នៅលើពិភពលោកយើងនេះ មានទន្លេធំៗ និងវែងៗច្រើនជាង ១៩០ ខ្សែ ដែលទន្លេនីមួយៗសុទ្ធតែមានលក្ខណៈពិសេស និងប្លែកៗខុសពីគ្នា ប៉ុន្តែតើលោកអ្នកដឹងទេថា ក្នុងចំណោមទន្លេទាំងអស់នៅលើពិភពលោក តើទន្លេណាខ្លះដែលមានទេសភាពស្រស់ស្អាតជាងគេ?

១.The Nile៖ ទន្លេនីល ស្ថិតនៅក្នុងប្រទេសអេហ្ស៊ីប គឺជាទន្លេដ៏ធំ និងអស្ចារ្យបំផុតរបស់ពិភពលោក ជាមួយសម្រស់ដ៏ស្រស់ត្រកាលនៅភាគខាងជើងនៃទ្វីបអាហ្រ្វិកលាតសន្ធឹងប្រវែង ៤១៣២ គីឡូម៉ែត្រ និងរត់ឆ្លងកាត់ប្រទេសចំនួន ១១ ទន្លេនីលក៏បានដើរតួយ៉ាងសំខាន់ក្នុងប្រវត្តិសាស្ត្រអេហ្ស៊ីបបុរាណផងដែរ។

២.Mississippi River៖ ទន្លេមីស៊ីស៊ីពី ស្ថិតនៅក្នុងទ្វីបអាមេរិកខាងជើង គឺជាទន្លេធំបំផុត និងស្អាតបំផុតទីពីរនៅលើពិភពលោក រួមទាំងជាកន្លែងសម្រាប់ទាក់ទាញភ្ញៀវទេសចរយ៉ាងច្រើនទៀតផង។

៣.The Ganges៖ ទន្លេ Ganges ស្ថិតនៅក្នុងប្រទេសឥណ្ឌា ត្រូវបានគេស្គាល់ថាជាទន្លេដ៏បរិសុទ្ធ និងជាទន្លេដែលអាចលាងជម្រះអំពើបាបរបស់មនុស្សគ្រប់គ្នាបានទៀតផង។ ទន្លេនេះគឺមានទិដ្ឋភាពស្រស់ស្អាតខ្លាំងណាស់ ដែលជាបទពិសោធន៍ដ៏គួរឱ្យចាប់អារម្មណ៍មិនអាចបំភ្លេចបាន។

៤.The Thames៖ ទន្លេដ៏គួរឱ្យភ្ញាក់ផ្អើលមួយទៀតក្នុងពិភពលោកគឺទន្លេ Thames ដែលជាកន្លែងទាក់ទាញភ្ញៀវទេសចរដ៏លេចធ្លោមួយក្នុងទីក្រុងឡុងដ៍ប្រទេសអង់គ្លេស។ វាផ្តល់នូវផ្ទៃខាងក្រោយដ៏គួរឱ្យចាប់អារម្មណ៍ ហើយក៏ជាទន្លេវែងជាងគេរបស់អង់គ្លេសមានស្ពានប្រហែល ២០០ និងផ្លូវរូងក្រោមដីជាង ២០ ដែលគេស្គាល់វាថាជាស្ពានឡុងដ៍ដ៏ល្បីល្បាញផងដែរ។

៥.The Amazon៖ ទន្លេអាម៉ាហ្សូន ស្ថិតនៅក្នុងទ្វីបអាមេរិកខាងត្បូង គឺជាទន្លេធំបំផុតក្នុងពិភពលោក ត្រូវបានគេចាត់ទុកថាជាសរសៃឈាមនៃភពផែនដីរបស់យើង និងត្រូវបានគេស្គាល់ផងដែរថាជា River Sea។ ជាមួយទេសភាពស្រស់ស្អាតខ្លាំង ប្រៀបដូចទឹកនៅលើឋានសួគ៌ ទន្លេអាម៉ាហ្សូនត្រូវបានគេចាត់ទុកថា ជាទន្លេស្រស់ស្អាតបំផុតទី ៥ ក្នុងពិភពលោក។

៦.The Colorado៖ ទន្លេ Colorado ស្ថិតនៅក្នុងសហរដ្ឋអាមេរិក គឺជាទន្លេដែលមានទេសភាពស្រស់ស្អាតបំផុត ជាមួយនឹងការធ្វើដំណើរឆ្លងកាត់វាលខ្សាច់អារីហ្សូណាស្ងួត ទន្លេនេះផ្តល់នូវទិដ្ឋភាពអស្ចារ្យមិនធ្លាប់មាន។

៧.The River Rhine៖ ទន្លេ Rhine គឺជាទន្លេធំទីពីររបស់អឺរ៉ុប ជាមួយនឹងសម្រស់ដ៏អស្ចារ្យ ស្ថិតក្នុងចំណោមទន្លេដ៏ល្បីល្បាញ និងស្រស់ស្អាតបំផុតរបស់ពិភពលោក ដោយវាមានប្រភពមកពី Swiss Alps ហើយហូរកាត់ទីក្រុងធំៗមួយចំនួននៅអឺរ៉ុប។

៨.The Zambezi៖ Zambezi គឺជាទន្លេដែលវែងជាងគេរបស់ទ្វីបអាហ្រ្វិក ហើយត្រូវបានកត់សម្គាល់សម្រាប់ការទាក់ទាញដ៏ល្បីល្បាញបំផុតរបស់វា ជាមួយទឹកធ្លាក់ Victoria ដ៏គួរឱ្យចាប់អារម្មណ៍។

៩.The Yangtze៖ ទន្លេ Yangtze ស្ថិតក្នុងប្រទេសចិន គឺជាទន្លេដែលវែងជាងគេទី ៣ របស់ពិភពលោក និងជាទន្លេមានទេសភាពស្រស់ស្អាតទី ៩ នៅលើពិភពលោក ដែលលាតសន្ធឹងប្រវែង ៦៣០០ គីឡូម៉ែត្រ រួមជាមួយទេសភាពដ៏គួរឱ្យទាក់ទាញជាទីបំផុត។

១០.The Mekong៖ ទន្លេមេគង្គហូរចេញពីខ្ពង់រាបទីបេដ៏ល្បីល្បាញ ហើយធ្វើដំណើរឆ្លងកាត់ប្រទេសចិន មីយ៉ាន់ម៉ា ថៃ វៀតណាម កម្ពុជា និងឡាវ ក៏ត្រូវបានរាប់បញ្ចូលក្នុងចំណោមទន្លេដ៏ស្រស់ស្អាតបំផុតទាំង ១០ នៅលើពិភពលោកផងដែរ៕

ប្រទេសថៃ ៖ កាលពីថ្ងៃទី១៧ ខែមករា ឆ្នាំ២០២៥ រដ្ឋមន្ត្រីក្រសួងវប្បធម៌ប្រទេសថៃ បានប្រជុំជាមួយមន្ត្រីមកពីស្ថាប័នពាក់ព័ន្ធ ព្រមទាំងលោក និរ៉ាត់ ផុងសិទ្ធីថាវ៉ន អភិបាលខេត្តឈៀងម៉ៃ ដើម្បីជំរុញការរៀបចំឯកសារស្នើចុះខេត្តឈៀងម៉ៃ ជាតំបន់បេតិកភណ្ឌវប្បធម៌ពិភពលោក ទៅកាន់អង្គការយូណេស្កូ ។

លោកស្រី ស៊ូដាវ៉ាន់ វ៉ាង់ស៊ូផាកិចកូស៊ុន រដ្ឋមន្ត្រីក្រសួងវប្បធម៌បានពិភាក្សាជាមួយលោក និរ៉ាត់ ផុងសិទ្ធីថាវ៉ន អភិបាលខេត្តឈៀងម៉ៃ អំពីការរៀបចំឯកសារស្នើចុះខេត្តឈៀងម៉ៃជាតំបន់បេតិកភណ្ឌវប្បធម៌ពិភពលោក ជាមួយអង្គការយូណេស្កូ ។ លោកស្រីនិយាយថា ខេត្តឈៀងម៉ៃ ប្រៀបបាននឹងរាជធានីនៃទឹកដីឡានណា ដែលមានអាយុកាលយ៉ាងហោចណាស់ ៧៣០ឆ្នាំ ហើយភាពរីកចម្រើនបានបង្ហាញឱ្យឃើញនៅតាមវត្តអារ៉ាម និងទីកន្លែងបុរាណជាច្រើន ។

ពលរដ្ឋនៅខេត្តឈៀងម៉ៃ មានមោទនភាពចំពោះភាពធំធេងផ្នែកប្រវត្តិសាស្ត្រ និងបន្តប្រពៃណី វប្បធម៌ពីមនុស្សមួយជំនាន់ទៅមួយជំនាន់ ដែលធ្វើឱ្យអ្នកមកកម្សាន្តនៅឈៀងម៉ៃពុំអាចបំភ្លេចបាន ។ ហេតុនេះ ថៃសម្រេចចិត្តស្នើសុំអង្គការយូណេស្កូចុះបញ្ជីខេត្តឈៀងម៉ៃ ជាតំបន់បេតិកភណ្ឌវប្បធម៌ពិភពលោក ដើម្បីជំរុញវិស័យទេសចរណ៍ ។

បច្ចុប្បន្ន ជាដំណាក់កាលដ៏សំខាន់ដែលថៃត្រូវរៀបចំឯកសារបញ្ជាក់ពីភាពលេចធ្លោរបស់ខេត្តឈៀងម៉ៃ តាមលក្ខណៈវិនិច្ឆ័យរបស់អង្គការយូណេស្កូ ដើម្បីបញ្ជូនឯកសារតាមដំណាក់កាលបន្តទៀត ។ ស្ថាប័នពាក់ព័ន្ធត្រូវសហការគ្នាធ្វើឯកសារឱ្យជោគជ័យ និងដាក់ទៅអង្គការយូណេស្កូឱ្យបានឆាប់រហ័ស ហើយចំណុចសំខាន់ ពលរដ្ឋខេត្តឈៀងម៉ៃត្រូវចូលរួមផ្តល់កម្លាំងចិត្ត និងគាំទ្រឱ្យការស្នើសុំដំណើរការដោយរលូន ។ នេះបើតាមការលើកឡើងរបស់លោកស្រី ស៊ូដាវ៉ាន់ ។

ការស្នើចុះខេត្តឈៀងម៉ៃជាតំបន់បេតិកភណ្ឌវប្បធម៌ពិភពលោក គឺដើម្បីឱ្យប្រទេសថៃមានកេរ្តិ៍ឈ្មោះល្បីល្បាញលើឆាកអន្តរជាតិ ដោយសារខេត្តឈៀងម៉ៃសម្បូរតំបន់ទេសចរណ៍ និងវត្តអារ៉ាម ។ ពេលខេត្តឈៀងម៉ៃក្លាយជាតំបន់បេតិកភណ្ឌវប្បធម៌ពិភពលោក គឺខេត្តឈៀងម៉ៃនឹងជាគោលដៅទេសចរណ៍ ទទួលបានចំណូល ពលរដ្ឋមានជីវភាពល្អប្រសើរ ព្រមទាំងក្លាយជា Soft Power ដ៏រឹងមាំស្របតាមគោលនយោបាយរបស់រដ្ឋាភិបាលថៃ ៕

ប្រទេសថៃ ៖ នាពេលថ្មីៗនេះ ភ្ញៀវទេសចរចិនយ៉ាងច្រើនបានលុបចោលដំណើរកម្សាន្តចូលឆ្នាំចិននៅប្រទេសថៃ ដោយសារបារម្ភពីសុវត្ថិភាពការធ្វើដំណើរ និងស្នាក់នៅថៃ ជាពិសេស ការជួ.ញដូរ មនុស្ស និងចាប់ជំ.រិត ក្រោយការបាត់ខ្លួនតារាសម្តែងចិន លោក Wang Xing នៅបរិវេណព្រំដែនថៃ និងមីយ៉ាន់ម៉ា កាលពីថ្ងៃទី៣ ខែមករា ឆ្នាំ២០២៥ ។

នៅថ្ងៃទី១៧ ខែមករា កន្លងមក នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ថ្លែងថា លោកស្រីនឹងប្រើប្រាស់បច្ចេកវិទ្យា AI ជួយបកប្រែភាសាដើម្បីផ្សព្វផ្សាយ និងផ្តល់ទំនុកចិត្តដល់ភ្ញៀវទេសចរចិនឱ្យត្រឡប់មកកម្សាន្តនៅប្រទេសថៃច្រើនដូចមុន ។

យើងនឹងត្រៀមទំនាក់ទំនងជាមួយភ្ញៀវទេសចរចិន ដែលបារម្ភពីសុវត្ថិភាពការធ្វើដំណើរមកប្រទេសថៃ ហើយខ្ញុំនឹងថតសំឡេងខ្លួនឯង និងប្រើប្រាស់បច្ចេកវិទ្យា AI ជួយបកប្រែជាភាសាចិនដើម្បីទំនាក់ទំនងជាមួយជនជាតិចិន ពីព្រោះខ្ញុំអត់ចេះនិយាយភាសាចិន ។ នេះបើតាមការលើកឡើងរបស់លោកស្រី ផេថងថាន នៅវិមានរដ្ឋាភិបាល ក្រោយពីលោកស្រីអញ្ជើញមន្ត្រីមកពីស្ថាប័នពាក់ព័ន្ធចូលរួមពិភាក្សាពីការផ្តល់ទំនុកចិត្តដល់ភ្ញៀវទេសចរបរទេស ជាពិសេស ភ្ញៀវទេសចរចិន ។

លោកស្រីបន្តថា ៖ «ការនិយាយជាភាសាថៃ គឺពុំមានប្រសិទ្ធភាពដូចការនិយាយភាសាចិនទេ ទើបខ្ញុំថតសំឡេងរបស់ខ្លួនដើម្បីទំនាក់ទំនងជាមួយជនជាតិចិន ដើម្បីបញ្ជាក់ថា ថៃបានត្រៀមការពារសុវត្ថិភាពភ្ញៀវទេសចរបរទេស ។ ពួកគេអាចមកដើរលេងនៅថៃយ៉ាងសប្បាយរីករាយ និងពុំចាំបាច់បារម្ភ» ។

ប្រទេសថៃកំណត់វិធានការទាក់ទាញភ្ញៀវទេសចរចិន គឺក្រោយពីតារាសម្តែងចិន លោក Wang Xing បានធ្វើដំណើរមកប្រទេសថៃដើម្បីសម្តែងភាពយន្ត កាលពីថ្ងៃទី៣ ខែមករា កន្លងមក ប៉ុន្តែត្រូវជនខិលខូចបោកឱ្យលោកទៅស្រុកមេស៊ត ខេត្តតាក និងឆ្លងព្រំដែនទៅមីយ៉ាន់ម៉ា ។ ប៉ុន្តែនៅថ្ងៃទី៥ ខែមករា ក្រុមគ្រួសារពុំអាចទំនាក់ទំនងជាមួយលោក រហូតដល់សារព័ត៌មានចុះផ្សាយពីលោកចាញ់បោកជនខិលខូច ។

រដ្ឋាភិបាលថៃបានទំនាក់ទំនងជាមួយរដ្ឋាភិបាលចិន និងកងកម្លាំងប្រដាប់អាវុធជនជាតិភាគតិចមីយ៉ាន់ម៉ា រហូតដល់អាចជួយសង្គ្រោះតារាសម្តែងចិនរូបនេះពីមីយ៉ាន់ម៉ាត្រឡប់មកថៃវិញ នៅថ្ងៃទី៧ ខែមករា ។ ក្រោយហេតុការណ៍នេះ ក្រុមហ៊ុនទេសចរណ៍ថៃបញ្ជាក់ថា ភ្ញៀវទេសចរចិននាំគ្នាលុបចោលការកក់បន្ទប់សណ្ឋាគារនៅថៃ ដោយសារបារម្ភពីសុវត្ថិភាព ៕

ក្នុងឱកាសបុណ្យចូលឆ្នាំចិនខាងមុខនេះ ប្រជាជនចិន ឬអ្នកដែលមានសែស្រឡាយចិនតែងតែមានទំនៀមទម្លាប់មួយចំនួន និងតំណមខ្លះៗ ដើម្បីលើកតម្កើងលាភសំណាង ក៏ដូចជាបង្កើនសុភមង្គល និងទ្រពសម្បត្តិផងដែរ។ ដូច្នេះទំនៀមទម្លាប់ដែលប្រជាជនចិនតែងតែអនុវត្តនៅថ្ងៃចូលឆ្នាំថ្មីរួមមាន៖

១.សែនដង្វាយដល់ព្រះ ដូនតា និងវត្ថុស័ក្តសិទ្ធ៖ ដំណើរការដ៏សំខាន់បំផុតមួយនៃ “បុណ្យចូលឆ្នាំចិន” គឺការគោរពដល់បុព្វបុរស វត្ថុពិសិដ្ឋ ព្រោះការថ្វាយបង្គំព្រះជាអ្វីដែលជនជាតិចិនអនុវត្តជាយូរមកហើយ។ គ្រប់គ្រួសារនឹងរៀបចំដង្វាយរួមមានអាហារប្រៃ អាហារផ្អែម និងផ្លែឈើល្អៗ ដើម្បីប្រើប្រាស់ជាតង្វាយក្នុងថ្ងៃបុណ្យចូលឆ្នាំចិន ដែលត្រូវនឹងថ្ងៃអង្គារ ទី២៨ ខែមករា ឆ្នាំ២០២៥ នេះ។

២.ការឱ្យអាំងប៉ាវ៖ ការផ្តល់ស្រោមសំបុត្រក្រហម ឬគេហៅថាអាំងប៉ាវ គឺជាអំណោយដែលមនុស្សចាស់ ឬមនុស្សធំ ឱ្យទៅមនុស្សដែលមានវ័យក្មេងជាង។ សម្រាប់កូនៗ ឬចៅៗ ដែលទទួលបានអាំងប៉ាវពីសាច់ញាតិចាស់ទុំ ពួកគេត្រូវនិយាយពាក្យជូនពរទៅកាន់ចាស់ទុំថា “សូមឱ្យឆ្នាំថ្មីសម្រេចបាននូវរាល់បំណងប្រាថ្នារបស់អ្នក និងមានភាពចម្រុងចម្រើន”។

៣.ស្លៀកសម្លៀកបំពាក់ថ្មីៗ៖ ការស្លៀកសម្លៀកបំពាក់ថ្មីៗ ដែលមានពណ៌ភ្លឺចែងចាំង ជាពិសេសពណ៌ក្រហម នឹងនាំលោកអ្នកឱ្យជួបតែរឿងល្អៗក្នុងជីវិតពេញមួយឆ្នាំ ព្រោះពណ៌ “ក្រហម” មានន័យថា លាភសំណាង និងទ្រព្យសម្បត្តិហូរហៀរ។

៤.ជួបជុំញាតិមិត្តគ្រួសារ៖ កិច្ចការដែលត្រូវធ្វើ និងចាត់ទុកថាមានសារៈសំខាន់បន្ទាប់ គឺការជួបជុំគ្រួសារ ព្រោះថ្ងៃចូលឆ្នាំចិនត្រូវបានគេចាត់ទុកថាជាថ្ងៃសម្រាប់ការជួបជុំបងប្អូនគ្រួសារ ញ៉ាំអាហាររួមតុជាមួយគ្នាជាដើម។

ទោះជាយ៉ាងណា សម្រាប់តំណមដែលអ្នកមិនគួរធ្វើនៅក្នុងថ្ងៃបុណ្យចូលឆ្នាំចិនរួមមាន៖
– ហាមបោសផ្ទះ
-ហាមបោកខោអាវ
-ហាមទិញស្បែកជើងថ្មី
-ហាមមិនឱ្យជេរ ឬវ៉ៃគ្នា
-បំណុលប៉ុន្មាន ត្រូវសងឱ្យអស់
-ហាមធ្វើឱ្យរបស់ណាមួយបែកបាក់
-ហាមកក់ ឬកាត់សក់
-ហាមបរិភោគបបរ
-ហាមប្រើប្រាស់របស់មុតស្រួច
-ហាមស្លៀកសម្លៀកបំពាក់ពណ៌ខ្មៅ
– និងហាមចូលបន្ទប់អ្នកដ៏ទៃ៕

ប្រទេសអាល្លឺម៉ង់ ៖ «អរគុណ ដែលថ្ងៃនេះជាថ្ងៃច័ន្ទ» ពាក្យមួយឃ្លានេះ គឺយើងពុំឮអ្នកណាម្នាក់និយាយទេ ហើយយើងតែងតែឮថា «មិនចង់ឱ្យថ្ងៃច័ន្ទមកដល់» ឬ «មិនចូលចិត្តថ្ងៃច័ន្ទ» ប៉ុន្តែពលរដ្ឋអាល្លឺម៉ង់បាននិយាយពាក្យនេះយ៉ាងរីករាយ ក្រោយពីអាល្លឺម៉ង់សាកល្បងឱ្យពលរដ្ឋធ្វើការត្រឹម៤ថ្ងៃក្នុង១សប្តាហ៍ កាលពីឆ្នាំ២០២៤ ។

ក្រោយពីក្រុមហ៊ុននានានៅប្រទេសអាល្លឺម៉ង់សាកល្បងឱ្យពលរដ្ឋធ្វើការត្រឹម៤ថ្ងៃក្នុង១សប្តាហ៍ ឃើញថា អាចបង្កើនប្រសិទ្ធភាពការងារ និងធ្វើឱ្យបុគ្គលិករីករាយធ្វើការ ។ ពួកគេមានពេលសម្រាកលើសមុន ប៉ុន្តែទទួលបានលទ្ធផលការងារស្មើធ្វើការ៥ថ្ងៃក្នុង១សប្តាហ៍ ។

កាលពីឆ្នាំ២០២៤ អាល្លឺម៉ង់បានសាកល្បងឱ្យពលរដ្ឋធ្វើការ៤ថ្ងៃក្នុង១សប្តាហ៍ ដោយមានក្រុមហ៊ុនជាច្រើនចូលរួមសាកល្បង ដូចជា ៖ ក្រុមហ៊ុនបច្ចេកវិទ្យា, ក្រុមហ៊ុនផលិត និងស្ថាប័នអប់រំ ។ រយៈពេល៦ដំបូងនៃឆ្នាំ២០២៤ គឺជាដំណាក់កាលវិភាគ ដែលក្រុមហ៊ុននានាត្រូវរៀបចំការងារសម្រាប់បុគ្គលិកត្រៀមខ្លួនធ្វើការ៤ថ្ងៃ ហើយរយៈពេល៦ខែបន្ទាប់ គឺក្រុមហ៊ុនចាប់ផ្តើមឱ្យបុគ្គលិកធ្វើការ៤ថ្ងៃ ដោយកាត់បន្ថយម៉ោងការងារ ប្រមាណ២០% ។

ក្រុមហ៊ុនអាល្លឺម៉ង់មួយចំនួនចាប់ផ្តើមឱ្យបុគ្គលិកធ្វើការ៤ថ្ងៃក្នុង១សប្តាហ៍ តាំងពីចុងឆ្នាំ២០២៣ ក្រោយពីបណ្តាប្រទេសនៅអឺរ៉ុបអនុវត្តជោគជ័យ ដូចជា ៖ អេស្ប៉ាញ, អង់គ្លេស និងព័រទុយហ្គាល់ ។ បើទោះជាកាត់បន្ថយម៉ោងការងារ២០% ប៉ុន្តែបុគ្គលិកធ្វើការងារមានប្រសិទ្ធភាព និងទទួលបានប្រាក់ខែពេញ ។ បុគ្គលិកប្រាប់ថា ជីវិតពួកគេល្អជាងមុន ហើយមានពេលសម្រាកលើសមុន ៣៨នាទីក្នុង១យប់ ។

នាយកក្រុមហ៊ុននានានៅអាល្លឺម៉ង់បារម្ភថា ការកាត់បន្ថយថ្ងៃធ្វើការនឹងធ្វើឱ្យលទ្ធផលការងារធ្លាក់ចុះ ប៉ុន្តែក្រោយការសាកល្បង គឺបុគ្គលិកទទួលបានលទ្ធផលការងារល្អគួរឱ្យភ្ញាក់ផ្អើល ឬលទ្ធផលការងារដូចដើម បើធៀបនឹងការធ្វើការ៥ថ្ងៃ ។ តាមរបាយការណ៍សាកល្បងធ្វើការ៤ថ្ងៃក្នុង១សប្តាហ៍ បង្ហាញថា ការប្រជុំបានធ្លាក់ចុះ៦០% ហើយបុគ្គលិកធ្វើការនៅការិយាល័យគាំទ្រឱ្យកាត់បន្ថយប្រជុំ ឬពុំចាំបាច់ប្រជុំញឹកញាប់ ៕

កូរ៉េខាងជើង៖ សម្រាប់ភ្ញៀវទេសចរដែលមានបំណងចង់ទៅទស្សនាប្រទេសកូរ៉េខាងជើង ឥឡូវនេះ Rason របស់កូរ៉េខាងជើងបានបើកដំណើរការហើយ។
នេះបើយោងតាម Young Pioneer Tours និង Koryo Tours ដែលជាក្រុមហ៊ុនទេសចរណ៍ចិនមានឯកទេសក្នុងការរៀបចំដំណើរទេសចរណ៍ទៅកាន់ប្រទេសកូរ៉េខាងជើង បាននិយាយថា តំបន់សេដ្ឋកិច្ចពិសេស Rason បានស្វាគមន៍ភ្ញៀវទេសចរចាប់ពីថ្ងៃទី ១៦ ខែមករា ឆ្នាំ ២០២៥ នេះតទៅ ដោយអនុញ្ញាតឱ្យពលរដ្ឋនៃប្រទេសភាគច្រើនចូលទស្សនា លើកលែងតែសហរដ្ឋអាមេរិក និងកូរ៉េខាងត្បូងប៉ុណ្ណោះគឺមិនឱ្យចូលនោះទេ។

ទោះជាយ៉ាងណាក៏ដោយ ភ្នាក់ងារទេសចរណ៍ក៏បានកត់សម្គាល់ផងដែរថា ស្ថានភាពអាចនឹងផ្លាស់ប្តូរនៅថ្ងៃខាងមុខ។ Rason ដែលមានទីតាំងនៅភាគឦសានប្រទេសកូរ៉េខាងជើង ជាប់ព្រំដែនរុស្ស៊ី និងចិន ធ្លាប់បានស្វាគមន៍ភ្ញៀវអន្តរជាតិ មុនពេលប្រទេសនេះបិទព្រំដែនរបស់ខ្លួនក្នុងខែមករា ឆ្នាំ ២០២០ ដោយសារតែការរីករាលដាលនៃ Covid-19 ។ បច្ចុប្បន្នកន្លែងនេះបានបើកដំណើរការវិញហើយ ប៉ុន្តែអ្នកទេសចរមិនអាចធ្វើដំណើរទៅ Rason ដោយខ្លួនឯងបានទេ មុននឹងទៅត្រូវកក់ដំណើរទេសចរណ៍តាមរយៈក្រុមហ៊ុនទេសចរណ៍ដែលមានអាជ្ញាប័ណ្ណជាមុនសិន។

ដំណើរកម្សាន្តជាធម្មតាមានរយៈពេល ៥ ថ្ងៃ ៤ យប់ ដោយមានមគ្គុទ្ទេសក៍ក្រុមហ៊ុនទេសចរណ៍ និងមគ្គុទ្ទេសក៍ក្នុងស្រុកអមដំណើរពេញមួយការធ្វើដំណើរ។ Rason មានទេសភាពស្រស់ស្អាតជាច្រើនកន្លែងដូចជា កន្លែងប្រវត្តិសាស្ត្រ សារមន្ទីរក្នុងស្រុក រោងចក្រកែច្នៃត្រី ក៏ដូចជាកន្លែងទាក់ទាញមួយចំនួនទៀតរួមមាន រោងចក្រ កំពង់ផែសមុទ្រ សាលាភាសាបរទេស មជ្ឈមណ្ឌលបណ្តុះបណ្តាលតេក្វាន់ដូ និងសួនឧស្សាហកម្មមួយចំនួនទៀតសម្រាប់ភ្ញៀវទេសចរចូលទស្សនា។

បន្ថែមពីលើការបើកតំបន់ពិសេសនោះ ប្រទេសកូរ៉េខាងជើងក៏បានសាងសង់រមណីយដ្ឋាន Wonsan-Kalma Beach Resort ទំហំ ២៤៥ ហិកតា ដែលមានទីតាំងនៅកណ្តាលអាកាសយានដ្ឋានថ្មីនៅឆ្នេរសមុទ្រភាគខាងកើតផងដែរ។ គម្រោងនេះត្រូវបានគេចាត់ទុកថាជាផ្នែកមួយនៃផែនការអភិវឌ្ឍន៍វិស័យទេសចរណ៍ដើម្បីបង្កើតប្រាក់ចំណូលប្តូរប្រាក់បរទេសសម្រាប់ប្រទេស៕