ប្រិយមិត្តមួយចំនួនជ្រាបមកហើយថាលោកស្រី ទ្រី ដាណា រងនូវសម្ពាធផ្លូវចិត្តខ្លាំងក្រោយគេនិយាយថាមិនជួយបងប្អូន បានធ្វើឱ្យអ្នកជំនួញរូបនេះគិតចង់បញ្ចប់ជីវិត។ ការព្រលយពាក្យថា ចង់ស្លាប់ លោក ផែង វណ្ណៈ បានឱ្យជម្រើសពីរទៅកាន់លោកស្រី ទ្រី ដាណា រត់ចូលឡានឬចងក ខណៈរឿងកាន់តែក្តៅដោយលោកស្រី ទ្រី ដាណា ស្វែងរកមន្ទីរពេទ្យទុកសម្រាប់បរិច្ចាគសរីរាង្គ។
ថ្មីនេះលោកស្រី ទ្រី ដាណា បានបង្ហោះពាក្យថា ចង់ស្លាប់ ខណៈលោក ផែង វណ្ណៈ បានសរសេរនៅលើបណ្តាញសង្គមរបស់ខ្លួនដែលមានគណនី PVN News ថា «សូមជម្រាបជូនប្អូនស្រី ទ្រី ដាណា បើប្អូនចង់ស្លាប់អាចចងកឬអាចរត់ចូលឡានបានតែកុំមកដ្រាម៉ាតាមហ្វេកប៊ុកសុំក្តីមេត្តាពីមហាជន»។ ការបង្ហោះរបស់លោកផែង វណ្ណៈ មានមនុស្សជាច្រើនបានរិះគន់ចំពោះទង្វើរបស់លោក ស្របពេលលោកស្រី ទ្រី ដាណា ទទួលបាននៅការដឹងឮពីជម្រើសនេះនិងបានអរគុណទៅកាន់លោក ផែង វណ្ណៈ។
អ្វីដែលកាន់តែធ្វើឱ្យបណ្តាញសង្គមរំជើបរំជួលលោកស្រី ទ្រី ដាណា ស្រាប់តែប្រកាសសួររកមន្ទីរពេទ្យដើម្បីទុកបរិច្ចាគសរីរាង្គរបស់ខ្លួនក្រោយពេលស្លាប់ដើម្បីទុកជាប្រយោជន៍។ នៅរសៀលថ្ងៃទី១១ មីនា លោកស្រី ទ្រី ដាណា បានសំណេរយ៉ាងដូច្នេះថា «បងប្អូនមានស្គាល់ពេទ្យណាមានទទួល បរិច្ចាគសេរីរាង្គទេខ្ញុំចង់បរិច្ចាគសេរីរាង្គរបស់ខ្ញុំជូន
ដោយសារបើសិនជាខ្ញុំធ្វើការសម្លាប់ខ្លួនតាមដែរលោកពូផែងវណ្ណៈណែនាំ ខ្ញុំគិតថាមិនមានប្រយោជន៍អ្វីដល់សង្គមទេដូច្នេះខ្ញុំចង់ឱ្យការស្លាប់របស់ខ្ញុំមានប្រយោជន៍ចំពោះបងប្អូនខ្មែររបស់យើងដោយកន្លងមកខ្ញុំបានលះបង់ច្រើនចំពោះសង្គមមួយនេះ»។
ថៅកែពេជ្ររូបនេះបានបន្តទៀតថា«ទោះខ្ញុំមិនទទួលបានការសរសើរនិងលើកទឹកចិត្តពីអ្នកណាក៏ដោយប៉ុន្តែខ្ញុំនៅតែបន្តធ្វើគ្រប់សកម្មភាព មិនថាចុះផ្ទាល់ឬតាមបុគ្គលិកទេ ប៉ុន្តែពេលនេះគឺខ្ញុំទៅមុខលែងរួចហើយ។ ខ្ញុំបាក់ទឹកចិត្តជាខ្លាំង ដោយហេតុថាខ្ញុំលែងមានតម្លៃចំពោះបងប្អូនខ្មែរទៀតហើយ ខ្ញុំធ្វើអ្វីក៏ខ្ញុំខុស ខ្ញុំមិនបានធ្វើក៏ខ្ញុំខុស ដូចនេះផែនដីនេះលែងត្រូវការ ឈ្មោះទ្រីដាណាទៀតហើយខ្ញុំសុំជ្រើសរើសយកសេចក្តីស្លាប់ ប៉ុន្តែខ្ញុំ សុំស្លាប់ឱ្យមានន័យនឹងសុំស្លាប់ដោយការបូជាចំពោះបងប្អូនខ្មែរ។ កែវភ្នែក ថ្លើមក្រលៀន ក្រពះពោះវៀន សេរីរាង្គកន្លែងណាដែលនៅល្អខ្ញុំនឹងបរិច្ចាគឱ្យបងប្អូនដែលគាត់កំពុងតែត្រូវការ»។ លោកស្រី បានបញ្ជាក់យ៉ាងច្បាស់ថា «តាមពិតខ្ញុំមិនចង់ផុសទេប៉ុន្តែដោយសារខ្ញុំសួរទៅខាងគ្រូពេទ្យប៉ុន្មាននាក់ដែរហើយនិងអ្នកដែលនៅជុំវិញខ្លួនខ្ញុំគ្មានអ្នកណាគេប្រាប់ខ្ញុំថាកន្លែងណាដែលមានបរិច្ចាគទេ។ខ្ញុំចង់ដឹងថានៅស្រុកខ្មែរនេះមានដែរឬទេ។ខ្ញុំចង់ បរិច្ចាគជូន»។
គួរឱ្យដឹងថា សំណេររបស់លោក ផែង វណ្ណៈ ប្រាប់ជម្រើសឱ្យលោកស្រី ទ្រី ដាណា ស្លាប់នោះគឺមិនឃើញការបង្ហោះនោះជាសាធារណៈទៀតនោះទេប៉ុន្តែលោកបានបង្ហោះនៅលើបណ្តាញសង្គមផ្សេងទៀតជុំវិញរឿងលោកនិងលោកស្រី ទ្រី ដាណា៕
