ប្រទេសជប៉ុន ៖ បច្ចុប្បន្ន ប្រទេសជប៉ុនប្រឈមនឹងបញ្ហាខ្វះខាតកម្លាំងពលកម្មយ៉ាងខ្លាំង គឺខ្វះទាំងបុគ្គលិកធ្វើការពេញម៉ោង និងក្រៅម៉ោង ដែលអាចធ្វើឱ្យក្រុមហ៊ុនជាច្រើនដួលរលំ ។ តាមទិន្នន័យការស្ទង់មតិក្រុមហ៊ុនជប៉ុនចំនួន១១,០០០កន្លែង កាលពីខែមករា ឆ្នាំ២០២៥ បង្ហាញថា ក្រុមហ៊ុនជប៉ុនជាងពាក់កណ្តាល ឬប្រមាណ៥៣.៤% ចង់បានបុគ្គលិកធ្វើការពេញម៉ោង ។

តាំងពីខែមេសា ឆ្នាំ២០២០ ក្រុមហ៊ុននានាត្រូវការបុគ្គលិកធ្វើការពេញម៉ោងច្រើនបំផុត ដែលតម្រូវការបុគ្គលិកយ៉ាងច្រើននេះ គឺប្រហាក់ប្រហែលនឹងខែវិច្ឆិកា ឆ្នាំ២០១៨ ជាពេលដែលជប៉ុនត្រូវការបុគ្គលិកច្រើនបំផុត រហូតដល់៥៣.៩% ។ រីឯផ្នែកខ្វះខាតបុគ្គលិកធ្វើការពេញម៉ោងច្រើន គឺផ្នែកសេវាកម្មព័ត៌មាន ខ្វះខាតវិស្វករ បន្ទាប់មក ផ្នែកសាងសង់ ។

ជប៉ុនមិនត្រឹមតែខ្វះខាតបុគ្គលិកធ្វើការពេញម៉ោងប៉ុណ្ណោះទេ ប៉ុន្តែជប៉ុនក៏ខ្វះខាតបុគ្គលិកធ្វើការក្រៅម៉ោងផងដែរ ។ តាមលទ្ធផលការស្ទង់មតិបង្ហាញថា ក្រុមហ៊ុនជប៉ុនខ្វះខាតបុគ្គលិកធ្វើការក្រៅម៉ោង ប្រមាណ៣០.៦% ហើយនៅតាមភោជនីយដ្ឋានខ្វះខាតបុគ្គលិកក្រៅម៉ោងច្រើនជាងគេ ។

ក្រុមហ៊ុនមួយចំនួនបានដោះស្រាយបញ្ហានេះ ដោយការជួលបុគ្គលិកពីក្រៅប្រទេសមកធ្វើការកាន់តែច្រើន ។ តាមទិន្នន័យក្រសួងការងារជប៉ុន គឺនៅខែតុលា ឆ្នាំ២០២៤ ក្រុមហ៊ុនជប៉ុនបានជួលជនបរទេសមកធ្វើការ ចំនួន២លាន៣សែននាក់ កើនឡើង១២.៤% បើធៀបនឹងរយៈពេលដូចគ្នាក្នុងឆ្នាំ២០២៣ ហើយក្រុមហ៊ុនចំនួន៣៤ម៉ឺន២ពាន់កន្លែង បានជួលបុគ្គលិកបរទេស យ៉ាងហោចណាស់ម្នាក់ ។

កត្តាមួយទៀតធ្វើឱ្យជប៉ុនខ្វះខាតកម្លាំងពលកម្មខ្លាំង គឺដោយសារជប៉ុនសម្បូរពលរដ្ឋអាយុច្រើន ទើបជប៉ុនត្រូវការកម្លាំងពលកម្មបរទេសរហូតដល់ជាង៦លាននាក់ នៅឆ្នាំ២០៤០ ដើម្បីសម្រេចគោលដៅការរីកចម្រើនសេដ្ឋកិច្ច ។ សេដ្ឋវិទូសួរថា តើក្រុមហ៊ុននានានឹងឆ្លើយតបតាមការស្នើសុំរបស់សហជីពការងារដូចម្តេច ដែលចង់ឱ្យក្រុមហ៊ុនដំឡើងប្រាក់ខែបុគ្គលិក ក្រោយពីសហជីពការងារបានពិភាក្សាជាមួយក្រុមហ៊ុននានារឿងការដំឡើងប្រាក់ខែបុគ្គលិក នាពេលថ្មីៗនេះ ។

ក្រុមហ៊ុនប្រមាណ៦៨.១% ដែលកំពុងខ្វះខាតបុគ្គលិក មានគម្រោងដំឡើងប្រាក់ខែឱ្យបុគ្គលិក ចាប់ពីខែមេសា ឆ្នាំ២០២៥ តទៅ ។ ប៉ុន្តែបញ្ហាខ្វះខាតបុគ្គលិកធ្វើការពុំសូវកើតឡើងនៅក្រុមហ៊ុនធំៗទេ គឺក្រុមហ៊ុនខ្នាតតូច និងមធ្យម ខ្វះខាតបុគ្គលិកច្រើនជាងក្រុមហ៊ុនធំ ។ ភ្នាក់ងារស្រាវជ្រាវយល់ឃើញថា បញ្ហានេះអាចធ្វើឱ្យក្រុមហ៊ុនដួលរលំជាបន្តបន្ទាប់ ខណៈកាលពីឆ្នាំ២០២៤ ក្រុមហ៊ុនជប៉ុនបានដួលរលំយ៉ាងច្រើន ៕

ជាធម្មតាពីធីបុណ្យស.ព គឺមិនមែនជាពិធីជួបជុំសប្បាយនោះទេ ការធ្វើពិធីនេះឡើងគឺក្នុងអត្ថន័យផ្ដល់ការគោរព និងជាការជួបជុំលាគ្នារវាងបងប្អូនសាច់ញាតិ ជាមួយអ្នកដែលបានស្លា.ប់ ហើយចំពោះការរៀបចំក៏មានច្រើនបែបទៅតាមជាតិសាសន៍ រឺជំនឿសាសនានានា។

ដោយឡែក គេកត់សម្គាល់ឃើញ “ហ្កាណា” គឺជាប្រទេសមួយដែលមានការប្រាព្ធពិធីបុណ្យស.ពនេះរៀងខុសប្លែកពីគេបន្តិច ដោយមើលមួយភ្លែតស្មានថាជាពិធីជប់លៀង ព្រោះអ្នកចូលរួមមានការច្រៀងរាំព្រមទាំងតុបតែងខ្លួនយ៉ាងស្រស់ស្អាតក្នុងការចូលរួម។ បើតាមទិន្នន័យបានអោយដឹងថា ការរៀបចំពីធីបុណ្យស.ពនៅហ្កាណា ត្រូវចំណាយអស់ប្រាក់ច្រើនជាងការរៀបមង្គលការទៅទៀត។

នៅតាមតំបន់ខ្លះទៀតនៃប្រទេសនេះយើងឃើញថា គេបានរៀបចំដាក់សា.កស.ពអោយអង្គុយ រឺឈរធ្វើកាយវិការណាមួយដែលពួកគេតែងធ្វើប្រចាំថ្ងៃ។ ឧទាហរណ៍ដូចជា៖ ដាក់អោយសា.កស.ពជិះម៉ូតូ អង្គុយពាក់វ៉េនតាខ្មៅ រឺឈរធ្វើស្ទាយជាដើម។ ចំពោះមូលហេតុនៃការរៀបចំសា.កស.ពបែបនេះ គឺដើម្បីរំលឹកទៅដល់របៀបប្រើប្រាស់ជីវិតរបស់អ្នកស្លា.ប់ទៅកាលពួកគេនៅរស់ និងដើម្បីអោយសាច់ញាតិមានអារម្មណ៍ថាសមាជិកគ្រួសាររបស់ពួកគេនៅក្បែរពួកគេដូចដើម។

ក្រៅពីនេះក៏មានតំបន់ខ្លះទៀត គេរៀបចំពិធីបុណ្យស.ពដោយមានតុបតែងម.ឈូសជារូបរាងប្លែក ទៅតាមមុខរបរ ការងារ រឺអ្វីដែលអ្នកស្លា.ប់ស្រលាញ់កាលនៅមានជីវិត។ ហើយការធ្វើបែបនេះ គេយល់ថាសាច់ញាតិពួកគេដែលស្លា.ប់ទៅនោះនឹងស្ងប់ចិត្តព្រោះបានទៅជាមួយនឹងអ្វីដែលគេស្រលាញ់។

សរុបជារួមមក នេះគឺជាជំនឿសានា និងប្រពៃណីទំនៀមទម្លាប់របស់ប្រទេសប៉ុណ្ណោះ មិនមែនបានន័យថាគេមិនស្រលាញ់ រឺមិនសោកស្ដាយចំពោះការបាត់.បង់សមាជិកគ្រួសាររបស់គេនោះទេ ហើយអត្ថន័យរបស់ពិធីបុណ្យ.ពសម្រាប់គេគឺ ការអបអរចំពោះជីវិតដែលគេមាន ការបញ្ចប់នឹងចាប់ផ្ដើមមកវិញ ការជួបនៃសមាជិកគ្រួសារ និងការបង្ហាញពីអរិយធម៌របស់ពួកគេ៕

សហរដ្ឋអាមេរិក ៖ សារព័ត៌មាន BBC រាយការណ៍ថា កាលពីរសៀលថ្ងៃទី១៣ ខែមីនា ឆ្នាំ២០២៥ ពេលយន្តហោះរបស់ក្រុមហ៊ុនអាកាសចរណ៍ American Airlines កំពុងចុះចតនៅអាកាសយានដ្ឋានអន្តរជាតិ Denver ស្ថិតក្នុងរដ្ឋខូឡូរ៉ាដូ សហរដ្ឋអាមេរិក ស្រាប់តែមានភ្លើងឆេះបាតយន្តហោះបណ្តាលឱ្យហុយផ្សែងយ៉ាងច្រើន ។ ហេតុនេះ ធ្វើឱ្យអ្នកដំណើរជាង១០០នាក់ ប្រជ្រៀតគ្នាឡើងលើស្លាបភ្លាមៗដើម្បីសុវត្ថិភាព ។

បើតាមរូបភាព គេបានឃើញអ្នកដំណើរជាច្រើននាក់កាន់សម្ភារៈ និងវ៉ាលិសតាមខ្លួនប្រជ្រៀតគ្នាឡើងលើស្លាបយន្តហោះ American Airlines ដើម្បីគេចពីសេចក្តីស្លាប់ ។ បុគ្គលិកអាកាសចរណ៍បានផ្តល់ Slides (ជាឧបករណ៍អណ្តែតលើខ្យល់) មកឱ្យអ្នកដំណើរសម្រាប់ទម្លាក់ខ្លួនចុះមកក្រោមដោយសុវត្ថិភាព ។

រដ្ឋបាលអាកាសចរណ៍អាមេរិក (FAA) បញ្ជាក់ថា នឹងស៊ើបអង្កេតរកមូលហេតុនៃការឆេះបាតយន្តហោះ ។ យន្តហោះនេះបានចាកចេញពីទីក្រុងនៅក្បែររដ្ឋខូឡូរ៉ាដូ សំដៅទៅអាកាសយានដ្ឋានអន្តរជាតិ Dallas Fort Worth នៅរដ្ឋតិចសាស់ ប៉ុន្តែយន្តហោះក៏បានផ្លាស់ប្តូរគោលដៅទៅកាន់អាកាសយានដ្ឋានអន្តរជាតិ Denver វិញ ក្រោយពីភ្នាក់ងារបច្ចេកទេសរាយការណ៍ថា ម៉ាស៊ីនយន្តហោះមានបញ្ហា ។

អ្នកនាំពាក្យក្រុមហ៊ុនអាកាសចរណ៍ American Airlines និយាយមកកាន់ប្រព័ន្ធផ្សព្វផ្សាយថា កាលពីរសៀលថ្ងៃទី១៣ ខែមីនា ភ្លើងបានឆេះយន្តហោះ Boeing 737-800 ដោយសារម៉ាស៊ីនយន្តហោះញ័រខ្លាំង ពេលយន្តហោះចុះចតនៅច្រកទ្វារ C38 ។ សំណាងល្អ ភ្នាក់ងារពន្លត់ភ្លើងអាចគ្រប់គ្រងស្ថានការណ៍បាន និងពុំបណ្តាលឱ្យអ្នកដំណើររងរបួស ។

យន្តហោះនេះមានអ្នកដំណើរចំនួន១៧២នាក់ ព្រមទាំងបុគ្គលិកអាកាសចរណ៍ ចំនួន៦នាក់ មនុស្សទាំងអស់ត្រូវបានជម្លៀសចេញពីយន្តហោះយ៉ាងមានសុវត្ថិភាព និងគ្មានអ្នកណារងរបួសទេ ។ យើងសូមអរគុណបុគ្គលិកអាកាសចរណ៍, ភ្នាក់ងារអាកាសយានដ្ឋានអន្តរជាតិ Denver និងអរគុណភ្នាក់ងារសង្គ្រោះបន្ទាន់ ដែលអាចដោះស្រាយបញ្ហាយ៉ាងឆាប់រហ័ស ដោយផ្តល់ភាពសំខាន់លើសុវត្ថិភាពមនុស្សទាំងអស់លើយន្តហោះ ។

វាជាហេតុការណ៍ភ្លើងឆេះយន្តហោះលើកចុងក្រោយបង្អស់ រហូតធ្វើឱ្យអ្នកដំណើរសួរពីសុវត្ថិភាពលើយន្តហោះអាមេរិក ខណៈកាលពីថ្ងៃទី២៩ ខែមករា កន្លងមក ធ្លាប់កើតហេតុការណ៍យន្តហោះក្នុងតំបន់របស់ក្រុមហ៊ុនអាកាសចរណ៍ American Airlines បុកគ្នាជាមួយឧទ្ធម្ភាគចក្រកងទ័ព ដែលបណ្តាលឱ្យមនុស្សស្លាប់ រហូតដល់៦៧នាក់ ៕

ធ្លាប់តែឮចាស់ៗហៅយន្តហោះថាជាកប៉ាល់ហោះ តែឥឡូវនេះកប៉ាល់ចេះហោះមែន កប៉ាល់កូនកាត់យន្តហោះអគ្គិសនីដែលមានឈ្មោះថា Viceroy Seaglider អាចរត់នៅលើទឹកដោយប្រើអ៊ីដ្រូហ្វូល ឬហោះហើរក្នុងរយៈកម្ពស់ពី ៩ ទៅ ១៨ ម៉ែត្រពីលើទឹកដោយជោគជ័យ។

Viceroy Seaglider គឺជាកប៉ាល់កូនកាត់យន្តហោះអគ្គិសនី ដែលផលិតដោយក្រុមហ៊ុន Regent Craft របស់អាមេរិក បានចាប់ផ្តើមធ្វើតេស្តសាកល្បងដឹកអ្នកដំណើរលើកដំបូងដោយជោគជ័យ ជាមួយនឹងគំរូយន្តហោះដែលមានទំហំពេញ ដោយបង្ហាញពីគំនិតរបស់ក្រុមហ៊ុនសម្រាប់ប្រភេទកប៉ាល់ធ្វើដំណើរតាមសមុទ្រ។

កប៉ាល់កូនកាត់យន្តហោះអគ្គិសនី Viceroy Seaglider មានសមត្ថភាពផ្ទុកអ្នកដំណើរ ១២ នាក់ និងសមាជិកនាវិកពីរនាក់ រួមទាំងអាចដឹកទំនិញបានប្រហែល ១,៦០០ គីឡូក្រាម ក្នុងល្បឿនជិះទូក ៣០០ គីឡូម៉ែត្រក្នុងមួយម៉ោង។ កប៉ាល់នេះក៏អាចរត់លើទឹកដោយប្រើអ៊ីដ្រូហ្វូល ឬហោះហើរក្នុងរយៈកម្ពស់ពី ៩ ទៅ ១៨ ម៉ែត្រពីលើទឹកទៀតផង នេះបើយោងតាមគេហទំព័របរទេស New Atlas ដែលបានរាយការណ៍កាលពីថ្ងៃទី ១០ ខែមីនា ឆ្នាំ២០២៥។

កាលពីខែកញ្ញាឆ្នាំមុន ក្រុមហ៊ុន Regent Craft បានទទួលការយល់ព្រមពីឆ្មាំឆ្នេរសមុទ្រអាមេរិក ដើម្បីសាកល្បងគំរូនេះ ហើយឥឡូវនេះយើងបានធ្វើតេស្តដោយជោគជ័យ។ គំរូកប៉ាល់កូនកាត់យន្តហោះអគ្គិសនី មានទំហំដូចនឹងកំណែផលិតនាពេលអនាគត ដែលមានប្រវែង ១៦,៨ ម៉ែត្រ និងស្លាបប្រវែង ១៩,៨ ម៉ែត្រ។ ការសាកល្បងថ្មីនេះបានសរបញ្ជាក់ឱ្យឃើញ ពិភពលោកកាន់តែជឿនលឿនហើយ ដោយមានបច្ចេកទំនើបៗជាច្រើនគ្រោងនឹងដាក់ដំណើរការនាពេលអនាគត។

ការសាងសង់ និងអភិវឌ្ឍកប៉ាល់កូនកាត់យន្តហោះអគ្គិសនីនេះ ក៏មានគោលបំណងដឹកជញ្ជូនអ្នកដំណើររវាងកោះត្រូពិច ក៏ដូចជាដឹកជញ្ជូនទំនិញ និងជួយក្នុងការឆ្លើយតបទៅនឹងភាពអាសន្ននានាផងដែរ។ យោងតាមក្រុមហ៊ុន កប៉ាល់ហោះ Viceroy Seaglider បច្ចុប្បន្នគឺទទួលបានការបញ្ជាទិញយ៉ាងច្រើនជុំវិញពិភពលោក ជាមួយតម្លៃជាង ៩ ពាន់លានដុល្លារក្នុងមួយគ្រឿង៕

ប្រទេសឥណ្ឌូណេស៊ី ៖ កាលពីថ្ងៃទី១១ ខែមីនា ឆ្នាំ២០២៥ សារព័ត៌មាន BBC រាយការណ៍ថា នារីមូស្លីមម្នាក់ឈ្មោះ Ratu Thalisa គឺជាតារា TikTok ដ៏ល្បីល្បាញ ដែលមានអ្នកតាមដាន TikTok របស់នាង រហូតដល់៤៤ម៉ឺន២ពាន់នាក់ ត្រូវបានតុលាការឥណ្ឌូណេស៊ីកាត់ក្តីឱ្យជាប់ពន្ធ.នាគារជិត៣ឆ្នាំ ក្រោយពីគ្រិស្តសាសនិកជន ចោទប្រកាន់ថា នាងនិយាយប្រមា.ថ សាសនាគ្រិស្តក្នុងបណ្តាញសង្គម និងឱ្យព្រះយេស៊ូទៅកាក់សក់ ។

តុលាការនៅខេត្តសុម៉ាត្រាខាងជើង បានកាត់ក្តីឱ្យស្ត្រីឈ្មោះ Thalisa ដែលទទួលការវះកាត់ប្តូរភេទ ជាប់ពន្ធនាគាររយៈពេល ២ឆ្នាំ ១០ខែ ដោយសារនាងបានផ្សព្វផ្សាយពីការស្អប់ខ្ពើមសាសនាគ្រិស្តក្នុងបណ្តាញសង្គម ។ ប៉ុន្តែការកាត់ក្តីរបស់តុលាការបានធ្វើឱ្យមន្ត្រីសិទ្ធិមនុស្សអន្តរជាតិរិះគន់យ៉ាងខ្លាំងថា វាជាការរំលោភសិទ្ធិបញ្ចេញមតិក្នុងបណ្តាញសង្គម ។

ការនិយាយរបស់ Thalisa ធ្វើឱ្យអ្នកគោរពគ្រិស្តសាសនាពុំយល់ស្រប និងចាត់ទុកថា នាងមើលងាយសាសនា ។ មុនពេលនាងត្រូវបានតុលាការកាត់ក្តីឱ្យជាប់ពន្ធនាគារ គឺមានគ្រិស្តសាសនិកជនមួយក្រុមដាក់ពាក្យបណ្តឹងទៅសមត្ថកិច្ច ឱ្យចាត់វិធានការនាងតាមផ្លូវច្បាប់ពីបទប្រមាថសាសនា ។ ពីដំបូង តុលាការបានកាត់ក្តីឱ្យ Thalisa ជាប់ពន្ធនាគារត្រឹមតែ២ឆ្នាំ ក្រោយមក តុលាការក៏បានបន្ថែមទោស ១០ខែទៀត សរុបគឺ ២ឆ្នាំ ១០ខែ ។ តុលាការបានទុកពេលឱ្យនាង១សប្តាហ៍ ដើម្បីប្តឹងទៅតុលាការឧទ្ធរណ៍ ។ នេះបើតាមការលើកឡើងរបស់ចៅក្រម ។

ចំណែកមន្ត្រីសិទ្ធិមនុស្សអន្តរជាតិបានថ្កោលទោសការកាត់ក្តីរបស់តុលាការថា វាជាការរំលោភសិទ្ធិសេរីភាពបញ្ចេញមតិរបស់ Thalisa ហើយពួកគេបានអំពាវនាវឱ្យរដ្ឋាភិបាលឥណ្ឌូណេស៊ីជួយអន្តរាគមន៍រឿងក្តីនេះ និងឱ្យតុលាការដោះលែង Thalisa ជាបន្ទាន់ ។

ឥណ្ឌូណេស៊ីបានអនុវត្តច្បាប់គ្រប់គ្រងពលរដ្ឋប្រើប្រាស់បណ្តាញសង្គមតាំងពីឆ្នាំ២០០៨ ហើយច្បាប់នេះត្រូវបានកែសម្រួលនៅឆ្នាំ២០១៦ ។ ប៉ុន្តែមន្ត្រីសិទ្ធិមនុស្សអន្តរជាតិបង្ហាញក្តីបារម្ភថា វានឹងបណ្តាលឱ្យមានការតល្មើសសេរីភាពពលរដ្ឋក្នុងការបញ្ចេញមតិតាមបណ្តាញសង្គម ។ តាមទិន្នន័យរបស់អង្គការលើកលែងទោសអន្តរជាតិ គឺមានពលរដ្ឋឥណ្ឌូណេស៊ី ចំនួន៤២១នាក់ ត្រូវបានតុលាការកាត់ទោសដោយសារការបញ្ចេញមតិក្នុងបណ្តាញសង្គម ចាប់ពីឆ្នាំ២០១៩ ដល់ឆ្នាំ២០២៤ ៕