ទូរស័ព្ទ iPhone ដែលដំណើរការប្រព័ន្ធ IOS បានគេនិយាយថាងាយរងការវាយប្រហារជាង Android នេះបើយោងតាមរបាយការណ៍ចុងក្រោយបំផុតពី Lookout ដែលជាគេហទំព័រស្តីពីសុវត្ថិភាពតាមអ៊ីនធឺណិត។ យោងតាមរបាយការណ៍នេះ បានចង្អុលបង្ហាញថា ទូរស័ព្ទ iPhone ងាយរងការវាយប្រហារ ឬងាយក្នុងការ Hack ជាង Android បន្ទាប់ពីស្រាវជ្រាវឧបករណ៍ជាង ២០០ លានឧបករណ៍ ដែលនេះគឺជានិន្នាការដ៏គួរឱ្យភ្ញាក់ផ្អើលមួយនៅក្នុងវិស័យសន្តិសុខតាមអ៊ីនធឺណិតលើទូរស័ព្ទដៃ។

តួលេខបង្ហាញថា ១៨.៤% នៃឧបករណ៍ iOS ត្រូវបានគេ Hack និងប៉ុនប៉ងបន្លំនៅក្នុងត្រីមាសទី ៣ នៃឆ្នាំ ២០២៤ ខណៈ Android មានអ្នកប៉ុនប៉ងលួចទិន្នន័យត្រឹមតែ ១១.៤% ប៉ុណ្ណោះ។ នេះមានន័យថា ការលួចព័ត៌មានសម្ងាត់ និងការប៉ុនប៉ងបន្លំដែលផ្តោតលើអាជីវកម្ម គឺបានកើនឡើង ១៧% ហើយចាប់តាំងពីឆ្នាំ ២០១៩ មក។ យោងតាមរបាយការណ៍ក្នុងឆ្នាំ ២០១៩ អ្នកស្រាវជ្រាវបានកំណត់អត្តសញ្ញាណគេហទំព័របន្លំចំនួន ៤៧៣ លានជាមួយនឹងការកើនឡើងគួរឱ្យកត់សម្គាល់នៃភាពស្មុគស្មាញនៃការវាយប្រហារ។

ឧក្រិដ្ឋជនតាមអ៊ីនធឺណិតកំពុងប្រើប្រាស់ការក្លែងបន្លំជានាយកប្រតិបត្តិកាន់តែខ្លាំងឡើង និងបង្កើតស្ថានភាពសង្គ្រោះបន្ទាន់ដើម្បីរៀបចំបុគ្គលិក ដែលជាបច្ចេកទេសឯករាជ្យនៃប្រព័ន្ធប្រតិបត្តិការ។ ជាងនេះទៅទៀត ការលេចឡើងនៃបញ្ញាសិប្បនិម្មិត (AI) និងគំរូភាសាក៏កំពុងបង្កបញ្ហាប្រឈមថ្មីសម្រាប់សន្តិសុខតាមអ៊ីនធឺណិតចល័តផងដែរ។ ដូច្នេះអ្នកវាយប្រហារ ឬពួក Hacker មានលទ្ធភាពធ្វើស្វ័យប្រវត្តិកម្ម និងកំណត់ការប៉ុនប៉ងបន្លំតាមទំហំផ្ទាល់ខ្លួន ដែលអាចធ្វើឱ្យវាកាន់គ្រោះថ្នាក់។

ទោះជាយ៉ាងណាក៏ដោយ Lookout បាននិយាយថាវាមិនអាចធ្វើឱ្យឧបករណ៍ Apple ខូចកេរ្តិ៍ឈ្មោះសុវត្ថិភាពនោះទេ។ ទោះបីជាមានតួលេខគួរឱ្យព្រួយបារម្ភក៏ដោយ មេរោគដែលបានរកឃើញ ដូចជា BnkRat, SpySolr និង ValadSpy ភាគច្រើនកំណត់គោលដៅលើប្រព័ន្ធប្រតិបត្តិការ Android ប៉ុណ្ណោះ។ ការសិក្សានេះគូសបញ្ជាក់ថា ដើម្បីសុវត្ថិភាពមិនថាអ្នកប្រើ iOS ឬ Android នោះទេ យល់ល្អគួរមានការប្រុងប្រយ័ត្នឱ្យបានខ្ពស់ និងឧស្សាហ៍អាប់ដេតកម្មវិធីនានាឱ្យបានទៀងទាត់បំផុត ដើម្បីជៀសវាងការ Hack៕

នៅក្នុងមហាសមុទ្រមានរឿងរ៉ាវអាថ៌កំបាំងជាច្រើន ដែលអ្នកវិទ្យាសាស្ត្រនៅមិនទាន់រកឃើញចម្លើយពិតប្រាកដនោះទេ។ ទោះបីក្នុងសម័យទំនើបនេះ មានបច្ចេកវិទ្យា និងការអភិវឌ្ឍន៍ជឿនលឿនស្ទើរតែគ្រប់ជ្រុងនៃផែនដីក៏ដោយ។

យោងតាមគេហទំព័របរទេស BBC Science Focus នៅក្នុងមហាសមុទ្រដ៏ធំល្វឹងល្វើយរបស់យើង មិនទាន់មានអ្នកវិទ្យាសាស្ត្រណាអាចទៅសិក្សាស្រាវជ្រាវដល់ជម្រៅជ្រៅនៃមហាសមុទ្រនោះទេ ដូច្នេះរឿងរ៉ាវអាថ៌កំបាំងទាំង ៣ ខាងក្រោមនេះនៅតែជាចម្ងល់រហូតមកដល់បច្ចុប្បន្ន។

១.តើទឹកនៅលើផែនដីកើតឡើងមកពីណា? ជាការពិតណាស់ ផែនដីត្រូវបានគ្របដណ្តប់ដោយមហាសមុទ្រ ៧០% ដែលបរិមាណទឹកដ៏ច្រើននេះបានបង្កើតជាជម្រកដ៏ធំបំផុតនៅលើភពផែនដី។ ទោះជាយ៉ាងណាក៏ដោយ ប្រភពដើមនៃទឹកនៅតែជាអាថ៌កំបាំងសម្រាប់អ្នកវិទ្យាសាស្ត្រ ថ្វីត្បិតតែផែនដីបង្កើតឡើងប្រហែល ៤.៥ ពាន់លានឆ្នាំមុនក៏ដោយ ក៏យើងនៅតែមិនអាចកំណត់បានថា តើទឹកកើតឡើងមកពីណានោះទេ។ ដូច្នេះហើយសំនួរដែលសួរថា ហេតុអ្វីបានជាផែនដីរបស់យើងមានទឹកគ្របដណ្តប់ច្រើនម្លេះ តើទឹកទាំងនោះកើតឡើងមកពីណា ហើយអ្នកណាជាអ្នកដាក់ឈ្មោះភពផែនដី ខណៈភពនេះមានទឹកច្រើនជាងដីទៅទៀត ហេតុអ្វីមិនដាក់ឈ្មោះថាជាភពទឹកទៅ ដែលសំនួរចាក់ដោតទាំងនេះ នៅតែមិនទាន់រកឃើញចម្លើយពិតប្រាកដនោះទេ។

២.តើអ្នកណាជាអ្នកបង្កើតថ្មដ៏ចម្លែកមួយនៅក្នុងសមុទ្រ Yonaguni? នៅឯឆ្នេរសមុទ្រ Yonaguni នៃប្រទេសជប៉ុន គឺមានថ្មចម្លែកមួយត្រូវបានគេរកឃើញនៅឆ្នាំ ១៩៨៦ ដែលបង្កឱ្យមានការចម្រូងចម្រាសជាច្រើនអំពីប្រភពដើមរបស់វា។ ទម្រង់ថ្មនេះមានដុំថ្មភក់ដាក់ជង់កាត់គ្នា សន្លាក់ប៉ារ៉ាឡែល រាងជារង្វង់ជណ្តើរ និងការឆ្លាក់យ៉ាងចម្លែក ដែលនាំឱ្យអ្នកខ្លះជឿថាវាជាសំណល់នៃអរិយធម៌បុរាណដែលបាត់ទៅហើយ។

ទោះជាយ៉ាងណាសាស្ត្រាចារ្យ Masaaki Kimura ជឿជាក់ថា វាជាសំណង់ដែលបង្កើតឡើងដោយមនុស្សកាលពី ១០.០០០ ឆ្នាំមុន ដោយមានលក្ខណៈពិសេសស្រដៀងនឹងទីក្រុងបុរាណ រួមមានពីរ៉ាមីតជំហាន ផ្លូវ និងបណ្តាញទឹក។ ប៉ុន្តែសាស្ត្រាចារ្យ Robert Schoch ជឿជាក់ថា រចនាសម្ព័ន្ធនេះគឺកើតឡើងដោយធម្មជាតិនោះទេ ដែលបង្កើតឡើងដោយការបំបែកថ្មយ៉ាងស្អាតតាមយន្តហោះបញ្ឈរ និងផ្ដេក ហើយចម្លាក់ថ្មគឺជាស្នាមប្រេះធម្មជាតិលើផ្ទៃថ្មភក់។

ដូច្នេះហើយការជជែកវែកញែកអំពីប្រភពដើមនៃថ្ម monolith Yonaguni នៅតែបន្តដោយមានមតិផ្ទុយគ្នាពីអ្នកវិទ្យាសាស្ត្រ។ តើនេះជាសំណល់នៃអរិយធម៌ដែលបាត់បង់ ឬជាការបង្កើតដោយធម្មជាតិ? ចម្លើយនៅតែជាអាថ៌កំបាំង ដោយរង់ចាំការរកឃើញថ្មីៗបន្ថែមទៀត។

៣.តើសំឡេងចម្លែកៗនៅក្នុងសមុទ្រមកពីណា? មហាសមុទ្រជាពិភពដ៏ស្ងប់ស្ងាត់មួយ ប៉ុន្តែរាល់ពេលអ្នកមុជទឹកចុះទៅក្រោមសមុទ្រ ពួកគេតែងតែឮសំឡេងអាថ៌កំបាំងជាច្រើនរាប់មិនអស់ ខណៈអ្នកស្រាវជ្រាវគិតថា ជាសំឡេងសត្វត្រីធំៗ ឬក៏ជាសំឡេងរលក និងការបម្រែបម្រួល អាកាសធាតុផ្សេងៗដូចជាការរលាយផ្ទាំងទឹកកកជាដើម។ ទោះជាយ៉ាងណាសំឡេងដ៏គួរឱ្យខ្លាចទាំងនោះនៅតែជាអាថ៌កំបាំងនៅឡើយនោះទេ ដោយមានមតិចម្រុះផ្សេងៗគ្នា ខណៈអ្នកខ្លះជឿថានៅក្នុងមហាសមុទ្រទំនងមានសត្វចម្លែកៗជាច្រើនដែលយើងមិនដឹង ហើយអ្នកខ្លះទៀតក៏ជឿថា នៅក្នុងមហាមហាសមុទ្រប្រហែលជាមានពពួកអេលានរស់នៅទៀតផង៕

យោងតាមគេហទំព័របរទេស Apple World Today និង Business Today បានចុះផ្សាយកាលពីពេលថ្មីៗនេះថា iPhone ដែលអាចបត់បានដំបូងបង្អស់របស់ Apple ឬហៅថា iPhone Fold ទំនងនឹងចេញលក់នៅចុងឆ្នាំ២០២៦ ឬដើមឆ្នាំ ២០២៧ ជាមួយតម្លៃមិនគួរឱ្យជឿ។

នេះបើតាមអ្នកវិភាគដ៏ល្បីល្បាញនៅក្រុមហ៊ុន TF Securities លោក Ming-Chi Kuo បាននិយាយថា iPhone Fold ដំបូងបង្អស់របស់ Apple គឺមានអេក្រង់ខាងក្រៅ ៥.៥ អ៊ីញ និងអេក្រង់ខាងក្នុងទំហំ ៧.៨ អ៊ីញ ដោយបូកបញ្ចូលជាមួយបច្ចេកវិទ្យាទំនើបៗជាច្រើនទៀត។

ទោះជាយ៉ាងណា បច្ចេកវិទ្យាសុវត្ថិភាព FaceID ដ៏ល្បីល្បាញ មិនត្រូវបានបំពាក់នោះទេ ដោយសារតែមានឧបសគ្គនៅក្នុងលំហ។ យោងតាមអ្នកវិភាគរូបនេះ iPhone Fold ជំនាន់ទី ១ ទំនងនឹងមានតម្លៃចាប់ពី ២,០០០ ទៅ ២,៥០០ ដុល្លារអាមេរិក ដោយមានការរចនាបត់រាងដូចសៀវភៅ បំពាក់ដោយកាមេរ៉ាខាងក្រោយភ្លោះ និងកាមេរ៉ា Selfie ពីរនៅលើអេក្រង់ពីរ។

ទោះបីមិនមានបច្ចេកវិទ្យាសុវត្ថិភាព FaceID ក៏ដោយ ប៉ុន្តែទូរស័ព្ទនេះគឺមានឧបករណ៍ចាប់សញ្ញាស្នាមម្រាមដៃ Touch ID។ យោងតាមអ្នកវិភាគដ៏កំពូល Ming-Chi Kuo ក្រុមហ៊ុនទំនងនឹងបញ្ចប់ការសិក្សាស្រាវជ្រាវពីគម្រោងផលិតស្មាតហ្វូនដែលអាចបត់បាននៅក្នុងត្រីមាសទី ២ នៃឆ្នាំ ២០២៥ ហើយគម្រោងនេះក៏នឹងចាប់ផ្តើមអនុវត្ត ឬក៏ផលិតជាផ្លូវការចាប់ពីត្រីមាសទី ៣ ឆ្នាំ ២០២៥ តទៅ។

ហេតុនេះនៅចុងឆ្នាំ ២០២៦ ឬដើមឆ្នាំ ២០២៧ ក្រុមហ៊ុន Apple ត្រូវបានគេរំពឹងថានឹងដាក់លក់ iPhone Fold ជាផ្លូវការជាមួយតម្លៃចាប់ពី ២ ពាន់ដុល្លារអាមេរិកឡើងទៅ។ ដោយសារចំនួនមានកំណត់ និងភាពស្មុគស្មាញនៃការផលិត iPhone Fold ក៏ត្រូវបានគេជឿថានឹងលក់បានប្រហែលពី ៣ ទៅ ៥ លានគ្រឿងនៅឆ្នាំ ២០២៦ ទោះជាយ៉ាងណា តួលេខនេះក៏អាចនឹងមានការប្រែប្រួលផងដែរ នៅពេលដែលផលិតផលចេញលក់៕

ប្រទេសអូស្ត្រាលី ៖ កាលពីថ្ងៃទី៩ ខែមីនា ឆ្នាំ២០២៥ សារព័ត៌មានបរទេសរាយការណ៍ថា ខ្យល់ព្យុះត្រូពិច Alfred បានបោកបក់គ្របដណ្តប់លើឆ្នេរសមុទ្រភាគខាងកើតប្រទេសអូស្ត្រាលី ដែលបណ្តាលឱ្យតំបន់ឆ្នេរសមុទ្រមានភ្លៀងធ្លាក់ខ្លាំង និងទឹកជំនន់ ។ ពលរដ្ឋម្នាក់បានស្លា.ប់ ដោយសារទឹកជំនន់ និងពលរដ្ឋជាច្រើននាក់ទៀតរងរបួស ហើយនេះចាត់ទុកថា ជាខ្យល់ព្យុះដំបូងដែលបោកបក់មកលើអូស្ត្រាលីខ្លាំងបំផុតក្នុងរយៈពេល៥១ឆ្នាំ ។

ការិយាល័យឧតុនិយមប្រកាសថា ខ្យល់ព្យុះបានបក់មកលើឆ្នេរសមុទ្រ នាល្ងាចថ្ងៃទី៨ ខែមីនា ដែលនៅឆ្ងាយពីទីក្រុងប្រ៊ីសបាន ប្រមាណ៥៥គីឡូម៉ែត្រ ហើយខ្យល់ព្យុះក៏បម្លាស់ទីទៅភាគខាងលិច ព្រមទាំងមានភ្លៀងធ្លាក់ខ្លាំងផងដែរ ។ ហេតុនេះ វាបណ្តាលឱ្យមានទឹកជំនន់ភ្លាមៗ និងកម្ពស់ទឹកទន្លេកើនឡើង ។

កាលពីថ្ងៃទី៨ ខែមីនា សមត្ថកិច្ចបានប្រទះឃើញសាកសពបុរសម្នាក់អាយុ៦១ឆ្នាំ ដែលបាត់ខ្លួនក្នុងទន្លេក្បែរទីក្រុងដារីកូ រដ្ឋញូវសៅវែល ដោយសារបុរសរូបនេះព្យាយាមបើករថយន្តឆ្លងកាត់ទឹកជំនន់ ។ រីឯស្ត្រីម្នាក់ទៀតបានរងរបួសដោយសារការបាក់ដំបូលអាផាតមិន នៅទីក្រុងហ្គលខូស ហើយនាងជាពលរដ្ឋម្នាក់ក្នុងចំណោមពលរដ្ឋ២១នាក់ ដែលអាជ្ញាធរជម្លៀសចេញពីអគារ ។ នេះបើតាមការបញ្ជាក់របស់សមត្ថកិច្ច ។

ខ្យល់ព្យុះបានបណ្តាលឱ្យលំនៅឋានពលរដ្ឋ និងអគារអាជីវកម្ម ជាង៣៣ម៉ឺនកន្លែង នៅរដ្ឋឃ្វីនឡែន ដាច់ចរន្តអគ្គិសនី ហើយវាជាការដាច់ចរន្តអគ្គិសនីទ្រង់ទ្រាយបំផុតក្នុងប្រវត្តិសាស្ត្រអូស្ត្រាលី ។ រីឯរដ្ឋញូវសៅវែល មានអគាររហូតដល់៤ម៉ឺន៥ពាន់កន្លែង គ្មានអគ្គិសនីប្រើប្រាស់កាលពីថ្ងៃទី៨ ខែមីនា ។

ទឹកទន្លេជាច្រើននៅរដ្ឋឃ្វីនឡែន និងរដ្ឋញូវសៅវែល បានហក់ឡើងខ្ពស់ក្រោយភ្លៀងធ្លាក់ខ្លាំងជាប់ៗគ្នាជាច្រើនថ្ងៃ ដែលធ្វើឱ្យអាជ្ញាធរដាស់តឿនឱ្យពលរដ្ឋនៅតែក្នុងលំនៅឋាន និងប្រុងប្រយ័ត្នគ្រោះថ្នាក់ដោយសារខ្យល់ព្យុះ ។ លើសពីនេះ ឥទ្ធិពលខ្យល់ព្យុះបានធ្វើឱ្យមានខ្យល់កន្ត្រាក់ខ្លាំង បាក់បង្គោលភ្លើង និងលិចផ្លូវជាច្រើនកន្លែង ។

នាយករដ្ឋមន្ត្រីអូស្ត្រាលី លោក Anthony Albanese ថ្លែងថា រថយន្តកងទ័ព២គ្រឿង ដែលទៅត្រួតពិនិត្យនៅតំបន់រងគ្រោះដោយសារទឹកជំនន់ បានក្រឡាប់ធ្លាក់ពីផ្លូវនៅទីក្រុងទ្រីហ្គេហ្កល រដ្ឋញូវសៅវែល កាលពីថ្ងៃទី៨ ខែមីនា ដែលបណ្តាលឱ្យកងទ័ពរងរបួស១៣នាក់ ៕

ប្រទេសថៃ ៖ ក្រោយពីមានបញ្ហាមួយចំនួននៅតំបន់ព្រំដែនកម្ពុជា-ថៃ បានធ្វើឱ្យពលរដ្ឋថៃកាត់តវីដេអូជាច្រើនបង្ហោះក្នុងបណ្តាញសង្គម ដើម្បីញុះញ.ង់ បង្កជម្លោះ និងការស្អ.ប់ ជាតិសាសន៍ ។ ហេតុនេះ រដ្ឋមន្ត្រីក្រសួងការពារជាតិថៃ លោក Phumtham Wechayachai បានសំណូមពរទៅកាន់ពលរដ្ឋថៃ និងខ្មែរ សូមកុំចែកចាយវីដេអូទាំងនេះ ពីព្រោះនាំឱ្យពលរដ្ឋទាំងពីរស្អ.ប់ គ្នាទៅវិញទៅមក ហើយវាគ្មានប្រយោជន៍សម្រាប់ប្រទេសទាំងពីរទេ ។

កាលពីថ្ងៃទី៧ ខែមីនា ឆ្នាំ២០២៥ សារព័ត៌មានថៃរាយការណ៍ថា ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃ លោក Phumtham បានលើកឡើងពីស្ថានការណ៍សន្តិសុខរវាងកម្ពុជា និងថៃ នៅប្រាសាទតាមាន់ធំ ថា មេបញ្ជាការកងទ័ពជើងគោកថៃបានរាយការណ៍ស្ថានការណ៍ឱ្យលោកជ្រាបហើយ ។ ថៃពុំបានបង្កើនកម្លាំងទ័ពនៅប្រាសាទតាមាន់ធំទេ គឺថៃគ្រាន់តែត្រៀមកម្លាំងទ័ពដើម្បីការពារអធិបតេយ្យភាពរបស់ខ្លួនប៉ុណ្ណោះ ។ ប៉ុន្តែសូមពលរដ្ឋថៃបញ្ឈប់ទង្វើញុះញង់ក្នុងបណ្តាញសង្គមនាំឱ្យមានការស្អ.ប់ខ្ពើ.មជាតិសាសន៍ ។

លោក Phumtham រដ្ឋមន្ត្រីក្រសួងការពារជាតិនិយាយថា មន្ត្រីកម្ពុជា និងថៃ បានជជែកគ្នាពីបញ្ហាព្រំដែនជានិច្ច បច្ចុប្បន្ន នៅតំបន់ព្រំដែនប្រទេសពីរគ្មានបញ្ហាអ្វីទេ ។ ថៃបានបញ្ឈប់សកម្មភាពនៅតំបន់មានបញ្ហាជាមួយកម្ពុជា ដើម្បីការពារកុំឱ្យបញ្ហារាលដាលកាន់តែខ្លាំងឈានទៅកើតជម្លោះ ។

ចំណែកការបង្ហោះវីដេអូក្នុងបណ្តាញសង្គមរបស់ពលរដ្ឋថៃ ដើម្បីឱ្យមានការស្អប់ខ្ពើមពលរដ្ឋប្រទេសជិតខាង គឺលោក Phumtham បានស្នើទៅកាន់សារព័ត៌មានថៃទាំងអស់ជួយសហការកុំផ្សព្វផ្សាយ ឬចែកចាយវីដេអូក្នុងបណ្តាញសង្គមទាំងនេះ ពីព្រោះប្រទេសកម្ពុជា និងថៃ នៅតែមានទំនាក់ទំនងល្អជាមួយគ្នា ។ ទង្វើណាមួយដែលធ្វើឱ្យកើតបញ្ហា និងប៉ះពាល់ដល់ទំនាក់ទំនងរវាងប្រទេសទាំងពីរ សូមឱ្យកម្ពុជា និងថៃ ជួយគ្នាទប់ស្កាត់ទង្វើទាំងនោះ ដើម្បីកុំឱ្យបញ្ហារាលដាលកាន់តែខ្លាំង ។

គួរបញ្ជាក់ថា តាំងពីហេតុការណ៍កងទ័ពថៃហាមឃាត់ពលរដ្ឋខ្មែរ មិនឱ្យច្រៀងចម្រៀងជាតិនៅប្រាសាទតាមាន់ធំ ស្ថិតលើភ្នំដងរែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ បានធ្វើឱ្យអ្នកប្រើប្រាស់បណ្តាញសង្គមថៃកាត់តវីដេអូជាច្រើនបង្ហោះក្នុងបណ្តាញសង្គម ជាពិសេស TikTok ដើម្បីញុះញង់ឱ្យពលរដ្ឋថៃស្អប់ពលរដ្ឋប្រទេសជិតខាង ។ ជាក់ស្តែង វីដេអូក្នុង TikTok ថៃខ្លះបង្ហោះតែរឿងអវិជ្ជមានថា ពុំរាប់ញាតិជាមួយកម្ពុជា ហើយសូម្បីតែថៃគ្នាឯង ក៏ពុំគាំទ្រវីដេអូទាំងនេះដែរ ៕