សហរដ្ឋអាមេរិក ៖ វីដេអូមួយធ្វើឱ្យអ្នកលេងបណ្តាញសង្គមបរទេសជជែកគ្នាយ៉ាងច្រើន គឺនារីអាកាសចរណ៍ម្នាក់របស់ក្រុមហ៊ុន Alaska Airlines នៅសហរដ្ឋអាមេរិក ត្រូវបានបណ្តេញចេញពីការងារ ក្រោយពីនាងបង្ហោះវីដេអូរាំបញ្ចេញក្បាច់ដាស់អារម្មណ៍ក្នុងបណ្តាញសង្គម ដើម្បីអបអរថ្ងៃចុងក្រោយនៃការសាកល្បងការងារ និងក្លាយជាបុគ្គលិកពេញសិទ្ធ ។

នារីអាកាសចរណ៍រូបនេះឈ្មោះ ណេល ឌៀឡា បានបង្ហោះវីដេអូក្នុង TikTok និង Instagram របស់ខ្លួន ក្រោយពីនាងដល់ពេលបញ្ចប់ការសាកល្បងការងារ ហើយទើបតែចុះហត្ថលេខាបំពេញការងារជាមួយក្រុមហ៊ុនអាកាសចរណ៍ ។ ប៉ុន្តែនាងពុំបានពិចារណាថា វីដេអូនេះធ្វើឱ្យមហាជនរិះគន់ពេញបណ្តាញសង្គមពីការរាំមិនសមរម្យលើយន្តហោះ និងត្រូវក្រុមហ៊ុនបណ្តេញចេញ ដែលធ្វើឱ្យនាងបាត់បង់អ្វីគ្រប់យ៉ាងត្រឹមមួយប៉ព្រិចភ្នែក ។

ក្រោយពីវីដេអូរបស់នាងត្រូវបានចែកចាយក្នុងបណ្តាញសង្គម ក៏ផ្ទុះការរិះគន់យ៉ាងច្រើនថា ការរាំរបស់នាងពុំស័ក្តិសមជានារីអាកាសចរណ៍ទេ ខណៈអ្នកខ្លះថា នាងពុំគោរពឯកសណ្ឋានអាកាសចរណ៍ ។ ប៉ុន្តែអ្នកខ្លះទៀតបានការពារនាង និងថានាងមានសិទ្ធិរាំ ។

បន្ទាប់ពីត្រូវក្រុមហ៊ុនបញ្ចេញចេញពី នារីឈ្មោះ ឌៀឡា ដែលមានគណនី TikTok ឈ្មោះ «jvnelle415» បានប្រកាសទទួលប្រាក់បរិច្ចាគពីមហាជននៅលើគេហទំព័រ GoFundMe ដើម្បីរកប្រាក់ចាយវាយក្នុងអំឡុងពេលស្វែងរកការងារថ្មី ។ នាងមានគោលដៅទទួលបានប្រាក់បរិច្ចាគរហូតដល់ ១ម៉ឺន២ពាន់ដុល្លារអាមេរិក ។

រីឯក្រុមហ៊ុនអាកាសចរណ៍ Alaska Airlines ពុំទាន់លើកឡើងលម្អិតពាក់ព័ន្ធនឹងការបញ្ឈប់បុគ្គលិកទេ គ្រាន់តែនិយាយថា រឿងរ៉ាវរបស់បុគ្គលិក គឺជាការសម្ងាត់ ។ ការរាំរបស់បុគ្គលិកធ្វើឱ្យផ្ទុះការរិះគន់ពេញបណ្តាញសង្គម គឺធ្វើឱ្យប៉ះពាល់ដល់វិជ្ជាជីវៈការងារ ៕

ប្រទេសចិន ៖ ក្រសួងពាណិជ្ជកម្មចិនបានប្រកាសកាលពីថ្ងៃទី១៤ ខែមករា ឆ្នាំ២០២៥ ថា បានបញ្ចូលឈ្មោះក្រុមហ៊ុនអាមេរិកចំនួន៧ទៀតទៅក្នុងបញ្ជីខ្មៅ ដែលកំណត់ថា គឺជាក្រុមហ៊ុនពុំគួរឱ្យទុកចិត្ត (Unreliable Entities List) ដោយសារក្រុមហ៊ុនទាំងនេះលក់អាវុ.ធ ឱ្យតៃវ៉ាន់ ។ ចិនចាត់ទុកថា ទង្វើនេះបានប៉ះពាល់ដល់អធិបតេយ្យភាព សន្តិសុខ និងផលប្រយោជន៍ផ្នែកអភិវឌ្ឍន៍របស់ប្រទេសចិន ។

ក្រុមហ៊ុនអាមេរិកដែលត្រូវបានក្រសួងពាណិជ្ជកម្មចិនបញ្ចូលឈ្មោះទៅក្នុងបញ្ជីខ្មៅ រួមមាន ៖
១-Inter-Coastal Electronics
២-System Studies & Simulation
៣-IronMountain Solutions
៤-Applied Technologies Group
៥-Axient
៦-Anduril Industries និង
៧-Maritime Tactical Systems ។

សារព័ត៌មានស៊ីនហួររាយការណ៍ថា ប្រទេសចិននឹងហាមឃាត់ក្រុមហ៊ុនទាំង៧នេះ មិនឱ្យចូលរួមធ្វើពាណិជ្ជកម្មនាំចេញ-នាំចូលទំនិញជាមួយចិន និងហាមវិនិយោគបន្ថែមនៅចិន ។ រីឯនាយកក្រុមហ៊ុនពុំអនុញ្ញាតឱ្យធ្វើដំណើរមកចិនទេ ហើយការស្នើសុំទិដ្ឋាការ ឬលិខិតអនុញ្ញាតផ្សេងៗនឹងត្រូវបដិសេធទាំងអស់ ។

មន្ត្រីនាំពាក្យរបស់ក្រសួងពាណិជ្ជកម្មចិននិយាយថា ការលក់អាវុធរបស់អាមេរិកជាញឹកញាប់ទៅឱ្យតៃវ៉ាន់ ដែលចិនចាត់ទុកថា ជាទឹកដីរបស់ខ្លួន គឺល្មើសនឹងគោលនយោបាយបង្រួបបង្រួមទឹកដីប្រទេសចិនតែមួយ (One-China Principle) ព្រមទាំងល្មើសនឹងបទប្បញ្ញត្តិនៃសេចក្តីថ្លែងការណ៍រួម ចំនួន៣ច្បាប់ រវាងចិន និងអាមេរិក ។ លើសពីនេះ វាជាការគំរាមកំហែងស្ថិរភាពនៅច្រកសមុទ្រតៃវ៉ាន់ ។

ការចុះបញ្ជីខ្មៅ គឺសំដៅលើក្រុមហ៊ុនណាដែលគំរាមកំហែងសន្តិសុខជាតិរបស់ចិន ប៉ុន្តែចិននឹងរីករាយស្វាគមន៍ក្រុមហ៊ុនបរទេសដែលស្មោះត្រង់ និងអនុវត្តតាមច្បាប់ចិនឱ្យចូលមកវិនិយោគ ។ ចិនសន្យាថា នឹងបង្កើតបរិយាកាសអាជីវកម្មឱ្យមានស្ថិរភាព ព្រមទាំងផ្តល់យុត្តិធម៌ដល់ក្រុមហ៊ុនបរទេសគោរពច្បាប់ចិន ។ នេះបើតាមការលើកឡើងរបស់មន្ត្រីនាំពាក្យក្រសួងពាណិជ្ជកម្មចិន ៕

លទ្ធផលការស្ទង់មតិរបស់ក្រុមហ៊ុនអាមេរិកឈ្មោះ Patriot Polling ដែលផ្សព្វផ្សាយកាលពីថ្ងៃទី១៣ ខែមករា ឆ្នាំ២០២៥ បង្ហាញថា ពលរដ្ឋរស់នៅកោះហ្គ្រីនឡែន ប្រទេសដាណឺម៉ាក ប្រមាណ៥៧.៣% គាំទ្រគំនិតរបស់ប្រធានាធិបតីអាមេរិកថ្មី លោក Donald Trump ដែលចង់បញ្ចូលកោះនេះជាទឹកដីរបស់អាមេរិក ។ ប៉ុន្តែនាយករដ្ឋមន្ត្រីហ្គ្រីនឡែនបញ្ជាក់ថា ពលរដ្ឋហ្គ្រីនឡែនមិនចង់ក្លាយជាជ.នជាតិដាណឺម៉ាក និងជន.ជាតិអាមេរិកទេ គឺចង់ក្លាយជាប្រទេសឯករាជ្យ ។

ការស្ទង់មតិនេះបង្ហាញទៀតថា ពលរដ្ឋរស់នៅកោះហ្គ្រីនឡែន ស្មើនឹង៣៧.៤% បានបដិសេធគំនិតរបស់លោក Trump ដែលចង់បញ្ចូលកោះហ្គ្រីនឡែនជាទឹកដីរបស់អាមេរិក ខណៈអ្នកឆ្លើយតបការស្ទង់មតិ៥.៣% ទៀត ពុំទាន់សម្រេចចិត្ត ។ តាមលទ្ធផលការស្ទង់មតិបញ្ជាក់ថា ពលរដ្ឋនៅកោះហ្គ្រីនឡែនភាគច្រើនចង់ក្លាយជាពលរដ្ឋអាមេរិក ។

លោក Trump ធ្លាប់ស្នើទិញកោះនេះពីប្រទេសដាណឺម៉ាក កាលពីលោកកាន់តំណែងជាប្រធានាធិបតីអាមេរិកអាណត្តិមុន ហើយលោកបាននិយាយពីសំណើទិញកោះនេះម្តងទៀត នាដើមខែមករា ឆ្នាំ២០២៥ ។ ក្នុងសន្និសីទសារព័ត៌មាន កាលពីថ្ងៃទី៧ ខែមករា កន្លងមក លោកពុំបានច្រានចោលគម្រោងប្រើកម្លាំងទ័ពដើម្បីយកកោះដ៏ធំបំផុតលើពិភពលោកនេះទេ ហើយលោកចង់ឱ្យកោះនេះស្ថិតក្រោមការគ្រប់គ្រងរបស់ក្រុងវ៉ាស៊ីនតោន ។ លោកនិយាយថា លោកអាចធ្វើអ្វីម្យ៉ាងដើម្បីយកកោះនេះដើម្បីរក្សាសន្តិសុខ ។

ចំណែកនាយករដ្ឋមន្ត្រីហ្គ្រីនឡែន លោក Mute B. Egede បានថ្លែងកាលពីថ្ងៃទី១០ ខែមករា ថា កោះនេះសម្រាប់ឱ្យពលរដ្ឋហ្គ្រីនឡែនរស់នៅ ហើយយើងមិនចង់ក្លាយជាជនជាតិដាណឺម៉ាក និងជនជាតិអាមេរិកទេ ។ បំណងប្រាថ្នារបស់យើង គឺចង់ក្លាយជាប្រទេសឯករាជ្យ និងរំពឹងថា នឹងមានដំណោះស្រាយនាពេលឆាប់ៗ ។ យើងនឹងសហការជាមួយអាមេរិកក្នុងការជីកយករ៉ែ ប៉ុន្តែពុំនៅក្រោមការគ្រប់គ្រងរបស់អាមេរិកទេ ។

គួរបញ្ជាក់ថា ហ្គ្រីនឡែន (Greenland) គឺជាកោះដ៏ធំរបស់ប្រទេសដាណឺម៉ាក និងជាកោះធំជាងគេបំផុតលើពិភពលោក ។ កោះនេះស្ថិតនៅចន្លោះមហាសមុទ្រអាកទិក និងមហាសមុទ្រអាត្លង់ទិក នៅភាគខាងកើតនៃប្រជុំកោះអាកទិករបស់ប្រទេសកាណាដា ។ បច្ចុប្បន្ន នាយករដ្ឋមន្ត្រីហ្គ្រីនឡែន កំពុងរកវិធីផ្តាច់កោះនេះចេញពីប្រទេសដាណឺម៉ាក និងក្លាយជាប្រទេសឯករាជ្យ ខណៈកោះនេះសម្បូរដោយធនធានរ៉ែ និងប្រេងឥន្ធនៈ ៕

ផ្លូវរថភ្លើង ឬផ្លូវដែកបានដើរតួយ៉ាងសំខាន់ក្នុងវិស័យគមនាគមន៍ សម្រាប់ប្រទេសនានានៅលើពិភពលោក ជាពិសេសនៅតាមបណ្ដាប្រទេសដែលមានផ្ទៃដីធំៗ សេដ្ឋកិច្ចខ្លាំង និងមានប្រជាជនច្រើន។ ដូច្នេះហើយតើអ្នកដឹងទេថា ប្រទេសណាខ្លះដែលមានបណ្ដាញផ្លូវដែក ឬផ្លូវរថភ្លើង វែងជាងគេបំផុតនៅលើពិភពលោក?

១.សហរដ្ឋអាមេរិក៖ ប្រទេសមហាអំណាចនេះមានផ្ទៃដីធំធេងណាស់ និងមានប្រជាជនច្រើនជាងគេទី៣ បន្ទាប់ពីប្រទេសចិន និងឥណ្ឌា បានធ្វើឱ្យសហរដ្ឋអាមេរិកត្រូវការសាងសង់បណ្ដាញផ្លូវរថភ្លើងវែងៗជាច្រើនខ្សែ ដែលមានប្រវែងសរុប ២៥០,០០០ គីឡូម៉ែត្រ ក្លាយជាបណ្តាញផ្លូវដែកដ៏វែងបំផុតនៅក្នុងពិភពលោក។

២.ប្រទេសចិន៖ ចិនគឺជាប្រទេសយក្សអាស៊ីដែលមានប្រជាជនច្រើនជាងគេបំផុតនៅលើលោក។ ប្រទេសនេះមានបណ្តាញផ្លូវដែកប្រវែងជាង ១០០,០០០ គីឡូម៉ែត្រ ដោយបណ្តាញដ៏ធំទូលាយនេះដំណើរការដោយសាជីវកម្មផ្លូវដែកចិនគ្រប់គ្រងដោយរដ្ឋបានដឹកអ្នកដំណើរ ២.០៨ ពាន់លាននាក់។

៣.ប្រទេសរុស្ស៊ី៖ រុស្ស៉ីជាប្រទេសដែលមានផ្ទៃដីធំជាងគេបំផុត ទោះបីជាចំនួនប្រជាជនមិនច្រើនដូចប្រទេសផ្សេងទៀតក៏ដោយ ប៉ុន្តែប្រទេសយក្សមួយនេះក៏មានផ្លូវរថភ្លើងវែងជាងគេបំផុតក្នុងលោកផងដែរ ដោយមានប្រវែងរហូតដល់ ៨៥.៥០០ គីឡូម៉ែត្រ សម្រាប់ធ្វើដំណើរ និងដឹកជញ្ជូនទំនិញ។

៤.ប្រទេសឥណ្ឌា៖ ឥណ្ឌាជាប្រទេសដែលមានបណ្តាញផ្លូវដែកវែងជាងគេទី ៤ នៅលើពីភពលោក ជាមួយប្រវែងជាង ៦៥,០០០ គីឡូម៉ែត្រ។ បណ្តាញនេះបានដឹកអ្នកដំណើរប្រហែល ៨ ពាន់លាននាក់ ដែលជាចំនួនខ្ពស់បំផុតនៅលើពិភពលោក និង ១.០១ លានតោននៃទំនិញ។

៥.ប្រទេសកាណាដា៖ ភូមិសាស្ត្រប្រទេសនេះ ភាគច្រើនគ្របដណ្ដប់ទៅដោយទឹកកកដូចប្រទេសរុស្ស៉ីដែរ។ ប្រទេសកាណាដាមានផ្លូវរថភ្លើងប្រវែងសរុប ៤៨,០០០ គីឡូម៉ែត្រ ធ្វើឱ្យបណ្តាញជាតិរបស់ខ្លួនក្លាយជាបណ្តាញដែលវែងជាងគេទី ៥ នៅលើពិភពលោក។ ផ្លូវដែកជាតិកាណាដា (CN) និងផ្លូវដែកកាណាដាប៉ាស៊ីហ្វិក (CPR) គឺជាបណ្តាញផ្លូវដែកដឹកទំនិញធំពីរធំៗ ដែលកំពុងប្រតិបត្តិការនៅក្នុងប្រទេស ខណៈដែលក្រុមហ៊ុន Via Rail ដំណើរការសេវាកម្មរថភ្លើងដឹកអ្នកដំណើរចម្ងាយ ១២,៥០០ គីឡូម៉ែត្រ៕

ប្រទេសម៉ាឡេស៊ី ៖ មនុស្សភាគច្រើនប្រហែលជាភ្ញាក់ផ្អើល ដែលពលរដ្ឋជប៉ុនចូលនិវត្តន៍ពីការងារចាប់អារម្មណ៍ទៅរស់នៅម៉ាឡេស៊ីជាងប្រទេសផ្សេងក្នុងតំបន់អាស៊ីអាគ្នេយ៍ ខណៈម៉ាឡេស៊ីមានអាកាសធាតុល្អ មិនខុសគ្នាពីប្រទេសផ្សេង ។ ប៉ុន្តែក្រៅពីកត្តាអាកាសធាតុ គឺការចំណាយលើការទិញទំនិញនៅម៉ាឡេស៊ីមានតម្លៃសមរម្យសម្រាប់ជនបរទេស ។

អង្គការ Long Stay Foundation ដែលធ្វើឯកសាររស់នៅបរទេសសម្រាប់អ្នកចូលនិវត្តន៍ បញ្ជាក់ថា កាលពីឆ្នាំ២០១៩ ពលរដ្ឋជប៉ុនចូលនិវត្តន៍ពីការងារបានទៅរស់ម៉ាឡេស៊ីច្រើនបំផុត បន្ទាប់មក ថៃ ។ ប្រទេសថៃមានប្រៀបជាងម៉ាឡេស៊ី ផ្នែកទេសចរណ៍ផ្លូវភេទ និងសេវាកម្មពេលរាត្រីលំដាប់ពិភពលោក ប៉ុន្តែជនបរទេសអាយុច្រើនចង់រស់នៅកន្លែងស្ងប់ស្ងាត់ ពួកគេពុំត្រូវការសេវាកម្មទាំងនេះទេ ។ រីឯពលរដ្ឋជប៉ុនមករស់នៅថៃក្រោយចូលនិវត្តន៍ គឺខេត្តឈៀងម៉ៃ ។

ក្រៅពីម៉ាឡេស៊ីមានអាកាសធាតុល្អ និងការចំណាយផ្សេងៗសមរម្យ នៅមានកត្តាមួយទៀតធ្វើឱ្យពលរដ្ឋជប៉ុនចាស់ៗសម្រេចចិត្តមករស់នៅ គឺរដ្ឋាភិបាលម៉ាឡេស៊ីជួយសម្រួលដល់ការធ្វើទិដ្ឋាការរស់នៅរយៈពេលយូរ «Malaysia My Second Home (MM2H)» សម្រាប់ជនបរទេស ។ ទិដ្ឋាការនេះអនុញ្ញាតឱ្យជនបរទេសរស់នៅម៉ាឡេស៊ី ចាប់ពី៥ឆ្នាំ ទៅ១០ឆ្នាំ ហើយពលរដ្ឋជប៉ុនជាច្រើនបានធ្វើទិដ្ឋាការរស់នៅរយៈពេលយូរ ។

ម្យ៉ាងទៀត ពលរដ្ឋជប៉ុនយ៉ាងច្រើនបានមករស់នៅម៉ាឡេស៊ី តាំងពីជប៉ុនគ្រប់គ្រងម៉ាឡេស៊ីក្នុងសង្គ្រាមលោកលើកទី២ ហើយពេលជប៉ុនចាញ់សង្គ្រាម ពលរដ្ឋជប៉ុនជាច្រើនពុំត្រឡប់ទៅប្រទេសវិញទេ ពួកគេតាំងទីលំនៅអចិន្ត្រៃយ៍នៅទីនេះ ។ បច្ចុប្បន្ន មានសាលារៀនជប៉ុនជាច្រើននៅម៉ាឡេស៊ី ទើបពលរដ្ឋជប៉ុនអាយុច្រើនសម្រេចចិត្តមករស់នៅទីនេះ ។

ប្រាក់សន្សំរបស់ពលរដ្ឋជប៉ុនចូលនិវត្តន៍ គឺពុំគ្រប់គ្រាន់សម្រាប់ទិញខុនដូក្នុងតំបន់ទេសចរណ៍នៅប្រទេសថៃទេ ប៉ុន្តែប្រាក់របស់ពួកគេអាចទិញខុនដូនៅទីក្រុងឆ្នេរសមុទ្ររបស់ម៉ាឡេស៊ី ។ រីឯតម្លៃអាហារ និងកន្លែងស្នាក់នៅវិញ គឺសមរម្យសម្រាប់ជនបរទេសដែលមានប្រាក់មិនច្រើនអាចរស់នៅទីក្រុងកូឡាឡាំពួរ ដោយពុំចាំបាច់សន្សំសំចៃប្រាក់ ៕

ប្រទេសថៃ ៖ សារព័ត៌មានថៃបានរាយការណ៍កាលពីថ្ងៃទី១៦ ខែមករា ឆ្នាំ២០២៥ ថា ប៉ូលិសអន្តោប្រវេសន៍ខេត្តស្រះកែវ ចាប់ផ្តើមរឹតបន្តឹង និងត្រួតពិនិត្យអត្តសញ្ញាណពលរដ្ឋគ្រប់រូប ដែលធ្វើដំណើរចេញ-ចូលក្រុងប៉ោយប៉ែត ប្រទេសកម្ពុជាញឹកញាប់ ហើយស្នើឱ្យកម្ពុជាជួយត្រួតពិនិត្យការចេញ-ចូលរបស់ពលរដ្ឋថៃផងដែរ ។

ការត្រួតពិនិត្យយ៉ាងតឹងរ៉ឹង និងកំណត់អត្តសញ្ញាណពលរដ្ឋថៃគ្រប់រូប ដែលធ្វើដំណើរចេញ-ចូលក្រុងប៉ោយប៉ែតញឹកញាប់របស់ប៉ូលិសអន្តោប្រវេសន៍ខេត្តស្រះកែវ គឺក្នុងគោលបំណងទប់ស្កាត់ជនខិលខូលដែលតែងតែបោកប្រាស់ពលរដ្ឋ ព្រមទាំងលុបបំបាត់គណនីធនាគារក្លែងក្លាយ ស្របតាមគោលនយោបាយរបស់មជ្ឈមណ្ឌលបង្ក្រាបបទល្មើសបច្ចេកវិទ្យា ។

សារព័ត៌មានថៃរាយការណ៍ថា ពលរដ្ឋថៃដែលត្រូវអាជ្ញាធរសង្ស័យថា បានរួមគំនិតជាមួយក្រុមបោកប្រាស់នៅក្រុងប៉ោយប៉ែត គឺប៉ូលិសអន្តោប្រវេសន៍ខេត្តស្រះកែវ នឹងត្រួតពិនិត្យប្រវត្តិរូបយ៉ាងលម្អិត ព្រមទាំងសាកសួរពួកគេពេលធ្វើដំណើរឆ្លងដែន ។ ជាមួយគ្នានេះ ប៉ូលិសអន្តោប្រវេសន៍ក៏ឱ្យបានស្នើឱ្យកម្ពុជាជួយតាមដានសកម្មភាពពលរដ្ឋថៃនៅក្រុងប៉ោយប៉ែត ។

ក្រៅពីការត្រួតពិនិត្យនៅច្រកព្រំដែនអន្តរជាតិ ក៏មានការត្រួតពិនិត្យយ៉ាងតឹងរ៉ឹងនៅតាមច្រកឆ្លងដែនធម្មជាតិផងដែរ ដោយសារនៅពាក់កណ្តាលខែមករា ឆ្នាំ២០២៥ ទឹកក្នុងប្រឡាយរីងស្ងួតធ្វើឱ្យពលរដ្ឋថៃងាយស្រួលឆ្លងទៅក្រុងប៉ោយប៉ែត ដែលនៅឆ្ងាយពីគ្នាមិនដល់៥ម៉ែត្រ ។

កន្លងមក ប៉ូលិសអន្តោប្រវេសន៍ខេត្តស្រះកែវ បានប្រជុំជាមួយមន្ត្រីមកពីស្ថាប័នពាក់ព័ន្ធ ដើម្បីទប់ស្កាត់ពលរដ្ឋថៃកុំឱ្យលួចទៅធ្វើការជាក្រុមបោកប្រាស់នៅប្រទេសជិតខាង ។ រីឯពលរដ្ឋថៃដែលធ្វើការនៅប្រទេសជិតខាង គឺត្រូវមានឯកសារ ដូចជា ៖ ឯកសារនិយោជកនៅក្រៅប្រទេស, លិខិតអនុញ្ញាតការងារពីស្ថានកុងស៊ុលថៃនៅក្រៅប្រទេស, លិខិតឆ្លងដែន និងប័ណ្ណការងារមានសុពលភាព ៕