ទីក្រុងតូចមួយបានបំផុសខ្លួនឡើងជាមួយទេសភាពស្រស់ស្អាតប្លែកភ្នែកកណ្ដាលវាលខ្សាច់ធំល្វឹងល្វើយ បានទាក់ទាញចំណាប់អារម្មណ៍មនុស្សទូទាំងពិភពលោកអោយចង់មកទស្សនាដោយផ្ទាល់ ព្រមទាំងផ្ដល់ជាចម្ងល់ជាច្រើនផងដែរថាវាមានពិត ឬជាការកាត់ត ព្រោះវាចម្លែកណាស់ដែលទីក្រុងមួយបែរជាកសាងឡើងនៅកណ្ដាលវាលខ្សាច់ដូចនេះ។

ជាការពិតណាស់! ទីក្រុងនេះមានឈ្មោះថា ហ៊ូអាកាឈីណា (Huacachina) មានទីតាំងស្ថិតនៅក្បែរទីក្រុង “អ៊ីកា” ក្នុងប្រទេសប៉េរូ។ វាជាភូមិតូចមួយដែលមានប្រជាជនរស់នៅត្រឹម ១០០នាក់ប៉ុណ្ណោះ ប៉ុន្តែទាក់ទាញភ្ញៀវទេសចររាប់ពាន់នាក់ក្នុងមួយឆ្នាំៗ។ សំណួរសួរថា តើអ្នកណាជាអ្នកកសាងវាឡើងមក ហើយចាប់តាំងពីពេលណា?

សម្រាប់ទេសភាពរបស់វាដែលមានដូចជាបឹង និងដើមឈើដុះព័ទ្ធជុំវិញនោះ គឺមិនមាននរណាបង្កើតវាឡើងមកនោះទេ ពោលគឺបឹង និងរុក្ខជាតិភាគច្រើននៅទីនោះកើតឡើងដោយធម្មជាតិតាំងពីរាប់ពាន់ឆ្នាំមុនមកម្ល៉េះ ប៉ុន្តែក្រោយមកខ្ទង់ឆ្នាំ១៩០០ ក៏មានមនុស្សរកឃើញទីតាំងនេះ ហើយពួកគេក៏បានតាំងទីរស់នៅជាបន្តបន្ទាប់។ ក្រោយៗមកទៀត ដោយយល់ឃើញថាទីនេះមានបរិយាកាសអំណោយផលពីធម្មជាតិល្អ វាបានក្លាយជាកន្លែងរបស់ក្រុមអ្នកមានអំណាចនៅប្រទេសប៉េរូសម្រាប់លម្ហែរកាយ ហើយគេជឿថាទឹកដីនេះមានប្រសិទ្ធភាពក្នុងការព្យាបាលជំងឺជាច្រើន។

ដោយការអភិវឌ្ឍន៍ចេះតែបន្ត បច្ចុប្បន្នគេបានកសាងអូតែ រីសត និងភោជនីយដ្ឋានជាហូរហែ ហើយវាបានក្លាយជាកន្លែងដ៏ពេញនិយមសម្រាប់ភ្ញៀវទេសចរមកពីជុំវិញពិភពលោក។ សកម្មភាពកម្សាន្តជាច្រើននៅទីនេះមានដូចជា៖ ជិះឡាន រឺជិះស្គីលើជម្រាលខ្សាច់, ជិះទូកមើលទេសភាព, ទស្សនាថ្ងៃលិច, ញ៉ាំអាហារ និងភេសជ្ជៈប្រចាំតំបន់ រួមទាំងសកម្មភាពផ្សេងៗទៀត។

យ៉ាងណាមិញ ថ្វីត្បិតមានភ្ញៀវទេសចរទៅកម្សាន្តរាប់ពាន់នាក់ក្នុងមួយឆ្នាំៗក្ដី ប៉ុន្តែថ្មីៗនេះរដ្ឋាភិបាលកំពុងព្រួយបារម្ភពីស្ថានភាពរបស់ទឹកបឹង ខណៈអាកាសធាតុមានការប្រែប្រួលហើយទឹកបឹងចាប់ផ្ដើមរីងស្រក ដូច្នេះវិធីតែមួយគត់ដើម្បីរក្សាបឹងនេះអោយនៅមានជីវិត គឺគេត្រូវបូមទឹកពីទីក្រុង អ៊ីកា មកបញ្ចូលទៅក្នុងបឹងនេះជាប់ជានិច្ច៕

ប្រទេសអ៊ីរ៉ង់ ៖ បាតុភូតធម្មជាតិដ៏ចម្លែកមួយបានធ្វើឱ្យមនុស្សម្នាភ្ញាក់ផ្អើលយ៉ាងខ្លាំង និងបារម្ភថា វាជាប្រផ្នូលប្រាប់ពីហេតុការណ៍អាក្រក់កើតឡើង គឺក្រោយពីភ្លៀងធ្លាក់ខ្លាំងបានធ្វើឱ្យឆ្នេរខ្សាច់ និងទឹកសមុទ្រនៅកោះមួយរបស់ប្រទេសអ៊ីរ៉ង់ ប្រែជាពណ៌ក្រហមស្រស់ដូចឈា.ម ។

កាលពីថ្ងៃទី១២ ខែមីនា ឆ្នាំ២០២៥ សារព័ត៌មានបរទេសរាយការណ៍ថា ប្រជុំកោះ Hormuz របស់ប្រទេសអ៊ីរ៉ង់ ស្ថិតនៅឈូងសមុទ្រ Persian បានធ្វើឱ្យពលរដ្ឋរស់នៅក្នុងតំបន់ និងភ្ញៀវទេសចរបរទេសភ្ញាក់ផ្អើលយ៉ាងខ្លាំង ពេលពួកគេឃើញបាតុភូតធម្មជាតិដ៏ចម្លែក គឺភ្លៀងធ្លាក់ខ្លាំងបណ្តាលឱ្យឆ្នេរខ្សាច់ និងទឹកសមុទ្រក្លាយជាពណ៌ក្រហម មិនខុសគ្នាពីឈាម ។

ក្រោយពីអ្នកប្រើប្រាស់ Instagram ម្នាក់ឈ្មោះ «@hormoz_omid» បានបង្ហោះវីដេអូបាតុភូតធម្មជាតិនេះ ធ្វើឱ្យអ្នកលេងបណ្តាញសង្គមទូទាំងពិភពលោក ចម្លែកចិត្ត ហើយវីដេអូនេះមានចំនួនទស្សនារហូតរាប់លាននាក់ ។ ម្ចាស់វីដេអូចង់ចែករំលែករូបភាពឱ្យមនុស្សម្នាបានឃើញពីបាតុភូតធម្មជាតិនៅតាមបណ្តោយឆ្នេរខ្សាច់កោះរបស់អ៊ីរ៉ង់ ដែលក្លាយជាពណ៌ក្រហមស្រស់ ក្រោយពីភ្លៀងធ្លាក់ ។

បាតុភូតធម្មជាតិដ៏ចម្លែកបង្ហាញពីឱ្យឃើញពីបម្រែបម្រួលអាកាសធាតុនាពេលបច្ចុប្បន្ន ក្នុងវីដេអូ គឺមានទឹកពណ៌ក្រហមខាប់ធ្លាក់ពីលើច្រាំងថ្ម និងហូរចូលសមុទ្រ ស្របពេលមេឃកំពុងធ្លាក់យ៉ាងខ្លាំង ។ រូបភាពនេះធ្វើឱ្យភ្ញៀវទេសចរដែលមកកម្សាន្តនៅឆ្នេរខ្សាច់រំភើបចិត្តយ៉ាងខ្លាំង និងនាំគ្នាពាក់អាវភ្លៀងមកឈរមើលទិដ្ឋភាពដែលកម្របានឃើញ ។

ក្រៅពីនេះ មានបុរសម្នាក់ដើរចុះទឹកសមុទ្រ ដែលពណ៌ទឹកសមុទ្រ មិនខុសគ្នាពីឈាម ។ ទោះជាមើលទៅ ដូចជារូបភាពកាត់ត ប៉ុន្តែពលរដ្ឋក្នុងតំបន់អះអាងថា វាជាបាតុភូតធម្មជាតិកើតឡើងពិតប្រាកដ និងពុំមែនជារូបភាពកាត់តទេ ។

ទោះជាមនុស្សភាគច្រើនខ្លាចរូបភាពនេះ ប៉ុន្តែអ្នកជំនាញបកស្រាយថា វាជាបាតុភូតធម្មជាតិ គឺកើតឡើងពីកំហាប់ខ្ពស់របស់អ៊ីកស៊ីតជាតិដែក (Iron Oxide) ដែលមានបរិមាណយ៉ាងច្រើនក្នុងតំបន់ ។ ហេតុនេះ ទើបសារធាតុរ៉ែផ្សេងៗនៅក្នុងដីបានផ្សំគ្នាជាមួយទឹកសមុទ្រ បង្កើតទៅជាបាតុភូតធម្មជាតិដ៏ចម្លែក ហើយវាពុំមែនជាប្រផ្នូលហេតុការណ៍អាក្រក់អ្វីឡើយ ។

ក្រោយការបង្ហោះរូបភាពប្លែកភ្នែកក្នុងបណ្តាញសង្គម ធ្វើឱ្យភ្ញៀវទេសចរជាច្រើននាក់ប្រាថ្នាចង់មកឃើញភ្លៀងធ្លាក់នៅឆ្នេរខ្សាច់ក្លាយជាពណ៌ឈាមដោយផ្ទាល់ភ្នែកក្នុងមួយជីវិត ។ បច្ចុប្បន្ន រដ្ឋាភិបាលអ៊ីរ៉ង់អនុញ្ញាតឱ្យភ្ញៀវទេសចរមកកម្សាន្តឆ្នេរខ្សាច់នេះ និងទស្សនាទេសភាពដ៏ស្រស់ស្អាតលើកោះពេញមួយឆ្នាំ ៕

តៃវ៉ាន់ ៖ ក្រសួងការបរទេសតៃវ៉ាន់បានចេញសេចក្តីថ្លែងការណ៍មួយ ដើម្បីដាស់តឿនពលរដ្ឋរបស់ខ្លួនរស់នៅក្រៅប្រទេស ឬធ្វើដំណើរទៅបណ្តាប្រទេសជិតស្និទ្ធជាមួយចិន គឺត្រូវប្រយ័ត្នខ្លួន ឬប្រយ័ត្នរងការគំរា.មពីចិន ឬអាជ្ញាធរចិនចាប់សួរចម្លើយយកទៅកាត់ទោ.ស ជាពិសេស ក្រុមនិស្សិតតៃវ៉ាន់ និងក្រុមសកម្មជនដែលប្រឆាំងនឹងគោលនយោបាយដាក់បញ្ចូលតៃវ៉ាន់ជាទឹកដីមួយផ្នែករបស់ចិន ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៣ ខែមីនា ឆ្នាំ២០២៥ ។

កាសែត Taipei Times របស់តៃវ៉ាន់បានរាយការណ៍ដោយយោងតាមសេចក្តីថ្លែងការណ៍ជាផ្លូវការថា នាពេលថ្មីៗនេះ រដ្ឋាភិបាលតៃវ៉ាន់បានដាស់តឿនពលរដ្ឋរបស់ខ្លួនឱ្យប្រុងប្រយ័ត្នការពារសុវត្ថិភាពឱ្យខ្លាំង ពេលធ្វើដំណើរទៅបណ្តាប្រទេសជាមិត្តរបស់ចិន ដូចជា ៖ បណ្តាប្រទេសនៅតំបន់អាស៊ីអាគ្នេយ៍ និងក្រុមប្រទេសនៅទ្វីបអាហ្វ្រិក ។

ការដាស់តឿនពលរដ្ឋរបស់រដ្ឋាភិបាលតៃវ៉ាន់ គឺក្រោយពីរដ្ឋាភិបាលចិនបញ្ជាឱ្យស្ថាប័នពាក់ព័ន្ធពិនិត្យឯកសារ ចំនួន២២ច្បាប់ តាំងពីខែមិថុនា ឆ្នាំ២០២៤ ដើម្បីឱ្យតុលាការចិនកាត់ទោសប្រហារជីវិតក្រុមសកម្មជនទាមទារឯករាជ្យឱ្យតៃវ៉ាន់ ហើយចុងចោទពុំចាំបាច់បង្ហាញខ្លួននៅបន្ទប់សវនាការ ។ រដ្ឋាភិបាលចិនក៏បានអនុវត្តតាមឯកសារទាំង២២ច្បាប់ នៅបណ្តាប្រទេសជាមិត្តរបស់ចិនផងដែរ តាំងពីចុងខែកុម្ភៈ ឆ្នាំ២០២៥ ក្រោយពីធ្វើកិច្ចប្រជុំសម្ងាត់ ២ថ្ងៃ រវាងភ្នាក់ងារសន្តិសុខចិន និងទីប្រឹក្សាជិតស្និទ្ធបំផុតជាមួយប្រធានាធិបតីចិន លោក ស៊ី ជិនពីង ព្រមទាំងសមាជិកគណៈកម្មការនយោបាយគណបក្សកុម្មុយនិស្តចិន ។

ស្ថានទូត និងស្ថានីយប៉ូលិសចិននៅបណ្តាប្រទេសជិតស្និទ្ធជាមួយចិន នឹងបំពេញតួនាទីជំនួសរដ្ឋាភិបាលចិន ដើម្បីអនុវត្តតាមឯកសារទាំង២២ច្បាប់ ។ ហេតុនេះ តៃវ៉ាន់ចាំបាច់ត្រូវតែដាស់តឿនពលរដ្ឋដែលរស់នៅក្រៅប្រទេស ឬធ្វើដំណើរទៅបណ្តាប្រទេសជិតស្និទ្ធជាមួយចិន ឱ្យប្រយ័ត្នខ្លួន ។ រដ្ឋាភិបាលតៃវ៉ាន់បានដាស់តឿនពលរដ្ឋ កម្រិតពណ៌លឿង (គួរប្រុងប្រយ័ត្ន) និងកម្រិតពណ៌ទឹកក្រូច (គួរប្រយ័ត្នឱ្យខ្លាំង) ពេលធ្វើដំណើរទៅទីក្រុងហុងកុង និងម៉ាកាវ ។ រីឯពលរដ្ឋតៃវ៉ាន់ធ្វើដំណើរទៅបណ្តាប្រទេសក្នុងតំបន់អាស៊ីអាគ្នេយ៍ ក៏ទទួលការដាស់តឿនពីរដ្ឋាភិបាលដែរ ក្នុងកម្រិតពណ៌ទឹកក្រូច ៕

វិស័យទេសចរណ៍ពិតជាសំខាន់សម្រាប់ប្រទេសជាតិ ក្នុងការជម្រុញសេដ្ឋកិច្ច និងលើកមុខមាត់ប្រទេស ដូច្នេះហើយទើបបានជាប្រជាជនតាមប្រទេសនីមួយៗតែងតែស្វាគមន៍ និងទទួលភ្ញៀវទេសចរដែលទៅលេងប្រទេសគេយ៉ាងកក់ក្ដៅជានិច្ច។

ស្របពេលជាមួយគ្នានេះដែរ ប្រទេសអេស្ប៉ាញ មានប្រជាជនជាច្រើនបែរជាមិនពេញចិត្តក្នុងការមានអ្នកទៅកម្សាន្តនៅប្រទេសរបស់ពួកគេទៅវិញ ។
មិនត្រឹមតែមិនពេញចិត្តប៉ុណ្ណោះទេ តែពួកគេថែមទាំងបាននាំគ្នាធ្វើការតវ៉ាដើម្បីបណ្ដេញភ្ញៀវទេសចរផងដែរ ហើយ៣តំបន់ដែលផ្ទុះការតវ៉ាខ្លាំងនោះរួមមាន៖

១. កោះ Canary៖ ក្នុងខែមេសា ឆ្នាំ២០២៤ ការតវ៉ាដ៏ធំសម្បើមរបស់ប្រជាជនចន្លោះពី ២០,០០០ ទៅ៥០,០០០នាក់ ដើម្បីធ្វើបាតុកម្មដើម្បីអោយមានការដោះស្រាយពីផលអវិជ្ជមាននៃកំណើនភ្ញៀវទេសចរលើសកម្រិត។ ពួកគេយល់ថា ការកើនឡើងនៃចំនួនភ្ញៀវទេសចរបានធ្វើឲ្យប៉ះពាល់ដល់សេវាសាធារណៈ ទំនិញឡើងថ្លៃ ផ្ដល់ការរំខានដល់បរិស្ថាន និងហេតុផលផ្សេងៗទៀត។

២. កោះ Balearic ៖ កាលពីខែឧសភា ឆ្នាំ២០២៤ ប្រជាជនប្រហែល ១០,០០០នាក់ ធ្វើការតវ៉ាលើហេតុផលស្រដៀងគ្នានេះ។ សកម្មជនតវ៉ា បានទាមទារអោយរដ្ឋាភិបាលតម្លើងតម្លៃទំនិញសម្រាប់ជនបរទេស បញ្ឃប់ការអភិវឌ្ឍន៍កន្លែងទេសចរណ៍ថ្មីៗ និងហាមផ្សព្វផ្សាយពីតំបន់ទេសចរណ៍ទៅកាន់ប្រទេសផ្សេងដោយគ្មានការអនុញ្ញាតពីប្រជាជនតំបន់នោះ។

៣. ទីក្រុងBarcelona៖ នៅខែកក្កដា ឆ្នាំ២០២៤ ប្រជាជនប្រមាណ ៣,០០០នាក់បាននាំគ្នាធ្វើការតវ៉ានៅក្នុងទីក្រុង Barcelona។ ប្រជាជនទាំងនោះបាននាំគ្នាសរសេអក្សរដាក់លើជញ្ជាំងតាមផ្លូវសាធារណៈជាច្រើនកន្លែងដែលមានន័យដូចជា “ទៅផ្ទះរបស់អ្នកវិញទៅ!” រឺ “ភ្ញៀវទេសចរបានធ្វើអោយរញ៉េរញ៉ៃទីក្រុងរបស់យើង”។ លើសពីការតវ៉ាលើរដ្ឋាភិបាល ប្រជាជនទាំងនោះបានយកកាំ.ភ្លើងទឹកទៅបា.ញ់ភ្ញៀវទេសចរដែលកំពុងអង្គុយនៅក្នុងហាង រឺផ្លូវសាធារណៈអោយពួកគេរត់ចែកជើងគ្នាអស់។

ទាក់ទងការតវ៉ារបស់តំបន់ទាំង៣ខាងលើ រដ្ឋាភិបាលប្រទេសអេស្ប៉ាញបានយល់ព្រមក្នុងការកំណត់ចំនួនភ្ញៀវទេសចរដែលអាចមកកម្សាន្តក្នុងប្រទេសរបស់ខ្លួនក្នុងរយៈពេលណាមួយដើម្បីកាត់បន្ថយការកកកុញនៃមនុស្សច្រើនពេក។ លើសពីនេះគេបានកាត់បន្ថយពន្ធពីប្រជាជនរបស់ខ្លួន រួចតម្លើងពន្ធសម្រាប់ភ្ញៀវទេសចរវិញ។ ហើយបច្ចុប្បន្នប្រទេសនេះមានស្ថានភាពធម្មតាវិញហើយ និងបើកទទួលភ្ញៀវទេសចរអោយចូលកម្សាន្តបានគ្រប់តំបន់ដោយមិនមានការតវ៉ាអ្វីទៀតឡើយ។