុត្តិធម៌ដល់អតិថិជន និងណែនាំឱ្យហាងក្នុងអាកាសយានដ្ឋានអនុវត្តតាមលក្ខខណ្ឌយ៉ាងតឹងរ៉ឹង ។ អាកាសយានដ្ឋានភូកេត អនុវត្តការងារគោរពគោលការណ៍ច្បាស់លាស់ ព្រមទាំងកែលម្អគុណភាពការផ្តល់សេវាកម្មស្របតាមស្តង់ដារអាកាសយានដ្ឋានដ៏ល្អ ដើម្បីឱ្យអ្នកដំណើរទទួលបានសេវាងាយស្រួល ឆាប់រហ័ស និងសុវត្ថិភាព ។ នេះបើតាមការលើកឡើងរបស់ភ្នាក់ងារត្រួតពិនិត្យតម្លៃអាហារក្នុងអាកាសយានដ្ឋាន ។

គួរបញ្ជាក់ថា ស្ត្រីភ្ញៀវទេសចរអង់គ្លេស ដែលបានទិញសាំងវិចថ្លៃនៅអាកាសយានដ្ឋានភូកេត ប្រទេសថៃ គឺមានគណនី TikTok ឈ្មោះ «naynaysully» និយាយថា នាងពុំធ្លាប់ទិញអាហារថ្លៃបែបនេះទេ ក្នុងជីវិត ៕

កាលពីថ្ងៃទី៨ ខែមករា ឆ្នាំ២០២៥ លោក អាណាន់ ចងកែវវឌ្ឍនា អ្នកស្រាវជ្រាវផ្នែកមេរោគនៅប្រទេសថៃ បានសរសេរក្នុងហ្វេសប៊ុកឈ្មោះ «Anan Jongkaewwattana» ថា ក្រុមហ៊ុនដ៏ល្បីរបស់អង់គ្លេស បានរកឃើញវិធីព្យាបាលអ្នកជំងឺអេដស៍ (HIV) ឱ្យជាសះស្បើយដាច់ ។ លោកប្រាប់ថា ជំងឺអេដស៍នឹងអាចជាសះស្បើយបាន ក្រោយពីពិភពលោក រស់នៅជាមួយជំងឺនេះអស់រយៈពេលជាង៤០ឆ្នាំ ។

ការព្យាបាលជំងឺអេដស៍ដោយការប្រើប្រាស់បច្ចេកវិទ្យាទទួលកោសិកាឈាមស T cell ឬ TCR (T Cell Receptor) ត្រូវបានបង្កើតឡើងយ៉ាងពិសេស ដើម្បីស្វែងរក និងកម្ចាត់មេរោគដែលសម្ងំលាក់ខ្លួនក្នុងរាងកាយមនុស្ស ។ វិធីថ្មីនឹងអាចផ្លាស់ប្តូរវិធីព្យាបាលជំងឺអេដស៍ ដែលប្រទេសនានាអនុវត្តកន្លងមក ។

បច្ចុប្បន្ន អ្នកជំងឺអេដស៍ត្រូវលេបថ្នាំប្រឆាំងជំងឺអេដស៍អស់មួយជីវិត ហើយបើទោះជាថ្នាំទាំងនេះមានប្រសិទ្ធភាពអាចគ្រប់គ្រងមេរោគកុំឱ្យរីករាលដាល និងជួយឱ្យអ្នកជំងឺមានជីវិតរស់នៅបន្តទៀត ប៉ុន្តែវាពុំអាចកម្ចាត់មេរោគអេដស៍ឱ្យអស់ពីក្នុងខ្លួនឡើយ ។ គេចាត់ទុកថា មេរោគអេដស៍ គឺជាមេរោគឆ្លាត ដោយសារវាអាចលាក់ខ្លួនក្នុងកោសិកា CD4+ T cells ដែលប្រៀបដូចជារបងជួយការពារមេរោគ ហើយថ្នាំពុំអាចកម្ចាត់មេរោគ ឬចូលក្នុងកោសិកានេះបានទេ ។

ក្រុមហ៊ុនអង់គ្លេសឈ្មោះ Immunocore បានរកឃើញវិធីព្យាបាលអ្នកជំងឺអេដស៍ ដោយសារវិធីថ្មីនេះអាចចូលទៅក្នុងកោសិកាដែលមេរោគលាក់ខ្លួន ដោយប្រើប្រាស់បច្ចេកវិទ្យា bispecific TCR ហើយវាមានតួនាទីស្រាវជ្រាវរកមេរោគ, ប្រាប់ពីកន្លែងមេរោគលាក់ខ្លួន និងបំផ្លាញកោសិកាលាក់ខ្លួនរបស់មេរោគ ។ ក្រុមហ៊ុនអង់គ្លេសបានសាកល្បងនៅគ្លីនិករួចហើយឃើញថា ការព្យាបាលមានសុវត្ថិភាព ហើយក្រុមហ៊ុនកំពុងស្រាវជ្រាវបន្ថែមទៀតដើម្បីផលិតថ្នាំ ។

ដោយឡែក អ្នកវិទ្យាសាស្ត្រផ្សេងទៀតបានស្រាវជ្រាវរកវិធីព្យាបាលផ្សេងៗ ក្នុងនោះមានវិធីព្យាបាលមានប្រសិទ្ធភាពបំផុត គឺ Broadly Neutralizing Antibodies ដែលអាចបំផ្លាញមេរោគអេដស៍គ្រប់ប្រភេទ ។ វិធីព្យាបាលមួយទៀត គឺការប្រើប្រាស់ហ្សែនតាមរយៈបច្ចេកវិទ្យា CRISPR ដើម្បីកម្ចាត់កោសិការាងកាយដែលឆ្លងមេរោគ ។ ក្រៅពីនេះ មានវិធីព្យាបាលហៅថា Kick and Kill គឺប្រើប្រាស់ថ្នាំជំរុញឱ្យមេរោគចេញពីកន្លែងលាក់ខ្លួន ដើម្បីឱ្យប្រព័ន្ធការពាររាងកាយ ឬថ្នាំសម្លាប់មេរោគ ។

ហេតុនេះ យើងត្រូវរង់ចាំការស្រាវជ្រាវបន្ថែមទៀតរបស់ក្រុមហ៊ុនអង់គ្លេស ដើម្បីផលិតថ្នាំព្យាបាលមេរោគអេដស៍ឱ្យជាសះស្បើយ ។ ការរីកចម្រើនផ្នែកវិទ្យាសាស្ត្រនឹងជួយពិភពលោក អាចព្យាបាលជំងឺអេដស៍ឱ្យជាសះស្បើយឆាប់ៗ ដោយការរួមបញ្ចូលវិធីព្យាបាលជាច្រើនដើម្បីបញ្ឈប់ការឆ្លងជំងឺនេះ ៕

ប្រទេសថៃ ៖ នៅខែមករា ឆ្នាំ២០២៥ គេហទំព័រ IQAir បានត្រួតពិនិត្យគុណភាពខ្យល់ក្នុងទីក្រុងនានាលើពិភពលោក និងចាត់ចំណាត់ថ្នាក់ទីក្រុងបាងកក ស្ថិតក្នុងលំដាប់ទី៩ គឺជាទីក្រុងមានធូលីកខ្វក់ខ្លាំងបំផុត ។ គេហទំព័រនេះណែនាំឱ្យពលរដ្ឋ និងភ្ញៀវទេសចរពាក់ម៉ាសនៅទីក្រុងបាងកក ដោយសារសន្ទស្សន៍គុណភាពខ្យល់ស្ថិតក្នុងកម្រិតពណ៌ក្រហម ប៉ះពាល់សុខភាព ។

គេហទំព័រនេះបញ្ជាក់ថា ធូលីកខ្វក់នឹងប៉ះពាល់ដល់អ្នកជំងឺ ឬអ្នកមានសុខភាពខ្សោយ ហើយណែនាំឱ្យកាត់បន្ថយការហាត់ប្រាណនៅទីវាល, ប្រើម៉ាស៊ីនកម្ចាត់ធូលី, បិទបង្អួចផ្ទះការពារធូលី ហើយអ្នកសុខភាពខ្សោយគួរពាក់ម៉ាស់ពេលចេញក្រៅផ្ទះ ។

ចំណែកចំណាត់ថ្នាក់ទី១ គឺទីក្រុងថាកា ប្រទេសបង់ក្លាដែស, ទី២ ទីក្រុងហ្គូកាតា ប្រទេសឥណ្ឌា, ទី៣ ទីក្រុងដេលី ប្រទេសឥណ្ឌា ។ រីឯទីក្រុងហាណូយ ប្រទេសវៀតណាម ជាប់ចំណាត់ថ្នាក់ទី៦ និងទីក្រុងហូជីមិញ ទី១០ ។

លោក Akanis Srisukwattana គ្រូពេទ្យជំងឺបេះដូង និងមានជំនាញ Sports Cardiology ក្នុងមន្ទីរពេទ្យ Samitivej Srinakarin នៅទីក្រុងបាងកក បានសរសេរក្នុងហ្វេសប៊ុក កាលពីថ្ងៃទី៨ ខែមករាថា ធូលីកខ្វក់រយៈពេលខ្លី និងវែង អាចបង្កជាជំងឺមហារីកច្រើនប្រភេទ និងធ្វើឱ្យមនុស្សអាយុខ្លី ។ លោកណែនាំឱ្យគ្រប់គ្នាថែទាំសុខភាពឱ្យល្អ ពីព្រោះត្រូវរស់នៅក្នុងស្ថានភាពបែបនេះយូរទៀត ។

ធូលីកខ្វក់រយៈពេលខ្លីនឹងបណ្តាលឱ្យកើតជំងឺរ៉ាំរ៉ៃ រីឯធូលីកខ្វក់រយៈពេលវែងនឹងបណ្តាលឱ្យកើតជំងឺមហារីកសួត ហើយធូលីកខ្វក់នឹងធ្វើឱ្យរាងកាយរលាកបង្កជាជំងឺផ្សេងៗ ហេតុនេះ ពលរដ្ឋគួរថែទាំសុខភាពឱ្យល្អ ពីព្រោះធូលីតូចៗអាចជ្រាបចូលក្នុងសួត និងឈាមដោយផ្ទាល់ ។

ការស្រាវជ្រាវជាច្រើនបង្ហាញថា ធូលីកខ្វក់ គឺជាមូលហេតុសំខាន់បណ្តាលឱ្យកើតជំងឺមហារីក ដូចជា ៖ មហារីកសួត, មហារីកគ្រាប់ឈាម, មហារីកថ្លើម និងមហារីកពោះវៀនធំ ហើយចុងក្រោយ យើងនឹងមានអាយុខ្លីដោយសារកើតជំងឺរ៉ាំរ៉ៃ ។ ហេតុនេះ ចូរកាត់បន្ថយការហាត់ប្រាណ ឬធ្វើអ្វីមួយនៅក្រៅអគារ និងបូមធូលីក្នុងផ្ទះ ។

ភ្នាក់ងារឧតុនិយមថៃប្រកាសថា អាកាសធាតុត្រជាក់បានគ្របដណ្តប់លើតំបន់នានារបស់ប្រទេសថៃ ដោយសារសម្ពាធខ្ពស់គ្របដណ្តប់លើភាគខាងជើង ខាងត្បូង និងសមុទ្រចិនខាងត្បូង ហើយបរិមាណធូលីកខ្វក់ក៏បានកើនឡើងខ្លាំងដែរ ៕

ម៉ូតូអគ្គិសនី Skyrider X1 ដែលផលិតដោយក្រុមហ៊ុនអាមេរិក Rictor គឺជាម៉ូតូបើកលើអាកាសដំបូងបង្អស់របស់ពិភពលោក ត្រូវបានគេរំពឹងថានឹងចេញលក់នៅឆ្នាំ ២០២៦។

បច្ចុប្បន្នម៉ូតូនេះបានដាក់បង្ហាញនៅក្នុងពិព័រណ៍គ្រឿងអេឡិចត្រូនិក CES 2025 ដែលប្រព្រឹត្តទៅនៅទីក្រុង Las Vegas ពីថ្ងៃទី ៧ ដល់ទី ១០ ខែមករា។ ម៉ូតូអគ្គិសនី Skyrider X1 ត្រូវបានបំពាក់ដោយម៉ាស៊ីនចំនួន ៨ អាចហោះហើរបានប្រហែល ៤០ នាទី ជាមួយល្បឿនហោះហើរអតិបរមា ១០០ គីឡូម៉ែត្រក្នុងមួយម៉ោង។

Skyrider X1 មានពីរម៉ូដែលគឺ X1 SL ដែលមានថាមពលថ្ម ១០.៥ kWh អាចហោះហើរបាន ២៥ នាទី ខណៈម៉ូដែល X1 SX ដែលមានថាមពលថ្មធំជាង ២១ kWh អាចហោះហើរបាន ៤០ នាទី។ វាក៏មានជម្រើសបញ្ជាដោយដៃសម្រាប់អ្នកបើកបរដែលចង់ប្រតិបត្តិការដោយផ្ទាល់ រួមទាំងមុខងារបើកបរអូតូផងដែរ។ យោងតាមក្រុមហ៊ុន ម៉ូតូអគ្គិសនីមួយនេះ អាចសម្របខ្លួនទៅនឹងអាកាសធាតុ និងបរិស្ថានក្នុងពេលវេលាជាក់ស្តែង ដោយកែតម្រូវកម្ពស់ ល្បឿន និងទិសដៅដោយស្វ័យប្រវត្តិ ដើម្បីធានាបាននូវការធ្វើដំណើរប្រកបដោយប្រសិទ្ធភាព និងសុវត្ថិភាព។

ទោះបីជាម៉ាស៊ីនមួយបរាជ័យក៏ដោយ Skyrider X1 ក៏អាចចុះចតដោយសុវត្ថិភាព ហើយត្រូវបានបំពាក់ដោយឆ័ត្រយោងសង្គ្រោះបន្ទាន់សម្រាប់ស្ថានភាពមិនល្អណាមួយទៀតផង។ ជាមួយកាប៊ីនបិទជិត និងប្រព័ន្ធគ្រប់គ្រងបីជាន់ ម៉ូតូអគ្គិសនីនេះត្រូបានគេនិយាយថា នឹងចេញលក់ជាផ្លូវការនៅឆ្នាំក្រោយក្នុងតម្លៃ ៦ ម៉ឺនដុល្លារអាមេរិក។ ក្រុមហ៊ុន Rictor ដែលជាក្រុមហ៊ុនផលិតយានយន្តអគ្គិសនីជឿជាក់ថា ការលក់ម៉ូតូហោះហើរលើអាកាសនេះទំនងនឹងទទួលបានភាពជោគជ័យខ្លាំងនៅពេលដែលចេញលក់ជាផ្លូវការ។

ទោះជាយ៉ាងណាក៏ដោយ គោលដៅរបស់ Rictor ហាក់បីដូចជាមិនសូវមានប្រជាប្រិយភាពសោះ ដោយសារកាលពីឆ្នាំមុនមានក្រុមហ៊ុនតាក់ស៊ីហោះមួយគឺ Volocopter បានបរាជ័យក្នុងការទទួលបានវិញ្ញាបនប័ត្រដឹកជញ្ជូនអ្នកដំណើរលើអាកាស ហើយទីបំផុតបានដាក់ពាក្យក្ស័យធន។ ដូច្នេះយានជំនិះដែលបើកបរដោយខ្លួនឯងរបស់ក្រុមហ៊ុននេះ ទំនងជាមិនបង្ហាញនៅលើមេឃក្នុងទីក្រុងនាពេលខាងមុខនេះទេ៕

ប្រទេសវៀតណាម ៖ កាលពីថ្ងៃទី៨ ខែមករា ឆ្នាំ២០២៥ សារព័ត៌មាន Bloomberg រាយការណ៍ថា ប្រទេសវៀតណាមបានកំណត់គោលដៅទទួលភ្ញៀវទេសចរបរទេសរហូតដល់២៣លាននាក់ នៅឆ្នាំ២០២៥ កើនឡើង៣១% ហើយវៀតណាមសង្ឃឹមថា វិស័យទេសចរណ៍នឹងជួយជំរុញការរីកចម្រើនសេដ្ឋកិច្ចជាតិ ។

ការកំណត់គោលដៅទទួលភ្ញៀវទេសចរបរទេសរហូតដល់២៣លាននាក់ គឺជាចំនួនខ្ពស់ជាងមុនពេលជំងឺកូវីដ-១៩ ឆ្លងរាតត្បាតនៅប្រទេសវៀតណាម ហើយវៀតណាមនឹងទទួលបានភ្ញៀវទេសចរច្រើនតាមគោលដៅនៅឆ្នាំ២០២៥ ។ វាកើនឡើងលើស៥លាននាក់ បើធៀបនឹងចំនួនភ្ញៀវទេសចរបរទេសមកលេងវៀតណាមកាលពីឆ្នាំ២០១៩ ដែលស្មើត្រឹមតែ១៨លាននាក់ ។ នេះបើតាមការអះអាងរបស់ BMI Research ។

តាមរបាយការណ៍បញ្ជាក់ថា កាលពីឆ្នាំ២០២៤ វៀតណាមទទួលបានភ្ញៀវទេសចរបរទេស ចំនួន១៧លាន ៥សែននាក់ កើនឡើង៣៩.៥% បើធៀបនឹងឆ្នាំ២០២៣ ក្នុងនោះភ្ញៀវទេសចរមកពីតំបន់អាស៊ី គឺស្មើប្រមាណ៨០% នៃចំនួនភ្ញៀវទេសចរបរទេសសរុប ។

ដោយឡែក វៀតណាមទទួលបានភ្ញៀវទេសចរឥណ្ឌា ចំនួន៥០១,០០០នាក់ នៅឆ្នាំ២០២៤ ។ រយៈពេល២ឆ្នាំកន្លងមក ភ្ញៀវទេសចរឥណ្ឌាបានធ្វើដំណើរមកវៀតណាម កើនឡើងរហូតដល់ជាង២ដង ហើយធ្វើឱ្យវៀតណាមក្លាយជាប្រទេសគោលដៅគួរឱ្យចាប់អារម្មណ៍សម្រាប់ភ្ញៀវទេសចរឥណ្ឌា ។

កាលពីខែមិថុនា ឆ្នាំ២០២៤ រដ្ឋាភិបាលវៀតណាមបានកំណត់គោលដៅឱ្យវិស័យទេសចរណ៍ក្លាយជាឧស្សាហកម្មសំខាន់ ដើម្បីជំរុញការរីកចម្រើនសេដ្ឋកិច្ច ។ មុនពេលជំងឺកូវីដឆ្លងរាតត្បាត ប្រាក់ចំណូលពីវិស័យទេសចរណ៍វៀតណាម គឺស្មើនឹង១២% នៃផលិតផលក្នុងស្រុកសរុប (GDP) ។ ប៉ុន្តែរបាយការណ៍របស់ក្រុមហ៊ុន VinaCapital Group Ltd. នៅខែឆ្នាំដដែលបញ្ជាក់ថា ប្រាក់ចំណូលវិស័យទេសចរណ៍ ស្មើត្រឹមតែ៨% នៃ GDP ។

បើទោះជាវិស័យទេសចរណ៍បានជំរុញកំណើន GDP, ជួយឱ្យពលរដ្ឋមានការងារធ្វើ និងលើកកម្ពស់គុណភាពជីវិតពលរដ្ឋក្តី ប៉ុន្តែវៀតណាមត្រូវតែកែលម្អចំណុចខ្វះខាតមួយចំនួន ។ លើសពីនេះ វៀតណាមចាំបាច់ត្រូវមើលពីសមត្ថភាពប្រកួតប្រជែង និងគោលនយោបាយទេសចរណ៍របស់ប្រទេសជិតខាង ដើម្បីដោះស្រាយបញ្ហាប្រឈមរបស់អាជីវកម្មពាក់ព័ន្ធនឹងទេសចរណ៍ ។ នេះបើតាមការលើកឡើងរបស់អ្នកជំនាញ ៕

ប្រទេសដាណឺម៉ាក៖ ស្តេចដាណឺម៉ាកបានធ្វើឱ្យពិភពលោកភ្ញាក់ផ្អើលនូវការផ្លាស់ប្តូរនិមិត្តសញ្ញាជាតិរបស់ខ្លួនជាលើកដំបូងក្នុងរយៈពេលជាង ៥០០ ឆ្នាំ ចំពេលមានភាពចម្រូងចម្រាសជាមួយលោក Trump ជុំវិញកោះ Greenland។

និមិត្តសញ្ញាជាតិដាណឺម៉ាក គឺជានិមិត្តសញ្ញានៃសហភាព Kalmar រវាងប្រទេសដាណឺម៉ាក ន័រវេស និងស៊ុយអែត ហើយក៏ជានិមិត្តសញ្ញាដ៏សំខាន់មួយរបស់ប្រទេសស៊ុយអែតដែលនៅជិតខាងនោះផងដែរ។

អស់រយៈពេលជាង ៥០០ ឆ្នាំមកហើយនិមិត្តសញ្ញានេះគឺមិនដែលផ្លាស់ប្តូរឡើយ ប៉ុន្តែដោយសារមានភាពចម្រូងចម្រាសជាមួយប្រធានាធីបតីជាប់ឆ្នោតរបស់អាមេរិក Donald Trump ប្រទេសដាណឺម៉ាកក៏សម្រេចចិត្តផ្លាស់ប្តូរនិមិត្តសញ្ញារបស់ខ្លួនពីរូបភាពមកុដបី ទៅជារូបភាពខ្លាឃ្មុំប៉ូល និងពពែ ដែលជានិមិត្តរូបនៃកោះហ្គ្រីនឡែន និងកោះហ្វារ៉ូ។ ហ្គ្រីនឡែនគឺជាផ្នែកមួយនៃទឹកដីរបស់ដាណឺម៉ាក ខណៈហ្គ្រីនឡែនក៏ជាកោះមួយដែល Trump ចង់បានផងដែរ។ កាលពីខែមុនលោក Trump បានចេញសេចក្តីថ្លែងការណ៍មួយថា លោកចង់ឱ្យសហរដ្ឋអាមេរិកទិញ Greenland។

Trump បានសរសេរនៅក្នុងសារបង្ហោះប្រព័ន្ធផ្សព្វផ្សាយសង្គមថា “Greenland គឺជាកន្លែងដ៏អស្ចារ្យ ហើយមនុស្សគ្រប់គ្នានឹងទទួលបានអត្ថប្រយោជន៍យ៉ាងច្រើន ប្រសិនបើវាក្លាយជាផ្នែកមួយនៃជាតិរបស់យើង”។ មិនយូរប៉ុន្មានស្តេច Frederik របស់ដាណឺម៉ាកក៏បានធ្វើការកែប្រែយ៉ាងសំខាន់ចំពោះនិមិត្តសញ្ញាជាតិរបស់ខ្លួន ដោយបានផ្លាស់ប្តូរពីរូបភាពមកុដបី ទៅជារូបភាពខ្លាឃ្មុំប៉ូល និងពពែ ដែលការផ្លាស់ប្តូរនេះគឺជាវិធីសាស្ត្រការពារកោះ Greenland និងកោះដទៃទៀតពីប្រធានាធីបតីជាប់ឆ្នោត Donald Trump។

ព្រះអង្គក៏បានសម្តែងនូវទស្សនៈច្បាស់លាស់លើការរក្សាបាននូវទឹកដីស្វយ័តស្វ័យភាពនេះនៅក្នុងព្រះរាជាណាចក្រដាណឺម៉ាក ដោយគ្មានប្រទេសណាអាចកាន់កាប់ ឬទិញកោះទាំងនេះពីដាណឺម៉ាកបានឡើយ។ អ្នកជំនាញជនជាតិដាណឺម៉ាក Royal Royal Lars Hovbakke Sørensen ជឿជាក់ថាការផ្លាស់ប្តូរទាំងនេះឆ្លុះបញ្ចាំងពីចំណាប់អារម្មណ៍ផ្ទាល់ខ្លួនរបស់ស្តេចចំពោះតំបន់ Arctic និងបញ្ជាក់ថា កោះហ្គ្រីនឡែន និងកោះហ្វារ៉ូគឺជាផ្នែកមួយដ៏សំខាន់នៃទឹកដីរបស់ដាណឺម៉ាក៕