ស៊េរី Netflix មានចំណងជើងថា «Squid Game រដូវកាលទី២» បានក្លាយជាការចាប់អារម្មណ៍ជាសកល ដោយជាប់ចំណាត់ថ្នាក់លេខ ១ ក្នុងចំណោម ៩៣ប្រទេស រួមទាំងសហរដ្ឋអាម៉េរិក ជប៉ុន និងបារាំង សម្រាប់រយៈពេល៥ថ្ងៃជាប់ៗគ្នា។ ទោះជាយ៉ាងណាក៏ដោយ នៅក្នុងប្រទេសវៀតណាម ខ្សែភាពយន្តដែលមានចំនួន៧ភាគនេះកំពុងប្រឈមមុខនឹងការអំពាវនាវឱ្យធ្វើពហិកាហើយអាជ្ញាធរភាពយន្តវៀតណាមបានបើកការពិនិត្យឡើងវិញជាផ្លូវការ។

យោងតាមប្រព័ន្ធផ្សព្វផ្សាយក្នុងស្រុក ភាពចម្រូងចម្រាសក្នុងប្រទេសវៀតណាម ផ្តើមចេញនៅក្នុងភាគទី៥ តួអង្គ Kang Dae Ho សម្តែងដោយ Kang Ha Neul ប្រាប់ក្រុមមិត្តភក្តិរបស់ខ្លួនថា «ឪពុកខ្ញុំបានចូលរួម ក្នុងសង្រ្គាមវៀតណាម» បន្ទាប់មក មិត្តភ័ក្តិម្នាក់ទៀតបានបញ្ចេញមតិថា«ឪពុករបស់អ្នកគឺជាមនុស្សអស្ចារ្យ» ដើម្បីឆ្លើយតបនឹងការកោតសរសើររបស់តួអង្គជុំវិញ។

ទស្សនិកជនវៀតណាមមួយចំនួនបានខឹងសម្បារចំពោះរឿងនេះ ដោយចោ.ទថាការបង្ហាញការប៉ះទង្គិចលើបញ្ហាប្រវត្តិសាស្ត្រដ៏រសើប។ អ្នកនិយមលេងអ៊ីនធឺណិតវៀតណាមបានលើកឡើងថា ការសរសើរទាហានកូរ៉េខាងត្បូងដែលជាប់ពាក់ព័ន្ធក្នុងសង្គ្រាមវៀតណាមថាជា «មនុស្សអស្ចារ្យ» ជារឿងមិនសមរម្យយ៉ាងខ្លាំង។ កំហឹងបានរីករាលដាលយ៉ាងឆាប់រហ័សក្នុងចំណោមអ្នកប្រើប្រាស់វៀតណាមនៅលើបណ្តាញសង្គម ជាមួយនឹងការអំពាវនាវឱ្យធ្វើពហិកា។

ជាការឆ្លើយតប អាជ្ញាធរភាពយន្តវៀតណាមបានផ្តួចផ្តើមការពិនិត្យឡើងវិញនៃ «Squid Game 2» ហើយត្រូវបានគេរំពឹងថានឹងប្រកាសសាលក្រមជាផ្លូវការក្នុងពេលឆាប់ៗនេះ។
គួរបញ្ជាក់ថា Squid Game រដូវកាលទី២ ដែលមានចំនួន៧ភាគ បានចេញផ្សាយនៅថ្ងៃទី២៦ ខែធ្នូ ឆ្នាំ២០២៤ បន្ទាប់ពីជោគជ័យនៃរដូវកាលទី១ ក្នុងឆ្នាំ២០២១ ៕

សហរដ្ឋអាមេរិក៖ ទិដ្ឋភាពភ្លើងឆេះព្រៃរាប់ពាន់ហិចតានៅទីក្រុង Los Angeles សហរដ្ឋអាមេរិក បានកើតឡើងកាលពីថ្ងៃទី៧ ខែមករា បណ្តាលឱ្យមនុស្ស ៥ នាក់បាត់.បង់ជីវិត និងមនុស្សរាប់លាននាក់ទៀតត្រូវជម្លៀសចេញភ្លាមៗ រួមទាំងផ្ទះសម្បែងរាប់ពាន់ខ្នងត្រូវបានឆាបឆេះ ខណៈបច្ចុប្បន្នភ្លើងនៅតែរាលដាលខ្លាំងក្នុងល្បឿនលឿនគួរឱ្យភ័យខ្លាចបំផុត។

នេះបើយោងតាមការចុះផ្សាយរបស់សារព័ត៌មានបរទេស CNN ភ្លើងដែលមានឈ្មោះថា Pacific Palisades បានឆាបឆេះនៅវេលាថ្ងៃត្រង់នាថ្ងៃទី ៧ ខែមករា ឆ្នាំ២០២៥ ហើយបានរាលដាលដល់ ៥២៦ ហិកតាក្នុងរយៈពេលតែ ៤ ម៉ោងប៉ុណ្ណោះ។ យោងតាមនាយកដ្ឋានពន្លត់អគ្គីភ័យ Los Angeles ប្រជាជនក្នុងតំបន់ប្រហែល ៣០,០០០ នាក់ត្រូវបានបញ្ជាឱ្យជម្លៀសចេញជាបន្ទាន់ ខណៈដែលផ្ទះជាង ១០,០០០ ខ្នងត្រូវបានបំផ្លាញដោយភ្លើង។

បច្ចុប្បន្នរដ្ឋាភិបាលក្រុង Los Angeles បានប្រកាសដាក់ទីក្រុងមួយនេះក្នុងភាពអាសន្ន ដើម្បីដោះស្រាយបញ្ហាភ្លើងឆេះព្រៃ។ ស្ថានភាពត្រូវបានគេរំពឹងថានឹងកាន់តែអាក្រក់ទៅៗ ដោយសារតែខ្យល់បក់ខ្លាំង ហើយអូសបន្លាយមកដល់ថ្ងៃទី៩ ខែមករាហើយនៅមិនទាន់រលត់ទៀត ខណៈអ្នកស្រុកទាំងអស់ក៏ត្រូវបានណែនាំឱ្យរៀបចំផែនការជម្លៀសចេញពីកន្លែងគ្រោះថ្នាក់នេះភ្លាមៗ។

មូលហេតុដែលព្រៃត្រូវបានភ្លើងឆេះឥតឈប់ឈរគឺដោយសារសកម្មភាពរបស់មនុស្ស ជាពិសេសការកាប់បំផ្លាញព្រៃឈើ និងការដុតព្រៃដើម្បីកាប់ឆ្ការដីកសិកម្ម រួមទាំងគ្រោះរាំងស្ងួតជាប្រវត្តិសាស្ត្រកាលពីឆ្នាំមុនៗ ក៏ដូចជាការប្រែប្រួលអាកាសធាតុ ការកង្វះទឹកភ្លៀង ដែលកំពុងបង្កើនចំនួនភ្លើងឆេះព្រៃ ជាហេតុបណ្តាលឱ្យបរិស្ថានស្ងួត និងងាយឆេះបែបនេះ។

មុនពេលភ្លើងឆេះ សេវាអាកាសធាតុជាតិបានចេញការព្រមានខ្ពស់បំផុតរបស់ខ្លួនសម្រាប់លក្ខខណ្ឌភ្លើងឆេះព្រៃខ្លាំងនៅទីក្រុង Los Angeles ចាប់ពីថ្ងៃទី ៧ ដល់ថ្ងៃទី ៩ ខែមករា ដោយព្យាករណ៍ថានឹងមានខ្យល់បក់ខ្លាំងពី ៨០ ទៅ ១៣០ គីឡូម៉ែត្រក្នុងមួយម៉ោង។ ហេតុនេះហើយបច្ចុប្បន្នភ្លើងនៅតែបន្តឆាបឆេះឥតឈប់ឈរ ទោះជាយ៉ាងណាមនុស្សរាប់លាននាក់ផ្សេងទៀតបានជម្លៀសទៅទីកន្លែងមានសុវត្ថិភាពហើយ៕

ប្រទេសកេនយ៉ា ៖ Influencer កេនយ៉ាម្នាក់បានបង្កើតមាតិកាលើគំនរសំរាមសម្លៀកបំពាក់ ដើម្បីឱ្យមនុស្សគ្រប់គ្នាយល់ដឹងពីបញ្ហាកាកសំណល់កើតឡើងដោយសារការនិយមទិញសម្លៀកបំពាក់ទាន់សម័យ ។ វាបានក្លាយជាបញ្ហាពិបាកដោះស្រាយសម្រាប់ប្រទេសជាច្រើនក្នុងទ្វីបអាហ្វ្រិក ព្រមទាំងប្រទេសកំពុងអភិវឌ្ឍន៍នៅទូទាំងពិភពលោក ។

អ្នកស្រី ជេណេត ឆេមិថេ អាយុ២៨ឆ្នាំ បានមកកាន់ភ្នំសំរាមឈ្មោះ ដេនឌ័រ៉ា ជាញឹកញាប់ ដើម្បីថតវីដេអូតាមទូរស័ព្ទដៃ និងផ្សព្វផ្សាយក្នុងបណ្តាសង្គមអំពាវនាវឱ្យគ្រប់គ្នាយល់ដឹងពីផលប៉ះពាល់បរិស្ថាន ដោយសារការបោះចោលសម្លៀកបំពាក់ក្លាយជាភ្នំសំរាម ។ វីដេអូមួយក្នុង Instagram របស់អ្នកស្រី គឺមានចំនួនទស្សនារហូតដល់ជាង១០លានលើក ។ អ្នកស្រីថា ៖ «ខ្ញុំមានគោលដៅចែកចាយវីដេអូដើម្បីឱ្យគ្រប់គ្នាដឹងថា សម្លៀកបំពាក់ទាន់សម័យប៉ះពាល់បរិស្ថានកម្រិតណា ។ ដេនឌ័រ៉ា ជាកន្លែងចាក់សំរាមដ៏ធំនៅជាយក្រុងណូរ៉ូប៊ី និងលើពិភពលោក» ។

ដំណោះស្រាយរបស់អ្នកស្រី គឺពុំគួរបោះសម្លៀកបំពាក់ណាដែលអាចស្លៀកបាន ហើយអ្នកស្រីតែងតែដើររកសម្លៀកបំពាក់ចាស់ៗមកកែច្នៃឡើងវិញ ។ អ្នកស្រីប្រាប់វា សម្លៀកបំពាក់ចាស់ក៏អាចកែច្នៃជាសម្លៀកបំពាក់ឡូយបានដែរ គ្រាន់តែយើងព្យាយាមប៉ុណ្ណោះ ។ ពេលឃើញយុវជនលើកទឹកចិត្តអ្នកដទៃឱ្យយកសម្លៀកបំពាក់មកដោះដូរគ្នា, ទិញសម្លៀកបំពាក់ជជុះ និងដេរសម្លៀកបំពាក់ដោយខ្លួនឯង គឺខ្ញុំមានក្តីសុខខ្លាំងណាស់ ពីព្រោះនេះជាគោលដៅនៃការបង្កើតមាតិការបស់ខ្ញុំឱ្យមនុស្សគ្រប់គ្នាកាត់បន្ថយការទិញសម្លៀកបំពាក់ទាន់សម័យ ។

ក្រៅពីការបង្កើតមាតិកាផ្សព្វផ្សាយក្នុងបណ្តាញសង្គមឱ្យយល់ដឹងពីបញ្ហាភ្នំសំរាម អ្នកស្រីបានរៀបចំសិក្ខាសាលាបកស្រាយក្នុងកម្មវិធី Fair Fashion នៅទីក្រុងណូរ៉ូប៊ី ដែលមានអ្នករចនាម៉ូដសម្លៀកបំពាក់ក្នុងស្រុក និងសិល្បករយកសម្លៀកបំពាក់កែច្នៃមកបង្ហាញ ។ ក្រៅពីនេះ អ្នកចូលរួមកម្មវិធីក៏បានដោះដូរសម្លៀកបំពាក់ជជុះផងដែរ ។

តាមទិន្នន័យក្នុងគម្រោងបរិស្ថានរបស់អង្គការសហប្រជាជាតិបង្ហាញថា ក្នុង១ឆ្នាំៗ សម្លៀកបំពាក់ទាន់សម័យពុំទាន់ដាច់រហែក ឬអាចស្លៀកពាក់បាន ស្មើទឹកប្រាក់ជាង៤៦០ពាន់លានដុល្លារអាមេរិក ត្រូវគេបោះចោលក្លាយជាសំរាម ។ ឧស្សាហកម្មសម្លៀកបំបាក់ទាន់សម័យបានបំពុលបរិស្ថាន ១០% ហើយពលរដ្ឋប្រទេសរីកចម្រើនបានទិញសម្លៀកបំពាក់ថ្មីលើសតម្រូវការ និងលក់សម្លៀកបំពាក់ជជុះទៅប្រទេសក្រីក្រ គឺកេនយ៉ា ៕

ប្រទេសថៃ៖ យោងតាមកាសែតបាងកកប៉ុស្តិ៍ នៅឆ្នាំ២០២៤ ប្រទេសថៃបានទទួលភ្ញៀវអន្តរជាតិជាង ៣៥ លាននាក់ ដែលលើសពីគោលដៅរបស់រដ្ឋាភិបាល ធ្វើឱ្យសេដ្ឋកិច្ចរបស់ប្រទេសនេះរកចំណូលបានរហូតដល់ ១,៦ ពាន់ពាន់លានបាត (ប្រមាណ ៤៦ ពាន់លានដុល្លារអាមេរិក)។ ដូច្នេះវិស័យទេសចរណ៍ គឺជាវិស័យមួយដែលធ្វើឱ្យប្រទេសថៃនាំមុខគេនៅអាស៊ីអាគ្នេយ៍ ដោយឈរនៅចំណាត់ថ្នាក់លេខ ១ និងលេខ ៨ នៅលើពិភពលោក ជាប្រទេសដែលមានភ្ញៀវទេសចរទៅទស្សនាច្រើនគេ។

បើប្រៀបធៀបទៅនឹងប្រទេសដទៃទៀតក្នុងតំបន់អាស៊ីអាគ្នេយ៍ ឧស្សាហកម្មទេសចរណ៍របស់ប្រទេសថៃនាំមុខគេហើយ ខណៈម៉ាឡេស៊ីបានស្វាគមន៍ភ្ញៀវអន្តរជាតិត្រឹមតែ ២៧.៣ លាននាក់ ហើយវៀតណាមបានស្វាគមន៍ភ្ញៀវអន្តរជាតិត្រឹមតែ ១៧.៦ លាននាក់ប៉ុណ្ណោះ។ ភ្ញៀវទេសចរដែលមកទស្សនាប្រទេសថៃភាគច្រើនគឺជាជនជាតិចិនដែលមានរហូតដល់ ៦,៧០ លាននាក់ បន្ទាប់មកគឺម៉ាឡេស៊ី ៤,៩៣ លាននាក់ ឥណ្ឌា ២,១២ លាននាក់ កូរ៉េ ១,៨៦ លាននាក់ និងរុស្ស៊ី ១,៧២ លាននាក់។

ក្នុងអំឡុងពេលដូចគ្នានេះ ប្រជាជនថៃក៏បានធ្វើដំណើរកម្សាន្តក្នុងស្រុកចំនួន ១៩៧,៥៣ លាននាក់ និងបានចំណាយប្រាក់ ៩៥២,៧៧ ពាន់លានបាតផងដែរ។ ហេតុនេះហើយនៅឆ្នាំ ២០២៤ ប្រទេសថៃឈរនៅចំណាត់ថ្នាក់លេខ ១ ជាប្រទេសដែលមានភ្ញៀវទេសចរច្រើនគេនៅអាស៊ីអាគ្នេយ៍។ អភិបាលខេត្តទេសចរណ៍ថៃ (TAT) លោក Thapanee Kiatphaibool បាននិយាយថា ចំនួនភ្ញៀវទេសចរជាតិ និងអន្តរជាតិបានកើនឡើង ២៥% បើប្រៀបធៀបនឹងរយៈពេលដូចគ្នាក្នុងឆ្នាំ ២០២៣ ដែលបង្ហាញថា ឧស្សាហកម្មទេសចរណ៍បានឈានដល់គោលដៅខ្ពស់បំផុតដែលបានកំណត់។

បន្ទាប់ពីលើសពីគោលដៅទេសចរណ៍ ៣៥ លាននាក់នៅឆ្នាំ ២០២៤ រដ្ឋាភិបាលថៃក៏បានកំណត់គោលដៅថ្មីបន្ទាប់សម្រាប់ទេសចរណ៍ ៣៩ លាននាក់នៅឆ្នាំ ២០២៥។ មូលហេតុដែលប្រទេសថៃមានកំណើនភ្ញៀវទេសចរលើសលប់ និងច្រើនជាងគេគឺដោយសារការលើកលែងទិដ្ឋាការសម្រាប់ពលរដ្ឋនៃប្រទេសចំនួន ៩៣ ដែលអនុញ្ញាតឱ្យស្នាក់នៅរហូតដល់ ៦០ ថ្ងៃ និងការលុបបំបាត់ TM ក៏ដូចជាទម្រង់បែបបទអន្តោប្រវេសន៍ងាយស្រួលផងដែរ៕

ប្រទេសចិន ៖ កាលពីថ្ងៃទី៦ ខែមករា ឆ្នាំ២០២៥ សារព័ត៌មានស៊ិនហួររាយការណ៍ថា ស្នាក់ការគ្រប់គ្រងវិទ្យុ និងទូរទស្សន៍ជាតិចិនបានចាប់ផ្តើមអនុវត្តគម្រោងមួយឈ្មោះ «Micro Drama Plus» គឺការផ្សព្វផ្សាយភាពយន្តខ្លីក្នុងអ៊ីនធើរណេតដើម្បីជំរុញសេដ្ឋកិច្ច និងផ្សព្វផ្សាយវប្បធម៌ចិន ។

បច្ចុប្បន្ន ភាពយន្តខ្លីរបស់ចិនក្នុងអ៊ីនធើរណេតបានបង្ហាញពីរឿងរ៉ាវក្នុងសង្គមខុសៗគ្នា ខណៈការចំណាយដើមទុនផលិតមិនច្រើនទេ ហើយភាពយន្តខ្លីបានក្លាយជាទម្រង់សិល្បៈដ៏សំខាន់មួយដែលបង្ហាញពីវប្បធម៌ចិន ។ ការចាប់ផ្តើមអនុវត្តគម្រោង Micro Drama Plus គឺក្នុងគោលបំណងប្រើប្រាស់ភាពយន្តខ្លីដើម្បីពង្រឹងវិស័យផ្សេងៗ, ជំរុញការច្នៃប្រឌិត និងលើកកម្ពស់វប្បធម៌ ។ នៅឆ្នាំ២០២៥ ចិននឹងផលិតភាពយន្តខ្លីបង្ហោះក្នុងអ៊ីនធើរណេត ប្រមាណ ៣០០រឿង ។

ភាពយន្តខ្លីចំនួន១០០រឿង ត្រូវបានផលិតឡើងដើម្បីលើកកម្ពស់តំបន់ទេសចរណ៍ ជាពិសេស ទេសចរណ៍នៅតំបន់ជនបទ ។ អ្នកទស្សនានឹងបានឃើញពីតំបន់ទេសចរណ៍ពាក់ព័ន្ធនឹងវប្បធម៌សំខាន់ៗ, ទេសភាពដ៏ស្រស់ត្រកាលបែបធម្មជាតិ និងទេសចរណ៍ក្នុងទីក្រុង ។

ជាទូទៅ ភាពយន្តខ្លីទាំងនេះមានរយៈពេលជាង១០នាទី ហើយពលរដ្ឋចិនអាចទស្សនាក្នុងឧបករណ៍អេឡិចត្រូនិកផ្សេងៗ និងក្លាយជាភាពយន្តពេញនិយមយ៉ាងខ្លាំង ។ ក្រៅពីនេះ ពលរដ្ឋនៅប្រទេសផ្សេងៗ ក៏ចូលចិត្តទស្សនាភាពយន្តខ្លីរបស់ចិនដែរ ដោយសារចំនួនដោនឡូតបានកើនឡើងខ្លាំងនៅក្រៅប្រទេស ។

នាយកក្រុមហ៊ុន Xiying Group និយាយថា បច្ចុប្បន្ន មនុស្សភាគច្រើនគ្មានពេលវេលាទស្សនាភាពយន្តមានរយៈពេលវែងទេ ហើយដោយសារជីវិតដ៏ប្រញាប់ប្រញាប់ ទើបពួកគេមានពេលតិចណាស់ដើម្បីទស្សនាភាពយន្តភាគ ។ ហេតុនេះ ភាពយន្តខ្លីមានឱកាសរកចំណូលបានច្រើនជាងភាពយន្តភាគ ។

គួរបញ្ជាក់ថា កាលពីថ្ងៃទី១ ខែមិថុនា ឆ្នាំ២០២៤ ប្រទេសចិនបានលុបចោលភាពយន្តខ្លីមួយចំនួនដែលបង្ហាញពីសាច់រឿងមិនល្អ ហើយកំណត់ឱ្យភាពយន្តខ្លីទាំងអស់ត្រូវតែទទួលការអនុញ្ញាតមុនពេលផ្សព្វផ្សាយ ៕