ម៉ូតូអគ្គិសនី Skyrider X1 ដែលផលិតដោយក្រុមហ៊ុនអាមេរិក Rictor គឺជាម៉ូតូបើកលើអាកាសដំបូងបង្អស់របស់ពិភពលោក ត្រូវបានគេរំពឹងថានឹងចេញលក់នៅឆ្នាំ ២០២៦។

បច្ចុប្បន្នម៉ូតូនេះបានដាក់បង្ហាញនៅក្នុងពិព័រណ៍គ្រឿងអេឡិចត្រូនិក CES 2025 ដែលប្រព្រឹត្តទៅនៅទីក្រុង Las Vegas ពីថ្ងៃទី ៧ ដល់ទី ១០ ខែមករា។ ម៉ូតូអគ្គិសនី Skyrider X1 ត្រូវបានបំពាក់ដោយម៉ាស៊ីនចំនួន ៨ អាចហោះហើរបានប្រហែល ៤០ នាទី ជាមួយល្បឿនហោះហើរអតិបរមា ១០០ គីឡូម៉ែត្រក្នុងមួយម៉ោង។

Skyrider X1 មានពីរម៉ូដែលគឺ X1 SL ដែលមានថាមពលថ្ម ១០.៥ kWh អាចហោះហើរបាន ២៥ នាទី ខណៈម៉ូដែល X1 SX ដែលមានថាមពលថ្មធំជាង ២១ kWh អាចហោះហើរបាន ៤០ នាទី។ វាក៏មានជម្រើសបញ្ជាដោយដៃសម្រាប់អ្នកបើកបរដែលចង់ប្រតិបត្តិការដោយផ្ទាល់ រួមទាំងមុខងារបើកបរអូតូផងដែរ។ យោងតាមក្រុមហ៊ុន ម៉ូតូអគ្គិសនីមួយនេះ អាចសម្របខ្លួនទៅនឹងអាកាសធាតុ និងបរិស្ថានក្នុងពេលវេលាជាក់ស្តែង ដោយកែតម្រូវកម្ពស់ ល្បឿន និងទិសដៅដោយស្វ័យប្រវត្តិ ដើម្បីធានាបាននូវការធ្វើដំណើរប្រកបដោយប្រសិទ្ធភាព និងសុវត្ថិភាព។

ទោះបីជាម៉ាស៊ីនមួយបរាជ័យក៏ដោយ Skyrider X1 ក៏អាចចុះចតដោយសុវត្ថិភាព ហើយត្រូវបានបំពាក់ដោយឆ័ត្រយោងសង្គ្រោះបន្ទាន់សម្រាប់ស្ថានភាពមិនល្អណាមួយទៀតផង។ ជាមួយកាប៊ីនបិទជិត និងប្រព័ន្ធគ្រប់គ្រងបីជាន់ ម៉ូតូអគ្គិសនីនេះត្រូបានគេនិយាយថា នឹងចេញលក់ជាផ្លូវការនៅឆ្នាំក្រោយក្នុងតម្លៃ ៦ ម៉ឺនដុល្លារអាមេរិក។ ក្រុមហ៊ុន Rictor ដែលជាក្រុមហ៊ុនផលិតយានយន្តអគ្គិសនីជឿជាក់ថា ការលក់ម៉ូតូហោះហើរលើអាកាសនេះទំនងនឹងទទួលបានភាពជោគជ័យខ្លាំងនៅពេលដែលចេញលក់ជាផ្លូវការ។

ទោះជាយ៉ាងណាក៏ដោយ គោលដៅរបស់ Rictor ហាក់បីដូចជាមិនសូវមានប្រជាប្រិយភាពសោះ ដោយសារកាលពីឆ្នាំមុនមានក្រុមហ៊ុនតាក់ស៊ីហោះមួយគឺ Volocopter បានបរាជ័យក្នុងការទទួលបានវិញ្ញាបនប័ត្រដឹកជញ្ជូនអ្នកដំណើរលើអាកាស ហើយទីបំផុតបានដាក់ពាក្យក្ស័យធន។ ដូច្នេះយានជំនិះដែលបើកបរដោយខ្លួនឯងរបស់ក្រុមហ៊ុននេះ ទំនងជាមិនបង្ហាញនៅលើមេឃក្នុងទីក្រុងនាពេលខាងមុខនេះទេ៕

ប្រទេសវៀតណាម ៖ កាលពីថ្ងៃទី៨ ខែមករា ឆ្នាំ២០២៥ សារព័ត៌មាន Bloomberg រាយការណ៍ថា ប្រទេសវៀតណាមបានកំណត់គោលដៅទទួលភ្ញៀវទេសចរបរទេសរហូតដល់២៣លាននាក់ នៅឆ្នាំ២០២៥ កើនឡើង៣១% ហើយវៀតណាមសង្ឃឹមថា វិស័យទេសចរណ៍នឹងជួយជំរុញការរីកចម្រើនសេដ្ឋកិច្ចជាតិ ។

ការកំណត់គោលដៅទទួលភ្ញៀវទេសចរបរទេសរហូតដល់២៣លាននាក់ គឺជាចំនួនខ្ពស់ជាងមុនពេលជំងឺកូវីដ-១៩ ឆ្លងរាតត្បាតនៅប្រទេសវៀតណាម ហើយវៀតណាមនឹងទទួលបានភ្ញៀវទេសចរច្រើនតាមគោលដៅនៅឆ្នាំ២០២៥ ។ វាកើនឡើងលើស៥លាននាក់ បើធៀបនឹងចំនួនភ្ញៀវទេសចរបរទេសមកលេងវៀតណាមកាលពីឆ្នាំ២០១៩ ដែលស្មើត្រឹមតែ១៨លាននាក់ ។ នេះបើតាមការអះអាងរបស់ BMI Research ។

តាមរបាយការណ៍បញ្ជាក់ថា កាលពីឆ្នាំ២០២៤ វៀតណាមទទួលបានភ្ញៀវទេសចរបរទេស ចំនួន១៧លាន ៥សែននាក់ កើនឡើង៣៩.៥% បើធៀបនឹងឆ្នាំ២០២៣ ក្នុងនោះភ្ញៀវទេសចរមកពីតំបន់អាស៊ី គឺស្មើប្រមាណ៨០% នៃចំនួនភ្ញៀវទេសចរបរទេសសរុប ។

ដោយឡែក វៀតណាមទទួលបានភ្ញៀវទេសចរឥណ្ឌា ចំនួន៥០១,០០០នាក់ នៅឆ្នាំ២០២៤ ។ រយៈពេល២ឆ្នាំកន្លងមក ភ្ញៀវទេសចរឥណ្ឌាបានធ្វើដំណើរមកវៀតណាម កើនឡើងរហូតដល់ជាង២ដង ហើយធ្វើឱ្យវៀតណាមក្លាយជាប្រទេសគោលដៅគួរឱ្យចាប់អារម្មណ៍សម្រាប់ភ្ញៀវទេសចរឥណ្ឌា ។

កាលពីខែមិថុនា ឆ្នាំ២០២៤ រដ្ឋាភិបាលវៀតណាមបានកំណត់គោលដៅឱ្យវិស័យទេសចរណ៍ក្លាយជាឧស្សាហកម្មសំខាន់ ដើម្បីជំរុញការរីកចម្រើនសេដ្ឋកិច្ច ។ មុនពេលជំងឺកូវីដឆ្លងរាតត្បាត ប្រាក់ចំណូលពីវិស័យទេសចរណ៍វៀតណាម គឺស្មើនឹង១២% នៃផលិតផលក្នុងស្រុកសរុប (GDP) ។ ប៉ុន្តែរបាយការណ៍របស់ក្រុមហ៊ុន VinaCapital Group Ltd. នៅខែឆ្នាំដដែលបញ្ជាក់ថា ប្រាក់ចំណូលវិស័យទេសចរណ៍ ស្មើត្រឹមតែ៨% នៃ GDP ។

បើទោះជាវិស័យទេសចរណ៍បានជំរុញកំណើន GDP, ជួយឱ្យពលរដ្ឋមានការងារធ្វើ និងលើកកម្ពស់គុណភាពជីវិតពលរដ្ឋក្តី ប៉ុន្តែវៀតណាមត្រូវតែកែលម្អចំណុចខ្វះខាតមួយចំនួន ។ លើសពីនេះ វៀតណាមចាំបាច់ត្រូវមើលពីសមត្ថភាពប្រកួតប្រជែង និងគោលនយោបាយទេសចរណ៍របស់ប្រទេសជិតខាង ដើម្បីដោះស្រាយបញ្ហាប្រឈមរបស់អាជីវកម្មពាក់ព័ន្ធនឹងទេសចរណ៍ ។ នេះបើតាមការលើកឡើងរបស់អ្នកជំនាញ ៕

ប្រទេសដាណឺម៉ាក៖ ស្តេចដាណឺម៉ាកបានធ្វើឱ្យពិភពលោកភ្ញាក់ផ្អើលនូវការផ្លាស់ប្តូរនិមិត្តសញ្ញាជាតិរបស់ខ្លួនជាលើកដំបូងក្នុងរយៈពេលជាង ៥០០ ឆ្នាំ ចំពេលមានភាពចម្រូងចម្រាសជាមួយលោក Trump ជុំវិញកោះ Greenland។

និមិត្តសញ្ញាជាតិដាណឺម៉ាក គឺជានិមិត្តសញ្ញានៃសហភាព Kalmar រវាងប្រទេសដាណឺម៉ាក ន័រវេស និងស៊ុយអែត ហើយក៏ជានិមិត្តសញ្ញាដ៏សំខាន់មួយរបស់ប្រទេសស៊ុយអែតដែលនៅជិតខាងនោះផងដែរ។

អស់រយៈពេលជាង ៥០០ ឆ្នាំមកហើយនិមិត្តសញ្ញានេះគឺមិនដែលផ្លាស់ប្តូរឡើយ ប៉ុន្តែដោយសារមានភាពចម្រូងចម្រាសជាមួយប្រធានាធីបតីជាប់ឆ្នោតរបស់អាមេរិក Donald Trump ប្រទេសដាណឺម៉ាកក៏សម្រេចចិត្តផ្លាស់ប្តូរនិមិត្តសញ្ញារបស់ខ្លួនពីរូបភាពមកុដបី ទៅជារូបភាពខ្លាឃ្មុំប៉ូល និងពពែ ដែលជានិមិត្តរូបនៃកោះហ្គ្រីនឡែន និងកោះហ្វារ៉ូ។ ហ្គ្រីនឡែនគឺជាផ្នែកមួយនៃទឹកដីរបស់ដាណឺម៉ាក ខណៈហ្គ្រីនឡែនក៏ជាកោះមួយដែល Trump ចង់បានផងដែរ។ កាលពីខែមុនលោក Trump បានចេញសេចក្តីថ្លែងការណ៍មួយថា លោកចង់ឱ្យសហរដ្ឋអាមេរិកទិញ Greenland។

Trump បានសរសេរនៅក្នុងសារបង្ហោះប្រព័ន្ធផ្សព្វផ្សាយសង្គមថា “Greenland គឺជាកន្លែងដ៏អស្ចារ្យ ហើយមនុស្សគ្រប់គ្នានឹងទទួលបានអត្ថប្រយោជន៍យ៉ាងច្រើន ប្រសិនបើវាក្លាយជាផ្នែកមួយនៃជាតិរបស់យើង”។ មិនយូរប៉ុន្មានស្តេច Frederik របស់ដាណឺម៉ាកក៏បានធ្វើការកែប្រែយ៉ាងសំខាន់ចំពោះនិមិត្តសញ្ញាជាតិរបស់ខ្លួន ដោយបានផ្លាស់ប្តូរពីរូបភាពមកុដបី ទៅជារូបភាពខ្លាឃ្មុំប៉ូល និងពពែ ដែលការផ្លាស់ប្តូរនេះគឺជាវិធីសាស្ត្រការពារកោះ Greenland និងកោះដទៃទៀតពីប្រធានាធីបតីជាប់ឆ្នោត Donald Trump។

ព្រះអង្គក៏បានសម្តែងនូវទស្សនៈច្បាស់លាស់លើការរក្សាបាននូវទឹកដីស្វយ័តស្វ័យភាពនេះនៅក្នុងព្រះរាជាណាចក្រដាណឺម៉ាក ដោយគ្មានប្រទេសណាអាចកាន់កាប់ ឬទិញកោះទាំងនេះពីដាណឺម៉ាកបានឡើយ។ អ្នកជំនាញជនជាតិដាណឺម៉ាក Royal Royal Lars Hovbakke Sørensen ជឿជាក់ថាការផ្លាស់ប្តូរទាំងនេះឆ្លុះបញ្ចាំងពីចំណាប់អារម្មណ៍ផ្ទាល់ខ្លួនរបស់ស្តេចចំពោះតំបន់ Arctic និងបញ្ជាក់ថា កោះហ្គ្រីនឡែន និងកោះហ្វារ៉ូគឺជាផ្នែកមួយដ៏សំខាន់នៃទឹកដីរបស់ដាណឺម៉ាក៕

ប្រទេសថៃ ៖ កាលពីខែតុលា ឆ្នាំ២០២៤ កន្លងមក សមត្ថកិច្ចថៃបានចា.ប់ ខ្លួននាយកក្រុមហ៊ុន The iCon Group, តារាល្បីៗលំដាប់ប្រទេស ចំនួន៣រូប រួមទាំងជនពាក់ព័ន្ធផ្សេងទៀតដាក់ពន្ធ.នាគារ ក្រោយទទួលបានពាក្យបណ្តឹងជាច្រើនពីជនរងគ្រោះនៅថៃ និងក្រៅប្រទេសថា ពួកគេចាញ់បោកក្រុមហ៊ុននេះអស់ប្រាក់យ៉ាងច្រើន ដែលរកស៊ីបោកប្រាស់យកតារាល្បីៗមកផ្សព្វផ្សាយលក់ផលិតផល ។

តារាសម្តែងថៃ៣រូប ដែលសមត្ថកិច្ចចាប់ខ្លួនដាក់ពន្ធនាគារ នៅខែតុលា ឆ្នាំ២០២៤ រួមមាន ៖ អ្នកនាង ភីឆាយ៉ា វឌ្ឍនាមុនទ្រី (ហៅមីន), លោក យូរ៉ាណាន់ ផាម៉ុនមុនទ្រី (ហៅសែម ឬលោក ប៉ាតាវី) និងលោក បូសាកាន់ កាន់ថាថាវ៉ន (ហៅកាន់) ។ តុលាការចោទប្រកាន់ថា ពួកគេបានសហការ និងទទួលប្រាក់ចំណូលពីក្រុមហ៊ុន The iCon Group ហើយថា ពួកគេមានទោសកំហុសធ្ងន់ធ្ងរ ពុំអាចដោះលែងឱ្យនៅក្រៅឃុំបានទេ ពីព្រោះអាចរត់គេចខ្លួនទៅក្លែងបន្លំភស្តុតាង ។

នៅថ្ងៃទី៨ ខែមករា ឆ្នាំ២០២៥ សារព័ត៌មាន Thairath រាយការណ៍ថា តុលាការបានចោទប្រកាន់ថ្នាក់ដឹកនាំធំៗរបស់ក្រុមហ៊ុន The iCon Group ទាំងអស់ លើកលែងតែតារាសម្តែង២រូប គឺអ្នកនាង ភីឆាយ៉ា វឌ្ឍនាមុនទ្រី និងលោក យូរ៉ាណាន់ ផាម៉ុនមុនទ្រី ដោយសារគ្មានភស្តុតាងគ្រប់គ្រាន់ ហើយតុលាការសម្រេចដោះលែងពួកគេឱ្យមានសេរីភាព ។

ក្រោយពីត្រូវបានដោះលែងចេញពីពន្ធនាគារស្ត្រីនៅទីក្រុងបាងកក អ្នកនាង ភីឆាយ៉ា បានឡើងជិះរថយន្តជាមួយក្រុមគ្រួសារ និងនិយាយមកកាន់ប្រព័ន្ធផ្សព្វផ្សាយថា នាងសូមអរគុណតុលាការសម្រាប់ការផ្តល់ភាពយុត្តិធម៌នេះ ហើយខាងពន្ធនាគារបានថែទាំនាងយ៉ាងល្អ ។ នាងក៏សូមអរគុណដល់អ្នកគាំទ្រផងដែរ ដែលបានផ្តល់កម្លាំងចិត្តទាមទារយុត្តិធម៌ឱ្យនាង ហើយនាងនឹងទៅថែទាំសុខភាពជាមួយគ្រួសារ ដោយសារស្រកទម្ងន់ច្រើន ។

នាងបានបញ្ជាក់តាំងពីដើមទីហើយថា នាងរីករាយចូលរួមក្នុងការស្វែងរកយុត្តិធម៌របស់តុលាការ និងព្រមបង្ហាញថា នាងជាមនុស្សបរិសុទ្ធ ពុំបានប្រព្រឹត្តខុស ។ ថ្ងៃនេះ (ថ្ងៃទី៨ ខែមករា) តុលាការបានពិសោធន៍រួចហើយ បើមានឱកាស នាងនឹងបកស្រាយរឿងនេះម្តងទៀត ។

សារព័ត៌មានថៃរាយការណ៍ថា នៅបរិវេណខាងមុខពន្ធនាគារពិសេសទីក្រុងបាងកក កូនប្រុស និងកូនស្រីរបស់តារាសម្តែង លោក យូរ៉ាណាន់ បានមករង់ចាំទទួលឪពុកចេញពីពន្ធនាគារ និងអរគុណអ្នកគាំទ្រទាំងអស់ ។ លោក យូរ៉ាណាន់ បានចាកចេញពីធនាគារ ដោយពាក់មួក និងម៉ាស់ ព្រមទាំងកាន់ព្រះពុទ្ធរូប ៕

ស្មាតហ្វូនដំបូងបង្អស់របស់ Samsung ដែលមានអេក្រង់បត់បានបីតង់ ត្រូវបានគេរំពឹងថានឹងបង្ហាញខ្លួននៅក្នុងទីផ្សារអាស៊ីមួយចំនួននៅក្នុងឆមាសទីពីរនៃឆ្នាំ ២០២៥។

យោងតាម PhoneArena ដែលជាគេហទំព័របច្ចេកវិទ្យាល្បីល្បាញមួយបានឱ្យដឹងថា ក្រុមហ៊ុន Samsung កំពុងត្រៀមខ្លួនក្នុងការដាក់បង្ហាញស្មាតហ្វូនបត់បានបីតង់ដំបូងបង្អស់របស់ខ្លួននៅក្នុងទីផ្សារអាស៊ីនៅពាក់កណ្តាលឆ្នាំនេះ។ ទោះជាយ៉ាងណាស្មាតហ្វូន tri-fold របស់ Samsung ទំនងមានតម្លៃខ្ពស់ខ្លាំងណាស់។

វាត្រូវបានគេនិយាយថា ស្មាតហ្វូនមួយនេះទំនងមិនសូវមានប្រជាប្រិយភាពនោះទេនៅពេលដាក់បង្ហាញជាផ្លូវការដោយសារតម្លៃខ្ពស់ពេក។ សូម្បីទូរស័ព្ទ Mate XT tri-fold របស់ Huawei ដែលចេញលក់ប៉ុន្មានខែមុនក៏មានតម្លៃខ្ពស់ខ្លាំងដែរ ជាមួយតម្លៃរហូតដល់ ២,៨០០ ដុល្លារអាមេរិក ថ្លៃជាង iPhone 16 Pro បីដង។ ដូច្នេះស្មាតហ្វូនបត់បានបីតង់ដំបូងបង្អស់របស់ Samsung ត្រូវបានគេនិយាយថា នឹងមានតម្លៃថ្លៃជាង ស្មាតហ្វូនបត់បានបីតង់របស់ Huawei ទៅទៀត។

នេះបើយោងតាមប្រព័ន្ធផ្សព្វផ្សាយកូរ៉េ ហេតុផលដែលធ្វើឱ្យទូរស័ព្ទប្រភេទ tri-fold មានតម្លៃខ្ពស់ និងពិបាកក្នុងការទទួលបានប្រជាប្រិយភាព គឺដោយសារដំណើរការផលិតដ៏ស្មុគស្មាញ ដូច្នេះ Samsung គ្រោងនឹងបញ្ចេញឧបករណ៍នេះតិចជាង ៣០០,០០០ គ្រឿងប៉ុណ្ណោះនៅក្នុងទីផ្សារមួយ ឬពីរនៅអាស៊ីក្នុងឆ្នាំ ២០២៥។ ជាមួយលក្ខណៈពិសេសនៃឧបករណ៍របស់ក្រុមហ៊ុន Samsung ត្រូវបានគេរំពឹងថានឹងមានអេក្រង់ធំទូលាយទំហំ ១២.៤ អ៊ីង នៅពេលបើកពេញ ដែលមានបំណងជំនួសទូរស័ព្ទ និងថេប្លេតប្រពៃណី ខណៈទំហំនេះក៏លើសពី ១០.២ អ៊ីញរបស់ Huawei Mate XT ផងដែរ។

លើសពីនេះឧបករណ៍នេះនឹងមានការរចនាប្រភេទ G-Type ដើម្បីផ្តោតលើភាពធន់ និងគុណភាពខ្ពស់ ខុសពីការរចនា S-Type របស់ Huawei Mate XT ។ អេក្រង់ G-Type មានការរចនាជាមួយនឹងអេក្រង់ខាងក្រៅពីរដែលអាចបត់ចូលខាងក្នុងបាន មិនសូវស្មុគស្មាញ និងជួយការពារអេក្រង់មេ នៅពេលដែលមិនប្រើ ។ ព័ត៌មានលម្អិតគួរឱ្យចាប់អារម្មណ៍មួយទៀតគឺថាឧបករណ៍នេះប្រហែលជាមិនប្រើកាមេរ៉ាលាក់នៅក្រោមអេក្រង់ទេ មានន័យថា ក្រុមហ៊ុននឹងខួងរន្ធតូចមួយនៅលើអេក្រង់ ដោយកាត់បន្ថយភាពទំនើបនៃផលិតផល។

ទោះបីជាយ៉ាងនេះក្តីការបង្ហាញផលិតផលអេក្រង់បត់បានបីតង់របស់ Samsung នាពេលខាងមុខនេះនឹងក្លាយជាផ្នែកមួយនៃផែនការរបស់ក្រុមហ៊ុនក្នុងការពង្រីក និងពង្រឹងត្រកូលទូរស័ព្ទដែលអាចបត់បានរបស់ខ្លួនឱ្យរឹងមាំជាងមុន៕