ពិធីករ ផលិតករ តាប៊ុយ បានទម្លាយពីអ្នកសិល្បៈធ្លាប់តែជាមនុស្សស្និទ្ធស្នាល ប៉ុន្តែនៅពេលលោកអស់ប្រយោជន៍បែរជាគេធ្វើសឹងតែមិនឃើញលោកជាពិសេសគឺទឹកមុខតែម្តង។ មិនត្រឹមតែ តាប៊ុយ អតីតប្រធានសមាគមសិល្បករវិញក៏បង្ហាញអារម្មណ៍ហួសចិត្តចំពោះអ្នកសិល្បៈមួយចំនួនដូចគ្នា។.png)
នៅយប់ថ្ងៃទី២៧ កុម្ភៈ តាប៊ុយ បានបង្ហោះសំណេរនៅលើបណ្តាញសង្គមថា «ម្សិលមិញបានចូលរួមកម្មវិធីសម្ពោធអគារថ្មីរបស់សមាគមសិល្បករខ្មែរ ហើយមានតារាច្រើនមែនទែនបានចូលរួម ហើយក៏បានជួបតារាដែលធ្លាប់តែស្និទ្ធិស្នាល តែគេធ្វើសឹងតែមិនឃើញយើងពិសេសទឹកមុខ»។ ផលិតកររូបនេះលើកឡើងទៀតថា «ក្នុងចិត្តដូចគេធ្លាប់ប្រាប់មែន ពេលយើងមានប្រយោជន៍ឱ្យគេ គឺគេមកអែបអបហើយ ពេលយើងគ្មានប្រយោជន៍គឺគេលេងទឹកមុខដាក់ហើយ សំខាន់មនុស្សដែលល្អដាក់គ្នាសោះមិនដែលមានរឿងទេ តែមកជួបចឹង»។
មិនខុសពី តាប៊ុយ ប៉ុន្មានតារាសម្តែង ចន ច័ន្ទលក្ខណា អតីតប្រធានសមាគមសិល្បករខ្មែរក៏បានចែករលែកដូចគ្នាពីអ្នកសិល្បៈហើយខ្លួនគឺជួបប្រទះរឿងបែបនេះឡើងឆ្អែតហើយ។ ជំទាវ ចន ច័ន្ទលក្ខិណា បានចែករំលែកសាររបស់ តាប៊ុយ ដោយភ្ជាប់មកជាមួយសម្តីដែរថា «ជួបឆ្អែតហើយ ហើយក៏ជាមូលហេតុដែលខ្ញុំកាត់បន្ថយការចូលរួមកម្មវិធីសិល្បៈមួយចំនួនធំ លែងយកចិត្តយកបេះដូងទៅប្រើទៀតហើយ ខ្ញុំដើរផ្លូវផ្សេងដោយស្ងៀមស្ងាត់ លែងដឹងឮអ្វីទាំងអស់ អ្នកណាមកទូលពិតរាយការណ៍អ្វីក៏ខ្ញុំមិនយកខ្លួនទៅពាក់ព័ន្ធដែរ អ្នកណាមានការអី ឬ មានបញ្ហាអី រកវិធីដោះស្រាយដោយខ្លួនឯងទៅ ដល់ពេលដែលខ្ញុំធ្វើមនុស្សអាត្មានិយមម្តង ប្រឹងរកស៊ីឱ្យខ្លួនឯងកាន់តែរីកចម្រើន ជួយមនុស្សឱ្យចំគោលដៅ»។
មិនត្រឹមតែអ្នកទាំងពីរនោះទេបានសម្តែងចេញពីអារម្មណ៍ដែលអ្នកនៅក្នុងចង្កោមសិល្បៈមិនទទួលបានការរាប់អានដូចមុន អ្នកសិល្បៈមួយចំនួនទៀតក៏បានចែករំលែកសំណេររបស់ តាប៊ុយ ព្រោះតែជួបប្រទះរឿងបែបនេះដូចគ្នា៕
