ប្រទេសថៃ ៖ បន្ទាប់ពីមានបញ្ហារកាំរកូសនៅតាមតំបន់ព្រំដែនកម្ពុជា ឡាវ និងមីយ៉ាន់ម៉ា កងទ័ពថៃបានរឹតបន្តឹង និងបង្កើនកម្លាំងទ័ពច្រើនខុសធម្មតា ដើម្បីការពារសុវត្ថិភាពការចេញ-ចូលនៅតំបន់ព្រំដែនថៃជាប់ប្រទេសទាំង៣ ។ ក្រៅពីនេះ កងទ័ពថៃបានដឹកជញ្ជូនសម្ភារៈទៅចែកឱ្យកងទ័ពរបស់ខ្លួន ដែលឈរជើងនៅព្រំដែនដើម្បីផ្តល់កម្លាំងចិត្ត ។

កាលពីថ្ងៃទី២ ខែមីនា ឆ្នាំ២០២៥ សារព័ត៌មានថៃរាយការណ៍ថា ប្រទេសថៃបានបង្កើនកម្លាំងកងទ័ពស៊ុរ៉ាណារី (Suranaree) ទៅការពារនៅព្រំដែនជាប់ឡាវ ក្រោយពីទទួលដំណឹងថា មានការរំលោ.ភ អធិបតេយ្យភាពថៃ ស្របពេលថៃកំពុងមានបញ្ហាព្រំដែនជាមួយមីយ៉ាន់ម៉ាជាបន្តបន្ទាប់ ជាពិសេស នៅខេត្តតាក គឺកងទ័ពមីយ៉ាន់ម៉ា តែងតែល្មើសចូលទឹកដីថៃ ។

ចំណែកនៅតំបន់ព្រំដែនថៃជាប់ឡាវវិញ ក៏មានបញ្ហាដែរ នាពេលថ្មីៗនេះ កងទ័ពថៃបានសង្កេតឃើញការលួចនាំចូលសម្ភារៈខុសច្បាប់ និងថ្នាំញៀនជាច្រើនចូលមកទឹកដីថៃ ដោយសារជនខិលខូចឃើញថៃសម្រុកបញ្ជូនកម្លាំងទ័ពយ៉ាងច្រើនទៅការពារនៅព្រំដែនមីយ៉ាន់ម៉ា ។ ដូច្នេះ ថៃក៏បង្កើនកម្លាំងកងទ័ព (Suranaree) មកកាន់ព្រំដែនឡាវយ៉ាងច្រើនខុសធម្មតា ដើម្បីទប់ស្កាត់ទង្វើខុសច្បាប់របស់ក្រុមជនខិលខូច និងការរំលោភអធិបតេយ្យភាពថៃ នៅស្រុកណាមយឺន ខេត្តឧប៊ុនរ៉ាជថានី ។

ក្រៅពីនេះ កងទ័ព Suranaree ក៏បានប្រគល់សម្ភារៈមួយចំនួនទៅឱ្យកងទ័ពថៃដែលឈរជើងនៅតំបន់ព្រំដែនជាប់ឡាវ ដើម្បីជារង្វាន់ និងផ្តល់កម្លាំងចិត្តឱ្យកងទ័ពប្រឹងប្រែងបំពេញតួនាទីការពារព្រំដែន ។

នៅថ្ងៃដដែល (ថ្ងៃទី២ ខែមីនា) កងទ័ពថៃ Suranaree ក៏បានសហការជាមួយទាហានឈុតខ្មៅថៃ ចុះត្រួតពិនិត្យស្ថានការណ៍នៅតាមព្រំដែននៅស្រុកភ្នំដងរែក ខេត្តសុរិន្ទ ជាប់ប្រទេសកម្ពុជាផងដែរ ក្រោយពីកើតហេតុការណ៍កងទ័ពថៃហាមពលរដ្ឋខ្មែរច្រៀងចម្រៀងជាតិនៅប្រាសាទតាមាន់ធំ ។

ពលរដ្ឋថៃបានផ្តល់កម្លាំងចិត្តដល់កងទ័ពគ្រប់រូបឱ្យចៀសផុតពីគ្រោះថ្នាក់ និងការពារទឹកដីនៅជាប់ព្រំដែនប្រទេសទាំង៣ កុំឱ្យបាត់បង់ គឺនៅជាប់មីយ៉ាន់ម៉ា ឡាវ និងកម្ពុជា ។

ពលរដ្ឋថៃខ្លះបានទម្លាក់កំហុសទៅលើរដ្ឋាភិបាលថា ពុំធ្វើរបងការពារនៅតំបន់ព្រំដែនជាប់មីយ៉ាន់ម៉ា ឡាវ និងកម្ពុជា និងកំណត់ខ្សែបន្ទាត់ព្រំដែនឱ្យច្បាស់លាស់ ពីព្រោះបច្ចុប្បន្ន បណ្តាប្រទេសជិតខាងរបស់ថៃតែងតែឆ្លៀតឱកាស ដោយសារឃើញមេដឹកនាំថៃទន់ជ្រាយ ហើយសូម្បីតែឡាវ ក៏លែងញញើតថៃ ។

នៅខែមីនានេះ ពលរដ្ឋឡាវជាច្រើនបានលួចឆ្លងដែនមកទឹកដីថៃតាមច្រកធម្មជាតិ ហើយបើគ្មានកងទ័ពថៃយាមល្បាតទេនោះ គឺពលរដ្ឋឡាវកាន់តែឆ្លងដែនខុសច្បាប់ច្រើនឡើងៗ ជាពិសេស នៅខេត្តជាប់ព្រំដែន គឺឧប៊ុនរ៉ាជថានី ។ នេះបើតាមការលើកឡើងរបស់ពលរដ្ឋថៃក្នុងបណ្តាញសង្គម ៕

ប្រទេសថៃ ៖ កាលពីថ្ងៃទី២៦ ខែកុម្ភៈ ឆ្នាំ២០២៥ ក្រុមហ៊ុនជប៉ុនវិនិយោគនៅប្រទេសថៃ Mitsubishi Motors ប្រកាសថា ក្រុមហ៊ុននឹងផ្តល់ប្រាក់សំណងចំនួន៤០ខែ ទៅឱ្យបុគ្គលិកណាដែលស្ម័គ្រចិត្តលាឈប់ពីការងារដោយពុំចាំបាច់បណ្តេញចេញ ដោយសារក្រុមហ៊ុនមានបញ្ហាផ្នែកហិរញ្ញវត្ថុ ។ ក្រោយពីក្រុមហ៊ុនប្រកាសរួចមក គឺមានបុគ្គលិករហូតដល់៤០០នាក់ បានដាក់ពាក្យលាឈប់ ។

អ្នកតំណាងក្រុមហ៊ុន Mitsubishi ឱ្យដឹងថា ក្រមហ៊ុនមានគម្រោងឱ្យបុគ្គលិកឈប់ពីការងារដោយស្ម័គ្រចិត្តមុនពេលចូលនិវត្តន៍ ដើម្បីឱ្យបុគ្គលិកធ្វើការនៅការិយាល័យ, ធ្វើការនៅស្នាក់ការធំ និងបុគ្គលិកផ្នែកផលិតចូលរួមក្នុងគម្រោងនេះ ឬបុគ្គលិកដែលចង់ផ្លាស់ប្តូរការងារ ហើយត្រូវការដើមទុនរកស៊ី ឬប្រកបមុខរបរផ្សេង ។ បច្ចុប្បន្ន បុគ្គលិកចំនួន៤០០នាក់ បានស្ម័គ្រចិត្តលាឈប់ពីការងារ ខណៈក្រុមហ៊ុនមានបុគ្គលិកសរុបនៅប្រទេសថៃ ចំនួន៥,២០០នាក់ ។

មូលហេតុដែលក្រុមហ៊ុនបង្កើតគម្រោងផ្តល់ប្រាក់សំណងឱ្យបុគ្គលិកស្ម័គ្រចិត្តលាឈប់ពីការងារ គឺដោយសារមានបញ្ហាផ្នែកហិរញ្ញវត្ថុ ហើយក្រុមហ៊ុនត្រូវធ្វើកំណែទម្រង់ដើម្បីបង្កើនប្រសិទ្ធភាពការងារឱ្យស្របនឹងស្ថានការណ៍ហិរញ្ញវត្ថុ ព្រមទាំងបង្កើតគ្រឹះរឹងមាំសម្រាប់ការរីកចម្រើនរបស់ក្រុមហ៊ុន នាថ្ងៃអនាគត ។ ហេតុនេះ ក្រុមហ៊ុនក៏ប្រកាសឱ្យបុគ្គលិកលាឈប់ដោយខ្លួនឯង ដើម្បីឱ្យពួកគេមានឱកាសផ្លាស់ប្តូរការងារ ។ នេះជាការផ្តល់ប្រាក់សំណងឱ្យបុគ្គលិកច្រើនបំផុត បើធៀបនឹងពេលកន្លងមក ។

បុគ្គលិកអាចលាឈប់ពីការងារ និងគ្មានការដាក់សម្ពាធពីក្រុមហ៊ុន ។ ក្រុមហ៊ុន Mitsubishi នៅតែរក្សាគុណភាពផ្នែកផលិត និងសេវាកម្មទាំងអស់ដើម្បីបំពេញតម្រូវការអតិថិជននៅប្រទេសថៃ ។ កាលពីថ្ងៃទី១៣ ខែឧសភា ឆ្នាំ២០២០ ក្រុមហ៊ុនក៏បានប្រកាសឱ្យបុគ្គលិកលាឈប់ពីការងារដែរ ដោយសារផលប៉ះពាល់ពីជំងឺកូវីដ-១៩ ដែលធ្វើឱ្យការលក់រថយន្តធ្លាក់ចុះ ពេលនោះ ក្រុមហ៊ុនបានផ្តល់ប្រាក់សំណងឱ្យបុគ្គលិកលាឈប់ ចាប់ពី៨ខែ ទៅ៣៥ខែ ។ ប៉ុន្តែនៅឆ្នាំ២០២៥ ក្រុមហ៊ុនផ្តល់ប្រាក់សំណងឱ្យបុគ្គលិករហូតដល់៤០ខែ ។

ដោយឡែក ក្រុមហ៊ុនផ្សេងៗក៏បានប្រកាសឱ្យបុគ្គលិកស្ម័គ្រចិត្តលាឈប់ដែរ ដើម្បីកាត់បន្ថយការចំណាយដើមទុន និងបង្កើនប្រសិទ្ធភាពការងារ ស្របពេលឧស្សាហកម្មផលិតរថយន្តធ្លាក់ចុះ ព្រមទាំងមានរថយន្តចិនប្រកួតលើទីផ្សារច្រើន ៕

ការងារជាប្រភពចំណូលដ៏សំខាន់សម្រាប់មនុស្សគ្រប់គ្នា។ មានការងាររាប់ពាន់ប្រភេទនៅក្នុងពិភពលោកដែលមនុស្សយើងបានធ្វើ ខណៈពេលដែលការងារជាច្រើនផ្តល់នូវស្ថេរភាព និងសន្តិសុខ ក្នុងនោះការងារមូយចំនួនគឺមានគ្រោះថ្នាក់ខ្លាំង ដែលទាមទារឲ្យអ្នកមានជំនាញ ភាពក្លាហាន និងការប្រុងប្រយ័ត្នខ្ពស់។ ខាងក្រោមនេះជាការងារដែលគ្រោះថ្នាក់បំផុតមួយចំនួនរបស់ពិភពលោក និងអត្រានៃអ្នកស្លាប់ដែលអ្នកមិនធ្លាប់ដឹង

១ កម្មករកាប់ឈើ៖ ការកាប់ឈើត្រូវបានចាត់ទុកថាជាការងារដែលប្រថុយប្រថានបំផុតនៅអាមេរិក ដោយសារតែការរួមផ្សំគ្នានៃសម្ភារៈធុនធ្ងន់ ការដួលរលំដើមឈើ និងលក្ខខណ្ឌធម្មជាតិដែលមិនអាចទាយទុកជាមុនបាន។ កម្មករកាប់ឈើមានអត្រាស្លាប់៩៨,៩នាក់ក្នុងចំណោមកម្មករ១០ម៉ឺននាក់។

២ អ្នកនេសាទពានិជ្ជកម្ម៖ អ្នកនេសាទពាណិជ្ជកម្មប្រឈមមុខនឹងហានិភ័យនៃការលង់ទឹក ជាប់ក្នុងឧបករណ៍នេសាទ ឬរងរបួសដោយសារឧបករណ៍ធ្ងន់។ ធម្មជាតិដែលមិនអាចទាយទុកជាមុនបាននៃសមុទ្រក៏ជាកត្តាដែលនាំឲ្យគ្រោះថ្នាក់ដែរ។ កម្មករនេសាទមានអត្រាស្លាប់ ៨៦.៩២ នាក់ក្នុង ចំណោមកម្មករ ១០០.០០០ នាក់

៣ អ្នកបើកយន្តហោះ និងវិស្វករហោះហើរ ខណៈពេលដែលការធ្វើដំណើរតាមផ្លូវអាកាសជាទូទៅត្រូវបានចាត់ទុកថាមានសុវត្ថិភាពសម្រាប់អ្នកដំណើរ វាមិនដូចគ្នាសម្រាប់អ្នកដែលដំណើរការយន្តហោះនោះទេ។ អ្នកបើកយន្តហោះ និងវិស្វករហោះហើរ ប្រឈមមុខនឹងគ្រោះថ្នាក់ដែលអាចកើតមាន ដូចជាការខុសបច្ចេកទេសឧបករណ៍ អាកាសធាតុមិនល្អ និងការប៉ះទង្គិចគ្នានៅកណ្តាលអាកា យោងតាមអង្គការពលកម្មអន្តរជាតិ (ILO) អត្រាមរណភាពសម្រាប់អ្នកបើកយន្តហោះ និងវិស្វករហោះហើរគឺប្រហែល 58.4 នាក់ក្នុងចំណោមកម្មករ 100,000 នាក់។

៤ អ្នកជុសជុលដំបូល៖ កម្មករជុសជុលដំបូលធ្វើការនៅទីខ្ពស់ ជារឿយៗនៅលើផ្ទៃចោត ឬរអិល។ ហានិភ័យដ៏សំខាន់បំផុតសម្រាប់អ្នកដំបូលផ្ទះគឺការធ្លាក់ពីលើដំបូល ដែលអាចបណ្តាលឱ្យមានរបួសធ្ងន់ធ្ងរ ឬស្លាប់។ ការងារនេះមានអត្រាស្លាប់ 51.8 នាក់ក្នុងចំណោមកម្មករ 100,000 នាក់។

៥ កម្មកររុករករ៉ែ៖ ដោយចូលទៅក្នុងស្រទាប់ជ្រៅនៃផែនដី អ្នករុករករ៉ែបានទាញយករ៉ែដ៏មានតម្លៃ និងធនធានដែលចាំបាច់សម្រាប់សង្គមសម័យទំនើប។ ទោះជាយ៉ាងណាក៏ដោយ ការងាររបស់ពួកគេគឺមានគ្រោះថ្នាក់ ដោយសារពួកគេប្រឈមនឹងការជីករូងក្រោមដី ការផ្ទុះ និងឧស្ម័នពុល។ ការប៉ះពាល់នឹងធូលី និងសារធាតុពុលផ្សេងៗក្នុងខ្យល់រយៈពេលយូរក៏អាចនាំអោយមានស្ថានភាពផ្លូវដង្ហើមរ៉ាំរ៉ៃផងដែរ។ អត្រាមរណភាពនៃការងារនេះប្រមាណ 25.7 នាក់ក្នុងចំណោមកម្មករ 100,000 នាក់។

៦ កម្មករប្រមូលសំរាម៖ បុគ្គលិកអនាម័យ ដែលគេស្គាល់ថាជាអ្នកប្រមូលសំរាម ប្រឈមមុខនឹងហានិភ័យពីការធ្លាក់ពីឡាន បុកដោយយានជំនិះ គ្រោះថ្នាក់ជាមួយគ្រឿងចក្រ ឬបញ្ហា ផ្សេងៗដែលប៉ះពាល់ចំពោះសុខភាពដោយសារតែការស្រូបយកខ្លិនមិនល្អ។ ពួកគេមានអត្រាមរណភាពខ្ពស់បំផុតក្នុងចំណោមការងារនៅអាមេរិក៕

ប្រទេសថៃ ៖ កាលពីថ្ងៃទី២៧ ខែកុម្ភៈ ឆ្នាំ២០២៥ សារព័ត៌មានថៃរាយការណ៍ថា លោក ផើមភូន ឈិតឆប រដ្ឋមន្ត្រីក្រសួងអប់រំបានលើកឡើងពីនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បញ្ជាឱ្យមន្ត្រីស្ថាប័នពាក់ព័ន្ធសហការគ្នាបង្ក្រា.ប និងដោះស្រាយបញ្ហាបារីអេឡិចត្រូនិកដែលកំពុងកើនឡើងខ្លាំងនៅប្រទេសថៃ ជាពិសេស ក្នុងសាលារៀន ព្រមទាំងផ្តល់អំណាចឱ្យគ្រូបង្រៀនមានសិទ្ធិចា.ប់បារីអេឡិចត្រូនិកពីកូនសិស្សជំនួសសមត្ថកិច្ច ។

លោកស្រីនាយករដ្ឋមន្ត្រីថៃបានណែនាំឱ្យសាលារៀនទាំងអស់កំណត់វិធានការតឹងរ៉ឹងទប់ស្កាត់បារីអេឡិចត្រូនិក ដើម្បីឱ្យសាលារៀនក្លាយជាកន្លែងមានសុវត្ថិភាព ។ ក្រៅពីនេះ ត្រូវត្រួតពិនិត្យកន្លែងលក់ដូរនៅជុំវិញសាលារៀនផងដែរ ដោយទំនាក់ទំនងជាមួយអាជ្ញាធរក្នុងតំបន់ចុះមកត្រួតពិនិត្យកន្លែងលក់ដូរថា តើការលក់ដូរទំនិញផ្សេងៗប៉ះពាល់ដល់កូនសិស្សដែរឬទេ?

ក្រសួងអប់រំបានចេញសេចក្តីប្រកាសទៅសាលារៀនទាំងអស់ឱ្យកំណត់វិធានការតឹងរ៉ឹង និងហាមកូនសិស្សប្រើប្រាស់បារីអេឡិចត្រូនិក ។ ក្រសួងអប់រំនឹងចាត់ទុកថា នាយកសាលា និងថ្នាក់គ្រប់គ្រងសាលាមានទោសកំហុស បើបណ្តោយឱ្យកូនសិស្សប្រើប្រាស់បារីអេឡិចត្រូនិកក្នុងបរិវេណសាលា ។

បច្ចុប្បន្ន ក្រសួងអប់រំកំពុងរង់ចាំនាយកដ្ឋានពាណិជ្ជកម្មអន្តរជាតិ និងក្រសួងពាណិជ្ជកម្មធ្វើវិសោធនកម្មបទប្បញ្ញត្តិពាក់ព័ន្ធនឹងសេចក្តីប្រកាសកាលពីឆ្នាំ២០១៤ ដែលកំណត់ឱ្យបារីអេឡិចត្រូនិក គឺជាទំនិញហាមនាំចូលប្រទេសថៃ ។ ក្រោយពេលធ្វើវិសោធនកម្មបទប្បញ្ញត្តិក្នុងសេចក្តីប្រកាសរួច នាយកសាលា និងគ្រូបង្រៀននឹងមានសិទ្ធិចាប់បារីអេឡិចត្រូនិកពីកូនសិស្សជំនួសសមត្ថកិច្ច ហើយសិទ្ធិនេះអនុវត្តបានតែក្នុងបរិវេណសាលាប៉ុណ្ណោះ ។

កន្លងមក សាលារៀនគ្រាន់តែរឹតបន្តឹង និងតាស់តឿនកូនសិស្សកុំឱ្យប្រើប្រាស់បារីអេឡិចត្រូនិក ហើយបើគ្រូបង្រៀនចាប់បារីអេឡិចត្រូនិកពីកូនសិស្ស គឺគ្រូនឹងខុសច្បាប់ ។ ហេតុនេះ ក្រសួងអប់រំនឹងរង់ចាំឱ្យក្រសួងពាណិជ្ជកម្មចាត់ការរឿងនេះសិន ហើយក្រសួងអប់រំសង្ឃឹមថា ចាប់ពីពេលនេះ សាលារៀននីមួយៗនឹងអាចបង្ក្រាបបារីអេឡិចត្រូនិកយ៉ាងមានប្រសិទ្ធភាព ។

ក្រសួងអប់រំពុំចង់ឱ្យកម្លាំងសមត្ថកិច្ចចូលមកចាប់កូនសិស្សដែលប្រើប្រាស់បារីអេឡិចត្រូនិកក្នុងសាលាទេ ពីព្រោះវាពុំចាំបាច់ ។ បើគ្រូបង្រៀនមានអំណាចចាប់បារីអេឡិចត្រូនិកពីកូនសិស្ស គឺចាត់ទុកថា វាជាតួនាទីរបស់គ្រូបង្រៀន ដែលធ្វើការជាអ្នកអប់រំ ប្រៀនប្រដៅសិស្ស ។ នេះបើតាមការលើកឡើងរបស់លោក ផើមភូន ឈិតឆប រដ្ឋមន្ត្រីក្រសួងអប់រំ ៕