ប្រទេសថៃ ៖ កាលពីខែតុលា ឆ្នាំ២០២៤ កន្លងមក សមត្ថកិច្ចថៃបានចា.ប់ ខ្លួននាយកក្រុមហ៊ុន The iCon Group, តារាល្បីៗលំដាប់ប្រទេស ចំនួន៣រូប រួមទាំងជនពាក់ព័ន្ធផ្សេងទៀតដាក់ពន្ធ.នាគារ ក្រោយទទួលបានពាក្យបណ្តឹងជាច្រើនពីជនរងគ្រោះនៅថៃ និងក្រៅប្រទេសថា ពួកគេចាញ់បោកក្រុមហ៊ុននេះអស់ប្រាក់យ៉ាងច្រើន ដែលរកស៊ីបោកប្រាស់យកតារាល្បីៗមកផ្សព្វផ្សាយលក់ផលិតផល ។

តារាសម្តែងថៃ៣រូប ដែលសមត្ថកិច្ចចាប់ខ្លួនដាក់ពន្ធនាគារ នៅខែតុលា ឆ្នាំ២០២៤ រួមមាន ៖ អ្នកនាង ភីឆាយ៉ា វឌ្ឍនាមុនទ្រី (ហៅមីន), លោក យូរ៉ាណាន់ ផាម៉ុនមុនទ្រី (ហៅសែម ឬលោក ប៉ាតាវី) និងលោក បូសាកាន់ កាន់ថាថាវ៉ន (ហៅកាន់) ។ តុលាការចោទប្រកាន់ថា ពួកគេបានសហការ និងទទួលប្រាក់ចំណូលពីក្រុមហ៊ុន The iCon Group ហើយថា ពួកគេមានទោសកំហុសធ្ងន់ធ្ងរ ពុំអាចដោះលែងឱ្យនៅក្រៅឃុំបានទេ ពីព្រោះអាចរត់គេចខ្លួនទៅក្លែងបន្លំភស្តុតាង ។

នៅថ្ងៃទី៨ ខែមករា ឆ្នាំ២០២៥ សារព័ត៌មាន Thairath រាយការណ៍ថា តុលាការបានចោទប្រកាន់ថ្នាក់ដឹកនាំធំៗរបស់ក្រុមហ៊ុន The iCon Group ទាំងអស់ លើកលែងតែតារាសម្តែង២រូប គឺអ្នកនាង ភីឆាយ៉ា វឌ្ឍនាមុនទ្រី និងលោក យូរ៉ាណាន់ ផាម៉ុនមុនទ្រី ដោយសារគ្មានភស្តុតាងគ្រប់គ្រាន់ ហើយតុលាការសម្រេចដោះលែងពួកគេឱ្យមានសេរីភាព ។

ក្រោយពីត្រូវបានដោះលែងចេញពីពន្ធនាគារស្ត្រីនៅទីក្រុងបាងកក អ្នកនាង ភីឆាយ៉ា បានឡើងជិះរថយន្តជាមួយក្រុមគ្រួសារ និងនិយាយមកកាន់ប្រព័ន្ធផ្សព្វផ្សាយថា នាងសូមអរគុណតុលាការសម្រាប់ការផ្តល់ភាពយុត្តិធម៌នេះ ហើយខាងពន្ធនាគារបានថែទាំនាងយ៉ាងល្អ ។ នាងក៏សូមអរគុណដល់អ្នកគាំទ្រផងដែរ ដែលបានផ្តល់កម្លាំងចិត្តទាមទារយុត្តិធម៌ឱ្យនាង ហើយនាងនឹងទៅថែទាំសុខភាពជាមួយគ្រួសារ ដោយសារស្រកទម្ងន់ច្រើន ។

នាងបានបញ្ជាក់តាំងពីដើមទីហើយថា នាងរីករាយចូលរួមក្នុងការស្វែងរកយុត្តិធម៌របស់តុលាការ និងព្រមបង្ហាញថា នាងជាមនុស្សបរិសុទ្ធ ពុំបានប្រព្រឹត្តខុស ។ ថ្ងៃនេះ (ថ្ងៃទី៨ ខែមករា) តុលាការបានពិសោធន៍រួចហើយ បើមានឱកាស នាងនឹងបកស្រាយរឿងនេះម្តងទៀត ។

សារព័ត៌មានថៃរាយការណ៍ថា នៅបរិវេណខាងមុខពន្ធនាគារពិសេសទីក្រុងបាងកក កូនប្រុស និងកូនស្រីរបស់តារាសម្តែង លោក យូរ៉ាណាន់ បានមករង់ចាំទទួលឪពុកចេញពីពន្ធនាគារ និងអរគុណអ្នកគាំទ្រទាំងអស់ ។ លោក យូរ៉ាណាន់ បានចាកចេញពីធនាគារ ដោយពាក់មួក និងម៉ាស់ ព្រមទាំងកាន់ព្រះពុទ្ធរូប ៕

ស្មាតហ្វូនដំបូងបង្អស់របស់ Samsung ដែលមានអេក្រង់បត់បានបីតង់ ត្រូវបានគេរំពឹងថានឹងបង្ហាញខ្លួននៅក្នុងទីផ្សារអាស៊ីមួយចំនួននៅក្នុងឆមាសទីពីរនៃឆ្នាំ ២០២៥។

យោងតាម PhoneArena ដែលជាគេហទំព័របច្ចេកវិទ្យាល្បីល្បាញមួយបានឱ្យដឹងថា ក្រុមហ៊ុន Samsung កំពុងត្រៀមខ្លួនក្នុងការដាក់បង្ហាញស្មាតហ្វូនបត់បានបីតង់ដំបូងបង្អស់របស់ខ្លួននៅក្នុងទីផ្សារអាស៊ីនៅពាក់កណ្តាលឆ្នាំនេះ។ ទោះជាយ៉ាងណាស្មាតហ្វូន tri-fold របស់ Samsung ទំនងមានតម្លៃខ្ពស់ខ្លាំងណាស់។

វាត្រូវបានគេនិយាយថា ស្មាតហ្វូនមួយនេះទំនងមិនសូវមានប្រជាប្រិយភាពនោះទេនៅពេលដាក់បង្ហាញជាផ្លូវការដោយសារតម្លៃខ្ពស់ពេក។ សូម្បីទូរស័ព្ទ Mate XT tri-fold របស់ Huawei ដែលចេញលក់ប៉ុន្មានខែមុនក៏មានតម្លៃខ្ពស់ខ្លាំងដែរ ជាមួយតម្លៃរហូតដល់ ២,៨០០ ដុល្លារអាមេរិក ថ្លៃជាង iPhone 16 Pro បីដង។ ដូច្នេះស្មាតហ្វូនបត់បានបីតង់ដំបូងបង្អស់របស់ Samsung ត្រូវបានគេនិយាយថា នឹងមានតម្លៃថ្លៃជាង ស្មាតហ្វូនបត់បានបីតង់របស់ Huawei ទៅទៀត។

នេះបើយោងតាមប្រព័ន្ធផ្សព្វផ្សាយកូរ៉េ ហេតុផលដែលធ្វើឱ្យទូរស័ព្ទប្រភេទ tri-fold មានតម្លៃខ្ពស់ និងពិបាកក្នុងការទទួលបានប្រជាប្រិយភាព គឺដោយសារដំណើរការផលិតដ៏ស្មុគស្មាញ ដូច្នេះ Samsung គ្រោងនឹងបញ្ចេញឧបករណ៍នេះតិចជាង ៣០០,០០០ គ្រឿងប៉ុណ្ណោះនៅក្នុងទីផ្សារមួយ ឬពីរនៅអាស៊ីក្នុងឆ្នាំ ២០២៥។ ជាមួយលក្ខណៈពិសេសនៃឧបករណ៍របស់ក្រុមហ៊ុន Samsung ត្រូវបានគេរំពឹងថានឹងមានអេក្រង់ធំទូលាយទំហំ ១២.៤ អ៊ីង នៅពេលបើកពេញ ដែលមានបំណងជំនួសទូរស័ព្ទ និងថេប្លេតប្រពៃណី ខណៈទំហំនេះក៏លើសពី ១០.២ អ៊ីញរបស់ Huawei Mate XT ផងដែរ។

លើសពីនេះឧបករណ៍នេះនឹងមានការរចនាប្រភេទ G-Type ដើម្បីផ្តោតលើភាពធន់ និងគុណភាពខ្ពស់ ខុសពីការរចនា S-Type របស់ Huawei Mate XT ។ អេក្រង់ G-Type មានការរចនាជាមួយនឹងអេក្រង់ខាងក្រៅពីរដែលអាចបត់ចូលខាងក្នុងបាន មិនសូវស្មុគស្មាញ និងជួយការពារអេក្រង់មេ នៅពេលដែលមិនប្រើ ។ ព័ត៌មានលម្អិតគួរឱ្យចាប់អារម្មណ៍មួយទៀតគឺថាឧបករណ៍នេះប្រហែលជាមិនប្រើកាមេរ៉ាលាក់នៅក្រោមអេក្រង់ទេ មានន័យថា ក្រុមហ៊ុននឹងខួងរន្ធតូចមួយនៅលើអេក្រង់ ដោយកាត់បន្ថយភាពទំនើបនៃផលិតផល។

ទោះបីជាយ៉ាងនេះក្តីការបង្ហាញផលិតផលអេក្រង់បត់បានបីតង់របស់ Samsung នាពេលខាងមុខនេះនឹងក្លាយជាផ្នែកមួយនៃផែនការរបស់ក្រុមហ៊ុនក្នុងការពង្រីក និងពង្រឹងត្រកូលទូរស័ព្ទដែលអាចបត់បានរបស់ខ្លួនឱ្យរឹងមាំជាងមុន៕

ស៊េរី Netflix មានចំណងជើងថា «Squid Game រដូវកាលទី២» បានក្លាយជាការចាប់អារម្មណ៍ជាសកល ដោយជាប់ចំណាត់ថ្នាក់លេខ ១ ក្នុងចំណោម ៩៣ប្រទេស រួមទាំងសហរដ្ឋអាម៉េរិក ជប៉ុន និងបារាំង សម្រាប់រយៈពេល៥ថ្ងៃជាប់ៗគ្នា។ ទោះជាយ៉ាងណាក៏ដោយ នៅក្នុងប្រទេសវៀតណាម ខ្សែភាពយន្តដែលមានចំនួន៧ភាគនេះកំពុងប្រឈមមុខនឹងការអំពាវនាវឱ្យធ្វើពហិកាហើយអាជ្ញាធរភាពយន្តវៀតណាមបានបើកការពិនិត្យឡើងវិញជាផ្លូវការ។

យោងតាមប្រព័ន្ធផ្សព្វផ្សាយក្នុងស្រុក ភាពចម្រូងចម្រាសក្នុងប្រទេសវៀតណាម ផ្តើមចេញនៅក្នុងភាគទី៥ តួអង្គ Kang Dae Ho សម្តែងដោយ Kang Ha Neul ប្រាប់ក្រុមមិត្តភក្តិរបស់ខ្លួនថា «ឪពុកខ្ញុំបានចូលរួម ក្នុងសង្រ្គាមវៀតណាម» បន្ទាប់មក មិត្តភ័ក្តិម្នាក់ទៀតបានបញ្ចេញមតិថា«ឪពុករបស់អ្នកគឺជាមនុស្សអស្ចារ្យ» ដើម្បីឆ្លើយតបនឹងការកោតសរសើររបស់តួអង្គជុំវិញ។

ទស្សនិកជនវៀតណាមមួយចំនួនបានខឹងសម្បារចំពោះរឿងនេះ ដោយចោ.ទថាការបង្ហាញការប៉ះទង្គិចលើបញ្ហាប្រវត្តិសាស្ត្រដ៏រសើប។ អ្នកនិយមលេងអ៊ីនធឺណិតវៀតណាមបានលើកឡើងថា ការសរសើរទាហានកូរ៉េខាងត្បូងដែលជាប់ពាក់ព័ន្ធក្នុងសង្គ្រាមវៀតណាមថាជា «មនុស្សអស្ចារ្យ» ជារឿងមិនសមរម្យយ៉ាងខ្លាំង។ កំហឹងបានរីករាលដាលយ៉ាងឆាប់រហ័សក្នុងចំណោមអ្នកប្រើប្រាស់វៀតណាមនៅលើបណ្តាញសង្គម ជាមួយនឹងការអំពាវនាវឱ្យធ្វើពហិកា។

ជាការឆ្លើយតប អាជ្ញាធរភាពយន្តវៀតណាមបានផ្តួចផ្តើមការពិនិត្យឡើងវិញនៃ «Squid Game 2» ហើយត្រូវបានគេរំពឹងថានឹងប្រកាសសាលក្រមជាផ្លូវការក្នុងពេលឆាប់ៗនេះ។
គួរបញ្ជាក់ថា Squid Game រដូវកាលទី២ ដែលមានចំនួន៧ភាគ បានចេញផ្សាយនៅថ្ងៃទី២៦ ខែធ្នូ ឆ្នាំ២០២៤ បន្ទាប់ពីជោគជ័យនៃរដូវកាលទី១ ក្នុងឆ្នាំ២០២១ ៕

សហរដ្ឋអាមេរិក៖ ទិដ្ឋភាពភ្លើងឆេះព្រៃរាប់ពាន់ហិចតានៅទីក្រុង Los Angeles សហរដ្ឋអាមេរិក បានកើតឡើងកាលពីថ្ងៃទី៧ ខែមករា បណ្តាលឱ្យមនុស្ស ៥ នាក់បាត់.បង់ជីវិត និងមនុស្សរាប់លាននាក់ទៀតត្រូវជម្លៀសចេញភ្លាមៗ រួមទាំងផ្ទះសម្បែងរាប់ពាន់ខ្នងត្រូវបានឆាបឆេះ ខណៈបច្ចុប្បន្នភ្លើងនៅតែរាលដាលខ្លាំងក្នុងល្បឿនលឿនគួរឱ្យភ័យខ្លាចបំផុត។

នេះបើយោងតាមការចុះផ្សាយរបស់សារព័ត៌មានបរទេស CNN ភ្លើងដែលមានឈ្មោះថា Pacific Palisades បានឆាបឆេះនៅវេលាថ្ងៃត្រង់នាថ្ងៃទី ៧ ខែមករា ឆ្នាំ២០២៥ ហើយបានរាលដាលដល់ ៥២៦ ហិកតាក្នុងរយៈពេលតែ ៤ ម៉ោងប៉ុណ្ណោះ។ យោងតាមនាយកដ្ឋានពន្លត់អគ្គីភ័យ Los Angeles ប្រជាជនក្នុងតំបន់ប្រហែល ៣០,០០០ នាក់ត្រូវបានបញ្ជាឱ្យជម្លៀសចេញជាបន្ទាន់ ខណៈដែលផ្ទះជាង ១០,០០០ ខ្នងត្រូវបានបំផ្លាញដោយភ្លើង។

បច្ចុប្បន្នរដ្ឋាភិបាលក្រុង Los Angeles បានប្រកាសដាក់ទីក្រុងមួយនេះក្នុងភាពអាសន្ន ដើម្បីដោះស្រាយបញ្ហាភ្លើងឆេះព្រៃ។ ស្ថានភាពត្រូវបានគេរំពឹងថានឹងកាន់តែអាក្រក់ទៅៗ ដោយសារតែខ្យល់បក់ខ្លាំង ហើយអូសបន្លាយមកដល់ថ្ងៃទី៩ ខែមករាហើយនៅមិនទាន់រលត់ទៀត ខណៈអ្នកស្រុកទាំងអស់ក៏ត្រូវបានណែនាំឱ្យរៀបចំផែនការជម្លៀសចេញពីកន្លែងគ្រោះថ្នាក់នេះភ្លាមៗ។

មូលហេតុដែលព្រៃត្រូវបានភ្លើងឆេះឥតឈប់ឈរគឺដោយសារសកម្មភាពរបស់មនុស្ស ជាពិសេសការកាប់បំផ្លាញព្រៃឈើ និងការដុតព្រៃដើម្បីកាប់ឆ្ការដីកសិកម្ម រួមទាំងគ្រោះរាំងស្ងួតជាប្រវត្តិសាស្ត្រកាលពីឆ្នាំមុនៗ ក៏ដូចជាការប្រែប្រួលអាកាសធាតុ ការកង្វះទឹកភ្លៀង ដែលកំពុងបង្កើនចំនួនភ្លើងឆេះព្រៃ ជាហេតុបណ្តាលឱ្យបរិស្ថានស្ងួត និងងាយឆេះបែបនេះ។

មុនពេលភ្លើងឆេះ សេវាអាកាសធាតុជាតិបានចេញការព្រមានខ្ពស់បំផុតរបស់ខ្លួនសម្រាប់លក្ខខណ្ឌភ្លើងឆេះព្រៃខ្លាំងនៅទីក្រុង Los Angeles ចាប់ពីថ្ងៃទី ៧ ដល់ថ្ងៃទី ៩ ខែមករា ដោយព្យាករណ៍ថានឹងមានខ្យល់បក់ខ្លាំងពី ៨០ ទៅ ១៣០ គីឡូម៉ែត្រក្នុងមួយម៉ោង។ ហេតុនេះហើយបច្ចុប្បន្នភ្លើងនៅតែបន្តឆាបឆេះឥតឈប់ឈរ ទោះជាយ៉ាងណាមនុស្សរាប់លាននាក់ផ្សេងទៀតបានជម្លៀសទៅទីកន្លែងមានសុវត្ថិភាពហើយ៕

ប្រទេសកេនយ៉ា ៖ Influencer កេនយ៉ាម្នាក់បានបង្កើតមាតិកាលើគំនរសំរាមសម្លៀកបំពាក់ ដើម្បីឱ្យមនុស្សគ្រប់គ្នាយល់ដឹងពីបញ្ហាកាកសំណល់កើតឡើងដោយសារការនិយមទិញសម្លៀកបំពាក់ទាន់សម័យ ។ វាបានក្លាយជាបញ្ហាពិបាកដោះស្រាយសម្រាប់ប្រទេសជាច្រើនក្នុងទ្វីបអាហ្វ្រិក ព្រមទាំងប្រទេសកំពុងអភិវឌ្ឍន៍នៅទូទាំងពិភពលោក ។

អ្នកស្រី ជេណេត ឆេមិថេ អាយុ២៨ឆ្នាំ បានមកកាន់ភ្នំសំរាមឈ្មោះ ដេនឌ័រ៉ា ជាញឹកញាប់ ដើម្បីថតវីដេអូតាមទូរស័ព្ទដៃ និងផ្សព្វផ្សាយក្នុងបណ្តាសង្គមអំពាវនាវឱ្យគ្រប់គ្នាយល់ដឹងពីផលប៉ះពាល់បរិស្ថាន ដោយសារការបោះចោលសម្លៀកបំពាក់ក្លាយជាភ្នំសំរាម ។ វីដេអូមួយក្នុង Instagram របស់អ្នកស្រី គឺមានចំនួនទស្សនារហូតដល់ជាង១០លានលើក ។ អ្នកស្រីថា ៖ «ខ្ញុំមានគោលដៅចែកចាយវីដេអូដើម្បីឱ្យគ្រប់គ្នាដឹងថា សម្លៀកបំពាក់ទាន់សម័យប៉ះពាល់បរិស្ថានកម្រិតណា ។ ដេនឌ័រ៉ា ជាកន្លែងចាក់សំរាមដ៏ធំនៅជាយក្រុងណូរ៉ូប៊ី និងលើពិភពលោក» ។

ដំណោះស្រាយរបស់អ្នកស្រី គឺពុំគួរបោះសម្លៀកបំពាក់ណាដែលអាចស្លៀកបាន ហើយអ្នកស្រីតែងតែដើររកសម្លៀកបំពាក់ចាស់ៗមកកែច្នៃឡើងវិញ ។ អ្នកស្រីប្រាប់វា សម្លៀកបំពាក់ចាស់ក៏អាចកែច្នៃជាសម្លៀកបំពាក់ឡូយបានដែរ គ្រាន់តែយើងព្យាយាមប៉ុណ្ណោះ ។ ពេលឃើញយុវជនលើកទឹកចិត្តអ្នកដទៃឱ្យយកសម្លៀកបំពាក់មកដោះដូរគ្នា, ទិញសម្លៀកបំពាក់ជជុះ និងដេរសម្លៀកបំពាក់ដោយខ្លួនឯង គឺខ្ញុំមានក្តីសុខខ្លាំងណាស់ ពីព្រោះនេះជាគោលដៅនៃការបង្កើតមាតិការបស់ខ្ញុំឱ្យមនុស្សគ្រប់គ្នាកាត់បន្ថយការទិញសម្លៀកបំពាក់ទាន់សម័យ ។

ក្រៅពីការបង្កើតមាតិកាផ្សព្វផ្សាយក្នុងបណ្តាញសង្គមឱ្យយល់ដឹងពីបញ្ហាភ្នំសំរាម អ្នកស្រីបានរៀបចំសិក្ខាសាលាបកស្រាយក្នុងកម្មវិធី Fair Fashion នៅទីក្រុងណូរ៉ូប៊ី ដែលមានអ្នករចនាម៉ូដសម្លៀកបំពាក់ក្នុងស្រុក និងសិល្បករយកសម្លៀកបំពាក់កែច្នៃមកបង្ហាញ ។ ក្រៅពីនេះ អ្នកចូលរួមកម្មវិធីក៏បានដោះដូរសម្លៀកបំពាក់ជជុះផងដែរ ។

តាមទិន្នន័យក្នុងគម្រោងបរិស្ថានរបស់អង្គការសហប្រជាជាតិបង្ហាញថា ក្នុង១ឆ្នាំៗ សម្លៀកបំពាក់ទាន់សម័យពុំទាន់ដាច់រហែក ឬអាចស្លៀកពាក់បាន ស្មើទឹកប្រាក់ជាង៤៦០ពាន់លានដុល្លារអាមេរិក ត្រូវគេបោះចោលក្លាយជាសំរាម ។ ឧស្សាហកម្មសម្លៀកបំបាក់ទាន់សម័យបានបំពុលបរិស្ថាន ១០% ហើយពលរដ្ឋប្រទេសរីកចម្រើនបានទិញសម្លៀកបំពាក់ថ្មីលើសតម្រូវការ និងលក់សម្លៀកបំពាក់ជជុះទៅប្រទេសក្រីក្រ គឺកេនយ៉ា ៕