ប្រទេសថៃ ៖ កងទ័ពថៃបានប្រាប់ពលរដ្ឋរបស់ខ្លួនថា ៖ «សូមកុំជឿតាមវីដេអូផ្សេងៗដែលបង្ហោះក្នុងបណ្តាញសង្គម ដែលធ្វើឱ្យកម្ពុជា និងថៃ មានបញ្ហាពុំចេះចប់ នាពេលកន្លងមក ។ វាជារឿងចាស់យូរហើយ កុំចេះតែជឿដោយមិនបានពិចារណា ហើយវីដេអូដែលបានឃើញកន្លងមក វាជាវីដេអូចាស់ៗទេ ។ ការយកវីដេអូចាស់មកបង្ហោះ គឺនាំឱ្យកម្ពុជា និងថៃ មានបញ្ហាពុំចេះចប់» ។

កងទ័ពថៃបានប្រាប់ពលរដ្ឋខ្លួនកុំជឿតាមការញុះ ញ.ង់របស់បុគ្គលមួយចំនួន ដែលយកវីដេអូកងទ័ពខ្មែរច្រៀងចម្រៀងជាតិនៅមុខប្រាសាទតាមាន់ធំយូរឆ្នាំហើយ មកបង្ហោះសាជាថ្មី ។ វីដេអូវីដេអូកងទ័ពខ្មែរមួយក្រុមច្រៀងចម្រៀងជាតិនៅខាងមុខប្រាសាទតាមាន់ធំ ស្ថិតលើភ្នំដងរែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ ត្រូវបានពលរដ្ឋថៃយកមកបង្ហោះចែកចាយក្នុងបណ្តាញសង្គមជាច្រើន ជាពិសេស គឺ TikTok ។ ពលរដ្ឋថៃទាំងនេះអះអាងថា កន្លងមក ពលរដ្ឋខ្មែរមួយក្រុមបានមកច្រៀងចម្រៀងជាតិនៅប្រាសាទតាមាន់ធំ លើកនេះ កងទ័ពខ្មែរច្រៀងម្តង ។

កាលពីថ្ងៃទី២៥ ខែកុម្ភៈ ឆ្នាំ២០២៥ សារព័ត៌មាន Thairath រាយការណ៍ថា កងទ័ពថៃ (Suranaree Command ឬ Suranaree Task Force) ការពារព្រំដែន បញ្ជាក់ថា វីដេអូកងទ័ពខ្មែរមួយក្រុមច្រៀងចម្រៀងជាតិនៅមុខប្រាសាទតាមាន់ធំ គឺជាវីដេអូយូរឆ្នាំហើយ តាំងពីឆ្នាំ១៩៩៥ មកម៉្លេះ ។ ហេតុនេះ កងទ័ពថៃបានសំណូមពរកុំឱ្យពលរដ្ឋជឿតាមការញុះញង់របស់បុគ្គលមួយចំនួនដែលចង់បង្កឱ្យកើតជម្លោះរវាងកម្ពុជា និងថៃ ពីព្រោះស្ថានការណ៍ត្រឡប់មកប្រក្រតីវិញហើយ ក្រោយពីទាហានកម្ពុជា និងថៃ បានចរចាគ្នា ។

កងទ័ពថៃការពារព្រំដែននៅខេត្តសុរិន្ទ បាននិយាយមកកាន់សារព័ត៌មាន Thairath ថា វីដេអូកងទ័ពខ្មែរច្រៀងចម្រៀងជាតិនៅមុខប្រាសាទតាមាន់ធំ ដែលពលរដ្ឋថៃកំពុងតែចែកចាយយ៉ាងច្រើននាពេលបច្ចុប្បន្ន គឺជាវីដេអូចាស់ទេ កងទ័ពខ្មែរច្រៀងចម្រៀងនេះជាច្រើនឆ្នាំហើយ ។ តាមការសង្កេតមើលឯកសណ្ឋានឃើញថា វាជាឯកសណ្ឋានចាស់ក្នុងអំឡុងឆ្នាំ១៩៩៥ រីឯតួប្រាសាទពុំទាន់កែលម្អនៅឡើយ គឺមិនដូចប្រាសាទនាពេលបច្ចុប្បន្ន ។

ហេតុនេះ សូមពលរដ្ឋថៃកុំជឿតាមវីដេអូផ្សេងៗដែលបង្ហោះក្នុងបណ្តាញសង្គម ដោយសារមានបុគ្គលមួយចំនួនចង់បង្កបញ្ហា ហើយចង់ឱ្យពលរដ្ឋថៃយល់ច្រឡំមកលើកម្ពុជា ក៏កើតជាជម្លោះរវាងប្រទេសទាំងពីរ ។ បច្ចុប្បន្ន ស្ថានការណ៍នៅប្រាសាទតាមាន់ធំល្អធម្មតាទេ ហើយកងទ័ពទាំងពីរប្រទេសបានចរចាគ្នារួចហើយ តាំងពីមន្ត្រីថ្នាក់ក្រោម រហូតដល់មន្ត្រីជាន់ខ្ពស់ ព្រមទាំងអនុញ្ញាតឱ្យភ្ញៀវទេសចរទាំងពីរប្រទេសមកទស្សនា ។ នេះបើតាមការបញ្ជាក់របស់កងទ័ពថៃនៅខេត្តសុរិន្ទ ។

ដោយឡែក ករណីពលរដ្ឋថៃមួយក្រុមដែលធ្វើដំណើរពីទីក្រុងបាងកក ដើម្បីមកទស្សនានៅប្រាសាទតាមាន់ធំ និងស្តាប់មគ្គុទ្ទេសក៍ទេសចរថៃរៀបរាប់ពីព្រំដែនខ្មែរ-ថៃ ប៉ុន្តែត្រូវបានកងទ័ពខ្មែរឈរជើងនៅប្រាសាទតាមាន់ធំ ចូលមកហាមឃាត់នោះ គឺកងទ័ពថៃនឹងបំពេញតួនាទីជាមគ្គុទ្ទេសក៍ដោយផ្ទាល់ ដើម្បីកុំឱ្យមានការយល់ច្រឡំទៀត ៕

តិចច្រឡំយកលេបថបចូលហាងកាហ្វេក្នុងទីក្រុងធំៗនៅអឺរ៉ុប គេពុំអនុញ្ញាតឱ្យយកចូលទេ តើមានមូលហេតុអ្វីបានជាមិនឱ្យយកចូលដូច្នេះ? ហាងកាហ្វេជាច្រើនកន្លែងក្នុងទីក្រុងធំៗនៅអឺរ៉ុបបានហាមអតិថិជនយកលេបថបមកអង្គុយធ្វើការក្នុងហាង ជាពិសេស នៅថ្ងៃសម្រាកចុងសប្តាហ៍ ដោយសារអតិថិជនទិញកាហ្វេ១កែវ ប៉ុន្តែអង្គុយរាប់ម៉ោង ពុំព្រមងើបពីកៅអី ។ ពួកគេថែមទាំងប្រាប់ហាង ឬអតិថិជនផ្សេងៗកុំបើកចម្រៀងខ្លាំងនាំឱ្យរំខានដល់ការប្រជុំ ។ វាធ្វើឱ្យបរិយាកាសក្នុងហាងក្លាយជាសោកសៅ ហាងបាត់បង់ប្រាក់ចំណូល ដោយសារអស់អតិថិជន ។

Black Sheep Coffee គឺជាហាងកាហ្វេដ៏ពេញនិយមនៅទីក្រុងរីតឌីង ប្រទេសអង់គ្លេស បានហាមអតិថិជនយកលេបថប និងថេបប្លេតចូលក្នុងហាង នៅថ្ងៃសៅរ៍-អាទិត្យ ដោយសារអតិថិជនជាច្រើននាក់ត្អូញត្អែរគ្មានកន្លែងអង្គុយ ។ ហាងនេះបានដាក់ស្លាកហាមយកលេបថប និងថេបប្លេតចូលហាង ចាប់ពីថ្ងៃសុក្រ ដល់ថ្ងៃអាទិត្យ ។

ការកំណត់គោលការណ៍នេះ ពុំមែនជារឿងថ្មីទេ នៅអង់គ្លេស ។ កាលពីឆ្នាំ២០២៤ ហាងកាហ្វេនៅទីក្រុងខេនធឺប៊ូរី បានហាមអតិថិជនយកលេបថបចូលហាង ក្រោយពីអតិថិជនយកលេបថបមកធ្វើការ និងប្រជុំអនឡាញរាប់ម៉ោង ហើយកុម្ម៉ង់កាហ្វេតែ១កែវប៉ុណ្ណោះ ។ លើសពីនេះ ពួកគេថែមទាំងប្រាប់ឱ្យអតិថិជនផ្សេងកុំនិយាយខ្លាំងៗ ពីព្រោះរំខានការប្រជុំ ។

ម្ចាស់ហាងកាហ្វេប្រាប់ថា ហាងពិបាកហាមអតិថិជនប្រើប្រាស់លេបថបណាស់ ពេលអតិថិជនលែងយកលេបថបចូលហាងធ្វើឱ្យបរិយាកាសរីករាយឡើងវិញ ខណៈអតិថិនផ្សេងៗអាចជជែកគ្នាដូចមុន ។ រីឯអតិថិជនដែលយកលេបថបមកធ្វើការក្នុងហាង ពួកគេទិញកាហ្វេ១កែវប៉ុណ្ណោះ ហើយធ្វើឱ្យបរិយាកាសសោកសៅ ។ ហាងកាហ្វេតូចៗខ្លះចង់ឱ្យមានអតិថិជនចេញ-ចូលច្រើន ហើយពុំអនុញ្ញាតឱ្យអតិថិជនណាម្នាក់អង្គុយយូរទេ ។ ហាងពុំចង់ហាមអតិថិជនយកកុំព្យូទ័រចូលហាង ប៉ុន្តែដោយសារពួកគេពុំគិតពីផលប៉ះពាល់ ។

ក្រៅពីអង់គ្លេស ហាងកាហ្វេតាមទីក្រុងធំៗនៅអឺរ៉ុប ក៏ជួបនឹងបញ្ហានេះដែរ ដូចជា ៖ ហាងកាហ្វេនៅទីក្រុងប៉ារីស បាសេឡូណា និងប៊ែកឡាំង ។ ម្ចាស់ហាងក្នុងទីក្រុងទាំងនេះនិយាយស្រដៀងគ្នាថា អ្នកខ្លះទិញកាហ្វេ១កែវ ប៉ុន្តែអង្គុយរហូតដល់៨ម៉ោង ហើយប្រាប់ឱ្យហាងកុំបើកចម្រៀងខ្លាំងៗ ពីព្រោះពួកគេកំពុងប្រជុំអនឡាញ ។ អ្នកខ្លះទៀតយកបាយប្រអប់មកបរិភោគពេលថ្ងៃត្រង់ក្នុងហាង ។ ហេតុនេះ ហាងកាហ្វេនៅអឺរ៉ុបបានឱ្យអតិថិជនបង់ប្រាក់គិតម៉ោង បើចង់ប្រើប្រាស់កុំព្យូទ័រធ្វើការក្នុងហាង ៕

បច្ចុប្បន្នប្រជាជនប្រមាណ ៥៥ ភាគរយដែលស្មើនឹង ៤,២ ពាន់លាននាក់នៃប្រជាជនសរុបក្នុងពិភពលោក គឺកំពុងរស់នៅក្នុងទីក្រុងដើម្បីស្វែងរកឱកាសការងារដ៏ច្រើន  និងរបៀបរស់នៅឱ្យប្រសើរជាងមុន។ បើតាមអង្គការសហប្រជាជាតិ (UN) ទីក្រុងដែលមានមនុស្សរស់នៅច្រើនជាង ១០ លាននាក់ត្រូវបានចាត់ទុកថាជាទីក្រុងធំជាងគេបំផុត (Megacity)។ ដូច្នេះនៅលើពិភពលោកយើងនេះ ទីក្រុងធំៗដែលមានប្រជាជនរស់នៅច្រើនបំផុតនោះគឺ៖

១.ទីក្រុងតូក្យូ ប្រទេសជប៉ុន៖ អស់រយៈពេលជាច្រើនទស្សវត្សរ៍មកហើយ ទីក្រុងតូក្យូតែងតែមានប្រជាជនរស់នៅច្រើនជាងគេបំផុតនៅលើពិភពលោក ដែលនៅឆ្នាំ ២០២៥ នេះ ចំនួនប្រជាជននៅទីក្រុងតូក្យូមានរហូតដល់ ៣៧.៤ លាននាក់ គ្របដណ្តប់លើផ្ទៃដី ១៣,៤៥២ គីឡូម៉ែត្រការ៉េ។

២.ទីក្រុងដេលី ប្រទេសឥណ្ឌា៖ ទីក្រុងនេះមានប្រជាជនរស់នៅចំនួន ២៩.៣ លាននាក់ ដោយគ្របដណ្តប់លើផ្ទៃដី ១,៤៨៣ គីឡូម៉ែត្រការ៉េ នេះបើយោងតាមការចុះផ្សាយរបស់សារព័ត៌មានបរទេស Science Focus។

៣.ទីក្រុងសៀងហៃ ប្រទេសចិន៖ ជាច្រើនឆ្នាំមុន សៀងហៃធ្លាប់ជាភូមិនេសាទតូចមួយ ប៉ុន្តែដោយសារទីតាំងរបស់វានៅភាគខាងត្បូងនៃទន្លេ Yangtze វាបានក្លាយជាទីក្រុងដ៏ធំបំផុតនៅក្នុងប្រទេសចិន និងជាទីក្រុងធំបំផុតទី ៣ នៅលើពិភពលោក ដែលមានប្រជាជនរស់នៅសរុបប្រមាណ ២៦.៣ លាននាក់។

៤.ទីក្រុងសៅប៉ូឡូ ប្រទេសប្រេស៊ីល៖ ជាមួយប្រជាជន ២១,៨ លាននាក់ ទីក្រុងនេះបច្ចុប្បន្នកំពុងជួបនឹងការលំបាកខ្លាំងដោយសារកង្វះប្រភពទឹកស្អាត។

៥.ទីក្រុងម៉ិកស៊ិក ប្រទេសម៉ិកស៊ិក៖ ទីក្រុងដែលស្ថិតនៅទ្វីបអាមេរិកខាងត្បូងនេះបច្ចុប្បន្នមានប្រជាជនរស់នៅប្រមាណ ២១,៦ លាននាក់ ត្រូវបានគេស្គាល់ថាជាទីក្រុងដែលមានវ័យចំណាស់ជាងគេបំផុតនៅអាមេរិក។

៦.ទីក្រុងគែរ ប្រទេសអេហ្ស៊ីប៖ ជាមួយប្រជាជនរស់នៅ ២០.៤ លាននាក់ ទីក្រុងគែរប្រហែលជាត្រូវបានគេស្គាល់ថាជាផ្ទះនៃអច្ឆរិយៈបុរាណមួយរបស់ពិភពលោក ដោយមានប្រាសាទពីរ៉ាមីត Giza អេហ្ស៊ីបបុរាណ។ វាក៏ជាផ្ទះសម្រាប់ ១១ ភាគរយនៃចំនួនប្រជាជននៃប្រទេសអេហ្ស៊ីបផងដែរ។

៧.ទីក្រុងដាកា ប្រទេសបង់ក្លាដែ៖ ដោយមានប្រជាជនរស់នៅ ២០.២ ពាន់លាននាក់ រាជធានីនៃប្រទេសបង់ក្លាដែសបច្ចុប្បន្នគឺកំពុងរីកចម្រើនក្នុងអត្រាដ៏ឆាប់រហ័ស ដែលត្រូវបានជំរុញដោយផ្នែកឧស្សាហកម្មបោះពុម្ពផ្សាយដ៏រីកចម្រើន។ នេះ​បាន​នាំ​ឱ្យ​មាន​អាផាតមិន និង​ការិយាល័យ​ខ្ពស់ៗ​រីក​ដុះដាល​ពាសពេញ​ទីប្រជុំជន​ដ៏ធំទូលាយ​នេះ។

៨.ទីក្រុងបុមបៃ ប្រទេសឥណ្ឌា៖ ទីក្រុងបុមបៃត្រូវបានសាងសង់នៅលើកោះចំនួនប្រាំពីរ ហើយជាទីក្រុងប្រវត្តិសាស្ត្រដែលពោរពេញដោយវប្បធម៌ និងសិល្បៈ។ វាក៏ជាកន្លែងសម្រាប់ឧស្សាហកម្មភាពយន្តឥណ្ឌា Bollywood ដែលត្រូវបានគេស្គាល់ជុំវិញពិភពលោកសម្រាប់ភាពយន្ដដ៏រស់រវើក និងតន្ត្រីទាន់សម័យ។ ជាមួយប្រជាជនរស់នៅ ២០.១ ពាន់លាននាក់ ទីក្រុងនេះក៏ត្រូវបានគេស្គាល់ថាជាទីក្រុងអ្នកមានផងដែរ។

៩.ទីក្រុងប៉េកាំង ប្រទេសចិន៖ ប៉េកាំងគឺជាទីក្រុងធំជាងគេទីពីររបស់ប្រទេសចិន និងធំជាងគេទី ៩ របស់ពិភពលោក ដែលមានប្រជាជនរស់នៅសរុបប្រមាណ ១៩.៤ លាននាក់។

១០.ទីក្រុង Osaka ប្រទេសជប៉ុន៖ Osaka គឺជាទីក្រុងធំជាងគេទីពីររបស់ប្រទេសជប៉ុន និងធំជាងគេទី ១០ របស់ពិភពលោក ដែលមានប្រជាជនរស់នៅសរុបប្រមាណ ១៩.២ លាននាក់៕

ប្រទេសជប៉ុន ៖ កាលពីថ្ងៃទី២៥ ខែកុម្ភៈ ឆ្នាំ២០២៥ Guinness World Records បានប្រកាសទទួលស្គាល់ពីភាពជោគជ័យ និងការគ្រប់គ្រងតំណែងជើងឯកជាផ្លូវការរបស់ប្រទេសជប៉ុន ដែលបានបង្កើតសួនច្បារមានទំហំតូចបំផុតនៅលើពិភពលោក គឺវាមានទំហំស្មើនឹងក្រដាស A3 ប៉ុណ្ណោះ និងមានទំហំតូចជាងសួនច្បារ Mill Ends Park នៅអាមេរិក ។

សួនច្បារមានទំហំតូចបំផុតលើពិភពលោកនេះ ស្ថិតនៅទីក្រុងណាង៉ាស៊ុមិ ខេត្តឈិស៊ុអូកាក់ ហើយបើធ្វើដំណើរពីទីក្រុងតូក្យូ មកកាន់ទីក្រុងណាង៉ាស៊ុមិ គឺចំណាយពេលប្រមាណ១ម៉ោង ។ បើទោះជាសួនច្បារមានទំហំតូចមែន ប៉ុន្តែវាមានច្រកចូល កន្លែងអង្គុយខ្នាតតូច និងស្មៅដ៏ស្រស់ស្អាត ។

លោក Shuji Koyama ប្រធានក្រុមមកពីនាយកដ្ឋានគ្រប់គ្រងការសាងសង់នៅទីក្រុងណាង៉ាស៊ុមិ និយាយថា សួនច្បារនេះបានធ្វើតាំងពីឆ្នាំ១៩៨៨ មកម៉្លេះ ដើម្បីប្រើប្រាស់ទីធ្លាទូលាយនៅក្បែរផ្លូវឱ្យក្លាយជាប្រយោជន៍ខ្ពស់បំផុត ។ មុនពេលធ្វើសួនច្បារនេះ គឺសមាជិកម្នាក់បានទៅកម្សាន្តនៅអាមេរិកក្នុងថ្ងៃឈប់សម្រាក ហើយឃើញសួនច្បារ Mill Ends Park មានតូចបំផុតនៅទីក្រុងផូកឡែន រដ្ឋអូរីហ្គន ទើបសមាជិករូបនេះចង់ធ្វើសួនច្បារនៅជប៉ុន ឱ្យតូចជាងសួនច្បារអាមេរិក ។

តាំងពីធ្វើសួនច្បារនេះមក អាជ្ញាធរទីក្រុងណាង៉ាស៊ុមិ ក៏ចាត់ទុកថា វាជាសួនច្បារមានទំហំតូចបំផុតនៅលើពិភពលោក ។ លើសពីនេះ សារព័ត៌មានជប៉ុនបានចុះផ្សាយពីសួនច្បារជាញឹកញាប់ ទើបធ្វើឱ្យភ្ញៀវទេសចរជាតិ និងអន្តរជាតិមកកម្សាន្តថតរូបនៅទីនេះជាហូរហែ ។

អាជ្ញាធរទីក្រុងណាង៉ាស៊ុមិ ចង់ឱ្យសួនច្បារនេះទទួលតំណែងជាសួនច្បារតូចបំផុតលើពិភពលោកជាផ្លូវការ ទើបអញ្ជើញអ្នកជំនាញមកវាស់ទំហំរបស់វាដើម្បីកត់ត្រាទំហំពិតប្រាកដ ។ បន្ទាប់មក អាជ្ញាធរទីក្រុងណាង៉ាស៊ុមិ ក៏បញ្ជូនទិន្នន័យលម្អិតរបស់សួនច្បារផ្ញើទៅឱ្យ Guinness World Records ។ លោក Shuji Koyama សប្បាយចិត្តខ្លាំងណាស់ ដែលសួនច្បារនៅទីក្រុងណាង៉ាស៊ុមិ បានគ្រប់គ្រងតំណែងជើងឯកជាផ្លូវការ ក្លាយជាសួនច្បារតូចបំផុតលើពិភពលោក ៕