អ្នកគាំទ្រជាច្រើនទាំងអ្នកមានគូនិងអ្នកមិនទាន់មានគូគឺមានការចាប់អារម្មណ៍យ៉ាងខ្លាំងចំពោះបទចម្រៀងមួយបទពីតារាចម្រៀង All3rgy – អលជ្ជី សមាជិកក្រុម La Cima និងព្រះនាងតូច នរោត្តម ជេនណា ក្នុងកម្មវិធីរបស់ព្រះអង្គម្ចាស់ក្សត្រី នរោត្តម ពង្សសូរិយា។
នៅថ្ងៃទី២៨ កុម្ភៈ តារាចម្រៀង All3rgy – អលជ្ជី បានទម្លាក់វីដេអូចម្រៀងមួយជាមួយនឹងខេបសិនថា «ទូលព្រះបង្គំមានកិត្តិយសណាស់ដែលបានចូលរួមសម្តែងជាមួយនឹង ព្រះនាង នរោត្តម ជេនណា»។ ដ្បិតថាបទនេះពុំទាន់ទម្លាក់ពេញបទក្តីប៉ុន្តែទទួលបានការចាប់អារម្មណ៍យ៉ាងខ្លាំងពីទស្សនិកជនបន្ទាប់ពីម្ចាស់បទ «ផ្កាស្លា» ដែលរៀបរាប់ពីអត្ថន័យស្នេហាផ្អែមល្ហែមទៅកាន់ដៃគូជីវិត។
ក្នុងអត្ថន័យចម្រៀងដែលមិនទាន់ដឹងពីចំណងជើងនេះបានបង្ហាញពីសាច់រឿងរបស់មនុស្សប្រុសមិនទាន់ជួបគូជាមនុស្សខិលខូចតែក្រោយមកបានផ្លាស់ប្តូរគំនិតនិងមានបំណងចង់ចាប់ដៃគូស្នេហាចុះអេតាស៊ីវិលជាមួយគ្នាដោយមានចាស់ទុំដឹងឮ។ ប៉ារ៉ូលចម្រៀងរបស់ ព្រះនាង ជេនណា វិញគឺបានរៀបរាប់ពីស្នេហាធំធេង។
វីដេអូខ្លីមួយនេះទទួលបានការចាប់អារម្មណ៍យ៉ាងខ្លាំងពីទស្សនិកជនទាំងប្រុសទាំងស្រីស្តាប់បទនេះហើយជីវិតស្នេហាពោរពេញដោយពណ៌ស៊ីជម្ពូរសូម្បីតែអ្នកមិនទាន់មានគូក៏រំជើបរំជួលជាមួយបទអ្នកទាំងពីរផងដែរ។ គួរឱ្យដឹងថា បទដែល All3rgy – អលជ្ជី និង ព្រះនាងតូច ជេនណា សហការជាមួយគ្នានេះគឺបានបង្ហាញក្នុងកម្មវិធី Proposal Engagement បុត្រីសម្ដេចក្រុមព្រះ ព្រះអង្គម្ចាស់ក្សត្រី នរោត្តម ពង្សសូរិយា ។
គួរឱ្យដឹងថាមុននឹងការសហការចេញបទចម្រៀងផ្អែមល្ហែមនេះ All3rgy – អលជ្ជី និងព្រះនាង ជេនណា ធ្លាប់សម្តែងជាមួយគ្នាក្នុងបទ «ស្នេហាកីឡាជាតិ» រួមជាមួយតារាចម្រៀង ឆន សុវណ្ណារាជ ក្នុងពិធីបើកការប្រកួតកីឡាជាតិលើកទី៤ និងកីឡាជាតិជនពិការលើកទី២កាលពីខែតុលា ឆ្នាំ២០២៤មកនេះ៕
